رواية أبي بواب وأمك خدامة الفصل الاول1والثاني2بقلم رانيا عمارة
بيري(بعصبيه) :انزلي شوفي الحيوان ده اتأخر ليه!!..تالت مره أتصل بيه..ومبيردش!..انا مش مستعده ان أي حد يبوظلي عزومة النهارده!
{تتألم وجيده من تعب رجليها، وتنهج وتقولها بتعب}
وجيده:حاضر يا بيري هانم، انا هنزل
{وقبل ماتنزل، كانت مُهره صعبان عليها تعب والدتها، بصيت بتردد لـ بيري وقالتلها}
مُهره(متردده) :انا هنزل بدل ماما
{نزلت مُهره ولقيت باب أوضة البواب مقفول، ندهت بأعلي صوتها يمكن يسمعها ويجي}
مهره:عم متولي....عم متولي....انت فين؟...ياعم متولي!
{ولكنها بتتفاجئ بدخول شاب للعماره بشنطة السفر، كانت في البداية فاكره انه صاحب شقه من الشقق الموجوده في العماره، لكنه وقف قصاد أوضة البواب، واتفاجئ بوجود قفل..بص يمين وشمال وهو متردد}
مهره:انت مين؟
حاتم:انا حاتم، ابن الحاج متولي، انتي اللي مين؟
مهره:انا بنت الشغاله اللي في شقة مدام بيري..طب بما انك ابنه ممكن تتصل بيه تشوفه اتأخر ليه..أصل مدام بيري وراها عزومة وهو اتأخر بالطلبات!!
{طلع حاتم تليفونه القديم اللي بـ زراير وشاشته مكسوره، واتصل علي متولي..ولكنه مردش، لكن ما بان علي وشه اليأس..ودي حاجه لاحظتها مهره}
مهره:ايه مبيردش؟
حاتم:لا
{دخل متولي بالطلبات، وهو ماشي بالعافية..وأول ما حاتم شافه جرى عليه}
حاتم:حمدالله على السلامه يا بابا..الأستاذه دي مستنياك من بدري!
متولي:انتي بت الحاجه وجيده؟
مهره:ايوه انا..كل ده تأخير ياعم متولي؟
متولي:معلش يابنتي، السن له حكمه..علي العموم خدي انا جيبت كل الطلبات اهو
مهره:ماشي، ربنا يديك الصحة
{َوخدت الطلبات وطلعت علي السلم، ومتولي خد ابنه ودخلوا الأوضه}
متولي:طمني عملت ايه في الكليه؟
حاتم:الحمدلله..أمي كانت بعتالك السلام
متولي:الله يسلمها..انت كنت عند أمك امتي؟
{وقعدوا علي السرير، اتنهد حاتم وقال}
حاتم:من يومين، وجوز أمي حلف لأبات عندهم، فقعدت وتاني يوم رجعت بيتنا..بيني وبينك الدنيا كئيبه هناك، قولت آجي هنا واقعد معاك، نونس وحدتنا
متولي:وأختك نسمه بقالها شهرين مسألتش فيا، والغريب يابني ان جوز أختك شغال في شارعنا ومش هاين عليه يعدي ولو مره يشوف حماه عامل ايه!!
حاتم:سيبك منه، المهم ان انا معاك، طمني عليك بقي عامل ايه؟
===فوق===
{بعد ما مُهره وصلت، كانت بيري قاعده علي الأنترية وحاطه رجل فوق رجل وماسكة مجله بتقرأ فيها..وأول ما شافت مهره، قامت}
بيري(بعصبيه) :ايه نقول حمدالله على السلامه أخيراً؟؟..انا بجد مش فاهمه بواب ايه ده؟؟..لما هو مش قد الشغل بيشتغل ليه ويقرفنا؟؟..ضاع من وقتي ساعتين، وهتحط في موقف زي الزفت بسببه..متولي ده لازم يمشي..ويا أنا يا هو في العمارة!!
وجيده:هدي نفسك ياست بيري..متعمليش في نفسك كده..ده احنا هنشرفك ونرفع راسك قصاد أهل أستاذ علاء..ولا تدايقي نفسك ده احنا تحت أمرك!
بيري:انا عايزه السفره النهارده تكون أشكال وأنواع، مش عايزه غلطه واحده في الأكل..وانتي يا مُهره، تنضفيلي الريسيبشن كويس..وشغل الكروته ده مش عايزاه
مهره:حاضر اللي تشوفيه
{وابتدا كل واحد فيهم يشوف اللي وراه..دخلت بيري أوضة النوم وطلعت الموبايل واتصلت بـ صاحب العماره}
بيري:مساء الخير يااستاذ حسن
حسن:يامساء النور، ازيك يا مدام بيري؟
بيري:مش تمام والله
حسن(بإستغراب) :ليه يااستاذه بيري، ايه اللي حصل؟
بيري:لازم متولي البواب يمشي من العماره..دي مش أول ولا تاني مره يتأخر عليا في الطلبات اوي كده..يعني يااستاذ حسن ده جزائي ان انا بسيب كل أبلكيشنز التوصيل، واختارته هو عشان أنفعه..وفي النهاية يأجلني للآخر لحد ما سعادته يخلص كل مشاويره وفي الآخر يفكر يحن علينا؟؟
حسن:طب ومشتكتيش ليه المرات اللي فاتت لما هو مش شايف شغله؟..كنتي عرفيني!
بيري:مكنتش عايزه أقطع رزق حد..بس الموضوع زاد عن حده
حسن:غريبه مع ان مفيش أي حد من سكان العمارة بيشتكي منه!..حضرتك أول حد يشتكي!
بيري:آهااا...اذا كان كده بقي نقول ان الموضوع واضح جداً انه شخصي..اشمعنا انا اللي بيعمل معايا كده؟..انا اتأخرت عنه في ايه؟...ده انا بديله لبس وأكل وفلوس مبتأخرش عنه في حاجه خالص!!
حسن:الحقيقه انا مش عارف هو ليه بيعمل كده!.. بس على العموم متقلقيش، انا هتصرف معاه بطريقتي
بيري:شكراً يااستاذ حسن، مع السلامة
حسن:مع السلامة
===تحت===
{راح حسن وخبط علي متولي، واللي فتحله كان حاتم..ولما حاتم شافه استغرب}
حسن(منفعل) :انت ايه يا أخي؟؟...أكل ومرعه وقلة صنعه؟...لو مش قد الشغل يا متولي فانا أحب أقولك انت مرفود وشوفلك عماره تانيه غير دي!!
{قام متولي وهو بيسند علي حاتم ابنه، وقاله بحزن}
متولي:لا يا أستاذ حسن، أبوس ايدك بلاش..عشان خاطري بلاش..انا عايش من شغل العماره دي..ومليش مكان تاني
حسن(بزعيق) :أمال مش شايف شغلك ليه؟..وبتعمل كل ده ليه؟؟..واشمعنا مدام بيري بالذات دوناً عن بقيت سكان العماره؟
حاتم:ممكن يااستاذ حسن، بلاش تتكلم معاه بالطريقه دي، ويكون اسلوبك أحسن عن كده!!
حسن(بزعيق) :وانت كمان هتعلمني ازاي اتكلم؟؟...طب اسمع بقي ياحبيبي..خد أبوك اللي مش شايف شغله وشوفولكم مكان تاني غير ده!!
{وطي متولي علي الأرض علي رجل حسن، وهو بيبكي..ودي حاجه أثارت غضب حاتم}
متولي:ابوس ايدك يااستاذ حسن متمشنيش...انا كل اللي عملته إني اتأخرت شوية..الدنيا كانت زحمة والجو حر...انا جيبتلها كل اللي هي عايزاه، مالوش داعي كل ده..أبوس رجلك بلاش!!
{شده حسن من علي الأرض، وهو مدايق من نفسه}
حسن:خلاص يا حاج متولي...انا بشد عليك عشان بحبك ومش عايز حد يشتكي منك في حاجة، متتأخرش بعد كده وجيب الطلبات بدري
متولي(بحزن) :حاضر انا تحت أمركم واحد واحد
حسن:ماشى ياسيدي، وياريت تربي ابنك ها
{ومشى، وحاتم مصدوم، وييبص لـ حسن بـ غل}
حاتم(بزعيق) :عاجبك كده وخليت واحد ميسواش تلاته جنيه بيتنطط علينا؟؟..انت ازاي توطي على الأرض وتبوس رجله؟؟...انت ليه بتقل منك ومني؟؟...وبتخلي شوية كلاب زي دول يتنططوا علينا كده؟؟
متولي:الفقير ريحته وحشه يابني..ربنا ما يكتبها علي حد..انا مش بقل منك ولا مني!!..الدنيا هي اللي أجبرتنا نبقي قليلين!!..دي حاجه مش بإيد حد فينا!!...لازم تعدي وتستحمل عشان مصلحتك..وإلا كده مش هتقدر تعيش!!
