رواية بنات راعي البقر
الفصل الثالث3
بقلم مريم اليوسف
كتير اوقات بناخد قرارات ونحنا بحالة فزع وخوف ع حدا بنحبو وبنعوف الدنيا كرمال هو يكون بخير ... بس لما بترجع الامور طبيعية ونشوفو بخير .. بنفكر بينا وبين حالنا انو ماكان بدها هالتنازل ...و متل مابقولو بتروح السكرة وبتجي الفكرة .
•
عند المغرب
راجع ابو بدر ومرتو ع البيت ومع دخولن كانو عم يحكو: الله لايضرو شب متل الوردة
صباح : انت شفت كيف السيارة من قدام بتحسها معجونة عجن
ابو بدر :منيح طلع منها عايش
طلعة شمس من المطبخ وحكت :عن مين عم تحكو ... شو صاير بالضيعة
صباح :ليش ماخبرتو
مع طلعت قمر ونجمة من الغرفة التانية :لا ماخبرنا ... بس حسينا في حركة مو طبيعة سيارات رايحة جاية .. شو القصة
صباح :عم يقولو جواد المكنيكي ... قال عم يجرب سيارة بعد ماصلحها وعمل حادث فيها ...
قمر :شووو
صباح :اي والله يابنتي ... انا وابوكي مرينا من جنب مكان الحادث العالم فوق بعضها عم تتفرج ... السيارة مطحونة طحن ... منيح طلع عايش
نجمة انتبهت ع اختها وسندتها بدون محدا يحس وقالت :الله يشفيه ويعافيه .. تعي قمر شوي
سحبتها ودخلت لجوا وشمس تابعت بالأسئلة : مين اسعفوا كيف طلعوه من السيارة
وقمر جوا قاعدة ع الارض وايدها على صدرها
قمر :نااار يا اختيي نااار وبصدري... مشان الله طمنوني عنو ... يارب ماتضرو ... يااارب ... يااارب
نجمة : طولي بالك ... عم يقولو عايش ...
قمر :يااارب ... ياااارب
طبت على رجليها وصارت تبكي : انا مرتو وماقادرة اطمن عنو ولا كون جنبوو ... ياربي .. ياربي ... يارب انا ضعيفة مابقدر على هاد ... يارب ..
نجمة : لا تخافي الا مانلاقي طريقة نتواصل معن
قمر : اي جبتيها رح اتصل بفاروق
~~~~~~~~~~~~~~•
بالمشفى
الكريدور عم يضج بالناس والعالم ... عيلة اهل جواد من العيل الكبيرة بالضيعة ونص اهل الضيعة جاي لتطمن على جواد واذا حدا بيقدر يساعد
طلع الدكتور والممرضة من غرفتو والكل تجمع حواليه ام جواد حكت بعيون باكية : مشان الله يا دكتور طمنا عنو
الدكتور : لا تخافو وضعو تمام ... شوية جروح بوجهو وكسر بأيدو ولنطمن صورنا راسو الحمد لله سليم .. كان عندو نزيف حاد من انفو خفنا يكون معو نزيف داخلي او كسر بالجمجمة .. بس الحمد لله كلو طلع سليم .
الكل :اي الحمد لله
الدكتور :لو سمحتو هلق خففو عجقة وليفيق بخلي الممرضة تدخلكن لعندو
رن تلفون فاروق وراح ع جنب يرد
~~~~~~~~~~~~~~~•
بلش يفتح عيونو بتعب وصار يتلفت حوليه ... هالمكان غير مألوف عليه ... كان عم يتخيل انو عم يشوف منام بس طلع حقيقة وكان اغلب وقتو بين الفايق والنايم وفهم كلشي صار معو
جواد :اااااه راسي
انفتح الباب ودخلت امو ... ركضت لعندو ومسكتلو ايدو وصارت تبوسو منها : سلامة قلبك ياروحي ... سلامة عمرك يا عمري ... ليش عم تعمل فيني هيك ... مشان الله يا امي لا تعذبني وتلوع قلبي عليك
جواد :اسف ... اسف اني خوفتكن
امو : الحمد لله هيك ولا غيرو ... قلي شوبدك لأعملك وتكون رضيان ... بس انت لا تزعل وتعصب وتتهور ... بدك هديك البنت براسي بروح بخطبلك اياها .. المهم ما انحرم منك يا ضو عيوني
جواد : عم تحكي جد
امو :اي والله جد ... انا تخيلت اني خسرتك كنت رح موت بس رب العالمين كبير وردلي اياك .. وماني مستعدة اخسرك مرة تانية انت بس قلي شوبدك وبيحضر عندك
جواد : الله لايحرمني منك يارب
امو :من انت وصغير وانا مارديتلك طلب كلشي كان بدك اياه كنت جبلك اياه وكنت عارض ابوك المهم ما ازعلك ... كان يقلي عم تنزعيه لهل الولد وانا مارد ... كان بدو اياك تشتغل بالارض وانت كان بدك تفتح ورشة بعت دهباتي وفتحتلك ورشة لانو هو رفض يساعدك ... ورح ضل ادعمك لموت .. خلص هي البنت عاجبتك بروح بخطبلك اياها
اثر فيه كلام امو كتير واتذكر كيف عطول واقفة جنبو وتشجعو .. الا ع جازتو من قمر
باس ايدها وقال :سامحيني ... سامحيني لأني خوفتك علي ... بوعدك من هون ورايح اذا شي مو رضيانة عنو مابعملو
اندق الباب ودخل فاروق وفورا بلش يمسحو دموعن
ابتسم جواد وقال :اهلين فاروق تعا تعا
قرب فاروق ووقف جنبو وقال الحمد لله عسلامتك خوفتنا عليك
جواد :الله يسلمك ...نصيبنا
ام جواد: انا طالعة جيب مي
طلعت وفاروق قعد مكانها وقال :انت مابتفهم يعني .. كيف هيك بتقوم وبتطير ... كنت رح جن وخصوصا انو حسيت الحق علي ... انا شوبدي بهل السوالف ... شوبدي لكون نقال حكي
جواد :خلص حصل خير
فاروق :ايه خير يصيبك والله
جواد :هههههه والله مابتقصر لولا ستر الله وانت كنت الله اعلم شو صار فيني
فاروق :ااااخ منك بس
جواد :ما اتصلت
فاروق :مابعرف ومادخلني تستطفل منك الها
جواد :عنجد ولو ما اتصلت ؟
فاروق :لاا انا لعندي محدا اتصل وتلفونك مع اهلك
جواد :معقول ماخبرت فيني
فاروق :مابعرف
جواد : امي قالتلي بروح بخطبلك اياها وشو مابدي رح يصير خافت انها تخسرني بالحادث
فاروق : اي ان شاء الله خير خبر حلو الله يكملها معك
جواد :بعد حكيها انردتلي الروح ومو حاسس بأي وجع
فاروق :اي تمام
جواد :عطيني تلفونك شوي اتصل فيها
فاروق :ما تحكي من تلفونك
جواد :ماحاظرتني من كل جهات الاتصال
مدلو التلفون
وبلش يكتب الرقم ليظهر قدامو فورا بالسجل والاتصال كان من ربع ساعة ومدة الاتصال خمس دقايق
جواد :ليش عم تكذب وتقول ما اتصلت
فاروق : هية وصتني ... خلص اطمنت عليك ومشي الحال
جواد :اي منيح خود مارح اتصل فيها عمهل لحتى اطلع
فاروق :وبركي امك عم تقول هيك لأنها هلق خايفة عليك وبكرا بس تشوفك صرت منيح توعى على حالها ترجع لموقفها
جواد :يارب مايصير هيك
فاروق :لنفترض صار شو رح تعمل
جواد :........
