الفصل التاسع 9
بقلم لينا بسيوني
بعنوان "وعلى الباغى تدور الدوائر"
دخلت وقفلت باب القصر براحه و نورت النور وببص !!! عينى وقعت على مشهد خلى قلبى يقف !!!
"عماد شيكا" واقف جنب " قيصر" اللى قاعد على الكرسى و فى أيده النبوت وحاطط رجله على وش "النمروسى" اللى متكتف تحته !!
و بصلى وقال :
قيصر ميتخنش مرتين ... ياعمى .... ياخاين !!
وقام وقف وهو لسه دايس على وش نمروسى برجله
وقالى :
كنت مفكرنى هشيل عينى من عليك !!!! ,وهسيبك تروح وتيجى برا القصر من غير ما أعرف !!!! .. أنا عارف انى اللى بيخون مره بيخون التانيه والتالته , أصله داء يا عمى يا خاين .. اها صحيح شكرا على الهديه اللطيفه دى (قالها وهو بيبص على نمروسى اللى تحت رجله بيفرفص).
شال رجله من على وش نمروسى , وشاط بيها قفصه الصدرى , النمروسى صرخ من شدة الالم والضربه , وبقى بيتلوى وهو متكتف على الارض , عدله قيصربرجله فخلاه نايم على ضهره , ووقف قيصر برجليه الأتنين على كتاف نمروسى اللى كان بيصرخ وبيترجى قيصر, مسك نبوته بأيديه الاتنين ورفعه بعزم ما فيه .... فوطيت راسى علشان ماشوفش المشهد اللى جاى .
فلقيت قيصر بيقولى :
تؤ تؤ تؤ .. أرفع راسك وبص , علشان الحته اللى جايه دى , أحلى حته .
مقدرتش أرفع راسى برده , فواحد من اللى مثبتنى شدنى من راسى ورفعها غصب عنى !!
لقيت قيصر بينزل بنبوته على رأس نمروسى مره ... وأتنين ... وتلاته ... بيدكها بالنبوت ,وبيدقها زى ما بندق فص الثوم فى الهون !!!
الدم أطرطش فى كل حته , وبقايا من مخ نمروسى اللى أتفرتك جات على وشى , أغمى عليا من هول المشهد...
فوقت على جردل ميه ساقعه بيتكب على رأسى , فتحت عينى لقيت فى وشى نبوت قيصر اللى متعاص بواقى مخ نمروسى .
قيصر بيلف حواليا بالنبوت بتاعه , فى الوقت اللى الميه أتسرسبت فيه من بنطلونى من الرعب , وغمضت عينى علشان ماشوفش نبوت قيصر وهوه بيدك رأسى
مفيش صوت فى القاعه غير صوت نبوت قيصر وهو بيحك فى الآرض , وفجأه أختفى صوت النبوت , وحسيت بهوا سخن عند ودنى المقطوعه وصوت قيصر بيهمس فيها وبيقول :
الضابط شادى المرشدى قالى أنك قتلت أبويا وكلب أبويا وأختى !!!
أختفى صوت قيصر ورجع تانى بس المره دى كان بيرج القصر من قوته وهو بيقول:
ابويا واختى قتلتهم علشان الورث ... حقك ... أنما الكلب قتلته ليه ؟!!! ... عملك أيه ؟!!!
ولا عشان عنده صفه مش عندك !!! , وسكت شويه وكمل وقال :
تسمع عن بابلو أسكوبار ؟!!! .. طيب تسمع عن منصور الحفنى؟ !!! .. طول عمرى نفسى يبقى ليا قصه وتاريخ زيهم و قصة قيصراللى قتل عمه علشان خانه مش حلوه , زى قصة قيصر اللى حول عمه الخاين لكلب !!