حاتم(بزعيق) :ملعون أبو الفقر اللي يخليك تقل من نفسك..وملعون أبو الأشكال الزباله اللي زي دي...اللي بيتنططوا على الخلق عشان الفلوس...لو انت عايز تعيش ذليل..فا ابنك مش هيعيش ذليل لحد..ولازم تغير أم الشغلانه دي..انا عايز أحس ان انا انسان وليا حقوق زي أي حد!!..مش عبد جايبينه من سوق العبيد بفلوسهم!!..بكرا ابنك ياخدك ويطلع لـ فوق...لـ فوق اوووي ووقتها هعرفهم كلهم قيمتهم الحقيقيه.
{وخرج من الأوضه ومشي}
متولي(بصوت عالي) :حاتم!!....ياحاتم يابني!!!...لا حول ولا قوة الا بالله العلي العظيم
{مشي حاتم في الشارع وهو دمه محروق من معاملة صاحب العماره ليهم، كان مغلوب علي أمره ولو اتكلم هيتسبب في قطع عيشه هو وأبوه..كان ماشي يبص للدنيا حواليه وهو بيتكلم جوا نفسه بصوت مش مسموع}
حاتم:ليه يا دنيا تخلي ناس زي دي تيجي علينا؟...الفلوس صح؟؟...وهما فيهم ايه زياده عننا عشان يبقي معاهم فلوس واحنا لا؟...مانا يمكن في يوم من الايام ابقي زيهم وأحسن بمليون مره...انا عكسك ياابويا...انت بتستحمل وتيجي علي نفسك عشان تقدر تصرف علينا..لكن انا اللي يجي عليا مرحموش..مش شرط أرد عليك في وقتها..بس انا بخزن!!..ويوم ما الخزان يملي علي آخره..هنفجر فيهم ولا هيهمني حد منهم...بس اصبر شوية وعدي وإلا هتموت بحسرتك!!
==فوق عند بيري==
{كانت مهره بتروق الريسيبشن قبل ما ضيوف بيري يوصلوا...وكانت بيري قاعدة علي الكنبة وحاطة رجل على رجل أثناء ما كانت بتكلم "حسن" صاحب العماره}
بيري:خلاص يااستاذ حسن..دي آخر فرصه له..وعلي العموم انا مش هطلب منه أي حاجة تاني!
حسن:لا يا أستاذة بيري، انتي هتطلبي منه وهينفذلك كل طلباتك، ده كان سوء تفاهم، ولو اتكرر تاني فا ليكي الحق تعملي اللي انتي عايزاه
بيري:متشكره يا أستاذ حسن، مش عارفة بجد أقولك ايه!
حسن:ولا أي حاجة احنا تحت أمركم، مع السلامة
بيري:باي
{قفلت بيري مع حسن..وقامت تشوف وجيده في المطبخ..وكانت وجيده بتعصر الطماطم بإيديها بدل ماتضربها في الخلاط!..ودي حاجة قرفت بيري منها}
بيري:ايه القرف ده يا وجيده؟...انتي ازاي تعصري الطماطم بإيديكي؟؟
وجيده(بإحراج) :اسفه يامدام بيري..بس الخلاط بايظ وانا جيت وقولت لحضرتك قبل كده بس مكنتيش فايقه..بس لو عايزاني آخده واصلحه مفيش مشكله!
بيري:القرف ده يترمي، ويتعمل صلصه غيرها، وإياكي تعملي كده تاني، مفهوم؟
وجيده:حاضر
{مشيت بيري ودخلت الأوضه، ووجيده كملت طبخ..وبعيد كانت مُهره سامعه كل حاجه وشايفه، وكانت بتبص لـ بيري بكل غل من معاملتها ليهم!!}
====عند حاتم في الشارع====
{كان حاتم ماشي ولسه زعلان وبيفكر، لحد ما عربيه خبطته ووقع علي الأرض..صرخ من ألم رجله والناس اتلمت حواليه، يشوفوا ماله!}
_انت كويس يااستاذ؟؟
{نزل صاحبة العربية، وهو قلقان عليه جداً..برفقة بنته الصغيره..واللي كانت واخده من ملامحه كتير}
عادل:انا اسف، بجد انا اسف والله...رجليك حصلها ايه؟؟
=حرام عليك، ده شكله واحد غلبان، ولا انتوا عشان راكبين عربيات ومعاكم فلوس، تدوسوا علي خلق الله؟
عادل:علفكرا هو اللي غلطان مش انا..هو اللي طلع علي فجأه وانا ماشي في طريقي زي آي حد..ومش هسمحلك ولا هسمح لأي حد انه يركبني الغلط!!
_خده وديه المستشفى لو عايز تكسب فيه ثواب!!
{اتجمعوا الناس وقوموا حاتم..وأول ما حاتم قام}
حاتم :انا كويس الحمدلله، جات بسيطه...رجليا بس اللي تاعباني شوية
عادل:طيب انا عندي استعداد أوديك المستشفى دلوقتي حالاً..ممكن؟
حاتم:طيب
عادل:اتفضل
{وسندوا حاتم لحد ما ركب العربية، وراحوا المستشفى..وهناك بعد ما الدكتور كشف عليه}
عادل:رجليه فيها كسر يا دكتور؟؟
الدكتور:لا الحمدلله، مفيش أي كسور..كام كدمة وهيروحوا مع الوقت..انا هكتبله العلاج وياريت ميتحركش كتير
عادل:طيب الحمدلله، طمنتني يادكتور
{وبعد ما الدكتور قعد على المكتب وكتبله العلاج، كان عادل ساند حاتم ومستنين الروشته}
عادل:العلاج ده متوفر في كل الصيدليات يادكتور؟
الدكتور:اه موجود في كل حتة، و حمدالله على السلامه
عادل:الله يسلمك
{وخد حاتم وخرجوا برا المستشفى، وركبوا العربية..وبعد ما عادل جاب العلاج لـ حاتم اداهوله، وصمم انه يوصله لحد البيت}
حاتم:قولي العلاج ده تمنه كام..و هاتلي رقمك عشان لما المبلغ ده يتوفر معايا، ارجعلك الفلوس!
عادل:العلاج ده هدية مني ليك..وبعدين انا اللي خبطتك..يعني هخبطك وكمان هدفعك؟؟
حاتم:الغلطه مش منك...الغلطه مني انا... انا اللي مكنتش مركز في طريقي وماشي سرحان!!
عادل:ولو...برضة دي هدية مني ليك، والحمدلله انها جات سليمه!
حاتم:صدقني مش هينفع...انا مقبلش جنيه واحد يتصرف عليا وهو مش من تعبي ومجهودي..صحيح مقولتليش اسمك ايه؟
عادل:اسمي عادل...ودي بنتي ملك..وانت؟
حاتم:ربنا يخلي...انا اسمي حاتم
عادل:عاشت الأسامي يا استاذ حاتم
حاتم:شكراً ليك..نزلني علي جنب هكمل الشويه دول علي رجلي
عادل:والله مايحصل، انا هوصلك لحد باب البيت..وهتطمن انك دخلت عشان قلبي يرتاح!!
حاتم:ماشي يااستاذ عادل اللي تشوفه
{وبعد ما عادل وصله ونزل، ودخل جوا...أول ما متولي شافه وهو بيعرج علي رجليه..اتصدم وقام يجري}
متولي:يانهار اسود...مالك يا حاتم، انت وقعت ولا ايه؟.. وايه الكيس اللي في ايدك ده؟؟
{وبعد ما سنده وقعدوا علي السرير، ضحك حاتم}
حاتم:متقلقش أوي كده..الحمدلله جات سليمه!!
متولي:ايوه يعني جرالك ايه!!!
حاتم:وقعت وانا ماشي..ارتاحت كده؟
====وقت العزومة عند بيري====
{بعد ما وجيده و مهره حطوا الأكل..دخلوا المطبخ}
بيري(بإبتسامه) :بجد مبسوطة اوي بزيارتكم دي
غاده:وانا أكتر يا بيري، بقالي كتير بقول لـ نبيل، مفتقده لمتنا سوا..ونفسي اننا نتلم سوا تاني
بيري:وأدينا اتجمعنا اهو!
علاء:طيب ياجماعه اتفضلوا انتوا مكسوفين ولا ايه؟..خدوا بالكم انتوا هنا أصحاب البيت..يعني مش عايز أي احراج خالص!!
نبيل:عارف ياعلاء..ده أكيد!
بيري:يلا بسم الله
=====عند وجيده ومهره====
{كانت وجيده بتتكلم بصوت واطي مع مهره}
وجيده:خدي دول واتكلي علي الله ارجعي البيت..وانا بعد مااخلص هاجي وراكي..لو اخواتك احتاجوا اي حاجه اعمليهالهم.
