رواية بنات راعي البقر
الفصل الاول1
بقلم مريم اليوسف
لكل امرئٍ من اسمه نصيب
اسميتها قمر .. من القمر اخذت الجمال وهادئة مثله .. يأخذ بقدر ويعطي بقدر
واسميتها نجمة .. ناعمة مثل النجمة ... خافتة .. بسيطة ...تستمر بالعطاء الى حين الاختفاء
واسميتها شمس نارية مثلها ... تفرض وجودها .. وتحرق خصومها
قصتنا هالمرة بتدور احداثها بقرية ريفية
هالقرية هي كتير حلوة واكتر اهلها بتشتهر بالزراعة بالمركز الاول بسبب خصوبة تربتها ووفرة مياها ......وتربية الحيوانات وبعض الاعمال الصغيرة الاخرى يلي بتحتاجها القرية متل دكانة محل تصليح حلاق محل الكترونيات يعني فيها خدمات صغيرة للضيعة فقط .. بيمنا الشغل الكبير ومتل ماذكرنا هية الزراعة وبصدروها للخارج
ببيت صغير بهل الضيعة مكون من غرفتين ومطبخ وحمام ..و بأحد الغرف كان مدها ارضي يعني فرشات بالارض وخزانة صغيرة ... وعجنب محمل فرش وع الجنب التاني مراية معلقة بالحيط ووبعض التياب المعلقة ع العلاقة جنب الباب وعلى ما اظن غرفة نوم
قاعدة صبية معها جوال بأيد وبالايد التانية ورقة وقلم وكأنها عم تنقل شي من الجوال ع الدفتر كان خطها كتير حلو بعد ما نقشت :
{واحدة من أجمل الوصايا التي قرأتها كانت لجبران خليل جبران عندما قال "صدّقني؛ لو فقدت ما فقدت، لو كسر الحرمان أضلاعك، ستجتاز هذه الحياة كما يجتازها كل أحد، فاختر الرضا يهُن عليك العبور"..
فإن سألت الله شيئًا فسله -الرضا- يا صاحبي، فإنك إن رضيت رأيت الحياة جنة في عينيك، واطمأن قلبك، وانشرَح صدرك، وسكَنَت نفسك، وابتهجت روحك.
اللهم رضاك والجنة، اللهم علّمنا الرضا، ثم علّمنا الحمد على ما سَرَّ من أحوالنا وما ساء.🤍💭}
رفعت راسها و ومسكت القلم وقربتو من شفافها بشرود .... ومع رفعت راسها بينت ملامحها الحلوة بشرتها بين البيضة والحنطية عيونها الواسع العسليات وجهها المدور وشعرها الناعم النازل ع ضهرها وجسمها المتاسق ... وهية شاردة دخلت صبية بس مبين اكبر منها بالعمر بس جمالها مابقل عن اختها لتحكي بعصبية :ولييه شمس كم مرة قلتلك ماتقربي من جوالي
شمس :وما اكلناه كنت عم انقل كم عبارة
:جوالي لابعد تقربي عليه فهمتي
شمس :عأساس هاد الي والك يا اختي اول ما جبتيه
:وهلق غيرت رأيي ... مزال عم تشتغلي جمعي حق جوال واشتريه حاج بتروحيهن ع الكتب والروايات والشغلات يلي بلا طعمة
شمس: والله محدا بلا طعمة غيرك وبعدين الكتب يلي عم اشتريها مو غالية و والتلفون ماني بحاجتو ماعندي حدا احكي معو لا صديق ولا قريب ولا حبيب
: ع القليلة بتريحيني منك ومن قصصك واقتباساتك ... وكمان ع الفيس بوك والتلجرام في كتير صفحات بتهتم بهيك امور يعني بتستفادي وبصير تصفحك اوسع
شمس :اي والله فكرة ... خلص رح صمد حق تلفون واشتري واحد
: يوم المنى
~~~~~~~~~~~~~~•
بمكان تاني وببيت اكبر واوسع واحلى .. وبغرفة القعدة قاعدة مرى كبيرة بالعمر وعم تتفرج ع مسلسل تركي ومنسجمة : العما بقلبها ما احقرها كيف فرقتن عن بعضن ... اي واذا ابنك اخد هالبنت حتى لو فقيرة بس والله حلوة
وجنب الباب من برا واقفة صبية حلوة كتير وبتعطي شبه لشمس واختها قمر كتتير مبتسمة ابتسامة جانبية وعم تراقب المرى يلي عم تتفرج ع التلفزيون ... اتنهدت ودخلت
: مرت عمي انا خلصت شغلات البيت بدك شي مني
: والبقرة
:حطيتلها اكل ومي وربطها تحت الشجرة بالبستان
:اي روحي لكن ليش جاي عم تخبريني
:بدي روح لعند اهلي
: خبرتي جوزك
: قلي شوفي امي
:بالاول شوفي البنات اذا بدن شي
:مرت عمي البنات مو هون نزلو ع السوق
: اي صح ... لكن مافي روحة مين بدو يضل معي هون
:بس انت اجلتيني الاسبوع الماضي لليوم ... اليوم اخواتي ماعندن شغل وبدي استغل الوضع واقضي اليوم معن
سكتت وعم تفكر .... والصبية تقريبا قطعت الامل ولفت لتطلع من الغرفة بحركتها البطيئة
: نجمة ...
التفتت عليها وقالت :اي
روحي بس لا تطولي
نجمة :ماشي .. خلي فريد يروح يجيبني لكن
:لاااا بترجعي لحالك .... ولا نسينا انك متعودة ع شوفير عند اهلك
تركتها ومشت ومدت ايدها ع ضهرها تتحسسو بألم
~~~~~~~~~~~~~~~•
بنرجع لنفس البيت الاول
قاعدة مرى بحيطان ال٥٠ كمان كانت بتملك جمال نادر وجنبها بنتها نجمة ضامتتها وقاعدة جنبها
صباح الام : والله كتير عم نشتقلك وين ماعم نشوفك
نجمة : ملتهية والله بالبيت وبوليد
صباح : وليش ماجبتيه معك
نجمة : راح مع ابوه
صباح : كيفن بيت عمك معك
نجمة : مناح مناح
دخلت شمس وقمر ومعهن صينية كبيرة عليها فطور والتانية معها الخبز والشاي
شمس : يالله خلصونا حاج عابطين بعض بعدين انا وقمر بنغار ها
قمر :مظبوط انا غيورة وبتعرفو
صباح :انتو كل يوم بشوفكن بس نجمة كل حين ومين ليتحننو عليها بيت عمها وييعتولنا اياها نزورها
نجمة : مادخلهن والله
شمس :خلص لاتحلفي سمو بلله
بلشو يفطرو بهدوء وصمت والنظرات عم تتناقل بينن وبين بعضن
الام صباح وبناتها التلاتة الكبيرة قمر ٢٨
والتانية نجمة ٢٥ والتالتة شمس١٩
جمالهن مميز وفريد والظاهر والجمال وراثة من امهن صباح
رن جوال قمر وهنن عم يفطرو قامت لتشوف مين وقالت :هاد ابي
صباح :ردي ردي وشوفي شبو
قمر :اي بابا .... عنجدد ... الله يبشرك بالخير يلله يلله رح خبرهن ... اي وانت كمان لاتطول عنا نجمة ... امم ... طيب ماشي
سكرت والكل نظراتو عليها بتسائل
صباح :شو شبو
قمر :واخيراً ابو رأفت رضي يبيعنا الارض
نجمة :هي الارض ماغيرها
قمر :لك ايي هي الارض يلي قاعدين عليها
شمس بلا مبالاه : مع البيت
قمر :ايي طبعاً
صباح :الف حمد وشكر الك يارب ... واخيرا ... رح يصير البيت النا ونرتاح من هم الاجارات
شمس :وعشو مبسوطين بالله
قمر :كيف يعني ليش مبسوطين .. يعني هاد البيت واخيرا رح يصير النا ومحدا الو دخل فينا
شمس : لا.. يكتر خيرو ابو رأفت رضي يتحنن علينا ويبيعنا البيت بعد ما نشف قلبنا ونحنا ندفعلو اجار ... بس عجب رضي يبيعنا حفينا ونحنا نقنعو عجب هلق حتى رضي .... طول عمرنا نصمصر لحتى قدرنا نجمع حقو ولما رحنا نشتريه رفض ... شو عدا مابدا ... وانا علي ضل قاعدة طول عمري بالاجار ولا اتملك شي بهي الضيعة .... وانا اصلا من زمان قلكن خلينا نطلع بس لأ انتو معندنين وهون رزقتنا وهون رزقتنا ...
