الفصل العاشر 10
بقلم لينا بسيوني
بعنوان "ديل الكلب..."
وفى يوم كان قيصر وكل الرجالة متجمعين فى صالة القصر بيكيسوا ويعبوا فى فلوس وبضاعه , كنت ساعتها مربوط بطوقى فى كرسى قيصر .
بصلى عدنان وشاورلى براسه انه هيبدأ ينفذ اللى اتفقنا عليه , بس اللى حصل غير اللى توقعته وأتفقت عليه مع عدنان خالص !!!
عدنان وقف فى وسط صالة القصر وقال بعلو صوته وهو رافع جرعة سم التفاح :
قيصـــــــر !!! عمك أدانى السم ده علشان أقتلك بيه .......
وبصلى وكمل كلامه وقال:
عمك معذور مايعرفش أن السم طريقة النسوان فى القتل , وأن فى عرفنا وسلونا لما تيجى تقتل عدوك لازم تبقى عينك فى عينه وأنت بتقتله , بالظبط زى ماعملت ياقيصر مع نمروسى
ورمى عدنان سم التفاح وسلاحه وقلع حزامه اللى فيه السنجه , شق قميصه وخبط على صدره بأيده بقوه وهو بيصرخ و بيقول :
راجل لراجل ياقيصر ومن غير سلاح ..
ابتسم قيصر وقام من كرسيه وشمر دراعه وهو بيقول :
بشوقك ياعدنان !!!!
قرب عدنان من قيصر , وقعدوا يلفوا حوالين بعض فى دايره صغيره وهما بيزمجروا بصوت فى أستعداد للهجوم, لحد ما فجأه هجم عدنان على قيصر ولف دراعاته الاتنين وثبت بيهم دراعات قيصر فى وسطه , قام قيصر ماطط جسمه لفوق ونزل براسه على مناخير عدنان كسرها , ففك عدنان أيده من على وسط قيصر و رجع لورا وهو ماسك مناخيره اللى بتسح دم ,فلقى بطن الجزمه السيفتى بتاعة قيصر فى صدره ,أتنطر وقع على ضهره , وفضل يتلوى من الألم على الأرض
فتح قيصر دراعاته وهو بيتمشى وسط عصابته , فى أشاره منه لقوته وبأسه .
قرب من عدنان اللى على الأرض وراح ناحية راسه ,رفع قيصر رجله وبينزل بيها على راس عدنان , فجأه عدنان مسك رجل قيصر, ونطرها بعزم مافيه فأختل توازن قيصر ووقع على بطنه فى الارض .
نط عدنان وركب على ظهر قيصر اللى على الأرض , وفضل يضرب بقبضه ايديه الاتنين فى ودان قيصر وراسه من ورا .
حاول قيصر يقوم من على الأرض, فنجح أنه يقوم من على الأرض ويصلب طوله بس وعدنان راكب على ضهره و متشعلق فى رقبته , رجع قيصر لورا وهوه شايل عدنان على ضهره ورزعه فى الحيطه , فضل يخبط ضهر عدنان اللى متشعلق فيه فى الحيطه مره ... وأتنين .. وتلاته ..
لحد ماعدنان فك أيده من على رقبة قيصر ووقع على الأرض مغمى عليه , وقف قيصر بيتمطوح يمين وشمال ودايخ من كتر ما عدنان ضربه فى ودانه , فجرى وهوه بيتمطوح ناحية الكرسي بتاعه ومسك نبوته ومشى ناحية عدنان , أعترض طريقه الكردى والأسوانى وهما بيقولوا :
مش دى الأصول يامعلم قيصر , الأصول تموته من غير سلاح !!!
فهددهم بنبوته و وهو بيقول بعصبية :
أرجع ورا ياااد ياابن الكلب أنت وهو !!!
وكمل طريقه ناحية عدنان ،فضل يضرب بطن عدنان بالنبوت , وبعدين وقف على كتاف عدنان برجله الأتنين (زى نمروسى) ومسك نبوته بأيده الأتنين ورفع النبوت بعزم مافيه ......
فوجئ قيصر بضهره بيتشرط بسنجه من ورا قبل ماينزل بالنبوت على راس عدنان , لف رقبته و بيبص لقى الكردى والأسوانى ودهشوم وأبو بشله رافعين سنجهم ونازلين تقطيع فى جسمه ,وفضلوا يطعنوا فيه لحد ما مات ....
جريت وأنا ملهوف على عدنان اللى بيطلع فى الروح , بس سلسلتى موصلتنيش لحد عنده , فضلت أشد فى السلسله المربوطه ,لحد ماجه من ورايا "الكردى" وفك الطوق اللى على رقبتى وحررنى ,و بص على عدنان
وقالى :
عالجه ....