{وطلعت الفلوس من جيبها}
وجيده:خدي دول يا مهره، وخدي بالك من نفسك
مهره:حاضر ياماما..انا ماشية بقي
وجيده:مع ألف سلامة
{مشيت مهره ونزلت...ولما وصلت مدخل العماره..كان حاتم قاعد علي كرسي قصاد العماره في الهوا..ولما مهره شافته لافف رجلة وحاطط ايده عليها..جالها فضول تعرف ايه اللي حصله}
مهره:السلام عليكم
حاتم:وعليكم السلام ورحمة الله وبركاته
مهره:معلش يااستاذ....
حاتم:اسمي حاتم!!
مهره:هو ايه اللي حصلك يااستاذ حاتم!..انت الصبح كنت كويس يعني!
حاتم:لا دي حادثة بسيطه، الحمدلله عدت على خير
مهره:حادثة؟...طب انت رجليك كويسه ولا فيها ايه طيب؟
حاتم:اه الحمدلله...بس معلش يعني استأذن منك يعني يااستاذه....
مهره:اسمي مهره!!
حاتم:استأذن منك يااستاذة مهره، بلاش تحكي حاجة قصاد ابويا وتقولي انها حادثة.. أصل انا قايله ان انا وقعت!!
مهره:لا متقلقش، حمدالله على السلامه
حاتم:الله يسلمك
مهره:مع السلامة
حاتم:سلام
{مشيت مهره قدام شوية يمكن تلاقي تاكسي ولكنها ملقتش وفضلت واقفه فتره طويله..لحد ما وقفتلها عربية ملاكي}
_تيجي معايا ساعتين؟
مهره(بزعيق) :انت عبيط ولا ايه؟؟..يلا اتكل على الله من هنا!!..بدل مااقول كلام مش هيعجبك!!
_ايه يا قطه؟...ده انا بقولك هما ساعتين بس..يعني مشوار صد رد.
مهره(بزعيق) :اتلم واحترم نفسك..هقلع اللي في رجلي وهنزل بيه علي دماغك..يلا يا زبالة من هنا..يلاا
_مش عيب تشتميني وانا في السن ده؟
{جه حاتم بسرعه بالعصاية وهو مصدوم من الخناقة}
حاتم:في ايه..دايقك ولا ايه؟؟
مهره(بزعيق) :ده قليل الأدب، بيقولي كلام زبالة شبه وشه!!!
{راح حاتم لاففله الناحية التانيه وشده من العربية، ولسه هيضربه بالعصاية..جه متولي بسرعة وشدها منه}
متولي(بزعيق) :في ايه؟؟؟
حاتم:بيعاكس الأستاذه...وانا اللي مرضاهوش علي أختي مرضاهوش علي بنات الناس!!
متولي(بزعيق) :امشي يلا من هنا..خد بالك احنا ناس عِرقنا صعيدي، واللي يجي علي وليه من ولايانا يبقي حكمها علي نفسه..لو خايف علي نفسك يبقي امشي...يلااا
{ركب الراجل العربية وهو بيبصلهم بـ غل ومشي}
مهره:متشكره ليك اوي يااستاذ حاتم.. انت وعم متولي، مش عارفه أقولكم ايه والله!!
متولي:لا يابنتي متشكريناش..الشكر لله وحده...ونصيحة من راجل في سن أبوكي..بلاش تمشي في الوقت ده بعد كده..عاوزه تمشي، يبقي تمشي بدري عن كده قبل ما الدنيا تليل!!
مهره:حاضر يا عم متولي، عن اذنكم
متولي:لاا استني، روح معاها يا حاتم لحد آخر الشارع َولما تتأكد انها ركبت العربيه، ارجع
حاتم:ماشي يا بابا..اتفضلي يااستاذه مهره
{رجع متولي للعماره...وحاتم راح مع مهره}
مهره:انا زعلانه من نفسي اوي
حاتم:زعلانه من نفسك ليه؟
مهره:عشان يعني انت عامل حادثة ورجليك تعبانه، وقومت تتخانق مع الحيوان صاحب العربية ده
حاتم:الناس لـ بعضيها يا آنسه مهره
مهره:وانت عرفت منين، مش يمكن متجوزه؟
حاتم:مش لابسه دبله!
مهره:صح فهيم برضه..علي العموم متشكره ليك
حاتم:ربنا يسترها عليكي وعلي اي واحده
مهره:يارب يااستاذ حاتم
{ولما وصلوا، وشاوروا لـ تاكسي...ركبت مهره وشاورت لـ حاتم ومشيت..ولما اتأكد ان التاكسي مشي..راح هو كمان ماشي ورجع العماره}
====تاني يوم====
{صحيت مهره من النوم، ملقتش وجيده، مكنش في غير اخواتها الاتنين (حمزه، نسمه)...حمزه في الثانوي، ونسمه في الاعدادي...ومهره أختهم الكبيره اللي بتتولي مسئوليتهم..قامت تجهزلهم الفطار..وهي واقفه في المطبخ، جه علي بالها مشهد حاتم وهو عايز يضرب سواق العربيه!!..لحد ما ضحكت}
مهره:هي ماما مجاتش من امبارح يا حمزه؟
حمزه:انا صحيت ملقيتهاش..يمكن بايته عند ست بيري؟
مهره:يمكن برضه..بس هي كانت قايلالي انها بعد ماتخلص شغل هترجع!
حمزه:بسيطه، يبقي باتت هناك!!
مهره:صح برضه
=====عند بيري في الشغل=====
{كانت في البيوتي سنتر بتاعها..وبالتحديد في مكتبها، والموظفه قاعده معاها بتراجع الشغل}
بيري:٣٠ اكستنشن؟...احنا بيعنا ٣٠ امبارح، معقول؟
علا:ايوه يابيري مستغربه ليه، هي دي أول مره يعني؟
بيري:أه طبعاً أول مره من ساعة ما افتتحنا البيوتي سنتر...علا بليز ركزي معايا شوية..الـ ٣٠ اكستنشن دول كانوا متوزعين علي عدد أيام معين..لكن غريبه ان كل ده في يوم واحد بس!!
علا:مركزه معاكي والله...طيب يابيري ايه الغريب، اللي انتي شايفاه واحنا مش شايفينه؟
بيري:خلاص يا علا..جهزيلي الـCombination بتاعت بروتين الشعر
علا:حاضر
{قامت علا وخرجت..لقيت تلاته بمسدسات مكتفين الموظفين..حتي الزباين نايمين علي الأرض من الخوف..صرخت علا أول ما شافتهم..لحد ما ضربوا طلقه في الهوا يخوفوها..ولما بيري سمعت الصوت خرجت برا}
بيري(بزعيق) :يانهار اسود...ايه اللي بيحصل ده؟؟؟..سطو مسلح وهنا في شغلي وأكل عيشي؟؟؟...انتوا مين وعايزين ايه؟؟
_فين الجواهر يا بيري؟؟...ودتيها فين!!!!
بيري(بإستغراب) :جواهر؟؟...جواهر ايه اللي بتتكلم عنها دي؟..ده غير انت مين اصلاً ومين اللي باعتك؟؟؟
=وهو كان حد قالك اننا جايين في قعدة تعارف؟؟..احنا جايين في مصلحه وماشيين..هناخد المصلحه هنسيبك انتي وحبايبك..مش هناخدها يبقي اتشهادوا عشان تروحوا علي نضافة
بيري(بزعيق) :وهي أشكالكم دي تعرف ايه عن النضافه اساساً؟؟..انتوا جايين هنا ليه؟؟
_ماتنجزي، هو كتر كلام وخلاص؟؟...فين المجوهرات.. لو ناسية هفكرك..واحده حمرا.. وواحده خضرا..واتنين ابيض.. ايه لسه ناسيه؟؟
بيري:لا الحقيقه مش فا....
{ولسه بيري هتكمل كلامها، اتضربت طلقه وراها في الحيطه وقعت البرواز علي الأرض، صرخت بيري وتنحت من شدة الخوف}
بيري:خلاااص...خلاص هقولكم...المجوهرات عند أشرف العقاد..بس عشان خاطري بلاش تعملوله حاجة، انا هتصل بيه وهقوله يديهملكم بس متعملولوش حاجة!!
_ههههه عشان ايه؟؟ خاطرك؟؟.. لا قوليها تاني
بيري:طيب متعملولوش حاجة ممكن؟
=والله علي حسب...اتصلي بيه!!
بيري(بخوف) :ايه؟؟
=بقولك اتصلي بيه اعرفيلنا مكانه وخلصي، وافتحي الاسبيكر!!