قمر :يقطع عمر الشيطان خلينا فرحانين بهل الخير شبك متل البوم
شمس :اذا هالخبر فرحكن فأنا اتعسني وكتير .... كان عندي امل انو نطلع من هالضيعة المشؤومة بس بعد مايصير البيت والارض النا معد عندي ادنى امل
تركت الاكل وقامت
قمر :عطول هيك شايلة هالسلم بالعرض وماشية مابتقول قاعدين ومستورين والحمد لله
صباح : يمكن معها حق ... بحياتها الضيعة ماكانت النا ولا اهلها حسسونا انو نحنا منن وفيهن مع انو صرلنا عمر قاعدين بيناتن بس بضلو يعاملوكي كأنك غريبة
قمر :اي ماصار شي احكي مع ابي وبنطلع ارض الله واسعة
نجمة :بالله شو وتتركوني هون لحالي
شمس من الغرفة التانية :لا اطمني بناخدك معنا يوم المنى يوم بتتركيهن
قمر :شمسسس
صباح :اااخ منك يا ام اللسان طويل
رجعت شمس قعدت معن ع السفرة وقالت :ماني متعودة ازعل على الاكل خلونا ناكل وبعدها لكل حادث حديث
خلصو اكل وقامو شالو الاكل وراحو يجلو الجليات .... قامت نجمة وكأنها عم تجر رجليها جر وماسكة ضهرها ومبين عليها التعب والوجع
شمس :شبك نجمة من وقت جيتي حاسستك تعبانة فيكي شي
نجمة :لا وجع خفيف من اسفل ضهري نازل ع رجلي
قمر بأهتمام :ورحتي ع الدكتور
نجمة بلبكة:اي اخدني فريد وعطاني دوا عم اتحسن
شمس :جبتيه معك خدي حبة مبين انك تعبانة
نجمة :اي جبتو
شمس اقعدي انا بجبلك اياه وينو
نجمة :بجزداني
راحت شمس ل ورا الباب عند العلاقة نزلت جزدان كان معلق وبلشت تدور فيه لطلع معها ظرف حب
برمتو ع نجمة :هاد ؟
نجمة :اي هاد هو
رجعت الجزدان ع محلو واتطلعت ع الظرف بغير قصد لتنتبه على اسمو ترامادول
شمس :هااد الدوا....!!!!
نجمة : شبو
شمس : مين وصفلك اياه
نجمة : الدكتور
شمس : طيب بس هيك لحالو
نجمة : اي ليش شوفيه
قمر : شبو هاد الدوا
قربت شمس من الباب وشافت امها برا عم ترش اكل للجاج واتطلعت بأخوتها الكبار
شمس : ترامادول
قمر : شو يعني
شمس : مسكن وكتير قوي وكترتو بتعمل ادمان ... مستحيل دكتور يوصفو ... او ممكن يوصفو مع دوا تاني يعني علاج ... اما مسكن لحالو كيف هيك
اتطلعت قمر وشمس بنجمة باستفسار
شمس : رحتي ع الدكتور عنجد
نزلت راسها : لا
قمر : وكيف جبتي هاد الدوا
نجمة : رحت ع الصيدلي وطلبت منو مسكن قوي لأنو المسكن العادي ماعم يمشي حالو .. شرحتلو وضعي وعطاني هاد الظرف وقلي انو عند الضرورة وبس رح يعطيني هاد الظرف ومابيعطيني غيرو مرة تانية ولازم روح ع الدكتور
شمس : وليش مارحتي ع الدكتور
نجمة :.....
قمر :ماقلتي لفريد
نجمة : قلتلو قلي عادي بكرا بروح الوجع
شمس : وراح ؟؟؟؟
نجمة نزلت راسها : لا عم يزيد
قربت شمس ورفعتلها راسها وقالت :لا تنزلي راسك ارفعيه ... وليش ساكتة وماعم تحكي بدك تضلي هيك طول عمرك ساكتة وحقك عم يتمرمرط بالاراضي
قمر : شمس سدي تمك ... واحكي منيح مع اختك الكبيرة
شمس : سكرت حلقي .. قومو البسو بدنا نروح ع الدكتور
نجمة :لاا مابدي ماخبرت بيت عمي
شمس : وعمرن مايخبرو بدك تروحي وغصب عنك ... ولا شو رأيك يا اختنا الكبيرة (الحكي موجه لقمر )
قمر :معك حق
نجمة : مارح روح لاتعذبو حالكن
شمس :والله انتي لاتعذبي حالك .. تعي قمر نلبس
قمر :وامي شوبدنا نقلها
شمس :نازلين ع السوق متل العادة
~~~~~~~~~~~~~~~~•
داخلين على مطعم وجبات سريعة
وقعدو ع اول طاولة شافوها
قمر :منيح انو الدكتور عندو كم موعد لنجي وناكل شي شغلة
شمس :كنت حابة افتل بالسوق بس خفت ع نجمة تتعب
نجمة : كنا بنفتل عادي صرت منيحة بعد ما اخدت الحبة
شمس : لو ماطالعين مابخليكي تاخديها لك هاد الحب بيقتل الاعصاب
نجمة :وانت منلك هالمعلومات اذا مبطلة دراسة
قمر :بكون من هالكتب يلي مبلشة فيها فرم
شمس :اي بنتثقف شو فيها
قمر :وكيف عرفتي الترامادول لشو بيتاخد
شمس :قريت رواية وكان فيها شخص بياخد ترامادول بكترة وصار معو ادمان
قمر :من رواية لكن ... وبركي معلوماتك مو موثوقة
شمس :هلق بنسأل الدكتور
التفتت ع جنبها وشافت شبين قاعدين ع طاولة مجاورتهن ... الشب يلي بين عليها كان وسيم وحليوة
شمس :ليكو هالشب ما احلاه متل ابطال الروايات يلي بقراهن اسمر ملتحي ... وشوية شقار عاطية انارة لدقنو ونقاوة بشرتو وتصفيفة شعرو
اتطلعو البنات عليه وحكت قمر : قصدك ابو القميص الاسود
شمس :اي .. حتى انيق بتيابو
قمر :اي هاد فاروق
اتطلعت بأختها وقالت :فاروق ؟؟مين فاروق ... ومن وين بتعرفيه
قمر :هاد فاروق ابن ابو القاسم يلي بنشتغل انا واياكي عندن بالارض ... كان من جالي بالمدرسة
شمس : قصدك من الضيعة
قمر : ماعم قلك ابن ابو القاسم
شمس : العما ... طلع من الضيعة .. حيويتنو يطلع من هالضيعة المعتوهة
نجمة : ليش بتكرهيها لهل الضيعة ماكنت اعرف شو عملتلك
شمس : هية بصراحة هالضيعة حلوة كتير بالنسبة لارضها وهوها وميتها غير شكل بس اهلها لااا ناس متنمرين مغرورين ... بعمرن ماحبونا ولا حبونا ... بكفي وين مارحنا وين ماجينا بقولو بنات راعي البقر ... شيلك عن راعي البقر .... نسيانين ابي قديش اتعذب ليقدر يشتري شقفة ارض ويعمر عليها بيت صغير نتأوى فيه وهنن مايرضو لأنو بيعتبرونا غرب ... وشافين حالن علينا لأنو بنشتغل عندن وبيتعايور منا ... بس ابوكي ليش متمسك بهل الضيعة مابعرف
قمر :حكيك فيه وجهة نظر .. بس اكيد ابي لقى الامان بهي الضيعة ولاتنسي رزقتو هون
شمس : خلص سكري على هالسيرة لانو انفتحت مليون مرة وما تغير شي ... اي نجمة احكيلنا كيفن بيت عمك معك
نجمة :مناح
شمس :لا تلفي وتدوري ... بنعرف البير وغطاه وامك مو هون مشان هيك احكي احسن ما تضلي حابسة بقلبك
نجمة :....
