رواية بنات راعي البقر
الفصل الرابع4
بقلم مريم اليوسف
بحثت بين طيات الكتب عن معنى ادق واوضح عن ذلك الذين يدعونه الحب ... .. الرجفة .. الطاقة التي تجري في الجسم .. عن عناق العيون ... انا اشعر بشيء من هذا القبيل بالاضافة الى احب القرب منه ... احب لحيته وجماله ... احب ان اماطل معه في الحديث ... انتظر قدومه في الوقت المعتاد ... لكن من ناحية اخرى الوم نفسي لأنني احب هذه التفاصيل وهي لا تعنيني ... انا مشتتة ... هل هذا هو الحب ام انه مجرد اعجاب ... اتمنى ان اعيش الحب ... الحب كلمة كلما ذكرتها خطر على بالي هو لا احد غيره( فاروق )... لكن انعت نفسي واذكرها بمبادئها ووجهتها ... لكن قلبي يدق بشيء لطيف اتجاهه .... كيف لي ان استمتع بهذا الشعور ومن جهة اخرى الا اخون مبادئي ........
تركت القلم ورفعت راسها لتطل قدامها الضيعة وهي قاعدة على التلة كانت عم تكتب ع دفتر صغير ومبين عليها مخنوقة وزعلانة لتشوف سمر وامل ومعهن سمير جايين لعندها
صابتها رجفة اول ماشافتن وبقلبها :لسه هدول عم خاف منن والله ... خايفة يعرفو اني كاشفتن ... يمكن هنن السبب مشان مافكر فيهن عم يروح تفكيري لفاروق مشان التهى .. من وين اجو هدول ومن وين اجا فاروق كمان اووووف
ابتسمت ووقفت لتزيل ملامح التوتر عن وجها
سمر :ليك اخي هالمكان شو حلو ماهيك
اتطلع سمير ع المكان وع الضيعة بترقب وقال : اي حلو كتير ... كيفك شمس
شمس :الحمدلله .. الحمد لله
سمير :اي منيح اطمنت عليكن لترجعو خبروني بجي باخدكن
امل :مافي داعي اخي بنرجع تدريجة مع شمس
سمير :طيب ماشي
راح وهو عم يراقب المكان منيح
سمر :شبك شمس مانك على بعض
شمس :اااه انا .. لا مافي شي
امل :عنجد فيكي شي ... لتكوني اضايقتي لأنو اجا سمير معنا
شمس :لا لا ... شو مكان الي خلفني .. بس قبل ماتجو كنت عم فكر بشي
سمر :شي متل شو
قعدو وقالت امل :احكيلنا
شمس :بقلبها :مضطرة بوح بأسراري كرمال مايكشفو اني كاشفتن وكاشفة كل حركاتن ..
شمس :انا معجبة بشخص وبنفس الوقت مابدي اياه ولا بدي يحبني .. شو اعمل
سمر بشك :مين هالشخص بنعرفو
شمس فهمت قصدها وفكرتها قاصدة سمير : لا مابتعرفوه من الضيعة .. اي شو اعمل انا عايشة بفوضى وتوتر
امل :انت بدك تحبيه ومابدك تكوني معو
شمس :هيك شي
امل :حبيه من طرف واحد
شمس :حب من طرف واحد !!!
امل :اي بس عفكرة بعذب كتير الحب من طرف واحد
شمس :يعني بقدر متع عيوني بشوفتو بدون مالوم حالي وبحكيلو كلشي حابة قولو بقلبي .. واتغزل فيه وبشخصيتو وبهيبتو... وبنفس الوقت اتمنالو الخير
امل :من اهل هي الضيعة وتتمنيلو الخير
شمس :اي هو حالة استثنائية .. هو انا صح مابحبن بس ماني عاملة عداوة معن يعني باخد وبعطي وبشتغل عندن كمان
سمر :صحي انا هي مافهمتا
شمس :عم اشتغل بأجاري ماني عم اشتغلن ببلاش
سمر :اي صحي شمس هو مافي شي موسم للأعراس
شمس :اااه
سمر : قصدي ايمت بتكتر الاعراس
شمس :بعد المواسم هلق شهر زمان وببلشو ليش عم تسألي
سمر :انو نحضر شي عرس .. ولا هي كمان ممنوع
شمس :لا اصلا وقت العرس محدا بكون عرفان حدا كل الضيعة بتروح يعني مابددقوو كتير ع الموجودين
امل :وانت رايحة عشي عرس
شمس :وانا صغيرة كنت روح بس هلق مابروح ولا تسألو ليش
امل :هههه خلص مارح نسأل
سمر :يعني ايمت اقرب عرس
شمس :سمعت انو بنت المختار بدا تجي جاهة كبيرة من برات الضيعة تطلبها لواحد مهم بالدولة بس ايمت مابعرف ...
سمر :اممم
شمس بقلبها : حاسة حالي عم اتورط ... ياربي شوو اعمل ... عم قول بدي ساعدهن ... بس برجع بفكر انو انا ماني هيك ... طيب اذا بدي احكي لميين
~~~~~~~~~~~~~~~•
كان فاروق عند جواد عم يسهر هو وقاسم وشارد وبأيدو كاسة الشاي .. ما عم تروح من قدام عيونو .. وخصوصا عيونها والشعور الحلو يلي حسو بالمنام عم يتكرر كل ما تذكرها
جواد : اقسم بالله رح افقع من قعدت البيت .. وبدي انزل افتح الورشة اهلي ماعم يخلوني
قاسم :انزل احسن من قعدة البيت والله انت قول للشغيل شو يعمل وانت بس أشرف
جواد :عم قلن هيك ماعم يرضو وخصوصا امي بتقلي لبعد الخميس ... شو مخبيتلي نهار الخميس الله اعلم
قاسم :لتكون بدا تخطبلك
جواد :والله صرلا يومين عم تقلي شو رأيك بهي وشو رأيك بهي
قاسم :وانت شو عم تقلا
جواد : ناطر لاخلص من قصتي مع قمر وبتفضى
قاسم :خلص يعني
جواد :اي خلص .. وقعت بمكان لازم اخسر فيه لكمل .. وقررت اخسر قلبي
قاسم : عملت زينة العمل هية هالعلاقة من الاول كانت مو ظابطة .. شو ماكان مافي شي بيتقارن قدام الاهل
التفتو ع فاروق يلي شارد ومانو معن ابدا
جواد : حبيب وين صرت
فاروق :اييه
قاسم :وين شارد
فاروق : انو عنجد ليش اهلك مابدن قمر من شو بتشكي البنت
جواد : لا تسألني لانو كل مابسالها لامي بتصير تلف وتدور ومابتعطيني جواب مقنع
قاسم :وانت ليش عم تسأل
فاروق : شمس عاجبتني
جواد: اصحكك
فاروق : ليش
جواد :لا تغلط غلطتي اذا من هلق فيك تبعد ابعد
فاروق :وبركي اهلي ماعارضو
