رواية ابي بواب وامك خدامه الفصل الخامس5والسادس6بقلم رانيا عماره
{نط المجهول على الدكتور بالـسـ.كـيـ.ـنه وقـ.تـ.ـله و هرب، جات الدكتوره ومعاها ورقة الأشعه}
الدكتوره:الحمدلله لقيت....
{ولسه بتكمل الجمله}
الدكتوره:اااااااه
{صرخت الدكتوره أول ما شافت الدكتور سايح في دمـ.ـه على الأرض، وفقدت أعصابها..ووقتها الشرطه وصلت المستشفى وقرروا يأجلوا تشريح الجثة وإلا كده عدد الضحايا هتزيد لحد ما يعرفوا مين ورا كل ده..كان الظابط واقف وسط الدكاترة، والدكتوره علي الأرض بتعيط وبتترعش من خوفها}
الظابط:احنا مضطرين نأجل قضية أشرف العقاد، لحد مانعرف مين هو القاتل المتسلسل اللي ورا كل ده
{عدى حد بسرعة فائقة في الطُرقة اللي جنبهم، وبمجرد ما عدي كان النور قطع في الطُرقه..بصوا كلهم في الاتجاه ده، والدكتور طلع المسدس من جيبه، ومشي ببطئ وهو حذر جداً..وأول ما دخل الطُرقه مكنش شايف أي حاجة..لحد ما بص للدكاتره اللي واقفين وبيتملكهم الخوف وقالهم}
الظابط:كشاف
{دخلت الممرضه جوا الأوضه تجيب الكشاف، وأول ما دخلت صرخت، لحد ما كلهم جروا جوا الأوضه، وهنا كانت الكارثة، جثة أشرف جنب جثة الدكتور!!!!}
==========عند حاتم في الجبل==========
{كان بيلعب بالأدوات اللي رامز ادهاله...جات مهره ووقفت جنب منه وهو بيلعب رياضة وكان باين علي ملامحها الغضب، ودي حاجة خليت حاتم ياخد باله}
حاتم:مالك يا مُهره؟...حد دايقك من الناس اللي هنا؟؟
مهره:هو انت عاجبك القاعده هنا ولا ايه؟؟
حاتم(بإستغراب) :وهتعجبني ليه؟
مهره(مدايقة) :انا اللي بسألك يا حاتم!!
حاتم:مانتي عارفه انها فتره مؤقته لحد ما نلاقي طريقه نرجع مصر بيها!!
مهره:ولا يمكن عجبك جو الستات اللي هنا.. فعلشان كده لازق اوي ومتبت
{وبعيد كانت نانيس واقفه بتبص عليهم، استغرب حاتم من كلام مهره واتغير صوته}
حاتم(بصوت حاد) :بطلي عبط ستات ايه وزفت ايه اللي انا قاعد عشانهم؟؟.. هو فين الستات دي اساساً؟..ده انا مشوفتش غير الست واختها اللي قاعدين عندهم، وست عجوزه عندها يجي ٨٠ سنة.. يبقي ستات ايه بقي؟؟
{سكتت مهره، وهي باصه في وشه بكل غل}
حاتم(بتفكير) :هو انتي بتتكلمي عن الست دي وأختها ولا بتتكلمي عن مين؟
مهره(بزعيق) :متتكلمش معايا بالاسلوب ده تاني، وصوتك ميعلاش عليا!!
حاتم(بزعيق) :مهره!!...متخلنيش أزعلك مني!!
