الفصل الخامس 5
بقلم لينا بسيوني
بعنوان "فياجرا"
لقيته بيطلع سيجار من العلبه وبرده معازمش عليا النتن وسحب علبة الفوار اللى فيها السم وطلع قرص فوار حطه فى الكوبايه وأستناها لحد ماذابت فى الميه ورفعها علشان يشربها ولسه هيشرب عينه جات على علبة الفيتامين ساب الكوبايه ومسك العلبة وقالى:
صمد!!
طبعا أنا كنت خلاص عملتها على روحى
صمد!!! ممكن تقرالى تاريخ الصلاحيه بتاعة العلبه دى ,هى أخرها شهر 6 ولا 9 أصلها مش باينه
مسكتها وقولته:
شهر 6 منتهيه ,,متشربهاش يابكر بيه بايظه
قالى :
مشربهاش صح ؟
هزيت رأسى وقلته:
أها
مش رأسى بس اللى كانت بتتهز جسمى كله كان بيترعش
زق الكوبايه بأيده بعيد ورمى العلبه فى الزباله
وقالى :
المهم ياسيدى انا جبتك بالليل كده علشان عندى خبر حلو ومش ضامن أنفعالك ومش عايز فضايح تانى قدام الناس
قولتله :
ها خير ؟
قالى :
أحنا وصلنا لحد من عيال أخوك
الخبر جه كمل عليا بقيت بجيب ميه من كل حته حاولت أمسك نفسى ورسمت أبتسامه صفرا على وشى وقولتله بصوت طلع مهزوز:
أيه ده بجد !!!! لقيتوه فين ؟!!
قال:
فى طنطا أمه ماتت وعايش لوحده فى نفس العنوان اللى كان فى قسيمة الجواز ,أنا كلمته وحكيت له كل الحكاية وقولت له يعمل التحليل علشان نكسب وقت ,انت عارف أن التحليل بياخدله فتره على ما نتيجته تطلع ،وأنا عايز أخلص ياصمد ياخويا من الحمل ده ، على العموم بكره هجيبه القصر علشان تتعرف عليه وعلى ما أعتقد هيطلع أبن أخوك
قولت بغيظ :
أشمعنى ؟
قالى:
لما تشوفه هتعرف ؟
طلعت من مكتبه وأنا أعصابى سايبه ودماغى بتودى وتجيب قلت لنفسى:
ياحظك القطران ياصمد يارب أنا عملت أيه علشان كل ده يحصل لى!!!!؟
يعنى أنا أتمرمط عشر سنين ويجى عيل أمه مومس يياخد كل حاجه على الجاهز!!! عشر سنين أخويا الندل عايش على دمى اللى كنت بنقلهوله كل يوم !!!ده ربنا عمره مايرضى بكده أبدا !! وأنا هسكت كده وحقى بيضيع منى !! أنا هسكت لحد ما الاقى نفسى فى كفر طهمرمس تانى!!! وشغال فى معمل تحاليل تحت السلم !!!
لألألأ!!!! على جثتى الكلام ده يحصل !!!معرفتش أنام الليله دى وأستنيت لحد تانى يوم , هموت وأشوف أبن أخويا الكلب غالى , غريمى اللى جاى ياخد منى كل حاجه
على العصر لقيت جرس الباب بيرن بفتح الباب لقيت بكر المحامى وجمبه شاب فوق العشرين سنه أول ماعينى وقعت عليه أتصدمت !!
شبه أخويا غالى فى شبابه أوى , ياخيبتى يانى !!شكله هيطلع أبنه , أبتسلمى ومد أيده يسلم عليا فمبقتش عارف أعمل أيه وبكر الحسينى واقف بيبصلى , مسكت نفسى وتقمصت شخصية العم الحنين,عيطت ورحت شده ليا وحاضنه وأنا بقول :
خش فى لحم عمك ياأبن أخويا خش فى لحم عمك يابنى
زقنى براحه وبقرف وبتناكه عامله زى تناكه أبوه بالظبط
و قالى :
أهلا ياعمى
دخل هوه وبكر المحامى واللى كان بيشرح الإجراءات بعد مانتيجة التحليل تطلع ..بس ماحدش كان مركز معاه الواد كان مركز فى القصر ومنبهر بيه واناكنت مركز مع الواد اللى هياخد كل شقايا وتعبى
أنتبهت بس لبكر المحامى لما لقيته بيقولى :
سامر (أبن أخوك غالبا ) هيعيش معاك فى القصر لحد ما نتيجة التحليل تطلع هى بتاخدلها حوالى اسبوعين هبلغكم أول ماتظهر النتيجة
بكر ضرب البومبه دى فى وشى وأستأذن علشان يمشى وقبل يطلع من القصر , نادى عليه اللى أسمه( سامر) ده
وقاله :
ياأستاذ بكر أنا عايز فلوس
قولت فى بالى :
أوباااا من أولها !!