قاسم : كيف يعني مارح يعارضو انا لما كان بدي بنت حمدان ماخلوني
فاروق :اي كمان هديك عيلة مسيطة بالشرب والعربدة
قاسم : مابعرف بس اذا ماقابض الشغلة جد طالعها من راسك
فاروق :لا مافي شي جد مجرد حكي ... هالبنات مشاء الله عنن ماشفت بجمالن
جواد : اذا عاجبتك شمس احكي عنها لاتحكي عن غيرها
فاروق :اي عفوا ... نسينا انو قمر مرتك
قاسم :بعدين انت ابوك شغلك بالارض لتعشق وتتمعشق والله ليخبر ليطالعك ويقلك الله يوفقك خليك بالسيارات
فاروق :قولك قلو وانفد من هالشغلة
قاسم :هههه والله مابعرف انت وحظك
جواد :اي شو اخبار السيارات معك
فاروق :بعت التنين يلي كانو معي وعم دور ع وحدة هلق
جواد: والله .. والسعر كيف
فاروق :ربحت فيهن قرشين مرتبين
جواد :مابدك تعليم تخريجي
فاروق:احااااااا
~~~~~~~~~~~~~~~•
عم تتقلب بفرشتها مليون قصة وقصة بدماغها بس حاسة حالها عم تغرق بالغلط سمعت حركة برا قامت تشوف لقت ابوها معو ابريق وكاسة شاي وعم يقعد ع المسطبة برا
شمس :مانمت لهلق
ابو بدر :مو جاييني نوم
شمس :وانا كمان
ابو بدر: جيبي كاسة شاي وتعي
راحت جابت كاسة وقعدت جنب ابوها ... صوت صرصور الليل .. وصوت ضفدع بعدين الشوي مع هدوء هالليل
شمس :شو الشي يلي شاغل بالك
ابوها :انتو يا بنتي ... خايف عليكن من غدر هالزمان .. خايف اتركن لحالكن تصارعو بهل الدنيا
شمس : ليش شو صاير علينا الحمد لله عايشين وغير شكل
ابوها : بس قد ماكان يابنتي البنت مافيها تضل لحالها .. متمني شوفكن ببيوتكن معززين مكرمين وولادكن تلعب حواليكن ... موت وانا متطمن
شمس :لا تحكي هيك الله يطول بعمرك ونحنا كتير مبسوطين بهي الحياة
ابوها :هكلان هم اختك قمر كبرت ومحدا دق بابها
قاطعتو : لساتها بعز صباها من وين جايبين هالخرافات اذا وحدة قطعت ٢٠ بتعنس
ابوها :هيك طباع اهل هالضيعة وعقليتن وصعب تتغير
شمس :الله يسامحك ماجيت تحطنا غير بهي الضيعة
ابوها : هالضيعة من الضيع المعروفة بالمنطقة ويلي بفوت عليها هو بأمان مشان هيك استقريت فيها اول ماجيت عطوني الامان وبعدني لهلق
شمس :طيب نحنا ماعنا ضيعة او مدينة نروح عليها ..
ابوها : انا كنت وحيد اهلي ابي مات قبل جدي وما ورتت شي ... وامك كانت من العمال يلي تشتغل تعرفت عليها وتزوجنا واهلها رحالة مدري وين بأيو ارض صارو
وضيعة ابي ما الي شي فيها ... واهلها ناس وسخين خفت عليكن ... صح هون مالكن نصيب بس مأمن عليكن ناس تربو ع الشهامة والعين الشبعانة
شمس : وجهة نظرك انا ولابعمري رح حبن
ابوها تجاهل حديثا وكمل حديثو الاول : وخايف على نجمة جوزها تركها وراح هية وهالولد
شمس :حكتو اليوم قال عن قريب بتعرف ياحرام بتحزن كانت عم تبكي خايفة يتزوج عليها
ابوها : وخايف عليكي
شمس : ليش خايف علي ... لا تاكل همي انا قد ميت رجال ... وبعدين هكالانين هم بكرا ويمكن ما نصبح خلص خلينا نعيش كل يوم بيومو وربك يلي خلقنا مارح ينسانا
ابوه :والنعم بالله
شمس :بابا .. بدي اسألك سؤال
ابوها :اسألي
شمس : هلق جدك ماكان لازم يعطيك شي قبل مايموت يعني حتى لو ابنو مات انت ابن ابنو
ابوها :جدك مادخلو لأنو كان تعبان وما وعيان على هالدنيا .. الحق على عمامي اخدو كلشي وطلعوني برا .. كانو ولاد حرام اذا البيت يلي كان لأبي اخدوه مني وقلعوني
شمس :لو بصرلك بتنتقم منن
ابوها :لااا ... في الله .. ويمكن مظبوط مايكون الي شي
شمس :طيب لو هنن كانو لنفترض انو بمحنة انت بتساعدن
ابوها :اذا بقدر اي
شمس :عنجد
ابوها :المعاملة مع الله يابنتي وعند ربك مابضيع شي
سكتت شمس وشردت قدامها وكأنو لقت جواب لسؤالها
هزت براسها وقالت : المعاملة مع الله
قامت وفاتت تنام فرشة نايمة عليها نجمة وابنها .. وفرشة قمر وفرشتها فاضية قعدت فيها وانتبهت عحركة قمر وكأنو مو نايمة
تمددت بفرشتها وحكتها :ليش لسه مانمتي
قمر فتلت لعندها وقالت :شمس ساعديني
اتجلست شمس واطلعت فيها وقال :بشو
قمر : شوف جواد
شمس :انت جنيني يعني
قمر :هو هاليوم وبعدها كلشي رح ينتهي .. حابة عيش معو اخر يوم وبعدها معد بدي شي من هالدنيا ... الظروف اكبر مني ومنو وخلص والله قررنا الانفصال ومافي رجعة .. بس هاليوم ... وهو قال مارح يطلقني لنكون مع بعض يوم كامل وانا بدي اخلص خلص حط حد لمشاعري ولحياتي واقطع الامل لأنو طول ما اسمي ع اسمو رح ضل اتأمل بشي بعمرو مارح يكون الي .. وبنفس الوقت حابة كون هاليوم معو
شمس :مابعرف .. مابعرف
قمر :انت ذكية بترجاكي لاقيلي شي حجة
شمس :شو هالحجة يلي بدي لاقيلك اياها تغيبي عن البيت يوم كامل
قمر :مابعرف .. حبابة فكريلي فيها... بعطيكي التلفون ايمت مابدك وخليه معك عطول كمان
شمس :هه شو شايفتيني بنت صغير عم تغريني بهيك شي انا اصلا رح اشتري تلفون جمعت حقو ورح اشتريه عن قرب
قمر :بترجاكي شمس ... هي امنيتي بهل الحياة
شمس : طيب ايمت
قمر : لحتى اقدر لاقي حجة هو جاهز
شمس : طيب ماشي رح فكرلك
قمر : تسلميلي يا احلى اخت .