قمر :احكيي
نجمة :شوو بدي احكي لاحكي ... انا رح افقع رح موت تقيق
قمر : شوو صاير
نجمة :مافي شي جديد بس انا والله معد اتحمل خالص عم موت بهداك البيت ع البطيء ... وحكي شمس صح مليون بالمية ياريت ماتزوجت وضليت معكن بعمرن ماحبونا ولا حدا رح يحبنا اذا بيت عمي يلي بيعتبروا من فقراء الضيعة رافعين مناخيرن للسما علي ... شغل بالبيت وبرات البيت ع القليلة عنكن كنت اخد اجاري من الشغل بالاراضي بس هلق غصب عني وبدون مقابل اول زواجي كل شغل البيت علي قلت مابأثر .. بعدها صار يطالعوني ع الشغل عندن بالارض وقال مو هي شغلتي قلت معلش يابنت مو جديدة علي الشغل بالارض وبتسلى .. ماكفاهن هاد وراحو جابو بقرة وانا يلي بشتغل فيها وبحلبها وقال هي شغلة ابوكي مافي شي جديد عليكي ... عم اسكت واصبر كرمال هالولد .. حتى هالولد عم ياخدوه لصفن وعم يربوه عكيفن بس بيبعتولي اياه غسلو وطعميه وفورا بياخدوه ... بحسسونني اني فيني شي مرض وبيعدي ... مابهدى لا ليل ولا نهار ياريت كنت خدامة ماكنت تعبت هالتعب ... ااخ بس
قمر :وفريد شو بيحكي
نجمة :طول ما انا ساكتة ورضيانة هو مابقول شي
شمس: اي خليكي ساكتة .. هاد وجع الضهر كلو من التعب عفكرة بكرا بتقعدي بالارض بيجو بكبوكي ساعتها لنشوف شو بدو ييفيدك سكوتك
قمر : شمس مشان الله تخرسي .. شو نسيتي ابنها
شمس :وشو جاييها من ابنها اذا صابها شي وقعدت بالارض ابنها بدو يتحنن عليها .. اذا عم ينتشأ على اديهن شوبدو يطلع منو ... كلشي والا صحتو البني ادم لانو اذا وقع بالارض محدا بشيلو ولا بيتطلع فيه
نجمة : كل حرف عم تقولو شمس صح بس ماعندي الجرأة احكيه ... انا يابنات تخطيت مرحلة التعب حاسة حالي آلة للشغل وبس اصلا ابني معد قرب مني زيادة اذا (بكت) عم يقول لستو ماما ... وانا بقلي نجمة ضمتها قمر وقالت :مشاان الله حاج تبكي
شمس :خلص ياعمري والله ماقصدي فتحلك جروحاتك
نجمة :هية بالاصل ماعم تتسكر
شمس :صار موعد الدكتور قومو وبنرجع بنقعد وبنحكي
مسحت نجمة دموعها وقامو ليروحو لتجي عينها بعين الشخص يلي قاعد مع فاروق
نجمة :بخوف يابنات هاد ابن عمي فؤاد .. اذا خبر فريد او بيت عمي ليشحروني
شمس :لك مشااان الله حاج تضلي خايفة منن امشي لشوف
قمر :اي والله نجمة مافي شي بخوف ومانك عم تعملي شي غلط مزالك مع اخواتك
وع طاولة فؤاد وفاروق فؤاد شرد شوي بالبنات وهنن عم يقومو ليتلفت فاروق ع الجهة يلي عم يتطلع عليها ليشوف ٣ بنات حلوين كلو وحدة بتقول للقمر قوم لاقعد محلك
فاروق :بتعرفن؟
فؤاد :اي وحدة منن مرت اخي بس كنت مستشبه مو اكتر
فاروق :المهم بنرجع لموضوعنا السيارة كتير عجبتني احكيلي مع الزلمة يظبطلي السعر
فؤاد :تكرم عيونك ... نمشي ؟
فاروق : يالله
~~~~~~~~~~~~~•
طالعين من عيادة الدكتور والصدمة متكسية ملامحن وساندين نجمة
قمر : ديسك !!!