فاروق : صدقني مارح تكون مبسوط لا انت ولا هية
جواد :ليش حاسك متأكد من حكيك
فاروق :لا مافي شي بس انو مثال ... بدك تحط كل الاحتمالات ... ولاتنسى قمر رافضة الفكرة لأنو عارفة حتى لو قبلوا فيها مارح يتقبلوها وتعيش طول عمرها متل الغريبة
جواد : لوقتها لشوف شو بصير ... معد فيني ضل هيك بالنص ... خلص رح اخد القرار المناسب ... وامي مستحيل ازعلها ... امي كتير ضحت بهل الحياة كرمالي مافيني كب كل شقى هالعمر هيك بس لأ انا متأكد امي مارح تخذلني هالمرة بحياتها ماخذلتني
فاروق :يارب
~~~~~~~~~~~~~~~•
بعد عدة ايام
بالارض عم يشتغلوا العمال اليوم بقطف الخوخ
شمس بشغلها ومع البنات وقمر كان حكيها قليل هالفترة
قربت سمر من شمس وسألتها : دخلك شو صار بهداك الشب يلي عمل حادث من كم يوم
شمس :والله مابعرف قالو منيح
امل : شموس ... كأنو الشب الحلو صرلو يومين ما اجا
شمس :ايو شب حلو
امل : فاروق
شمس : كمان مابعرف
سمر : يا الله شو عنكن شباب حلوين بهل الضيعة
شمس : اي لاتغرك المظاهر ... وبعدين انت وين شفتي شباب الضيعة
سمر :كل يوم بنتمشى انا وامل بالضيعة
شمس :اي انتبهو اهل الضيعة مابحبو هالحركات
سمير عطى ادنو عالسالفة
امل :كيف يعني
شمس :مابحبو الغرب يتفتلو بالضيعة كتير احسن مايقلعوكن
سمر :عم تحكي جد
شمس :والله .
سمر :اي خلص معد نمشي بالمرة
شمس :مو هيك اذا بدكن تقضو شي غرض مابأثر بس مابحبو الحركة الكتيرة
امل :غريب والله
شمس :صرلي عمر معاشرتن وماعم افهم عليهن .. شيلنا منهن يوه
امل :طيب اذا تمشينا معك بأثر شي
شمس :هههه عأساس انا على راسي ريشة
سمر :بس والله عم تضيق خلاقنا
شمس : في تلة ورا الضيعة ابي عندو فيها مزرعة بقر بنروح لهنيك منو محدا الو عنا ومنو هوايات حلوين
امل :بس نحنا حابين نتفرج ع الضيعة من جوا ونتفرج على بيوتها
شمس :ههههه ماهي التلة بتكشفلك كل الضيعة
امل :عنجد
شمس :والله
سمر :نطلع اليوم
شمس :بنطلع
~~~~~~~~~~~~~~~~•
عم تساعد نجمة امها بشغل البيت بس ع الخفيف ليرن تلفونها وتروح تشوف مين بيطلع رقم فريد وردت فورا : الو
فريد : مابدك ترجعي
نجمة: .......
فريد : والله ماقادر عيش بدونك .. ارجعي ومابتكوني غير رضيانة
نجمة : سمعت امك عم تخطبلك
فريد :حكي فاضي
نجمة :لا مو حكي فاضي ومبارح اهلها للبنت اجو لعنا ليشوفو ردة فعلي
فريد :وشو صار
نجمة :قلتلون انو كلشي انتهى ومعد ارجع والله يهنيكن ببعض
فريد : سكري هلق سلام ... بس حكينا ما انتهى
~~~~~~~~~~~~~~•
سكر التلفون ودخل على امو
فريد :اميي .. انت مين قلك تروحي تدوريلي على عروس
امو :لكن بدك تضل هيك
فريد : كيف هيك شو نسيانة انو عندي مرى وولد
امو : تضرب هيك مرى وبعدين ماتركتك هية وابنها وراحت ... وانا اصلا معد لفيها على بيتي
فريد :ليش معد تلفيها .. وبعدين بدال ماتروحي تبرمي على عروس روحي رجعيلي مرتي
امو :فشرت ادعس بيتهن هالنَور ... ومحدا زعلها لنراضيها
فريد : اي لا تراضيها ولا تدعسي بيتن وانا مارح طاوعك واتزوج بكفي ظلمت وحدة مارح اظلم وحدة تانية
امو :وليش لتظلمها
فريد: مابدك تقعديها معكن هون وتعمليها خدامة لكل العيلة
امو :وحياتك غير ماقعدكن ببيت لحالكن .. بعطيك بيت اهلي تسكن فيه ... بس جكر ببنت الراعي
فريد :اي تزوجيها انت لكن
تركها ومشي
امو :والله لزوجك غصب عنك وعنها عم تفهممم ... لسه بنت الراعي بدا تتشرط تحمد ربها انو كنت مسكنتها ببيتي
~~~~~~~~~~~~~~~~~•
وقت الاستراحة وراحت شمس تعمل شاي ... كان روتينها اليومي ... ومنو بتتمشى لحالها
دخلت ع الغرفة لتعمل الشاي والقت نظرة على لوح الشوكلا بعدو مكانو .. كل يوم تلقي عليه نظرة... بعد ماركبت على الشاي مدت ايدها واخدتو
واجاها صوت من وراها :من الاول خديه تكبير هالراس ليش
رجعتو فورا عمكانو وقالت :كنت عم شوف بكون دايب من الشوب
فاروق : وشو بهمك اذا كان دايب او لأ
التفتت عليه وقالت :فضول والله
فاروق :اذا فضول احسن .. فكرت شي تاني
سكتو شوي وبعدها حكي :انتو كل يوم بتعملو شاي
شمس :اي والله كل يوم هيك قاسم معود العمال واذا عندك اعتراض بلاه
فاروق :لا لا .. صحتين
شمس :لكن ليش عم تسأل
فاروق :فضول هههه
شمس بقلبها :ما ازنخك
لفت لتطلع لبرا بس وقفها وقال :مبارح وين كنتي
شمس :انا؟؟؟
فاروق :اي انت ... او مستشبه
شمس :مابتذكر اني طلعت مبارح
فاروق: كنت واقفة مع شب عند الدكانة
شمس :واقفة مع ميين
