رواية بنات راعي البقر
الفصل السابع7
بقلم مريم اليوسف
."من يُحبنا ونحن في اسوأ حالاتنا، هُم من يستحقون أن يبقوا في قلوبنا إلى الأبد"🤍
رجع فاروق ع البيت ومبين على وجهو مانو على بعضو والشباب كانو عندن بالبيت قاعدين جنب البحيرة الصغيرة يلي بالجنينة واراكيل وتسالي
انضم لقعدتهم بدون ولا حرف
فصيل : وين اختفيت
فاروق : مشوار قضيتو وجيت
جواد : شبك مانك على بعضك
فاروق : مافي شي
تركهن وقام دخل ع البيت
جواد : شو صايرلو هاد
قاسم : علمنا علمك
فاروق تقريبا حاسس حالو اغبى شخص بالكون ... بحياتو ماكان هيك بهل الضعف .. ولا كان متوقع انو يتنازل هالتنازل كرمال بنت ... شافها بعينو محد قلو ... عم توقف مع شباب ولسه متعلق فيها ومابدو اياها تروح لغيرو ... وبالاخير هي ماعطتو اي رد
دخل غرفتو وراح ارتمى ع تختو وغمض عيونو بتعب
~~~~~~~~~~~~~~•
ببيت ابو بدر
كانت نجمة عم تبكي بشكل هستيري وجنبها اخواتها وامها عم يحاولو يهدوها
نجمة : معقول هيك وراح تزوج ... ماعندي اي كرامة
شمس : طولي بالك ياعمري .. كيف خبرتو
قمر : اجا اخوه قال بدن وليد وقلها انو فريد تزوج وعايش معها بالمدينة لانو طفش من كل الناس منها ومن اهلو
شمس : ياربي دخليك ... طيب خلص اختي حاج تبكي بترجاكي .. مانو معروف ندل مافي شي غريب عليهن
قمر : خليها تبكي بترتاح
شمس : ايو رياحة بدا تجي من البكي لك اختي
قمر : خلص اتركوها بحالها
شمس : طيب ماحكيتو معو بركي بيت حماكي عم يكذبو
نجمة : ماعندو لا ارسال ولا حتى نت
شمس : حسبي الله ونعم الوكيل .. وينو بابا
قمر : بعت وراه المختار
شمس : المختار ؟؟
قمر : اي والله ابصرر
~~~~~~~~~~•
عند المختار
قاعدين بالمضافة والمختار قاعد قدام ابو بدر وابو بدر منزل راسو بذل
المختار : ومتل ماسمعت مابدي هالشي يتكرر ... هي ضيعة ربيانة ع الاصول وبحياتو محدا شاف مننا غلط ... او حكي ع بنت من عنا كلمة صغيرة ... مشان هيك شوف العطل يلي عندك وصلحو لانو هي ضيعة والها مسموعياتها .... انا رح حاول لملم هالفضيحة واعتبرها اول فرصة الك .. بس اذا هالشي بتكرر بتحمل حالك انت وعليتك وبتطلعو من هالضيعة
ابو بدر : ماشي يا مختار يكتر خيرك ... بالاذن
المختار : الله معك
قام ابو بدر وطلع من مضافة المختار وحاسس حالو كتير صغير ... وحتى حس نظرات الناس الو غريبة ... مافي شي بيتخبى بهي الضيعة ... خلص انا انفضحت ... ضل منزل راسو لوصل ع بيتو ...
اول ماوصل ع البيت كان في جواتو براكين من القهر والذل والحزن وبدو يفجرها او هو يلي رح ينفجر
ابو بدر : شمسسسس
طلعت شمس من غرفتها ع صوت ابوها يلي اول مرة بتسمعو عم يندهلا بهي الطريقة ... كان شكلو بخوف ... وجهو احمر وعيونو حمر .. ونفسو يلي بدل على حالتو
قربت لعندو : شبك بابا انت منيح ... صاير شي
رفع ايدو وضربها كف خلاها توقع ع الارض من شدتو .. طلعو الكل عليه .. وهية اول مرة ابوها بيضربها وماحدا بيتخيل موقفها
اجت صباح وقالت : شوفي يارجال ليش ضربتها للبنت
ابو بدر : وطيتلو راسي بين الخلق .. الله ياخدني لارتاح .. الله ياخدني ... لك انا شو عامل .. شو عملت شي غلط لتعملو فيني هيك
شمس بعدها ع قعدتها وهية بغير عالم ... دموعها نازلة بصمت وايدها هلى خدها
قمر : شوفي بابا مشان الله فهمنا وليش ضربتها لشمس
ابو بدر : اساليها لهل الوسخة مين هاد يلي عم تقابلو ع تلة الضيعة والناس شايفينها وعم يحكو علينا طالع نازل
الكل مصدوم وماحكي ..