جريت على عدنان , بصيت عليه لقيت بطنه كلها كدمات من كتر الضرب , قلتهم وأنا عينى بتسح عياط وملهوف عليه , شيلوه بسرعه وريحوه على السرير فى أوضته , فقرب" أبو بشله " وده كان أضخم واحد فيهم , أضخم من قيصر نفسه , وقرب من عدنان وكان عايز يرفعه على ضهره ويطلع بيه.
قولتله بلهفه وانا بوقفه:
أنت بتعمل أيه !!! أنت عايز تموته !! لو حركته الدم هيتدفق فى الكدمات وهيموت !!!
فوقف وهو مش فاهم حاجه من اللى بقولها !!!
فقولتلهم :
هاتوا ملايه وأرفعوه براحه وحطوه فيها وكل واحد يشيل طرف من الملايه وترفعوا لفوق فاهمين ؟!! .. علشان نوقف على أد مانقدر سريان الدم فى الكدمات , و طلعوه على السرير بالملايه نفسها , وحد بسرعه يروح يجيب من العطار ( صبغة الألفيه وزيت كافور وحبه سودا ) ,ويارب مايكونش فيه نزيف داخلى !!! ...
وبالفعل جابوا الملايه ورفعوه ,ومشيوا بيه براحه , مشيت وراهم بس كنت لسه بمشى على ركبى , أظاهر نسيت أن قيصر مات وأنى ممكن أصلب طولى , حاولت أصلب طولى , فى الأول معرفتش أو ممكن جسمى مكنش مصدق و لسه خايف يصلب طوله , حاولت تانى
وأنا بقول لنفسى :
أنت بنى أدم ياصمد مش كلب !!!
قدرت أرفع جسمى لفوق بس ماقدرتش أصلب طولى لآخره , خدت نفسى وطلعت لعدنان .
الكردى والأسوانى وأبوبشله وغيرهم من الرجاله , كانوا كل يوم عند عدنان فى الأوضه بيشوفونى وأنا بعمل كمادات وبدلك المناطق اللى حوالين الكدمات علشان أوزع الدم وأرش على الكدمات بالصبغه الألفيه وأدهن بالكافور وعصير البصل وأغلى الحبه السودا وادلك بيها الكدمات .
بيشوفونى وأنا بأكله وأشربه واديله الدوا وأخد بالى منه , وأشيل لامؤاخذه ....
لحد مافى يوم فاق وفتح عينه بالعافيه كل العصابه فرحت , حتى الكردى باسنى وقالى :
عفارم عليك ياصمد ....
بدأ يفوق عدنان واحده واحده بس لسه مبيتحركش , بيفتح عينه بس ,وبيتكلم كلمه أو كلمتين ويرجع يغيب تانى .
وفى ساعة متأخره بالليل كنت نايم ساعتها جمبه لوحدى , صحيت على صوته وهو بيقول :
صمد .. صمد
صحيت من نومى وقلتله :
خير ياعدنان يبنى !!؟
قاللى بصوت متقطع:
عايز.. أرفع.. ضهرى
قولتله :
من عنيا ياعدنان يابنى , هنزل أجيبلك مخده طريه وأرفعك ضهرك شويه عليها .
نزلت وجبت المخده ( اللى قتلت بيها أخويا غالى) وطلعت على أوضه عدنان تانى
لقيته مفتح عينه ومستنينى ياعينى أعدله على السرير , قربت منه وأنا فى أيدى المخده
وقلتله :
تعرف ياعدنان يابنى اللى حصل ليا ده خلانى أتمسك بالورث أكتر , معلش مش هقدر أوفى بكلمتى معاك , علشان ده ورثى , حقى , أنا دفعت دمى عشر سنين وعشت زى الكلب !!!تفتكر هضحى بنص حقى كده !!!
حاول يصرخ يعينى ويستنجد بس صوته مكانش طالع من التعب , طلعت فوقيه بجسمى كله على السرير ومسكت المخده وكتمت نفسه وأنا بقوله :
انا اسف يبنى والله , انت عارف ديل الكلب عمره مايتعدل ...
فرفص خالص يعينى وقطع النفس , خبيت المخده وعدلته , وعدلت السرير , وصرخت بأعلى صوتى وأنا بعيط وبقول :
عدنااااااان , الحقنى ياكررررردى !!!
