رواية احببت معقدة
الفصل الخامس 5
بقلم فاطمة سلطان
فليسقط كل من جعلني اشعر بالوجع ، فلتُلحق اللعنه بكل شخص كان السبب في حزني
انا لم اكن اعلمه وانتم من وضعتموه امامي وليس ذنبي تعلق قلبي به، فالمرء علي حسب ما اعتاد
____________________________________
علي لسان هدير
صعبت عليا نفسي لما اتهانت بالشكل ده، اليوم فضل معلم فيا لسنين طويله وكان السبب اني امشي في طريق مختلف تماما حتي لو كان الطريق ده غلط انا كنت راضيه بيه كفايا اني كنت عايزه انسي هدير بالعُقد اللي فيها
و انسي هدير الضعيفه حتي لو لمده ساعات في الخفي عايزه انسي انا مين و كاني بقيت شخص تاني و بؤمن بمعتقدات تانيه وفي نفس الوقت بكره نفسي وعملت كل شي كان بالنسبالي منكرعرفت حاجات مكنتش اتخيل انها موجوده عرفت قد ايه ان هدير الساذجة خلاص مبقتش موجوده او بقيت عايزه بشخصيتين جوايا الصح و جوايا الغلط
______________________________________
لم تجد هدير نفسها غير وهي تضع يدها علي وجهها في حضن عمتها التي تصرخ في وجه اخيها، كانت مندهشة حتي الدمعه أبت النزول ..
هاجر بغضب شديد جدا
- انتَ اتجننت وله ايه يا حسني
وليد رغم اشتعاله بسبب أحاديث الناس ولكنه لم يتوقع ان يثور ابيه لهذه الدرجة ويصفعها ربما والده مهما غضب عليهم وثار عليهما لم يرفع يده علي اي شخص منهما
- ايه يا بابا اللي عملته ده
حسني بغضب ونبرة صارخة وصوت غليظ
- و لا حد فيكم ينطق بكلمه كفايا قله ادب و مسخره ، الهانم اللي رايحه جاية علي حل شعرها مع البيه والشباب يتخانقوا في الشارع علشانها و سيرتنا تبقي علي كل لسان مهوا العيب مش عليكي العيب علي اللي ربتك ما تربيه ست
هاجر بغضب وحده من اتهامات اخيها وكلماه الجارح
- حسني احترم نفسك بقولك و حاسب علي كلامك كل اللي حصل انه ...
حسني قاطعها قائلا
- مسمعش صوتك مش فالحه غير تديني دروس في الاخلاق و كلام زي السم في الطالعه و النازله علشان اخوكي كان فين لسانك وفين الدين والشرع و الاصول اللي بتتكلمي عليها
و انتِ سيباها رايحه جايه مع شاب وداخل طالع عليكم ايييه كانت عقلك فين اللي شايفه ان محدش يعرف في الاصول غيرك
وله الاصول مكنتش الا علينا انتِ هتكبري وتخرفي، اتحملتي مسؤوليتها علشان تربيها وله علشان تسبيها دايره علي حل شعرها
وليد ربما يشعر بالغضب ولا يقل عن غضب أبيه و لكن كلمات والده كانت قاسية خصوصا علي عمته فهو يحترمها ويعلم ان هذا الكلام كان ثقيل علي امراه في عمر والدته مهما حدث و مهما فعلت
- خلاص يا بابا عمتو .....
