رواية ابي بواب وامك خدامه الفصل الثالث3والرابع4بقلم رانيا عماره
{لما بيري لقيت الشرطه وراها..جاتلها حالة صدمة..قرب الظابط منها في صمت..وهي بتترعش من الخوف ولسه مش مستوعبة اللي حصل}
الظابط:محدش يلمس الجثه..سيبوا كل حاجة زي ماهي
{قربوا العساكر وكلبشوا بيري، أثناء ماهي بتترعش ومش قادرة تنطق}
بيري(بعياط) :في ايه...انتوا ليه بتكلبشوني؟..انا معملتش حاجة والله ما عملت حاجة
الظابط:سسسسسس...خدوها علي البوكس
بيري(بعياط) :والله ما قتلته..انا جيت لقيته كده
العسكري(بزعيق) :اخلصي بقي
{وخدوها علي البوكس..و الظابط وطي ناحية الجثه..لحد ما مااتصل بالاسعاف، وجم يشيلوه في كيس وخدوه علي الطب الجنائي...وهناك كان الدكاتره بيتفحصوا الجثث..وواحد منهم لاحظ حركة غريبة جوا المشرحه}
الدكتور(1) :سامع؟
الدكتور(2) :انا مش سامع حاجة!!
{ولما ركزوا اكتشفوا الصوت جاي من كبينه من الكباين اللي في المشرحة..ولما الدكتور قرب وفتح الكباين كلها يبص فيها...اكتشف ان في كبينه منهم فيها جثتين..زادت دقات قلبه ورجع لـ ورا بسرعة}
الدكتور(2) :مالك يا علي؟؟؟
{وقع " علي" على الأرض وفقد النطق..وجرى عليه صاحبه يفوقه.. كان بيرج فيه علي آخره}
الدكتور(2) : عليييييييي
=======في قسم الشرطة======
"كانت بيري قصاد وكيل النيابه بيحقق معاها في الجريمة اللي حصلت..اتكلمت بيري بـ ثبات وقالتله"
بيري:انا مش هتكلم نص كلمة..المحامي بتاعي هو اللي هيتكلم!!
الظابط:وهو فين المحامي؟
بيري:ممكن اتصل بيه؟
الظابط:ممكن.. اديها التليفون
{وبعد ما العسكري اداها الموبايل..كانت بيري بتحاول تفتكر رقم المحامي..ولكنها اتصلت بـ جوزها علاء}
بيري(بعياط) :الحقني انا متهمه في قضية قتل يا علاء...حد كلمني وقالي انك بتخوني في المكان اللي روحته ولقيت أشرف هناك مقتـ.ول ومرمي علي الأرض غرقان في دمه...انا شكلي حد كان عاملي فخ وانا من غبائي وتسرعي وقعت فيه!!
علاء:ياه يابيري قضية قتل مره واحده؟...معقول الكلام اللي بتقوليه ده؟
بيري(بعياط) :تعالي يا علاء وهاتلي المحامي بتاعنا..متتأخرش
علاء:انتي فين طيب؟
{وبعد ما علاء عرف مكان قسم الشرطه راحلها..وبعد ما بيري حكيتلهم كل حاجة}
علاء:متخافيش يا بيري، انا واثق انك مظلومه ومعملتيش أي حاجة!!
بيري(بعياط) :انا فعلاً معملتش حاجه..انا وقعت في الحفره اللي كانت متدبرالي..انا انسانه غبيه!!
علاء:اوعي تقولي كده تاني!!...هو انتي في حد في ذكائك؟...يلا ياسيادة المحامي اتفضل
المحامي :عن اذنكم
{وخدها العسكري ودخلوا ورا المحامي، وبرا كان علاء مبتسم}
الظابط:المتهمه بيري فريد يسري الوالي
بيري:ايوه انا
المحامي:وانا المحامي رفيع نادي الهلالي
الظابط:موكلتك متهمه في قضية قتل أشرف العقاد
المحامي:يافندم موكلتي جالها رسالة علي موبايلها بخيانة زوجها الأستاذ علاء في المكان المحدد..ولما موكلتي راحت هناك اكتشفت قتل أشرف العقاد يعني حد كان قاصد انه يوقعها في الفخ ده
الظابط:جيبتوا موبايلها؟
العسكري:اهو يافندم
{خد الظابط الموبايل وفتح المسدجات..وفي الوقت ده كان المحامي بيبص لـ بيري بصه معناها اتطمني في ايدينا الأدله..ولكن الظابط ملقاش أي حاجة}
الظابط:مفيش حاجه، رسالة ايه دي بقي؟؟
بيري(بإنفعال) :والله العظيم المسدج دي اتبعتتلي فعلاً..يافندم انا مش بكدب في حاجة!!
الظابط(بسخريه) :طب وريني الرساله اللي جاتلك لما حضرتك مظلومه اوي كده
{واداها الموبايل، ولما بيري قلبت الدنيا كلها علي المسدج ملقتهاش}
بيري(مصدومه) :يانهار اسود ومنيل...والله كانت هنا...المسدج جاتلي وانا جيت بناءاً عليها!!
الظابط :للاسف سقط أول دليل..حضرتك هتفضلي مشرفه معانا كام يوم علي ذمة التحقيق
بيري(بعياط) : يا فندم في حاجة غلط!!..والله العظيم في حاجة غلط!!!...ماتقول حاجة يااستاذ رفيع!!
الظابط:متحاوليش يا بيري..انتي كده كده هتقعدي معانا لحد ما الطب الشرعي يبين الأدلة
========في الطب الجنائي=======
{كان الدكتور لسه بيفوق في زميله، لحد ما لقي وشه إزرَق فجأه، وجسمه تلج ومفيهوش أي نبض..ولما حط ايده عليه اكتشف انه اتوفي}
الدكتور(مصدوم) :علي....علي مات؟؟؟...انا مش فاهم حاجة!!... هو ايه اللي بيحصل ده؟؟
{بيبص بعيد لقي شخص مجهول لابس قناع، واقف ورا الباب الزجاج...وموطي راسه ناحية الأرض..قام الدكتور وهو مصدوم وبيترعش ومبرق!!.. كان ماشي ببطئ لحد ما وصل للباب وبعد ما قفل الباب..خرج الشخص المجهول السكينه وفضل يخبطها في الإزاز بـ عنف لحد ما كسره.. ولسه هيدخل ايده..كان بقيت الدكاتره جم وفي لحظه جري واختفي}
الدكتور(٣) :ايه اللي كسر الإزاز كده؟؟
الدكتور(4) (بصويت) :دكتور عليييي...دكتور علي!!!!!
{وجريت عليه وهي بتصرخ}
=======تـاني يـوم في بيت صالح======
{قام حاتم ومهره، وكان الحزن باين عليهم جداً}
صالح:كنتوا خليكم كام يوم كمان...مهره لسه تعبانه!!
حاتم(بحزن) :انا لازم أعرف ابويا وست وجيده وعيالها حصلهم ايه..انا قلبي مش مرتاح ولا دوقت طعم الراحة من ساعة اللي حصل.
دريه:لازم يا حاتم...دي حاجة تحزن القلب والله..علي العموم معاكم رقمنا..لو احتاجتوا اي حاجة..اتصلوا علينا.
صالح:اه يا حاتم، متترددش انك ترن عليا..وفي ساعتها هتلاقيني تحت رجلك
{قرب حاتم وحضنه}
حاتم :ربنا يخليك ياعم صالح، مش عارف أشكرك ازاي..كفاية انك استضفتني في بيتك وانا غريب عنك
صالح:ما غريب إلا الشيطان..وقولتلك انك في مقام عيالي..روح ربنا يسترها في طريقكم
{قربت دريه من مهره وحضنتها}
دريه:مع سلامة الله يا مهره، خد بالك منها يا حاتم
حاتم :حاضر يا أمي
دريه:حلوه منك أمي دي...ربنا يسترها في طريقكم ويبعد عنكم ولاد الحرام
حاتم :يارب
صالح:خدوا بالكم من نفسكم
حاتم :حاضر
{مشي حاتم مع صالح، ووراهم دريه وكانت سانده مهره..ولما طلعوا علي أول الشارع، شاورولهم..وبعدين رجعوا بيتهم تاني..وحاتم ومهره كملوا طريقهم لحد ما وصلوا بيت مهره..كان البيت من أوله لآخره متدمر..ولما مهره شافت شقتهم بالشكل ده صرخت}
مهره(بصويت) :يا مااماااا..ياحبيبتي...يااارب طمني قلبي عليهم
حاتم (بحزن) :معلش يا مهره، اهدي طيب دلوقتي نتطمن عليهم...انا هسأل جيرانكم اهو
مهره(بعياط) :خايفه يا حاتم...وقلبي واجعني اوي عليهم..انا ازاي مشيت وهربت..ياريتني كنت استنيت والرصاصة جات فيا انا وموتتني ولا كانت أذيتهم هما في حاجة!!
