رواية كاظيمة الفصل السادس6بقلم وسام الفرجاني
ماكو شهر تقريبا وانها عمتي ام رواء جاية وام رسول يسلمون واستغرب بصراحة لان شفت بعيونهم حجي وام رسول ظلت تبوس بالجهال وهلا برويحاتي ومن هالسوالف وتشمشم بيهم
جانت كاعدة امي جان تكول بصراحة الموت قدر ولازم واحد مايعترض عليه وشي راح و كاظمية بنية صلاوات عليها وعدها جهال من ابنه رسول ومانريدهم يضيعون
كالتهم امي اي !!
كالت نريد ناخذها لسمير اخو رواء !!
امي : مابيها شي بس الشور شور ابوها وهي وتعرفون احنه نطيناكم ناس حسب ونسب ومابيكم عيب بس هسة اختلفت الوضعية مابيدي شي الكلام كله بيد ابوها نكله على هالسالفة ونردلكم خبر ان شاء الله واذا اكو نصيب فكل الهلا واذا لا بعد هاي قسمتهم هيج
ام رواء : والله هو ابني نتزوج تعرفه اكيد كاظمية بس كلنا بدال ما يروحون الجهال ويضيعون بين خوالهم وعمامهم ويتربون يتامى ناخذها مرة ثانية وتكعد عدنا والجهال يتربون بين عمامهم
امي : كلكم خير وبركة يلا كاظمية جايج وين ؟
كاظمية : كملوا سوالف كملوا لبسوني الابيض وزفوني وحددوا كلشي وحدكم ..
ام رواء : لا بنيتي كل الراي الج اكيد
كاظمية : يا راي خالة انتم كملتوا كلشي وماباوعتوا اليه اصلا فصلتوا ولبستوا ماناقصكم بس تحددون يوم العرس
امي : ع هونج بنتي ميصير عيب كومي صبيلنا استكان جاي مرتب يلا بنيتي
كاظمية : الجاي يشربونه الف عافية عليهم اما زواج ما زواج فهذا الاسود ما انزعه طول عمري وزواج ما اتزوج وولدهم ع عيني وراسي يشوفونهم يروحون ويرجعون بيناتنا
عمتي ام رسول : ع كيفج بينه كظومة ترى ماشفتي منه بس الزين ليش مارايده العيشة عدنا
كاظمية : بس الزين !! مو ما رايدة العيشة وياكم انتم ع عيني وراسي بس ماريد اتزوج ورى رسول جاي تفهموني !!
امي : هسة دصبي جاي يلا شلعتي كلوبنا
صبيتلهم جاي ورادت عمتي تشوف الجهال انوب وجبتهم الها وبوستهم ولاعبتهم وبعدين كالوا نروح وعود ردولنا خبر كتلها عمتي الخبر من هسة انطيج اياه والله ما يمسني غير رسول لو ع جثتي
اخذت جهالي ورحت لغرفتي واجت امي تكلي ليش تحاجيهم بـ نتر مو عيب هيج تسولفين كتلها يمة لان اذا وصلتي السالفة لأبوي راح يجبرني اخذه واني بالاصل جنت يم المرحوم رسول ومو خلصانة من رواء مو عود كاعدة وياهم بنفس البيت لاااا وشنو ضرة
لفت ظهرها وكالت لازم اكول لابوج ع الموضوع ميصير مايعرف شي كتلها حطيها ترجية بإذنج اذا جبرني راح اهج واطلع من البيت بليلة سودة ومتعرفوني وين
وانت عندج علم بالاوراق الي يمي ضامتهن بالوقت المناسب
امي صارت عدها ردة فعل من كلت الها هيج و الله جاب الوقت هذا وقت حصاد الحنطة وابوي حضر غراضه وشغله حتى يحصد الكاع مالته وطبعا رشها بعيد يعني يروح كم يوم ويرجع وهنا كلت لازم اروح اواجه بيت اهل رسول بالاوراق واخذ حقي واسكن بالبيت
طبعا امي ماحاجته بالموضوع مالت المشية وراح للحصاد ورحت لبيت اهل رسول وكلت الهم اني رسول بحياته اشترى اليه بيت وبإسمي والبيت موجود وراح اسكن بي لان مو لرسول حتى يتوزع ورث ومدري شنو يعني محد اله حق بي
