رواية احلامي البريئه الفصل الثامن عشر18بقلم ملك روحي
التفت مراد لقى احلام واقعه عالارض مغمى عليها اتنفض من مكانه وجري عليها
مراد؛ احلااام مالك يااحلااام وزعق بعلوو صوته الحقونا احلام أغمى عليها فوقي يااحلام وشالها وطلع بيها بره وهوه بيصرخ بعلوو صوته والممرضين اتلموا على صوته ود. خالد جه بسرعه ومراد دخلها اوضه الكشف وبعد نص ساعة خرج د خالد. وكان مراد منتظره بره وعبدالله.سال مراد ايه اللي حصل وحكاله مراد انها أغمى عليها وانفعلت وطردته من المكتب وكان واقف هيموت من الخوف عليها.
وخرج د خالد؛ وقرب على مراد.. ايه اللي حصل يااستاذ مراد واحلام أغمى عليها ليه اللي عرفته ان حضرتك كنت معاها في مكتبها وحصل الإغماء ده.
مراد؛ مفيش يادكتور احنا كنا بنتكلم وفجأه انفعلت واغمى عليها وانا بسرعه خرجت وجبتها اوضه الكشف بس طمني يادكتور هيا كويسه.
د خالد؛ الحمدلله بس اللي حصلها ده نتيجه انفعال حصل وضغطها وطي فجأه واغمى عليها وانا عايز اعرف دلوقتي ايه المشكله اللي حصلت عشان احلام يغمى عليها بالشكل ده.
مراد؛ اتعصب لما لقى اهتمام د. خالد بأحلام وقاله وانت عايز تعرف ليه ايه اللي حصل قلتلك موضوع كنا بنتكلم فيه وانفعلت وخلصنا.
عبدالله؛ قرب من مراد وشده بعيد.. اهدي يامراد الدكتور بيسأل عادي ده شغله.
د خالد؛ لا مش بسأل عادي احلام خلاص هتبقى خطيبتي وطبيعي أمرها يهمني.
مراد؛ سمع كلام دكتور خالد واتعصب والغيره اتمكنت منه ومحسش بنفسه تحت نظرات عبدالله اللي حس ان مراد خلاص هيقتل د خالد. وفجأه مراد ضرب دخالد بالبوكس في وشه خبطه في الحيط ومسكه من لياقه قميصه وعيونه كلها شر وغضب جري عبدالله عليه وهوه بيحاول يفك ايده بعيد عن الدكتور خالد.
مراد؛ أنت قلت ايه احلام خطيبتك انطق.
د خالد؛ وهوه مش مستوعب اللي حصل وبيحاول يفك نفسه من تحت ايدين مراد.. وزق ايده بقوه وقال. ابعد ايدك ياحيوان انت ازاي تمد ايدك عليا انت مش عارف انا مين انا هحبسك.
مراد؛ وعبدالله بيحاول يسيطر عليه وهوه في قمه غضبه.. احلام تخصني انا واحسنلك تبعد عنها والا هتندم يادكتور.
د خالد؛ انا اللي هندمك على اللي عملته ده غالي اوي.
مراد؛ وريني هتعمل ايه وانا حذرتك ابعد عن احلام والا هموتك.
ومشي دخالد على مكتبه بعد ماالمستشفي كلها اتفرجت على الخناقه.ودخل دخالد مكتبه وكان وراه د محمد وكان متعصب جدا... بقلمي #ملك روحي
دمحمد؛ممكن تقولي ايه اللي بيحصل ده انا حذرتك قبل كده.
د خالد؛ بعصبيه. انا مش ناقصك يادكتور محمد مفيش حاجه حصلت.
دمحمد؛ والخناقه اللي حصلت دلوقتي مش بسبب الدكتوره الجديده اللي انت جبتها انا كنت متوقع كل ده وقلتلك انا مش عايز مشاكل كل شويه في المستشفى وانت مسمعتش الكلام متزعلش بقاا مني ومن اللي هعمله.
د خالد؛ هتعمل ايه يعني المستشفى دي بتاعتي زي ماهيا بتاعتك احنا شركاء فيها واي تصرف هتعمله هقلب عليك الدنيا ومتنساش انت كمان ليك مستندات معايا اي تصرف هتعمله هندمك عليه.
دمحمد؛ الشر طلع من عينيه. انت بتهددني.
د خالد؛ أنت اللي جاي تهددني وعايز تخرب بيتي بس انا مش هسمحلك وعليا وعلى أعدائي.
