رواية جسد زوجتي
الفصل الثاني 2
بقلم حماده زهران
أنا طيرت من الفرحه لما وافقت وأتجوزنا وعيشنا اجمل أسبوع في حياتنا......
أخيراً لقيت المواصفات اللي أنا عايزها واتجوزتها كمان أنا سعيد جداً بحياتي الحمد لله حياتي بدأت تستقر...
وبعد عشر ايام من جوازنا بدأت حاجات غريبه تظهر على ريم في البداية فضلت تكح كحه غريبه لدرجة أنها بتجيب دم من بقها......
أتخضيت عليها مسكتها لقيتها فجأة وقفت محنطه وبتبص لفوق وعنيها كلها بيضه وصوابعها أتعوجت وفتحت بوقها على الاخر......
وسمعتها بتهمس وبتقول كلام سريع مش مفهوم وسكتت وكررت نفس الكلام بنفس الطريقه و أنا مخضوض عليها ومش فاهم حاجه كررت نفس الكلام بنفس الطريقه......
وبعدها قالت أنا هموت بعد يومين ودي الحاجه الوحيده اللي فهمتها من وسط الكلام اللي قالته.....
اللي حصل ده أستغرق تقريباً 10 دقايق.....
وبعدين فاقت وبقيت كويسه كشفت عليها وأطمنت أن معندهاش حاجه مفيش سبب طبي أدي للحالة اللي جاتلها ومش فاكره اي حاجه من اللي حصل معاها......
جملة ريم لسه بترن في دماغي "أنا هموت بعد يومين"...
قررت مروحش المستشفى اليومين دول.....
وحكيت لأمي اللي حصل مع ريم أمي كتر خيرها قررت تريحها ومخلتهاش تقرب جنب المطبخ ولا حتى خدمة البيت كله.....
عدا اليوم الأول طبيعي جداً مفيش حاجه حصلت واليوم التاني لغاية العصر مفيش حاجه حصلت....
كنت قاعد في أوضتنا أنا وريم قامت خرجت تروح الحمام وبعد ما خرجت من الاوضه بثواني أمي صرخت قمت من مكاني مفزوع وخرجت أجري علشان أشوف ريم بالمنظر ده...
"ريم متجمدة مكانها وعنيها قلبت أبيض وصوابعها جالها تصلب والمره دي رفعت إيديها فوق راسها وفضلت كأنها بتحاول تمسك حاجه فوق راسها.....
وفضلت تصارع بأيدها في الهواء وتنفسها بقي شديد وفجأة ثبتت ورجعت إيديها جنبها ورجعت أتجمدت تاني و تنفسها وقف كأنها تمثال بوقها مفتوح بدون صوت كأنها صرخه صامته......
نزلت جسدها المتجمد على الأرض وبدأت أكشف عليها وفحصت النبض والقلب لكنها صدمه كبيره بالنسبة ليا ريم ماتت......
عدا ساعتين وأنا وأمي كنا في حالة أنهيار.....
المغسله وصلت ومعاها اتنين مساعدين دخلوا الاوضه وأمي كانت معاهم وقفلوا الباب........
بعد وقت مش كتير المغسله والستات وأمي خرجوا يجروا ومفزوعين وبيقولوا اعوذ بالله أعوذ بالله ولقيت كل الناس اللي جم علشان يحضروا الدفنه خرجوا يجروا ، دخلت الأوضه بعد ما خرجوا لقيت ريم قاعدة مكانها بتبصلي ومبتسمه جريت عليها أفحصها لقيتها سليمه قولتلها انتي كويسه ردت كأنها طفلة وقالت أنا كويسه يا عمو جبلي شوكولاته زي بابا......
أنا مش عارف أعبر عن الحالة اللي أنا فيها ريم لسه عايشه نزلت جري علشان أجيب شوكولاته......
لقيت أمي واقفه في الشارع بعباية البيت وواقفه مرعوبة جبت الشوكولاته وأخدت أمي وطلعت لقيت ريم قاعدة بتسمع كرتون على التلفزيون أديتها الشوكولاته وكانت مبسوطه جدا وبنفس طريقه كلام الكرتون اللي هو لغة عربية قالتلي شكراً لك وفتحتها وبدأت تاكل أمي واقفه خايفه منها وأنا بقول لنفسي مش مهم اللي بيحصل ده هي مرت بتجربة صعبة ماتت ساعتين أكيد ده أثر على دماغها.....