فاروق : شب
قربت عليه بتحدي وقالت: شو قصدك بهل الحكي .... قصدك انو انا فلتانة وواقفة مع شباب .. ولا هي حيلة بدك تستدرجني ولا بتعرف بعملة اختي ومفكر انو انا غبية متلها
فاروق : والله ماهيك قصدي حتى يمكن مستشبه
شمس :اولا انا محدا بيشبهني ... وتانيا اذا بتفكر مجرد تفكير انك تحطني براسك فانتبه لانك رح تطلع خسران ... وهاد الحكي مابينحكى معي عم تفهم .. قال واقفة مع واحد قال ... لأنو انا بطيق ارمي السلام عحدا لحتى وقف معو
فاروق :هههه لك شبك ... والله يمكن غلطان مابدها كل هاد ... بس معك حق انت محدا بيشبهك
تركتو وطلعت وهو عم يضحك وطلع ليحقها انبسط بمجاقرتها
فاروق :انت ليش بحسك مابتطيقي حدا
شمس :ليش فيكن حدا بينطاق
فاروق :اف لهل الدجة حاقدة علينا
شمس :اكتر مابتتصور
الحديث داير وهية ماشية وهو عم يمشي وراها
فاروق :طيب وقفي شوي لنعرف المشكلة ونحلها
شمس :مافي شي
فاروق :طيب وقفي شوي .. هيك بحركاتك عم تحسسيني انو في شي كبير صاير معك
حست على حالها انو مكبرة الموضوع وانو اذا اجت تواجه ماعندا شي تقولو
كتفت اديها ولفت لتوقف قدامو وتفرك رجلها تحتها وتترنح بدها توقع ليمسكها فورا ايدو مسكت ايدها والتانية لفها على خصرها ووجها ووجهو التقو مع بعض ... اتأملت عيونو وهو اتأمل عيونها .. اتأملت ملامحو عن قرب ودقنو يلي عجبتها من اول مرة شافتو فيها .. وهو عيونو على معالم وجها الحلوة والمتكاملة ... انفاسن يلي اختلطت ببعضها وانفاسها يلي عم تعلى وتنزل من خضتها وهو انفاسو كمان بلشت تتخربط فاقت على حالها وبعدت عنو فورا
حست عحالها تخربطت كتير وشي جرى بجسمها خلاها تتكركب وهو كذلك الامر في شي خربطو من قربو منها لهل الدرجة
شمس :انا ... انا رايحة شوف الشاي
فاروق :وانا رايح شوف العمال
وكل واحد راح من طريق معاكس للطريق التاني
فاتت ع الغرفة ورفعت ايدها قدام وجهها كانت عم ترجف حطت ايدها على صدرها يلي عم يعلا ويهبط بقوة
حطت ايدها على صدرها لتخفف عن حالها
شمس :ياربي شو هالشعور ... كيف هيك الواحد بتمر عليه لحظات وهو مخدر ... ليش ضليت مبحلقة فيه وعم اتأملو ... حلو ... يضرب منو لحلاتو ... لسه ناقصني انا
وهو ماشي وشارد ... الشي يلي حسو اول مرة بحسو ... غمض عيونو واتذكر مرة كان مع بنت طبعا مافي شب الا و الو طيشات وكان قريب منها لدرجة كبيرة بس ماحس هالشعور يلي حسو ... شي دخل على جسمو متل المس .. الصاعقة ... اتذكر ملامحها
فاروق :عليها جمال بيسحر ... مابلوم جواد لما حب اختها... عنجد عندن جمال مو طبيعي
وصل لعند العمال وسلم عليهن وراح وقف مع المرابعي كان شارد ومانو بهل العالم نهائيا عم يحاول يركز ويفوق للي حواليه بس دماغو مشتت
والشي الوحيد يلي فيقو هو صوتها وهية عم تقول :هي الشاي جاهز
رفع عيونو عليها حطت الشاي جنبن وراحت لجنب اختها عم تتجنب النظر بعيونو وهو عم يراقبها بكل خطوة ... لما بتدخل هيك مشاعر لجوات الانسان بصير يراقب بتمعن اكتر الشخص يلي حركلو هالمشاعر .. بصير يدور بكل تفصيل صغير كان متجاهلو لأنو مابهمو بس هلق تلقائياً عم يتأمل مشيتها حركتها طولها عرضها ... وهية كمان قعدت عند البنات وكل شوي تسرق النظر لعندو تلقائيا وكل ماصحت على حالها تلوم حالها وتبعد نظرها ... مستحيل تحس اي شي اتجاه حدا من اهل هالضيعة وعندا هالشي ممنوع منعاً باتاً
قام فاروق ومشي وقمر فورا وقامت لحقتو قدام عيون شمس يلي مالحقت تمنعها وكانت مقهورة كتير من تصرف اختها
قمر :فاروق .. فاروق
وقف والتفت عليها
قمر : كيفك
فاروق :انا تمام الحمد لله ... وهو كتير منيح
قمر :كيف صار وضعو
فاروق :احسن بكتير ...بس حاليا بالبيت لبين مايفك الجبصين عن ايدو
قمر :الحمد لله طمنتني
فاروق :بتحبي وصلو شي
قمر :لا لا ... ومابدي يعرف انو عم اسأل عنو .. خلص هيك احسن نحنا انتهينا
فاروق :عفكرة بعد الحادث فتح الموضوع مع امو ما اعترضت يعني تفائلي بركي هيك ربك بسهلا
قمر : انت مفكر هيك.. بس مستحيل تظبط ... اتفقنا انا واياها تجي تخطبني وانا ارفض
فاروق : شووو ... عم تحكي جد
قمر :والله ... لك مابدن اياني خلص ليش عم عذب حالي
فاروق :ايمت هالحكي
قمر :يوم يلي اجت لهون
فاروق :اي هاد قبل الحادث بركي بعد ماشافت ابنها وصل للموت تغير رأيها
قمر :لا ... اصلا مبارح بعتتلي رسالة لساتك عند وعدك
فاروق :توقعت هالشي
قمر :المهم انو اطمنت عنو انو هو بخير .
