بعنوان "نمروسى"
(الفصول القديمة على البروفايل الشخصى)
فتحت الباب بالمفتاح ودخلت علشان أتصدم من اللى شوفته !!!
الضابط" شادى المرشدى " قاعد مع" قيصر" بيشربوا شاى وبيقهقوا من الضحك !!!
وأول ما "قيصر" شافنى قال وهو بيقفل ويفتح فى المطوة بتاعته :
حمد الله على السلامه ياعمى .. ياخاين !!
فى اللحظة دى الدنيا كانت بتلف بيا , أعصابى سابت , وركبى كانت بتخبط فى بعضها من الرعب , لفيت وكنت عايز أجرى من القصر بس أتنين من رجالة قيصر مسكونى وثبتونى !!! أأه ياشادى الكلب !!! , نيمتنى على المشمع !!!!
ولقيت شادى بيقول لقيصر :
أستأذن أنا بقى يامعلم قيصر, علشان مبحبش أتدخل فى الامور العائليه
وقام من مكانه وهو بيلبس الكاب بتاعه
فرد عليه قيصر وقاله :
فرصه سعيده ياشادى , وبكره هتوصلك الفلوس والبضاعه زى ما أتفقنا
هز شادى راسه بالموافقه و جه ناحيتى
وقالى وهو بيغظنى:
ياخاين !!!
وكمل على باب القصر وخد القوه اللى معاه ومشى ...
الوقت وقف فى اللحظه اللى قفل فيها شادى باب القصر , صالة القصر هششش , مفيهاش صوت غير صوت نبوت قيصر وهو بيدك أرضية القصر ,
دك قيصر بنبوته الأرض وهو قاعد على كرسيه مره .. والتانيه ... والتالته و قام وقف من مكانه , فعملت ميه على نفسى من الرعب ,وأتسرسبت من بنطلونى
شاور على الأتنين اللى ماسكنى فسابونى, و شاورلى بصباعه علشان أقرب منه
متحركتش من مكانى من الرعب
فشخط فيا ,شخطه قلعت قلبى من ضلوعه,وخلت ركبى تمشى لوحدها خطوتين وهى بترتعش,لحد ماوقفت لوحدها ومبقتش عارف أتحكم فيها
قعد يلف حواليه بنبوته
وهو بيقول :
تعرف ياعمى , أنا دكيت قسم أمبابه ليه !!!؟
وجاوب على نفسه وقال :
ضابط شغال فى القسم شتمنى بأمى نرجس , مرات أخوك , شوفت!!
مابالك بقى باللى يخون قيصر!!
ورفع نبوته لفوق ونزل بيه بعزم ما فيه على ضهرى , فوقعت رزع على الأرض و صرخت بأعلى ما فى عزمى من كتر الآلم, لدرجه أن حبالى الصوتيه أتمزقت ومبقتش تطلع صوت
وكمل كلامه وهو بيقول :
أنا عارف أنك كنت خايف منى , وأتخضيت من المنظروالرجاله ,ومش متعود على حاجه زى كده ومقدر ده وعامل حساب للدم اللى بينا ، علشان أيه !!! علشان قيصر عادل
وطلع مطوته وقربها منى وانا واقع على الأرض وقال :
المره ده قرصة ودن !!
ورفع المطوه ونزل على ودنى فلقيت نص ودنى على الأرض والدم بيتنطور من النص التانى اللى فى راسى, أغمى عليا من الصدمه وفوقت بعدها بفتره طويله معرفش أد أيه ,فتحت عينى لقيتنى على الارض ولسه بنزف من ودنى جامد , ونص ودنى المقطوع قدامى , بلف براسى مالقتش قيصر ,لقيت عدنان ومعاه 5 بلطجيه بيشربوا شاى وسجاير جمبى وبيضحكوا !!!