ابوها : شوو احكي مين هاد يا وسخة ... لك حطيتي راسي بالطين .... لكن المختار بعتلي ضب بناتك احسن ماتنقلعو من هالضيعة .. انقلبت قدامو قد الكمشة ... ماشي بالطريق والناس تتهامس علي ... ماشي وراسي بالارض
صباح : شو هالحكي يارجال .. بناتك انت مربيهن ع العفة مستحيل تطلع منها هيك
ابو بدر : والناس يلي شافوها .. شو مصلحتن
صباح نزلت لعند شمس وقالتها : احكي لابوكي انك بريئة وانو الحكي غلط
ابو بدر : احكيي لشووف
ساكتة وماعم ترد
قمر : بابا شمس صغيرة ومانها واعية واذا عنجد واقفة مع حدا بتكون جاهلة عقوبة هالأمر
ابو بدر : اي صغيرة كتتير ... هي يلي كنت قول عنها يلي قد حالها ومابينخاف عليها ... وكمان عم يقولو غريب عن الضيعة ومعو سيارة احدث موديل ... احكيي يا وسخةة مين هااد
ساكتة وماعم ترد
ابو بدر : شايفين انها عاملتها والا مابتسكت ... لك ان شاء الله تموتي ... ان شاء الله تموتي ياشمس وارتاح منك كسرتي ضهري ... الله يخلصني منكك .. الله يخلصني منك
صباح : مشان الله يا رجال بلا هالحكي ... متاكدة في شي غلط وشمس مستحيل تعمل هالشي ... تعا اهدى وروق وبعدها بنفهم منها
سحبتو صباح لجوا وهو مافي علسانو غير ان شاء الله تموتي
وقمر نزلت لعند شمس : قلتلك .. قلتلك مارديتي علي
قامت دخلت لجوا واخدت زاويتها وانعزلت فيها وماوقفت بكي
~~~~~~~~~~~~~•
عسفرة العشا عند بيت ابو قاسم
كل العيلة مجتمعة وعم يتعشو بهدوء لتكسر الصمت هيام
هيام : مرت عمو شفتي هدول البنات يلي اجو ساعدونا بشغل البيت بنات الراعي
ام قاسم :شبهن
فاروق اعطى انتباهو للحديث
هيام : قال اهل الضيعة شايفين وحدة منن واقفة مع شب غريب ناح التلة
ابو قاسم بعصبية: انت من وين جبتي هالحكي
هيام : الضيعة كلها عم تحكي بهل السيرة
ابو قاسم : ومن ايمت كنا متل الناس نحكي باعراض الناس
هيام : والله ماقصدي بس عم قول شو عم يصير حكي
ابو قاسم : قصدك او ماقصدك هيك احاديث مابدي اسمعها بهل البيت
فاروق تغيرت ملامحو بس ماحكي
ام قاسم : طيب يا رجال لا تعصب مابدها .. بركي مو صحيح
قاسم : معقول ؟؟ مابصدق اكيد كذب
هيام بغيظ: وليش متأكد حبيبي
قاسم : البنات صرلن عم يشتغلو معنا عمر وبحياتي ماشفت عليهن شي ... وحتى اسالو فاروق .. مو هيك فاروق
فاروق : مابعرف ... بس اكيد سوء ظن
علا : عمي بحياتكن بهي الضيعة ماسكتو عن هيك شغلات ... ع القليلة لازم تتحروا عالموضوع
ابو قاسم : خلص المشكلة انحلت
فاروق : كيف يعني
ابو قاسم : حسبي الله ونعم الوكيل مع انو مابحب احكي بهيك مواضيع بس الله يسامح يلي طش هالخبر
قاسم : مارح نحكي ابي .. قلنا شو عملتو
ابو قاسم : المختار بعت ورا ابو بدر وحكاه بمعنى انو يشوف بناتو وينتبهلن وهالمرة تحذير واذا تكررت هالشغلة مرة تانية يحمل حمالو ويطلع من هالضيعة
الكل ساكت .. ام قاسم اتطلعت بفاروق وفاروق بادلها نفس النظرة وبعدها قام من على السفرة
~~~~~~~~~~~~•
دخل جواد على بيت اهلو وحالتو متل كل يوم شحم وزيت
وام جواد كانت حاملة الشاي وعم توديه لابو جواد ... وابو جواد اول ماشافو ندهلو
ابوه : جواد
جواد : اي ابي
ودخل لعندن
ابو جواد : خبرت شو صاير بالضيعة
جواد : لا شوفي
ابو جواد: هي البنت يلي صرعت راسنا فيها مدري اختها شايفينها اهل الضيعة مع شب ع التلة راكبة معو بالسيارة والله اعلم شو عم يعملو
جواد : كيف يعني
ابو جواد : متل ماعم قلك .. والمختار بعت ورا ابوها وسمعو كم كلمة ترضي خاطرو
جواد : ايو بنت منن
ابو جواد : عم يقولو الصغيرة ... بس مغزى الحديث شفت الناس يلي كان بدك تناسبن
جواد : مابصدق ... حتى لو شفت بعيني ... ويلي مطالع هالحكي الله لايوفقو
ابو جواد : مافي دخان بلا نار ومحدا الو مصلحة يتبلى عليهن
جواد : حسبي الله ونعم الوكيل بس
ابو جواد : والله معك حق يا ام جواد
ام جواد ماحكت وكانها مو رضيانة عن هالسوالف ولحقت ابنها بعيونها بحزن
ابو جواد : صبي صبي شاي جيل اخر زمن
~~~~~~~~~~~~~•
بعدها على قعدتها والكل صامت بالبيت محدا عم يحكي مع حدا ... وسكوتها اكد عملتها وابوها شو ماحكاها خلص صار يلي صار .. بس عم يفكر شو بدو يعمل بالأيام الجاية ماعد الو عين يمشي بين الناس
اخدت تلفونها وبعتت رسالة بكلشي صار معها لعماد
اجاها الرد : اسف كتير لانو حطيتك انت واهلك بهل الموقف ... ليكي انا مستعد هلق اجي واحكي كلشي لأبوكي
شمس : حتى لو ابي عرف اهل الضيعة شو ..
عماد : العرس بعد بكرا ... واذا تنفذت العملية خديها مني وعد لرجعلكن قيمتك بين الناس وخلي راسكن مرفوع
شمس : ان شاء الله تمشي الامور متل مابدنا
عماد : سمير واخواتو طلعو من الضيعة
شمس : مامعي خبر
عماد : هي انا عم خبرك ... تحملي يوم واحد بس .. واذا بدك فيكي تحكي لأبوكي ولاهلك كلشي توضحيلن كلشي وان شاء الله يوم العرس كلشي بينكشف
شمس : ماشي رح شوف
دخلت قمر ع الغرفة وشمس فورا خبت الجوال
قمر : لك ماحرمتي ... قومي شوفي حالة ابوكي يلي وصلتيه الها
شمس : مو فاهمين شي
قمر : فهمينا
شمس : رح فهمكن وهلق
وقفت وقالت : تعي معي .. لتعرفو الحقيقة
بس قبل ماتمشي رن موبايل قمر
قمر باستغراب : فاروق ؟
شمس : ردي
قمر : الو
فاروق : كيفك قمر
قمر : ماشي الحال
فاروق : بدي احكي مع شمس اذا ممكن
قمر : اي هي حدي تفضل
شمس بصوتها المبحوح : الو
لاحظ نبرتها وضل ساكت
شمس :: الو
فاروق : بكيانة ؟
شمس : ليش متصل
فاروق : انا رح قول انو انا يلي كنت معك ورح ابعت اهلي يخطبوكي ... بس انت وافقي معي عنفس الحكي
شمس : مشاكلي بحلها لحالي وانت اطلع منها
فاروق : شمس مو وقت عنادك .. هي انسب طريقة نسكت فيها الناس
شمس : يعني اذا خبرو انو انا معك معد يحكو
فاروق : بنلاقي تصريفة ... بس انت قولي كنت مع فاروق
شمس : مارح قول شي ... وانا بعرف كيف حلها بدون مساعدتك
فاروق : هيك لكن
شمس : اي هيك
فاروق : طيب عراحتك .. بس هلق عم تلاقيني جنبك بس لقدام مارح تلاقي حدا جنبك
شمس : شكرا الك .. بس ماني ناطرة منيتك علي
فاروق : خلص فكري متل مابدك مو الحق عليكي الحق علي انا سلام
سكرت والدموع مجمعة داخل عينها
قمر : لك هاد بحبك ولو مابحبك ماكان عمل كل هاد ... وليش ماوافقتي
شمس : طلعي من راسي انت التانية ماني ناقصة قصص تجي فوق يلي انا فيها ...خليني حل قصصي وحدة وحدة
مشت اتجاه غرفة اهلها بس وقفها صوت ابوها عم يقول : نحنا لازم نطلع من هالضيعة معد الي عين حط عيني بعين حدا ...