دمحمد؛ ماشي يادكتور خالد. ومشي من مكتبه وهوه بيتوعدله انه هيخليه يندم على كلامه.
عند مراد..
عبدالله اخده وطلع بره المستشفى عشان يهديه.
عبدالله؛ أنت ازاي تعمل كده بتتخانق في المستشفى انت مش فاهم انك بكده بتعمل مشكله لأحلام.
مراد؛ أنت مسمعتش كلامه واللي قاله وامتا ده حصل على جثتي ده يحصل ازاي يتخطبوا انا لازم اروحلها وافهم منها.
عبدالله؛ مسكه من دراعه.. تروح فين يامراد احلام تعبانه من الضغط اللي اتعرضتله بسببك وكمان رايح تتخانق معاها انت مش عارف بتعمل ايه.
مراد؛ انا هتجنن ياعبدالله هيا ازاي بتحبني وازاي بتتخطب للدكتور ده.
عبدالله؛ دي حياتها وهيا حره انت بتحاسبها على ايه مش انت اللي سبتها وكسرت قلبها استحمل بقاا
لو قربك منها هيسببلها مشاكل انا مش هسمحلك يامراد تأذيها لو احلام عايزاك يبقى تقرب بموافقتها غير كده لا انت فاهم.
مراد؛ حتى انت ياعبدالله وانا اللي فاكر انك حاسس بيا وبالنار اللي في قلبي.
عبدالله؛ انا حاسس بيك بس لازم تهدي وتفكر هتعمل ايه من غير عصبيه لازم احلام تعرف انك اتغيرت وأنك بتحبها اكيد هتقبل ترجعلك بس بالهداوه وخليني انا اكلمها.
مراد؛ هز رأسه بالموافقه.
عبدالله؛ انا هدخل اطمن عليها وانت خليك هنا وانا مش هتأخر.
مراد؛ تمام.
ودخل عبدالله عشان يشوف احلام وسأل عليها الممرضه وقالتله انها فاقت. وخبط عالباب وأستأذن الدخول ودخل.
احلام؛ اتعدلت وقالتله اتفضل ياعبدالله.
عبدالله؛ حمدلله على السلامه الف سلامه عليكي ايه اللي حصل.
احلام؛ يعني صاحبك مقلكش.
عبدالله؛ لا قالي بس انا عايز اعرف منك.
احلام؛ كان جاي يتأسفلي وفاهم اني هبقي غبيه للمره الثانيه وهصدق انه بقا راجل.
عبدالله؛ بس مراد اتغير يااحلام وبيحبك انا متأكد من كلامي ياريت تديله فرصه وتدي نفسك فرصه انتي كمان لاني متأكد انك بتحبيه.
احلام؛ مراد ميعرفش يعني إيه حب مراد حس اني بضيع من ايده فامينفعش طبعا انه يخسر واحده كانت بتحبه وبتجري وراه وتتمنى يبصلها.بس وحياه الحب اللي حبيتهوله وميستاهلوش لأندمه على كل حاجه عملها فيا.
عبدالله؛ صدقيني مراد بيحبك وندم على كل حاجه بلاش تعندي وتضيعيه من ايدك.
احلام؛ هوه اللي ضيع كل حاجه عشان ميستاهلش.
وفجأه الباب اتفتح وكان مراد. اتفاجأ عبدالله واحلام بصتله بغضب. انت ازاي تيجي هنا وبتدخل كده ازاي من غير استأذان.
عبدالله :انا مش قلتلك استناني بره يامراد وبلاش تهور.
مراد؛ كان ساكت وكل اللي بيعمله انه بيقرب من احلام وعيونه على عيونها وقعد جنب السرير وقرب منها.. وهوه باصص في عيونها وهيا قلبها بيدق جامد من قربه.
مراد؛ بهدوء.. والله بحبك ومحبيتش حد غيرك ومحسيتش الاحساس ده قبل كده غير معاكي وندمت على كل حاجه صدقيني.
احلام؛ بصت في الأرض واتصنعت الجديه عكس التوتر اللي سيطر عليها. وقالت.. ودي بقاا تمثيليه جديده جاي تعملها عليا وفاهم اني هصدقك انت بتحلم.
مراد؛ بعصبيه.. افهمي بقاا انا بحبك وندمت اني ضيعتك من ايدي افهمي بعندك ده هتضيعي اللي مابينا.
احلام؛ مكانش في حاجه مابينا عشان تضيع يامراد بيه متكبرش الموضوع.