ولاد الكلب ولا كأنهم شايفنى , حاولت أشد نفسى علشان أقوم ,ضهرى طقطق جامد , حاولت أصلب طولى معرفتش , حاولت تانى نجحت بصعوبه أنى أقوم بس وضهرى متنى , خدت نص ودنى اللى على الأرض ومشيت وأنا بتمطوح يمين وشمال ,لحد ماوصلت أوضتى ,دورت على قطن وشاش ومطهر علشان أوقف النزيف ، و جبت خيط جراحه وأبره ووقفت قدام المرايا وحاولت أخيط ودنى تانى , أيدى كانت بتترعش جامد ومكنتش عارف أمسك الأبره حاولت أخيطها على أد ما أقدر , ولكنى أغمى عليا تانى , فتحت عينى تانى يوم الصبح لقيت الآبره والخيط فى أيدى , حاولت أقوم وبصيت فى المرايا لقيت نص ودنى المقطوع مدلدل ,رميت نفسى على السرير من كتر التعب والالم اللى فى ضهرى,
كنت هموت فى أوضتى ومحدش كان هيسأل فيا, ولاد الكلب كانوا هيسبونى لحد ماأعفن ويجوا يشيلوا جثتى يرموها !!!, لولا الواد منصور البواب اللى فضل ياخد باله منى ويأكلنى ويشربنى ويدينى الدوا شهر ونص لحد مابدأت أفوق وعرفت أصلب طولى شويه وأتمشى فى الأوضه , لحد مادخل عليا منصور فى مره وهو جايب الاكل وقالى:
قيصر سألنى عليك ؟
قولتله وأنا ركبى بتخبط فى بعضها :
سألك على أيه؟!!! وقولتله أيه ؟!!
قال :
سألنى عن صحتك وطمنته انك بقيت زى الفل
لطمت وقلتله :
طمنته !!! ياغبى !!!
قالى :
بص يازميلى, انا مش هكدب على قيصر فى حاجه خالص أديك شايف
وبص على نص ودنى اللى مخيطه
سكت شويه وقال :
مش هتنفع يازميلى
قولتله :
هى أيه اللى مش هتنفع ؟
شاور على نص ودنى المتخيط وقال :
ودنك !! النص اللى أنت مخيطه عفن و وبقى أسود خلاص
قولتله :
خليك فى حالك والنبى وشوف أنت رايح فين ,
قاللى :
براحتك يازميلى!!
وسابنى ومشى , قومت بصيت فى المرايا لقيتها عفنت فعلا فشيلتها ورمتها فى الزباله وعرفت أنك هكمل اللى جاى من عمرى بودن ونص
فكرت أنى أروح لقيصر قبل مايطلبنى علشان أعتذرله على اللى حصل و أقوله أنى كنت مذهول ومكنتش عارف أنا بعمل أيه ,وأوعده أنه مش هيتكرر تانى , وبالفعل روحتله أوضته وخبطت براحه وأنا مرعوب ففتحلى الباب نص فاتحه , وكان فى نص هدومه وأظاهر انه كان مشغول , فشخط فيا وقالى :
عايزه أيه !!!!
فقولتله وانا جسمى كله مقشعر :
انا جاى أعتذرو...
قطع كلامى وشخط فيا
وقاللى :
طول مانا فى القصر ماتطلعش بره أوضتك و ماشوفش وشك أمك قدامى ...غور ياااااد
فجأه الصحه ردت فى جسمى وجريت من قدامه على أوضتى وكل تفكيرى أزاى أقتل قيصر!!!
عصرت دماغى , كل حاجه مقفله مفيش حتى خرم أبره أنفد منه
خرم !!!!
جريت على الخرم بتاعى اللى فى أوضتى وانا بقول لنفسى:
علشان أقتل قيصر لازم أعرف نقطة ضعفه ,زى ماعملت مع اخته, و أن مكنتش هعرف أراقبه هو شخصيا فمن حسن الحظ أنى اللى فى الاوضه اللى فيها الخرم , عدنان ,دراعه اليمين واللى يعرف عنه كل حاجه .