قمر : شو مابدك تفوتي
شمس : ماسمعتي ابوكي شو عم يقول
قمر : اي سامعة
شمس : اي مارح قلو خلينا نطلع من هالضيعة النحس
قمر : بهل البساطة
شمس : اي بهل البساطة
قمر : وفاروق
شمس : شبو فاروق
قمر : واضح انو بحبك وصادق
شمس : مشان الله اسكتي عاساس مابعرف شو رح يصير ... محدا رح يقبل فينا افهميها ... واكبر دليل انت ونجمة يعني لازم كلنا نتخوزق
قال ما متنا بس شفنا مين مات
رجعت عفرشتها .. بس سرعان مارجعتلا الدموع لتكون الدليل على الحزن يلي بقلبها
~~~~~~~~~~~~~~•
بعد يومين
يوم العرس
الضيعة اليوم مشغولة بتجهيز لعرس كبير والكل فرحان وعم يتجهز ... طبعا بيت ابو بدر ما انعزمو ولا حتى انعزمو من قبل ... خلال هاليومين شمس كانت منعزلة لحالها وما عم تجتمع مع ابوها وابوها ماكان يسأل عنها ولا كان بدو يشوفها .. وهالشي أثر كتير عليها .. من هديك الليلة سكرت موبايلها وعطتو لامها مابدا تتصل مع حدا ولا حتى مع عماد وتكمل معو الخطة معد يهمها شي تنسرق الضيعة او لا او بينت برائتها او لأ .. كل هما انو بدا تطلع من هالضيعة المشؤومة يلي ما جابتلها غير وجع القلب ... وكل ما تتذكر فاروق قلبها يشد عليها ... بتحبو وبتموت عليه بس كانت عارفة انو مانن لبعض مشان هيك عم تحاول ماتفكر فيه
الوقت بلش يميل للغروب .. وهية طلعت ع السطح قعدت جنب الخزان وضمت رجليها وصارت تراقب الضيعة السيارات اشكال الوان عم تدخل ع الضيعة ... اصوات الغني بلشت تطلع من صالة الضيعة
~~~~~~~~~~~•
وبمكان تاني
العصابة عم تتجمع
منهن الاشخاص يلي عرفناهن ومعهن حوالي ٢٠ شخص .. ومعهن شخص مبين الراس الكبير
: شباب وصبايا هبشتنا كبيرة اليوم بدنا نكون حذرين ... الاسلحة معكن
الكل : اي معلم
متل ما اتفقنا نركز على البيوت الكبيرة ... عملو مجموعات وكل مجموعة بتقصد بيت .. ومعنا بس نص ساعة ... انا واحمد رح نكون بالصالة ونراقب الوضع وجوالتكن بخلوها مفتوحة ... الساعة ٩ انسب وقت لننطلق هلق خلينا نراقب الوضع من هون
~~~~~~~~~~~~•
وبمكان تاني رجال الامن مزروعين بكل ارجاء الضيعة ... وحصرا جنب البيوت ... جنب كل بيت في شخصين ... اذا في شجرة متخبين فيها ... او يتسللو ع السطح وع مداخل الضيع ومخارجها ... حتى ع التلة في عناصر ومعهن نواضير ليلة وحتى عند الصالة
وعماد بين الشجر راكب سيارتو بالخفاء وحكي ع اللاسلكي : العيون مفتحة عشرة على عشرة ... اكيد ماعندن ادنى فكرة بوجودنا اتاكدو نحنا الحلقة الاقوى ولا تتردو بطلب الدعم اذا واجهتكن مشاكل ... وما تقبضو عليهن اول مايدخلو .. اكيد متصلين ببعض وبيهرب الباقي ... بعد عشر دقايق بتداهمو ...
~~~`~~~~~~~~~•
الجو هدوء بكل الضيعة ومافي نسمة .. مافي غير صوت الاغاني عم تصدح من مكان الصالة
الساعة ٩:٠٠ وعماد بلش يضوج لهلق مافي اي حركة
عماد : شباب في اي حركة غريبة
١ : لا
٢لا
٣لا
٤لا
٥لا..