فاروق :الله يريح قلوبكن
قمر :تسلم
رجعت لجنب اختها واستلمتها شمس :سألتي عنو ... لك انا مابتفهمي ما قلتلك لاتسألي عنو خلص عايش ومنيح
قمر :خلص مادخلك
شمس : اااخ بس لو بعرف القصة من الاول كنت دبحتك وماخليتك تعملي هالشي ... لك ماعم صدق لهلأ انو هالشي طلع منك
~~~~~~~~~~~~~~~~~~•
عم يتمشى بأرض الدار وطلعت امو من المطبخ وشافتو
ام جواد :يا امي ليش طالع من غرفتك
جواد :والله انا منيح
ام جواد :وهالدوخة يلي عم تجيك
جواد :ماسمعتي الدكتور قال عهوا الخبطة وعم تخف الحمد لله
ام جواد :طيب تعا اقعد لجبلك شي تتسلى فيه
جواد: امي تعي شوي بدي احكي معك
ام جواد :اي ياعمري قلي
جواد :شو صار بموضوعنا
ام جواد :ايو موضوع
جواد :موضوع جازتي
ام جواد :اي ياعمري انت نقي اي بنت لروح اخطبلك اياها
جواد :بدنا نرجع نعيد ونفتق بالسالفة
ام جواد : يا امي مشان الله ماعم تظبط معي لك هي البنت كبيرة ... وبعدين مامعروف اصلن وفصلن ... وانت وين وهية وين لك ماشفت قديش عالم اجت وشقت عليك من كل الضيع وكبارها قبل صغارها وهاد بدل على مكانتنا بين الناس بدك تجي تخطبلي وحدة بتشتغل بالاراضي وبين الشباب طول اليوم واهلها من يوم اجو على هالضيعة مامعروف عنهن شي وفوق كل هاد ابوها راعي بقر والبنت كبيرة بدك اكتر من هيك اسباب ... بدك تخلي ابوك يناسب هالراعي الجربان لك اذا مو مشانك مشانا ومشان ابوك ومركزو بين الناس لك بنت الوزير بتموت عليك وانت لاحقلي هي البنت
جواد :وشو عشان حكيك بالمشفى
ام جواد :كنت خايفة عليك .. بس لما الحمد لله اطمنت عليك رجعت فكرت بالموضوع
جواد بهدوء :بس انا بحبها
ام جواد :اذا بدك بروح بخطبلك اياها بس بتطلع من هالبيت ولاتفرجيني وجهك طول عمرك
جواد :لو بدي اخدها غصب عنكن كنت عملتها من زمان بس انا مابدي اخسركن
ام جواد : لكن انسى الموضوع
جواد :ماشي متل مابدك
قام ودخل على غرفتو والدنيا كلها سودة بوجهو
وهية ضلت قاعدة محلها وعم تحكي بقلبها :اي شكلو عم يقتنع الحمد لله ... كان بدي روح اخطبها وخليها ترفض ... بس لاا ... انااا بدي روح فوت عبيتن وانرفض فشرو انا بفوت عبيت الملك ومابنرد بدي فوت عبيت راعي البقر وانرد اي بعيدة عن سنانكن ... مشان شو يقولو والله اجا جواد طلب بنتنا ونحنا رفضنا اي بأحلامن
~~~~~~~~~~~~~~~~~~•
العصر
عم يتمشوا البنات شمس وامل وسمر بأتجاه التلة يلي حكت عنها شمس
امل :ليش ما اجت قمر
شمس :تعبانة شوي
سمر :ملاحظة على قمر صرلا فترة مو على بعضها
شمس :مظبوط
امل :المرى يلي اجت هداك اليوم الها علاقة
شمس :هيك شي
سمر :احكيلنا شو القصة
شمس :خلص غير مرة ... هلق شوفولي هالمنظر
كانو واصلين ع التلة ومو حاسين .. ولما نبهتن شمس اتفاجئو من المنظر ...كان كتير حلو ... تلة عالية شوي كاشفة كل الضيعة
امل :شو هالمكان الحلو
شمس :عطول بجي لهون ... كنت وانا صغيرة اجي مع ابي وهلق صرت اجي لحالي .. بعيد عن الناس
امل :اي والله هالمكان بجنن
فردو الاكلات يلي كانو جايبينها معن وبلشو يتسلو ويحكو ويدردشو
امل : شموس لمين هداك البيت
شمس :بيت المختار
سمر :حلو كتيير
شمس :اي بس ليكو هاد البيت أحلى
امل :وبيت مين بكون
شمس :بيت ابو القاسم يلي نحنا بنشتغل عندن
سمر :ايواا
امل :انت شفتيه من جوا ؟
شمس :اوقات كانو ياخدو البنات ينضفو الحديقة ...وانا كنت روح كنت صغيرة ... اي شايفة اغلب بيوت الضيعة ... شي بجنن
امل : يعني معن مصاري كتير
شمس : اووووف هي الضيعة جلودها معباية اذا بكل بيت في سيارتين وتلاتة
سمر :يعني مين الرأس مالية بالضيعة
شمس :اكتر اكتر الشي ابو القاسم وابو جواد والمختار وولاد ابو العبد ... وكم واحد مابعرف اسمائن منيح حتى اهل الضيعة البقية معن بس يمكن ماببينو عليهن
امل : بخل يعني
شمس :مابتخلى في البخيل والكريم وفي يلي بخاف من الحسد وفي يلي ببعزق كتير ... بس كلن محشايين مصاري ... اراضيها بتطلع دهب احمر غير الشغل يلي بيشتغلو برات الضيعة
سمر :امممم
امل : وين بصيرو بيوتن هدول
شمس :بدي ضل عيد ... هداك بيت ابو القاسم حد برج التغطية ... وهادك جنب الجامع المختار ... وهداك بيت ابو جواد .... وهدوك البيوت ولاد ابو العبد هاد زلمة كبير مات وولادو عمر كل واحد عمارة جنب بعض ..وفي هاد ............الخ
سمر :ودخلك شمس هالعالم وين بتحط مصاريها
شمس :ببيوتن ... هو المنطقة امنة والكل تقريبا مكتفي ومافي سرقات وما بحطو ابدا بالبنوك مصاري
امل :امممم
فجأة وقفت سمر وبلشت تصور الضيعة
شمس :كتير عاجبتك الضيعة يعني
سمر :بتضل ذكرى بركي معد صرلنا نرجع نشتغل
شمس :ناويين تتركو
سمر :لا بس شو نسيانة انو عنا جامعات ومابتعرفي الايام شو مخبيتلنا
شمس :امممم
امل : اي المهم شمس حبيتي شي مرة
شمس :اي
امل :عنجد مين
شمس :ابطال الروايات يلي بقراهن هههههه
سمر :فكرت عنجد
شمس :وبالحقيقة عم دور ع اسمري الملتحي
امل :قصدك شب اسمر وعندو دقن
شمس :اي هيك شي واهم صفة انو مايكون من هي الضيعة ... اي انتو حبيتو ؟
سمر :اي انا حبيت شب بالجامعة
شمس :احكيلي عن الحب ... انو شو بتحسي
سمر :احلى شي بالحب البدايات ... اول مابتوعي على حالك انو مشاعرك عم تتحرك اتجاه هالشخص اذا اجت عينك بعيونو بتوقف الدنيا ... شي بيجري بجسمك مابتعرفي شو هو ... دقات قلبك بتتخربط ... نفسك بديق ... بتضلي عم تراقيبه ... بتحاولي تلفتي انتباهو ... ويمكن انت مابدك تتنازلي بس في شي جواكي بيتمرد ... مثلا بتقولي مابهمني بس مابتلاقي حالك الا عم تراقبيه ... بتنقهري اذا شفتيه مهتم بحدا غيرك ...