شويه ولقيت كله صحى من النوم وبقوا عند عدنان فى الأوضه قلت وعينى بتسح عياط :
عدنااان مات يارجاله , عدناااان مات ياكردى , وأخر كلمه قالها قبل مايموت :
الكردى الريس !!!! عدنان وصى أن كردى يبقى رئيسكم يارجاله
الكردى وشه نور من الفرحة وفضل مستنى لو حد هيعترض على كلامى ووصية عدنان , قرب عليه الاسوانى و حضنه وقاله:
فى ضهرك يا معلم كردى
ووراه الجعفرى وابو بشله وبقية العصابه , محدش اعترض وكلهم ايدوا الوصية .
فخطب فيهم الكردى وقال :
يارجاله الفلوس والبضاعه اللى تحت هتتقسم علينا بالتساوى ومن هنا ورايح الجبايه هتتقسم بالعدل .
الكردى حول نظام العصابه من نظام رأسمالى لنظام أشتراكى عشان يكسب ولائهم !!!!
بعدها بيومين جاللى الكردى وقاللى أنهم بيلموا البضاعه والفلوس و يومين وهيسيبوا هسيبوا القصر,وعرفنى أوصله أزاى لو أحتجته تانى .. وسابنى ومشى
بصيت حواليا وأنا باخد نفسى بأرتياح فعينى وقعت على الطبق !!! , ناديت على الواد منصور يجى يرمى الطبق بره , فجه خده
فقولتله وهو طالع بالطبق :
خد الكرسى ده كمان وارميه فى أى داهيه
وشاورتله على كرسى غالى أخويا المخروم
فرجع علشان يشيل الكرسى , فمقدرش يشيله فقالى :
الكرسى تقيل أوى يازميلى , ماتيجى تشيله معايا
قولتله:
شوف حد يشيله معاك يامنصور متقرفنيش !!!
بالفعل يومين والقصر فضى خالص ورجع لطبيعته لدرجة أنى رجعت أسمع صوت العصافير تانى فى جنينة القصر بعد ماأختفت فى فترة حكم قيصر !!!
طلعت فى التراس
ومطيت جسمى لفوق فأتصلب طولى لأول مره من شهور ومسكت كوباية الشاى فى أيدى والبتى فور فى أيدى التانيه .
قدامى واقف الواد منصور بيسقى الزرع و بيشاورلى وبيقولى :
:
صباح الخير يازميلى ......
عدى شهرين على هذا الحال , فاضل على معاد فتح الوصيه التانيه شهرين و بكر المحامى مش لاقى أخر عيل من عيال أخويا غالى !!!
أفتكرت أن كده خلاص القصة أنتهت , بس للاسف جاتلى مكالمه من بكر المحامى وقاللى أنه لقى آخر عيل من عيال أخويا , بس قاللى المره أنه بيتمنى يطلع أبنه !!
قولتله :
أشمعنى؟!!!
قاللى :
لما تشوفه هتعرف !!!
بعدها بأسبوعين بالظبط جالى أبو بكر المحامى كالعاده داخل عليا بظرف التحاليل , كنت ساعتها واقف فى التراس بشرب شاى , شوفته وهو داخل من البوابه فشاورتله يجيلى على التراس.
دخل عليا التراس ورمى قدامى على الترابيزه ظرف التحاليل وقالى :
أيجابيه .. يابختك ياصمد
قولتله بأستغراب :
يابختى !!
قاللى :
أصلك ماتعرفش أبن أخوك المره دى مين ؟!!!
الفضول كلنى وقولتله بلهفه :
مين ؟!!!
سند ضهره على الكرسى وولع سيجار بعود كبريت وهز عود الكبريت فى الهوا علشان ينطفى وهوبيقول :
أبن أخوك غالى المره دى .. طلالى العابد صاحب شركه من أكبر شركات البترول فى الخليج , من الآخر ثروته أضعاف... أضعاف ثروة أخوك , وهو جاى كمان ساعه علشان يتعرف على أبوه اللى ماشوفهوش ، وعلى عمه .
قولتله :
أخيرا أخويا عرف واحده عدله !!!
فقالى :
ومش أى واحده دى أميره من امراء الخليج .
فقوللته :
يامسهل الحال يارب , بس والنبى بلاش تجيب سيرة الفيزا تانى بقى ,ده راجل ملياردير المره دى .
ضحك بكر المحامى وكمل شرب سيجارته وقعدنا نستنا طلالى , غريمى الجديد...
عدت ساعه بالظبط وبالدقيقه , ولقينا موكب جاى مكون من 4 عربيات فارهه, تحس أن كلها طالعه من جراج محمد رمضان !!!!
نزل خدم وحشم هنود وفلبنيين من العربيات وأترصوا قدام العربيات , وبعدهم نزل شاب عشرينى لابس ثوب أبيض (جلابيه خليجى ) وعقال وشه وسيم وعامل ذقنه سكسوكه ..