عدا شهر وخلال الشهر ده ريم حرفياً قلبت طفله لدرجة أنها لما بتكون عايزه تروح الحمام كانت بتقولي ممكن يا عمو توديني الحمام ده غير الرسومات اللي بمجرد ما اي حد يشوفها هو ومغمض هيقول طفله اللي رسمتها الغريبه أنها بتقول أن اسمها موده....
أنا وأمي كنا بنتعامل معاها علي أنها طفله وفي يوم كنا قاعدين بنفطر وريم مسكت الأكل بأيديها وراحت تسمع كرتون على التلفزيون تجاهلناها أنا وأمي وفجأة حصل اللي مكنتش متوقعه ريم أتحنطت ودخلت نفس الغيبوبة عينيها قلبت أبيض وفضلت تصارع بأيدها في الهواء وبعدها ماتت أتأكدت وفحصت نبضها لكنه واقف ريم ماتت.....
شيلتها ونيمتها علي سريري وطلبت من أمي متجيبش سيره لحد يمكن ريم تصحي تاني........
عدا خمس ساعات وريم ما صحيتش وأنا حاضنها وببكي وفجأة أخدت نفسها بقوة وفاقت......
وأول ما فاقت زقتني وخرجت تجري أمي كانت خارجه من أوضتها خبطتها وقعتها علي الأرض جريت أسند أمي اللي كانت مفزوعه قعدتها علي كرسي وخرجت أجري وراها....
شوفتها بتركب تاكسي جريت وركبت عربيتي كانت مخليه التاكسي يسرع وأنا وراهم لغاية ما وقف التاكسي عند عماره ودخلت وانا دخلت وراها......
طلعت شقه في الدور الثالث الباب مفتوح ومكنش فيه حد موجود لكنه غرقان ميه وصوت ميه شغال....
دخلت وأنا بقول يا ريم أنتي فين وفضلت أدور عليها لحد ما وصلت لغرفة النوم ولقيت ريم بتحاول تزق في قطعة أساس كانت واقعة قصاد باب دولاب داخل الحيطه مساحته تقريباً ٦٠سم عرض
أول ما شافتني بصوت عالي قالتلي تعالي ساعدني أتخضيت وجريت زقيت معاها قطعة الاساس والقطعه دي كانت دولاب خارجي لكنه تقيل جداً واقع ورجليه مكسورين......
ودولاب الخزين اللي داخل الحيطه الميه بتتسرب منه......
وفتحت ريم الباب وشوفت صدمه جثة واحده جسمها داب من كتر الميه اللي نازله من سطح الدولاب بقوة....
ريم فضلت تبكي وتقول لا لا لا اخدتها في حضني وأنا في دماغي مليون سؤال وصدمتي بالجثة دي فجأه ريم بعدها زقتني وقالت اوعي ابعد عني أنا معرفكش انت مين......
أنا أتصدمت لما قالت كده قولتلها.....
-مالك يا ريم أنا فارس جوزك ....
= أنا مش ريم ومش مرات حد أنا أميره اللي قدامك دي....
-هااااه اميره طيب اميره مين ممكن تفهميني....
وبدأت تحكي وهي بتبكي.....
"أنا كنت دكتوره لسه متعينه جديد لسوء الحظ مكان التعيين بعيد عن البيت علشان كده أضطريت أخد الشقه دي أيجار سعرها كان حنين عليا لكن زي ما أنت شايف عفشها متهالك والجدران مش كد كده......
أوضتين ومطبخ وحمام مفروشه بسعر 800 جنيه في الشهر وافقت ويادوب أستلمتها امبارح وبدأت أنظم الحاجه بتاعتي....
وبدأت ارص هدومي في الدولاب وبعدها قولت أنضف شدولاب الخزين فدخلت في الدولاب......
وفجأة الباب اترزع ورايا حاولت أفتح فيه لكنه مبيفتحش فضلت يوم كامل أخبط واحاول ازوق في الباب لكنه مش بيفتح.....
فضلت أصرخ علي أمل حد ينجدني بصيت في سقف الدولاب لقيت مواسير الصرف فكرت فكره غبيه اني اكسر المسوره واحاول افتح بيها الباب لكني موت ولقيت نفسي في جسم حد تاني زي ما انت شايف.....