راقبت يوم عدنان من الخرم بتاعى ,
بيصحى من نومه ويقوم من سريره وينزل يلعب يجى ١٠ ضغط علشان يفوق وبعدين يقوم يشد سطر الهروين!!! ويطلع يشم الهوا فى التراس وبعدين يغير هدومه وينزل يباشر أمور العصابه ويرجع تانى لأوضته بالليل يشد سطر تانى وينام زى الملايكه يعينى ....وهكذا كل يوم
لحد مافى يوم صحيت بدرى وحضرت صينيه فيها كوبايتين شاى على حبة كحك و بسكويت وبيتى فور كنت وصيت الواد منصور يجيبهم من محل حلويات مشهور , وأستنيت لحد ماصحى من النوم وشد سطر الهروين وطلع على التراس , و خدت الصينيه وروحت خبطت على باب أوضته ففتحلى وهوه مستغرب وقاللى :
خير !!!؟
قولتله :
خير ياعدنان يابنى , أنا صحيت الصبح ومالقتش حاجه أعملها , ماأنت عارف , قيصر حاكم عليا ماطلعش من باب اوضتى ولو شافنى هيقتلنى , وأنا يابنى مش متعود على الحبسه دى، ومش متعود أقعد كده من غير ما أتكلم مع حد , فعملت كوبايتين شاى وجبت حبة بسكوت وبيتى فور من اللى بوقك يستاهلهم وقلت أجى أصبح عليك
بص على كوباية الشاى والبيتى فور، وحسيت أنه هيريل عليهم , ووسعلى من على الباب علشان أدخل , قعد طبعا يبصلى بشك وانا واقف بالصنييه فى الاوضه .
فقولتله :
أيه رأيك نقعد فى التراس
ومستنتوش يرد وطلعت على التراس حطيت الصينيه على الترابيزه وقعدت على كرسى من الكراسى , طلع ورايا التراس وهو لسه بيبصلى بشك ,و قعد على الكرسى اللى قدامى فمديتله أيدى بكوباية الشاى , فممدش أيده ياخدها منى , فقولتله :
عيب عليك ياعدنان يابنى , أنت مفكرنى حاطتلك حاجه فى الشاى , يابنى أنا طيب وغلبان والله واللى عملته ده , عملته علشان كنت أهبل وخايف من قيصر والله , أنما أنا مش بتاع مشاكل , وعلشان تصدقتنى أهوه
وروحت واخد بق من كوباية الشاى اللى كنت بديهاله , فبص بشك على البسكوت والبتى فور فمديت أيدى وكلت حاجه من كل حاجه , فمد ايده وخد كوباية الشاى وقعد ياكل بشراهه البتى فور , فضلت على كده كل يوم الصبح اخبط عليه الباب وأدخله بالصينيه لحد ما اتعود عليا و على صينية الشاى بالبيتى فور ,وبقت من أساسيات يومه وبدا يفتح معايا كلام عام وكان بياخد باله أوى من كلامه ومجابش مره سيرة شغله مع قيصر , لحد مافى اليوم الدنيا رجعت تبتسملى فيه تانى !!!
حصلت مشكله كبيره لعدنان فى الشغل وغلط غلطه كبيره ,حاسبه عليها قيصر قدام رجالته كلهم وضربوا بالنار فى رجله , يوميها كنت سامع قيصر بيزعق جامد فى القصر
وكان بيقول لعدنان:
أنا قلت تقتله مش تعلم عليه !!!
