رواية عودة إبليس
الفصل الواحد والثلاثون والأخير
بقلم رشا منصور
صرماط….
فضلت قاعد لحد ما لقيت عزيز وصل وبيقول يا ميسان تعالى حسيت ساعتها كأنه بيستعد يبلغني خبر سئ
بصيت لهم وقولت نهي مش موافقه ع العموم أنا أتمني لها السعادة وكفايه إني بقيت مطمن عليها وأنا هعيش في مملكة الجن المسلم بس تبقي تعالي شوفني ولو مرة في الشهر 😟
عزيز….
بصراحه أمي ولا وافقت ولا رفضت هى لها طلب لو نفذته اعتبر نفسك عريس يعني الموضوع فى إيدك انت
صرماط… طلب إيه
ميسان….
لقيت عزيز بيخلع نفسه وقالي قولي إنتي يا ميسان هى بلغتك أنتي 😮 بص يا عمي هى عاوزة فستان زفاف وأنكم تعيشوا فى الشقه هنا و و 👀 من الآخر كدا عوزاك تحفظ سورة البقرة فى خلال الإسبوع ده كنت بتكلم وأنا بقرب من الباب علشان الحق أجري قبل ما يعمل فينا حاجه
صرماط…
بس كدا أحلي وأجمل فستان بس سورة البقرة دى أنا أخاف أنطق كلماتها أحسن اتحر'ق وكمان انا عمري ما قرأت القرآن محتاج مساعدة من الجن المسلم ممكن تتوسط ليا يا عزيز حد يعلمني
عزيز…
ركزت كويس وقولت فى بالي نورين محتاجك هنا فى الحال
وظهرت نورين ومن غير ما انطق بصت ل أبي وقالت له تعالي معايا وفعلا اخدته واختفت
وبصراحه من جوايا كنت مبسوط ان أبي مستعد يعمل اى حاجه مهما كانت صعبه بالنسبه له علشان خاطر أمي الحب حلو وحلاوته لما تثبت حبك بالفعل مش مجرد كلام
وطرت أنا وميسان ع أمي ابلغها ما هى عروسه بقي ولقيت تيتا وطنط مها مرة واحدة بدوء يزغرطوا ويكلموا بعدها عن الفساتين
هو انا مش هخلص من حوار الفساتين ده
ولقيت ميسان بتقولي عزيز عاوزة فستان أنا كمان 😮😦 خدت بعضي وطرت فى الحال
عبدالله….
لقيت عم محمد بيقولى يا عبدالله خد فى واحد بيسال عليك اخدت الموبايل وبرد لقيت زميلي وقالي أنه راح سأل عن العريس وفضل يقولى عليه كلام حلو أوى وبعد ما قفلت معاه اتصلت ع سهي وقولت لها عرفي عريسك إنى بعد أسبوع هكون موجود مبروك يا عروسة ربنا يسعدك ويتمم بخير يارب
سهي….
فرحت أوى بكلام أخويا واتصلت ع أمير وبلغته وقالي قبل الميعاد هيكون موجود عند الدكتور عزيز
عزيز…
أمير كلمنى وفرحنى أوى قولت له إيه رأيك نعمل فرح أميرة معاك وطرت لهم واخدت أميرة وقولت لها شاوري ع كل اللي انتي عوزاه وفعلا فى خلال ساعات كانت شقتها مفروشه ومتوضبه وحجزت قاعه كبيرة وابتديت استعد أنا كمان واجهز البدل وجبت بدل للاولاد وطبعا فستان ل مسيان علشان تسيبني انام
وبقينا طول الاسبوع كلنا مشغولين حتى تيتا كمان وبقيت أروح المستشفي ساعتين بس يا دوب أشوف المهندسين عاملوا إيه وكلمت شركة متخصصه فى الأجهزة الرياضيه وأن شاء الله قريب هفتتح قسم العلاج الطبيعي
صرماط….