أنت هتعيش زى الكلاب يمكن تتعلم الوفاء ,وشاور بأيده لأتنين من رجالته فجابوا طوق بسلسه طويله من الحديد ولفوه حوالين رقبتى وقال :
من هنا ورايح أنت كلب !!!, هتمشى زى الكلب على ركبك !!, وهتاكل زى الكلب وهتتكلم زى الكلب , تهوهو بس !!
وشاور لرجالته فجرجرونى من السلسله اللى فيها الطوق الملفوف على رقبتى وطلعونى على سطح القصر , وربطونى فى عامود حديد وسابونى فى الشمس يومين من غيرأكل ولا شرب علشان ينشف جلدى وينخر عضمى .
شفايفى شققت و جلدى أزرق وكنت فضلى تكه على الموت , لقيت قيصر حط قدامى الطبق اللى كان غالى أخويا بيعمل فيه حمام!!! وصب فيه بق ميه صغير خالص , لحست الطبق من عطشى , فرمالى فى الطبق عضمه صغيره , فقرقشتها بشراهه من جوعى ,
وقولته وانا صوتى بيطلع بالعافيه :
عطش..
مكملتش الكلمه ولقيته نازل ببطن الجزمه السيفتى بتاعته على وشى , فاطار من بوقى 3 أو 4 ضروس وبوقى فضل يسح دم
وقال بعصبيه :
أنت كلب !! لما تعوز حاجه تهوهو .. فاهم ياكلب ؟ !!!
وسابنى ومشى ..
جه تانى يوم
أول ماشوفته قولتله :
هو ... هو
فضحك بصوت عالى و هو بيقول لرجالته اللى جمبه
شوفتوا !! اشتغل اهو !!!
وحطلى بق ميه تانى صغير , فلحست الطبق تانى ورمالى عضمايه تانيه , ولف خد رجالته وسابونى على السطح وفضل على كده كام يوم, يسيبونى لحد ما ابقى خلاص هموت وعلى أخر لحظه يدونى بق ميه وعضمه علشان اقدر أكمل , ولو مره غلطت وصلبت طولى أو أتكلمت كنت بأخد اكيال من العذاب والضرب خلت جسمى كله كدمات وتقرحات من كتر الجروح , كان لازم أمشى على ركبى وهى بتخر دم , و أهوهو زى الكلب !!! وألا....
و فى يوم ما , جم فكوا السلسله وجرجرونى بيها لتحت عند قيصر , دخلونى على قيصر اللى كان قاعد على كرسيه وفى أيده نبوته و قدامه تاجر من اللى بياخدوا منه بضاعه , أول ما دخلونى , قيصر قام وخد منهم السلسله اللى بيجرجونى بيها , وجرجرنى ناحية التاجر اللى كان مذهول من اللى بيشوفه !!!
فقال قيصر :
أعرفك ... كلبى اللى حكتلك عنه !!!!
قيصر كان بيعمل زى نمروسى بالظبط , كان بيخوف اللى قدامه وبيرمى فى قلبه الرعب , بس مش بأسد زى نمروسى , بعمه اللى حوله لكلب علشان خانه !!!
فضل على كده يجيبنى فى اى قعده شغل يفرج التجار عليا , علشان يحكوا ويتحاكوا باللى بيعمله , وكان بيرمى قدامى العضم وانا جعان علشان اكله بشراهه فاللى قدامه يقتنع انى كلب فعلا!!!
كان بيكافئنى بعضم أكتر لو عملت حركه من حركات الكلب , مثلا لو قعدت ألف حوالين ذيلى !!!, أو شمشمت زى مابتشمشم الكلاب , كان بينبسط أوى ويقعد يضحك بصوت عالى.
مارس عليا كل انواع الساديه اللى ممكن تتخيلها علشان أبقى فعلا كلب !!! لدرجة انى نفسى صدقت انى كلب ونسيت كلام البنى ادمين وبقيت بهوهو بس !!!
