رواية احتواء القاسي الفصل الثلاثون30بقلم سوسو تويكس
مر اسبوعين ونحنا في أمريكا وعلاقتي مع معتصم اتصلحت شديد وعرفتها اني مهمة عندو من طريقة كلامو وتعاملو معاي، بس مكانتي شنو بالتحديد ما عارفه والشي ده منفسن بي بكره اكون في دوامة مرات احسو ببادلني نفس المشاعر ومرات احسو بعتبرني صديقه بس تصرفاتو كلها متناقضه، قطع تفكيري وهو بقول :هااك ده بنكهة الفانيليا و الكاكاو زي ما طلبتي_مسكتا الاسكريم وهو بدا ياكل حقو، واثناء ما بنتمشي جمب الشاطئ قالي بغيره واضحه:حسي لو سمعتي كلامي وغيرتي الفستان الأحمر ده ما كان احسن ليك_لينه:انت من قبيل في سيرة الموضوع ده+في اليل ده البعاين لي منو واي زول مع الشقرا بتاعتو_معتصم:حتى لو بليل حاسي بيهو لافت الانظار ده غير انك طالعه حلوة فيهو _لينه:بتغار يا سيد غيور_معتصم:لي ما اغار؟ مش مرتي_هنا فصلتا ما عرفتا ارد بشنو _قالي:عايني ارح نقعد شويه_كان في حجرين كبار من الحجار الجمب الشاطيء قعدنا فيهم وطبعا انا حفيانه لاني ماشه في الرمله، المكان ده مميز كنت دايما بجي ليهو مع امي _قالي:ح نرجع السودان بعد بكرة عشان جامعتك ح تفتح بعد اسبوع للسمستر التاني_لينه:همم ايي_معتصم:مالك اليله هاادئه كده_لينه:معتصم ممكن أسألك _معتصم:عيوني ليك اها اسألي_وجهت نظري لموجات الشاطئ الكان عاكس فيهو ضوء القمر والمكان كلو مضلم وهادئ واي جوز بتلقوهم منعزلين في حتة_قلتا بعد مسافه:حصل حبيت واحده تانيه بعد امنيه او الاصح هل بديت تحب واحده تانيه _سكت مسافه وهو موجه نظر للشاطئ وقال بهدؤ :لأ _مسحتا دمعتي الجرت وقت سمعتا اجابتو اصلا متوقعه شنو يحبك وياداب ليك ٥ شهور من وقت ظهرتي في حياتو وينسا امنيه حب الطفوله_ما اتكلمت عشان ح يعرف من صوتي اني عايزه ابكي _معتصم:اها وانتي حصل حبيتي غير مايكل بتاعك داك_لينه:مايكل يا حليلو متذكر لحسي_طبعا ده الحصلت بسبب المشكله القبلي ٤ سنه _معتصم:ايي ومتذكر مكالمة الفيديو كول البليل حالتو كنت بت ١٦ سنه_لينه:معناها متذكر الكف الاديتني ليهو وقت سالتني ده منو قلتا ليك ده غريمي ما تدخل، كبرنا المشكله في اليل داك وبسببك امي شهرين شالت مني التلفون كعقاب_حمر لي وهو بقول:لو يرجع الزمن بديك ليهو كفين بالدبل، عايزاني اعمل شنو وقت القى بت ال١٦ سنه بتتكلم فيديو في نص اليل مع ولد وبعده تقلي ادبك في الكلام وتتلامضي..
لينه:كانت فتوة مراهقة +الايام ديك كان الارتباط بالاولاد الشقر موضة في امريكا_معتصم:حسي ما تزوغي من السؤال حصل حبيتي غير ود ميكي بتاعك داك_لينه:غيران بس من عيونو الزرق، ولا مايكل زاتو ما كان حب، أما بالنسبه لي سوالك ما بكذب في واحد في قلبي وحبيتو كمان_عاين لي مسافه بهدؤ وتركيز لمن وترني، وتاني ماف زول اتكلم وسكانها على كده، رجعنا الفندق وتاني يوم ودعنا عمي جمال وزرتا قبر امي للمرة الاخيره عشان بكره راجعين السودان_قمنا من الصباح صلينا وصلنا المطار واتحركنا _واول ما وصلنا السودان وطلعنا من المطار لفحتنا هبوبه سموم غايتو الحمد لله بس ما دي السودان عاد🐸.....
يتبع