شمس :ماتخيلت بحياتي ساعد حدا بهيك شي
قمر : بس انا ما اي حدا
شمس :حسبي الله ونعم الوكيل
قمر :اي صح مافي بهل القصص يلي عم تقريها شي حجة
شمس :قمرر ناامي
~~~~~~~~~~~~~~~•
الصبح بكير
شمس عم تفيق قمر بخفت :قمرر .. قمرر
فاقت قمر وقالت شوفي
شمس :قومي اتجلسي .. مابدك تشوفيه
اتجلست وحكت :كيف
شمس :قومي فوتي ع الحمام ومثلي انك عم تستفرغي وبعدها بتقولي في اسهال وبتتوجعي من بطنك كتتير
قمر :ليش كل هاد
شمس : مشان انزل انا واياكي ع المدينة نشوف دكتور
قمر :وبعدين
شمس :بنقول انك بدك تنامي ليلة بالمشفى وانا بنام معك
قمر :وبركي حدا من اهلك صار بدو يلحقنا
شمس :مانن فاضيين وبعدين انا معك .. استأجرولي غرفة جنبكن
قمر : لكن رح ابعتلو خبر انو اليوم
شمس :ماشي بس بالاول قومي واعملي حالك عم تستفرغي ومتل ماوصيتيك ضلي طالعة فياتة ع الحمام اسهال واستفراغ
قمر :يلا
قامت فاتت ع الحمام وبلشت تطالع اصوات انها عم تستفرغ وحست عليها امها وطلعت فورا من الغرفة التانية وصار تدق ع الباب واجت شمس لعندها
شمس :هي قمر طول الليل تقول بطني عم يوجعني وهلق عم تستفرغ
صباح : انا رايحة اعملها كاسة نعنع
شمس :اي ماشي .. وانا رح ابعت للمرابعي انو مانا رايحين اليوم ع الشغل
صباح :اي ماشي
~~~~~~~~~~~~~~~~•
فايق الصبح بكير بنشاط وراح قعد مع امو وابوه عم يشريو قهوة الصبح بكير
فاروق :صباح الخير
ردو :صباح النور
فاروق : اي شو هالرواق
امو :والله نحنا عطول بنفيق بكير بس انت ولا مرة عملتها
فاروق :وعملتها اليوم مابتشربونا معكن
ابوه :اي قوم فز جيب فنجان وتعا
جاب فنجان واجا
امو :عجب فايق بكير
فاروق : عم اتعود .. والشغل بالارض بدو فيقة بكير
ابوه :اي ها .. بلشت تفوت بالجو
فاروق :شوبدنا نعمل ... اليوم جاي سم ومواد كيماوية لنرش المحاصيل في حشرة عم تاكل الزرع
امو :الله يوفقك انتبه والبس شي واقي
فاروق :لا انا بس رح استلمن رح جيب كم واحد شغلتن هالشغلة هنن يلي ببخو كل المحاصيل
ابو القاسم :اي ابي وانتبه حتى وانتو عم تنزلوهن لأنو هاد سم مرُكز وكل علبة بتنحل بصهريج مي
فاروق :اي ولا يهمك ..
شرب اخر شفة قهوة وقام : استودعناكن
امو :الله معك والله يفرحني فيك ... بس ايمت هالولد ناوي يحط عقلو براسو ويخليني زوجو
~~~~~~~~~~~~~~•
قمر متمددة بفرشتها بايدها كاسة نعنع وعم تشرب منها وجنبها شمس عم تقلها بصوت واطي :اتوجعي .. اتوجعي
قمر: اااه يا بطني ... ااااه
شمس :قومي ع الحمام
قامت قمر عم تركض ع الحمام وايدها ع تمها
شمس :اميي قمر مامشي حالها انا رح اخدها وانزل ع المدينة نشوف شي دكتور
صباح :رح انزل معكن
شمس :لاا شو تنزلي معنا ... انا باخدها ضروري نشنطط كل العيلة خلص انا بروح معها وبطمنك عنها بظن التهاب امعاء بس خلي الدكتور يشوفها افضل
صباح :طيب روحو .. وطمنوني اول ماتوصلو
شمس :ولا يهمك .. انا قايمة شوفها بالحمام وخليها تلبس
~~~~~~~~~~~~~~~•
بالمرزعة وقدام البيت الصغير واقف فان تابع لشركة وعم ينزل عبواة المبيدات وكان معن فاروق ... بوصلة المرابعي جايب العمال
كان فاروق عم يحاسب الزلمة وعيونو على العمال يلي عم تنزل من السيارة
مشي الفان وفاروق اتجه لعندن
المرابعي :صباح الخير
فاروق :صباح النور ... شو كأنو ناقصين العمال
المرابعي : اي والله في قمر وشمس اتصلو فيني وخبروني انو قمر تعبانة شوي واليوم مو جايين
فاروق :اي ماشي ... فوتو هدول لجوا قبل ماتبلشو
المرابعي : انا حكيت مع الزلمة يلي برش المبيدات قال مانو فاضي هالكم يوم
فاروق : اي مو مشكلة ... انا رايح انت اهتم بالشغل اليوم
المرابعي : ماشي لاتاكل هم
~~~~~~~~~~~~~•
قاعدين بالسرفيس يلي متجه ناح المدينة ... وقمر قاعدة جنب الشباك وسارحة ... عيونها بلشو يقطرو دموع
انتبهتلها شمس : قمر انت منيحة
مسحت دموعها وقالت :مابعرف ... المفروض يكون أحلى يوم ولا اتعس يوم
شمس : شو رأيك نرجع
قمر :واذا رجعنا شو رح يصير
شمس : ممكن نماطل بالقصة بركي الله بيفرجها عليكن
قمر : مافي فايدة بالمماطلة .. خلص خلينا ننهي هالقصة
شمس :طيب خلص هلق اجلي البكي استمتعي بهل اليوم معو وبعدها لكل حادث حديث ..
قمر:المشكلة عرفانة شو ناطرني بعد هاليوم ..