وبعدها سمعت صوت ضرب نار , و شويه و سمعت صوت رجلين بتجرى ناحية أوضه عدنان , ببص من الخرم لقيت
٣ من رجالة قيصر شايلين عدنان ورموه على سريره وخدوا نفسهم ومشيوا , جبت شاش وقطن وخيط وأبره ومطهر من أوضتى وطلعت على أوضة عدنان , وخبطت كتيير لحد مافتحلى وهو واقف على رجل واحده والرجل التانيه مليانه دم , عملت نفسى ملهوف عليه وسندته عليا وقعدته على الكرسى ونزلت قرفصت تحته وبدأت أطهر الجرح أنا بقوله :
الحمد لله الرصاصه طلعت من الناحيه التانيه , بس لازم مضاد حيوى علشان الجرح والعدوى , هطهر الجرح وهكتم الدم بالقطن والشاش , على ما أكلم الواد منصور فى التليفون يجيب المضاد الحيوى ,
وبالفعل كلمت الواد منصور جاب المضاد وجه , فضلت مع عدنان باخد بالى منه وأغيرله على الجرح كل يوم , لحد ما أطمنلى ووثق فيا ,وفى يوم حكالى على سبب المشكله بينه وبين قيصر ,ومنها عرفت أنا هخلص من قيصر أزاى !!
حكالى قصة قيصر وصديقه "نمروسى " اللى بنوا مع بعض العصابه , لحد ماحصلت مشكله كبيره بينهم , خلت "نمروسى" لحد دلوقتى بيدور على قيصر وعايز يقتله بعد ما كشف خيانة مراته مع قيصر , ساعتها العصابه أتقسمت نصين نص مع قيصر والنص التانى مع النمروسى , وقالى :
سبب المشكله أن قيصر كان عايزنى أقتل حد من عصابة النمروسى , الحد ده كان فى يوم من الايام أخويا قبل مايختار يبقى فى صف نمروسى
خدت الكلمتين دول , وعرفت أنا هعمل أيه بالظبط , وقررت أن المره دى هخلص من قيصر للابد...
أخترت الوقت اللى ينفع أخرج فيه بره القصر من غير ما قيصر يشوفنى .. الصبح بدرى قبل كله مايصحى , وكنت وانا راجع للقصر قبل ما أدخل من بوابة القصر بتأكد من الواد منصور أن "قيصر " بياخد القيلوله بتاعه ونايم فى أوضته , ولو فى يوم منمش كنت ببات بره القصر , علشان مايشوفنيش
طبعا دوخت على ماعرفت أوصل لنمروسى وأضطريت بدون الدخول فى تفاصيل أنى أسحب من الفيزا بتاعة مصاريف القصر مليون جنيه!! علشان أعمل صفقه مخدرات مع واحد
أسمه "عماد شيكا" هيوصلنى لواحد تانى هو اللى هيوصلنى لنمروسى , وبالفعل "النمروسى " وافق يقابلنى فى الفيلا بتاعته لما عرف أن الموضوع يخص قيصر ...
"نمروسى" غير قيصر خالص باين على الوش , مش مستخبى زى قيصر ,بيتاجر فى المخدرات والسلاح بس لو دكر أثبت , غيرأنه غاسل فلوسه كويس أوى ,وداخل فى مشاريع كبيره , عقارات وبرندات ملابس من الآخر بلطجى وتاجر مخدرات شيك !! ,
روحتله الفيلا و ذهلت لما دخلت من البوابه وركبت الكوشمن (حاجه عامله ذى التكتك كده , بس على نضافه )
ملعب جولف!! وأسطبل خيل كبير !!وحمامات سباحه !!!, ده غير كمية الأمن اللى متسلح بأحدث الأسلحة واللى أكيد كلها مترخصه , من الآخر عصابة مترخصه مش بلطجيه زي قيصر ,
الكوشمن وقف فى حتة أرض واطيه فى ملعب الجولف , والسواق شاورلى من غير ما يتكلم على" تبة" عاليه، علشان أطلعها على رجلى , نزلت من الكوشمن وطلعت على التبه وأنا بتشبث بالنجيله علشان أتفاجأ فوقيها , بشاب فى سن قيصر بس جسمه عادى مش جته ذى قيصر لابس بدله وماسك فى أيده عصايا مزخرفه زى عكاز، و ليه هيبة كده ,قاعد على كرسى عالى وقدامه طبق كبير مليان لحمه نيه متقطعه مكعبات , المشكله مش هنا .. لأ .. المشكله فى اللى مربوط جمبه فى الكرسى !!!!!