{بص لها حاتم بحزن، ولسه بيلف ضهره لقي ضرب نار قوي عليهم..سحب مهره وطلعوا يجروا هربوا وهما مش فاهمين مين اللي بيطاردهم وعشان ايه!!..لحد ما جروا مسافه كبيره ووصلوا الميناء التانيه..ودخلوا يستخبوا جوا سفينه..وكانوا بيطاردوهم وبيدوروا عليهم..وحاتم بيحاول يسكت مهره..وحريصين جداً من انهم يعملوا اي صوت لانهم هيعرفوا مكانهم}
مهره(بعياط) :ماما يا حاتم
حاتم(بصوت واطي) :شششش استني يا مهره!!
{وكان الشخصين اللي بيطاردوهم بيتكلموا برا وحاتم سامع كلامهم}
_انا شوفت حد هناك!!
=لا مش هما.. طب والعمل ايه؟
_مش عارف..طب تعالي نشوف هناك
{ومشوا يدوروا عليهم بالمسدسات..وعدت ساعة في التانيه في التالته..وكانت مهره تعبت وقفلت عينيها وغصب عنها نامت..حتي حاتم نام من كتر الجري}
{وفي بيت فاتن والدة بيري..صحيت علي صوت فيروز وهي بتكلمها وواقفه قصاد السرير}
فيروز:ماما مجاتش لحد دلوقتي يا تيته!!..ممكن تتصلي بيها تعرفي هي مجاتش ليه؟
{قامت فاتن وهي مش مركزه والنوم غالب عليها..وبصيت في الموبايل لقيت الوقت متأخر}
فاتن(بإستغراب) :الساعه ٢ بعد الضهر ولسه مرجعتش؟؟
فيروز:دي حتي مخلتنيش أروح المدرسة..وخدتني ومشينا من البيت وكانت بتكلم عمو أشرف وبتقوله كلام غريب
فاتن:كلام غريب زي ايه يا فيروز؟
فيروز:بتقوله ميقولش حاجه قصاد بابا..وانها هتتفق معاكي انكم انتوا الاتنين تقولوا ان ماما جات عشان انتي تعبانه
فاتن:وهي بتكلم أشرف ابن اختي ليه؟..ولما جوزها يعملها مشكله؟...وسعي يا فيروز
{قامت فاتن، واتصلت بـ بيري ولكنها مكنتش بترد}
فاتن(مدايقه) :انتي كده هتخليني اتصل بـ علاء وانا بصراحة ربنا لا بقبله ولا هو بيقبلني
{واتصلت علي علاء}
فاتن:صباح الخير يا علاء
علاء:صباح النور
فاتن:بيري فين؟...خرجت امبارح بالليل ولحد دلوقتي مرجعتش، وبكلمها مابتردش!
علاء :بنتك متهمه في قضية قتل، مش عارف ناقص مصايب ايه تاني مجابتهالناش..بقي انا مراتي تجرجرني وراها في الأقسام والمحاكم؟...ليه عايزين الناس يقولوا عني ايه؟؟
فاتن(بزعيق) :يعني البنت مسجونه من ليلة امبارح ومحدش يكلمني يعرفني!!..وقضية قتل ايه دي؟؟..انت عبيط ولا بتخرف!!... بنتي انا تقتل؟؟...تلاقيك انت اللي لبستها المصيبه السوده دي!!
علاء(بزعيق) :لا انا مسمحلكيش ياحاجه فاتن...انا متربي وطالع من بيت محترم..الدور والباقي علي بنتك..من الواضح انها خارجة من بيت مفيهوش أخلاق ولا أدب
فاتن(بزعيق) :انا مش هرد عليك..ولا هضيع وقتي معاك..انا عايزه اعرف بيري في قسم ايه..والكلام اللي قولته ده هيكون ليك معايا حساب عسير بعدين
علاء(بزعيق) :طب اسمعي يا حاجه فاتن يالي كنت بعتبرك زي أمي..مادام انا بيتغلط فيا كده..انا مش هريحك ومش هقولك هي فين..ابقي لفي علي كعوب رجليكي علي كل أقسام مصر يمكن ربنا يسهل وتعرفي هي فين...سلام
فاتن(بزعيق) :يابجح يا واطي... قفل السكه في وشي!!
فيروز:انتي كنتي بتكلمي مين يا تيته؟
فاتن:كنت بكلم أبوكي..وحياة ربنا ما مدارية عليه تاني..اهو شوفي تربيته واخلاقه..انا مش هسيبك له تاني..وأمك لازم تطلق منه ده انسان ميتعاشرش
{واتصلت بـ بنتها التانيه غادة}
فاتن(بعياط) :الحقيني يا غادة..احنا في كارثة!!
========في بيت غسان========
{كانت زهرة مزنوقه جداً وعايزه تدخل الحمام...كانت بتخبط علي الباب لحد ما غسان فتحلها}
غسان:عايزه ايه؟؟
زهرة(بتعب) :عايزه أدخل الحمام..تعبانه اوي
غسان:ماتعمليها في أي داهيه ومتوجعيش دماغي!!
زهرة:حرام عليك يا غسان ده انا أختك..ده احنا ملناش غير بعض، انت ليه بتعمل فيا كل ده!!
غسان:مش عارفه بعمل كل ده ليه؟..مشغلتيش دماغك وفكرتي؟..بصي يا زهره لو عايزاني أحلك والخلاف اللي مابينا يخلص..يبقي خليكي في حالك ومتدخليش في أي حاجة تخصني..يعني لا بعمل ايه ولا بقول ايه!!..انتي هنا خرسه وعاميه!!
زهرة(بتعب) :حاضر يا غسان، ممكن أدخل الحمام بقي؟
غسان:ادخلي
{جريت زهره علي الحمام، وكان غسان واقف برا خايف لا تهرب..وكل شويه يخبط عليها}
غسان:خلصتي؟؟
زهرة: لسه
غسان:انجزي عشان مكسرش الباب عليكي
زهرة:كفايه بقي وارحمني!!
{وبعد ما خلصت خرجت..وفجأه اتكعبلت ووقعت علي الأرض، وعيطت.. بص لها غسان بعدم استعنى..وصفر وبص في بقيت أركان المكان ما عدا عندها..لحد ما قامت ووقفت ودخلت الأوضه تاني}
غسان:انا مش هحبسك المره دي..وهعمل حساب للأخوه اللي بينا...بس لو عملتي أي حاجة من الحاجات اللي حذرتك منها، هتندمي اوي!!
{وسابها ومشي..وزهره قعدت علي السرير تبصله بحزن وهو ماشي..مكنتش عارفه هتتصرف ازاي..
كان نفسها تهرب منه ولكن الفرصه مجاتلهاش}
{وعند حاتم و مهره بعد وقت طويل، سمعوا أصوات جايه ناحيتهم..قام حاتم وصحى مهره}
حاتم(بصوت واطي) :مهره اصحي...في ناس برا يا مهره، لازم نتداري وإلا هنروح في داهيه...مهره اصحي!!
{صحيت مهره وقامت، وخدها حاتم وطلعوا علي سلم لحد ما لقوا نفسهم فوق السفينه..ولما بصوا حواليهم لقوا المكان متغير ولقوا نفسهم في دولة جزر القمر}
مهره(مصدومة) :يانهار اسود احنا ايه اللي جابنا هنا؟؟؟...يااارب ايه اللي بيحصلي ده!!!
حاتم(مصدوم) :تعالي بسرعه
{وجروا بعيد لحد ما خرجوا من السفينه، لقوا نفسهم دخلوا علي جزيرة أنجوان..كانوا مصدومين ومش عارفين ايه اللي جابهم هنا؟؟..وازاي!!..وكان التفسير الوحيد ان السفينه اتحركت بالبضاعه للجزيره أثناء نومهم..بصيت مهره لـ حاتم وعيطت}
مهره(بعياط) :احنا لازم نرجع بلدنا تاني وإلا هنم....
{ولسه مهره بتكمل كلامها..سمعوا صوت غليان..ولما بصوا الناحية التانيه اكتشفوا وجود بركان مغطي علي كل الطريق اللي المفروض يعدوا منه!!..بص حاتم يمين وشمال لحد ما لقي ممر صغير تحت جبل..لحد ما خد مهره وقربوا منه}
حاتم:بصي يا مهره..انا هعدي أشوف الطريق ده سالك ولالا...وانتي اقفي هنا متتحركيش..لو لقيته سالك هندهك..ماشي؟
مهره(بحزن) :ماشي
{دخل حاتم بصعوبه من الممر الضيق ..لحد ما وصل لـ كهف أكبر وأوسع..وقتها رجع ينده مهره ولكنه ملقهاش!!}
حاتم(بزعيق) :مهره...مهره...مهره!!!!!