بيري(بخوف) :طيب
{وطلعت موبايلها واتصلت بـ ابن خالتها أشرف}
بيري(بخوف) :امممم...الو..الو ياأشرف..ازيك عامل ايه؟
أشرف:حلو اوي...ازيك انتي يا بيري وإزي علاء وخالتي و فيروز؟
بيري(بخوف) :كويسين...انت فين، مسافر ولا في البيت...أصل كنت.... كنت عايزه أعدي عليك بالليل انا و علاء نقعد معاك شوية، بقالنا كتير مقعدناش مع بعض!
أشرف:اه انا في البيت
بيري:خلاص تمام هنعدي عليك بالليل
أشرف:مفيش مشكله، تيجوا تنوروني
{قرب واحد من زعيم العصابة..ومسك موبايل بيري وهبده في الأرض بقوه لحد مااتكسر نصين}
_بيته فين؟؟؟
بيري(بخوف) :هقولكم!!!
{وبعد ما قالتلهم العنوان ومشوا}
بيري:طلعي موبايلك بسرعه، بسرعه يا علا!!!
علا(بخوف) :حاضر
{وبعد ما طلعت موبايلها، كانت بيري ناسية الرقم..فااضطرت تغير الخطوط، وبعد ماغيرتهم، اتصلت بيه}
بيري:امشي من البيت بسرعه يا أشرف وخد المجوهرات معاك..دقيقتين بالظبط وتختفي!!!
أشرف:انا مش فاهم حاجة!!
بيري:اسمع اللي بقولك عليه، مفيش وقت!!
أشرف:طيب..طيب.. ماشي
{وفي وقتها كان أشرف بيلم المجوهرات عشان يهرب.. وبعد مافتح باب الشقه، سمع خطوات طالعه على السلم..ولما حس ان في حد جاي..قفل الباب براحه وطلع علي السطح...وفي الوقت اللي هما بيخبطوا على الباب فيه وبيضربوا النار..كان هو هرب ونط من عماره لـ عماره تانيه..ولما دخلوا ملقوش حد}
=عملتها فينا بنت الكلب!!!!
_والحل ايه؟؟
=اصبر بقي!!
{وعند بيري كانت مشيت الزباين وقفلت البيوتي سنتر ورجعت البيت، ودخلت الشقه...ولميت كل حاجة وخدت بنتها في ايديها}
بيري:ارجعي بيتك يا وجيده ومتجيش الا لما أقولك
وجيده:ليه يا ست بيري؟
بيري:اسمعي اللي بقولهولك، ممكن؟
وجيده:حاضر اللي تشوفيه
{وبعد ما وجيده خدت حاجتها، وخرجوا كلهم برا ونزلوا..وكان متولي وحاتم قاعدين في مدخل العماره علي الكنبه بيفطروا..ولاحظوا ارتباك بيري وجريها}
متولي:هو في ايه يا أم حمزه؟
وجيده:والله مااعرف..دي جات علي فجأه كنت لسه بجهز الغدا..قالتلي خدي حاجتك وامشي..ومجيش الا لما هي اللي تقولي
متولي:بصراحه أمرها غريب الست دي، تحسي دماغها دي مش مظبوطه..ولا حتي فيها فاره والده
وجيده:اه والله..تخيل ياحاج متولي..انها امبارح منعتنا ندوق لقمه من أكل العزومه، وقال ايه تقولي كلوا عيش بـ جبنه من اللي في التلاجة..قولت وعلي ايه الواحد يصبر لما يرجع بيته ويعمل ما بداله!
متولي:دي وليه لاسعه، فكك منها..ياكش تولع..تبقي تخلي النفخ اللي منفوخاه ده ينفعها..يمكن ربنا يكرمها و تطرشق قريب
وجيده(بتضحك) :ههههه ضحكتني ياحاج متولي...والله انت القعده معاك زي العسل، ربنا يباركلك في ابنك...يلا انا ماشيه
متولي:مع السلامه
{وبعد ما مشيت}
متولي:متعرفش الست بيري دي مالها!
حاتم:واحنا مالنا، ماتولع في داهيه تاخدها هي وسي حسن اللي بتتحامي فيه ولا كأنه جوزها!!
متولي:شكلك لسه شايل من ليلة امبارح!
حاتم:وهو انا شايل بـ عقل؟...ده انا كل يوم الكره في قلبي بيزيد..اه لو يقعوا في أيدي بس!!
=====عند بيري وبنتها فيروز=====
{بعد ما ركبوا العربيه، وبيري مشيت من طريق جديد}
فيروز:هو احنا رايحين فين ياماما؟
بيري:رايحين عند جدو
فيروز:طب ومدرستي؟..حضرتك نسيتي ان انا عندي مدرسة ودروس؟
بيري:معلش كام يوم لحد مانشوف هنعمل ايه!
فيروز:هنعمل ايه في ايه؟
بيري(بعصبيه) :خلاص بقي يا فيروز، انا مبحبش كتر الأسئلة دي!!
فيروز:ماشي!!
======عند مهره=====
{جات العماره، وهي طالعه..ندهها متولي}
متولي:رايحه فين يا مهره؟؟
مهره:طالعه لـ ماما
متولي:هي أمك مكلمتكيش وقالتلك انها مشيت هي وست بيري؟؟
مهره:لا والله ما قالتلي حاجة...هي مشيت من امتي؟؟
متولي:يادوب من مفيش ١٠ دقايق، لو كانت استنيت شوية كنتوا اتقابلتوا
مهره:ياريتني كان معايا رصيد كنت كلمتها ولا كان كل ده حصل..ده انا ضربت مشوار علي الفاضي!
متولي:طب اقعدي ارتاحي شوية يابنتي، وابقي اتكلي علي الله
مهره:طيب ياعم متولي
{قعدت قصدهم مهره وهي محرجه}
مهره:ازيك دلوقت يا حاتم؟
حاتم:الحمدلله أحسن
مهره:الوجع خف؟
حاتم:مش اوي لسه شويه
مهره:ياريت بعد كده وانت بتجري تبقي تبص في طريقك عشان متتكعبلش تاني
{بص حاتم لـ مهره وابتسم، خصوصاً انها مقالتش انها حادثة قصاد متولي}
متولي:طيب انا هعمل شاي، تشربي شاي يا مهره؟
مهره:ماشي ياعم متولي، بس متكترش الشاي...أصل ماما بتخليه زي الحبر
متولي(بيضحك) :حاضر
{ودخل جوا يجهز الشاي..وكانت مهره محرجه}
حاتم:وانتي شغاله هنا مع الحاجة وجيده؟
مهره:لا مش شغالة معاها، بس ساعات باجي اساعدها لان الشغل يكون تقيل عليها
حاتم:ربنا يقويكم...و بتدرسي؟
مهره:انا جايبة في الثانوية العامة 80٪ كنت شعبة أدبي...بس الكليه اللي اترشحتلي يعني بمصاريف عاليه احنا منقدرش عليها
حاتم:ووالدك فين؟...عايش؟
مهره:بابا متوفي من سنين، حتي مليش اعمام ولا حد..مليش غير ماما واخواتي
حاتم:ربنا يخليهملك
مهره:يارب
حاتم:طيب الكليه بتاعتك مصاريفها كام؟
مهره: 2500
حاتم:هي مش غاليه، بس علي الناس اللي زي حالاتنا بتبقي غاليه يعني
{دمعت مهره، ومسحت دموعها، واتغير صوتها}
مهره:مليش اللي يديني..وماما كتر خيرها اللي بتاخده بيروح علي أكلنا ومدرسة اخواتي..مش بيتبقالنا حاجة..وانا الحمدلله راضية بنصيبي..لان مقداميش حاجه غير كده أعملها!!
{اتأثر حاتم من كلامها، وكان هاين عليه يعيط لانهم بيمروا بنفس الظروف}
حاتم:لا يا آنسه مهره، ممكن متعيطيش؟...ربنا قادر على كل شيء..انتي ليه طيب مجربتيش تشتغلي؟
مهره:ماما رافضة...وبتقولي ان الناس برا وحشه ومبترحمش..حاولت أقنعها كتير، بس هي رافضه لحد دلوقتي!!...مابقتش عارفة اعمل ايه تاني!!
حاتم:خلاص سيبيها عليا انا هحاول أقنعها..طب عارفه انا كمان بدور علي شغل..لو لقيت شغل ليا هجيبلك شغل معايا
مهره(بفرحه) :طب ياريت تبقي عملت فيا جِميل مش هنساهولك طول عمري!!