.الخ
نفخ بقهر ... ورجع اتطلع بالساعة
طن الجهاز
: سيدي في حركة
عماد : موقعك ؟
: بيت ابو القاسم
عماد : حاول تعرف مصدر الحركة
٢ : سيدي في شخص عندي عم يتسلل ع اسطوح بيت ابو شادي
٣: سيدي في شخصين عند بيت المحتار واحد تسلل ع السطح والتاني تخبى جنب الباب تحت الشجرة
٤: سيدي حارة العبد فيها كم شخص تفرقو
٥ حركة ببيت ابو جواد
٦ في حركة عندي كمان
٧ وعندي كمان
.... الخ
عماد : والباقي
ردو هدوء سيدي
بكل شارع خلي ٣ اشخاص والباقي تجمعو كل ٣ وساعدو زميل من زملائكن ... الباقي مداخل الضيعة مابدي الدبانة تمر ... الصالة محاصرة ... المداهمين عدو للعشرة واقتحمو واطلقو النار عند اللزوم
~~~~~~~~~~~~~•
شمس هلق واقفة ع الشباك يلي بطل على الضيعة وعم تتحزر معقول ياترى صار شي
فاتت قمر عليها وحكت : والله يلي بشوفك شاردة ومهمومة بقول انو العريس كان حبيبك
شمس : نانانا نا .. ياريت تسكتي وتحلي عني
رن تلفون قمر
قمر : مين هالرقم
شمس : ردي
قمر : الو ... اي هون ... خدي
شمس : الي ؟؟
قمر : اي شخص قلي بدو يحكي معك
اخدت الجوال بحيرة وحطتو على ادنها
شمس : الو
عماد : تمت المهمة يا بطلةةةة
~~~~~~~~~~•
بالصالة
الناس مبسوطة وعم ترقص والاكل من جميع الاصناف على الطاولات
وعالطاولة قاعد جواد وفاروق وشادي
شادي : ليه قاسم وفيصل مو قاعدين معنا
فاروق : لأنو بيسترجو يقعدو بعيد عن نسوانهن بهيك مناسبة هههه
شادي : اييه نيالن ... عقبالنا لما نجتمع نحنا ونسوانا
جواد : قول ان شاء الله هههههه
وضحك فاروق .... وجواد زادت ضحكتو ليدخلو تنيناتن بنوبة ضحك
شادي : لك شبكن حكيت شي بضحك
فاروق : ههههه ابدا
انضمو ميرفت ولونا لعندن
مرفيت : انو ليش لهلق قاعدين وماعم تشاركو بالرقصة
فاروق : بنخاف نخطف قلوب البنات ههههههه
لونا : ههههه بهي معك حق ... بس وحتى وانتو قاعدين خاطفينهن
جواد : ههههههه اااخ بس
مرفيت : بشرفكن قومو نرقص
فاروق : مابدي
جواد : وانا متلو
شادي : بالناقص منك ومنو تعو اخواتي انا برقص معكن
لونا : الله يخلينا اياك يا احلى اخ
~~~~~~~~~~~~~•
قمر : مين هاد وشو قلك لحتى هيك رح تطيري من الفرح
شمس : واخيرا يا قمر انكشفت الحقيقة
قمر : حقيقة شو
سمعو صوت سيارة وقفت قدام البيت واندق الباب
طلعو ع الباب بأستغراب وكانو شرطيين جايين بسيارة الشرطة
ابو بدر : تفضل
الشرطي : انت ابو بدر
ابو بدر اي انا
الشرطي : ومين شمس
شمس : انا شوفي
الشرطي : مطلوبين لسيادة النقيب
ابو بدر : ليش شو عاملين
الشرطي : تعو وبتعرفو كلشي
شمس : لحظة لالبس
دخلت بسرعة والاب واقف مستغرب شي من الشرطة وشي من بنتو يلي دخلت بحماس لتبدل
لبست تياب انيقة وابوها كان لابس كمان لانو كان بتاب البيت وراحو مع الشرطي
قمر : شوفي شو صاير .. وع وين بدكن تاخدوهن
الشرطي لهون عصالة العرس نص ساعة وبيرجعو ماتخافو
راحو ركبو معن وانطلقت السيارة
نجمة : حدا فهم شي
صباح : لا بس انا قلبي مو مطمن ابدا
قمر : خلونا نلبس ونلحقن
صباح : اي بسرعة
~~~~~~~~~~~~•
عباب الصالة
الشرطة معبية المكان ويلي جوا بيجهلو تمام شوفي برا .. وكلشي ناس كانت برا ان كان من طرف العروس او العرس توقفو ليتحققو منهن
وصلت السيارة ونزلو منها شمس وابوها
واجا لعندن عماد وكان لابس درع وصافح ابو بدر باليد وبالايد التانية كان حامل اللاسلكي
عماد : النقيب عماد الاحمد ... كيفك ياعم
ابو بدر : الحمد لله
التفت حواليه وشاف الكم الهائل من العساكر وقال : شوفي يا حضرة الضابط شو صاير
عماد : رح تعرف كلشي.. (اتطلع ب شمس ) كيفك شمس
شمس مع ابتسامة : الحمد لله
عماد : عناصر .. ادخلو الصالة ووقفو الاغاني واضبطو الوضع
دخلو العناصر متل سرب النحل ع الصالة .. وكلشي بالصالة صابو حالة ذهول .. توقفت الاغاني والكل وقف وصار يستفسر ... وفتحو طريق لنص الصالة دخل عماد وجنبو شمس وابوها
فاروق : هادد؟؟؟ شو عم يعمل .. ومين بكون
جواد : مين هاد
فاورق : والله ماعم اعرف كان بدو يقرب بس العسكري يلي قدامن منعو
عماد : لو سمحتووو هدووء
الكل سكت
عماد : بالاول بعتذر على الدخول عليكن بهي الطريق وبتمنى تهدو لأنو جايين لصالحكن
تقدم ابو القاسم وابو جواد والمختار وابو اشادي وبعض الكبارية .. وعماد اشر للعناصر يعطوهن مجال يقطعوا
المختار : ياريت تفهمنا بسرعة شو يلي صاير
عماد : اليوم احبطنا عملية سرقة كبيرة كانت بضيعتكن ... وتم القاء القبض على اكبر عصابة حرامية بالبلد هون بضيعتكن
ابو القاسم: كيف يعني
عماد : لو سمحتو لا تقاطعوني
التزمو الصمت واتطلعو بابو بدر وبنتو باستغراب
عماد : يلي حكيتو صح .. والحمد لله مسكنا كل افراد العصابة بس بظن لسه في حدا منهن متخبي هون بصالة ومارح يطلع الا معنا .... مسكناهن وصاردنا المسروقات كلها وكلها بالحفظ والصون
ابو جواد : مسروقات شوو
عماد : من بيوتكن مصاري ومجوهرات
ابو القاسم : احكي غير هالحكي يا سيادة الضابط
عماد : لا تخافو ياجماعة كلو تحت السيطرة ... والفضل كلو بيرجع لشمس
التفت ع شمس وابتسم وقال : هي الصبية كشفتهن وخبرتنا ونحنا كنا ع تعاون معها كل هالفترة واليوم كانت العملية والقينا القبض عليهن كلن
قدر فاروق يقرب منهن وحكي كيف ومين هنن
اشر عماد لشرطي وهداك دخل الشباب الخمسة والبنتين مكلبشين
عماد: هدول هنن .. دخلو عأساس عمال يشتغلو بالاراضي ومنو بيرسمو خطة السرقة
بس شمس سمعتن واجت خبرتنا بالفرع .. هنن كانو عم يرسمو ونحنا كنا عم نرسم عليهن ... بهنيكن بوجود هيك بنت .. بنت بمية رجال
رئيس العصابة موجود بالصالة مع واحد تاني .. بس مافي اي مفر والتزومو الهدوء ليلاقوا طريقة يهربوا فيها
ابو بدر : انت يابنتي
دمعو عيونها وقالت : اي ابي
ابو بدر : ليش ماخبرتينا كيف بتعملي هالشي لحالك
شمس : خفت احكي لحدا وتنفضح القصة وماينمسكو المجرمين
الكل عيونون عليها وهية همها الوحيد ابوها ومن بين هالعيون .. عيون سمير يلي كلها حقد وشرار
عماد : وبالنسبة للحكي الي طلع بحق شمس ... بحب وضحلكن انو انا يلي كنت معها وكانت عم تعطيني معلومات وكانت بمهمة رسمية ... وبتمنى ماتحكو بأعراض الناس بدون ما تفهمو القصة ... وانت يا ابو بدر برجع بهنيك ع هيك ترباية
ابو القاسم : صدقت ... والنعم من هيك تربية
والكل صارو شي يقول الله محيي اصلك وشي والنعم من هيك تربية وكلام مدح كتير
ابو بدر عيونو على بنتو مدمعين وفخور فيها وهية عيونها بس على ابوها وبدها تشوف هاد الرضا فيهن
وفاروق صافن بشمس ومافي ع وجهو اي ردة فعل او يمكن مصدوم
طلعها من شرودها صوت سمير : هي انت ياشمس ... وانا يلي كنت ناوي اجي طالعك من هالقرف يلي عايشتيه ونسافر لمكان بعيد كتير
سمر : انت شوو عم تحكي ... هيك لكن انت طول هالفترة حاببها لهي ..