الاوراق ماخذتها وياي لان خاف يسوون شي فكلت ابلغهم قبل كلشي .. وعمتي اصلا تدري بالموضوع واحسها من حجيت بالقصة اكو بحلكها كلام تريد تكلي اياه بس جانوا اخوان رسول وعمامه كاعدين وماحجت
كالوا الي كلشي ماخله رسول وماعنده اي شي كتلهم عندي اوراق تثبت كالوا نشوفهن ونحكم وانت جاي تتبلين ع رسول من مات كتلهم خير ان شاء الله كلشي بالدليل
رجعت للبيت وحجيت لامي وكالت شنو جاي تفكرين وين تريدين توصلين ؟
كتلها اريد اعوف البيت واعيش ببيتي اني وجهالي واسترزق الرزاق حي .. وما اعتمد ع اي بشر اربي جهالي وهم يصيرون عون اليه بوكت عازتي لان بالتالي كل واحد جاي يشمرني ع الثاني وكلكم علاقتكم بية مصالح
ابوية منا بس يريد يخلص مني عبالك اني مو بنته وكاعدة ع كلبه مو بالكاع .. ويريد يزوجني بإسرع وقت بدون ميشوف رأيي ولا حتى يعرف العريس بس هيج همه كله اروح عن البيت
هذا البيت فكرت بي من جان رسول بالحياة اقسم بالله احس هداية من الله هالفكرة و اجت لان لوما هالبيت هذا راح اظل بالذل والاهانة وابوي اول تالي يجبرني اخذ واحد لو مواليده حرب العالمية الاولى حاضرها
امي مثل الزعلت بس شنو هاي الحقيقة الى متى اجامل ومأكول حقي .. اجه ابوية للبيت تعبان ونام الظهريات من التعب وكعد ع صوت الجهال بس يبجون ماجاي اكدر اسيطر عليهم اثنينهم اسكت هذا يبجي هذا .. ينام هذا شوي يبجي الثاني يكعد من النوم
جان عندي سرير من حديد مصنوع يدوي امهدهم واحطهم اثنينهم واحد عكس الثاني واهزلهم حتى ينامون ايدي تروح وماينامون الا بشلاع الكلب ومع ذلك ما ضايجة ابد يستاهلون التعب
فتح الباب ابوية ..
-ماتسكتين هالعجيان يجوعرون صارلهم ساعة
- أمر يابه والله اسكت بيهم وميقبلون يسكتون
- شيليهم وانگلعي بيهم جوة الشجرة اريد انام راسي ثولتي
- تمام يابه شايلتهم. خاص بوسام الفراجي
جانت عدنا شجرة مالت زيتون كبيرة شوية بيها فياي يبعد الشمس الحارة اخذتهم بالحر واهزلهم حتى ينام ابوية
كتلتهم الشمس تصمط صمط والله البني ادم الجبير مايتحملها مو عود اطفال صغار
الصراحة انقهرت ع جهالي الى متى نظل مطرودين !
امي فتحت الموضوع ويا ابوية ع اخو رواء وابوي ما ناقصه بس يشد جوبي ويدك اصبعتين بس يريد يبعدني عنه
خليته الما ينام ابوية واخذتهم لغرفتي وسديت الباب علمود اذا صيحوا الجهال ميكعد
واخذتلي غفوة من مات رسول ما نايمة هيج نومة يمكن من التعب هيج غفيت غفوة ماكعدت الا ع صوت امجد يبجي صحيت ما اعرف الدنيا ظهر لو ليل تيهت الوقت
طلعت توة صايرة المغرب والله عبالي دنيا صبح افتر راسي
لكيت ابوية يسگي بالشجرات الي كدام بيتنا ويرتب بيهن من شافني كلي تعالي ..
انتِ حاطة ببالج احد ! ليش رافضة تزوجين شنو قصتج!
- ماحاطة والله يابه اي احد بس اني خلص عندي جهال اثنين اريد اربيهم
- و ان شاء الله تظلين هيج هنا حدما يكبرون !