شمس عم تتذكر المشاعر يلي خرببطتا لما التقت بفاروق بس حاولت تتجاهلها وصار تفكر بقمر
شمس :الحب فيه تنازلات
سمر :هو الحب يلي فيه تنازلات ... بتخسري كلشي كرمال ماتخسريه ... بس مع الايام مابتلاقي غير خسرتي حالك وبس
امل :وقد ما قريتي عن الحب وسمعتي عنو مارح تحسي فيه الا لما تعيشيه
سمر :بالظبط
رن تلفون سمر بمسج قرأتها وحكت :يالله امل اخواتك عم يبعتو لازم نرجع ع البيت
امل :يالله ... شمس بدك تضلي هون
شمس :اي روحو انتو انا بعدين بلحقكن
امل :تمام ... يلا سلام
راحو على عجلة وضلت شمس سارحة قدامها
لبعد فترة انتبهت انو في جزدان صغير لامل كان فيه سمعات وشاحن جوال ومصاري
شمس :هي نست هدول هون .. يلله ببقا باخدلا اياهن او بكرا بعطيها اياهن
~~~~~~~~~~~~~~~
داخل فاروق ع بيتو وبأيدو طايقة راسو وعم يلوح فيها .. لقى امو وابوه قاعدين عم يشربو شاي
فاروق :سلام
: وعليكم السلام ورحمة الله وبركاته
فاروق :شو في اكل ميت من جوعي
ابو القاسم :عجب متأخر اليوم
فاروق :خلصت من الارض ورحت شفت سيارة
ابو القاسم : ماعندك تنتين
فاروق :اي بعتهن وحدة اخدها صاحبها والتانية بكرا رح سلمها
ابو القاسم :واشتريت السيارة يلي رحت تشوفها
فاروق :لا ماعجبتني مشان هيك بدك تعيرني سيارة من عندك هالكم يوم
ابو القاسم :هههه تكرم عحسابك
امو :يلا امي فوت تحمم لخليهن يجهزولك الغدا
فاروق :يلا
ابو القاسم : جواد عنا
فاروق :عنجد وينو
امو : مع قاسم فوق
فاروق : هاد مجنون طالع من بيتن ولساتو مريض
ابوه :بكون طق من قعدة البيت .. انتو الشباب مو متعودين
فاروق :هههه بهي معك حق
...........................
دخل ع البلكون يلي قاعدين فيها جواد وقاسم وكانو عم يحكو
جواد :اي بعتت سيارة لعند واحد صاحبي ظبطها ورجعناها للزلمة
قاسم :منيح ماحكى شي
جواد :اي والله .. بس طلع ابن حلال والله لو واحد غيرو ماكان رضي الا بسيارة جديدة
قاسم :مو لهل الدرجة انت التاني لاتنسى انت كمان كنت رحت فيها لولا ستر الله
فاروق : انت ماتقعد ببيتك العالم لساتها عم تجي تشق عليك
جواد :مخنوق ورح افقع ... قعدة البيت ومرض وناس فايتة طالعة وانا مشتت كتير لو الوضع بيسمح لاطلع افتح الورشة ... والله متل مابقولو الشغل عبادة ....بنسي وبلهي
سحب كرسي فاروق وقعد معن وحكي : شو صار بموضوعك
جواد : متل ماقلتلي امي بوقتها كانت خايفة علي ولما اطمنت لقت حالها مكبرة الموضوع ورافضة رفض قطعي
فاروق : اي شو يعني هلق
جواد : خلص ... رح انهي هالقصة ... اهلي مابدن حتى لو وافقو مفكر رح انبسط وارتاح .. قمر معها حق شافت القصة لقدام مشان هيك قررت نترك .
فاروق : والله مو عارف شو قلك بس متل ماقلت القصة واضحة نهايتها رح تجبلك مشاكل ووجع راس اذا تم هالامر
جواد :اقطع عرق وسيح دم وخالص .. رح ادعس عقلبي شوبدي اعمل سنة زمان وبنسى يمكن انا مستصعب الموضوع بس يمكن مع الايام انسى ... الايام كفيلة تنسي
سكت وسكتو وشرد بهل الضيعة لأنو شايفينها من الطابق التاني
~~~~~~~~~~~~~~~•
الدنيا صارت المغرب وشمس راجعة ع الطريق لحالها ... شافت حالها قريبة من خيم العمال .. وقالت :خليني اعطي الجزدان لأمل احسن ماتدور عليه .. غيرت مسارها وكملت اتجاه الخيم .. واول ماوصلت سمعت شي خلاها توقف وماتكمل ... سمعت اسمها
:والله هالشمس فادتنا كتير .. بركي بنخلص مهمتنا وبنهبش هبشتنا بوقت قصير
سمر : وهبشة مرتبة عهوا ماحكت انو اهل هالضيعة جلودهن معابية مصاري
مؤيد :وقعتنا منيحة هالمرة ههههه
سمير :انا رح احكي مع المعلم لشوف كيف رح نرسم خطة السرقة
سمير : جنى ومرح خليكن قراب من شمس وقد مافيكن تستردجوها وتسحبو منها حكي
صوت سمر : اي ماعليك وانتو خليكن عجنب
صوت سمير: يسلملي الغيران
سمر : اي بدي غار انت الي وبس ...
تراجعت بخطواتها بهدوء والرعب تسلل لقلبها .. بعد ماسمعت هالكلام واول ماوصلت ع الطريق العام بلشت تركض وكل شوي تتلفت لوراها مشان تشوف اذا في حدا شافها وبلشت تحلل يلي سمعتو : جنى ومرح ... خطة سرقة ... يستدرجوني .... انت الي وبس
وقفت بنص الطريق عم تلهت واستندت عركبها وبعدها جلست ضهرها وقالت :عصاابة!!!؟؟؟؟؟
وصلت عبيتها وهية بشرود تااام .. كان اهلها عم يتعشو ندهو عليها قالتلن مو جوعانة وفاتت عغرفتها هية واخواتها قعدت وبلشت تتوضح الصورة قدامها مع استرجاع الزكريات ... (مين اغنى واحد بهي الضيعة .... هادك بيت مين ... وين بحطو مصاريهن .... اسحبو منها حكي .... حكي المعلم ... اصبح في معن شركاء ... جنى ومرح ... اسمائن مو حقيقة .... انت الي وبس ... مانن اخوات ... مافي اخت بتقول لاخوها انت الي وبس .... عصابة جايي ع الضيعة تسرقها وانا عم ساعدهن بدون ماحس .... انا لازم اعمل شي .... لا مارح اعمل شي يسرقوها انا شودخلني بيستاهلو اهل هالضيعة ... بس انا ماني هيك .... بس لاتنسي بحياتن ماحبونا ... حتى لو بدي اعمل شي شوفيني اعمل ... مبين انهن عصابة كبيرة خلص مادخلني وبعتبر حالي ماسمعت شي ... بس العما ما أغباني كيف ما شكيت بامرن وانا نص عمري بين الكتب والروايات وعندي علم عكتير شغلاات ... وقريانة كتير قصص بوليسية كان لازم افهم من اسالتهن انو في شي مو طبيعي ... لك انا شو ماخدني كان خليني مابعرف شي ... كيف بدي اقدر اتعامل معهن بعد ماعرفت انن عصابة حرامية.. خايفة اذا شكو انو انا عرفت يأذوني ... معقول حدا انتبهلي ....انا شو هالوقعة يلي وقعت حالي فيها ....