مهره(بعصبيه) :وانت لسه هتزعلني؟
{وسابته ومشيت..وحاتم وقف رياضة، وقعد علي الجبل يبص علي مهره من بعيد..لحد ما نانيس راحتله وقعدت جنبه}
نانيس:عامل ايه يا.... معلش نسيت اسمك... انت اسمك ايه؟
حاتم:حاتم
نانيس:وانا نانيس..أخبارك ايه يا حاتم، مبسوط هنا؟
حاتم:مش اوي
نانيس:ايه اللي جابك هنا وخلاك بعدت عن مراتك؟
حاتم(بإستغراب) :مراتي؟؟؟
نانيس:اه مراتك، مهره قالتلنا انك متجوز، ومراتك في مصر، وانك مستني أي فرصه عشان ترجعلها
حاتم(بتردد) :اه... اه ايوه.. اه متجوز
نانيس:طب وحلوه كده زي مهره ولا مهره أحلي؟
حاتم(بتردد) :حلوه
نانيس:يابختها بيك
{حاتم دير وشه، لقي مهره واقفه بعيد وبتبصلهم..راح قايم من مكانه}
حاتم:طيب انا هروح مشوار، سلام
نانيس:واحنا لحقنا نتكلم؟
{سابها حاتم ومشي، لقي رامز في وشه وجاي مبتسم}
رامز:ما رأيك؟
حاتم:رأي في ايه؟؟
رامز:نانيس أخت زوجتي
حاتم :زي الزفت
{وسابه ومشي}
رامز:نعم، ماذا؟؟...ماذا تعني بالزفت؟.. هل تقصد زفت الطُرق؟
============في بـيـت غادة=========
{كانت قاعدة مع فاتن ونبيل}
فاتن:اللهم آجرني في مصيبتي، وأخلف لي خيرًا منها..يارب انت العالم بيا والله..خلاص مبقتش مستحمله!
{رن موبايل نبيل، و رد}
نبيل:الو
الظابط:انا وكيل النيابة، حسني شاهين
نبيل:اهلاً بيك يافندم، في جديد في القضيه؟؟
الظابط:احنا الحقيقه موصلناش لحد دلوقتي لأي دليل، وفي شئ غامض ومش مفهوم بيحصل..فااحنا مضطرين نحجز المُتهمه بيري فريد.. لحد ما يظهرلنا دليل بـ برائتها.
نبيل:طيب هو ايه يافندم اللي بيحصل، في حد جديد ظهر؟
الظابط:الحقيقه انه مظهرش..ولكننا بنسعي بكل جهدنا اننا نوصلة..حبيت أبلغك ان ميعاد جلسة بيري في المحكمه النهارده كمان ساعتين بالظبط، وبعدها هتترحل علي السجن لحد مانشوف ايه ممكن يحصل.
نبيل:متشكر جداً لاهتمام حضرتك، حالاً هبلغ والدتها
الظابط:مع السلامه
نبيل:سلام
فاتن:ايه يا نبيل، حكموا علي بيري؟؟
نبيل:لا ياطنط فاتن..بس جلستها النهارده كمان ساعتين، يلا قوموا اجهزوا، هنشوف القاضي هيحكم بـ ايه!
{قامت غادة وسندت فاتن}
فاتن:يااارب يااارب يحكملها بالإفراج، كفاية عليها كده...البنت متبهدلة جوا
{ودخلت جوا هي وغادة بنتها}
{وبعد ما جهزوا وراحوا المحكمة، كانت فاتن وغادة واقفين عند الحديد قصاد بيري }
فاتن(بعياط) :متخافيش يا بيري هتخرجي منها بإذن الله
بيري(بعياط) :والله العظيم ما قتلته، ياريتني ما روحت.. مكنش كل ده حصل!!!
غادة:عارفين والله...عارفين ياحبيبتي انك مظلومة..وان شاء الله هتظهر برائتك قريب متخافيش!
{خرج القاضي والمستشارين، وأول ما فاتن وغادة شافوهم، راحوا يقعدوا..كان علاء جوز بيري لسه جاي، وقعد بكل برود ولامبالاة..وبعد ما القاضي والمستشارين قعدوا وخبطوا علي الخشب عشان الناس تسكت ويبدأوا في الجلسة..وبعد ما المحامي قدم الورق للمحكمه}
القاضي: بالنظر إلى الأدلة والتحقيقات التي قدمتها الشرطة والمحامين، وبناءً على القانون والأسس القانونية السائدة في هذا البلد، أُعلن بأن السيدة بيري فريد يسري الوالي ليست مذنبة في قضية قتل السيد أشرف العقاد. أدين براءتها وأُطلق سراحها فوراً. على الرغم من عدم توفر الأدلة المؤكدة على براءتها، إلا أن المحكمة لا تستطيع إدانتها بناءً على الشكوك أو الظنون وبما أنه توجد شكوك في إدانتها. ونتيجة لعدم وجود أدلة قطعية تثبت إدانتها، فإنها تُعتبر بريئة من الذنب. نأمل أن تتخذ السلطات الأمنية اللازمة للتحقيق فيمن هم الفاعلين الحقيقيين لهذه الجريمة وتقديمهم للعدالة.