حسني قاطع ابنه بنبرة غاضبة تماما
- اسكت انتَ كمان لما اطلع انا و ابني شُحطه و داخلين الشارع الاقي البيه ماسك في واحد صايع تاني ضرب و الناس ملمومه و اعرف ان الخناقه علي بنت اخويا اللي احنا مش رجاله ولا عارفين نحكم عليها بقالنا اكتر من خمسين سنه في الشارع ده والناس عارفين أحنا مين واحده زيك عيله لا راحت ولا جت تطلعنا كلنا بقرون
ابتعدت هدير عن هاجر بعد ان استيقظت من الصدمة التي كانت بها و لم تستغرب حينما وجدت نفسها لم تبكي و كأن الدموع قد جفت فلن تذرف دمعه منها بعد الان
- عمتي ربتني لدرجه اني مش هرد عليك بس معلش يا عمي انا فعلا ملقتش راجل يربيني و لو شايف ان ده عيب واني تربيه واحده ست ابقي كلم اخوك في الموضوع ده هو اكتر واحد تقدر تلومه محدش يلوم عمتي علي حاجه
حسني باشتعال من شموخها وبجاحتها بالنسبه له
- ده انتِ بجحه صحيح لسه ليكي عين تردي يا مقصوفه الرقبه جايبه طوله اللسان دي منين اللي زيك تتكسف مش تبجح سبوني عليها والله لاقتلها لو ابوكي مربكيش و انا غفلت عنك احنا لسه فيها
اربيكي انا
وقف بينه و بينها وليد وهاجر التي أردفت قائلة بغضب
- مش من حقك تضرب هدير هي معملتش حاجه غلط وعمر ما قاسم طلع شقتنا لوحده او حتي وانا مش موجوده فكر يطلع ولو بيوصلها ده بسبب تعبي لما كنت مش بتحرك وكانت محتاجه حد يوصلها و الجامعه بعيده عليها بتروح مع صاحبتها سارهو حتي هي لو غلطت مش من حقك تمد ايدك عليها علشان كلام سمعته من الناس
حسني بانزعاج وغضب فمازال يتذكر احراجه بين الناس و ما تفوهوا به بكلمات تجرح اي رجل
- مش بقولك كبرتي وخرفتي انتِ لسه بتقويها و هي بتمشي بصفه ايه مع النيله قاسم بيه ده بصفه انها عيله لسه في ابتدائي وهو بيتعلم المشي وله ايه ما تفوقي
لنفسك يا هاجر لما شحط يمشي جنب بنت اللي علي وش جواز في الرايحة و الجاية منتظره
الناس تقول انه زي اخوها من امته و احنا عندنا المفاهيم دي والله ما حد خرب دماغها غيرك ...
شعرت هدير بالتعب الشديد ودوران في رأسها مما جعلهم يلتفتوا علي صوت اصطدام ها بالارض ، فنظرت هاجر و صرخت حينما وجدتها قد فقدت وعيها تماما حملها وليد لاقرب اريكه بعد إصرار والده بالا ياخذه اليالمستشفي بهذا الشكل حتي لا يثيروا شكوك الناس
فصرخت به هاجر ووليد، ثم هبط وليد حتي يأتي باي طبيب
______________________________________
كان قاسم يجلس مع صديقه كريم في الصيدلية
وكان صديقة يحاول ان يعالج ذلك الجرح الذي احدثه الفتي في كتفه، بعد أغلق باب الصيدلية
أردف كريم بعتاب شديد لصديقه
- يعني يوم ما تتخانق .. تتخانق مع بلطجي الشارع يا قاسم عايز تودي نفسك في داهيه
قاسم بغضب شديد ونبرة مشتعلة كلما يتذكر حديث ذلك المعتوة
- عفاريت الدنيا بتطنط في وشي كان لازم نروح القسم و احبسه و تولع الناس كلها
كريم بسخرية لاذعة وكأن امثال هذا الشاب قد يفرق معه ذهابه الي القسم
- ما تحبسه هو كده عقاب ده يحشش هناك ده لو بات في بيته يوم بيحس انه غريب ده انتَ كنت هتفتح دماغه و خرشمت وشه لورحت هتتحبسوا انتم الاتنين و انتَ مش وش كده هو بالنسباله مش هتفرق
انا عايز افهم ام محمد دي ازاي كانت جايبه الحيوان ده عريس لهدير
- الدم غلي في عروقي ملقتش نفسي غير اني ماسك فيه لما قال انها صايعه معايا في الرايحة و الجاية و قال كلام كتير مش عايز افتكره ابن الكلب ده لو اطوله تاني
كريم بمرح حتي يخفف من حده الجو
- علي فكره ابويا هيخصم القطن و الحاجات دي من مرتبك ده انا لو خت فلوموكس بيحاسبني عليه
أردف قاسم بانزعاج و نبره هادئة لا تقارن مع الثورة التي تقام بداخله
- احنا في ايه وله في ايه تفتكر عمها عمل ايه معاها ؟
انا عرفت من ساره انها رجعت و قولتلها حاولي انك تروحلها
كريم بصراحه مطلقة فهو لن يزين الحديث فلا يتقبل اي رجل ما حدث علي كرامته
- الواحد يتوقع انه يعمل اي حاجه فيها، الراجل اتحرج جدا ومهما عمل محدش يقدر يلومه
اللي سمعه مش قليل
قاسم بانزعاج حينما شعر بأنه سيلحق بها الضرر بسببه
- ازاي يعني محدش يلومه، وهو كان فين السنين دي كلها مكنش واقف جنبها ليه، هدير لسه صغيرة و هي في ظروف نفسية وحشة متسمحش لحد انه يفكر يأسي عليها
- هي بنت اخوه وعيله واحدة في الاول والاخر اللي داخل بينهم خارج
احنا صحاب يا قاسم واخوات كمان صح ؟
قاسم بتأكيد فهو رفيق عمره منذ المرحلة الابتدائية تقريبا
- اكيد طبعا
- انا اخ وحيد علي تلت بنات ولو واحده عملت كدا منهم والله العظيم لاقتلها قبل ما ابويا يعملها ....
