رواية كاظيمة
الفصل الخامس5
بقلم وسام الفرجاني
المغرب صار صياح عمتي ويمها زلم وحطيت ع راسي وطلعت شكو وشكو شبيكم شصاير كلبي حسني رسول بي شي جان يكولون رسول غرك بالشط !!
حيلي انهد ورجليه بعد متشيلني كتله شنو شنو كالولي توكلي بالله اختي هذا قدر الله ولا اعتراض عليه .. لزمت بجفي التراب الي جواي وطشيته ع راسي رسووول وينه جيبولي رسول ولكم رسول ميعوفني ويروح اني واثقة ميروح ويعوف ابنه كبل مايشوفه ..
طلعت اركض معرف وين اريد رسول رسول وينك حياتي امجد ماشافك بعد ليش تعوفه ؟
ويلزمون بية وين رايدة يمعودة هسة يطلعوه ويجيبوه هنا وكتلهم عوفوني عوفوووني وضربتهم وخروا عني اني كتله من بارحة عينك ع نفسك من الشط
رسول ميغرك عمت عيني عليه هيج زلمة ياخذه الماي ولو الماي مدري شقصته ويانه احنه الي يـمو@ت عطشان لو غركان !!
عمتي صياحها اسمعه بس صوتها مختلف اسمعه واني انوح وابجي بس مو يمها اني جنت امسح راسي بتراب الكاع كلها وشعري الي ماله داعي بعدم وجود رسول ..
ياربي بوكت حلت الدنيا بعيني وصار انسان يعرف قيمتي ويحبني تاخذه يارب والله ماعشت عيشة بيها خير من وعيت ع دنيا ظيم بظيم ..
جان يشيل ملفع ولد ويحطه ع راسي ويكلي كومي كافي كدام الناس فوتي بغرفتج ابجي واستري شعرج يلا
باوعتله لكيته نفس الشخص الي نقذني !
وهو نفسه الي من جنت عزباء جان يباوعلي الي اسمه رافد بأول بارت كتلكم عنه و جنت ارتاح لنظراته بالضبط لان من نقذني جانت ليل ومن يجي لرسول قبل وفاته مكدر اشوفه وياه زلم بس اسمع صوته صوت الي نقذني
بس بعدين من شفته وسمعت صوته عرفت من الشوفه هو نفس الاعجاب بوقت المراهقة ومن صوت نفسه الي انقذني طلع هو واحد نفسه #رافد
شهالصدفة وشهالتفكير وشجابه ووين جان وليش اجه ما ادري عقلي وكف عن تفكير ..
بساعتها ماجنت مهتمة اله لان مصابي جبير وحرورة غرك رسول بعدها تغلي بروحي
اجت رواء وبنات عم رسول شالوني لغرفتي والكل يكهد ويبجي حتى رواء الحية شفتها تبجي بجي مو طبيعي ..
يروحي وين انت هسة ليش عفتني وحدي مو وعدتني تظل وياي .. بهاللحظات طببوا رسول للبيت بتابوت و علت الاصوات والصياح وعرفته وصلوا طلعت ركض نزلوا حبيبي خلوني اشمه راح حبيبي وهو يوصيني ع امجد
لزمت بطني وكتله مجودي حبيبي هذا ابوك مو تسالني عليه بس تجي هاي اخر مرة تكون قريب منه اشبع منه يلا
عمتي سمعت سوالفي شلون احاجي امجد الي بطني ولزمت خدودها تخمش حتى زوركت خدودها وطبعت اظافرها بي ..
كتلهم لتاخذونه خلوه يمي الليلة .. ماقبلوا وخري كافي يلا كافي .. خلووووه يمي ماسامحكم والله .. جان يصيحون تعالوا اخذوها يلا نريد ندفنه ورانه طريق اخذوا النسوان ..
شالوه بعد روحي وفروا بالبيت واخذوا ان شاء الله انأخذت روحي بعده وما اشوف نور ورى عيونه
اخذوا رسول بعد ميرجع صيحتلهم خلي يروح سفرة ميخالف ويجيني ثاني يوم قبلانة خلوه بربكم خلوه يروح سفرة
عافوني محد يسمعني صعدوا التابوت واخذوه واني طلعت اركض وراهم اشوفه وهو رايح ولزمني بنات عمه وكالولي تعالي فوتي لغرفتج تعالي كتلهم عوفوني شدخلكم ..