النمروسى رابط أسد بالغ بجنزير متثبت فى الارض وقاعد جمبه على الكرسى !!!, وبيلقمه اللحمه فى بوقه, أول ماعينى وقعت على المنظر رجعت لورا من الخوف وكنت هقع من التبه , بس رنت ضحكة النمروسى وهوه بيقول :
ماتخافش ( سيمبا ) مبيعضش , بياكل بس .
ورمى للأسد حتة لحمه , فلقطها الأسد فى بوقه وهوه بيزأر , شاور لواحد من الخدم اللى حواليه فجابولى كرسى قصير خالص عامل زى كرسى الحمام ,
أنا فاهم كويس اللى بيعمله نمروسى ، مقعدنى قدامه على كرسى قصير , كأنه بيقول أنه هو المسيطر فى الحوار ووجود الأسد علشان يرمى الرعب فى قلبى وأبقى خايف أكدب عليه أو أخدعه
قعدت على الكرسى
فقالى :
لخص فى جمله واحده
فقلت :
أنا جاى أسلمك قيصر
ماظهرتش أى ملامح على وشه , وقال :
تفاصيل ؟
حكتله على كل حاجه واللى موجود فى القصر وعدد عصابة قيصر ومتوزعين أزاى فى القصر ومكان أوضة قيصر مش بس كده , انا كنت عامل حسابى وخدت معايا نسخه من الرسم الهندسى للقصر بمداخله ومخارجه .. خلصت كلامى
النمروسى وزن الكلام فى دماغه وقال :
وأيه اللى يضمنى أنها مش لعبه من قيصر !!؟
وسكت شويه ورمى حته لحمه لسيمبا الأسد وكمل كلامه وقال :
هبعت معاك حد من عندى تدخله القصر , علشان يتأكد من اللى بتقوله
قلت فى بالى :
ده انا نفسى بدخل بالعافيه , هدخل حد تانى أزاى ياربى !!!, بس رديت عليه وقولتله :
اللى تؤمر بيه يانمروسى باشا
وبالفعل بعتلى حد عرفت أدخله , بمساعدة الواد منصور ، طبعا من غير ما أقول لمنصور مين ده !! كدبت عليه وقلتله ده واحد تبع الاستاذ بكر وجاى يتمن شوية حاجات فى القصر وهو ماشاء الله غبى ومابيتعبش نفسه فى التفكير فدخله , وأتاكد النمروسى من كل كلمه قولتهالو ,مرديش يقولى على معاد الهجوم بس قاللى أنهم هيهجموا الاسبوع اللى جاى بالليل ، وهيبلغني قبلها بيوم.
تانى يوم الصبح لقيت ضرب النار أشتغل , ااااه يانمروسى الكلب !!!!
طلعت من اوضتى جرى على باب القصر الخلفى وجرى فى الشارع، وأنا بجرى بعيد عن القصر لمحت النمروسى بنفسه قدام القصر وبيقود الهجوم ، شكله مبقوق من قيصر اووى للدرجة اللي تخليه ينزل بنفسه .
بعدت عن القصر لمدة ٥ ساعات ،ورجعت وأنا بتسحب وببص على القصر من بعيد لقيته هسسسس مفيش صوت!!! , قربت من القصر , لقيت البوابه مفتوحه وجثث مترميه, من عصابة الزفت " قيصر"ومن عصابة أبن الكلب "النمروسى" , قربت من باب القصر واللى كان مقفول , فتحت الباب بمفتاحى واحده .. واحده و مديت راسى الأول من الباب فماشوفتش حد قدامى , الدنيا كانت مضلمه والنور كان مطفى , دخلت وقفلت باب القصر براحه و نورت النور وببص !!! عينى وقعت على مشهد خلى قلبى يقف !!!
"عماد شيكا" واقف جنب " قيصر" اللى قاعد على الكرسى و فى أيده النبوت ورجله على وش "النمروسى" اللى متكتف تحته !!
بصلى قيصر وقال :
قيصر ميتخنش مرتين ... ياعمى .... ياخاين !!