قام الاستاذ بكر مد أيده فى جيبه وطلع روزمه وبيدهاله مرضاش ياخدها وقاله :
لا انا عايز مبلغ .. يعنى علشان أظبط نفسى وأروق على حالى وبعدين اللى جاي دى كلها أجراءات مكتبيه الدنيا وااضحه أهيه
وشاور على صورة أخويا غالى اللى متعلقه على الحيطه وعلى وشه فى أشاره منه على الشبه الكبير , سكت شويه ألاستاذ بكر وقاله :
بص ياسامر أنا بنسبه كبيره متأكد أنك أبن المرحوم , بس برده الوصيه واضحه مفيش فلوس من غير مانتيجة التحليل تطلع
رد عليه سامر وقاله :
أسبوعين كتير برده وأنا عندى مصاريف وحاجات لازم أجيبها
سكت بكر شويه وقال فى حل وسط وبصلى
وقال :
فيه كريدت كارد ( فيزا ) مع صمد كان حساب عامله أخوه غالى علشان يصرف منه ويجيب مستلزمات القصر ويدفع الفواتير وخلافه صح ياصمد ؟
هزيت راسى مصدوم ومستنى الجمله اللى بعدها علشان أتنقط فكمل وقال:
الحساب فيه مبلغ كويس , هكلم حد بكره يبقى يطلعلك عليه كارت أنت كمان و تبقى تصرف من الحساب ده الأسبوعين دول لحد مانتيجة التحليل تطلع
قاله :
تمام قشطه كده أوى .. هات دول بقى على مايعملولى كارت بكره
ومد أيده وخد روزمة الفلوس من أيد بكر المحامى
مشى الأستاذ بكر وسابلى حبل حوالين رقبتى , سابلى عيل ملزق دمه تقيل وجلف خد نسخه من مفتاح القصر وقعد يتمشى فى القصر ويشاور على اللى عاجبه واللى مش عاجبه وكل شويه هو فين السفرجى ؟ طيب فين البواب ؟ هو فين الطباخ ؟
واناأقوله :
معندناش أنا اللى بعمل كل حاجه ومبدخلش حد غريب القصر
شويه لقيته بيقولى أنا زهقت وخد نفسه ومشى من القصر , أنا قولت بركه والله مجاش لحد الساعه 12 دخلت أنام وصحيت مفجوع على صوت دوشه عالى فى القصر من جوه وتخبيط جامد قومت بسرعه من على السرير وجريت من أوضتى على الصوت علشان عينى تتفاجأ بمنظر عمره ماكنت أتخيله
لقيت سامر بيرقص بنص هدومه وحواليه خمسه مومس , يعنى مش واحده ولا أتنين ده جايب بالخمسه أبن ال..
طبعا دمى فار وعروقى أتنفخت وجريت عليه وانا بزعق وبكسر قزايز الخمره عليه وعلى المومس اللى جايبهم طردت المومس بره القصر ورجعتله لقيته بيبلبس هدومه
وبيقولى :
أيه اللى أنت عملته ده يابهيم !!!
قولتله :
بهيم بهيم يابن ال... ,رايح تجيب نسوان وخمره ويافاجر أبوك اللى أنت جاى تورثه لسه دمه مابردتش فى تربته
لبس هدومه كلها وقعد على الكنبه جمب المخده اللى قتلت بيها أبوه وقالى وهو بيولع سيجاره :
بص بقى أحنا هنا فيفتى فيفتى يعنى قمار , من ألاخر لو طلعت أبن أخوك وده أن شاء هيحصل هطردك بره القصر ده , ولو طلعت مش أبن أخوك هتطردنى أكيد يعنى
خد نفس من السيجاره كأنه بيغتصبها وقالى وهوبيطلع الدخان من بوقه :
يبقى الاسبوعين دول زى زيك فى القصر أعمل اللى أنا عاوزه وأياك تفكر تعمل حركه ذى اللى عملتها دى تانى وخليك فاكر فيفتى .. فيفتى
عطرت أيدى بالمسك ومسحت بيها وشى ودخلت أصلى أستخاره على قرار خدته
فضل كل يوم على هذا الحال خمره ونسوان وفياجرا .. خمره ونسوان وفياجرا .. خمره ونسوان وفياجرا
فياجرا!!
نزلت جبت شريط فياجرا ذى اللى بيبلعها سامر الزانى ونزلت معملى فى القبو
جبت بذور التفاح وأستخلصت كميه تانيه أكبر شويه حوالى 80 ملغ من (الأميغدالين) سم التفاح
وبعدين مسكت الشريط واللى كان عباره عن ٣ حبوب بس وقربته من النار لحد ما المصغ اللى على الشريط ساح ,شيلت غلاف الشريط براحه وطلعت ال٣ حبيات فياجر , طحنتهم ومزجتهم بسم التفاح وكبستهم تانى على نفس شكل الحبايه وحطتهم فى الشريط وبصمغ عربى لزقت غلاف الشريط تانى ونفخت فيه لحد مانشف وبقى ذى الأصلى بالضبط
وقعدت أتخيل سامر وهوه بيفعل الفاحشه وفجأه يتخنق وقلبه يوقف , هيقابل ربنا أزاى ده !!!
أستنيت لتانى يوم الضهر الوقت اللى بيبقى نايم فيه علشان أعرف أدخل أوضته وأبدل شريط الفياجرا بتاعه العادى بالشريط المسموم اللى عملته
فتحت باب أوضته بشويش ودخلت الأوضة وأنا بتسحب براحه وقفت جوه الاوضه و لفيت بعينى بس بدور على الشريط, لقيت سامر نايم فى سابع نومه وجمبه قزايز الزفت الخمر وريحة الأوضه تقرف ,ببص لقيت الشريط على الكوميدينو ومتاخد منه حبايه واللى معايا كامل!!
, أتوترت شويه وقلت لنفسى
لو بدلته مش هياخد باله ده سكرى وبتاع كاس
وبعدين قولت:
لأ لياخد باله ,, تبقى نهايتى
قعدت أخد نفسى علشان أهدى , وضغط بصوباعى براحه على حبايه من اللى فى الشريط المسموم اللى معايا علشان أطلعها فعملت صوت تكة وفطت منى نزلت تحت السرير
أتسمرت مكانى لما لقيته أتحرك!! بس الحمد لله أتقلب على السرير من غير مايصحى
كده بقى معايا حبيتين فى الشريط المسموم مديت أيدى علشان أبدل الشريط .. تليفونى رن بصوت عالى.
لقيت سامر صحى من النوم وشافنى وانا فى أيدى الشريطين وببدلهم ....