شمس :خلص قمر مابتعرف الايام شو مخبيتلك ممكن تنسيه ويمكن تحبي من بعدو ويمكن تكونو لبعض انت تفائلي بالخير .. خلص خلي الايام تمشي متل مابدها
هزت براسها واكتفت بالصمت
وصلو لقدام مشفى ونزلو
قمر :ليش انزلنا هون
شمس : بدك تكون الكذب ناقصة يعني تعي لقلك
فاتو لجوا وشمس شافت ممرضة واقفة جنبهم تحكي ع التلفون
شمس :صباح الخير
الممرضة :اهلين
حطتلها مصاري بجيبتها وقالت : اختي متقاتلة هي وحبيبها ومشان نخلين يرجعو لبعض قلنالو انها بالمشفى .. من بعد اذنك بس صورة عشي تخت
الممرضة : بس هيك .. اي تعو معي
مشو وراها وحكت شمس :واذا في كيس سيروم معلق بايدها بتكوني فضلتي ع راسنا
الممرضة :ولا يهمكن .. بس مابتجيبو سيرة لحدا
شمس :لا لا رح ناخد الصورة من هون ونروح فورا من هون
دخلتهن ع غرفة فاضية وتسطحت قمر ع التخت والمرضة لزقتلها نبريج صغير فوق ايدها عأساس سيروم وصورتها شمس عدة صور
وبعدها شكرو الممرضة وراحو
قمر : عنجد انت فظيعة
شمس :كل العالم بتعمل هيك وقفت علينا
طلعو لبرات المشفى وحكت شمس مع امها
:الو ... اي امي ... اي فحصها الدكتور ومعها التهاب امعاء علقلها سيروم وبس يخلص بيرجع بشوفها ... لا لا شو تجي انا معها ... ولاتخافي عليها هلق ببعتلك صورها هي منيحة وارتاحت شوي ع السيروم ... طيب ماشي بخبرك شو بصير معي ... الله معك
سكر وقالت لقمر :فيكي تروحي تعيشي يومك
قمر :طيب كيف بدنا نكمل الكذبة
شمس :بعد الضهر لما بعرف انو انقطع السير ع الضيعة بخبرها انو مامشي حالك ورح نخليكي لبكرا الصبح
شمس :والتلفون رح خليه معي اذا امي اتصلت بقلها انك نايمة
قمر :طيب عطيني شوف جواد وين صار
~~~~~~~~~~~~~~~•
عم يسوق بأيد وحدة والتانية مجبرة بس بدون حمالة ... رن تلفونو فتح السبيكر ورد :الو ... اي ... اي انا قريب منكن شوي وبكون عندكن
سكر ومشي شوي لوصل لقدام المشفى وشافن واقفين ع جنب ... اول ماشافها تسارعت دقات قلبو وكيف صف ونزل من السيارة مابيعرف ..
وصل لعندن هية خجلت وشمس حاولت تبعد شوي
وبدون مايحكي ولا كلمة ضمها بأيدو السليمة بقوة عصدرو ومع ضمتو الها انهارت من البكي ومع بكاها ضمها اكتر وحط راسو على كتفها وصار يبكي
شمس واقفة عم تراقب الوضع وتلقائيا صارت تبكي معن
بعدت قمر عم حضنو بصعوبة وصارت تتفقدو اول مرة بتشوفو بعد الحادث
جواد :مافيني شي لا تخافي .. كان في شوية جروح كلو راح لسه ايدي كم يوم وبفك الجبصين عنها
قمر :الحمد لله عسلامتك
جواد :الله يسلمك ... نمشي
قمر :ع وين
جواد : نفطر بشي مكان وبعدها وين مابدك هاد اليوم الك
قمر :وانزل ع السوق شوي
جواد :تكرمي
قمر :شمسسس نمشي
قربت شمس منن وسلمت عليه :مرحبا
جواد :اهلين
شمس :روحو انتو انا بدي اتفتل شوي
قمر :مابدك تروحي معنا ع الاوتيل
شمس :بس قولولي شو اسمو وانا بلحقكن
جواد :اوتيل الشرق وفي غرفة محجوزة بأسمك
شمس :اي خلص لكن روحو انتو
قمر :وين بدك تروحي
شمس : بدي اشتري موبايل وطلع خط باسمي وفعلو واتفتل شوي بالسوق
قمر : طيب ماشي
جواد :عايزة مصاري
شمس :لا شكرا ... قمر التلفون رح يضل معي متل ماحكينا
قمر :ماشي
جواد وقمر ركبو السيارة وانطلقو وشمس وقفت تاكسي وراحت
~~~~~~~~~~~~~~~~•
ساحبها من ايدها بمررات الاوتيل لوصلو للغرفة المطلوبة فتح الباب بالكارت يلي معو ودخلو
قمر :عأساس بدنا نروح نفطر
جواد :بنفطر هون عأساس شمس تجي معنا بس ما زال لحالنا خلينا فعلا لحالنا
قمر : بس انا كان بدي انزل ع السوق واشتري شوية شغلات
جواد : بنشتريها بعدين .. تعي حابب نقعد ونحكي
قرب منها وحط راحة كفو على خدها
وعيونو بعيونها
جواد :في عندي كلام كتير حابب قولو بس كلو معد ينفع ... انا اسف قمر ... اسف على كلشي ... ماتمنيت توصل الامور لهون بس صدقيني حاولت كتتيييير ... اسف لأنو رح اتركك بنص الطريق ... اسف لأنو ما كنت رجال وقد كلمتي ... اسف على انانيتي وخليتك تنجري وراي.... اسف على هاللحظة كمان ... اسف على كلشي
قمر :انت مادخلك ... انا يمكن كان في حق علي .. اتطلعت لفوق لشي مو الي ... انا كمان اسفة علقتك فيني وقلت بكرا الا ماتظبط ... بس كان لازم افهم من الاول ... مشيت ورا احلام وهالاحلام رح تضل طول عمرها احلام وبحياتها ماتصير واقع
جواد :متمني الوقت يوقف هون وبس
قمر : هيك انكتب علينا ولهون قصتنا بتخلص
جواد : مابدي كون اناني اكتر من هيك ... بس ياريت مانترك ونضل هيك ع القليلة بتضلي الشي السري الحلو بحياتي
قمر : لا جواد لهون وبكفي ... اذا كملنا محدا رح يقدر يعمل شي بحياتو ... لازم تشوف حياتك وتبني اسرة وتصير اب ... بس (غصت ) لاتكون عليهن ظالم (ونزلو دموعها )
ضمها بقوة وصار يبكي متل الولد الصغير
بعد عنها وقال : اخر فرصة .. بترجاكي قمر اخر فرصة خليني اقنعن
قمر :لا جواد ... حتى لو قبلو مارح كون مبسوطة .... مارح يتقبلوني
جواد :بنعيش ببيت لحالنا
قمر : جواد انا ناهية هالقصة بترجاك لاترجع تخليني نفتح نفس الموضوع بعد المرة المليون
مارح تتحمل انا اشكيلك على اهلك او اهلك يشكولك مني وماتعود تعرف الصح من الغلط ... وانا مابقدر عيش بين ناس بيكروهني .
جواد :وحبي انا
قمر : رح ضل عايشة على ذكراه لأخر يوم بعمري
بعد صمت
قمر: شو صار بالفطور ... خلصنا حاج نكد خلينا ننبسط بوقتنا يمكن بكرا ما نصبح
جواد :الموت علي اهون من فراقك
قمر :بعيد الشر عنك ...
هالمرة هية مسكت وجهو بين كفوفها : جواد نحنا غلطنا ولازم نوقف هالغلطة هون واذا ربك كاتبلنا نرجع نجمتع مافي قوة بالدنيا بتقدر توقف بوجهنا ... خلص وكل امرك لرب العالمين
جواد :دخيل اسمك يارب
قمر : يلا خلينا نفطر .. قصدي نتغدا لانو مرق وقت الفطور وبدي انزل ع السوق .. مخططة براسي لسهرة كتير حلوة
باسها من راسها وراح لعند التلفون يطلب غدا
~~~~~~~~~~~~~•
ماشية شمس بالشارع ومعها جوال جديد عم تتفقدو ... لوصلت لمكان وضبت الجوال بالجزدان يلي حاملتو واتطلعت ع المبنى يلي قدامها وكان مركز شرطة والناس فايتة طالعة وفي شرطة حرس وشرطة جاريين شخص
شمس :فوت ولا لأ ... طيب اذا فتت شو قلن ... خلص مارح فوت ورح خبر حدا كبير بالضيعة يتصرف .. شو مفوتني هالفوتة
التفتت لتغير طريقها لتصطدم بشخص كان عم يحكي ع التلفون وصرخ فيها :ما تنتبهيي وكمل طريقو للمركز
شمس :العما بقلبك شو وقح
تشجعت وفاتت ع المركز
..................