قاسم قاطعه بانزعاج فهو يعلم الي اين سيأخذهما الحديث
- انا علي اخري وربنا، انتَ واخواتك شي و ظروف هدير شي تاني مينفعش انها تتقارن بحد انتَ جنب اخواتكو ابوك معاهم اخواتك معندهمش نقص اسمه وجود راجل في حياتهم مش بمعني حب او كده بس عندهم حد واقف في ضهرهم
حاسيين يعني ايه عيله بتحبهم ، هدير كل ده مش موجود عندها
كريم أردف بنبرة هادئة فهو لا يريد ان يصل الي تلك النقطة فقط
- خلينا نتكلم بالعقل برضو هدير زي اختي ولو احتاجت حاجه مش هتاخر عليها ابدا و اي خدمه هعملها ليها علشان احنا جيران و زي اختي ، بس مينفعش اني افضل ملازمها اربعة وعشرين ساعة اخري اقولها السلام عليكم، لو لقتها في الشارع
و لو جت هنا تشتري علاج لعمتها تجيب اي حاجه اوجب معاها
بس الموضوع زاد بالنسبالك يا صاحبي ..
قاسم أردف بانزعاج بعد ان تنهد تنهيدة مطوله فقد شغله هذا الموضوع كثيرا
- انا معملتش حاجه غلط يا كريم متكلمنيش زيهم علشان هقفل منك بجد و هقوم امشي اغور في اي حته ...
كريم مازال مستمرا في الحديث ولم يهمه ما تفوه به قاسم
- يمكن انتَ معندكش اخوات بنات و لو اختك عايشه مكنتش هتوافق بكده اكيد و متحاولش تبرر الموضوع غلطيمكن انا مقدر كويس ان نيتك ناحيه هديركويسة
و مامتك برضو هتكون فاهمة كده، بس مش كل الناس هتفهم ده
يا شيخ ده اللي بيعمل حاجه غلط بيداري و يخبي مش بيوصلها وياخدها لغايت بيتها وكلام في البلكونات قدام الناس ده اللي بيعمل حاجه غلط مبيعملش كده يا جدع
انتَ قدام الناس عملت الاسوء من الغلط انتَ عملت صح من وجه نظرك انتَ و هما حسبوه غلط و لما الصح في وجهه نظرك انتَ يتقارن بالغلط يبقي عمره ما كان صح ...