طرت مع نورين ولقيتها خدتنى لمملكة الجان المسلم مكنتش متخيل أنها بالجمال ده ولا رائحة العطر اللى فى كل مكان ولقيت شاب وجهه بشوش منور وناصع البياض وعرفت ان هو اللى هيساعدنى ع حفظ سورة البقرة وطمنى وقالي مدام أصبحت مؤمن بالله عمر ما القرآن يأذيني بالعكس ده هيزود من قوتى وفضلت صبح وليل احفظ لحد ما قدرت بعد خمس أيام أحفظها بالتجويد كمان وكنت فرحان أوي وحسيت نفسي أقوى من الأول وكأنى رجعت شباب وطرت وروحت عند الست مها بس وقفت عند الباب واستاذنت بالدخول وطبعا أخدت شكل بشري وبعد ما سمحوا ليا
تيتا….
أهلا وسهلا ما شاء عليك انت عريس نهي وبصيت ل نهي وقولت لها راجل زى القمر الحقي اتجوزيه يا خيبه قبل ما تيجي واحدة تاخده منك وروحت مزغرطه وقولت ل مها هاتي الشربات
نهي….
بصيت له وقولتله فين الفستان يا صرماط لقيته بيقولى إسمي مؤمن
إيه رأيك فى الإسم اللي اختارته
قولت له عسل يا مؤمن ويلا جهزلى الفستان مدام نفذت طلبي يبقي فرحنا مع العيال بعد يومين
عزيز….
رغم انشغالي إلا ان الفضول شغلني وطرت لحد مملكة الجن المسلم وطلبت مقابله الحكيم لقمان ونورين وسألتهم ليه معرفوش سهي أنها زوهريه واستغربت كلامهم
الحكيم لقمان….
عدم معرفة سهي حمايه لها لأنها لما تعرف هتفضل تسعي للمعرفه
والفضول هيخليها تتكلم وهتلفت نظر الجن المؤذي لها ووقتها ممكن يمسها جن منهم ويوهمها بأنها تقدر تعرف الغيب وأن أحلامها كلها بتتحقق لحد مرة وراء مرة تبعد عن ذكر الله وممكن كمان قرينها نفسه يساعد الجان يعملوا لها سحر ويعطلوا حالها
وانت عارف ان فى بينا معاهدة منقدرش ندخل
عزيز …. يعني إيه لو حاجه حصلت هنسيبها كدا
نورين….
الإنسان لازم يحصن نفسه بالقرآن والأذكار صباح ومساء وبعد كل صلاة قراءة آية الكرسي والمعوذات وقتها الجن المؤذي ميقدرش يقرب منها ولو حاول بيتم صاعقه فى الحال
علشان كدا عدم معرفه سهي افيد لها طول ما الإنسان مشغول بحاله ومالوش دعوة بعالم الجان هيفضل فى أمان
عزيز. …
عندك حق وأنا متشكر ع اللي عملتوا مع أبي وكل حاجه بتعملوها معايا استأذنكم انتوا عارفين عندى عرايس وعرسان
وطرت رجعت تاني للبيت واتفقت مع ميسان نبدأ نجهز البيت علشان طنط مها والكل هيجي هنا علشان خطوبه أمير
وابتديت اكتب طلبات الست ميسان من حلويات وعصائر وزينه للديكور وعوزانى أجيب بلالين انفخها يا خسارتك فى البهدله يا عزيز من يوم ما عاشت هنا وهي بقت قويه ومستقويه وجدتى اللى مقوياها عليا ربنا يسامحك يا تيتا
وعدت الأيام ولقيت أمير بيتصل ويقولى أجهز يا أخ إحنا جايين فى الطريق أطلب لنا أكل
عبدالله….
أخدت إجازة بعد ما قبضت المرتب بتاعي وسافرت ومعرفتش سهي بميعاد وصولي علشان أعملها لهم مفاجأه
سهي….