قاعدة قدام شرطي وهو عم يحكي بضجر
: عن مين بدك تشتكي
شمس :مابدي اشتكي ع حدا
:لكن ليش جاي
شمس :جاي بلغ عن عملية سرقة
:طيب شو انسرقلك
شمس :ما انسرقلي
رما القلم من ايدو بعصبية وقال : شوو حزيرة
شمس :ماعم تعطيني مجال احكي
كتف اديه وقال تفضلي احكي
شمس :بدي بلغ عن عملية سرقة بدها تصير
:بالله شوو .. جاي تضحكي علي انت
شمس : سمعت أشخاص عن يخططو ليسرقو
:اي ليسرقو بتجي بتبلغي وياريت تقومي تروحي بحال سبيلك لانو مانا فاضين لتهيوأتك ومن اشكالك شايفيين كتير .. واحمدي ربك انو عم سايرك وما حطيتك بالسجن لهلق
شمس بهدوء ماقبل العاصفة :وليش بدك تحطني بالسجن بالله
:لانو يلي عم تعمليه تضليل عدالة
ضربت بأديها التنتين ع الطاولة ووقفت وقالت :ايوو عدالة عم تحكي عنها ... اذا سمع ماعم تسمعني لك مو الحق عليك الحق علي جاي لحتى ساعدكن تمسكو عصابة ... والحق ع يلي حطك على هالكرسي تهيوأت قال
وقف وقال انتبهي لكلامك والااا
شمس : والا شووو بدك تحطني بالسجن (مدت اديها) وقالت تفضلل شو نااطر
: يا شرررطي
انفتح الباب ودخل نفس الشخص يلي ضربت فيه عند الباب استغربت نوعا ما شمس لانو بتياب مدنية بس ماطال استغرابها وقت وقف الشرطي بعلامات خوف على وجهو وضربو تحية
: شو عم يصير هون
:سيدي .. هي البنت جاي بدها تضلل العدالة
اشر بأصبعتو عليه وقال حكيي معك بعدين وبعدها اشر ع شمس وقال انت الحقيني
شمس :بس انا ماعملت شي .. هو يلي ماعم يسمعني وفهمني غلط
:لا تخافي تعي معي
شمس :لا لا انا خلص معد بدي اشتكي ع حدا ولا صاير شي معي اصلا
:اسمعت سيدي كانت بدها تضللنا
: انا سمعت الحديث كلو و لو سمحتي يا انسة تفضلي معي انا حابب اسمع شو عندك
هزت براسها ومشت وراها ... لتتفاجئ صارو برا المركز
شمس بقلبها :عم يقلعني بطريقة حضارية ههه بستاهل من كترة غلبتي
هو كمل ع سيارتو وهية غيرت طريقها لتروح
وقف مستغرب وقال :ع وين
شمس :فهمتا لحالي هو قلعني بطريقة همجية وانت بطريقة حضارية
فتح الباب يلي جنب الشوفير وقال تفضلي اركبي
شمس :ليش بدي اركب ... طبعا لا مارح روح معك ع محل
: بدنا نروح ع الفرع
شمس :ع وييننن
:بنفاذ صبر : فرع الامن الجنائي هنيك لازم نسمع قصتك هون مخفر عادي
شمس :بسس
:بسس شووو
شمس :كيف بدي اركب معك .. ومين انت
طلع من جيبتو بطاقة وفتحها قدامها وقال : نقيب بالامن الجنائي واسمي عماد
شمس :يعني انت مابتشتغل هون
عماد : هون وغير هون كان عندي شي وطالع وانا طالع اسمعتكن بالصدفة
شمس :طيب ماشي .. المكان بعيد؟
عماد :خمس دقايق بالسيارة
ركبت وهي متوترة لوصلو للفرع واول مانزل وفاتت وراه كل حدا يشوفو يضربلو تحية وهي ماشية خلفو .. والمكان كان الو رهبة بالنسبة الها وصل لمكتب فتح الباب وفات ودغري لورا المكتب وشلح جاكتو وقعد برياحة وهي بعدها واقفة
عماد :تفضلي ارتاحي
قربت وقعدت
عماد :شو تشربي
شمس :مي
عماد :قهوة بتشربي
شمس : اذا في شاي
رفع السماعة : كاستين شاي وكاسة مي ع مكتبي
عماد :تفضلي شو عندك
شمس :بس بالاول بدي قلك انو انا مو من هون
عماد :كيف مو من هون
شمس :انا من ضيعة الوادي
عماد : تابعة لمحافظتنا
شمس :اي
عماد :اي مو مشكلة .. احكي بالاول شو عندك لنعرف القصة بايو اتجاه رايحة
شمس :انا بشتغل بالاراضي انا واختي وثابتين مع شخص بالضيعة .. ومن فترة تغيرو العمال هدول العمال بيجو من برات الضيعة بيتشغلو عنا وسمعتن عن يخططو يسرقو الضعية
عماد :لحظة شوي انتو شو بتشتغلو بالظبط
شمس :كلشي بخص الاراض مثلا بنزرع بنعشب .. بنقطف هيك شي
عماد :بالضيعة مافي عمال
شمس :لا اهل الضيعة ميسورين الحال ومابطلعو اهل بيتن يشتغلو متل شغلنا وبجيبو عمال من برات الضيعة
عماد : بيجو وبروح كل يوم
شمس :لا ناصبين خيم وقاعدين فيها
عماد :طيب خلينا نركز ع العمال يلي اسمعتيهن
وبلشت شمس تحكيلو كلشي بالتفصيل وبعض النقطة ما يفهمها عماد ويتستفسر عنها
واخد النقاش معن اكتر من ساعة
لرن تلفون شمس يلي هو تلفون قمر واستأذنت ترد :الو اي امي ... لا هية منيحة ... لا نايمة ... والله مابعرف ليجي الدكتور ... اي ماشي اول مايجي ويطمن عنها دغري بخبرك
سكرت ورجعت قعدت مكانها
عماد :خير صاير شي
شمس :لا لاتشغل بالك ... اي هيك كلشي
عماد :عهوا حكيك مبين مو سهلين
شمس :مظبوط
عماد : واكيد هدول وحدة من العصابات يلي مدوخينا
شمس :مابعرف
عماد : وهلق كيف بدك تساعديني لفوت ع الضيعة
شمس :انا .. لا طبعا انا خلص هون مهمتي خلصت سلمتكن القصة وتسطفلو ريحت ضميري
عماد :لا طبعا ما خلصت مهمتك بالفعل هلق بلشت
شمس :بس مابقدر
عماد : لا تنسي انك ساعدتيهن كتير ليجمعو معلومات عن الضيعة يعني انت شريكتهن بطريقة غير مباشرة واذا انمسكو رح تتحولي ع التحقيق متلك متلن .. الا اذا ساعدتينا هالشي ممكن يساعدك
شمس : بس والله انا بالاول ماكنت بعرف
عماد :وصرتي بتعرفي وبجيتك لهون معد في رجعة
شمس :ياربي شو هالوقعة يلي وقعت حالي فيها
عماد :اهم شي انت هلق خليكي هادية مزال لسه ماصار شي سرقة مافي داعي للخوف .. بس بدنا نعرف سو خطتهن
شمس :بظن ناطرين شي مناسبة لتصير متل عرس او خطبة او نجاح
عماد : ليش
شمس :بهيك مناسبة كل اهل الضيعة بتجتمع والبيوت بتكون فاضية
عماد :وهنن بيعرفو هيك معلومة
شمس :اي (نزلت راسها ) انا خبرتن
ابتسم وقال هويتك
شمس :ليش هويتي
عماد :مو كل شغلة بدي اعطيكي الها تفسير
طلعت الهوية وعطتو اياها وكبس ع زر دخل لعندو عنصر
عماد : صوري الهوية وجبلي اياها
:حاضر سيدي
عماد : رقم تلفونك
شمس : ما معي تلفون
عماد بتعجب : مامعك تلفون؟
شمس :اي اي صح اليوم اشتريت جوال بس لسه ماتفعل الخط
طلعت التلفون الجديد وعطتو اياه هاد اليوم اشتريتو
عماد :ويلي كنت عم تحكي فيه
شمس :اااه .. اي هاد لاختي
عماد : يلي بالمشفى
شمس : لا بالاوتيل (وسكتت بعد الخبصة يلي حكتها )
عماد: انتو شو جايين تعملو هون
شمس : مافي شي ..