قاسم بارهاق شديد وانزعاج من لوم اقرب الناس له في الفترة الاخيرة كوالدته وصديقه المقرب
- عارف ان كل ده كان غلط وحاولت اقلل كل الحاجات دي بقالي فتره بس هدير بتمر بحاله نفسيه صعبه مينفعش ابعد مره واحده
محدش يعرف من اهل هدير ان هدير عندها فوبيا من الاماكن العامه و الزحمة محدش يعرف ان هدير شايله في قلبها ايه غيري انا اعرف هدير بتفضل ايه في لبسها في اكلها في طريقه حياتها كلها
لو بعدت عنها هضيع حرفيا لازم هدير تتاقلم علي حياتها الجديدة و يكون ليها اصحاب قبل ما انا اختفي من حياتها لازم تروح لدكتور نفساني هدير مليانه بالعُقد اللي تخليها تعمل اي حاجه تهرب من واقعها
انا معملتش بطوله بس معملتش ذنب يا كريم انا عملت اللي ضميري خلاني اعمله لبنت عندها عشر سنين كانت ماشيه بتعيط يوميا وهي رايحه المدرسة، صحيح اني ساعدتها تقفل علي نفسها بس انا مقدرتش ابعد مرة واحده
كريم كان يستمع الي حديث صديقه ويحفظ كل ما يقوله كان بعضه مقنع والبعض الاخر لم يقنعه ابدا، فأردف بنبرة هادئة
- ممكن هدير متقدرش تبعد عنك للظروف دي، بس هل ياتري انتَ هتقدر تبعد عنها لو بقت كويسة ؟؟؟
اكمل كريم حديثه فهو لا يريد ان يسمع اجابه لهذا السؤال فيكفي ان يجيب قاسم في كراره نفسه علي سؤاله
- انا مش شيخ جامع ومعنديش حصيله اجاوبك عليها في الدين، بس لو الانسانية هضرك وتضرها بلاش منها وفي حالات اسوء من هدير بمراحل محتاجين حد يعاملهم بانسانيه ومش هنروح بعيد كام واحدهفي الشارع ارملة وعايشه لوحدها وله كام واحده في المنطقة مطلقة رايحة يوميا بعيالها المدرسة ومفيش حد واقف جنبها شوف كام واحده تقابلها في الشارع ملهاش بيت و لا ماؤي
هدير لاقيه البيت اللي يحتويها و قاعده بين اربع حيطان هدير ليها اب هدير ليها عمه بتهتم بيها و في كليةولاقيه انها تاكل لو الموضوع انسانيه يبقي كل واحد هيمشي مع عشر بنات بحجة انهم اخوات وخلاص بقا تبقي سلطة
في ناس محتاجه المساعدة اكتر من هدير ومشفتكش اهتميت كده وبعدين لو هدير صاحبت ولد وراحت وجت قدامك و هتقولك اصله اخويا هيبقي الشي ده عادي بالنسبالك ؟؟
قاسم بانزعاج مما يقوله صديقه وكأن الجميع اصبح لا يفهمه ولا يفهم هو نفسه ويسأله في شيء يعلم انه سيرفضه بالطبع
- في ايه يا كريم متعصبنيش انتَ كمان انا مفيش حد احتاجني وسبته سواء هدير او اي حد غيرها
و بعدين انا عارف بعمل ايه لكن مش عارف اي واحد غيري يستغل ظروفها ازاي الناس نيتهم وحشه وواحده بتفكير هدير ممكن يضحك عليها في اي لحظه ...
كريم أردف بهدوء وتجاهل ما يقوله صديقه
- فعلا اديك بتقولها بنفسك الناس نيتها وحشه
وانا اشهد بده طول عمري انك مسبتش حد بس اشهد برضو ان مفيش حد اتعمقت بتفاصيله زي هدير، انا مش عايز اضايقك بس اللي حصل النهارده ده كان متوقع من بدري و متلومش علي الناس مش عيب انك تعترف انك غلطت لما حاولت تساعد
للاسف انتَ ضريتها وضريت نفسك كلها كام يوم والناس هتنسيولا كأن حصل حاجه المهم لو انتَ شايف انك حمتها و حبتها كاختك فانتَ قضيت واجبك و زياده معاها
ولو حكايه الفوبيا والعقد النفسية دي و الكلام ده اعتقد مفيش اطيب من مدام هاجر انك تتكلم معاها لما الامور تهدي اعتقد طنط هاجر مش هتسكت و هتوديها لحد متخصص في حالتها
المهم انك متكدبش وتصارح نفسك لو انتَ مقدرتش تتقبل ان هدير تبعد عنك او انها في يوم من الايام يكون في حياتها شخص تاني للاسف انتَ لازم تتقدم ليها و تطلبها للجواز لان وقتها عمرها ما هتكون اخوه
قاسم انزعج من حديثه و كلماته ربما اصبح ينزعج من أحاديثهم المتكررة عن هذه النقاط ولكنه لم يجد اجابه اكثر مما يقولها حتي الان
- اتقدم لمين يا كريم بطل جنان ده انتَ بتقول الالعن من انهم بيقولوه يبقي انا فعلا ماشي معاها و لما الناس ابتدت تاخد بالها اتقدم ليها
كان كريم سيجيب عليه ويقول له انه هذا هو الصحيح اذا وجد انه فعلا تحولت مشاعره تجاهها فهذه هي الخطوة السليمة ولكن قاطعهم دق امينه علي الباب الزجاجي الصيدلية فهي تريد رؤيه ابنها ..