وليك بالأخير شو طلع منها بتستاهل
عماد : عسكريي طالعن ع البوكس ... ولو سمحتو الكل رح يتفتش وكل شخص مو معروف بتمنى تساعدونا تدلونا عليه
قربو العساكر ليطالعوهن بس بدون ما ينتبهوا سمر سحبت فرد من عسكري حاولو يسيطروا ع الوضع بس الرصاصة كان اسرع بكتير ... هدوء لثواني ... لتوقع شمس على ركبها واديها ع بطنها الدم ملاهن
من على الباب صرخت قمر وامها باسمها واجو يركضو ... ابوها نزل بسرعة لعندها
العساكر سيطرو على الوضع وطلعو الحرمية لبرا فورا ....
شمس فورا غابت عن الوعي
ابوها: بنتي... شممسسس... لا تموتي
فاروق بلهفة: لازم ناخدها على المشفى بسرعة
عماد : اسعاااف فوراااا
فاروق : مارح ننطر الاسعااف ... جهزو سيارة بسرعةة
حملها وطلع يركض فيها وامها ركضت وراها وقمر ماعرفت وين تروح تررك ابوها يلي قاعد بالارض ولا تلحق اختها .. نزلت لعند ابوها يلي ايديه دم وشارد فيهن
قمر : بابا قووم شمس رح تكون منيحة
ابوها : دعيت عليها بالموت ... انا دعيت عليها بالموت
قمر : شمس رح تكون منيحة قوم بابا
وقف بترنح وجواد فورا سندو
اتطلعت فيه قمر بس ما علقت
جواد : رح جهز سيارة ونلحقهن .. ساعديه ليوصل ع الباب
ماردت عليه وهو ركض لبرا ...
والعساكر منعو من اي حدا يطلع ليتحققو من كل الموجودين وانو مافيهن غريب وساعدهن بهل المهمة قاسم وفيصل .. والقوا القبض ع الشخصين يلي كانو موجودين
~~~~~~~~~~~~~~•
بالمشفى
ع كرسي جنب غرفة العمليات قاعد ابو بدر وجنبو قمر وصباح ... مرتكيين ع بعض وعم يبكو بصمت
وعجنب .. واقف فاروق وجواد... وعماد منفصل عنهن شوي واغلب وقتو ع الجوال
ابو بدر : اذا بصير معها شي مارح سامح حالي
صباح : مارح يصير معها شي ورح نرجع كلنا ع البيت لا تفاول عليها
وع الكرسي التاني قعد فاروق بتوتر وخوف رفع راسو ع السقف ونفخ
جواد قعد جنبو وقال : شبك
فاروق : بموت اذا بصرلا شي ... يارب تكون معها
جواد بصدمة : بتحبها
فاروق : بعطيها عمري بس تكون بخير
جواد : عم تحكي جد
فاروق : .....
جواد : خلص رح تكون بخير لا تاكل هم ... بنت قوية ورح تتجاوزها باذن الله
فاروق : ياارب
جوال جواد عم يرن
جواد : من الضيعة بدن يطمنو
قام عجنب يرد
وعماد قرب من اهلها : عم طول بالك .... ان شاء الله رح تكون بخير
ابو بدر :......
عماد : انسة قمر ممكن كلمتين
قامت معو على جنب
عماد : مابمشي الحال هيك ... فرطتو من كتر البكي لازم تقووا حالكن وان شاء الله رح تكون بخير ادعولها
قمر : ياارب
طلع الدكتور من غرفة العمليات
وطمنهن : طالعنالها الرصاصة و وضعها مستقر رح تضل تحت المراقبة ٢٤ ساعة وبعدها بنقرر حالتها
تنفسو برياحة
وعماد مضطر يرجع يتابع شغلو ...
عماد : قمر رقمي معك اي شي بصير بتخبريني
~~~~~~~~~~~~•
بعد يومين
اجا فاروق ع الورشة لعند جواد
فاروق : تروح
جواد : ع وين
فاروق : ع المشفى
جواد : من كل عقلك
فاروق : والله
جواد : وشو بدك تبرر وجودك
فاروق : بقلن ابي باعتني واذا محتاجين شي
جواد : اي بروح بس بالاول بدي مر ع البيت وغسل وبدل تيابي
فاروق : ماشي
~~~~~~~~~~~~~•
بالمشفى
شمس نايمة ع تختها وعم تتوجع
قمر : ياعمري اهدي هلق بخف الوجع ع المسكن
شمس : رح موووت ... لما سحبو المفجر كأنو سحبوه من قلبي ... ااااااخ
قمر : طيب رح شوف الممرضة بركي بتعطيكي مسكن اقوى
شمس : اي روحي دخيلك
مافي ثواني واجت الممرضة وحقنتها بابرة بالوريد
الممرضة : ان شاء الله بتصير احسن
شمس : ااااه ياربي
قمر : مشاني يا اختي حاج تتوجعي والله قلبي عم يوجعني عليكي
شمس لتلتهى : قمر.. احكيلي
قمر : شو احكيلك
شمس : اي شي .. التهي فيه
قمر : اي صح تعي خبرك شو صار ... كل اهل الضيعة مافي علسانهن غير سيرتك وانو يا هيك البنات يا بلا وبنت بمية زلمة .... وكل يوم بيجي حدا من اهل الضيعة لهون بشوف اذا عايزين شي واذا بدنا شي ... والضابط الحمد لله متواسطلنا هون بالمشفى ... واهل الضيعة راحو تعرفوا ع مسروقاتهن واستلموهن ... وابي ياعمري عليه شو خايف عليكي ... بس امك ماعد خلتو يجي لهون لانو كل مابيجي بقضيها بكي وحاطط اللوم عحالو انو هو دعى عليكي .... واهم شي الشب الحلو عم يتصل فيني يطمن عنك ... ويمكن هاد اليوم يجي هيك افهمت من حكيو
شمس : ....