- ليش مو بنتكم اني
- اخوج الاصغر منج ع وجه زواج وبيتنا صغير تعرفين يادوب غرفتين ومطبخ لازم تزوجين علمود تظل الغرفة لاخوج يتزوج بيها
- عادي اطلع من البيت بس ما اتزوج
كرب عليه وعض ع لسانه طبعا هاي من يتعصب هيج يصير جان يرفع ايده اني فزيت لزمني من شحمة اذني كلي بنتي اسمعي الكلام ولا تبقين تلغين
بهاللحظة كلت هذا وقت مناسب اكله عندي بيت بإسمي واطلع بي وهو بس يريدني اطلع راح يوافق
- كتله اني عندي بيت بإسمي اسكن بي اني وجهالي واسترزق واعيش جهالي بأي شغل حر واخلصكم مني لان طردتوني يكلامكم اكثر من مرة
- شتشتغلين لازم تريدين كل يوم يطبلج زلمة
- ههه نسوان جثيرة عيشت جهالها وصاروا زلم ومو كل مرة ارملة هي مو شريفة
طك وضربني راشدي الا طبعت اطراف اصابعه بخدي جانت ايده ايد فلاح وبعد يمكم الحساب
صارت الطبعة مالت اصابعه شلون مجويات بنار
عافني بالكاع وكالي هالاسبوعين تزوجين ابن ام رواء ماعدنا نسوان نمشي بكيفها ما الج غير رجلج
- هالجملة بالضبط كلتها الي قبل كم سنة من اجوني رسول خطابة وزوجتني اجباري بوكتها جنت طفلة لا حول ولا قوة اما هسة الوقت اختلف واني اختلفت وقصة تزوجين اجباري بعد ما تنفع وياي تريدني بالبيت اظل ما تريدني الم ملابسي واخذ جهالي واروح
- والله لنعلبوج لابو اليربيج يا جلحة
هد وراي ولجعني ب عود مرتين والثالثة شردت منه طبيت للغرفة وسديت الباب
اني رحت لغرفتي بس شنو قسما بذات الله احس نفسي صرت ملكة مو لان راددت ابوي بالعكس بس لان حجيت هالشي وماجنت متوقعته احجي حسيت نفسي صرت قوية
تالي الليل ..
لميت ملابسي بـ صُرة لا جنطة عندي ولا شي وشلت جهالي وبليل اظلم طلعت امشي بخطوات خفيفة بعدني بالبستان وسمعت باب غرفة اهلي انفتحت جان بوقتها الباب بي صريج تصرج من ينفتح .. خاص بوسام الفراجي
وكفت لان صوت مشي مالتي وجواي ورق شجر وتصير صوت ..
طلع ابوية طالع للصحيات .. خفت صرت ارجف لان جهال بأي دقيقة يصيحون ظليت واكفة مثل الصنم حدما رجع
وتحركت ع سريع بنص الطريق وكعد امجد
مجودي حبوبي شكعدك هسة مو وكتك يعمري
من كعد امجد كعد وياه اسعد ومبين عليهم كاتلهم الجوع واني بالشارع مكدر ارضعهم ..
رحت للبيت ع حسب ما وصفه اليه المرحوم رسول لان هو كالي مقابيل مدرسة #الثورة قبل هيج اسمها بيت الحوش مالته كبير مقابيله بيت نفس التصميم اني بيتي ع مقابيل باب مدرسة الثورة مباشرة
ليش الجذب اني ما اعرف الاماكن هواي اتيه بسرعة وصرت امشي وامشي .. بس احس وراي خيال او احد يمشي وراي واني خوافة جدا بس هسة الوضع اختلف عن قبل
هسة ام اني ولازم احمي جهالي بأي وسيلة ..
فظليت امشي بدون ما اتلفت واسمع نبح جلاب هنا وهناك وطبعا الجلاب فد شي عادي متعودين عليه ببيئتنا بس الخيال والشغلات الشيطانية اعوذ بالله لا هنا توكف
هي ماكو شي يمكن بس اني احس واحد وراي يمشي ..