وفى يوم جه القصر ودخل علينا شاب عشرينى بنضاره معاه ظرف تحاليل , كنت ساعتها مربوط جمب قيصر على الكرسى وبنهش فى طبق العضم اللى قدامى
دخل الشاب وقال :
سلام عليكم أنا "محى " , الاستاذ بكر باعتنى هنا علشان أقابل أخويا قيصر وعمى صم...
وقطع كلامه وهوه مذهول لما بص لقا بنى أدم مربوط زى الكلب فى كرسى قيصر.
بص قيصرعلى ظرف التحاليل اللى فى أيده وقاله :
أيجابيه !!؟
فهز راسه فى أشاره منه لكلمة أها , شاورعليا قيصر وقاله :
أعرفك بعمك ... صمد
وقبل مايتصدم "محى " من المشهد , جات رصاصه فى نص راسه وقع على الآرض ميت
نفخ قيصر فى ماسورة مسدسه وبصلى وقالى :
تلميذك ياعمى !!!
ونادى على رجالته وقالهم:
أدفنوا جثته فى جنينة القصر جمب اللى ماتوا فى معركة نمروسى !!!!
فى يوم تانى لقيت الواد منصور داخل علينا , كنت اول مره تصادف أنى أشوفه ويشوفنى , أكيد سمع عن اللى بيحصلى بس ماشفنيش قبل كده وأنا كلب !!! , فرحت أوى أول ماشوفته, كنت فاكره مات فى معركة النمروسى , أول ماشافنى عينه دمعت , وجاتله الجرأه أنه يقول لقيصر:
حرام عليك يا معلم قيصرده برده عمك .
شخط فيه قيصر وقاله :
غور يااد من هنا بدل ما اربطك جمبه.
فخد نفسه وجرى من قدام قيصر
كل يوم كنت بندم على اليوم اللى قتلت فيه اخويا , ولو كان رجع بيا الزمن كنت أديتله دمى كله علشان يعيش , كنت أديتله روحى , على الاقل وهوعايش كنت بنى أدم ...
عدت الايام والاسابيع على هذا الحال , ومع الوقت رضى عنى قيصر من كتر ماتقمصت دور الكلب لدرجة انى كنت بعمل حمام بنفس طريقتهم , أروح قدامه على أى شجره , وأرفع رجلى وأعمل حمام .
بقى يسبنى أتمشى زى الكلب فى جنينة القصر بعد ما كان بيربطنى , وفى يوم الصبح بدرى كنت بتمشى فى الجنينه , فلقيت عدنان واقف فى التراس بيشرب شاى و بياكل بيتى فور , بصلى وشافنى تحت التراس , أفتكرنى وهوه بيحط البتى فور فى بوقه , فقلبه حن وبص يمينه وشماله ورمالى حتة بيتى فور ,جريت عليها كلتها , فرمالى اتنين تانيين ودخل الاوضه وقفل التراس !!
بقيت كل يوم أروحله الصبح تحت التراس وأقعد أهوهو!!! علشان يرميلى حتة بيتى فور
وعلى كده كل يوم , لحد مافى يوم لقيته نزل بنفسه وجرجرنى من السلسله لحته مستخبيه وحط قدامى طبق بيتى فور وكوباية شاى !!!
نزلت بشراهه على البتى فور و شربت كوباية الشاى وانا عينى بتسح عياط ...
أول مره من شهور أحس انى بنى أدم ,
وطيت على رجل عدنان أبوسها , فلقيته عينه غرغرت هى كمان وهو متأثر.
قولتله :
شكرا ياعدنان يابنى
أول ماسمعنى بتكلم خاف وأتوتر وطلع يجرى ...