{وخرج يدور عليها، وفجأه حد ضربه علي دماغه وفقد الوعي!}
=======في المستشفى عند وجيده======
{الممرضه دخلت العناية المركزه عند بنتها ، "نسمه"...واكتشفت انها اتوفيت من صوت انذار الجهاز..جريت تنده الدكتور}
الممرضه(بصويت) :الحالة اللي عندنا بتموت يا دكتور
{طلع يجري الدكتور والممرضات..وعملولها إنعاش ولكن كانت اتوفيت..خرج الدكتور من الأوضه والحزن متملكه، وقال للممرضات}
الدكتور:مينفعش أهل الحالة اللي جوا، يعرفوا حاجة عن وفاتها، لحد ما حالتهم الصحيه تتحمل تلقي الخبر
الممرضه:حاضر يا دكتور
الدكتور:شوفوا حد من قرايبها وبلغوه نفس الكلام اللي قولتهولكم
الممرضه :حاضر
{مشي الدكتور، والممرضه راحت تجيب بياناتهم}
======في قسم الشرطة عند بيري=======
{جات فاتن وفيروز وغادة ونبيل...بعد ما عرفوا مكان القسم..سأل نبيل العسكري}
نبيل:لو سمحت فين مكتب وكيل النيابة..حسني شاهين؟
العسكري:آخر الطرقة دي، شمال..المكتب اللي في الوش عالطول
نبيل:شكراً
{وخدهم ووصلوا عند أوضة وكيل النيابة}
نبيل:لو سمحت عايز أقابل وكيل النيابة
العسكري:انت مين؟؟
نبيل:انا محامي، اسمي نبيل محمد
العسكري:ثواني
{ودخل جوا الظابط..وكانت غادة وفاتن علي أعصابهم.. وفاتن بتبكي من خوفها علي بنتها}
فاتن(بعياط) :خايفه اوي علي أختك يا غادة...مانتي مشوفتيش جوزها وهو بيكلمني..كأنه شمتان فيها ومش متأثر باللي جرا
{طبطبت غادة علي كتف فاتن وهي متأثره}
غادة:ان شاء الله خير يا ماما
فاتن:يارب
{خرج العسكري من المكتب}
العسكري:اتفضلوا
نبيل:متشكر
{دخل نبيل ووراه غادة وفاتن وفيروز..ولما وكيل النيابة شافه ابتسم}
وكيل النيابة:يااهلاً وسهلاً بيك يا نبيل
نبيل:اهلاً بحضرتك
فاتن(بإستغراب) :انتوا تعرفوا بعض؟
نبيل:اه معرفه قديمة..المهم طمني يا حسني باشا..ايه موضوع بيري..وايه اللي حصل؟
الظابط:كل الموضوع انها مُتهمه في قضية قتل أشرف العقاد
{صرخت فاتن ولطمت علي وشها}
فاتن(بصويت) :بنتي انا متهمه في قضية قتل؟؟...لا قضية قتل ايه ياباشا...أكيد في سوء تفاهم!!
غادة:استني بس ياماما..كمل حضرتك!
الظابط: و لما استدعينا المحامي الخاص بيها..شرحلنا كل حاجة..ولحد دلوقتي القضيه احنا شغالين عليها
نبيل:بس بيري طول عمرها ماشية جنب الحيط، وعمرنا ما سمعنا عنها أي حاجة
الظابط:الأدلة اللي هتبين
نبيل:طيب أرجوك لو في حاجه ظهرت جديد، بلغنا ضروري
فاتن(بعياط) :عشان خاطري تطمنا عليها..انا قلبي فيه نار من ساعة ما جالي الخبر...عشان خاطر بنتها..أمها لو جرالها حاجة..أبوها هياكلها بإيديه وسنانه
غادة:بس ياماما مالوش لازمة الكلام ده هنا!!
{قام نبيل وبعدين غادة وفاتن}
الظابط:ان شاء الله
نبيل:يلا يا غادة...يلا بينا
{وخدهم وخرجوا، وركبوا العربية}
فيروز(بعياط) :ماما مسجونه؟؟
غادة:لا ياحبيبتي في سوء تفاهم وان شاء الله هيتحل..متخافيش!
=======عـنـد حـاتم=======
{فاق لقي نفسه مربوط هو و مهره..وناس غريبه قاعدين قصادهم}
حريث:من أنتم؟؟
حاتم:انتوا اللي مين؟؟
مهره:انتوا رابطينا كده ليه؟...وايه اللبس الغريب اللي انتوا لابسينه ده!!
ساندرا: نحن قبيلة "السُمَتاء"...من أنتم، ومن أي قبيلة تنتموا؟
حاتم:احنا مصريين وجينا هنا بالغلط، مكنش قصدنا نيجي المكان ده
{بص حريث لـ ساندرا نظرة انبهار، وقال}
حريث:أحب المصريين، سمعنا عنهم كثيراً، لكننا لم نرهم ولا مره!
حاتم:فكونا طيب..انتوا رابطينا كده ليه؟..هنهرب منكم مثلاً؟
حريث: ولمَ لا؟...من المحتمل أن تهربوا، لا شئ مضمون في هذة الدنيا...حاتم سيكون الدرع المحصن لنا في هذا المكان
حاتم:ثواني!!!...انتوا عرفتوا اسمي ازاي؟؟؟
ساندرا:من بطاقتك الشخصية، مثلاً!
حاتم(بتعجب) :مثلاً!!...وانتوا بتبصوا في بطاقتي الشخصية ليه؟؟...ده انا هوديكم في داهيه لو مفكتوناش
{قرب منه حريث ورفع السيف فوق دماغه}
مهره(بصويت) :انتوا هتعملوا فيه ايه؟؟؟
{حاتم قفل عينيه، وابتدت العصبيه تبان علي وشه}
حاتم(بعصبيه) :ابعد السيف ده عني، عشان مزعلكش!!!
ساندرا(ضحكة سخرية) :هاهاهاهاها..كلامك يضحكنا.. هل نعتبر هذا وعيد؟
حاتم(بعصبيه) :اعتبريه اللي تعتبرية..فكوني عشان موريكمش الوش التاني...ده بدل ماتساعدونا، لأ رابطينا..انا مش فاهم هدفكم ايه من ورا اللي بتعملوه ده!!
حريث(بصوت حاد) :افعل ما تشاء..حريث لا يهتز جسده خوفاً من أحد...حريث لا يخاف إلا من نفسه!!
حاتم(بسخريه) :غريب الصراحه اول مره اشوف حد مبيخافش من الناس بس بيخاف من نفسه، لا حلوه وجديده!
{قرب حريث من حاتم، وبص له بصة شر..ولسه هيضربه، راح حاتم فاكك نفسه، وزق حريث وقعه علي الأرض ونزل ضرب فيه، جات من وراه ساندرا عشان ضربه بالسيف، صرخت مهره ونبهته}
مهره(بصويت) :خد بالك يا حاتم
{لفلها حاتم وزقها بـ رجله..وكانوا هما الاتنين عليه!..وكانت مهره بتفرك يمين وشمال وبتحاول تفك نفسها وقت ماكانوا بيتخانقوا..قرب حريث من حاتم وضربه في بطنه بقوته، فصرخ ووقع علي الأرض}
حاتم(بتعب) :اااااه
{وبعدين قام تاني، واتغلب علي تعبه وضرب حريث، وجات من وراه ساندرا عشان تضربه، راح موطي وقالبها فوق حريث..وفجأه مهره فكت نفسها،وشدها حازم وطلعوا يجروا، ووراهم حريث وساندرا بيطاردوهم}
حاتم(بصوت عالي) :طلعولنا من أي داهيه دول!!!
(حريث ورا) :لن نتركهم..فقد أصبحوا اعدائنا من تلك اللحظة!!
{واختفي حاتم ومهره، كان حريث وساندرا هيتجننوا ويوصلولهم}
حريث(بعصبيه) :أين ذهبوا؟؟؟...لقد هربوا من بين ايدينا يا ساندرا..حريث اليوم حزين!!
ساندرا(بعصبيه) :اذهب هناك..وانا سأتفحص تلك المنطقه بمفردي
حريث:اتفقنا أيتها الفتاة
{وكل واحد فيهم راح يدور في حته..وجوا الكهف كان حازم ومهره مستخبين..لحد ما حريث دخل يدور عليهم}
حريث(بصوت عالي) :لن اتركك أيها الوغد الأحمق..سأعيدك بين يدي مره أخري..فقط الصبر.
{ولما قرب منهم، بصيت مهره لحاتم بخوف، وقالتله بصوت واطي}
مهره(بخوف) :هنعمل ايه، ده جاي علينا!!
حاتم(بصوت واطي) :شايفه الفتحه اللي هناك دي؟؟
مهره:ايوه شايفاها
حاتم:هنروحلها بس من غير صوت
مهره:مش هعرف!!
حاتم:حاولي!!
{مشيت مهره قدام حاتم ببطئ شديد..لحد ما دخلوا الفتحه اللي في الكهف ودي اللي دخلتهم علي مكان تاني!..وفجأه حريث سمع صوت حيوان مفترس، وقرر انه يمشي بسرعة، وراح لـ ساندرا عند الشجره}
حريث:نحن في منطقة الخطر يا ساندرا..أستشعر وجود حيوان مفترس هُنا!!