قمر : شمس انت معي
شمس كانت بنوم عميق
غطتها منيح وطلعت لبرا لتتصادف مع عماد
سكرت الباب وحكتو : اهلين
عماد : كيفك
قمر : الحمد لله
عماد : وشمس
قمر : كانت كتير موجوعة .. عطوها مرتين مسكن لحتى نامت
عماد: ليه
قمر : كان في مفجر مكان العملية واليوم سحبوه
عماد : ماعلى قلبها الا العافية
قمر : شكرا
عماد : نشرب شي
قمر : اي ليش لأ
~~~~~~~~~~~~~•
جواد كان عم يسوق .. وجنبو فاروق عم يقلب بمسجلة السيارة
جواد : هلق سؤال
فاروق : اي
جواد : انت عنجد حبيتها لهي البنت
فاروق : اي والله
جواد : انا مانبهتك من هيك حب
فاروق : لأنو الشغلة بايدي ... بس اهلي ماعندن مانع
جواد : متأكد
فاروق : اي امي قالتي شو رأيك اخطبلك اياها
جواد : لتكون عم تجرجرك متل ماعملت امي
فاروق : معقول
جواد : كلو معقول
فاروق : والله مابعرف .. بس بكير على هالحكي ... كل همي انو شوفها بخير واطمن عليها
~~~~~~~~~~•
وصلو ع المشفى وبنفس الكوريدور من جهة جاي جواد وفاروق .. ومن الجهة التانية جاي قمر وعماد معهن كاسات قهوة
جواد : هاد شو عم يعمل مع قمر
فاروق : هالزلمة شو حرقلي اعصابي
جواد : وانا بلش يحرقلي اعصابي
ضلو يتقدمو لوصلو مقابيل بعض قدام غرفة شمس
قمر ما بتنكر رجفة قلبها بشوفة جواد .. بس تعلمت الصبر على اصولو وقادرة تمثل اللامبالاة
فاروق : السلام عليكم
قمر وعماد : وعليكم السلام
فاروق : شو الاخبار
قمر : الحمد لله .. بس لساتها تعبانة
فاروق : فايقة هلق
قمر : تركتها نايمة
جواد : اي تمام ... كيفك حضرة الضابط
عماد : تمام .. انا بالأذن ... قمر بنضل عتواصل
قمر : ماشي
راح عماد وجواد ضابط اعصابو لمشي وراح
جواد : شو يعني بنضل عتواصل
قمر : عم تحكيني الي ؟
جواد : مين في غيرك
قمر : جواد يلي بينا انتهى من زمان وخلي كل حدا ينتبه لحياتو
جواد : لا تخليني طالع جناني عليكي
قمر بعصبية من نبرتو : مابيلزمني جنانك طالعو بشي يفيدك
جواد :وصايرة تعرفي تجاوبي وجوابك جاهز
قمر : انتو شوبدكن ليش جايين
فاروق : بكفي جواد
جواد : اااخ بس
قمر : هههههه مو عارفة شو قلك ... عم اتطالع مراجلك علي وعصبيتك وانت قدام اهلك حرف مابتقدر تهمس ... روح روح التهى بالعروس يلي نقتلك اياها الماما وطلع عصبيتك عليها لتشوفك شقد رجال
جواد : قمر اخرسييي
قمر : الحقيقة بتوجع ماهيك
جواد : قمر بتعرفي انو بكلمة وحدة بخرب الدنيا
قمر : هه شوبدك تعمل ... بدك تروح تخبر ابي .. روح صار عندو مناعة ضد الصدمات
جواد : لا مو هيك
قمر : لكن كيف
جواد : حابة تسمعي
قمر : شوفي عندك
فاروق وكأنو فهم وقال : جوواد اصحكك ... لا تخبص الدنيا
جواد : اذا ما انخبصت ما بتتصلح
قمر : عن شو عم تحكو
فاروق : قمر فوتي لنفوت لعند شمس
جواد : مو قبل ما احكي يلي عندي
كتفت ايدها وقالت : تفضل
جواد : قمرر
قمر : اييي
جواد : انا رديتك على ذمتي
فاروق : 🤦
قمر بلبكة : شووووو انت شو عم تخبص ... اكيد مابصير هيك
جواد : مزال ماخلصت العدة بصير ... وهلق رجعنا متل قبل زوج وزجتو ... كيفك فيها
قمر : لا اكيد ... لا ... فاروق احكيلك كلمة ..
فاروق ؛ ماعم قلك فوتي وانت ماعم تردي
قمر : شو يعني هلق رجعت مرتو
فاروق : حسب معلوماتي اي
قمر : قلو يطلقني .. مابدي ... مابدي
تنهد جواد وقال : اوووه هلق ارتحت وكانو كان صخرة قاعدة على قلبي
قمر : مابصير هيك ... مابدي ارجع لنفس التجربة ... مابدي ارجع عيش بالخوف ... جواد طلقني
جواد : وحياتك ماتحلمي ... وهلق بروح بخبر البابا وبفرجيه عقد الزواج ... ولا بخبر الشرطة وبطلبك عبيت الطاعة وهيك بحط اهلي واهلك تحت الامر الواقع .. مو فكرة
قمر : اكيد مافييك تعمل هيك ... فاروق بترجاك حكيه
فاروق : تسطفلي منك الو ...
قرب فتح الباب ودخل على شمس
جواد : بحبك يا حلو
قمر : لا تفرح كتير ... مارح يصير كلشي متل مابدك
جواد : وحياتك متل مابدي وزيادة ...
كان بدا تهرب بدا تصرخ بدا تبكي .. بس هو مسكها وضمها حاولت تصدو بس كان اقوى منها ... وضل محكم بحضنها لحتى خارت قواها وصارت تبكي على صدرو
جواد : اكبر غبي يوم فرطت فيكي ... صح هدول اهلي بس كمان هي حياتي وانا يلي بدي عيشها ... وحياتك عندي لو بدي حارب اهلي والضيعة كلها واطلع منها ايد من ورا وايد من قدام مارح فرط فيكي ورح تكوني الي وكون الك
زاد بكاها
جواد : بكفي يا قلبو لقلبي والله هالقلب فرطت براغيه ومعد قادر ...