شمس :ليش مستغربة .. بس الحمد لله لسه ما اتطورت حالتها والا كان بدها عملية
قمر :اول مرة بوافق شمس بشي... ليش هيك مأهملة حالك يا اختي
نجمة :والله مابعرف
شمس :جاي عبالي روح احرقهن كلن بقلب بعضن
قمر :اي هدي حالك ...وحاج تضربي مراجل
شمس :هديت حالي ... بس يكون بعلمك نجمة بدك تقعدي عنا هالفترة مافي رجعة لعند هدولاك يلي مافي بقلبن رحمة ... سمعتي شو قال الدكتور بدك رياحة وتضلي متسطحة ع ضهرك شهر ع الاقل
قمر :مظبوط ... اطمني من هالناحية مارح نخليها ترجع لتشفى وبعدها اذا بدا ترجع بترجع ع بيتها لحالها
~~~~~~~~~~~~~~•
قاعدين بحديقة الصغيرة يلي قدام البيت فؤاد وامو
فؤاد :حزري امي مع مين كنتو
امو :مع مين ؟
فؤاد : مع فاروق ابن ابو القاسم
امو :اف وشو كنت عم تعمل معو
فؤاد : هاد فاروق هوسوو السيارات ببيع وبيشتري عم يتاجر ع الخفيف ... وفي سيارة رخيصة ومنيحة صاحبها بدو يبيعها عرفت عليه فاروق
امو :وشو جاييك انت من ورا هالشغلة
فؤاد :عم حاول اكسب فاروق وصاحبو ... بدي اتقرب من بيت ابو القاسم بركي بفوت بيناتن وبلاقي شي شغلة عندن
امو :اي والله جبتها
دخل فريد عليهن واتذكر فؤاد نجمة
فؤاد : اهلين ابو الوليد
فريد :اهلين فيك ... امي وين نجمة مانها بالبيت
امو :اي راحت ع بيت اهلا
فؤاد :ع بيت اهلا ولا كانت بالمدينة وعم تتغدا بمطعم
فريد :انت شو عم تقول
فؤاد :شفتها بالمطعم مع اخواتها عم يتغدو
فريد : انت متأكد
فؤاد :والله
فريد :امي هية قالتلك بدا تروح عشي محل
امو :لا بس ع بيت اهلا ... بس بدها فركة ادن كيف هيك بتروح ومابتاخد لا اذنك ولا اذني عأساس مأمنة بعتتها لعند اهلا
فؤاد :اي عادي مافيها شي مزال مع اخواتها مافي حدا غريب
امو :كيف عادي ... مابصييرر تطلع عمحل بدون ماتاخد اذنو .. والله يا فريد اذا بتمرقلا اياها ماتلوم الا حاالك عم تفهم
فريد بغضب :بسيطة
حمل تلفونو ودقلها وماكانت ترد ... بعدها رن ع تلفون قمر
فريد :الووو
قمر :اي
فريد :وينها نجمة
قمر :معنا جايين ع الطريق
فريد :اي ماشي ناطركن
فؤاد مد ايدو ع جيبتو ومالقى جوالو
فؤاد :فريد عطيني جوالك مدري وين حاطط جوالي
اخدو ورن عليه واجا الرد .. الو ... فاروق .... ييي والله فكرت مضيعو ... اي تمام ناطرك
~~~~~~~~~~~~~~
وصلو بالتاكسي ع باب بيت احمى نجمة وفاتو البنات التلاتة من البوابة الخارجية
والتقوا بالجنينة فؤاد وفريد وامهن
فريد : مية اهلا وسهلا بالخانم وين كنتي
نجمة فريد بدي احكي معك كلمتين ع جنب
فريد :شوبدك تحكي .. ولا حابكين شي قصة انت واخواتك ... ع حد علمي انك عند اهلك ماني عرفان انك فالتة ع حل شعرك
نجمة :مو هيك القصة ... خلينا نحكي شوي جوا
فريد : جوا ولا هوون نفس الشي .. يالله احكي عم اسمعك
نجمة بسبب خجلها الزايد تلبكت ومعد عرفت شو تحكي
وهالشي خلى شمس الجريئة تنفعل وتحكي : انا بحكي عنها ...
فريد : تفضلي
شمس :والله ياصهري العزيز نجمة جاي تاخد غراضها وتقعد عنا فترة
فريد : وليش بالله
شمس : والله مرتك معها الديسك وهي جيتنا من عند الدكتور ولازمها رياحة وبظن هون مابيمشي الحال ترتاح... لانو مافيكن تكونو المرض والعلاج بنفس الوقت
ام فريد :شو قصدك وليه
شمس :يلي فهمتوه ... واختي بسببكن وصلت لهي المرحلة ... لو متأخرين شوي كان بدها عملية ... بس مين داير محدا
ام فريد :وليش مايكون معها الديسك من وقت كانت عنكن والشغل بالاراضي
شمس :شغل الاراضي لحالو مابيعمل ديسك .. بس مليون شغلة وشغلة بيعملو شلل مو بس ديسك
فريد عيونو على نجمة يلي مبينة تعبانة وبنفس الوقت مابدو يسمح لهدول البنات يعملو يلي بدن اياه
فريد :وليش ماخبرتني انا كنت اخدتها مو احسن مانها رايحة من ورا ضهري
نجمة :كم مرة قلتلك ضهري عم يوجعني تقلي خدي مسكن وتحط راسك وتنام
فريد :ماكنت عرفان انك تعبانة لهل الدرجة
شمس: وهي عرفت شو عملت قطعت البحر
فريد :اخرسيي يا بنت
شمس :واذا ما خرست شو بتعمل ... العماا وبكل وقاحة عم يجاقر فوق الشي يلي عاملينو بالبنت لك انتو مابتخافو الله عاملينها خدامة للكل شايفينها ادمية وساكتة وانتو ركبتو ودندنلتو رجليكن
قمر :شمس خلص
شمس :لا مو خلص ما كنت ناوية احكي بس معد فيني ... مافيهن لا زوق ولا دم رح يروحوها للبنت ...
امو :اخرسي ولييه والك عين تحكي يا بنت راعي البقر
شمس :بنت راعي البقر وبتشرف ع القليلة عم يتشغل ويطعي اهل بيتو من عرق جيبنو مو احسن ماناكل حرام ... وبعدين مزال متعايرين من راعي البقر ليش لتناسبوه ... ويلي بناسب التاني بصون الكنة يلي عندن ما بعاملوها متل الخدامة
امو :لانو هاد مستواكن ... وهيك هيك انتو عم تشتغلو عند العالم فأذا اشتغلت ببيت جوزها شو بأثر
شمس :الشغل عند العالم اشرف من هيك زوج وبيت احمى
رفع فريد ايدو ليضربها بس سرعان ماوقفتو الكف شمس وقالت : عم ترفع ايدك علي ليش مين مفكر حالك ...