ساندرا:يا إلهي، يجب علينا الهروب سريعاً
حريث:هيا بنا
{وهرب هو وساندرا ورجعوا علي الكوخ بتاعهم..وهناك كان حاتم ومهره سامعين صوت حيوان مفترس مش قادرين يحددوا نوعه ايه!!}
مهره(بخوف) :ده ايه ده؟؟؟
حاتم:شكل في حيوان مفترس هنا..مش عايزك تخافي
{عدي الحيوان وشافوه..كان حيوان ضخم وغريب أول مره يشوفوه ومن الواضح انه مفترس..وفجأه الحيوان ده دخلهم، وصرخت مهره.. زقها حاتم وطلعها برا، وعدي وراها ولسه الحيوان المفترس بيطاردهم..لحد ما خرجوا برا الكهف، وطلعوا على جبل في وسط الغابة...وهناك كانت مهره تعبت، وكان لازم يرتاحوا}
حاتم(بخوف) :حاسه بـ ايه يا مهره؟؟
مهره(بتعب) :انا عايزه انام، تعبت
حاتم:حاضر
{وقطف ورق كتير من الشجره، وعملها مخده تسند دماغها عليها..وقعد جنبها، ولما داق ورق الشجره كان مُر جداً}
حاتم:ايه القرف ده!!
==========في البيوتي سنتر=========
{راح علاء البيوتي سنتر..وطلع الورق من الخزنه..وخده ومشي راح للمحامي بتاعه }
علاء:انا عايز ملكية المحل تتغير من بيري ليا انا
المحامي:بس ده في خطر كبير عليك
علاء:خطر كبير في ايه؟...لو خايف علي نفسك عرفني وأشوف غيرك عادي..متفكرش انها هتقف عليك يعني
المحامي:وهو ده كلام يتقالي يا استاذ علاء؟..ده انا بقالي سنين شغال معاكم..انا بس خايف علي مصلحتك
علاء:المحامي الشاطر اللي عارف ثغرات القانون كويس اوي ميطلعش منه كلام زي دي...ميقولش الكلام ده غير واحد مش متمكن!
المحامي:انا الحمدلله متمكن وبـ شهادة ناس كتير اوي
علاء:مادام متمكن اثبتلي صحة كلامك
المحامي:حاضر
علاء:الحوار ده هيخلص على امتى؟
المحامي:اديني يومين تلاته أدبر الأمور
علاء:علي أقل من مهلك..وعلى رأي المثل اتقل تاخد حاجة نضيفه
المحامي:بالظبط كده
============في بيت غسان==========
{كان في أوضته و بيقرأ كتاب اسمه "وهم الإله"}
غسان:الاله الذي دعا له فولتير وتوماس باين لايمتلك صفات شخصية على الاطلاق مقارنة مع الجانح الذهاني في العهد القديم, رب الالوهيين في القرن الثامن عشر المسمى بعصر النهضة هو اعظم مايمكن ان يكون....
{جات زهرة وقفت قصاد أوضته وسمعت الكلام اللي بيقوله، كانت بتبصله بإحباط ويأس وهي شايفه أخوها بيضيع من ايديها.. وفجأه لقيت كمال في وشها}
كمال:انتي واقفه هنا بتعملي ايه؟.. بتتصنتي عليه؟
زهره(بزعيق) :ايه الكلام المتخلف اللي بتقوله ده؟..وانا برضه هتصنت علي أخويا؟؟...انت اللي بتعمل ايه هنا ومالك رايح جاي ولا كأنه بيت أبوك!!
{خرج غسان من الأوضه وهو مستغرب الزعيق}
غسان:في ايه؟؟
كمال:ولا حاجة يا غسان
غسان(بزعيق) :قولت في ايه!!!
كمال:أختك ست زهرة كانت واقفه قصاد أوضتك، مش عارف بقي كانت واقفه بتعمل ايه!
{قرب غسان من زهرة ومسكها من ايديها بقوه}
غسان(بعصبيه) :كنتي بتعملي ايه قصاد أوضتي؟؟..احنا مش اتفقنا اتفاق..بترجعي عنه ليه؟؟
زهرة(بألم) :ده كداب وبيحور...انا كنت معدية من هنا و بالصدفه شافني
كمال:طب ايه رأيك بقي ان انا مش كداب وهي اللي كدابة!!!
{راح غسان ضارب أخته، وحبسها جوا الأوضه}
زهرة(بصويت) :ارحمني دي مابقتش عيشه، مش كفايه سايب صاحبك رايح جاي في بيتنا ومش عامل أي حرمه للبيت..ده انت لو لاقيني في الشارع هتخاف عليا عن كده!!!...متقفلش عليا كفايه كده!!...انا عمري بيضيع وانا في المكان الحقير ده...مش عايزني هنا.. سيبني وانا هغور في داهيه بعيد...بس ارحمني!!!
{راح كمال مطبطب علي كتف غسان}
كمال:عادي ياعم محصلش حاجة، روق بس
غسان:سيبني دلوقت يا كمال...مانا أصلي عارف..مبيعديش يومين الا وهي عاملالي حوار كبير أكبر من اللي قبله!!
{وسابه ونزل تحت، وصاحبة نزل وراه}
=======في المستشفى======
{بعد ما بلغوا بنت عم "وجيده"...جات وهي مصدومه من الخبر وبتصرخ}
نوال(بصويت) :ياحبايبي...الله يكون في عونك يا وجيده، فقدتي عيالك التلاته دفعه واحده...يا وجيده يابنت عمي ياغاليه
{قابلتها الممرضه ووقفتها}
الممرضه:احنا اتفقنا معاكي متعرفيهمش حاجة لان ده غلط علي حياتهم، لسه الحالات مش مستقره واللي بتعمليه ده بيعرض حياتهم للخطر!!
نوال:حقك عليا من حزني والله، بس حاضر مش هقول حاجه دلوقتي، بس لو سألت أقول ايه؟؟
الممرضه:قولي انهم في العناية المركزه، لعلمك ابنها احنا مش لاقيين جثته، مفيش غير بنتها اللي توفاها الله
نوال:يعني ممكن يطلع حمزة و مهره عايشين؟
الممرضه:ممكن الله اعلم، ربنا قادر على كل شيء
نوال:ونعم بالله
{دخلت نوال في العنبر عند وجيده...كانت وجيده نايمه علي سرير، وفي ناحية تاني متولي..والاتنين متبهدلين بعد اللي حصل}
نوال(بحزن) :ازيك يا وجيده عامله ايه؟
وجيده(بتعب) :الحمدلله
نوال(بحزن) :مصدقتش اللي سمعته، كنت بتمني يطلع حلم
وجيده(بتعب) :الحمدلله علي كل حال
{دخل العنبر "حسن" صاحب العمارة}
حسن:حمدالله على السلامه يا متولي
متولي:الله يسلمك يااستاذ حسن
حسن:حمدالله على سلامتك يا ست وجيده
وجيده(بتعب) :الله يسلمك
حسن:ابنك حاتم فين صحيح؟..عايز اتطمن عليه هو كمان!
متولي(بتعب) :ابني حاتم معرفش مصيره ايه..محدش فيهم جابلي سيرة عنه لحد دلوقتي!
حسن:لو كان حصل حاجة كانوا بلغوك، لكن من الواضح انه نفد بجلده
متولي(بتعب) :بتمني من ربنا يكون ده حصل، وميكونش حصل اللي في دماغي
حسن:ومحدش من عيالك جه يشوفك؟
متولي(بتعب) :الله اعلم وصلهم الخبر ولالا
نوال:بكرا تخفي وتقوميلنا بالسلامة يا وجيده
وجيده(بتعب) :يارب
======عند حاتم ومهره في الغابة======
{كانت مهره نايمه، وفجأه جالها ضيق تنفس، قام حاتم وقومها لحد ما قعدت، وخبطها علي ضهرها وهي بتكح..لحد ما الحاله راحت من عندها}
مهره(بتعب) :اه... كنت هموت
حاتم:سلامتك يا مهره، بقيتي أحسن دلوقتي؟
مهره(بتنهج) :اه الحمدلله...حاتم انا عطشانه وكمان عايزه آكل أي حاجة..انا بجد تعبانه اوي والحاله دي ممكن ترجعلي في أي وقت!
حاتم:هي مش أول مره الحالة دي تجيلك؟
مهره(بتعب) :لا دايماً بتجيلي
حاتم:سلامتك يامهره، طب قومي معايا
مهره(بتعب) :ماشي
{وسندها لحد ما قامت، ومشوا قدام شوية}
حاتم:دلوقتي هنلاقي أي نهر، وهتشربي وهتبقي زي الفل
مهره(بتعب) :ياريت يا حاتم
{وبعد لما وصلوا للنهر، ضحكت مهره هي وحاتم}
مهره:ده طلع في نهر فعلاً!!