طلع الصبح وشمس متمددة بفرشتها وعيونها مفتحة .. والظاهر انها كل الليل مو نايمة
وبعدو تفكيرها شغال : احكي لابي ... بس ابي يمكن مايصدقني ... واذا صدقني رح يقول لأهل الضعية ويمكن ننفضح ونجيب لحالنا وجعة راس .... احكي لأمي امي مو ناقصها هموم وتصير تهلوس بالليل والنهار ويمكن تخبر الكل ... انا لازم خلي الشغلة سر .. بس ماعم اقدر فكر لحالي بدي حدا يقلي شو اعمل ... خبر قمر .. لالا قمر رح تتوتر ويبين عليها وهنن رح يلاحظو ... طيب خبر نجمة بس نجمة رح تخبر قمر ونرجع لنفس القصة ... ياااربي ... معقول انا مكبرتها .... خلصنا احسن الشي مادخلني ولا سمعت شي ولابعرف شي خليهن بيستاهلو اهل هالضيعة ينسرقو وينحرق دمهن للبلي ... بس بركي انمسكو وحققو معن وقالولن انو شمس ساعدتنا (برمت عاتني جهة ) اوووووف بصير اتشنطط ع المخافر .... وبركي ما انمسكو ..... طيب وبركي هدول صارو بدن يسحبو مني معلومات .... شوبدي اعمل اتهرب رح يحسو ... واذا حكيت الصدق رح كون عم ساعدهن ... ياربي ساعدني
~~~~~~~~~~~~~~~~•
قاعدة مرى ختيارة قدام غرفتين من طين جنب حنفية وعم تتوضا
اجا صوت حدا جاي لعندها :صباااح الخييير يااااستييي
رفعت نظرها وشافت فاروق : اهلييين ياااستتتييي
فاروق :شوو كيييفككك
:منييحةة بس لو توطي صوتك انا بسمع يااستي هديك ستك ام امك يلي مابتسمع
فاروق :ههههههه لك بعرف بس عم اتفقد سمعك لساتو حديد
:وحياتك ياستي بسمع دبيب النملة
قرب منها وبسلها ايدها وباس راسها
: الله يرضالي عليك ... كيفك يا ضي عيوني
فاروق :والله مشتقلك ... شو ستي هلق عم تتوضي شكلك متقلة بالنومة وماحسيتي عصلاة الصبح
:واحد متلك مابحس ... الحمد لله حسيت وصليت وشكرت ربي وهلق عم اتوضى صلي الضحى
فاروق :الله يهدينا ويهديكي يارب
: اي قلي يا ستي شو يلي جابك لعندي قبل طلوع الضو اكيد شايف شي منام وجاي لفسرلك اياه مو هيك
فاروق:اقسم بالله انت مخاوية
:هههههه تعا تعا احكيلي
قرب وقعد جنبها عكرسي حديد قديم : قوليلي كيف همتك
:الحمد لله قوية والقوي ربك ... يلا حاج تلف وتدر قلي شو شايف بمنامك حاكم مناماتك بتصيب
فاروق :والله ياستي منام غريب بس حلوو ... هاد يا ستي شفت حالي عم اسبح بمكان كتتير حلو والمي صااافية فجأة بتطلع قدامي بنت من تحت المي بس وجهها مو واضح بس عيونها كتيير حلويين وشعرها طويل ونازل على ضهرا .. انا بالمنام صرت قول هي حورية .. قربت مني كتيير وانا كل ماتقرب دقات قلبي تعلى وتعلى حسيت حالي حبيتها كلشي فيني انشل عن الحركة حبيت قربها كتير مني .. وصار تبعد انا هون ماتحملت انها تروح وصرت الحقها لحتى طلعت من المي وصارت تركض انا لما شفتا عم تركض قلي هي بني ادم وصرت الحقها شوي تضيع مني وشوي لاقيها بس تكون بعيدة وهيك لحتى فقت كتر ماهلكت من الركض وراها
:ههههههههه
فاروق :شو ليش عم تضحكي
: ع منامك
فاروق : شبو
: ستي مين هالبنت
فاروق :والله ماشفت وجهها
:شوبدي بالمنام بالحقيقة مين هية
فاروق:والله مافي حدا
:بس قلبك ياستي عم يدق
فاروق :كيف عم يدق وانا لسه مافي ولا بنت عاجبتني
:فكر ياستي
شرد شوي واول حدا خطر عبالو شمس بس فورا طرد هالافكار من راسو
:وين رحت
فاروق :المهم شو معناتو هالمنام
: البنت حواليك وانت عم تحبها بس الوصول الها صعب ... مزال شفتها عم تهرب وكمان بالحقيقة رح تكون عم تهرب
فاروق :ما استفدنا شي
:اي قوم روح عشغلك هلق بتتأخر
فاروق :انا المعلم بروح ايمت مابدي وبجي ايمت مابدي .. مابدك تشربيني فنجان قهوة من تحت اديكي
:اي وماتكرم عينك .. اسندني لنقوم نفوت لجوا
~~~~~~~~~~~~~~~~•
راكبين بالسيارة ورايحين ع الشغل وشمس عم تحاول تفوق من حالتها ... انتبهت ع قمر الشاردة قربت منها وحكتها :شبك قمر
قمر :انا اللي شبني ولا انت
شمس :شوبدك فيني انت شبك
قمر : معد اتحمل ياشمس .. معد اتحمل بدي شوفو بدي اطمن عنو
شمس :وترجعي عن قرارك
بلشت تبكي : عم اتقطع من جوا النار ماعم تهدى ابدا .. اشتقتلو كتير ... جاي عبالي ارفع الحظر عنو وحكيه ونرجع متل قبل .. انا رضيانة نضل هيك المهم كون معو
شمس :اصحك قمر ... استحملي اكتر مشيتي بطريق لا ترجعي فيه .. انسيتي امو .. خلص خلي كل واحد يروح بطريق ... خليه يتزوج ويعيش حياتو ...