{وبعد شوية خرج متولي بصينية الشاي}
متولي:عملتلكم شاي..وخليتهولك خفيف يامهره زي ما طلبتي، أي خدمه
مهره:تسلم ياعم متولي
{ولسه بتاخد منه الشاي، لقوا ٣ رجالة شكلهم مُريب داخلين عليهم بالمسدسات}
الفصل الثاني
حاتم:انتوا ميين؟؟؟
{ولكن السطو المسلح عدي من جنبهم في صمت لحد ما طلعوا فوق عند بيري..وساعتها كان متولي بيشد في حاتم عشان يدخلوا الأوضه جوا}
حاتم(بعصبيه) :في ايه يا بابا؟؟.. انت بتخاف ولا ايه؟
متولي:انا مش خايف علي نفسي انا خايف عليكم..امشي يا مهره يابنتي وارجعي البيت قبل ما ينزلوا تاني
مهره:حاضر
{مشيت مهره، ومتولي شد حاتم ودخلوا الأوضه وقفلوها..وفوق لما العصابة طلعت ولقيت الباب مقفول ومحدش بيستجيب، قرروا يكسروا الباب..ولما دخلوا ملقوش حد}
_يلا بينا
{ونزلوا ومشوا}
====في بيت أحد الملحدين====
{كان غسان معدي وشاف أخته بتصلي في الأوضه..وفي وقتها شدها وضربها بالقلم}
زهرة(بصويت) :اااااه...انت بتضربني وانا بصلي يا غسان؟؟
غسان(بزعيق) :بذمتك انتي مقتنعه باللي بتعمليه ده؟...مش عايزه تبقي معايا وتفتحي مخك المقفل ده.. ومين أقنعك ان الحركات العبيطه اللي بتعمليها دي تتسمي عبادة؟؟
زهره(بزعيق) :حرام عليك...انت مش هترتاح يا غسان غير لما ربنا يديك قلم قوي يفوقك..استغفر ربنا واطلع من التفكير المتخلف اللي اتحطيت فيه بسبب صُحبتك الفاشله!!
{راح غسان لاوي دراع زهرة لـ ورا، واتكلم بكل غل.. بينما هي كانت بتتألم من شدة الوجع}
غسان(بزعيق) :اللي عايز يعيش هنا..يبقي يعيش علي كيفي وبس ويعمل اللي انا عايزوا..وميخرجش برا طوعي
زهرة(بألم) :مينفعش اللي انت بتعمله ده يا غسان...ده بيت ابويا زي ماهو بيت أبوك..مش معني اننا مش من نفس الأم انك تنسي ان انا أختك الكبيره!!
غسان(بسخرية) :ابوكي وخلاص مات...وأمي وأمك الله يعينهم بعد ما اترموا في مستشفى المجانين..مابقاش في غيري انا وانتي..ولو عايزه تعيشي هنا وتتستري تحت سقف البيت ومتترميش في الشوارع وكلاب السكك تعض فيكي يبقي تسمعي كلامي وبس!!!
===========فـلاش بــاك=========
{بعد ما غسان حب ينتقم من أمه ومرات أبوه وده لإنهم منعوا عنه حبوب الترامادول اللي كان بيتعاطاها، حب ينتقم منهم ويحطلهم في العصير والأكل حبوب هلوسه.. وأدوية تفقدهم عقلهم..ده غير المؤامرات اللي لعبها عليهم عشان يقنعهم انهم فعلاً مجانين..واليوم ده كان راكب معاهم العربية اللي هتوديهم مستشفى الأمراض العقليه}
ليلي(بصريخ) :انا مش مجنونه...حد يقول حاجة..انا مش مجنونه يا غسان...انتوا واخديني وموديني فين؟
أنيسة(بصريخ) :متودونيش مستشفيات...ودوني عند رفعت أبوس أيديكم...يارفعت انت فين؟؟...رفعت!!!!
غسان(بصوت حاد) :شششش خلااص خلصنا..ده المكان اللي يليق بـ سموكم..انا لو أقدر اعمل أكتر من كده كنت عملت بس انا مش عبيط أودي نفسي في داهيه!
ليلي(بإنهيار) :لا يا غسان ده انا أمك...يمكن جيت عليك الفتره اللي فاتت كتير بس من خوفي عليك...لكن ده انت ابني وبحبك مهما يحصل!!
غسان(بـ لامبالاه) :وانا بقي مبحبكيش..مبحبش حد فيكم...مبحبش إلا نفسي وبس!
============================
زهرة(بعصبيه) :هما اللي كانوا السبب في كل اللي انت فيه ده!!
غسان:أمي وأمك؟؟
زهرة:لااا...انا بتكلم علي صحابك...هما اللي جروا رجليك للترامادول اللي كنت بتاخده...وهما برضه السبب في إلحادك ونكرانك لوجود الإله!!
غسان(بزعيق) :متتكلميش في أي حاجة تخصني تاني عشان متزعليش..وخلينا فيكي يا زهرة..هتسمعي كلامي بالحرف هحبك وهحطك في عينيا..انما بقي هتعملي العكس..هتشوفي اللي عمرك ما شوفتيه!!
{وسابها وخرج من الأوضة وهي لسه بتبكي}
======عند بيري======
{أثناء ما كانت سايقة، كانت بتكلم أشرف ابن خالتها}
بيري:عشان خاطري مش عايزه علاء يعرف أي حاجة عن الموضوع ده وانا هقوله أي حاجة!!
أشرف:متخافيش يا بيري انا مش هجيبله سيره عن الموضوع ده زي مااتفقنا، بس هتقوليله ايه؟
بيري:بصراحة مش عارفة..هقوله ان ماما تعبت فجأه وكان لازم اروحلها أشوفها، وهتفق مع ماما بيكون كلامنا زي بعض وإلا هنروح في داهيه!
أشرف:ماشي يا بيري خدي بالك من نفسك
بيري:اوكي يااشرف باي
{وفي الوقت ده فيروز لاحظت}
فيروز:هو انتي بتتفقي مع عمو أشرف علي بابا؟؟
{اتغيرت ملامح بيري، واتوترت زيادة}
بيري:لا يا فيروز، انا مقدرش..بس تيته تعبت فجأه وكان لازم نروح نشوفها..انا بس خايفه أقول لـ باباكي إكمنه مبيحبهاش وممكن يتدايق من زيارتنا ليها!
فيروز:بس اللي حضرتك بتقوليه ده غير اللي كنتي بتقوليه لـ عمو أشرف..هتروحوا في داهيه ليه لو بابا عرف؟
بيري:فيروز!!!...قولنا مليون مره بلاش ندخل في تفاصيل متخصناش..وياريت لو بابا سألك عن أي حاجة قوليله معرفش، أوكي؟؟
فيروز:اوكي يا ماما
=========عند علاء جوز بيري=========
{أثناء ما كان في شغله، لقي التليفون بيرن}
علاء:الو....خليه يدخل...تمام
{دخل راجل بـ بدلة وهو مبتسم..وأول ما علاء شافه قام يسلم عليه}
علاء:يااهلاً وسهلاً بـ نويري باشا، نورت الدنيا كلها
نويري:بنورك يا علاء
علاء:اتفضل ارتاح
نويري:بعتنالها ٣ رجالة في البيوتي سنتر، واعترفت علي أشرف العقاد..ولما روحنا ملقيناهوش في البيت من الواضح انها بلغته بعد ما الرجاله مشوا..ولما راحولها البيت مكنتش موجوده لا هي ولا الشغالة..اذاً في اتصالات دايرة مابينهم، وعارفين خط سيرنا كويس اوي!
علاء:انا لحد دلوقتي مكلمتهاش، وحتي لما أكلمها ولا كأني اعرف حاجة..هي احتمال تكون شايلاهم مع البواب او الشغاله اللي في العمارة..خصوصاً انها عاملة حساب اليوم ده كويس اوي!!
نويري:بواب وشغالة ايه اللي بتتكلم عنهم؟..هي اللي زي دي واثقة في نفسها لما هتثق في الشغاله والبواب وتسلمهم أمانه كبيره زي دي؟..وهي ايه ضمنها اساساً انهم مش هيسرقوها..او هيبيعوها؟
علاء:لا أحب أطمنك...اصل الشغاله اللي عندنا أمينه حبتين تلاته وبقالها معانا كام سنة ومشوفناش منها حاجة وحشه..ممكن تكون بيري لما لقيتها أمينه قالت تشيل معاها المجوهرات، واعتقد دي حاجة متجيش علي بال أي حد!!