عماد :بدي افهم كلشي ... وكمان في نقطة بدي افهما انو ليش ماحكيتي لحدا من اهلك او اهل ضيعتك عن القصة
شمس : طيب رح احكي
واضطرت شمس تحكي كلشي للنقيب كيف علاقتهن مع اهل الضيعة وكيف مابناسبوهن وكيف اختها متزوجة بالسر وكيف ماخبرت حدا لانو مابتعرف ردة افعالهن
خلص حوارهن بعد ما النقيب صار عندو كافة المعلومات
عماد :تلفونك صار عندي ورح اتواصل معك لتزوديني بمعلومات اذا احتجت
شمس :فيني روح
عماد :اي تفضلي
وقفت لتطلع بس وقفها وقال :لأيمت ضالة هون
شمس :لبكرا الصبح
عماد :تمام
مشت شمس خطوتين ووقفت والتفتت عليه
شمس :ممكن خدمة
عماد :شو
شمس :تحكي مع امي عأساس انك دكتور وتقلها انو المريضة قمر رح تضل لبكرا لانها بحاجة كيس مصل تاني 🙂
~~~~~~~~~~~~~~~•
المسا
عيلة ابو جواد متوترين وخايفين على جواد يلي مختفي وطافي موبايلو ...
كانو مجتمعين بالصالون ابو جواد ومرتو وابنهن امجد وبعض الاشخاص .. ودخل عليهن فاروق
فاروق :خير شو صاير
ام جواد :جواد من الصبح مختفي وطالع بسيارتو وطافي جوالو .. ووضعو بينخاف عليه لسه ما طاب منيح ومافي اي خبر عنو
فاروق : ماعندك فكرة ابدا وين ممكن يروح
ابو جواد : لا والله يا ابني
فاروق : طيب اهدو وروقو انا رح حاول اعرف شي .. ولا تخافو لانو لو لاسمح الله صاير شي كنا عرفنا خبر السوء مافي اسرع منو
ام جواد : الله يسمع منك يارب طلع من عندن وهو محتار ماعم يخطر عبالو اي شي وفجأة تذكر قمر .. وبعدها فورا تذكر انو اليوم ما اجو ع الشغل
قعد ع مقدمة سيارتو واتصل بالمرابعي
فاروق :كيفك ابو ايوب .. بدي عذبك بدي رقم قمر ... اي بنت ابو بدر طيب ماشي ناطر رسالة منك .... انمسح من عندي وماكنت مثبتو
~~~~~~~~~~~~~~~•
واقفة بحمام الغرفة قدام المراية وشاردة بحالها لابسة قميص نوم مع روب فوقو وفاردة شعرها الكستنائي على ضهرها مع مكياج ناعم وبأيدها قلم الحمرا رفعتو ببطئ لتلون فيه شفافها يلي زاد من جمالها .. وسرعان ما وصلت دمعة لجنب شفتها مسحتها فورا مشان ماينتزع المكياج .. صوت نقرات ع الباب : قمر .. انت منيحة
قمر :اي طالعة
اخدت نفس عميق تستمد منو القوة وفتحت الباب لتلاقيه واقف وناطرها ولما شافها بحلتها الجديدة صابو ذهول من جمالها
قمر عم تحاول تتناسى كلشي وتفكر وتعيش هاللحظة وبس : طالعة حلوة ؟
جواد : انت بتياب الشغل كنت مطيرتيلي عقلي كيف هيك ... انت ناوية تجيبي اخرتي يعني
قمر : بعيد الشر عن قلبك ليش
جواد : انت عم تدبحيني بالشي يلي عم تعمليه وعم تصعبي علي المهمة
قمر :خلص رايحة بدل
لفت لترجع من مكان ماطلعت بس ايدو منعتها من المسير وجذبها لصدرو بقوة
جواد :اااااه يا قمر ااااااه
قمر : جواد حكينا كتير والحكي مارح يغير شي خلينا نسنتمع بوقتنا ونشبع من بعض
جواد :لو بعيش العمر عمرين وانت بحضني مابشبع منك
مسك ايدها وصار بيوسها بشوق لتعبر عن حالتو وزاد من بوساتو على ايدها وهو طالع على ساعدها وبعدها على كتفها وبعدها ع رقبتها يلي خلت حرارة جسمو ترتفع ويفقد السيطرة على حالو .. ليفرغ كلشي جواتو من قهر مكبوت وحزن واشتياق ... ليحملها (طبعا مع مراعاة ايدو المسكورة) ويروح فيها على التخت ليغيبو عن العالم ويتناسو كلشي هنن فيه
~~~~~~~~~~~~~~~~•
واقفة ع بلكونة غرفتها وشاردة ... الوحدة بتخليك تفكر كتتتييير
صوت موبايل عم يرن
شمس :ماااماااا ... اوووف منك ياقمر
لفت وفاتت لتشوف مين بس كان مكتوب( فف)
رفعت بكتافها واخدت الجوال : الو
: مرحبا
شمس :اهلين
:قمر ؟
شمس :لا اختها مين
: شمس ؟؟
شمس :اي مين
: انا فاروق
مع ذكر اسمعو اشتعلت نار بصدرها : اهلين
فاروق :كيفك شمس
شمس :الحمد لله
فاروق : خير شو صاير معكن ليش ماجيتو اليوم ع الشغل
شمس :قمر تعبت شوي وجبتا ع المشفى
فاروق :خير شو مرضها
شمس :التهاب امعاء
فاروق :وكيف صارت
شمس : بكرا بشوفا الدكتور وبخبرنا
(عم تكذب بطلاقة قد ماكذبت ع امها من الصبح )
فاروق : ايو دكتور
شمس :يلي بالمشفى
فاروق :يعني مانك بالضيعة
شمس :لا رح ننام اليوم بالمشفى
فاروق :طيب فيني احكي مع قمر
شمس : لا نايمة
فاروق :شمس مابدي خبي عليكي جواد من الصبح مو مبين واهلو مشغول بالن كتير عليه .. اجا شي لعند قمر
شمس :ااااه
فاروق :شمس اسمعتيني
شمس :اي .. لا ماشفنا حدا من الصبح
فاروق :متأكدة
شمس :اي
فاروق :لانو غياب جواد وقمر عن الضيعة بنفس اليوم صدفة صعبة شوية ماهيك
شمس :مابعرف شي انا .. وبعدين حكيه ليش عم تتصل فينا
فاروق :ما تلفونو مطفي
شمس :اذاً ضل حاول الا مايفتح
فاروق :ماشي رح حاول واذا مارد جاي لعنكن ع المشفى
شمس :اعمل يلي بدك اياه
فاروق :سلام
شمس :الله معك
سكرت وحكت ... لك رح ننفضح الله يعطيكي العافية يا قمر هالوقعة يلي وقعتيني فيها واخد لساني على الكذب ... ياترى شقد كان رقم غرفتن ..