الحركة بالقرية واحنه ساكنين بنهايتها بطيئة جدا مابيها احد بس وصلت لشوارع المدينة عبالك الساعة 8 بالليل الي يشوفهم وهي هسة تالي الليل
تعبت مشي واستراح انزل الجهال وارتاح واخذ نفس وامشي واستراح واكعد اخذ نفس بس مشي بطيئ تعرفون جهال وشايلة صرة ملابس وياي ف الحيوان حيشاكم ما يتحمل
اذن الفجر اني توة واصلة مدرسة الثورة
رجعت استذكر اوصاف رسول للبيت هو بالضبط وما يضيع اصلا مباشرة باب ع باب المدرسة وبيتنا
الباب مال البيت من حديد تلزيك تنك وبراميل حديد مقسومة نصين يعني تلزيك .. ومشدود من داخل بمدري شنو لان مابي قفل اصلا
زين شلون افتحه شيوصلني .. باوعت يمين يسار ماكو جان انزل الجهال اصعد واجيت بنص البيت لكيته مشدود ب خيط مال ملابس وبسمار
فليتهن وفتحت الباب ودا اخذ جهالي طلع زلمة لابس شماغ من بيت طارف الفرع اني شلعت وهو شفته فز بكلبي متت ضحك عليه عود زلمة وشماغ هههههههه
من تقرب كلي عرفته شاخط جان يكول ..
— منو انتِ؟ شعندج هنا !
— بيتي وجاية بي عندك اشكال ؟
— الله يسامحج تالي الليل جاية عبالك ابو الطبر انتِ وخشتج. خاص بوسام الفراجي
— عمي تعرفني اعرفك رجليك بالكبر وتحشش ماناقصتك
(طلع خطية رايح لصلاة الفجر للمسجد الظاهر قريب من هنا)
طبيت البيت اظلم وماعندي لا ضوة لا لالة لا فانوس
طلعت دشداشة من ملابسي ومديتها ع رجليه وحطيت امجد ع رجليه اهز بي واسعد بحضني اهز بي
رغم عايشة بالقرى بس ظلت عندي فوبيا من البزون و الهر من اشوفهن اتخيلهن اسد مو بزونة
صرت اسمع صوت بزازين صراحة كشيت هاي هم هنا بزازين بعدين كلت هاي شجاني قابل بالقمر اني هو العراق كله بزازين ..
ظليت بهالهندس مو كثير بعدين شرقت الشمس وكشف الضوة والجهال نايمين كلت استغل نومهم جان اكوم واطب جوة للغرف اتفقدها وابدي اعزل بالبيت واكنس وانظف وارتب وضعي والبيت فارغ يصوصي لا اكل ولا اثاث ولا حصير بس مي بي الحمد لله
الصبح من علت الشمس شلت الجهال وطببيتهم للبيت من الشمس وصرت انظف بالوسخ بس ناقصني مكنسة جان كبل وحاليا هم موجودة نسويها من سعف النخل بيدنا
باوعت ع بيت جيرانة الي نفس تصميم بيتي كلت احسن شي اشحذ منهم مكنسة واذا ماعدهم استأذنهم اخذ سعفة
دكيت الباب الما بزعت محد.طلع عبالك بيت مهجور هم مو خوش شغلة هاي .. خاص بوسام الفراجي
رحت للبيت الوراه واني ادك بالباب اجه هذا الشايب الشاخط من شفته كوة ضميت ضحكتي تذكرت شلون فز الفجر
طلع صدك شاخط طابكات فيوزاته ..
انفتح الباب وسلمت عليهم وكلت الهم اني جارتكم جديدة ورايدة ممسحة او مكنسة انظف البيت اذا مابيها زحمة
طلعت امهم وسلمت عليه وحلفتني اذا تحتاج شي تمرين
خطية طلعوا خوش ناس وعدها بنات صغار كتكوتات يخبلن طلعن وراها كوة يخطن ويمشن بعدهن ببداية المشي
واني راجعة للبيت صاحني الشاخط يكلي
— تعرفين واحد يعرف بالبناء هنا ؟
– عمو بيك شي هو انت صارلك 100 سنة هنا ماتعرف غير صارلي يوم هنا ..روح عمي الله بالخير
رجعت مغثوثة من هذا شاخط فاصل ع الاخير شلون بشر يربي لازم بكل مكان يصادفني واحد غثة ..