نويري:انا عايزك تعرفلي مكان المجوهرات بطريقة غير مباشره، لان المجوهرات لو مرجعتلناش..انا وقتها هستخدم معاها اسلوب صعب اللي لحد دلوقتي مش عايز استخدمه معاها
علاء:متقلقش يا نويري كل شئ تحت السيطره
=========في بيت وجيده=======
{الباب خبط، وهما قاعدين في الصالة}
وجيده:قومي يا نسمه افتحي الباب
نسمه:حاضر
{وبعد ما فتحت لقيت متولي وحاتم، ومعاهم كيس صغير..وأول لما شافتهم قامت}
نسمه:عم متولي؟
وجيده:ده ايه الزياره الحلوه دي، تعالوا
{دخل متولي ووراه حاتم}
وجيده:اقعدوا
متولي:معلش لو جينالكم علي فجأه
وجيده:لا متقولش كده، ده انتوا نورتونا والله
متولي:يكرم أصلك يا ست وجيده
وجيده:اقعدوا
{وبعد ما قعدوا، خرجت مهره من الأوضه واتفاجئت بـ متولي وحاتم..وقربت تسلم عليهم}
مهره:اهلاً
متولي:اهلاً يا مهره
{قعدت مهره علي الأرض جنب أختها}
متولي:بعد أما انتي مشيتي يا ست وجيده..جم تلات رجالة شكلهم مُريب متفهميش دول جايين ليه..ولما قعدت أربط الأحداث ببعض وافتكرت ست بيري وهي بتجري ومستعجله..قولت ااه يبقوا دول تبعها وكانوا جايين عشانها
وجيده:وانت جاي مخصوص عشان الموضوع ده؟
متولي:لا مش ده اللي انا جاي عشانه
حاتم:احنا عرفنا يعني ان آنسه مهره، كانت جايبه مجموع حلو في الثانوية العامة واللي منعها هو يعني اسف موضوع الفلوس
{راحت وجيده داغزه مهره بـ غل في دراعها!!}
مهره(بألم) :ااه
وجيده:وهو ايه اللي فتح الحوار ده مابينكم اساساً؟؟
حاتم:براحة يا حجه وجيده مش كده!!...هي كانت جاية عشانك ولما ملقتكيش...بابا قالها تقعد علي الدكه برا ترتاح شويه، والكلام جاب بعضه وعرفنا..مفيهاش حاجه يعني!
وجيده:الموضوع مش فلوس وبس
حاتم:أمال ايه؟
وجيده:انا محبش بنتي تشتغل برا عند حد..انا مضمنش الناس برا عامله ايه؟..وهل ممكن حد يدايقها وانا بعيد عنها ولالا!!..مهره سنه بالكتير ونجوزها..هي بس لو توافق علي العريس اللي متقدملها كانت ريحتنا وشالت الحِمل من عليا شويه!!
حاتم:ومين قالك انك هترتاحي من حِملها؟؟..بالعكس يوم ما بنتك تيجي تتجوز، هتعوز اللي يجهزها..وانتي هتكفي علي بيتك وعيالك ولا علي جهازها؟...فانا جاي أقولك سيبيها تشتغل عشان تكمل تعليمها وتبقي حاجة ليها مستقبل
وجيده:اما قولي يا حاتم يابني..عرفت توفق مابين شغلك ودراستك؟
حاتم:انا حالياً قاعد من الشغل..بس لما لما كنت بشتغل اه كنت الحمدلله بقدر أوازن مابين الشغل والدراسه، ربنا بيكرم برضه
متولي:بلاش تنشفي دماغك يا ست وجيده..سيبي البنت تشيل الحِمل من عليكي وتساعد معاكي في مصاريف البيت، وبالمره تكمل تعليمها وتبقي حاجة عليها القيمه في المستقبل!!
وجيده:مانت لو مكاني كنت عملت كده وأكتر، ولا كنت خليت بنت من بناتك تشتغل وتتمرمط وانت علي وش الدنيا
متولي:أديكي قولتي علي وش الدنيا، لكن لما تبقي أرملة وعندك تلات عيال..يبقي نزليهم كلهم يشتغلوا ويساعدوا معاكي..وهتتنقلوا نقلة تانيه مكنتوش تحلموا بيها.. ده.....
{َو لسه بيكمل كلامه...حصل ضرب نار قوي جداً...من شدته مكنوش شايفين بعض...وباب الشقه اتكسر والدخان ملي البيت!!...وفي اللي اتضرب بالنار ومات...واللي اتصاب..وفي الوقت ده كان حاتم بيشد حد معاه وهو مش شايف مين!!...وهربوا من بلاكونة المنور لحد ما مشوا بعيد ولسه ضرب النار شغال...لحد ما هربوا بعيد خالص..ولما فاقوا وركزوا..اكتشف حاتم ان اللي معاه هي مُهره...صرخت مُهره وعيطت}
مهره(بصويت) :ماما واخواتي!!!!...مامااااااا
{ولسه حاتم بيبص لقي ناس جاية من بعيد بتضرب عليهم نار وبتطاردهم...فضل يجري هو ومهره لحد مااختفوا من قدامهم ووصلوا علي مينا السفن!!..ومن كتر التعب مُهره وقفت وكانت بتبكي بكاء شديد..وحاتم مصدوم ومش عارف الناس دي مين!!...لحد ما جه راجل من اللي شغالين في المينا}
_انتوا مين؟؟
=======عند بيري========
{بعد ما وصلت كانت قاعدة مع والدتها}
فاتن:وانتي عرفتي علاء انك جايه هنا؟
بيري:لا يا ماما..هبقي أقوله متقلقيش..المهم لو هو سألك في أي حاجة قوليله سبب زيارتنا انك كنتي تعبانه
فاتن:وانتي كمان هتلبسيني توب المرض يابيري وانا سليمه وزي الفل؟
بيري:أكيد مش قصدي يعني يا ماما..بعد الشر عليكي..انا اللي أقصده ان كلامنا يبقي واحد!!
فاتن:طب مش ناوية تقوليلي جايبة فيروز وجايين هنا ليه؟
بيري:بصراحه احنا زعلانين من بعض، بس انا هعملها حجة واقعد عندك كام يوم..ولا انتي مش عايزاني أقعد معاكي؟
فاتن:ومش هعوز ليه؟..ده البيت يساع من الحبايب ألف..عاملة ايه يا فيروز؟
فيروز:الحمدلله
فاتن:يدوم الحمد..قومي يا بيري، ادخلوا الأوضه ارتاحوا
بيري:ماشي، يلا يا فيروز
{وخدت بنتها ودخلوا الأوضه..وفاتن شاكه في بيري}
=========في بيت غسان=======
{رجع البيت بالرشاشات والأسلحه، ومعاه اتنين شايلين جثة في كيس، لحد ما رموها علي الأرض..وغسان طلع فلوس من جيبه واداهالهم}
غسان:كده تمام؟
_تمام
{وخرجوا من الفيلا...ولما زهرة شافت اللي بيحصل قدام عينيها، جات وهي مصدومة}
زهرة(بصوت حاد) :ايه ده؟...دي جثة؟؟؟؟؟
غسان(بزعيق) :وطي صوتك...اه جثه مستغربة ليه؟؟...فاكره الواد اللي اسمه حمزه اللي كان داير يشير في صوري ويشتمني ويحفل عليا هو وزمايله؟؟
{لطمت زهرة علي وشها وصوتت..وقربت من غسان ومسكته من لياقته}
زهرة(بصويت) :يانهارك اسود ومنيل...انت قتلته؟؟؟... قتلته؟؟؟؟؟
غسان:اه ومقتلتهوش هو وبس..لالا..قتلته هو وكل اللي معاه، ماعدا اتنين هربوا، بس انا مش هسيبهم وهفضل وراهم لحد ما اوصلهم
زهرة(بصويت) :حرام عليك...ليه كده....لييييه؟؟؟؟
{راح غسان فاكك ايديها وزقها بعيد عنه، وضربها بالقلم وزقها قصاده بكل قوه}
غسان(بزعيق) :قولتلك متراجعينيش في حاجة!!!...هو انا عايش في بيت أبويا ولا في محكمه؟؟؟...مره انت مصاحب عيال صيع...مره بتشرب زفت..مره مش مآمن بوجود الإله...مره قتلتهم ليه...انتي اللي عايزه مني ايه؟؟؟؟
{وبعد ما طلعوا فوق، زقها جوا الأوضه وقفل عليها بالمفتاح، وبصق علي الأوضه وهو كله عصبيه}
غسان(بزعيق) :عشان تحرمي وتحترمي نفسك، وشغل المحاميين اللي عايشاهولنا في أم البيت ده تبطليه!!!
{وبعد ما نزل تحت..كانت زهرة بتعيط ومش عارفه تهرب من أخوها القاسي ازاي!!...ولا حتي تستنجد بمين!!}
زهرة(بعياط) :وأفوض أمري إلى الله، إن الله بصير بالعباد.