فاتن وغادة:لولو لولولولولولوي
نبيل:الحمدلله!
بيري(بإبتسامه) :يعني هخرج!!!... أخيراً!!!
{وفي الوقت ده علاء بص لها بصة كره، وقام وخرج من القاعة، قامت فاتن وغادة ونبيل، وراحوا ناحية بيري}
فاتن(بإبتسامه) :هتخرجي ياحبيبتي!!...هتخرجي متخافيش!!!
بيري(بعياط) :الحمدلله يارب، مش مصدقة نفسي والله!!...الحمدلله....هو علاء فين؟
غادة:مشي
بيري(بإستغراب) :مشى؟؟؟
=========بـعد الـعـزاء في بيت هويدا========
{كانت قاعدة علي السرير وماسكة هدوم حاتم وبتعيط}
هويدا(بعياط) :سيبتني وروحت يا حاتم...بدل ماكنت تفرحني بچوازك ياحبيبي، وأشيل عيالك، ولا تفرحني بيك وانت ناچح في حياتك ياغالي.
{دخل سميح جوزها وقعد علي السرير بلامبالاة}
سميح:وسعي هانام
هويدا(مصدومة) :هاتنام يا سميح؟؟...وانت چايلك نوم؟؟...ليك نفس تنام وآني ابني ميت ومش عارفين چثته فييين!!!
سميح(بزعيق) :ما اللي مات مات خلاص، هتوچعي دماغنا ليه؟.. هو هيجرفنا وهو عايش وهو ميت؟؟
هويدا(بزعيق) :بتي ضحي كان عندها حَج لما جالت انك جاسي الجلب..انت ميهمكش غير نفسك وبس يا سميح!!
سميح(بزعيق) :مانتي وبتك شبه بعض، متربتوش ولا تعرفوا ريحة التربية..مش عاملين احترام للراچل اللي آنيكم في بيته و...
هويدا(بزعيق) :ايه ايه؟؟..آني مين ياعينيا؟..ايه قعدنا هناهو ببلاش؟...ولا يكونش بتعمل اللي محدش عمله؟
{دخلت ضحي وهي بتبص لـ سميح بكل غل..قام سميح وهو متعصب}
سميح(بزعيق) :انتي ازاي تفتحي علينا الباب من غير ماتخبطي يا بت انتي؟؟
هويدا(بصوت حاد) :جاك فتح راسك..انا ادخل مكان ما أحب في الوقت اللي يعجبني، ياراجل يا ناقص
{لطشها سميح بالقلم علي وشها، وشدها من الإيشارب، ونزل ضرب فيها، لحد ما هويدا قامت تصوت}
هويدا(بصويت) :وسع ايدك عن البت..بدل ماأخلي ليلتك طين!!
ضحي(بصويت) :ربنا ياخدك ويريحني انا وأمي من وشك اللي يقطع الخميره من البيت
سميح(بزعيق) :ناجصه رباية...سافلة...يابت الكلب
ضحي(بصويت) :الحقوووني يانااااس
{وخرجت تجري في الشارع تصرخ..و سميح وهويدا وراها..لحد ما نسمة جات مستغربة}
ضحي(بصويت) :جوز أمي مصبحنا وممسينا بـ علقة..لا بيأكلنا ولا بيشربنا..ده حتي انه يسيبنا في حالنا مبيعملهاش
نسمة(بزعيق) :كانت تتقطع ايدك قبل ماتتمد علي أمي وأختي..اللي حصل ده بجد ياما؟؟؟
{بصيت هويدا لـ سميح بخوف}
هويدا:ادعيلهم بالهداية يا نسـ....
نسمه(بتقاطعها بزعيق) :اللي حصل ده بجد ياما؟؟
ضحي(بزعيق) :وانتي لسه مستنيه الرد منها؟...ما الرد واضح.. بصي يانسمه وشوفي شعري اتخلع ازاي في ايده!!
{وجابتلها حتت من شعرها اللي اتقطعت}
ضحي(بعياط) :شايفه؟؟
{راحت نسمه قالعه الشبشب ونازلة ضرب في جوز أمها}
سميح(بزعيق) :ايدك لا أقطعهالك!!
نسمه(بزعيق) :جاك قطع ايدك ورقبتك، ياعرة الرجالة.. بقي انت بتمد ايدك علي أمي وأختي؟؟.. ليه بياخدوا من وش أمك ده ايه؟؟...ده انت لا حرامي يسرقك ولا عفريت يحرقك.