حاتم:عيب عليكي
{قربت مهره تشرب، وشاورت لـ حاتم يشرب هو كمان..وبعد لما شربوا وغسلوا وشهم..بيتديروا لقوا حريث وراهم}
الفصل الرابع
حريث:أتظن أنك نجوت؟
{و رفع سيفه علي حاتم، ولسه هيضربه..فلت منه حاتم وهرب هو و مهره..وأثناء ما كانوا بيجروا..لقوا نفسهم علي حافة جبل..بص حاتم يمين وشمال، لقي ممر بعيد..طلع يجري ناحيته ووراه مهره لحد ما اختفوا من قصاد حريث..ومن شدة غِله من ناحيتهم، حدف السيف علي الأرض بكل عصبيه}
حريث:لماذا لا أستطيع الإلحاق بهم؟؟...هل هذا عيب مني أم مهارة منهم؟...كان يجب عليّ أن أُسرع خطواتي!!
{وشد سيفه من علي الأرض، وخده ومشي..وفي أحد الأكواخ المهجوره..كان حاتم ومهره مستخبين من حريث}
مهره(بخوف) :انا حاسه انه هيطلعلنا من أي ناحيه في أي وقت!!
حاتم(بقلق) :بس شكله مشي، انا مش سامع أي صوت!
{وبعد نص ساعة، تعبت مهره وقعدت ترتاح}
مهره:تقدر تقولي هنرجع مصر تاني ازاي؟..كان المفروض رجعنا السفينه!
حاتم:وانتي ايه ضمنك اننا لو كنا فضلنا فيها مكانوش هيلبسونا أي داهيه ويسلمونا للشرطه!
مهره:طب والحل ايه يا حاتم؟
حاتم:مش عارف
{و عند فاتن كانت قاعدة مع غادة وجوزها بعد ما وصلوا البيت...كانت بتعيط علي بنتها، ومحدش فيهم قادر يسكتها}
غادة:ده انتي من ساعة ما جينا وانتي علي نفس الحال!!
نبيل(بتفكير) :وهي بيري هتقتل أشرف ليه؟...هما كان في حاجة مابينهم؟
فاتن(بعياط) :مش عارفه يا نبيل يابني...بس انا بنتي مربياها كويس..بيري متعملش كده!!...في حاجه غلط!
غادة:انا اللي مستغرباه رد فعل علاء!!...هو ازاي واخد الأمور ببساطة كده، لأ وكمان عايز يقلب الترابيزه عليها!!
{عدلت فاتن قعدتها، وقعدت قريب من غادة}
فاتن :ده بقي اللي انا بقوله..علاء ده انا شاكه فيه يكون هو اللي عمل الفيلم ده كله عشان يلبسها مصيبه ويخلص منها!!
غادة:لا ياماما مش للدرجادي..مش عشان كان في مشاكل مابينهم، فا يديه الحق انه يدبرلها مكيده زي دي..انا بقول اللي حصل ده وراه حد من اعدائها
فاتن:ماهو علاء جوزها ده ألد أعدائها...انا بس اللي مجنني، لما انت مبتحبهاش اتجوزتها ليه؟..ده أبوه وأمه كانوا سايبينه علي راحته، والاختيار كان بإيده هو!!
نبيل:اصبروا لما تبان الأدله ووقتها هنقدر نفهم أكتر، خدي طنط ودخليها ترتاح جوا
فاتن:لا أنا هرجع البيت
غادة:لا ياماما هتقعدي معانا لحد ما نشوف ايه هيحصل، متنسيش ان تحركاتنا هتزيد كتير الفتره اللي جايه!!
فاتن:على رأيك يا غادة..طيب انا قايمه ارتاح
{قامت غادة وسندت فاتن، وخدتها ودخلوا الأوضه..وجات مكالمة لـ نبيل}
نبيل:الو....مشرحة الطب الشرعي؟
=====لأول مره في بيت هويدا والدة حاتم======
{كانوا قاعدين هي وجوزها علي الكنبه قصاد البيت الفلاحي في الهوا، بيشربوا الشاي}
هويدا:مين اللي جال يا سميح إن انا جلبي جاسي؟
سميح:وهو ده كلامي آني؟.. ده كلام ابنك حاتم
هويدا:وانت شوفت حاتم فين؟
سميح:آخر مره جه عندنا، جال الكلام ده لما كنا جاعدين مع بعض فوق السطوح
هويدا:إخص عليك يا حاتم، بجى آني جلبي جاسي؟؟...ليه شوفت مني ايه غير كل خير!!
سميح:يمكن عشان لا بتسألي عنه ولا بتهتمي لأمره، كل فين وفين علي ما يجي على بالك يا هويدا!!
هويدا:ما درياش مين اللي عفش ومين اللي حلو..المهم يا سميح الله يباركلك، رن على نسمه بتي وجولها تعدي عليا بعد العشا عشان رايحة مشوار.
{وقامت وقفت}
سميح:ماشي يا هويدا
{ولسه هتدخل جوا، جات نسمه وهي بتعيط}
نسمه(بعياط) :أبويا مرمي في المستشفى ياماما..بيقولوا ضربوا عليه نار هو والست وجيده اللي شغاله في نفس العمارة..دول ناس لا عندهم ضمير ولا رحمة..أبويا أذاهم في ايه عشان يعملوا فيه كل ده!!
هويدا(بإستغراب) :وانتي چيبتي الكلام ده منين يا نسمه؟؟
نسمه(بعياط) :عبدالله عدي عليه في العمارة..والناس قالتله اللي حصل!!
هويدا(بصويت) :وأخوكي فين؟؟؟
نسمه(بعياط) :محدش جابلي سيره عنه..وكلمت ضحي وقولتلها وزمانها جاية هي كمان
هويدا(بصويت) :يامصيبتي لا يكون أخوكي چرالة حاچة هو التاني!!
نسمه(بعياط) :ربنا يسترها عليهم، ادخلي البسي بسرعة على ما ضحي تيجي!!
{طلعت تجري هويدا جوا وهي بتصرخ من خوفها علي ابنها حاتم، قام سميح وقال لـ نسمة}
سميح:ربنا يجيب العواقب سليمه
نسمه(بعياط) :يارب ياعم سميح ياارب
========في مستشفى الطب الشرعي=========
{جه دكتور "جاسر" بدل الدكتور اللي مات، والدكتور التاني راح يدفن زميلة الدكتور بعد ما اتأكدوا انه اتوفي..وكان حاطط جثة أشرف قدامه، وبيشرحها عشان يعرف سبب الوفاه...مكنش في غيره في المشرحه..وفجأه النور طفي واشتغل وهكذا علي هذا الحال..قرب الدكتور من مكبس الكهربا وضغط عليه، وفجأه الكهربا فصلت تماماً بالرغم من انها مينفعش تفصل وده لإن الجثث اللي في التلاجات هتبدأ في التعفن..بص الدكتور يمين وشمال، كان متوتر من شئ مجهول هو حاسه..وبعد مرور دقيقه كانت الكهربا رجعت، وفجأه الدكتور سمع صوت حاجة بتتحرك في أحد التلاجات الموجوده..ولما فتحهم واحده واحده...ووصل عند واحدة معينة، اكتشف ان فيها جثة أشرف اللي كانت لسه محطوطه قدامه برا...تنح واترعش..وحاجه شدته جوا التلاجه بدون إرادته ولما دخل جوا،كان بيخبط بعزم قوته ومحدش استجابلة}
======بالليل في الكوخ عند حاتم ومهره======
{كانت مهرة هي بس اللي صاحية، وحاتم نايم بعيد في زاوية تانيه..قربت مهره وندهته}
مهرة:حاتم....حاتم....اصحي...احنا هنفضل هنا ولا ايه... انا مش شايفه حاجة...حاتم اصحي!!
{صحى حاتم وقام والنوم غالب عليه و مش شايف أي حاجة}
حاتم: معقول الدنيا ليلت علينا...هي الساعة كام دلوقتي؟
مهره:وانا ايه عرفني!!...وبعدين احنا هنفضل هنا طول حياتنا ولا ايه؟؟...انا عايزه أرجع لـ ماما واخواتي، عايزه اتطمن عليهم..انا مش مستعده أقضي حياتي كلها هنا!!
{وابتدت تعيط}
حاتم(متأثر) :مش انتي لواحدك يا مهره اللي عايزه ترجعي لأهلك..انا زيك بالظبط..عايز أرجع لـ بابا وبقيت أهلي..بس أديكي شوفتي كل مانقرب من البيت ايه اللي بيحصل!!..والمشكله يا مهره ان انا مش عارف مين اللي بيعمل كده وعشان ايه!!
مهره(بعياط) :يلا يا حاتم نحاول ونشوف مخرج وكل واحد فينا يرجع لـ حياته الطبيعية...انا عمري ما كنت أتخيل إني أبعد عن ماما واخواتي في يوم من الايام...انا حاسة ان ماما واخواتي حصلهم حاجة!!...والمشكله ان انا مش عارفة ارتاح..لا قادره أقرب منهم واتطمن عليهم...ولا قادره أعيش بعيد عنهم!!