~~~~~~~~~~~~~•
كانت نايمة بعمق وهو قاعد جنبها صافن فيها
فاروق : شمس ... شمس ... انا فاروق ... كيفك
سمعت همساتو وفتحت عيونها بثقل ... شافتو قدامها وهية كل ظنها انها عم تحلم
فاروق : فقتي
شمس : (بخفت) مابعرف .. ماني بهل العالم انا
فاروق : تجي على عالمي
ابتسمت
فاروق : شو قلتي
شمس : بالاول عرفت شو كنت اعمل مع عماد
فاروق: اي عرفت ... وانا كنت متأكد انك مابتغلطي وارجع قول مافي انسان مابيغلط ولازم بعدك عن الغلط ... بس ومع هيك كان لازم تخبريني
شمس : انت كتير حلو
فاروق: وانت بتجنني
شمس : كنت عطول اتغزل فيك وقول اسمري الملتحي
فاروق : انا
شمس : اي
فاروق : يعني انت معجبة فيني
شمس : لا
فاروق : لكن
شمس : بحبك
ماصدق شو سمع وقام لعندها وقال : شمس شو عم تحكي
شمس عم تغمض وتفتح عيونها
فاروق : شمس ارجعي قولي شو قلتي
شمس : تعبانة ... ونعسانة
فاروق : مو هيك .. شو قلتي
شمس : عطشانة ... ماعم يرضو يسقوني ولو شربة مي
فاروق : اكيد مشان صحتك
شمس : تمي ناشف شفافي تقطقو وقمر ماعم ترضى
فاروق : والله مابقدر يا عمري
شمس : بس انا معد تحمل
فاروق اتطلع ع الباب كان مسكر .. قام ع قنينة المي وعبا بطبقتها كم نقطة وقال : رح بللك شفافك مو اكتر
هزت براسها بنعس
فاروق : بس بشرط تقولي بحبك يا فاروق
شمس : حبيبي السري ههههه كنت عم عيش معك قصة حب بخيالي
فاروق : انت قومي ورح خلي الخيال واقع والواقع خيال
شمس : عطشانة
قرب ونقطلها كم نقطة مي عشفافها وهية تحاول تبلعهن وبعدها دخلت بنوم عميق
رجع القنينة لمكانها وابتسم وقام طلع برات الغرفة
~~~~~~~~~~~~~~~~•
تاني يوم بالضيعة
وببيت ابو بدر حصرا
ابو بدر وصباح عم يجهزو حالن ليروحو يخرجو شمس من المشفى .. طمنهن عنها الدكتور ومعد بحاجة لوجودها بالمشفى
طلعو بسيارة تكسي وانطلقو
ونجمة ضلت بالبيت تنضفو وتزبطو لوصول اختها
اندق الباب وراح لتفتح لتتفاجئ بفريد
ضلت واقفة مصدومة ومعد طلع منها ولا حرف
فريد : شو مافي اهلين ... الحمد لله عالسلامة
نجمة : خير
فريد : شو خير ما خير ... هيك الوحدة بتحكي زوجها جاي من بعد فترة
نجمة : ارجع مكان ما جيت ماضللك شي بهل البيت
فريد : شو يعني ماضللي شي ... الي كلشي .. وبعدين مافي تفضل
نجمة : لا مافي حدا وكمان ابنك عند اهلك بعتو اخدوه يعني ما الك شي وهلق روح من محل ماجيت
فريد : وقلبي يلي عندك بدي اياه
نجمة : هه لا تضحك علي
فريد : طيب بدي نحكي
نجمة : مافي حكي بعد مارحت وتزوجت
فريد : ومين قال انو تزوجت
نجمة : اخوك
فريد : مافي هيك شي ابدا .. وحكو هيك اكيد مشان يغيظوكي
نجمة : حسبي الله فيك وفيهن لانو ناقصني انا ... خلص حلوو عني
فريد : حقك علي والله ... وانا بعتذر بس والله انا طلعت برات الضيعة لأشتغل واقدر افتح بيت لحالي واخدك
نجمة : وتلفونك ليش مطفي
فريد : انكسرت ع اجار الغرفة يلي كنت قاعد فيها واضطريت بيعو
نجمة : هههه
فريد : بس الحمد لله لقيت شغل ثابت واستأجرت بيت صغير على قدنا وجاي اخدك ونبعد عن كل العالم ... بدي ارجع جدد حياتي معك شو رأيك 😉
نجمة : ماخبرت شو صار فينا
فريد : اي والله خبرت وجاي اطمن عن اختك بس ماعم تسمحيلي
نجمة: اي اليوم رح يخرجوها
فريد : اي تمام الله لايضرها ... بس ماء شالله عنها يلي عملتو محدا بيعملو ... مع انو مابهضمها بس والله برتفع الراس
نجمة :.....
فريد : اي المهم هلق شو
نجمة : حكيك مع ابي
فريد ؛ بنحكي مع ابوكي ما اختلفنا بس انو شو بدك ترجعيلي
نجمة : شو بقول ابي انا موافقة عليه
فريد : عمرريي حبيبتييي ... انا زوجك ماني جاي اطلب ايدك
نجمة : فريد خلص روح
فريد : مابروح لشوف شو قلتي
نجمة : قول بشو
فريد : انا بحبك ولسه بدي اياكي ومابدي اخرب بيتنا وبدي رجعك شو قلتي
من جواها مبسوطة بس ماحكت
نجمة : مابعرف
فريد : لا بهل القعدة عند اهلك مكبرة راسك كتير
نجمة : اي ليش لأ رجعت شخصيتي يلي سلبتوها مني
فريد : اي بحقلك .... ويكون بعلمك انا بدي رجع مرتي يلي سلبوها مني ... اعملي حسابك المسا جاي اخدك براضيكي غصب عندك جاي اخدك
نجمة : اكيد مافيني اترك اختي مريضة وروح معك
فريد : وانا اكيد مافيني اتحمل اكتر من هيك اليوم المسا وماعندي غير هالكلام
نجمة : اي روح وللمسا بيفرجها الله
~~~~~~~~~~~~•
جواد كان بغرفتو وطالع من الحمام ومبين عليه متحمم وتيابو جاهزين على التخت ليرن تلفونو قرب واخدو من على الطاولة وتفاجئ بالاسم : ام قاسم
جواد : الو
ام قاسم : كيفك ابني
جواد : الحمد لله .. كيفك انت خالتي
ام قاسم : تمام الحمد لله
جواد : اي خالتي قوليلي
ام قاسم : ابني سؤال وياريت تجاوبني بصدق
جواد : اكيد تفضلي
ام قاسم : فاروق مين البنت يلي بحبها
جواد : اه
ام قاسم : جاوبني ابني ... وانت واياه هالفترة صايرين قراب من بعض ياريت اذا بتعرف تقلي
جواد : صح قراب من بعض بس مابنحكي بهي الامور
ام قاسم : يعني لونا عاجبتو
جواد : مابعرف .. اسأليه
ام قاسم : ماعم يحكي ... وانا خلص ناوية زوجو بس هو معند وليش مابعرف ... واكيد حابب وحدة انا ابني وبعرفو
جواد : طيب ارجعي افتحي معو الموضوع بظن يحكي
ام قاسم : يعني بتعرف شي
جواد : خالة خلص حكيه انت
ام قاسم : طيب اخر سؤال
جواد : ماشي
ام قاسم : شمس ؟
جواد :....