كنت قاعدة واهلي وأمي معايا وعاملين يتكلموا ع جهازى وبيتناقشوا فى أسامي عيالي اللى هما لسه فى علم الغيب
ولقيت الباب بيخبط وأهلي اتحولوا ل قطط وواقفوا ع جنب روحت فتحت الباب لقيت عبدالله كان وحشني أوى حضنته ولقيت القطه أمي بتشد في عبايتي كنت نسيت خالص أنه مش أخويا
عبدالله. …
وحشتيني يا سهي والله يابت كبرتي وبقيتي عروسه زى القمر أكيد امه دعياله😙 وببص لقيت قط بيشدنى وقطه تانيه طلعت وقفت ع رجل سهي إيه ياما هو أنا لما سفرت جبتي بدالي قطط 😁😁😁
أم عبدالله. …
يخيبك يا عبدالله ضحكتني ربنا يفرحك يابني أحكي لنا أخبار الشغل إيه جهزى الأكل يا سهي زمان اخوكى جعان
كنت فاهمه ان القطط عاوزة تبعد عبدالله عن سهي علشان كدا خليتها تقوم ولقيت عبدالله حكي لنا عن العريس والكلام اللى صاحبه قاله وعرفته ان أمير كان بيفكر يكتب الكتاب بالمره قولت إيه يا عبدالله وافق يابني خلينا نفرح ونطمن ع أختك
عبدالله. …
أصبري بس يا أمي لما هو يقولى بنفسه يا سهي اتصلي ع خطيبك خليه يجي نقرأ الفاتحه
سهي…
هو فى الطريق كان مكلمني الصبح بدري وقالي أنه هيجيب أهله ويستنوا عند الدكتور عزيز لحد ما أنت توصل بالسلامه وأنا كلمته دلوقتي وعرفته أنك وصلت
عبدالله. ..
اة يا شقيه لحقتي ع طول بلغتيه 😁😁 ماشي ياست البنات
عزيز….
يلا يا ميسان عملتي الأكل ولا لسه ولقيتها بتقولي أنا طلبت دليفري أنا مش فاضيه بعمل ماسك
نعم ياختى دليفري تاني هو انا مش هترحم من الدليفري ده ابداااا
ميسان….
متزعلش يا حبيبي دلوقتي بقي فى مساواة افتح اليوتيوب واتعلم أنا مش مطلوب منى أفضل واقفه فى المطبخ أنا مش ملزمه
عزيز….
إيه هى وصلت ل مش ملزمة تعالي يا مبروكة شوفي أبنك واللي جري له
ووصولوا الجماعه وأمي وطنط مها وأمير وأميرة وتيتا والاولاد وطبعا أمي لابسه نقاب علشان محدش يشوف وشها ويعرفها وبعد ما ارتاحوا من الطريق واتغدوا قام أمير يتصل ع سهي واتكلم مع عبدالله واستأذنه أننا نروح لهم ونقرأ الفاتحه وننزل نجيب الشبكه ولأول مرة اكتشف أن أمي أستاذة فى الزغاريط
روحنا وقدمت أمي ع أنها خالتي أنا وأمير وهى اللى ربتني وقراءنا الفاتحه واتفقنا ان تكون شبكه وكتب كتاب والفرح يبقي فرحين أمير وأميرة فى يوم واحد وكانت أكبر مفاجأة لهم لما قدمت لهم مراتي واولادى وعرفتهم أنهم كانوا مسافرين ولسه واصلين علشان يحضروا الفرح
سهي…
كنت فرحانه ومتلخبطه وبدل ما كانت خطوبه قلبت ل جوازة والدكتور عزيز قال أنه حجز قاعه كبيرة وأن شقه طنط مها اتوضبت وأنه حاجز لنا أسبوعين فى الغردقة هديه الفرح أنا مش مصدقه نفسي كل دى حاجات عمري ما كنت أقدر أحلم بها احمدك وأشكر فضلك يارب
أم عبدالله ….
كنت فرحانه ل سهي وحزينه أنها هتبعد عني بس الدكتور عزيز قالي ان أمير هيجيب شقه فى السويس وكل إجازة هيجوا يقضوها هنا وهيشغل عبدالله ابني فى المستشفي علشان يفضل جنبي
نهي….