حاتم:يلا بينا يا مهره..هنرجع تاني وأمرنا لله..يلا
{وخد مهره وخرجوا برا الكوخ، وفضلوا ماشيين علي ضوء القمر...لحد ما وصلوا لـ طريق..وشاوروا لـ عربية وركبوها}
_إلي أين أنتم ذاهبين؟
{حاتم مكنش عارف هيقوله ايه..ولكن أكيد جزر القمر فيها مدينة}
حاتم:ودينا مدينة قريبة من هنا
مهره:هو احنا في بلد ايه؟
_أنتم في جزر القمر
حاتم ومهره(بإستغراب) :جزر القمر؟؟؟
_نعم، جزر القمر، وبالتحديد في أنجوان
{وبعدين بص لهم السواق بإستغراب}
_هل أنتم مصريين؟
مهره:ايوه فعلاً احنا مصريين، عرفت منين؟
_المصريون يتحدثون بهذة اللغه
حاتم:وانت اتعاملت مع مصريين فين قبل كده؟
{ضحك السواق وقالهم}
_زوجتي مصرية
{وهنا ابتسم حاتم، وحس ان لسه في أمل ممكن يرجعهم لـ مصر...وبعد ما وصلوا المدينة..نزلهم في شارع عام}
_أين الـ١٠٠٠ فرنك؟
حاتم(بإستغراب) :١٠٠٠ فرنك؟...ايه الفرنك ده؟؟
_عُملتنا الفرنك القمري..هيا أسرع وأعطني ١٠٠٠ فرنك
مهره:احنا تايهين هنا وممعاناش فلوس..ممكن تساعدنا؟
{نزل السواق من العربية وهو متعصب}
_كنت أشعر من داخلي بأنكم اثنين لصوص..من أنتم؟.. انطقم قبل أن أتصل بالشرطة وتذهبون للجحيم!!!
حاتم(بزعيق) :بقولك ايه ملكش دعوه بيها ومتعليش صوتك..احنا لا حرامية ولا زفت..احنا جينا البلد دي بالغلط ومش عارفين نرجع بلدنا!!!
_هل هي زوجتك؟...أم اختطفتها؟
حاتم(بزعيق) :احترم نفسك، مش عشان احنا هنا متغربين ومش عارفين حاجة، فا ده يديك الحق تتعدي حدودك معانا!!
{وقرب منه حاتم وهو متعصب وناوي للخناقه، شدته مهره بعيد وقالت للسواق}
مهره(بتردد) :خلاص يا حاتم مالوش داعي المشاكل، احنا لو حرامية زي مابتقول كنا هربنا، لكن احنا مستعدين نتحمل نتيجة غلطنا...احنا مش طالبين منك حاجة غير المساعده.
حاتم:عندك مكان نقعد فيه ولا لا؟؟
_من الواضح أنني تسرعت في الحكم عليكم، يبدو أنكم بسطاء من طبقة فقيره..على العموم سوف أساعدكم وأخرج لكم الصفات الحسنة التي بداخلي..ماذا تريدون؟
حاتم:احنا عايزين مكان نقعد فيه، وعايزين شغل
_الوقت متأخر الآن للعمل..سوف آخذكم معي وأستضيفكم في منزلي يوم أو اثنين فاأكثر
حاتم:شكراً
_العفو، اركبوا السيارة
{ورجعوا ركبوا العربية تاني، وخدهم واتجه لـ بيته}
=========في المستشفى عند متولي========
{راحت هويدا وبناتها وجوزها سميح وجوز بنتها عبدالله..وسألوا الممرضة}
الممرضة(بتردد) :هو الحاج متولي حالتة مش مستقره..بس ابنه يعني....
هويدا(بصويت) :ابني ماله؟؟؟؟
الممرضه(بتردد) :مش لاقيين جثته هو واتنين كمان
{صرخت هويدا هي وبناتها واترميت علي الأرض}
هويدا(بصويت) :ابني حاتم...يالهوووووي
نسمه(بصويت) :أخويا اتقتل؟؟؟...اتقتل وجثته اختفت؟؟؟...لاااااا...لاااااا...لااااا
عبدالله:انتي متأكده من اللي بتقوليه ده؟؟
الممرضه(بحزن) :شدوا حيلكم
{وسابتهم ومشيت، وهويدا وبناتها بيصرخوا}
سميح:بيني وبينك كنت حاسس
عبدالله(مصدوم) :طب ازاي طيب؟...طب واللي عمل كده استفاد ايه؟..هما كان في مشاكل بينهم وبين حد؟
سميح:اه زمانهم كانوا عاملين مشاكل مع طوب الأرض..أصلك ياعبدالله متعرفش متولي قدي، آني اعرفه من قبلك، وبجولك اه زمانه كان عليه تار..أمال ساب البلد عندنا وهرب في مصر ليه؟..واهو شوف سبحان الله، قدره راحله لغاية عنده.
هويدا(بصويت) :يا حااتم...اخوكوا ماااات وجثته اختفت، حسبنا الله ونعم الوكيل في الظالم...حق ابني آني مش هسيبه ابداً
عبدالله:متخليش حماتي تدخل ويايا جوا، انا هدخل لـ حمايا وأشوفه وهخرج، وقولها بلاش صويت.
{وسابهم وراح أوضة متولي...قرب سميح من هويدا وهي بتصرخ جنب بناتها}
سميح(بزعيق) :كفاياكي صويت، الناس كلها خدت بالها...كفايه!!
هويدا(بصويت) :ماهو لو كان ابنك، كان زمانك بتصرخ معايا..لكن مش ابنك فا حقك تقول كده وزيادة كمان
سميح(بزعيق) :ولو كان ابني عمري مااعمل اللي بتعمليه ده...ده شغل نسوان..مفيش راجل يصوت!!
ضحي(بصويت) :مانت لو كنت بتخلف يا جوز أمي، مكنش جرا اللي جرا!!
{نزلت الكلمه على سميح زي السكينة..ومن شدة جرحها في قلبة..محسش بنفسه غير وهو بيضرب ضحي}
سميح(بزعيق) :لو أبوكي اللي متلقح جوا معرفش يربيكي، آني هربيكي وبطريقتي..يا سافلة يا قليلة الرباية
ضحي(بصويت) :ايه القسوه اللي فيك دي..ياساتر من جبروتك!!!
هويدا(بصويت) :ابعد عنها، هتبجى النار نارين....هتبجى النار ناريين يا سميح!!!
{وكانت بتلطم من حزنها علي ابنها، وبنتها ضحي...وجوا في العنبر، كان متولي مش حاسس بالدنيا، وواقف قصاد منه عبدالله}
عبدالله:حمدالله على السلامه يا حمايا
متولي(بتعب) :الله يسلمك..حاتم ابني فين؟
عبدالله(بتردد) :حاتم؟؟...حاتم كويس..هو بس كا...
متولي(بيقاطعه) :حاتم مش كويس وانتوا مخبين عليا
عبدالله(بتردد) :حاتم تعيش انت
متولي(بصويت) :حاتم ابني مات؟؟...حاتم...حاتم...هاتولي حاتم.... حاتم
{وكان بيحاول يقوم من علي السرير في عز تعبه، ولكن عبدالله ثبته في مكانه وقعد جنبه}
عبدالله:حاتم مش لاقيين جثته يا حمايا..الله أعلم عايش ولا ميت..بس كلامهم بيقول انه توفاه الله
وجيده(بعياط) :حاتم مات؟؟؟....وعيالي؟؟؟..حمزه ونسمه ومهره فين؟؟؟
{لف عبدالله وشه الناحية التانية}
عبدالله:محدش جابلنا سيرة عنهم
وجيده(بصويت) :يبقوا زيه....يبقي جرالهم اللي جراله...ياولااااادي...عيالي التلاته ملهمش غيري...دول غلابة زي وطيبين!!!
متولي(بصريخ) :حاااااتم!!!!
==========في مستشفي الطب الشرعي=======
{جه اتنين دكاترة جوا المشرحة}
_سايب موبايله هنا، متعرفش راح فين!!
=يمكن راح يصلي؟
_وهو في حد بيصلي نص ساعة، لا يكون كبر دماغة و روح
=أكيد مش هيروح يعني ويسيب موبايله هنا...طب بقولك انا عايز أتابع قضية قتل أشرف العقاد معاة...انا مش عارف هو وصل لفين!!
_ماهو لو يرد..علي العموم الجثه هناك...انت عارف مكانها؟
=اه عارف
{وراح يفتح التلاجة، لقي الدكتور جوا متجمد وهو مفتح عينيه الاتنين..وجثة أشرف مش موجودة!!...ولما أصابته الصدمة..و زميلة التاني لاحظ صمته، حس إن في حاجة}
_ايه يا رجب مالك؟؟....في ايه؟؟
{وقرب ولما بص اتصدم، وصرخ}
============في قسم الشرطة============
{كان الظابط قاعد علي مكتبه، ورن التليفون الأرضي}
الظابط:ايوه معاك....ايه الجثة اختفت؟؟...واتنين دكاترة اتوفوا؟؟؟...يعني ايه!!!!!!... طيب انا جاي!!