ام قاسم : شو ليه ساكت
جواد : يا خالتي اساليه انت
ام قاسم : يا اي يا لأ ووعد ماخبرو ... بس بدي قلبي يرتاح
جواد : والله مابعرف ايو جواب رح يريحك
ام قاسم: انت قول وماعليك
جواد : طيب اي
ام قاسم : خلص يكتر خيرك ... ولا تقلو انو حكيتك
جواد : بس ياخالتي والله بحبها
ام قاسم : مارح تعرف مصلحة ابني اكتر مني يلا سلام
~~~~~~~~~~~•
سكرت الجوال وابتسمت للشخص يلي قدامها وهو ابو قاسم
ام قاسم : قلتلك هي
ابو قاسم : وانا كان بدي اتاكد قبل ما احكي مع ابوها للبنت
ام قاسم : اتكل ع الله
ابو قاسم : رح اتصل بابو جواد ومرتو يجو لعنا ... حكيها انت بموضوع البنت التانية وانا بحكي ابو جواد حاجتو هالولد والله بحزن
ام قاسم : ليش مانروح نحنا لعندن
ابو قاسم : ما جواد بالبيت ومابدي يعرف بالقصة بدنا نعملها مفاجأة للولاد
ام قاسم : اي والله بدها تكون مفاجئة
~~~~~~~~~~~~•
تمددت شمس ع فرشتها ببيت اهلها والاستقبال كان حافل وكلن عم يأهلو ويسهلو فيها
ابوها : نور البيت يا شمسو لهل البيت
قمر : احم احم
ابوها : وانت قمرو
ضحكت نجمة
ابوها : وانت النجمة
قمر : بس كأنو الشمس اكبر من كل هدول
ابوها : هههههه الله بيعلم كل وحدة الها معزة خاصة فيها
صباح : الله يخليك فوق راسن يا حق
الكل : آمين
الاب : اي بابا شو حابة تتغدي
صباح : شو هالحكي ماسمعت شو قال الدكتور ... بنبلش بالخفيف لانو في امعاء متضررة
الاب : طيب شو المسموح لروح جبلا اياه
صباح : ما تاكل هم نحنا بنتصرف روح ارتاح وخليها هية ترتاح
ابو بدر : طيب ماشي
شمس : ماما جوعانة
صباح : اختك نجمة مجهزلتك شوربة غير شكل
شمس : يا حبيبي يعني بدي قضيها ع الشوربة
صباح : بس هالكم يوم تحملي
شمس : طيب امري لله
طلعت صباح وماضل غير البنات
رن جوال قمر وقرأت الرسالة وابتسمت
شمس : ضحكينا معك
قمر : هاد فاروق عم يتطمن عنك
شمس ؛ دخيلو هو ووهالأطمئنان الفاشل
قمر : لي وليه
شمس : يلي بيسمعو قبل الحادث بقول مارح يتكنس من عندي بالمشفى
قمر : ومين قلك انو ماكان يروح بس مايقدر يشوفك من ابي او امي ... ومبارح ماكان حدا وفات لعندك قعد شوي معك ... لك صحي قلي انك فقتي وحكيته ؟؟ معقول ماكنت حاسة
اتجلست بسرعة بس وجعتها مكان العملية : اااه
قمر : شبك .. انتبهي
شمس : شوو قلتي ... مبارح فاروق كان عندي
قمر ؛ اي وبظن ماحسيتي عليه
شمس : يعني مو منام
قمر : لا
شمس : يخرب بيت عدوينك اذا هالحكي صحيح
قمر : شبك ولو
شمس : يا مصيبتك يا شمس
قمر : شو صاير
شمس : انا مبارح كتير خبصت بالحكي ... ياربي دخيلك كيف بحكي هيك
قمر : شو حكيته متذكرة
شمس : ااااخ بس
قمر : سبتيه يعني
شمس : ياريت
قمر : عكل حال شو ماكان يلي حكيته هو كان طاير من الفرح فيه
شمس : اوووف يااه
قعدت قمر ونفخت وقالت : لا تنقهري ولا عبالك شو ماكان يلي صايرلك مو قد يلي صايرلي
شمس انتبهت لقمر : شو صاير
قمر : امبارح جواد ردني على ذمتو
شمس ونجمة : شوووو
قمر : لك انا ماصدقت خلصت من هالكابوس
شمس : كيف بصير هيك
نجمة : اذا ماخلصت العدة برجعها بكلمة وحدة
شمس : وشوبدك تعملي هلق
قمر : والله مابعرف كل مابتذكر بحس حالي رح انجلط
شمس : بعدك بتحبيه
قمر : اااه بس ... بحبو بس مو بهل الطريقة مليت من الخوف والرعب وخاف حدا يكشفنا ... قلي لو بدو يعادي الدنيا كلها مع تفرق عندو
شمس : بس شو هالتصرف الجحاشي هاد هيك برجعك من الباب للطاقة
قمر : ماهو كان عماد بالمشفى وانا كنت واقفة معو والافندي قال غار علي
سكتو لما دخلت صباح ومعها الشوربة وكمان جوال شمس
صباح : تاكلي لحالك ولا ساعدك
شمس : لا ماما يسلمون .. باكل لحالي .. وشكرا ع الجوال كنت رح انساه