هويدا(بصويت) :كفايااكو خناااق بقي كفااايه!!!!
============عـند حاتم ومـهـره==========
{كانوا كلهم متجمعين علي الأكل ماعدا مهره..خرجت من الخيمه ومشيت في اتجاه تاني}
دينا(بإستغراب) :رايحة فين يا مهره؟
مهره:راجعه مصر
حاتم(بإستغراب) :مصر ايه دي اللي راجعاها لواحدك؟
{سكتت مهره ومردتش عليه، راح قايم}
رامز:كيف تذهبين لـ مصر بمفردك؟
مهره:انا قررت خلاص، و همشي.. أشوفكم علي خير
دينا(بإستغراب) :استني يا مهره، متمشيش، انتي مش عارفة حاجة هنا...اياكي تقربي من قبيلة السمتاء!!!
{ولكن مهره مردتش عليهم، وكملت في طريقها، دخل يجري حاتم جاب التيشرت بتاعه ولبسه، وراح وراها}
حاتم:انتي رايحة فين؟؟..مينفعش حد فينا يمشي لواحده لحد مانرجع مصر!
مهره:ليه؟...ما دينا ونانيس موجودين يبقوا يمشوا معاك!
حاتم(بإستغراب) :انا مالي ومالهم!!..استني يا مهره بقولك!!
{وشدها من ايديها فا لفت}
حاتم:انتي عايزه تمشي ليه؟
مهره:حاتم لو سمحت، ابعد ايدك عني..وياريت متتكلمش معايا تاني..انا اللي ميحترمنيش ميلزمنيش
حاتم:هو مين اللي مبيحترمكيش ومين اللي ميلزمكيش؟...اااه قولي بقي انك زعلانه عشان اتكلمت معاكي بعصبية..انا اسف يا مهره مكنش قصدي
مهره:وبتقولها بقرف كده ليه؟..عادي علفكرا كان ممكن متعتذرش مادام ده اسلوبك ودي طريقتك!!
حاتم:خلاص يا مهره حقك علي دماغي، مرتاحه كده؟
{بصيتله مهره بقرف، ومشيت}
حاتم(بصوت عالي) :علفكرا انا مش همشي وراكي تاني عشان تبقي عارفة!!...انا قولتلك متمشيش وانتي برضه مشيتي وعملتي اللي في دماغك، وأي حاجة تحصلك انتي اللي هتتحملي مسئوليتها!!
{مشيت مهره مسافة طويلة، وحاتم واقف مكانه لحد ما لقي رامز جاي ناحيته}
رامز:أسرع وأحضرها قبل أن تقترب من قبيلة السمتاء
حاتم:انا متهيئلي سمعت الاسم ده قبل كده!!
رامز:إنهم أخطر القبائل الموجوده بالقرب مننا..هل تعلم انهم يقوموا بتعذيب الرجال والنساء إن اقتربوا من دائرتهم؟..ولا أريد أن أحكي لك ماذا يحدث كي لا تخاف
حاتم:لا تبقي غلطان انا مبخافش، ومش انا اللي يتقالي الكلام ده!!
رامز:حسناً..اذهب وأحضر مُهره قبل أن تصل إليهم!!
{مشي حاتم وراح وراها وندهها}
حاتم:مهره...مهره
{وشدها لتاني مره، لحد ما وقفت}
حاتم:متمشيش يا مهره..انا مش هسيبك تمشي، المكان ده خطر عليكي وعلينا كلنا!!...ارجعي وهنشوف حل قريب جداً يرجعنا لـ مصر
مهره(بعياط) :انا مابقتش قادرة استحمل..عماله بصبر في نفسي وبقول هترجعي تشوفي أهلك..انا بقيت هتجنن عليهم، ومش عارفه عايشين ولا....
حاتم:عايشين...ومتقوليش حاجة تانيه..هما يومين بالظبط ندبر أمورنا وهنرجع مصر تاني واللي يحصل يحصل...بس بلاش تعرضي نفسك للخطر، وخلينا في منطقة الأمان..مجاتش علي يوم ولا يومين كمان!!