لزموني 3 وحطوني بالغرفة ومن ساعتها انقلبت حياتي عبارة عن سواد بسواد
راح سندج بالحياة يا كاظمية منو الج هسة حتصيرين لكمة بكل حلك راح الي يدافع عنج
اول ليلة وفقيدي بقبره ما اكلكم احسها سنة تعدت وهالليلة ماتعدت .. كلما يسدون باب غرفتي افتحه لحد يسده هسة يجي رسول تعبان حتى يفوت كبل
الي يحاول يسده اعاركه وصياح لتسسسد الباب لتسد الباب اذا يجي رسول شكله .. صاروا يعاملوني مثل المخبلة وينطوني ع كد عقلي ..
سووا فاتحة ببيت عمه ابو رواء لان مقابيلهم شارع كبير وتحوي الفاتحة وكذلك بعيدا عن اصوات صياحنا وخلوا النسوان عدنا يجن ..
القصة خاصة بصفحة وسام الفراجي
عمتي الليل كله ما سمعت حرف منها وماحجت فقط تصيح وصياحها بي شحطة مو صياح اعتيادي مدري اني ما اسمع بس مية بالمية بيها شي ..
المهم الفاتحة تظل لتالي الليل و وولد عم رسول واصدقائه يعزبون بالناس الي تجي واني لابسة اسود وساعة تقريبا 11 بالليل طلعت ع حمامات وصار عندي فضول اشوف فاتحة رسول فطلعت من بيت بيتنا وبيت عمه ابو رواء كلت من الحايط تبين الفاتحة مالتهم اشوف احد يجي لفقيدي او لا بهاللحظة جان اشوف رواء ورافد خاتلين جوة شجرة التين وحاضنين بعض واحنه بنص الظيم وهم وين
سمعوا حركتي وفزوا اثنينهم وشفتهم بالجرم المشهود وبدون اي كلمة رافد راح للفاتحة شايل سطل ماي يرش الكاع الي كدام الفاتحة وهي كبل طلعت لبيتهم ..
طلع هذا يتحجج بهالامور يتلاكى برواء .. رجعت وين اني وين هالشغلات الي شفتهن شديصير بس حفظت الموقف بعقلي لان جان مو وقت تفكير وعتب جنت بحالة نفسة ما تساعد حتى اسولف واحجي لان غرك رسول جان مأثرة عليه جدا وعادي محجيت رجعت حتى ماشفت الفاتحة شلون صايرة ورحت للحمامات ورجعت لغرفتي ..
بجيت وبجيت وبجيت ماخليت دمعة تتحسف عليها ما نزلتها ع رسول .. وكفت ع مراية باوعت لنفسي شفت شامتي كلت وينك حبيبي رسول هاي الشامة الي تحبها طلعت تعال شوفها ..
لمستها بيدي وغمضت صرت اتخيله رسول يمها تعال حبيبي هاي مالتك شمها مثل كل مرة اعرفك تحب الشام ..
رسول دا تشوف شعري شلون مخربط يلا انتظرك حبيبي بعد ابوي وامي حتى تمشطه بيدك مو جنت تريد هيج تسوي واني اخجل منك تعال هسة موافقة تعال سوي الي يعجبك
دا احاجي المراية وعايشة بالخيال ويا رسول واتخيله يمي فات مدري منو من باب التفتت لكيت امي جان اكلها يمة ليش مادكيتي الباب رسول ميقبل احد يشوف شامتي غيره
القصة خاصة بصفحة وسام الفراجي
امي كامت تبجي واجت تحضني حبيبتي ليش هيج تسويين بنفسج كولي الحمد لله الانسان ع قدر ايمانه يبتلى
كولي الحمد لله ع قضاءك وقدرك خيرا او شرًا ديربالك تيأسي من رحمة الله
كاظمية : يمة انتو مو تكولون رسول مات هسة اجاني وسولف وياي
امي : اي بنتي زين يلا اسكتي حبيبي وكافي تحجين ويا المراية
كاظمية : لا مو مراية هذا رسول بس ماتشوفونه بس اني دا اشوفه
امي : اي حبيبتي عفية لتصيحين بعد وتضربين نفسج مو دا يجيج وجهج كله خموش من ورا اظافرك
كاظمية : لا ما سوي شي دام رسول يمي ليش ابجي مو يمة
امي : اي بنتي يلا امشي تكملين عدة مالتج ببيتنا
كاظمية : وين ؟ يا بيت ؟ وارجع لابوية لا اني هنا يم رسول .. رسول ميقبل اعوف بيتي هسة يجي ومايلكاني
امي : يا حبيبتي ميصير تظلين هنا ولازم تلزمين عدة وهنا زلم يشوفوج يلا كومي نروح للبيت
كاظمية : بس اذا دز عليه رسول ارجع مو ؟
امي : اي حبيبتي بيتج هذا امشي
(صاروا يعاملوني معاملة مخبلة وتحجي وكلشي يكولون الها اي .. )
اخذوني للبيت وفرغولي غرفة واهلنا كلهم بغرفة الثانية بس شنو امي كالت الي لا تطلعين لا هنا ولا هنا ميصير احد يشوفك هاي عدة مو لعبة
كتلها ماشي بس اذا يجي رسول اطلعله مو كالت اي عود من يجي .. سألت امي ع ابوية كالت بالفاتحة ظل يأدي واجب وبعدين يجي
كالتلي ليش كتلها مو يكتلني ترا ماعليه اني كالتلي شهالحجي حبيبتي محد يقربلك يلا ظلي بالغرفة اجيبلك شوربة حارة زينة لمعدتك ..