======في مينا السفن عند مُهرة======
{اتعرفوا علي راجل كبير في سن السبعين..وكان بيهديهم}
صالح:هدي نفسك يابنتي، وهو مين دول بس اللي طاردوكم؟؟
حاتم(بحزن شديد) :والله ما اعرف
مهره(بعياط) :أخوياااا حمزه كان حاكيلنا انه يعرف واحد ملحد مش فاكره اسمه..وهو وصحابه ليل نهار يشيروا صورته ويتريقوا عليه..انا وماما نصحناه كتير وقولناله بلاش، دي في الأول والآخر حاجة بينه وبين ربنا، واحنا ملناش دخل فيها..مصدقناش ولا سمع كلامنا
حاتم(بحزن) :مش يمكن دول نفس الناس اللي جم العمارة النهارده؟؟
مهره(بعياط) :مش عارفة!!
صالح:انتوا اللي عليكم تروحوا قسم الشرطة تعملوا محضر باللي حصل وانا جاي معاكم...يلا يا ولاد قوموا
{وخدهم وأثناء ما كانوا رايحين القسم، ونزلوا من التاكسي عدت من جنبهم عربية وضربت مُهره بالنار في كتفها!!.. وقعت علي الأرض وهي بتصرخ...وحاتم و صالح جريوا عليها، لحد ما نقلوها على المستشفى...وهناك كانت مهره في عالم تاني وكل اللي بتردده علي لسانها كلمة ماما}
مهره(بتعب) :مامااا.... ماماااا
صالح(بحزن) :لا حول ولا قوة الا بالله العلي العظيم
{دخل ظابط الشرطه وهو بيبص يمين وشمال}
الظابط:مين فيكم اللي اتعرض لـ ضرب النار، الأستاذه دي صح؟
حاتم:هي...ومن ساعتها واحنا بنتطارد من شخص منعرفوش ومفيش بينا وبينه أي حاجة!!
الظابط:أكيد في...مفيش حاجه بدون أسباب..انت والدهم؟
صالح:لا انا راجل شغال على باب الله في المينا
الظابط:كنت شاهد على الواقعه اللي حصلت؟
صالح:اه حصلت قصاد عيني، انا والاستاذ ده..والناس اللي برا
الظابط:ممكن بطايقكم؟
{راح صالح مطلع بطاقته واداها للظابط يبص فيها}
حاتم(بتردد) :معلش يا باشا...انا ممعايش بطاقه..ولا حتي هي.. احنا اتضرب علينا نار في البيت وجرينا قبل ما يعملوا فينا حاجة...هو يعني شكله حد حاططنا في دماغه
الظابط:مفيش مشاكل..اسمك ايه؟
حاتم(بتردد) :اسمي حاتم متولي عبد العزيز
الظابط:والآنسه؟
حاتم:مش عارف، بس هي اسمها مهره...ده كل اللي انا أعرفه عنها
الظابط:اسمك ايه يا أستاذه؟؟
مهره(بتعب) :مهره يوسف صبري ملاك
الظابط:في عداوة بينك وبين حد يا مهره؟
مهره(بتعب) :اخويا كان...
حاتم:استأذنك بس ياباشا...الآنسه مهره بتقول ان اخوها كان علي خلاف مع واحد ملحد
الظابط:تعرفي حاجه عنه يا مهره؟؟
مهره(بتعب) :لا مش فاكره حاجة
الظابط:ياجماعه لازم شوية معلومات..وإلا كده مش هعرف أفيدكم في اللي حصل.
صالح:طب والعمل ايه بس يا سعاة الباشا؟
الظابط:هاتولي الشاهدين اللي برا
===========عند علاء=========
{رجع العمارة..لقي باب البواب مقفول}
علاء(بينده) :متولي....متولي
{وطلع الموبايل يتصل بيه، مردش..ولسه بيتصل بـ صاحب العمارة..لقاه في وشه}
علاء:كنت لسه هتصل بيك!!
حسن:خير يااستاذ علاء؟
علاء:كنت عايز متولي يمسحلي العربية عشان مسافر بكرا الصبح...مش موجود وبتصل بيه مبيردش!!
حسن(بإستغراب) :غريبة يعني..راح فين ده؟
{وطلع الموبايل يتصل بيه}
علاء:ما قولنالك مشيه وريحنا وهات واحد حِرَكي غيره..ده مبلط 24 ساعه جوا الأوضه!!
حسن:طب استني بس يااستاذ علاء أما نشوف في ايه!!.....مبيردش فعلاً.. هيكون راح فين طيب؟
علاء:طب خلاص مش مهم..تصبح على خير
حسن:وانت من أهله
{وجرب يتصل بيه تاني...وعلاء طلع الشقه..وقلب الدنيا كلها علي المجوهرات ولكنه ملقاش حاجة..لحد ما زهق وقعد علي السرير يفكر}
علاء(بتنهيده) :نفسي أعرف شايلاهم فين!!...بس هي مش عبيطه ولا يمكن تقولي سرها أبداً!!
=========في المستشفي عند مهره========
{بعد مالظابط خد أقوالهم ومشي..طلع صالح ورقه من جيبه وكتب فيها رقمه واداها لـ حاتم}
صالح:خد يا حاتم...انت برضه في مقام عيالي.. ده رقمي عشان لو احتاجت حاجه..وانا ان شاء الله هجيلكم بكرا الصبح عشان هتخرجوا من هنا
حاتم:طب هو مينفعش نخرج النهارده؟..انا سمعت يعني ان الليله هنا بـ ٣ آلاف، وانا مش معايا المبلغ ده
صالح:مش مهم سيبها على ربنا...ده اللي بيعمل خير بيلاقيه يابني، يلا تصبحوا على خير
حاتم:وانت من اهله
{وبعد ما صالح مشي...قعد حاتم علي الكنبه ونام}
=======تاني يوم في بيت بيري======
{نزل علاء وركب العربية..واتجه لـ بيت أشرف السري وأول ما دخل سلم عليه وحضنه}
أشرف:ده ايه النور اللي هل علينا مره واحده ده؟
علاء:حبيبي
{وقعدوا}
أشرف:ايه بيري لسه مكلمتكش لحد دلوقتي وقالتلك انها عند خالتي؟
علاء:ولا رنيت رنه حتي..بس مش فارقه..حسابها معايا تقيل اوي وكل مادا بيتقل عن اللي قبله
أشرف:انتوا الاتنين صعبانين عليا
علاء(بإستغراب) :صعبانين عليك ليه؟
أشرف:كل واحد فيكم بيمثل علي التاني الاستعباط، مع انه عارف كل حاجه!
علاء:مانت معانا ياحلو..ونفس اللي بتقوله ده يتطبق عليك انت كمان..اما قولي عامل ايه في البيت ده كله لواحدك..مبتخافش بالليل يطلعلك عفريت؟ ههههه
أشرف(بيضحك) :ههههه لا مبخافش..سيب الكلام ده لـ عيل صغير، مش ليا انا
علاء:قولي بقي المجوهرات فين؟؟
أشرف:عالطول كده؟
علاء:اه عالطول، ماهو عشان ملفش وأدور عليك كتير..انا في الأساس جاي عشانها
أشرف:بالنص ها
علاء:ماشي يا سيدي بالنص بس خلص
أشرف:من عينيا
{وقام ولف ضهره}
أشرف:طب بس قولي تشرب ايه...ماهو مينفعش تيجي عندي وتمشي كده!!
علاء:مش مهم انا مش جاي أتضايف
{دخل أشرف الأوضه، وطلع المجوهرات، وخرج}
أشرف:انت اتنين، وانا اتنين ونبقي كده مرضيين
علاء:تمام، وريهملي أشوفهم
{وبعد ما اداه المجوهرات، راح مطلع المسدس و رافعه في وشه...تنح أشرف من غدر علاء له}
أشرف(بزعيق) :في ايه يا علاء..بقي بترفع السلاح عليا؟؟
علاء:وآضربك بالنار كمان..احدف الاتنين التانيين.. انجز يلااا
أشرف(بزعيق) :يانصاب يا حرامي..بقي بتخليني أديلك الأمان عشان تلعب بديلك معايا؟؟؟
علاء:لأ و لسه!!
{ورجع بضهره وهو موجه المسدس في وش أشرف، وفتح الباب بإيده لحد ما العصابه دخلت ومسكوا أشرف وضربوه وخدوا منه المجوهرات كلها}
أشرف(بتعب) :دي خيانه
علاء:واللي انت عملته ده مكنش خيانه؟؟
أشرف:ايه اللي انا عملته؟؟
علاء:انت عارف كويس انت عملت ايه..انا مش محتاج اتكلم!!
أشرف:انا أي حاجة عملتها كانت بعلمك، معملتش حاجة من وراك!!
علاء:إلا حاجة واحده...بيري!!