{وبالفعل خد مهره ورجعوا تاني...وبعد مرور شهرين كانت كل حاجة زي ماهي..وحاتم كان بيلعب رياضه وبيقوي جسمه...حتي أهله خلاص صدقوا انه مات..ووجيده تقبلت موت عيالها التلاتة ومكنش قدامها حاجة تانية تعملها غير انها تصبر}
============في بـيـت فـاتـن==========
{كانت فاتن واقفة في المطبخ بتجهز الغدا..وفي الصالة كانت بيري وفيروز بنتها قاعدين مع بعض...لحد ما جرس الباب رن، قامت بيري تفتح لقيته جوزها..لفيت ضهرها ورجعت قعدت علي الكنبه كأنه هوا قصادها}
علاء:مش هلومك وأقولك مالك كأني كنت معاكي ليلة امبارح، بس هلوم بنتك اللي ولا كأنها شافت أبوها
بيري:ادخلي جوا يا فيروز
{دخلت فيروز جوا..وبيري حطيت رجل علي رجل، وكانت بتلعب في ضوافرها (مش مهتمه)}
علاء:بقى بتعمليلي بلوك يا بيري؟..طب والله عال العال...ده انا ولا كأني جوزك...قومي يا هانم جهزي شنطة هدومك وارجعي علي بيتي
{ضحكت بيري ضحكة طويله بسخريه}
بيري:ههههه بيتك؟؟..بيتك ازاي؟...قصدك بيتي!!
علاء:بقالك شهرين قاعدة هنا ولا سائله فيا..ده حتي شغلك مبقتيش تنزليه
بيري:لا انا البيوتي سنتر هبيعه أول ما أقف علي رجلي، وهاخد الفلوس وهسافر برا انا وبنتك
علاء:هتبيعيه ازاي؟
بيري:هو ايه اللي هبيعه ازاي؟...انت عبيط؟
علاء(بصوت حاد) :ماتحترمي نفسك..اه هتبيعيه ازاي، ماهي دي غلطتي انا كان المفروض أعرفك بس قولت أصبر شوية تكوني فوقتي من الصدمة الأولانيه عشان ميبقوش صدمتين مره واحدة!..ضربتين في الراس بتوجع برضه ولا ايه؟
{اتغيرت ملامح بيري من اللامبالاة لـ الخوف وتوقع مصيبة أكبر مستخبيه...لحد ما قامت}
بيري:صدمة؟...صدمة ايه؟؟
علاء(ببرود) :مانا أصلي بيعت البيوتي سنتر من شهر...ولا شهر ونص؟...اممم مش فاكر...بس مقولكيش بيعته لـ ناس ولاد حلال، راجل خليجي مريش..لأ وكمان قالي هيشوفلي شغل في الخليج...ربنا يباركله بدعيله من جوا قلبي والله
بيري(بصويت) :يا بجاحتك!!!...بيعته وجاي بـ عين قوية كمان؟
علاء:هو انا بقولك سرقته؟...بقولك بيعته..أصلها تفرق
بيري(بزعيق) :بيعته ازاااي؟؟.. انطق بيعته ازاي؟؟
{خرجت فاتن علي زعيقها..لقيت علاء}
فاتن(بزعيق) :انت بتتخانق مع بنتي؟؟
بيري(بصويت) :بيقولك باع البيوتي سنتر بتاعي!!...البيوتي سنتر اللي عيشت نص عمري كله أجمع في تمنه!!...ده انا كل جنيه دفعته فيه جالي بطلوع الروح...انا هدفعك القلم ده غالي اوي اوي، وزي ماغدرت بيا، هوريك الغدر اللي علي أصوله!!!
علاء(ببرود) :انا مش فاهم بس انتوا بتتخانقوا معايا كده ليه وعاملينلي صداع؟...طب ده كتر خيري ان انا لقيت حد يشتريه مني.. أصلك مشوفتيهوش يا حماتي، متدغدغ مليون حته بعد اللي حصل..طب ده انا لحد دلوقتي مرضتش افتح الموضوع مع بنتك وأقولها جواهر ايه دي اللي خليت شوية كلاب يدمرولك تعب السنين؟
فاتن(بزعيق) :وانت عرفت منين موضوع الجواهر ده؟؟
علاء:الحكومه مبتهزرش، عرفوني كل حاجة..وقالولي انك كنتي على علاقة مع أشرف ابن خالتك، بس انا كدبتهم وقولتلهم لااا مراتي بنت أصول طالعة من بيت محترم لا يمكن تعمل كده ابداً، حتي أشرف كان الله يرحمه راجل ابن حلال، عمره ما زعل حد فينا ولا داسلنا علي طرف.