لابسة اسود ومغنتبة ووجهي عبوس وصايرة شاذي من غير فاتحة اني زركة انوب فاتحة وفقيدي راح من ايدي
كعدت وجابلني شوربة مكدر اعبر خاشوكة وحدة من الشوربة بزردومي .. كعدت اباوع لصحن الشوربة و اجت امي لكتني صافنة ع صحن
امي : شبيج يمة اكلي شوي زين الك
كاظمية : انتظر رسول يجي لان جوعان هسة اكيد
امي : شوربة كثيرة من يجي اصبله يلا اكلي مو زين ع الي بطنج لازم ياكلون
كاظمية : هئ ماريد اخذي من يجي رسول عود اكل ميصير اكل وهو جوعان
امي : يارب صبرني ع مبتلاي
ظليت كاعدة واخذت وياي شماغ اله يلبسه من يروح للبستان وحاضنته واشم بي حيل جان بهاللحظة يطب ابوية و جنت منتظرة منه كلمة تبرد كلبي تواسيني لان خسارتي كبيرة
شاف الباب مفتوح مال غرفتي ..
ابوية : ليش فاتحة الباب ؟ شنو تريدين العالم تشوفك
كاظمية :هسة راح يجي رسول ميصير ينقفل
ابوية : تخبلتي رسمي سدي الباب لحد يشوف جهرتج
طلع و رد الباب وراه واني حسيت بخنكة خنكة خبر غرك رسول جنت اتمنى بحياتي مرة وحدة يسمعني كلمة زينة يريح بيها كلبي واني بعز مأساتي جنت اريد بس كلمة عطف منه حتلو كذب والله صحيح حتلو كذب بس اقنع بيها روحي واكول عندي اب حنون
المهم خليته كم دقيقة وجان افتح الباب ماريد ينسد اريد يجيني رسول ..
رجعلي وكلي من الله غركج مكان رسول وخلصت منج وافتكيت من همج يعني
شيسوي بيج الله بعد 💔
سمعت صوت كسرة كلبي ب اذاني من عنف سالفته وقساوتها واني بس ابتسمتله كتله اي والله كون اني مكانه ولا هو
سد الباب بيده انوب بس بقوة ضربه ضرب وكمت فتحته اني ماعاد يهمني شي
صرت اعيش ايام سودة خصوصا ايام العدة كوة كملتهن من ظيم ابوية وسوالفه وكل شوي لو يعيرني لو يشمرلي سالفة
اخر شي اليوم شافني بغرفتي ابجي جان يهز ايده ويكلي هو انت صاحية كاعدة ع كلبي منو يكلبج بعد وانت ارملة والله يالله 💔
بعد ماكملت العدة خليت امي تروح لغرفتي الي متروكة وبلغتها تسلم عليهم وتفتح جنطة السودة بيها كم ورقة تجيبها وتكلهم اريد اجيب ملابس كاظمية وتاخذ الاوراق بدون ما يدرون وامي مو مفتهمة السالفة
وبالفعل جابتهن وجابت المستندات وضميتهن كبل لا ابوي يشوفهن لان ما اتحمل العيشة هنا اريد اكعد ببيتي الي اشتراه رسول الي واخلص منه حتلو اعيش وحدي بس كلت مو وكتها هسة رسول ما صار كثير من مات ..
تسارعت الايام وصار وقت الحمل وبطني صارت شبر ليكدام والحمد لله وبفضل الله رزقني الله بتوم ولد كتلهم رسول جان يريد يسمي ابنه امجد وهذا الجبير الاول واحد طلع والثاني اسعد وهيج يصيرون امجد واسعد ..