نظفت البيت وكملته بالكامل وكعدوا الجهال خصوصا اسعد خبيث مبين عليه من هسة هو الي يكعد اخوه بصياحه اما امجد نايم وهادئ بس سعّودي حرك ههههه
رضعتهم كملت و هجدوا شوي .. حطيتهم جواهم ملابسي ورحت رجعت المكنسة جان امهم تكول
— انتِ جديدة هنا ؟ خاص بوسام الفراجي
— اي هذا بيتي اشتريته من كبل فترة وهسة صار وكت اسكن بي
— اي صحيح قبل فترة اجوا هنا يشوفون البيت وكالوا ع اساس يشتري البيتين الي نفس البناء
— لا اخذ واحد بس الي مقابيل مدرسة الثورة
— يبو شلون يألفون السالفة ع اساس ماخذهن ثنينهن بوقتها كالوا حتى اجوا ناس عليه يشتروه كالوا محجوزات
— والله خالة ما ادري اني اصلا دكيت الباب عليهم كبلكم علمود المكناسة ومحد طلع
— اي مو كتلك مابي احد المهم حبيبتي غداج صار لتعبين نفسج بعد شوي اجيبه الج
— ليش مكلفة نفسج خالة
— اني ام سوسن حبيبتي بس شيكولون علينا العالم اجونا جيران جدد وماعازمينهم اصلا هسة جيران كلها تدزلك كل بيت وجبة هاي عادات العراقيين كلهم
رجعت للبيت مفرفرحة شلون جيران طلعوا ينحطون ع جرح يطيب هاي اني بحلم بعلم لكيت ناس طيبة وكلبها ابيض مثل ام سوسن ..
فتت للبيت لكيت الجهال فارطين من البجي اسعد يصيح وامجد يكهد .. ويلي ويلادي ويلي وسكتتهم بالكوة بس شنو لا احد ينزعج من صياح جهالي لا خافي لا روحي بالشمس لا احد يصيح سكتيييييهم
راحة نفسية بس انتظر ردة فعل عيالي وابوية وشما يكون فميكدرون يسوون شي دام البيت ب اسمي
اندك الباب كلت هاي ام سوسن اكيد ..
طلعت ولكيتها مسوية غدة من هذا الي يترس العين كتلها ليش هالخير الجثير هذا ترا اني نفر واحد هي تفاجئت بس ما سألتني ليش
بعد المغرب جارة ثانية جابتلي عشا
ثاني نهار نفس روتين الجهال والترتيب والتنظيف واكيد اهلي يدورولي هسة لان بالاصل متعرف امي بيتي وين حتى تجيني ومنتظر منهم يجون بأي دقيقة
قبل اذان الظهر اندك الباب كلت هاي اكيد احد الجيران جايب غدة لو ام سوسن اكيد
فتحت الباب فاتت كبل بنية شكلها اكبر لشتي
نزعت ربطتها وعبايتها اول ما طبت للبيت اني بعدني متفاجئة بصراحة بالبداية شكيت بنفسي خاف تطلع عرف هاي !
نطيت مجال سديت الباب شو هاي طبت كبل للإستقبال وكعدت ...
شبيج خالة شو نزعتي ترا اكو زلم بالبيت هسة يشوفونج بالمنظر هذا! حرام تستري ..
(بصراحة خفت منها لذلك سويت نفسي اكو زلمة يعني مو بس اني بالبيت حتى تخاف ماريد تعرف وحدي لان مااعرف نيتها شنو)
ضحكت جان تكول عادي ولدي ذوله ..
شنو ولدج خالة دا اكلج البيت بي زلم البسي ربطتج
.. لزمت الحجاب بيدي وشمرته عليها ..
وكع بحضنها .. لزمته وعقجته وحطته ع صفحة ..
بصراحة صارت عندي ردة فعل ..
كتلها كومي اطلعي انتِ واضحة عليج مو مترباية كومي يلا لا اصيح عليج ولدي هسة ؟
ردتلي .. منو اسعد لو امجد ؟
من كالت اسمهم كزبر جلدي شلون تعرفهم وبالاسماء !
صرت افور ولزمتها بلسان زين غسلتها غسل بس هي كاعدة بكل برود وبكل صلافة ..
كتلها انتِ هسة شتريدين ؟
كالت من تكعدين وتهدأين وتحجين وياي بأدب اسولفلك كلشي بس الظاهر المرحوم مو كاص لسانج زين وصرتي هيج تثرثرين بسوالفج..
انتِ شبيج شو تتجاوزين ؟ مخرفة شي
لتجيبين طاري مرحوم ع لسانج
ضحكت وما ردت انوب برودها يزيد النار بية
كتلها لتعبين جهالي ديبجون احجي انتِ منو وشجابج هنا ومية الف سؤال بعد براسي تحجين لو الم المنطقة هسة كلها عليج
كالت اني روكة !