اتصلت ع الرسبشن : الو ... لو سمحتي تحوليني ع غرفة جواد *****
بعد شوي من الانتظار : اي ماعم يرد ... طيب عطيني الرقم وانا بحاول من عندي....
~~~~~~~~~~~~•
الصبح
فاقت شمس طبعا ع رنة الجوال تجلست واخدتو بتعب وردت ... اي ماما ... اي انا هلق جاي من عند الدكتور ومعي ورقة التخريج.. لوصل لعندها بخليكي تحكي معها .. يلا نحنا ان شاء الله مشوار الطريق وبنكون بالبيت ... الله يسلمك يارب
سكرت ورن جوالها اخدتو وكان رقم وتوقعت يكون عماد
شمس :الو ... صباح النور ... لا رح شوف اختي ونمشي .... بدك تشوفني ..... اي تعا لهون لكن رح انطرك تحت بالكافية .... ماشي .. لا لا نازلة فورا
~~~~~~~~~~~~~~~~•
فتحت عيونها قمر وماكان حدا جنبها .. تجلست وعم تدور عليه بعيونها شافتو لابس وواقف على البلكون وعم يحكي ع التلفون ... لبين ما تجلست وتململت كان هو مخلص واجى لعندها
جواد :صباح الخير
هزت براسها :صباح النور ... ماحسيت عحالي كيف اخدني النوم
جواد :بس انا مارفت عيني ... طوال الليل قاعد وعم اتأملك
رفعت الغطا عنها وقالت رح بدل تيابي مشان نروح
هز براسو بدون مايعلق
~~~~~~~~~~~~~~~~•
عيلة ابو جواد مجتميعن بالحديقة وفاروق واقف معن
فاروق :اسمعتو هو منيح وانا هلق رايح جيبو خلص حاج تضلو خايفيين
ابو جواد :يلا حصل خير المهم هو هلق منيح
ام جواد : مابيعرف حالو مريض هلق وقتو هاد رفيقو
فاروق :رفيقو وانقطع واتصل فيه وبتعرفي جواد مابرد حدا حتى لو كان عم يموت بعيد الشر عنو
لف فاروق ليمشي ووقفو صوت ام جواد : ع وين
فاروق :رايح جيبو قلي تعب بالروحة بدو حدا يسوق عنو بالجية
ام جواد :اجي معك
فاروق : ليش مصرين تحسسوه انو هو ولد صغير ... بالاذن
تركن وراح لبرا كان في تاكسي ناطرتو ركب فيها وانطلق
~~~~~~~~~~~~~~~~~
بعد مرور اكتر من نص ساعة
دخل عماد من باب الاوتيل وشافها قاعدة على طاولة عم تشرب قهوة
قرب منها بخطوات سريعة
عماد :مرحبا
شمس :اهلا ... اتأخرت خفت اختي تنزل ونروح
عماد : صار معي مشكلة بالفرع واخرتني
شمس :مو مشكلة .. ليش بدك تشوفني
طلع اللابتوب يلي حاملو معو وحطو ع الطاولة وقال هون في عنا صور لاقطتهن كاميرات مراقبة لحرمية وبدي تشوفيلي اذا حدا منن بيشبه حدا من عنكن
شمس :اممم ماشي فهمت عليك
ندهت للكرسون : لو سمحت فنجان قهوة والحساب عغرفتي
عماد :لا انا بدفع
شمس :مو انا يلي رح ادفع ههه
بعد قعدة طويلة شوي وهنن عم يشوفو الصور
شمس :مافي ولا واحد عم تتطابق صورتو مع حدا منهن ... ومابظن يلي عنا يتركو شي وراهن
عماد : طيب انا اذا بدي روح ع الضيعة كيف
شمس :بعد ماروح ع الضيعة بنحكي وبنشوف شي طريقة .. بس ليش
عماد :بدي اعرف كلشي عن الضيعة مداخلها ومخارجها وكل طريق وكل زاوية
شمس :والعصابة
عماد : لا وجه لوجه لا بخاف يكونو بيعرفوني بس بدي منك اذا بتقدري تصوريهن
شمس :هالشي صعب
عماد :وانت قدها
دخل من بوابة الفندق فاروق وهو مبتسم وعم يتذكر حكي شمس وانهن بالمشفى وعم يحكي بينو وبين حالو رح حطها على عينها وفرجيها اني كاشفهن ... لتتلاشى الابتسامة والافكار من راسو وقت شافها قاعدة مع شب غريب
حس بالانزعاج والضيق وكمل لعندن
وشمس شافتو جاي من بعيد
شمس :هاد شو عم يعمل هون
التفت عماد ع فاروق يلي جاي اتجاهن وقال :مين بكون
شمس :فاروق صاحب الارض ... بس شو بدنا نبررلو مين بتكون انت .... نحكيلو لأنو اكيد رح يسأل
عماد :طبعا لأ ... اذا هالحكي طلع لشخص تالت فشلت الخطة .... لا تقلقي انا بتصرف
وصل فاروق لعندن وعيونو عم تغلي وهي مثبتة عليها : مرحبا
شمس وعماد : اهلا
وقف عماد ليصافحو وفاروق صافحو وعيونو على شمس ما انشالت
فاروق : ماتعرفنا ؟
عماد :عماد
فاروق :وانا فاروق بس مين بتكون حضرتك لحتى قاعد مع بنت ضيعتي بتقربو بعض شي
عماد :لا ... انا و شمس بنحب بعض
شمس من صدمتها كانت بدا تصرخ وتقول (شوووو) بس ماكانت قادرة تنطق ولا حرف
زاد احمرار وجه فاروق يلي اشتعل من الغضب والغيرة بس مافيه يحكي اي شي وقال :اااه مامعي خبر انو شمس عندا حبيب
شمس اضطرت تتابع الكذبة وقالت :انا وعماد تعرفنا ع التلفون ومن فترة بنحكي مع بعض .. واستغليت نزلتي لهون لألتقى فيه
فاروق :اي تشرفنا ... وانا بكون من نفس ضيعة شمس
عماد ضل واقف وقال : تشرفت بحضرتك ....حبيبتي بدي استأذن بحكيكي ماشي
وقفت وقالت :ماشي الله معك
راح عماد وفاروق قعد مكانو : وينو جواد
شمس :هلق بينزل هو وقمر
فاروق :ماكنت مفكرك موهوبة لهل الدرجة