فريد :ياعيب الشوم ع هيك بنات عم يتصرفو من شور راسن بدون رأي ابوهن
شمس :وحياتك صغيرة وابي ونحنا قصد مادخلناه لانها شغلة تافهة بأذن الله رح يتدخل بموضوع الطلاق
فريد : والله مخططين لكلشي
شمس : لانكن جماعة مابتصونو الامانة ... يلله نجمة فوتي جيبي غراضك
ام فريد :ما بتاخد قشة من البيت بدا تزعل تروح تنقبر الله لايردها
شمس :اطمني مارح تاخد شي من عندكن رح تاخد غراضها يلي جابتن من بيت اهلها
ام فريد :اي تفوت تاخد زبالتها .. عأساس عنكن اغراض يابنات الراعي
شمس : يالله نجمة
دخلت نجمة ع البيت بس وقفها صوت فريد : اذا طلعتي من هالبيت معد الك رجعة
حكت نجمة :ومين قلك انو حابة ارجع انا خلص وصلت لاخر حدي ... عم موت مليون موتة كل يوم بهل البيت ومحدا حاسس فيني .. خليني لحق شوي من حالي احسن ما اخسر حالي وانا عم حاول ارضيكن وانتو ما عاجبكن وانت اكتر واحد يافريد شايف كلشي قدامك بس عم تتجاهل لانك ملاقيني ساكتة ومابحكي .. بس خلص لهون ... اطلع من هالبيت بديسك احسن ما اطلع جثة
فريد :وابنك ؟
نجمة : حتى هو عم تحرموني منو مابتخلوني خليه معي ولا شوي .. خلص خليه معكن هيك هيك محرومة منو
دخلت نجمة والبنات راحو وقفو ع جنب وفريد واهلو وجوهن مابتتفسر ... كيف هيك فجأة صار هيك بحياتها ماشكت او حكت عجب هلق هيك بدا تترك كلشي .. ممكن تزعل كم يوم .. او حتى تحكي ... مستغربين كتير ومابيعرفو انو اذا هالكاسة اتعبت اكتر من طاقتها بتطوف ... وهي الحياة اذا مابينت حقك بيتاكل وبيندعس عليه ووقت تجي تواجه بقولو ليش ماحكيت
بنرجع للمشهد يلي كان في شخص حاضرو من بدايتو وواقف عباب الدار البراني
لما حس الجو صار هدوء مد ايدو وطرق ع الباب ليعلن وصولو
اتطلعوا ع الباب كلن ما عدا شمس وهو عيونو كانو عليها ... دخل سلم واعطى التلفون لفؤاد ولف ليطلع مع محاولة فؤاد انو يعزمو لكن رفض وضل مكمل ليطلع وعيونو بعدها عم تسرق النظر على هالبنت القوية الواثقة من حالها ... حتى ع الباب ما اتطلعت ولاحتى لما فات
~~~~~~~~~~~~~~~•
دخل ع بيت اهلو يلي اشبه بالقصر الريفي ... شاف مرت اخوه وسألها عن ابوه وامو وقالتلو قاعدين بالبلكون الخلفي للبيت
راح لعندن وكانو زلمة ومرى كبار بالعمر وقاعدين على كراسي مصنوعة من القصب والطاولة نفسهن وسطحها زجاجي وقدامن جاط فواكه بيحمل اصناف كتيرة من الفواكه وعصير برتقان وصحن مكسرات مشكل
فاروق : السلام عليكم
ردو :وعليكم السلام ورحمة الله وبركاته
اخد حبة من صحن المكسرات ورماها بتمو واخد كاسة وصب من ابريق العصير وقعد ع الكرسي التالت الفاضي
امو : بدك تتغدا
فاروق : لا
ابوه : لكن خير مالك بالعادة نشوفك بهل الوقت
فاروق :بصراحة جاي بدي طلب
ابوه :خير
فاروق :بدي مصاري .. شفت سيارة كتير حلوة ومابتتفوت
ابوه : وسيارتك؟
فاروق :ابي انت بتعرف انو ماعم اثبت عسيارة عم اشتري وبيع وهلق هي السيارة لقطة والسيارة يلي معي لسه ما اجت بيعتها ... وبدي جيب هديك السيارة قبل ماتروح من ايدي
ابوه ساكت
فاروق :ابي هي سيارة زراعية يعني بتناسب ضعيتنا كتير وحتى بتناسبنا النا كمان يعني الطلب عليها كبير
ابو : طيب انت شو جاييك من السيارات
فاروق :ابي انا هوايتي السيارات والحمد لله عم تاجر فيهن ع الخفيف ورزقتهن منيحة وانت بتعرف انو عندي خبرة بالسيارات وهالشي عم يساعدني والناس عم تشتري عثقة فيني لانو بنصحهن وبعرف طلبن ومافي حدا اخد مني سيارة الا وبقلي روح الله يوفقك
ابوه : لك يا ابني انت مانك بحاجة هي الشغلة كلها ... هالاراضي كلها لمين تاركينها
فاروق : قلتلكن شغل الارض كلو مابحبو وبعدين هي قاسم وفيصل وفي مرابعين عم يمشو الشغل
ابوه :قاسم وفيصل ماعم يلحقو لحالن والمرابعين مارح يديرو بالن ع الشغل اذا ماكان حدا فوق راسن
فاروق : يعني معي بصيرو يلحقو
ابوه :اي بتتقاسم الشغل انت واخواتك بيمشي الحال ... احسن مانسلم رزقنا للغريب لك ابني
فاروق :لا مابدي عم طقطق بالسيارات وغير شكل
ابوه :طيب شو رأيك اذا عطيتك مبلغ منيح وتكبر شغلك
فاروق :عنجد
ابوه :اي بس بشرط
فاروق : شو هو
ابوه :المصاري يلي رح اعطيك اياهن مابدي ترجعلي اياهن .. بدي تعتبرن اجارك من شغل الارض مع اخواتك لمدة سنة
سكت فاروق ومارد ... اتطلع بوجه امو يلي عم تهزلو راسها برضى
فاروق : شقد المبلغ
ابوه :يلي بتطلبو
فاروق : طيب ماشي .. موافق
ابوه :عم تحكي جد
فاروق : اي جد
ابوه :ع خيرة الله اذاً
فاروق : وهلق بدي مصاري اشتري السيارة قبل ماتروح
ابو : تكرم
~~~~~~~~~~~~~~~~•
قاعدين المسا العيلة كلها بغرفة وحدة ونجمة متسطحة وماوقفت بكي من وقت اجت . والبنات قاعدين عم يسردو شو صار لابوهن وامهن .. ابوهن مبين شخص بسيط وادمي
الاب : بس انت غلطتي يا بنتي ماكان لازم تتصرفو من راسكن وانت ياشمس تكبري حكي معن
شمس : اسفة بابا بس والله من حرقتي قلبي عليها
ابوها : ع القليلة نخلي طريقة للرجعة
نجمة : بابا انا معد بدي ارجع
ابوها :يابنتي مو قصدي ترجعي قصدي نخلي مكان للحكي
صباح :يالله طولو بالكن ولاتفكرو بهل الموضوع هلق لانكن معصبين بتصيرو تحكو حكي طالع نازل خلينا نروق وبعدها بنحكي بالموضوع ..بس قومو خلينا نحط عشا
~~~~~~~~~~~~•
بصباح يوم جديد اشرقت الشمس فوق ضيعتنا الحلوة ليقوم كل شخص عشغلو
شمس وقمر تقريبا خلصو لباس العمل وهو كنزة وبنطلون وتحتن بوط رياضة ولابسين حجاباتن ولفوها ع وجهن بس خلو عيونن مبينة ولبسو كفوف وطاقية لتحميهن من الشمس هاد كان لباس شغلن الدائم او لكل بنت بتشتغل هيك شغل بتلبس هيك وبتخبي وجها واديها منيح مشان اشعة الشمس ماتحرقهن