تانى يوم روحتله عند التراس وفضلت أهوهو , مردش عليا , فضلت كل يوم على هذا الحال , بطل يرد عليا , بس أنا مزهقتش وفضلت متشبث بالأمل اللى ممكن يرجعنى تانى بنى أدم , وفضلت أروحله كل يوم وأهوهو تحت التراس , لحد مافي يوم فتح التراس وهو متعصب وقالى بصوت واطى :
عايز ايه !!!؟
فقولتله :
هو ... هو
رجع قفل باب التراس تانى ,فلفيت وكنت همشى واجيله تانى يوم , بس لقيته نازل وفى ايده صينية شاى وبص يمينه وشماله وقالى :
بس من غير كلام .. ماشى ؟
فقولتله :
هو ..هو
شدنى من السلسله فى حته مستخبيه فقعدت أكل البتى فور وأشرب الشاى من غير ما أتكلم , وفوجئت بيه هو اللى بيتكلم وبيقول:
على فكره أنا بعمل كده بس علشان أنت كنت جدع معايا فى يوم من الأيام،
وسكت شويه وقال :
وعلشان برده صعبان عليا ومضايق من اللى عمله قيصر فيك.... وفى أخويا !!
وقفت اكل وركزت فى كلامه أظاهر فيه كره وعداوه بدأت تنبت فى قلب عدنان ناحية قيصر .
قعد وسند ضهره على الحيطه
وقال كأنه بيكلم نفسه :
أخويا أختار يبقى فى صف نمروسى فى المعركه وأسرناه حى , بس قيصر أصر أنى أقتله بنفسى فقتلته بأيدى ... سكت وأنهار فى العياط وهو بيقول :
أنا مش زى قيصر .. ولا زيك , من يوم ماقتلت أخويا بأيدى وانا مش عارف أنام , أبويا وأمى واخويا بيجولى غضبانيين كل يوم فى الحلم , لدرجة أنى بقيت بشوفهم وأنا صاحى !!!
أنا اللى عملت قيصر ولولايا مكنش حد من العصابه أنضم ليه ,علشان دول كلهم رجالتى وانا اللى مربيهم , الاسوانى ودهشوم وأبو بشله والكردى وكل اللى تحت أيده كانوا رجالتى وتحت أمرى , لحد ماجه قيصر وخد كل حاجه منى وخد رجالتى !!! ده ليه ؟ علشان الفلوس !!
اللى معاه فلوس هوه اللى بيحكم ويتحكم فى الرجاله , وقيصر معاه الفلوس والهيبه وانا مجرد كلب زيك عنده .
فلقيت نفسى بقوله :
أذا كان على الفلوس فانا ممكن أديلك نص مليار جنيه , نص ثروة اخويا وتخلصنى من قيصر
رفسنى برجله وقاللى :
انا قولتلك من غير كلام !!!
وخد باقى البيتى فور والشاى من قدامى ومشى
قلت لنفسى أيه اللى عملته ده ياصمد الكلب , ولو راح دلوقتى وقال لقيصر !!!
كنت مرعوب وبطلت أروح ناحية التراس تانى , لحد مافى يوم شاورلى عدنان من التراس علشان أقابله فى الخن المستخبى ولقيته بيقولى :
نص مليار , 500 مليون جنيه , ماشى ؟!!!
قولتله وانا بهز ديلى من الفرحه :
ماشى وانا عندى خطة تقتله بيها , بما انك اكتر حد بيثق فيه وبتقرب منه .
قولتله على مكان جرعه من سم التفاح كنت مخبيها فى المعمل اللى فى قبو القصر, راح جابها وخلاها معاه.
وفى يوم كان قيصر وكل الرجالة متجمعين فى صالة القصر بيكيسوا ويعبوا فى فلوس وبضاعه , كنت ساعتها مربوط بطوقى فى كرسى قيصر ...
بصلى عدنان وشاورلى براسه انه هيبدأ ينفذ اللى اتفقنا عليه , بس اللى حصل غير اللى توقعته وأتفقت عليه مع عدنان خالص !!!
عدنان وقف فى وسط صالة القصر وقال بعلو صوته وهو رافع جرعة سم التفاح
قيصـــــــر !!! عمك أدانى السم ده علشان أقتلك بيه .......