شمس :بشو
فاروق :بالكذب
شمس :قصدك ع جواد وقمر
فاروق :اي كنت عم تحكي بطلاقة ومامبين انك عم تكذبي بالمرة ... بس بعد هلق مالازم اتفاجئ قاعدة مع شب بنص البلد باوتيل وعم تقولي حبيبي ماكان مبين عليكي ابدا انك تبع هيك حركات
شمس :حركات شو
فاروق :والله مابعرف اسألي حالك
شمس :صح انا وعماد بنحب بعض بس اكيد مافي شي من يلي عم يخطر على بالك
فاروق : ههههه لا طبعا مارح يخطر عبالي شي وانا شايفكن عم تلتقو بالأوتيل
شمس :قاعدين هون قدام كل العالم ولو في شي من يلي عم تفكر فيه بستقبلو بالغرفة مو هون
فاروق :مافرقت كتير ... من ايمت بتحبو بعض
شمس :تحقيق
فاروق : لأ بس بدي اعرف بنت ضيعتي شو عم تخبص وشو السمعة يلي رح تجيبها للضيعة
شمس :انت شو عم تقول ... اكيد مارح يصير شي وعماد شب محترم وماعندو هالحركات ابدا
فاروق :مزال ماعندو هالحركات وعجبتيه بيت اهلك موجود
شمس :اي ... اي طبعا بدو يجي يخطبني بس مو هلق لساتنا بمرحلة التعارف
فاروق :لمرحلة التعارف في شي اسمو فترة خطبة
شمس :لا تحاصرني بحكيك .. وعماد ابدا مانو هيك وهي حياتي وانا حرة فيها
فاروق :لا مانك حرة وقت بتكوني ربيانة بضيعة ع العادات والتقاليد والحرام والحلال
شمس : شو يعني حديثك
فاروق :مزال بتحبيه وبحبك عنجد خليه يجي يطلبك ... واذا لأ يا اما بتتركيه او رح اضطر خبر ابوكي
شمس :تخبر ابي ؟؟بصفتك شو
فاروق :لما ابوكي مأمنكن عنا وعم تشتغلو بكل امان ومحدا بيقدر يتعرضلكن مضطر خبرو اذا شفت اي غلط
تخربطت شمس ومعد عرفت شو تحكي او تقول وشو الشي يلي انحطت فيه خلال دقائق وصفنت بفاروق يلي انقلب من شب رايق ومهضوم لانسان جدي ... ومع هيك من اول ما لمحتو لهلق قلبها ماهدي
اكتفت بالصمت ومراقبتو وهو منزعج والشعور الحلو يلي عم تحسو وهي قريبة منو
شمس بقلبها : انا بحبك الك .... انت حبيبي السري يلي رح تكون بطل احلامي اما بواقعي للأسف ... حبيت كتير خوفك علي يا اسمري الملتحي
~~~~~~~~~~~~~~~•
بنفس الوقت فوق بغرفة جواد
زبطت حجابها على المراية والتفتت عليه يلي عم يراقبها بكل حركة وبكل تفصيل ... قربت منو وهو وقف قبالها
قمر: يلا جواد ..... يلا جواد قولها
جواد : قبل ما قولها بدي قلك انا اسف ... وبدي قلك انو حبيتك اكتر من اي شي ورح ضل حبك لاخر يوم بعمري ومين ما اجا مكانك الحب يلي بقلبي الك وبس
دموعها ماكان بدن استئذان ابدا ونزلو على خدودها
جواد : واذا احتجتي شي انا جنبك .. شو ماكان الشي اطلبي ولا تتردي وافهمي منيح انو في شخص بحبك لحد الموت وبيفديكي بروحو ... الله يسامحن اهلي الله يسامحك يا امي الله يسامحن .... والي عندك طلب بترجاكي ما تدعي على امي وتسامحيها
هزت براسها بصمت وبدموع عم تحكي كلشي
طلع من جيبتو ظرف ومدو الها وقال هاد متأخرك يلي اتفقنا عليه
قمر :بس ..
قاطعها وقال :لا رح تاخديهن حطن ع الطاولة قدامها مع ورقة عقد الزواج ....وفتح ايديه لترتمى بحضنو واجهشت بالبكي وهو نزلو دموعو بدون وعي ... بعدت عنو وقالت بترجاك بكفي
مسح دموعو بأيدو السليمة وقال :انت طالق
فتح الباب وطلع وهية قعدت بالارض منهارة ع الاخر وكأنو نفذت كل طاقتها بالمقاومة انها تضل صامدة
مافي دقايق وفاتت شمس لعندها قعدت جنبها وضمتها
شمس :ليش كل هالبكي
قمر :خلص ... راح كلشي ...وحتى الامل الصغير يلي كنت متأملة فيه راح
شمس : يمكن كلو خير ... بس انت كوني قوية وصدقيني كلو رح يمرق
قمر حطت ايدها على صدرها وقالت: وهاد الوجع
شمس :رح يخف ... يلا قومي غسلي وجهك لازم نرجع ع بكير
هزت براسها وقامت
~~~~~~~~~~~~~~~~•
راكبين بسيارة جواد فاروق يلي عم يسوق وجواد قاعد جنبو بس محدا فيهن عم يحكي شي ... جواد شارد بالطريق وحزين وفاروق كمان منتبه ع الطريق بجمود ومن جوا كتير مقهور
~~~~~~~~~
ومن جهة تانية شمس وقمر راكبين بالسرفيس وراجعين ع الضيعة قمر حالتها مابتقل عن حالة جواد .. اما شمس عقلها مشغول بالشي يلي صار معها وطبعا زعلت لانو كذبت هالكذب على فاروق بس هية هاد يلي بدا اياه تحبو من طرف واحد من دون مايحس حتى لو على حساب وجع قلبها وماتنحط مكان قمر او نجمة
وطلعت ع الراديو غنية لوائل جسار (خليني ذكرى جميلة )
وكمان طلعت عند جواد وصارو يسمعوها بنفس الوقت وكأنها بتحكي عن قصتهن بالفعل
{ خلي الفراق .... اجمل فراق ...في دنية العشاقين ... وان حد سألك عني قلوو .. كنا اوفى تنين ... قل كان حبيبي وكان حياتي وعشرة ليها سنين }