قمر :فكرت فيها ... معلش يتزوج ... وانا بضل مرتو يلي بالسر
شمس :مفكرة القصة مارح تنكشف ... مافي شي بضل مخبى ... والانسحاب الك بهل الوقت انسب حل ... الحمد لله انو محدا خبر فيها ... لك مافكرتي بأبوكي اذا انفضحت القصة ... بعرف هالشي صعب وفوق قدرتك على التحمل بس ياقمر هالشي من بدايتو كان غلط .. وهلق لسه عندك طريق للرجعة ... مفكرة رح تتحملي يتزوج ويجيب ولاد وانت مرتو السرية مجرد تفكير انك تحملي مارح تحلمي فيه ... فكري منيح يا اختي .. وابعدي يمكن ربك ينسيكي اياه
قمر :تعبانة ياشمس ... تعبانة
شمس :سلامتك من التعب يا اختي
قمر :صرت بكرهن لأهل هالضيعة متلك ... عم ينحرق قلبي وروحي ومحدا حاسس فيني كلو بسببن وبسبب التمييز تبعن .. انا من شو بشكي او انت او نجمة ماحرام يلي عم يصير فينا
شمس :وحياتك نحنا احسن منن بمليون مرة بس الا مايقلب الدولاب ... انت بس توكلي ع رب العالمين وهو يلي رح ينصرنا
قمر بكسرة وصوت مرتجف :يااااااارب
وقفت السيارة قدام الخيم ليظهر قدامن الشباب الخمسة والبنتين .. صفنت فيهن شمس وكأنو خطر عبالها شي
صبحو عليهن وشمس وقمر ردو الصباح وانطلقو عشغلن
~~~~~~~~~~~~~~~•
اول ما وصل ع المرزعة شاف باب الغرفة مفتوح ابتسم وطفا السيارة ونزل ومشي لعند الغرفة واول مادخل تفاجئ بالمرابعي ابو ايوب
فاروق :صباح الخير
المرابعي :اهلين مبكر اليوم
فاروق :اي والله بلشنا نتعود ع الشغل
المرابعي : وكيف ملاقيه
فاروق :ماشي الحال ... يلا انا رايح شوف العمال
المرابعي :بس بدك تشوف الفلاح مشان يفلح شقفة الارض ونشوف شوبدنا نزرعها
فاروق :اي هلق بجي بس لأطمن انو الشغل ماشي تمام
تركو وراح ناح العمال
واول ما وصل سلم والكل ردو السلام .. بس شمس ابتسمت لا اراديا بس فورا عبست ورجعت تنتبه لشغلها وحمدت ربها انو وجها مغطى
كانت واقفة جنب شجرة وعم تقطف حبات المشمش يلي عم اتطولهن
وهو عاين وينها وراح لجنبها قطف حبة وصار ياكلها
شمس :هاد المشمش في شوية حموضة اذا حابب تاكل حلو روح لعند هدوك الشجرات
فاروق :لا انا بحب الحامض ...
شمس : صحتين
فاروق : شو مانكن عاملين شاي اليوم
ابتسمت ابتسامة خفيفة وطبعا هو ماشافها : اي مو هلق عمهل شوي لوقت الغدا
فاروق : ماتنسي تحسبي حسابي
شمس : ماشي
ضل واقف شوي عم يراقبها كان مبسوط وهو بقربها وكان متمني يحكي معها اكتر بس مافي شي يحكوه
التفتت عليه لأجو عيونها بعيونو وقالت : لو سمحت بعدلي شوي بدي كمل شغلي
واول ما شاف عيونها قلبو صار يدق بسرعة ... هدول العيون يلي شافن بالمنام .. واتذكر مبارح الموقف بس ماركز منيح ع جمال عيونها لأنو كلشي بوجهها حلو
ضل واقف وصافن ومارد عليها
شمس : معلمم فاااروق
حكي بهمس :بتعرفي انو عيونك بجننو
حكي هالكلمتين وتركها عم تتخبط بمشاعرها يلي فاروق فجر شي جواتها معد تقدر تسيطر عليه .. كتير عالم تغزلو فيها وبجمالها الا هالكلمتين وكأنو سهم وانغرزو بصدرها
وعيت عحالها بعد فترة بقهر وقالت :اصحك شمس .. اصحك ... مو هو لا ماهاد هو يلي بدي اياه .. لايغرك جمالو وهالكلمتين يلي قالن ..
بس في شي مافيها تنكرو انو لما بتشوفو بتحس صدرها انشرح وبتحب تطلع عليه وتملي عيونها منو ... بتحب تحكي معو وبنفس الوقت مابدا تقرب منو ....عم تعيش صراع بين عقلها وقوانينو الصارمة وبين قلبها يلي بلش يدق يتمرد على عقلها ومبادئها
شمس بداخلها : كل مابشرد عم تطلع قدامي .. وبنفس الوقت بكرهك ومابدي قرب منك ... انا شو يلي عم يصير معي
حست حالها ضايعة من كلشي .. بلشت تدور عليه بعيونها شافتو واقف مع امل حست بأنزعاج ... ليش واقف معها ... وليش انا مقهورة... هية مانها من الضيعة ... اكيد عم تسحب منو حكي ... لازم امنعو ... لا مادخلني .. ما انا قررت انو مادخلني بالعكس رح ساعدهن مشان احرقلن قلبن ع اموالهن متل ماحرقو قلب اختي ...
وامل وفاروق هية رجعت على شغلها وهو راح اتجاه قمر بس هية مشت اتجاهن
فاروق : قمر شيلي الحظر بدو يحكي معك
قمر : بخصوص شو
فاروق :احكي معو وبتعرفي
التفتت ع شمس اتطلع عليها نظرة طويلة ومشي
شمس :رح تحكي
قمر :اي
شمس : بدي كون جنبك وقت تحكيه
ابتسمت ابتسامة لا مبالاه وماردت
~~~~~~~~~~~~~~~~•
معو شنتة تياب وماسك ايد ابنو وطالع من البيت لشافتو امو ووقفتو :فرريدد ... ع وين
فريد :نازل ع المدينة دور ع شغل
امو :ليش شبو شغلك هون
فريد :يادوب جايب همو .. بدي اشتغل وحسن وضعي
امو :طيب ليش مزالها مستورة
فريد :انا عيلتي تشتت وبدي ارجع لمها من الاول وجديد
امو :ناازل ع المدينة كرمال بنتو لهل الراعي
فريد :اي ... نازل كرمالها ... الجازة والطلاق مو كلمة بتحكوها انتو وانا بدي نفذ ... نجمة ضحت وصبرت كتير كرمالي وانا صار وقت ضحي
امو :يعني شو
فريد :الواحد كل ماكان بعيد بضل محبوب والمشاكل مارح تخلص طول ما انا عايش بنفس البيت ... رح انزل اشغل واستأجر شي بيت هنيك واخد مرتي وابني ونبلش من جديد
امو :خلص قررت تترك كلشي وتمشي
فريد :امي الحياة بنعيشها مرة وحدة خلينا نعيشها بدون وجع راس ومشاكل.. انا مارح اقطعكن وكل جمعة رح صير انزل لعنكن
امو :والبنت يلي رحنا حكينا فيها
فريد :قوليلن فريد بدو يرجع مرتو لانو بحبها
امو :طيب وليد ع وين اخدو
فريد : اخدو لعند امو تنتبه عليه ولبين ماظبط وضعي رح ابعت واخدهن لعندي
قرب باس راسها وقال : ادعيلي
تركها بصدمتها ومشي
~~~~~~~~~~~~~~~~~•
قاعدة شمس عم تشرب شاي وعم تنقل نظرها بين الشباب الخمسة وبين البنتين
شمس بقلبها :هلق معقول هدول عصابة ... والله مو مبين عليهن ... بس حلال عليكن اهل هالضيعة بيستاهلو ينسرقو وينحرق دمن ... كنت والله ناوية اعمل شي بس فشرتو
فاقت من شرودها عحدا عم يقعد جنبها وكانت امل : شو وين شاردة
شمس :اااه ... ولاشي مشاكل هالحياة
امل : خير صاير شي
شمس مشان تخليهن يأمنولا اكتر : مشان قمر .. بتحب شب بصير ابنها لهديك المرى يلي اجت امس
امل :...