{وبعد ما الظابط قفل...لبس الجاكت و ركب عربيته واتجه لـ مستشفى الطب الشرعي..وهناك كان مجموعة دكاتره واقفين}
الظابط:ايه اللي حصل بالتفصيل؟؟؟
============عند حاتم ومهره============
{نزلوا من التاكسي، ودخلوا منطقة سكنيه مع السواق... كان مكان ضخم مليان خيم فوق الجبل...وفي ناس قاعده قصاد خيمها مولعه النار وبتشوي، وفي اللي بيطبخ...كان حاتم ومهره ماشيين ورا السواق مستعجبين المكان اللي أول مره في حياتهم يشوفوه!..لحد ما وصلوا عند خيمة}
حاتم:واحنا هنقعد هنا؟؟
رامز:هما حل من الاثنين ليس لهم ثالث...إما أن تجلسوا معنا في نفس الخيمة..أو تشتروا خيمة جديده وتنصبوها في قطعة أرض فارغة!!
حاتم:ودي تعملها كام؟
رامز:٥٠٠ فرنك تقريباً..فهي في زيادة أو نقصان، لا أعلم
حاتم:بس احنا ممعاناش فلوس دلوقتي
رامز:إذاً سنتجه إلي الحل الأول وهو أنكم ستجلسون معنا إلى حين يأتي الحل..هيا تفضلوا!!
{دخل رامز للخيمة ووراه حاتم ومهره، جات ست منتقبة من بعيد، وقربت من مهره وحضنتها}
دينا:لما رامز بلغني في التليفون انكم مصريين مصدقتش نفسي..وقولت أخيراً هيبقي معايا مصريين هنا!!
مهره:احنا كمان مصدقناش لما قالنا انه متجوز مصرية
دينا:نورتوا الدنيا كلها، يا اهلاً وسهلاً...اتفضلوا
{وخدتهم علي الشِلَت وقعدوا، وصبت الشاي في الكوبايات}
دينا:قولولي بقي جيتوا جزر القمر ازاي؟...جايين في شغل صح؟
حاتم:احنا جينا هنا بالغلط، حتي عشان نرجع مصر مش عارفين هنعملها ازاي دي!!
دينا:ازاي جيتوا بالغلط؟
مهره:كان في حد بيطاردنا واستخبينا منه في السفينة، وللاسف اتحركت واحنا مش حاسيين بـ ده لحد أما لاقينا نفسنا هنا!!
دينا:مش شايفه في أيديكم دبل يعني، انتوا اخوات؟
حاتم:لا احنا مش اخوات.. بس مهره بعتبرها زي أختي
رامز:وما الذي يربط بينكم، هل هي صلة قرابة؟
حاتم:خالص ولا قرايب حتي...كل الموضوع ان والدة مهره شغاله في نفس العمارة اللي والدي شغال فيها
رامز:آهاااا...قل أنكم جيران
حاتم:بالظبط كده جيران
دينا:بس نورتونا
مهره:ده بنورك...بس أسفه في سؤالي يعني...هو احنا كلنا هنبات هنا؟؟
دينا(بتضحك) :لا كلنا مش هنبات هنا...زي مانتي شايفه..الخيمه وراها خيمة تانيه بندخلها من الباب ده... انا وانتي هننام جوا..ورامز والأستاذ ده هيباتوا هنا...صحيح متعرفناش بيكم!
مهره:انا مهره وده حاتم
دينا:وانا دينا...و ده رامز جوزي
مهره:اتشرفت بمعرفتكم
دينا:وانا كمان...قوليلي بقي بقالكم قد ايه هنا؟
مهره:بقالنا يومين
دينا:يبقى أكيد مكلتوش، انا هحضرلكم أكل و راجعه، خدوا راحتكم ده بيتكم
مهره:شكرا يا دينا مش عارفه أقولك ايه، ربنا يكرمك زي ما بتكرمينا في بيتك!!
دينا:الشكر لله وحده
{ودخلت جوا تجهز الأكل، دخلت بنت في عمر العشرين، وسلمت عليهم كلهم}
رامز:هذة نانيس أخت دينا زوجتي
مهره:اهلاً بيكي
نانيس:اهلاً بيكم انتوا في بيتنا المتواضع
{وسابتهم ودخلت جوا لـ أختها دينا..وكانت مهره محرجه، وباصه في الأرض}
رامز:ومن أي محافظة تنتموا؟
=========في مستشفى الطب الشرعي=======
{كان الظابط لسه واقف مع الدكاترة في أوضة المراقبة..وبيراجعوا الكاميرات}
الظابط:الفيديو مفيهوش أي حاجة تثبت الحقيقه اللي احنا عايزين نوصلها!!...ازاي هو طول الفيديو قاعد علي الكرسي ومتحركش!!.. أكيد في خلل في أجهزة المراقبة!
الدكتور:يا سيادة الوكيل..انا بقالي ٥ سنين شغال هنا وبيعدي عليا حالات أشكال وألوان وطُرق قـتـ.ل مختلفة..أول مره أشوف حاجة بتحصل زي دي..يافندم في شخص مجهول هنا في المستشفى وبيظهر لكل واحد فينا شويه..أكيد هو اللي ورا كل ده
{راح الظابط مطلع موبايله وعمل مكالمة}
الظابط:عايز البوكس بالعساكر يوصل في مستشفي الطب الشرعي، انا بأمركم بتفتيش المستشفى بأكملها... حالاً تكونوا عندي...سلام!!
{وبعد ما قفل}
الظابط:محدش يحرك أي حاجة، احنا هنفتش المستشفى من أولها لآخرها لحد مانعرف ايه اللي بيحصل!
{وبعد ما البوكس وصل ب العساكر، وفتشوا المستشفى}
العسكري:مفيش حاجة يافندم
الظابط:انتوا فتشتوا المستشفى حته حته؟؟؟
العسكري:ايوه يافندم، مسيبناش مكان مفتشناهوش، حتي سراير المرضي بصينا تحتها
الظابط(بإستغراب) :يبقي هرب!!...رجعولي الكاميرات
=========تـانـي يـوم، في بيت غسان========
{خرجت زهرة باللبس الأسود، وقبل ما تفتح باب الفيلا وتخرج، لقيت غسان نازل من علي السلم}
غسان(بصوت حاد) :رايحة فين؟؟؟؟
زهرة:رايحة مشوار
غسان:مشوار ايه ده؟؟
زهرة:رايحة أعزي في ولاد الحاجة وجيده...واحدة اتوفيت، واتنين اختفوا..حتي عم متولي، ابنه مختفي
غسان:مين الناس دي؟...وتعرفيهم منين؟
زهرة:مهره تبقي صاحبتي.. بنت الحاجة وجيده
{شدها غسان بعنف من ايديها}
غسان:انتي أول مره تقوليلي ان ليكي صاحبة بالاسم ده!!!
زهرة(بألم) :اااه...وانت مدايق اوي كده ليه؟؟؟
{وبصتله في وشه بنظرة غريبه، فا سابها}
غسان:مفيش مرواح في حتة واقعدي هنا
زهرة(بزعيق) :في ايه، هو انت احتكرتني لنفسك؟؟؟
غسان(بزعيق) :اه احتكرتك لنفسي، وانجزي عشان متندميش
{وزقها من دماغها بقوه، وفضل واقف مستنيها تطلع، جريت زهره من كتر الغل اللي جواها، ومسكت كتاب من كتب الإلحاد بتوعه}
زهره(بصوت حاد) :هقطعهم يا غسان!!...لو مسيبتنيش أمشي هقطعهم!!
غسان(بزعيق) :قبل ماتقطعيهم، هكون قتـ.لـ.تك
زهرة(بصوت حاد) :متقدرش لانك جبان
غسان(بزعيق) :ابعدي عن وشي، متخليش الشيطان اللي جوايا يندمك ندم كبير انتي مش قده!!
زهرة(بزعيق) :كويس انك اعترفت بحاجة زي دي..بس في معلومة غلط انت قولتها.. الشيطان مش جواك...لأ..الشيطان ده انت... انت الشيطان نفسه يا غسان، شيطان ماشي علي الأرض وبيإذي في كل اللي حواليه، لو مسيبتنيش أمشي..انا اللي هندمك ندم كبير اوي!!
{راح غسان شاددها من هدومها بكل غل، لحد ما قربها ناحيته وابتدي يتحول}
غسان(بزعيق) :انا مبتهددش..وأعلي ما في خيلك اركبيه يا زهرة..ده انا لسه هخلي الجاي سواد فوق دماغك!!!!!
زهرة(بعياط) :انا عمري ما شوفت أخ بيعمل كل ده مع أخته، أمال لو مكنتش أختك كنت عملت ايه!!!
غسان(بزعيق) :كنت رميتك في الشارع، يلا غووري!!