{وضربه بالمسدس وقت-له.. وخدوا جثته وأخفوها}
علاء:اللي حصل ده ميوصلش لأي حد تمام؟
_تمام
=========في المستشفى عند مُهره=======
{جالهم صالح وخدهم ورجعوا الميناء..وقعدهم في بيت صغير..وعرفهم علي مراته "دريه"}
دريه:حمدالله على السلامه يا مهره..انا لما سمعت من صالح اللي حصلك، زعلت اوي عشانك
مهره:شكراً..انا الحمدلله بقيت أحسن
صالح:قومي يا دريه جهزي الأكل
حاتم:لا ياعم صالح احنا مش عايزين أي حاجة..احنا لازم نمشي من هنا مادام احنا متراقبين
صالح:وانت تضمن ياحاتم لما تخرج تفضل سليم؟...مش يمكن اللي بيطاردكم ده..يقرفكم في عيشتكم ويعمل حاجه جديده؟
حاتم(بحزن) :انا نفسي اعرف مين دول واحنا مالنا اصلاً بكل ده!!...حتي ابويا انا مش عارف حصله ايه!!...انا لو كنت فضلت هناك كان زماني ميت..ياعم صالح انا طول عمري ماشي جنب الحيط وعمري ما أذيت حد
صالح:باين عليك طيب وابن حلال..علي العموم خد بالك من نفسك...وخد دي اقبلها هديه مني
{وطلع سلسله شكلها حلو واداهاله}
حاتم(بإستغراب) :ايه دي ياعم صالح؟
صالح:دي سلسلة محمد ابني رحمة الله عليه...من بعد ما مات وانا شايلها في جيبي.. ولما شوفتك حسيتك فيك كتير من ابني...خدها وخليها معاك
{قام حاتم وحضنه}
حاتم:انت طلعتلي من تحت الأرض نجده!!
صالح:خير الناس أنفعهم للناس..بس حط في دماغك مش هتمشوا الليله دي..اصبروا كام يوم لحد ما مهره تخف وتقوم بالسلامة
حاتم:حاضر يا عم صالح..ادعيلنا ربنا يسترها ويعديها علي خير
صالح:ربنا يسترها في طريقكم ويبعد عنكم ولاد الحرام
حاتم:يارب
========في بيت فاتن والدة بيري========
{كانت بتتكلم في الموبايل مع بنتها غاده}
غادة:يعني بيري عندك؟
فاتن:اه عندي.. بس لو سألتك اعملي نفسك مش عارفة..انا شاكه في اختك وقلبي حاسس انها وراها حاجة
غادة:ليه بتقولي كده يا ماما؟؟
فاتن:كلامها مش راكب علي بعضه ومش منطقي..تحسي انها بتضحك علي عيل صغير مش على واحده معدية السبعين سنه...قلبي لما بيحس بحاجة بتطلع صح..وانا عندي احساس ان وراها مصيبه
غادة:خلاص انا عندي فكره نتأكد منها..انا هخلي نبيل يكلم علاء، يعمل يعني انه بيسأل عليه، ونعرف ايه آخر الأخبار
فاتن:جوز أختك مش سهل..و دماغه متكلفه زيها و...
{ولسه بتكمل كلامها لقيت بيري جايه}
فاتن:اه طيب يا غادة...انا ورايا شغل كتير مش فاضية دلوقتي...يلا مع السلامة
{قعدت بيري وهي مركزه في كلامها}
بيري:خير ياماما في حاجة ولا ايه؟
فاتن:لا اختك كانت بتطمن عليا
بيري:اوعي تكوني عرفتيها ان انا قاعده معاكي!!
فاتن:لأ وهي دي تيجي برضه؟...انا مقولتش اي حاجة...بس ياخوفي لا الاقيها جايه تزورني علي فجأه
بيري:وهو في حد بيزور حد علي فجأه ياماما؟...امال التليفونات عملوها ليه؟؟
فاتن:مانتي عارفه ساعات بتطق في دماغهم يجوا علي فجأه...ووقتها هتبقي مشكله لانهم هيشوفوكي ويعرفوا!!
بيري:انتي بتخوفيني ليه طيب؟...طب اروح فين بس؟
فاتن:ارجعي بيتك وإن كان علي خناقك انتي وجوزك..كل البيوت فيها مشاكل...بس الشاطر هو اللي يحل مش يعقد الدنيا!!
بيري:لالا بيتي ايه؟؟.. مش هيحصل دلوقتي، لازم يعرف غلطه الأول وبعدين أفكر اسامحه ولالا!!
{وجات مسدج لـ بيري من رقم غريب وكان محتواها كالتالي}
مجهول: مش ملاحظه ان جوزك متغير معاكي بقاله فتره؟...وأكيد دماغك بتودي وتجيب ومش عارفه توصلي لإجابه...بس انا بقي الاجابه عندي..انا فاعل خير وعايزك تفوقي لنفسك...جوزك متفق مع واحده يعرفها عليكي يتقابلوا الساعة 4 علي العنوان اللي هقولهولك ده..الحقي نفسك واكشفيه علي حقيقته.
{ولما بيري بصيت في الساعة لقيتها ٢...والطريق بياخد ساعتين من عندها لحد المدينه..مكنتش عارفه تعمل ايه تروح ولا متروحش}
بيري(في سرها) :مش يمكن يطلع فخ؟...ولا كمين متدبرلي عشان يلاقوا المجوهرات!!...مش عارفه
{وقامت ودخلت أوضتها، وبعد ما لبست خرجت}
فاتن:رايحه فين يا بنتي؟
بيري:رايحه مشوار و راجعه تاني
فاتن:طيب خدي بالك من نفسك
بيري:حاضر
===========في بيت غسان==========
{كانت زهره لسه محبوسه في الأوضه.. وقاعده علي السرير بتسبح...لحد ما لقيت الباب اتفتح، ولما بصيت في وشه مطلعش أخوها}
زهره(بزعيق) :انت مين وازاي تدخل هنا؟؟
كمال:غسان حالته وحشه، وعنده تشنجات..وانا مش قادر عليه!!
زهره(بصويت) :ماله غسان؟؟؟
{وطلعت تجري وخرجت برا الأوضه ونزلت لقيت غسان بيتشنج علي الأرض}
زهره(بصويت) :مالك؟؟... ماله حصله ايه؟؟
كمال:كان كويس وفجأه حصله كده
زهره:غسان بياخد علاج كل يوم في نفس الميعاد... شكله نسي ياخده النهارده..اجري علي أوضته وهات علبة دوا من أول درج لونها أحمر... بسرعه
{طلع يجري كمال وجاب الدوا...وزهره خدته واديته لـ غسان..وبعد ٥ دقايق كان فاق}
زهره(بعياط) :انت كويس ياغسان؟؟...مخدتش علاجك ليه؟..كنت هتروح مننا!!!
{وسندته هي وكمال وحطوه علي الكنبه}
غسان(بهلوسه) :انا كويس... كويس اوي...هات شريط الترامادول من الجاكت اللي هناك يا كمال
{صرخت زهره في وشه وضربته}
زهره(بصويت) :حرام عليك نفسك بقي...ارحمنا انت بتعمل كده ليه؟؟...ليه بتإذي نفسك وعشان ايه؟؟
{ضربها غسان بالقلم علي وشها، وصرخ فيها}
غسان:احبسها مكان ما جيبتها، يلاااا
كمال(بيشدها) :يلااا
{وشد زهره وخدها وقفل عليها تاني}
زهره(بعياط) :حسبنا الله ونعم الوكيل فيكم
=========في بيت صالح======
{كانت دريه بتأكل مهره..وعلى الأرض كان صالح و حاتم بياكلوا}
مهره(بتعب) :مليش نفس
دريه:عشان خاطري كلي..ده انتي حلوه وزي القمر..حرام والله اللي جرالك ده
مهره:ده نصيب، ولا بد انه يصيبنا مهما هربنا منه
دريه:الأكل هو اللي هيقويكي وهيخليكي فرسه...عايزين نشوفك بصحه وعافيه يا مهره
مهره:تسلميلي يا طنط..انا بجد مش قادره أكمل
صالح:خلاص يا دريه سيبيها علي راحتها، ومنين ما تجوع تاكل تاني
{وبص علي حاتم لقاه مبياكلش}
صالح:مبتاكلش ليه يا حاتم؟؟
حاتم:ومين يجيله نفس بس يا عم صالح
صالح:معلش تعالي علي نفسك وكمل أكل
حاتم:مش هقدر والله...شكرا لـ كرمك
{وقام وقعد}
دريه:خلاص يا ولاد منين ماتجوعوا عرفونا..ده البيت بيتكم انتوا مش أغراب!!
حاتم:تسلمي ياست الكل
==========عند بيري========
{وصلت المكان وكانت داخلة مقلقه..ولما بصيت بعيد لقيت أشرف مرمي علي الأرض وسايح في دمه}
بيري(بصويت) :أشرف...أشرف..مين اللي عمل كده؟؟
{بتبص وراها لقيت الشرطه}
يتبع