نجمة يلي متسطحة قدامن : ذكرتوني لما كنا نطلع تلاتتنا ما احلى هديك الايام
شمس :يالله لتصحي بتصير تطلعي معنا ههه
قمر :خلص هلق لاتفكري بشي المهم ترتاحي
دخلت صباح وبأيدها كيس صغير :خدو امي هي الزوادة
شمس :ماما متأكدة مابدك مساعدة
صباح :اي خلص روحو اتيسرو
نجمة والله ماني حابة اقعد وانتو تتلبكو فيني
شمس :اي اسكتي واقعدي ... امي انتبهي لاتخليها تتحرك
صباح :اكيد
صوت زمور سيارة
قمر :يالله شمس ... يالله بخاطركن
طلعو لبرا وكانت سيارة بيك اب ركبو بالصندوق من ورا وقعدو ونزلو رجليهن للخلف ومشت السيارة ... مشو شوي ووصلو لعند خيم فيها كمان عمال ... قرب شخص من الشوفير يلي هو مرابعي بمزرعة من مزارع ابو القاسم
السلام عليكم
المرابعي : اهلا وعليكم السلام .. وينها ورشة ابو مزين كأنو فاكين الخيم وراحلين
:اي والله مبارح اجاهن خبر من عشيرتهن انو صاير عندن حريق كبير ولازم يروحو يتطمنوا على ربعن
:له له كيف صار هيك
:والله مابعرف ... بس اذا بدك ورشة في ورشة جديدة اجت مبارح كمان نصبو خيم وقعدو
:انا والله مرابعي مادخلني .. رح احكي مع صاحب الارض واسألو
:اي ليش لأ اسألو
شمس :شوفي شو صاير
قمر :ما سمعتيهن عم يحكو انو ورشة ابو مزين راحو ع ضيعتن وفي ورشة جديدة بدالن
شمس :عنجد .. ما انتبهت
قمر :الله اعلم وين حضرتك شاردة
شمس : بهل الدنيا
وقفت شمس بقلب الصندوق وقربت لعند الشوفير لتسمع شو عم يصير وبهل الاثناء كان المرابعي مخلص تلفون وقال : اندهلن خلينا نتيسر
:يالله شوي
وراح ناح الخيم
~~~~~~~~~~~~~~~~•
عسفرة كبيرة ومحطوط عليها اشهى الفطور اجتمعت عيلة ابو القاسم
٣ شباب كل شب وجنبو زوجتو واخر الشي قاعد فاروق ماجنبو حدا والاب والام
واحد من اخواتو لفاروق واسمو قاسم كان عم يحكي تلفون وسكر والتفت عفاروق : ليك فاروق العمال اليوم جداد يعني بدك تنتبه وتعلمن منيح شو يشتغلو
ضحك فاروق وقال:مو لأعرف شوبدي اشتغل انا
قاسم :لا تخاف في المرابعي هنيك وفي بنتين مانن جداد بيعرفو الشغل انت امشي اليوم معن بتصير تعرف كلشي
فاروق :الاتكال ع الله
فيصل :هههه ولله ماني مصدق انو فاروق رح ينزل ع الارض
فاروق :اي صدق صدق كلو تحت ضغط الله وكيلك ههههه
امو : خلص لقينا نقطة ضعفو لفاروق وصار فينا نضغط عليه كل مرة ع نفس الوتر
قاسم :السيارات مو هيك
ضحكت امو وهزت براسها
قاسم : كنت عرفان انو فاروق مابضحي هالتضحية الا كرمال سيارة هههههه
امو :لسه في شغلة تانية ناوية عليها بس مو هلق
فيصل :اكيد مشان تزوجيه
امو :ههههههه
فاروق :لا ماحزرتو حصرا بالجازة لو بتجيبولي معرض سيارات بحد ذاتو مارح اقبل
ابوه كان عم يسمع بصمت الحديث .. حط اللقمة من ايدو وقال : طيب ليش .. هي اخوك فيصل اصغر منك وصار عندو ولد والتاني ع الطريق وانت بعدك على حالك لأيمت
فاروق : بصراحة مافي بنت عم تعجبني ... (واتطلع بأمو) ولا تقوليلي بنت عمك وبنت خالك من هلق ماحسيت اتجاهن بشي بحسن متل اخواتي ربينا كلنا سوا صعب اتقبل اي وحدة منن زوجة الي (واتطلع ع مرت اخوه فيصل)لاتزعلي علا ع اختك بس عم احكي الصراحة
علا :لا ابدا بالعكس هي حياتك وانت حر
امو :طيب خليني دورلك
فاروق :خلص اتركيني وانا بنقي وحدة وبقلك عليها ...
امو :كل مرة بتقلي نفس الحكي
فاروق :خلص رح فكر بالموضوع عنجد ... وهلق انا قايم روح بتوصوني بشي
امو :لا روح الله يرضى عليك
~~~~~~~~~~~~~~~•
كانت واقفة ومستندة عسور صندوق السيارة يلي راكبين فيها ليطلع من بين الخيم مجموعة شباب وبنتين .. بس الشباب لفتو انتباها من حيث الجسم والطول والجمال راحت لجنب اختها فورا ونكعتها لتشوفن ..
قمر بهمس :لك شو هاد يا شمس هدول هربانين من شي فيلم
شمس :شايفة انت ما احلاهن
قمر :لك اي من زمان نشوف هيك اشكال بتفتح النفس عالشغل
شمس :ههههه اي والله
وصلو القو السلام ووطلعو ركبو معن .. والبنات قعدو جنبن
البنات :مرحبا انا امل واختي سمر وانتو ؟
قمر :وانا قمر وهي اختي شمس اهلين فيكن
البنات :كمان اخوات شي حلو
قمر :اي والله نحنا اختين وانتو اختين بنظبط
سمر :مو بس انا وامل وكمان هدول الشباب اخواتنا
اتطلعو قمر وشمس ببعضن طبعا مو باين غير عيونن بس من حركة عيونن مبين انهن ابتسمو
قمر :تشرفنا
سمر :فكو عن وجهكن خلينا نشوفكن
شمس : مو محرزة هلق رح نوصل
امل :بس مبين من عيونكن انكن حلوين
شمس :تسلمي هاد من زوقك
سمر :انتو من زمان بتشتغلو هون
قمر :اي من زمان كتير
سمر :نحنا من جديد والله
شمس :لاحظنا هالشي
امل:وصعب الشغل
شمس :مو مشتغلين من قبل ؟؟
امل :لا مو زيادة يعني
شمس :هلق اذا اول مرة بدو يعضل جسمكن فترة وبعدها بتتعودو
سمر : شو الشغل
قمر :هلق نحنا مستلمين مزرعة من مزارع المنطقة فيكي تقولي فيها من كلشي خضرة وفواكه ... وحاليا عم نقطف مشمش هاد
امل:مبينة المنطقة بتجنن
شمس :اي فعلا كتير حلوة ومزراعها لسه أحلى
وصلو للمزرعة واول مانزلو كان في بيت صغير وحدو متورات مي وفي بركة كبيرة والعشب الاخضر حواليها من كل مكان والشجر الاخضر عمد عينن والنظر
شمس :هي بداية المزرعة .. هلق بدنا نمشي مسافة صغيرة لنوصل لمكان الشغل
سمر :ماشاء الله تبارك الرحمن .. تقوليها جنة ع الارض