شمس : بحبو بعض كتير بس امو او اهلو بشكل عام بس المنفذ امو مابدن اياها ... وقمر عم تحرقلي قلبي
امل :يييي
شمس :اي صح .. مبارح نسيتي جزدانك ع التلة
امل :اي والله فقدتو لما رحت ع الخيمة ...
شمس :شو رأيك نطلع عالتلة اليوم منو بنتسلى ومنو بجبلك اياه معي
امل :اي ماشي ليش لأ
شمس انتبهت عقمر قامت وبأيدها تلفونها
شمس :لكن حكي سمر وردو علي خبر
وقامت ورا اختها
كانت قمر عم تتصل
ولما انتبهت شمس جنبها
وفورا فصلت الخط
قمر :خير شمس
شمس :بدي اعرف شوبدك تحكي معو
قمر :بترجاكي شمس بدي حكيه لحالي
صار التلفون يرن بأسمو
شمس : بدي اسمع خايفي تتنازلي وتخبصي شي خبصة
طفا التلفون ورجع يرن وكأنو ماصدق جواد اتصلت فيه
قمر :لا مارح اتنازل بس حبابة اتركيني لحالي
شمس :بتحكيلي كلشي
كمان سكر ورجع يرن
قمر :خلص وعد
~~~~~~~~~~~~~~~•
رايح جاي بغرفتو .. الايد الأولى مكسورة والايد التانية حامل فيها الجوال وعم يحاول يتصل فيها بس ماعم ترد بعد ماعلمت تعليمة خفيفة وفصلت
جواد بقهر :ردي قمرر... رديي
رجع كبس ع الاتصال وفورا انفتح الخط
قمر :الو
وكأنو اردتلو الروح بعد ماسمع صوتها .. غمض عيونو بأسى ومارد
قمر :الو
رد بحزن :الو
قمر :كيفك
جواد : شو رأيك
قمر :كيف صرت ان شاء الله احسن
جواد :الحمد لله ... بس انا وجعي بمكان تاني
قمر :وضعي مو احسن من وضعك
جواد :......
قمر :بدك تحكيني قلي فاروق ؟
جواد : خلص متل مابدك ... رح نترك
تغير صوت انفاسها وكأنو حبست غصة ومابدا تبوح فيها
جواد :قمر....
سمع زفيرها وبعدها حكت:كيف لحتى
جواد : معك حق بكلشي ... اهلي ماعم يتقبلو الفكرة وحتى لو غصبتن مارح نرتاح .... وصلت لمرحلة واقع بين نارين يا اما بدي اخسر اهلي يا اما بدي اخسرك.. وصدقيني الخيارين اصعب من بعض
قمر : انا من الاول عرفت هالشي وقررت انسحب كرمال ماتخسر اهلك انا بكرا بروح بيجي مية وحدة غيري بس اهلك مابيتعوضو
جواد : ولا مليون وحدة ممكن تجي محلك او تعوض عنك
جواد : ماكنت متمني الامور توصل لهون ... ممكن تفكريني اناني بس بتمنى نضل ع القليلة هيك ... ماعم اقدر اتقبل انك تصيري بعيدة عني او ممكن تصيري لغيري
قمر : لازم نحط حد لهل الشغلة هلق لأنو حياتنا رح تضل معلقة .... انا ما ممكن اتزوج بس انت لازم تتزوج وتعمل عيلة واذا ضليت بحياتك رح تكون حياتك جحيم لا بتقدر تكون معي ولا بتتقبل حياتك الجديدة ... مشان هيك خلينا ننهي هالقصة اليوم وكل واحد يشوف حياتو ... حتى انا ممكن يصير شي بحياتي الله اعلم
جواد : اليوم ؟
قمر : اي بس هالكلمة قوليها وكل واحد بروح بحال سبيلو
جواد : خليني شوفك لأخر مرة وودعك بطريقتي
قمر : .....
جواد : بترجاكي ماترفضي يوم واحد
قمر : يوم واحد ؟
جواد : اي وبعيد عن الضيعة بدي عيش معك يوم واحد بعيد عن العالم كلها
قمر : صعب ... ومستحيل هالشي يلي عم تقولو
جواد : بترجاكي قمر ... نحنا متزوجين معقول ماعيش مع مرتي يوم واحد لحالنا... كنا نقضيها بالسرقة وبالدقايق .
قمر : طيب وين
جواد : بأوتيل بالمدينة ... انت ماتهتمي بالتفاصيل المهم فضيلي حالك يوم ولاقي شي حجة تطلعي فيها ... عأساس بدك تنامي عند رفيقتك اي شي
قمر : مع انو بأكدلك هالشي مستحيل بس رح شوف
جواد : وانا ناطر
قمر : وبركي ما مشي الحال
جواد : ما بطلقلك لشوفك
قمر : طيب بدك شي
جواد : سلامتو لقلبك
~~~~~~~~~~~~~~~•
ماشيين اتجاه البيت بعد
ماوصلن المرابعي لأول الطريق
شمس :وبدك تروحي
قمر :مابعرف.... كيف بدنا نظبطها مابيمشي الحال
ولما صارو على عتبة الباب سمعو صوت نجمة عم تبكي دفشو الباب وشافو نجمة عم تبكي وابنها على جنب عم يلعب بسيارة لعبة
قمر :شووفي ... شو صاير
امهن : اجا فريد حط الولد مع غراضو وراح
شمس :ع وين راح
صباح :والله مابعرف ماحكي شي بس قال مصروف نجمة ووليد رح يوصلن كل راس شهر
شمس :وليش نجمة عم تبكي
نجمة :اكيد راح يتزوج وتركني
شمس :معقول؟؟
نجمة :يطلقني ويروح يتزوج ما انو يخليني معلقة هيك
قمر :طولي بالك مابظن يتزوج حتى لو بدو يتزوج الضيعة بتنطبل
نجمة :لك حاكيين بالبنت
شمس :طيب هو ماعم يحكي معك ؟
نجمة :لأ حاظرتو
شمس : شو قصة الحظر اليوم
صباح :شو
شمس :ولا شي .. فك الحظر واسأليه ليش جاب الولد واذا بدو يتزوج يجي يطلق بالاول وياخد ابنو ... بيرمي الولد وبروح يتزوج مشان ماينكد عليه
نجمة : شو امي حكيه
صباح : اي حكيه بدنا نفهم شو القصة حاج انت ليكي كيف صارو عيونك من كتر مابكيتي ومابتعرفي شو القصة
شمس : لهل الدرجة بتحبيه ولو نجمة
نجمة : مو قصة حب ..
شمس : اي ماشي ماشي
ماسمحت لأختها تكمل ودخلت لتتحمم وتغير تيابها وهية عم تفكر وتقول شو هو هاد الحب يلي عم يخلي اخواتي يلا كرامة لهل الدرجة ههههه