مراد؛ انتي فاهمه لما تتخطبي للدكتور خالد بكده هتخليني ابعد انتي بتحلمي.
احلام؛ استغربت انه عرف بصتله بتحدي عشان تردله شويه من اللي عمله فيها.. ايوه هتخطب لدكتور خالد. راجل بجد وبيحبني وعرف ان ابويا جنايني ومهموش كل ده كل اللي يهمه انا وبس مش عايز غيري عارف قيمتي مش زيك حبيتك وانت لعبت بيا وكسرت قلبي وحياه الحب اللي حبيتهولك لأعيش حياتي مع راجل يحبني ويقدرني ويعرف قيمتي وساعتها هكون مبسوطه وسعيده بس انت هتفضل لوحدك عشان اللي زيك ميعرفوش يحبوا يعرفوا يجرحوا وبس ويعايروا الناس بفقرهم هتعيش لوحدك وهتموت لوحدك.
مراد؛ بصلها والدموع في عيونه وحس بالعجز وأنه خلاص ضيعها من بين ايديه.. وخرج من غير مايرد عليها..
عبدالله؛ زودتيها يااحلام عبدالله عرف غلطه صدقيني بيحبك بجد مضيعيش حب عمرك بالعناد ده.
احلام؛ ودموعها زي الشلال ارجوك ياعبدالله مش عايزه اسمع حاجه سيبني لوحدي ارجوك.
عبدالله :خرج عشان يلحق مراد ونزل وراه وكان مراد في قمه غضبه وركب عربيته وهوه متعصب وبيفتكر كلام احلام اللي كان بيقطع في قلبه..
عبدالله؛ ركب جنبه. ومبقاش عارف يقوله حاجه وبصله وسكت... بقلمي #ملك روحي
مراد؛ هوه انا ليه بيحصل معايا كده كل ماأحب حد يسيبني ويمشي كل مااتعلق بحد اضيعه من ايدي ويجرحني ودايما ميصدقنيش سليم اخويا كمان مشي وسابني وهوه فاكر اني خونته مع حبيبته بس هيا اللي خانته مش انا ولما كشفتها ورفضت اكون معاها انتقمت مني وقالت لسليم اني حاولت اتقرب منها ورتبت كل حاجه عشان يشوفنا مع بعض سليم مصدقش اني اخونه حاولت أفهمه وجريت وراه بس هوه ركب عربيته ومشي ومرجعش تاني الموت كان اقرب ليه مني. مات وهوه فاكر اني خونته..
عبدالله :اهدي يامراد انت ليه بتفتكر اللي فات سليم فهم غلط وده قضاء وقدر انت مالكش زنب فيه.
مراد؛ لأ ليا انا السبب في موته عشان خبيت عليه ان البنت اللي حبها خاينه خانته قبل كده مع كمال وبعدها حاولت تخونه معايا انا اللي سكت وخبيت عليه عشان خوفت اكسرله قلبه بس فهمت متأخر اني بضيعه من ايدي.
عبدالله؛ خلاص يامراد اهدي ارجوك.
مراد؛ انا مش هسيبهم انا هنتقم منهم كلهم وهجيب حق سليم.
عبدالله؛ احنا قلنا بلاش الكلام ده انت عايز تضيع نفسك انت ناسي احلام وحبك اللي عايز ترجعه.
مراد؛ بكسره وصوت مهزوز. احلام خلاص ضاعت من ايدي خلاص ياعبدالله عمرها ماهتسامحني ولا ترجعلي تاني ضيعتها وسابتني زي سليم ماسابني ومشي انا خلاص هعيش لوحدي زي ماهيا قالت مبقاش في حد جنبي انا استاهل عشان غبي ومبعرفش احافظ على اللي بيحبوني. ابعد انت كمان ياعبدالله عشان متسببش ليك في وجع امشي انت كمان وسيبني لوحدي. انززل ياعبدالله عايز ابقى لوحدي وياريت متجيش تاني مش عايز اشوف حد سيبوني لوحدي.
عبدالله؛ اهدي يامراد انا مش هسيبك ومش هنزل.
مراد؛ بغضب وزعيق انزل ياعبدالله مش عايز حد معايا انزل بقولك ابعد انت كمان انززززل.
عبدالله؛ صرخ في مراد وقاله مش هنزل مهما تعمل.
مراد؛ نزل من العربيه ووقف تاكسي وركب فيه ومشي وساب عبدالله في العربيه.
عبدالله؛ مجنون اقسم بالله استنى يامراد رايح فين وساق العربيه وطلع وراه..