قمر وشمس كانو عم يحكو للبنات على الشغل والمرابعي عم يحكي الشباب .. مشو لجنب البيت اخدو كل واحد منن سطل وومشو والمرابعي راح وركب تركتور صغير معلق فيه تريلا وفيها صناديق بلاستيكية وسلالم خشبية ومشي قدامن وهنن لحقوه مشي .. وصلو لعند شجر كبير ومثمر بكثرة من المشمش
المرابعي : شباب هون رح نشتغل اتكلو ع الله وبلشو
الشباب اخدو السلالم وطلعو ع الشجر ليقطفو من فوق والبنات بيقطفو الحبات القريبة عليهن وبياخدو السطول المليان ويفضوها بالاقفاص وشمس استملت توجيه الاقفاص وتفرز الحبات المستوية والحبات المتماسكة والخربانة كل حدا والو مكان
~~~~~~~~~~~~~~•
ببيت فريد واهلو
فتح عيونو واتجلس اتطلع جنبو كان فاضي مبين التعب والارهاق عليه طلع من غرفتو ع الصالون كانت امو قاعدة عم اتطعمي ابنو وليد
فريد :صباح الخير
امو :صباح النور ... شو كيف نمت
فريد :مانمت طول الليل اتقلب
امو :لا ينشغل بالك ياتقبرني بكرا والله لزوجك ست ستها ... العما بقلبن عيلة شراشيح ... لك والله قلتلك مليون مرة بلالك اياهن مابدنا هالعيلة انت عندت ... قلت بتحبا ... شفت شو طلع من ورا حبك
ساكت وماعم يرد وماعرفنا اذا مطاوع امو بالحكي يلي عم تحكيه ولا الو رأي تاني
فريد :وين الفطور
امو : والله مالحقت يادوب حلبت البقرة وعم طعمي وليد يالله رح فيق البنات يعملوه
قامت تفيقن وهو قاعد محلو عم يسمع كيف عم تحاول تفيقن ومافي تجاوب منهن
سرح شوي بأفكارو
#فلاااش_باااااك#
طالع من غرفتو والفطور جاهز ع الساعة ٨ وريحة النضافة فايحة بالبيت كلو
قعد يفطر مع اهلو وما اهتم اذا كانت موجودة ع الفطور او اذا كانت فاطرة
فريد : نجمةةة
طلعت من المطبخ وعم تقول ليكني جيت افطر انت
فريد :وين كاسة الشاي
هية فكرت عم يندهلها مشان تفطر معن بس طلع عم يسأل عكاسة شاي
نجمة :يالله ثواني
رجعت المطبخ جابت كاسة شاي وحطتها قدامو
نجمة :بدكن شي تاني
فريد وهو منسجم بالاكل :شوفي امي
امو :طعميتي وليد
نجمة :اي وهلق عم يلعب بأرض الدار
امو :لكن هلا روحي خلصي شغلك
هزت براسها وعيونها بعتب على فريد
#####بااااااك
طلعت امو وقالت : اااخ من البنات وهم البنات .. ليك امي احمل ابنك شوي لأعملك فطور انا
فريد :لا خلص بلاه
وقف وقال :انا فايت بدل تيابي وروح ع الشغل بدك شي مني
امو :لا روح الله يسر امرك ويبعتلك بنت الحلال يلي تعوضك عن هالجربانة
~~~~~~~~~~~~~~~~•
شب من العمال الجداد واقف على الشجرة وعيونو عم تتنقل بين قمر وشمس ... وكيف ملتهين بشغلن وعم يشتغلو بكل ضمير واخلاص
وعم يتردد بمسامعو صوت حدا : في بنتين رح تشتغلو معن ... اسمائهن قمر وشمس ... هدول من الضيعة بس مانن من اهلها ... ابوهن اجا من زمان عليها واستقر فيها ...فيكن تستفادوا منن وحصرا شمس لانو بتكره الضيعة واهلها .
هز راسو ورجع تابع عملو بصمت
~~~~~~~~~~~~~~~•
كان شب تلاتيتين قاعد بسيارتو قدام ورشة التصليح وتيابو كلشها شحم ومبين انو مكينيكي مبين علي الانزعاج .. اجا شب صغير ودق ع البلور وحكي شو معلم مابدك تفتح الورشة
عطاه المفتاح وقلو فتاح انت
:بدك تروح عشي محل يعني
:مابعرف .. روح من وجهي
نفخ بقهر واخد جوالو من على التابلو وفتح ع اول اسم بالواتساب وكان الاسم عمر
نزل بالرسائل لنهار مبارح
هو : كيفك ياحب ...
الووو
وينك
ليكي انا كتير مشتقلك
قمر ليش ماعم تردي علي
ردت : اليوم مافيني صعب
هو : ليش ... صاير شي حاسس من كلامك انو فيكي شي
هي : ليك جواد خلينا نبعد فترة ... انا بدي ارجع فكر بشكل جدي بعلاقتنا
هو : مافكرنا وخلصنا ... شوقصتك كل فترة بتطلعلي بشغلات جديدة
هي :بترجاك بس شوية وقت
هو :لأيمت يعني
هي :لحتى انا ابعتلك
هو :بس انت بتعرفي انو مافيني ابعد عنك
هي :عأساس نحنا قراب
هو :انا عرفان لوين بدك توصلي
هي : بعدين بنحكي سلام
هو:خلينا نحكي هلق تعي ع بيت المزرعة وبنتفاهم
هي :سلام جواد بترجاك لا تتصل ولا تبعت شي لحتى انا ابعت
هاد الحكي كان مبارح ... بعتلها اليوم كتير وماردت وحاول يتصل كمان مافي رد
رجع كبس ع الاتصال طلع خارج التغطية الظاهر سكرت التلفون ع الاخير
جواد : اووف منك قمر اوووف
فتح ع الاسماء ودور ع اسم قاسم وكبس ع الاتصال وفورا اجاه الرد
قاسم : يا هلا والله
جواد : كيفك
قاسم : مشتقلك كيفك انت
جواد : ماشي الحال
قاسم : قلي شبك
جواد :انت بالارض اليوم
قاسم : هههه اي بس مو محل ما انت مفكر
جواد :كيف يعني
قاسم : فاروق استلم المزرعة الشمالية
جواد : وهية ؟
قاسم : اكيد هنيك
جواد : طيب سلام
قاسم : الله معو ههههههه
سكر الجوال ورماه ع التابلو بقهر ودور السيارة وفتلها بأرضها ومشي بأقصى سرعة
لحتى طلع الشغيل لبرا ليشوف اذا صار شي بس الغبرة كانت واصلة للجو وراه
~~~~~~~~~~~~~~~•
قعد المرابعي جنب شمس يلي عم تصفف المشمش وحكي :شو شموس مابدك تعمليلنا كاسة شاي من تحت اديكي
شمس :تكرم عمي ابو ايوب بس خلص هالكم سحارة
المرابعي :اتركيهن انا بشتغلن وانت روحي مشان تاخدو استراحة وتفطرو
شمس :يالله
تركت من ايدها ومشت اتجاه البيت يلي بالمزرعة وع الطريق شلحت الكفوف وفكت اللتمة عن وجها وشلحت الطاقية وصارت تهوي فيها
شمس :اليوم شوب كتير .. الله يتلطف فينا
قبل ما توصل لمحت سيارة وقفت عند البيت ونزل منها فاروق اتأملتو منيح كان لابس قميص ورافع كمامو شوي لفوق وبنطلون جنيز وبوط
شمس :الاسمر الملتحي ؟؟؟ ههههههه
وقفت ورا شجرة لتراقبو شو رح يعمل .. وهو قرب من متورات المي يلي عم تضخ مي بقياس ٥ انش حط ايديه تحت البوري وعباهن مي ورش على وجهو وكرر هالحركة اكتر من مرة وهية عم تراقبو بصمت