كنت فرحانه أوى مش علشان رجعت أعيش فى عالم الأنس تاني وبس لكن علشان توبت بجد ودعيت ربنا يتقبل توبتي ويغفر لي ذنبي والتزمت فى الصلاة وابتديت احفظ القرآن وصرماط قصدى مؤمن اثبتلي أنه أسلم بجد لما قدر يحفظ سورة البقرة وبصراحه أنا بحبه بسبب اهتمامه بيا ووقفته جنبي دايما وعمري ما احتاجت حاجه إلا والاقيه جابهالي وبحس أنه عاوز يسعدنى طول الوقت ورغم سني الكبير ألا إنى بحس معاه إنى طفله وحاسه بفرحه كأني أول مرة اتجوز
مؤمن (صرماط )....
اتعلمت حاجات كتير من الجن المسلم منها الصلاة والتسبيح والأذكار اليوميه ورغم إنى لسه جديد ع الموضوع ده بس حاسس كأن حياتي لسه بتبدأ واحلي ما فيها أنك تعيش مع حبيبتك وتبدأ معاها صفحه جديدة
عزيز….
قبل يوم الفرح أخدت أهل سهي وحجزت لهم فى فندق اللى فيه القاعه وطبعا أميرة كانت متفقه مع الميكاب ارتيست وحجزت سويت كامل ل سهي وأميرة وميسان وأمي وأحنا الرجاله فضلنا فى غرفه أمير وجه الحلاق روق علينا وفضلنا طول اليوم منتظرين الهوانم يخلصوا مش عارف إيه كل ده
وجه ميعاد الفرح ووقفت قدام السويت واخدت أميرة وسلمتها ل عريسها وعبدالله سلم سهي ل أمير وببص لقيت أمي وأبي اختفوا راحوا مملكه الجن يحتفلوا بزفافهم شقاوة كبار 😁واخدت ميسان وجدتى وطنط مها وام عبدالله وقعدوا ع تربيزة وانا روحت عند الرجاله وقعدت اسمع الأغاني كانت كلماتها جميلة
نسيت أقولكم انى عملت الفرح إسلامي معنديش استعداد اغضب ربنا تاني بعد ما توبت والحمد لله العروسه للعريس ومافيش يارب اى متاعيس وكان يوم جميل وحياة جميله وبعد الفرح أمير خد سهي وطلعوا الغردقه وأميرة خدت عريسها وطلعوا ع نوبيع وأنا أخدت جدتى ومراتي وطنط مها وقعدنا فى شقتها يومين
وحجزت يومين ل عبدالله وام عبدالله فى فندق علشان نرتاح بعد تعب السفر والفرح وبعد كدا اخدتهم كلهم وطنط مها معانا طبعا مينفعشي نسيبها لوحدها وطلعنا السويس
وبجد مافيش أحلي من الحياة الهاديه الجميله وتعيش مرتاح البال بعيد عن القيل والقال وتكون واثق ان ربنا دايما بيختار لك الأفضل
وعاوز اقولكم حاجه مهمه أوى
أنا عزيز مؤمن اللي كان عزازيل صرماط سابقا حكيت لكم تجربتي وكل اللى مريت به علشان تعرفوا حاجه واحدة بس ان باب التوبه مفتوح دايما ومش عيب أننا نغلط لكن لما نعرف إيه الصح نغير نفسنا للأحسن فالحق أحق ان يتبع
ربنا بيقبل التوبه المهم أنها تكون من قلبك ومتقررش غلطك تانى أتمني تكون رسالتي وصلت للكل
تمت بحمد الله
🌹 🌹🌹🌹🌹🌹🌹🌹🌹🌹🌹🌹🌹🌹 💚 مرحبا بكم ضيوفنا الكرام 💚هنا في كرنفال الروايات ستجد كل ما هوا جديد حصري ورومانسى وشيق فقط ابحث من جوجل باسم بكل ما هوه جديد من اللينك الظاهر امامك
🌹🌹🌹🌹 🌹🌹🌹🌹🌹🌹🌹🌹🌹🌹
بكل ما هوه جديد من اللينك الظاهر امامك
🌹🌹🌹🌹 🌹🌹🌹🌹🌹🌹🌹🌹🌹🌹