{وزقها علي السلم، فوقعت وهي بتبكي، لحد ما قامت وطلعت فوق دخلت أوضتها وقفلت علي نفسها}
=============فـي الـعـزاء=========
{كان أهل متولي وأهل وجيده متجمعين}
_البقاء لله
عبدالله:ونعم بالله
=البقية في حياتك
سميح:حياتك الباقيه، شكر الله سعيكم
{وعند الستات كانت هويدا وبناتها بيعيطوا}
هويدا(بعياط) :ياحبيبي يا حاتم..جصرت معاك آني عارفة...شكلك كنت زعلان مني اوي اوي، ولما فاض بيك جولت تحكي لـ سميح چوزي...فاكرني جاسية عليك وجلبي جوي من ناحيتك..متعرفش انك جلبي وروحي وعَجلي..لو كنت أعرف انها آخر مره هشوفك فيها مكنتش سيبتك ياغالي، كنت تنيتني چنبك، لحد ما أشبع منك..مع إن الضنا مبيتشبعش منه ابداً..بس كنت مليت عيني منك شوية ياحبيبي!
_ربنا يرحمه ويغفرله، ويغفر للشباب التلاته اللي راحوا دفعة واحدة ومنه لله اللي كان السبب في حرقة قلب أمهم..دي زمانها ماتت فيها، مقدرتش تستحمل!
نسمة(بعياط) :عاش غلبان ومات غلبان، كان نفسه يبقي حاجة كويسه ويرفع راسنا وسط الناس
=احتسبوه من الشهداء، والشهداء ليهم منزلة عظيمة عند ربنا
{يجي من ورا شجرة شخص مجهول بيبص عليهم}
_البقاء لله
عبدالله:ونعم بالله
===========في الخيمة عند مهرة =========
{صحيت مهره من النوم، ملقتش حد خالص..لحد ما خرجت من الخيمة وفضلت تدور عليهم}
مهرة:حاتم!!
{لحد ما لقيتهم فارشين بعيد وقاعدين في الهواء الطلق..ولما قربت منهم، ابتسملها حاتم}
مهرة:صباح الخير
كلهم:صباح النور
دينا:نمتي كويس يا مُهره؟
مهره:اه الحمدلله
{وقعدت جنبهم}
رامز:الهواء يرد الروح، ما رأيك يا مهره؟
مهره: حلو...كويس
دينا:صحيح كنت عايزه آخد رأيك...اعمل أكل ايه النهاردة مشاكيك والحلو مكاترا...ولا اعمل لانجوست ولا أعمل أكل مصري؟
مهره:ايه الوصفات الغريبه دي؟..هو ده أكل؟؟
دينا:هههه أمال انا بقول ايه؟
مهره:مش عارفه يعني بس ده بيتك وانتي حره، اعملي اللي تعمليه!
رامز:وهنا يوجد كل شئ بالرغم من بساطة المكان!
حاتم(بإستغراب) :طب ماتوصفلي عندكم ايه!
رامز:يوجد أجهزة الألعاب الرياضيه لبناء جسد مثالي، ويوجد مطاعم ولكنها بعيدة عن هنا ولكن ليست بعيدة كثيراً..ويوجد أسواق للفاكهه والخضروات وأسواق للملابس وأسواق للحوم.
حاتم(منبهر) :حلو ده..عجبني!!..ياريت توريني الجيم، انا محتاجه ضروري!!
رامز:حسناً، قم يا رجل
{قام حاتم ومشى ورا رامز، لحد ما وصلوا لأعلي الجبل، ولما بص ملقاش أجهزه!}
حاتم :وعمال تقولي أجهزه وبتاع...هو فين الجيم ده؟؟
رامز:أمامك هنا!!
حاتم:أمامي فين؟..انا مش شايف حاجة!!
{وطي رامز، واداله أدوات غريبه مصنوعه من الأسمنت والبلاستيك..وشيله واحده!}
حاتم(بإستغراب) :هي دي الأجهزه يا رامز؟؟؟
رامز:نعم، ها هي..لعلمك يا حاتم.. أتري الرجل الذي يقف بعيداً علي الجبل؟
حاتم:اه شايفه ماله؟
رامز:جسده متناسق، ومفتول العضلات، أتعلم انه كان يستخدم هذه الأدوات التي لم تنال إعجابك بعد؟
حاتم:يعني انت عايز تفهمني، ان الراجل اللي هناك ده اللي قد العمارة اللي انا كنت ساكن فيها...كان بيلعب بشوية الزلط دول؟؟
رامز(بعصبية) :لاااا...هذا ليس بـ زلط...هيا نجرب، سأمسك واحدة وأقوم يإلقائها في وجهك وأنظر ماذا سيحدث من قوتها!!!
حاتم(بصوت عالي) :انت عبيط ياعم انت ولا ايه؟؟.. انت جايبني هنا عشان تجرب فيا، ويا صابت يا خابت بقي!!..انا كنت حاسس انك هتودينا في داهيه
رامز:جرب وآمسكهم الآن..هيا!!
{واداله الأدوات في ايده ولما حاتم شالهم اكتشف انهم تقال جداً}
حاتم:تصدق طلع عندك حق!!...دول تقال جداً...بس مش عليا أصلك لسه متعرفنيش...يلا بسم الله
رامز:عِش أيها الرجل، وانا سأتمشى هناك قليلاً
حاتم:تمام
{مشي رامز، وحاتم ابتدا يشيل الأوزان عشان يلعب رياضه ويبني جسم وبالمرة ينسي همومه...وعلي جهة أخري كانت دينا قاعده مع مهره، وجات نانيس قعدت معاهم}
نانيس:عاملين ايه؟
دينا ومهره:الحمدلله
نانيس:قوليلي يا مهرة هو الأخ اللي جه معاكي ده قريبك؟
مهره:لا خالص بس بتسألي ليه؟؟
نانيس:أصله عسول اوي بصراحة
دينا:تخيلي يا مهرة إن نانيس رافضة تتجوز واحد مش من نفس جنسيتها، يعني من الآخر عايزه تتجوز واحد مصري زينا
{اتغيرت ملامح مهره، ورفعت حواجبها}
مهره:حاتم متجوز
نانيس:متجوز؟؟
مهره:اه متجوز، ومراته موجوده في مصر، وهيرجعلها قريب ان شاء الله...هي بس لولا الظروف اللي اتحطينا فيها هي اللي جابتنا هنا.
نانيس:اسمعها منه عشان اتأكد
مهره :ياريت نخلي كل واحد في حالة وإلا هنمشي من هنا، احنا جايين عشان تساعدونا...مش عشان تحطوا عينيكم علي اللي مننا
دينا:خلاص يا نانيس، عيب اصلاً اللي قولتيه ده، ومادام هو متجوز يبقي خلاص لا مراته تزعل مننا برضه.
{وبصيت لـ مهره}
============عند فاتن وغادة===========
{كانوا واقفين في القسم مع عادل اللي خبط حاتم في أول حلقة..والحقيقه ان عادل يبقي أخو نبيل}
نبيل:موصلوش لأي حاجة والله..حتي الكاميرات كأنها كتابه واتمسحت بأستيكه.. والغريب هنا انهم لما فتشوا المستشفى ملقوش أي حاجة، طب لو المفروض انه هرب، طب فين الفيديو اللي بيهرب فيه؟...إلا لو نط من شباك أو حاجة!
عادل:مفيش حاجة تتقال إلا انه هرب من الشباك..أكيد مش كل أوضة من أوض المستشفى فيها كاميرا...ممكن يكون مستخبي في مخزن أو حاجة!!
فاتن:كل ده ميهمنيش، انتوا سايبين بيري اللي محبوسه بقالها كام يوم وقاعدين تفكروا الحرامي هرب ولالا؟
غادة:هنعمل ايه تاني أكتر من اللي عملناه يا ماما؟...وبعدين هي الشرطه قاعده يعني، ماهما بيعملوا اللي عليهم وزيادة
فاتن(بزعيق) :تقدري تفهميني يعني ايه مش عارفين يثبتوا براءة أختك؟...وهو الدكتور اللي مات ده، كانت بيري هي اللي قتلـ..ـته هو كمان وهي مرمية في الحجز بقالها كام يوم؟...مش كفاية عليها كده ولا ايه؟
نبيل:اهدي بس يا طنط..استحملي كمان كام يوم لحد ما البراءه تبان...وانا متأكد انها هتخرج بعد اللي حصل في المستشفى ده
============في مكتب الدكتور===========
{كان الدكتور اللي اعترف بوجود قاتل متسلسل لظابط الشرطة...قاعد في المكتب مع زميلته بيتابعوا أوراق الأشعه}
الدكتوره:في أشعه ناقصه من الورق ده
الدكتور:انتي مش طبعتيهم كلهم؟
الدكتوره:اه بس شكلي نسيت واحدة هناك..هروح أجيبها وجاية
الدكتور:ماشي
{مشيت الدكتوره وراحت تجيب الأشعه اللي ناقصة..وكان الدكتور بيكتب في الورق، فجأه الباب إتفتح لواحده ولما رفع راسه وبص كانت الصدمة}