شمس : عجب هاد جاي ع الارض ... انا مبارح لعرفت انو ابن ابو القاسم ... بس شو قالت قمر اسمو ... اممم .... بس والله حلو .. حوينتو بهل الضيعة ... اي شو جايين انا ... اصحك شمس تغيري رأيك بأهل هالضيعة ههههه
فاقت من شرودها واتطلعت عليه مالقتو ... تابعت طريقها ووصلت على البيت فتحت بالمفتاح يلي معها وهو كان قريب وشافها واجا ناحها
دخلت ودخل وراها وهية انتبهت لوجودو بس ابدا ما تلبكت او خافت
فاروق : مرحبا
التفتت عليه وقالت : اهلا
مع التفاتتها عرفها من لقاء مبارح
فاروق :انت بتشتغلي هون
شمس :اي بشتغل عنكن وهلق جاي اعمل شاي للشغيلة احسب حسابك
ابتسم وقرب من الطاولة يلي واقفة قدامها وارتكى عليها واتطلع عليها وهية عيونها بالابريق يلي قدامها
فاروق :شو اسمك انت
بعد صمت قليل حكت :شمس .. اسمي شمس
فاروق :اسمك حلو
شمس :شكرا
فاروق :ومابدك تعرفي شو اسمي
شمس :قلتلك اسمي بما انك صاحب الارض وممكن تحتاجني او تنده علي بس انا مابهمني اسمك
فاروق :طيب اذا بدك تندهيلي شو بدك تقوليلي
شمس :يا معلمم .. او يا بيك شو بتفضل
جلس وقفتو وقال : بفضل فاروق
شعلت الغاز وحطت الابريق عليه واتوجهت لبرا
وهو لحقها
فاروق :من ايمت بتشتغلي هون
شمس :من زمان
فاروق :وعاجبك الشغل هون
شمس :الحمد لله
رن جوال فاروق وراح ليرد عجنب وشمس استغلت انشغالو ودخلت ع المطبخ كان الشاي خالص حطت الابريق على الصينية مع كاسات شاي وطلعت كان هو مخلص المكالمة واتطلع عليها حكتو :اذا بتحب تشرب شاي حسبت حسابك
فاروق ماشي هلق بلحقك
شرد فيها وهية رايحة ماحس الا سيارة وقفت جنبو التفت ليتفاجئ بجواد
قرب ناحو وهداك نزل واجا لعندو صافحو بعض
جواد :كيفك فاروق
فاروق :الحمد لله .. انت كيفك
جواد :بخير ... شو شايفك هون ؟
فاروق :هههه نفس السؤال يلي بدي اسألك اياه
جواد : شيلك عن المزح .. بعرفك مابتحب الارض وهوسك بالسيارات
فاروق :فيك تقول هيك شي بس عملت اتفاق مع ابي
جواد :على خير
فاروق :المهم شو رأيك بصورة السيارة يلي بعتلك اياها مبارح
جواد :كتيير حلوة ولقطة
فاروق : وهو انا دفعت عربونها والمسا اذا الله راد رح جيبها
جواد :لا تنسى مرقلي اياها ع الورشة
فاروق :اكيد .. المهم قلي شو جابك لهون
جواد :اوووووف شوبدي احكي لأحكي
فاروق :خير
جواد : جاي شوفها
فاروق :لمين
جواد :شبك ولووو شو نسيت
فاروق :شوبدي انسى
جواد : لك انت وقاسم شهدتو علينا
فاروق :لك ايييييه ... والله رايح عن بالي نهائيا
جواد :اي منيح
فاروق :لساتك بالسر
جواد :اي والله
فاروق :اي وينها لحتى جاي عم تقلي بدي شوفها
جواد :هية هون بتشتغل عنكن
فاروق :عناا؟؟؟ مين
جواد :بنت راعي البقر
فاروق بصدمةة :شمس ؟؟؟
جواد :لا ولوو .. اختها قمر
فاروق :اممم
جواد :شو امممم ... بدي شوفها
فاروق بمزح :شو عاملك ملقى عشاق هون
جواد :فاروق مو ناقصك بس كلمتين وفالل
فاروق : متزاعلين يعني
جواد : والله مابعرف شو صايرلها ... اذا بتجيب مليون واحد انن يفهموا مرى وحدة ها رح يعجز
فاروق :والله معك حق بهي ... ليك انا اليوم بلشت ولسه ماني عارف شي .. قلي كيف فيني اخدمك
~~~~~~~~~~~~~~~•
قاعدين الشغيلة عم يفطرو
وبصراحة معجبين نوعا ما بجمال شمس وقمر بعد مافكو اللتمة عن وجاهن
البنات بمجموعة والشباب بمجموعة ... الشباب كل شوي يسرقو النظر للبنات
امل : عنجد ماتوقعت انكن حلوين لهل الدرجة
شمس :هههه تسلمي هاد من زوقك
قمر :مو لهل الدرجة انت التانية
سمر :مافي مبالغة ابدا
شمس :وانتو كمان العين تحرسكن كتير حلوين ومرتبين
قمر :صح انتو من وين
امل :ريف الشام
شمس : وعجب عم تشتغلو هالشغل بالشام مافي شغل
سمر :امبلى .. بس نحنا بندرس والصيف بنطلع بنشتغل بالاراضي والاجارات منيحة
شمس :عنجد ؟
امل :والله .. مثلا انا وسمر جامعة انا ادب عربي وسمر تاريخ .. وهداك اخي سمير هندسة مكنيك اخر سنة وسالم معلوماتية ومؤيد معلم صف ونوح هي السنة بكالوريا
التفتت شمس عليهن ولاحظت ع سمير انو عيونو ماعم تنشال عنهن بس اتجاهلت واتطلعت بقمر يلي شاردة .. وبالحقيقة هية شردت وقت قالت امل (هندسة ميكانيك) واتذكرت جواد
شمس :قمرر وين شاردة
قمر :هون .. صبيلي شاي
شمس :بس كاستك مليانة
قمر :عنجد .. ما انتبهت
سمعو خطوات فاروق يلي اعلن عن وصولو ليلتفت الكل عليه
فاروق : يعطيكن العافية جميعا
ردو الله يعافيك
فاروق :هلق انا جديد هون بالنسبة للقديم وللجديد منكن ... انا ابن صاحب الارض ورح اشتغل معكن هالفترة
سمر :ولي على قلبي ما احلاه
امل : من جديد عم يشتغل هون يعني
شمس : اول مرة بشوفو وعحسب ماعم يقول رح يشتغل هون
سمر :يعني مابتعرفوه
شمس :بالشكل بس
امل : ومرتبط
شمس :مابعرف روحي اسأليه
اتطلع ع البنات وحدة وحدة وقدر يميز قمر وقال :قمرر ؟
قمر :اي
فاروق :بدي تساعديني بكم شغلة ... عند البير حكيت قاسم وقلي اسأل قمر بتعرف
قمر :بخصوص شو
فاروق :تعي هلق بقلك
قامت قمر ومشت معو وهو التفت ع شمس وقال صبيلي كاسة شاي راجع
~~~~~~~~~~~~•
وصلو لجنب البيت الصغير وقلها :جواد ناطرك جوى
تركها ومشي
تلبكت كتير وخجلت بنفس الوقت من فاروق بس هو انسحب قبل ما تبررلو او يحسسها بالاحراج
مشت بغضب وفتحت الباب دخلت وسكرت وراها ولقتو قاعد ع كنبة قديمة شوية ...ولما شافها وقفت ومشي لعندها
قمر بعصبية: انت شوووو جااابك لهون .. لسه فاروق ماعرف بقصتنا
جواد : جيت لانو اشتقتلك وجيت شوفك
كان وصل لعندها ضمها بقوة وباسها ....