قرب علينا وبص لبكر المحامى وقاله بلكنه خليجى بيتكلم مصرى :
هو ده عمى صمد !؟
فهز بكر راسه .
قرب منى وعينه غرغرت شويه وفتح دراعه وحضنى , فشميت ريحة عطر عود باهظة الثمن .
قاللى :
عمى , دمى , مش عارف أوصف فرحتى بيك يا أخو أبويا , أنت عارف ان عندنا الواحد لازم يفخر بنسله وأنا فخور أن أنا أبن غالى الدوسرى أكبر ملياردير فى الشرق الأوسط , مش علشان المال , أبدا والله ماجيت لمال وأنى عندى من المال مايكفى أحفاد أحفاد عيالى , بس جيت اليوم علشان ألم لحمى وأفخر بنسبى ونسلى وأقابل عمى والم شملى بيه .
قلبى حن للواد ده معرفش ليه !! وخدته فى حضنى
وقولتله :
نورت بيت أبوك غالى يابوعابد أتفضل , دخل القصر بس مكانش مبهور بالقصر خالص بالعكس , شكل القصر كان عادى بالنسبه له , طبعا ملياردير زى أبوه ..
بص على صورة أبوه اللى متعلقه فى القصر وعينه غرغرت و
قال:
يعز عليا ماأشوفك ياأبى وأنت عايش
قولتله :
البقية فى حياتك يابنى ويطرح البركه فيك
قالى :
عمى باريد أرتاح , وما تخاف أنا ماراح أتقل عليك , أنا مسافر كمان يومين .
قولتله :
عيب عليك يابنى الكلام ده ,ده بيتك وانا ضيفك .
قالى :
حاشا لله , الأستاذ بكر ماقلكش ولا أيه !!! أنا ماراح أخد أى شئ من ورث أبى , وراح أتنازل عليه كله لك , بكر حكالى على خدمتك لأبى طول عشر سنين !! وأنا جيت علشان أكافئك على أخلاصك كمان أخليك جمبى طول عمرى , أكيد ماراح لاقى حد يصون ثروتى ويدير أعمالى ويكون أمين عليها غيرك ياعمى .. ياأخو أبوى ..
فقولتله :
شكرا يابنى على ثقتك الغالية ...
وطلعته على الأوضه أياها أم خرم , علشان اراقبه برضه ,
راقبت يومه من خرمى , راجل ملتزم فى الصلاة حتى فى صلاة الفجر , كنت بسمع حركه فى الأوضة بتاعته وأبص من الخرم الاقيه فارش المصليه وبيصلى .
الفرحه مكانتش سايعانى ورث أخويا خلاص بقى كله ليا , مش كده بس كمان فوقيه كماله ورث طلالى , اللى قررت أحتال عليه هو كمان !!
مش عايز اقولك بقى شيلته من على الأرض شيل , أكل وشرب ودلع , بقى بيعشق حاجه أسمها عمه صمد ,لدرجة أنه قبل مايسافر قعد يزن عليا أنى أبيع كل حاجه فى مصر وأسافر معاه الخليج علشان ادير معاه شركاته اللى هناك , وابقى جمبه على طول , قلتله أنى هفكر فى كلامه , لما يرجع تانى مصر كمان 10 أيام , واهوه بالمره نخلص من أجراءات نقل الورث على مايكون رجع من السفر , بتقل عليه برده علشان ميحسش أنى طمعان فيه ويأمن ليا أكتر !!
وبالفعل بدأنا أجراءات نقل الورث وطلالى بره مصر , تنازلت عن توكيلى فى أدارة الثروه وارجاعها للوريث الشرعى" طلالى العابد" عشان تبقى ملكه رسمى ويقدر يتنزلى عنها بيع وشرا ء لما يرجع مصر كمان 10 أيام ( اجراء قانونى روتينى)
عدى 10 أيام , كنت ساعتها واقف فى التراس , بس بدل ما ألمح طلالى على الباب , لمحت قوه من البوليس جايه على القصر وضابط بيسأل الواد منصور عن صمد الدوسرى , لقيت نفسى بهرب من القصر ماعرفش ليه !!! ومعرفتش القوه اللى جايه دى جايه تقبض عليا ليه ؟!!
بس عرفت بعدها لما عديت على قهوه ولقيتهم عارضين صورتى على التلفزيون وكاتبين
عليها
مطلوب القبض عليه بتهمة قتل " روز" ابنة الملياردير المعروف "غالى الدوسرى" !!!
جريت من قدام القهوة وانا مصدوم ومش فاهم ايه اللى بيحصل !!!!
دخلت ابحث على النت لقيت الترند..... فيديو ليا وانا بشنق روز !!!.....