توم كإنما ربي يكلي هاي عوض عن حنان ابوج الفاقدته وعن رسول الفاقدته ..
حسيتهم ذولي الي راح اعيش علمودهم ويسندوني ويعيشوني بكرامة بس يكبرون وصرت اتخيل شلون يدافعون عني وميقبلون احد يتنمر عليه او يحجي عليه وصرت ارضعهم من صدري ورغم جنت اعاني كلش من هالحالة لان مو كلش جبيرة بس الحمد لله ..
واجت عمتي ورواء وبنات عم رسول الله يرحمه يسلمون عليه ويباركولي وعمتي لزمت امجد وكامت تبجي يروحي نفس خشة رسول بالضبط يبعد روحي وكلبت الكعدة لبجي ودموع
وصرت اخاف عليهم من الهوى وامهدهم بيدي واكعد اغنيلهم دللول يالولد يبني دللول ورغم كثير يبجون بس جنت وياهم بكل ثانية تمر بحياتهم اريدهم يكبرون بين ادية ..
واجت سنوية رسول وتحضرتله اروحله لقبره ازوره .. واجه ابوي كلي وين كتله اروح لسنوية رسول كال اكعدي ماكو روحه كتله يابه ميصير حرام عليك كال اكعععدي اكلك
كعدت بس كلت والله الا اروحله لو يكطعني خليته الما يروح و اخلي الجهال يم امي واطلع مو هامني شي ورحتله وزرته وبجيت وبردت كلبي ورجعت لكيته منتظرني ابوية اني مستسلمة لامر الواقع وادري حنكتل بس عادي اهم شي سنوية مال وفاته ازوره بيها واسولف رياه
تلكاني ابوية وبـ عود مال رمان عاد هذا يلزك بالجسم يطبع طبع كتلني صلخني صلخ بحيث جسمي واني سمرة صار احمر من عود الرمان مالته .. كلي انتِ هيج تديحين بكيفج اني اعرف شلون اكسر ركبتج
مرت 4 ايام جسمي يوجعني وضلوعي تصيح من الي شفته من ابوي ومكدر حتى ادنك وارضع جهالي من ورا الكتلة
تدرون شي ههه جاي اضحك من حسرتي لا تعبالون مكيفة بس كل الغربة والكرابة كيفت بالتوم وباركتلي بس ابوي ولا اجه عليهم ولا شافهم ههه
اجه ابوي فتح باب الغرفة لان جهال يبجون وصار يصيح نريد انام هو انتِ وحدج محد متحملج انوب 2 وياج صاروا سكتيهم نريد ننطمر
طلع واريدهم بس يسكتون الا اجت امي وياي وصارت تسكت بيهم ومهدتهم زين وشالتهم حتى بس ينام ابوية
المهم صار عمرهم تقريبا 9 اشهر جان تجي امي عليه تكلي ابوج جاي عليه ابو حذيفة وسائل عنج وكايلة يريدج ع سنة الله ورسوله
كتلها شبيكم كل عقلكم منو كلكم اريد اتزوج ثانيا هو مو رجليه بالكبر عمره 60 مدري 50 سنة كلتلي مدري هذا الي حجالي اياه .. القصة خاصة بصفحة وسام الفراجي
كتلهم والله ما اخذه لو اهج منا وطبعا اني ردت بس شوي يشدون الجهال شوي لان ما اعرف بيهم ولازم امي وياي وبعدين اطلع المستند واروح لبيت عيالي اخذ حقي واسكن ببيتي وحدي واربيهم واشتغل اي شي ..
عاد امي كالت اني اروح اتعذر منهم اكلهم خلي يتركون هالسالفة البنت ماتريدكم بدون ما يدري ابوج والحمد لله خلصت من هالشايب الله لا ينطي العافية هو وحذيفة بعد وام حذيفة الي مو شادة عليه وكارصته ..
ماكو شهر تقريبا وانها عمتي ام رواء جاية وام رسول يسلمون واستغرب بصراحة لان شفت بعيونهم حجي وام رسول ظلت تبوس بالجهال وهلا برويحاتي ومن هالسوالف وتشمشم بيهم
جانت كاعدة امي جان تكول بصراحة الموت قدر ولازم واحد مايعترض عليه وشي راح و كاظمية بنية صلاوات عليها وعدها جهال من ابنه رسول ومانريدهم يضيعون
كالتهم امي اي !!
كالت نريد ناخذها لسمير اخو رواء !!