____________________________________
أتي وليد بعد ساعة حينما ذهب الي اقرب دكتور وهو يلح عليه انه يجب ان يذهب معه وبالفعل أتي الطبيب وكشف علي هدير واستطاع افاقتها ثم تركها و خرج من الغرفه وجد حسني ووليد
وليد بقلق : خير يا دكتور ايه اللي حصل مالها
الدكتور بتفسير : هو بخبرتي مفيش حاجه تستدعي القلق هي زي ما اتكون اتصدمت او في حاجه ضايقتها فاغمي عليها تعتبر زي هروب او حاله نفسيه فاعتقد ان معندهاش اي مشكلة عضوية من الكشف المبدئي
بس برضو تقدروا تعملولها تحاليل و شيك اب كامل و تطمنوا اكتر وتقدروا تعرضوها علي دكتور نفساني ..
وليد باطمئنان وقلق في انن واحد : شكرا يا دكتور احنا اسفين تعبنا حضرتك و اصريت انك تيجي رغم انك مبتروحش بيوت
الدكتور بهدوء : انا جيت من إصرارك وبرضو لاني قدرت موقفكم وشغلتي انسانيه حتي لو كان ده شرط كان لازم اتغاضي عنه لما الاقي شخص مهتم كدا الحق انا اكمل كشوفات في العيادة وله ايه
ودعه وليد وشكره علي ما فعله اما حسني كان يجلس بكل برود ولم يهتم بما يحدث حتي انه تركهم متحججاً انه سيذهب ليصلي العشاء ثم ياتي مره اخري
خرجت هاجر بعد ان تركت هدير بمفردها بناء علي طلبها بانها تريد ان تكون بمفردها ربما لتكون صريحة هي لا تريد ان تكون بمفردها، خرجت هاجر وجلست مع وليد
هاجر بتساؤل : ابوك راح فين
وليد بانزعاج : رايح الجامع وجاي
عمتي متزعليش من ابويا ده تصرف طبيعي جدا انا نفسي تحت اتنرفزت وكنت هرتكب جريمة لما لقيت الواد الشمام وله اللي مش باين له هو مين بيتكلم عن هدير بالشكل ده وبيهين العيله كلها ولقينا شاب مجروح و دراعه بينزف والناس كلها ملمومه علشان بنت عمي
حضرتك منتظره ابويا يعمل ايه
هاجر بانفعال : يعمل اي حاجه الا انه يمد ايده عليها
وليد بتفسير : احنا سمعنا كلام خلانا واقفين مش عارفين نقول كلمه قدام الناس والا هنرتكب جريمه في واحد بيتكلم علينا كان نفسي بجد الارض تنشق و تبلعنا
هاجر بتفسير : محدش يلوم هدير علي حاجه لو هتلوم حد فانا السبب انا اللي سمحت بكل ده لاني كنت بشوف ان قاسم قادر يفرح هدير وقادر انه يحتويها
انا متاكده ان قاسم يعرف حاجات عن هدير معرفهاش مش فاكره اليوم و لا الساعة اللي بقت هدير في ظل قاسم الوحيد اللي فهمها
كلكم كنتم بعيد عننا علشان أمك
وليد بانزعاج من تبريرها
- عمتي والله متتكلميش وكأنك شايفه ان علاقتهم وخروجهم بمعرفتك وقدام الناس صح و منتظره ان محدش هيتكلم
بعدين هدير اشمعنا قاسم الي متعلقه بيه دي مفكرتش انها تتكلم معايا باسلوب كويس الا من فترة قريبة وبرضو اول ما تشوفني بتصدر الوش الخشب