بيري:طب ما بقولك ايه، بدل اللف والدوران والفيلم الهندي ده كله، تعالالي وش وقولي جاي ليه؟
علاء:جاي آخد مراتي وبنتي عشان نرجع البيت، غلطت انا؟..ولا انتي نسيتي انك علي ذمة راجل؟
بيري:أرجع معاك؟؟.. ده انا هوديك ورا الشمس..بقي انا تاخدني لحم وترميني عضم؟؟
علاء:اما صحيح بمناسبة اللحم والعضم...متعرفوش كيلو اللحمه بكام دلوقتي؟...أصل ناوي أعمل عزومه لجماعة صحابي
{راحت فاتن وبيري زاقينه برا وابتدوا يزعقوا}
فاتن(بزعيق) :برااا بيتي يا كلب يا خسيس...كنت اتخرست قبل مااقولهم موافقة عليك تكون جوز بنتي...اطلع براااا
بيري(بزعيق) :في ستين داهيه تاخدك...في دااااهيه
{ورزعوا الباب في وشه، وفيروز خرجت}
بيري(بزعيق) :ادخلي جوا
=============عـند مـتـولـي===========
{كان قاعد قصاد العمارة وحزن الدنيا كله ماليه..لحد ما جات واحدة من سكان العماره}
_صباح الخير يا عم متولي
متولي:صباح النور يا ست زينه
_عايزه منك شوية طلبات للبيت
متولي:اؤمريني
_عايزه الطلبات اللي في الورقه دي
{واديتهاله}
متولي:تحت أمرك
_بس ياريت متتأخرش عليا
متولي:حاضر ياست زينه
{وقام والست طلعت...وهو ماشي قابلته وجيده، كانت جاية وفي ايديها طلبات}
متولي:علي فين ياست وجيده؟
وجيده:رايحة أجيب طلبات للسكان الجداد في العمارة
متولي:ماتقعدي ترتاحي..هتفضلي شايله الهم لحد امتي؟
وجيده:وانا لو قعدت ارتاح مين هيصرف عليا؟...انا اللي زي مالوش غير ربنا
متولي:ربنا يتولاكي ويتولانا برحمته
وجيده:يارب يا عم متولي، بالإذن
متولي:مع السلامة
{طلعت وجيده فوق، وخبطت علي الباب، فتحتلها الست}
وجيده:اتفضلي جيبت كل الطلبات اهو
=شكراً يا أبله وجيدة...عايزاكي تنضفيلي الشقه، هتاخد منك كام يوم؟
وجيده:يوم واحد بأمر الله وتكون نضيفه
=طيب انتي فاضية دلوقتي؟
وجيده:اه فاضيه، اعملهالك دلوقتي لو تحبي
=ياريت، طيب اتفضلي
وجيده:بسم الله الرحمن الرحيم
{دخلت وجيده جوا الشقه، وبالتحديد الريسيبشن}
=نضفي الشقه كلها وسيبي الريسيبشن للآخر..عشان انتي عارفه في الرايحة والجايه هيتبهدل..ومتغيريش حاجة من مكانها
وجيده:حاضر، حاجة تانيه؟
=لا بس كده
وجيده:حاضر
=========عـنـد حـاتـم فوق الجـبل=========
{كان بيلعب رياضة وبيشيل أوزان تقيله..لحد ما جات نانيس وهي لابسه لبس مُغري، ومبتسمه}
نانيس:ازيك يا حاتم، عامل ايه؟
{ولكن حاتم مبصلهاش، وكمل رياضة}
حاتم:كويس
نانيس:جسمك بقي حلو اوي بعد ما لعبت رياضة
حاتم:شكراً
نانيس:هو ممكن تدربني معاك؟؟
حاتم(بصوت حاد) :أدربك معايا ازاي يعني؟؟؟
نانيس:يعني...توريني بتلعب الضغط ازاي..بص انت اعمل قدامي وانا هعمل زيك
{وكانت ريأكشنات وشها مش مريحه بالمره..لحد ما مسكت ايد حاتم وهي بتشد منه الوزن..لحد ما ايد تالته اتحطت معاهم..ولما بصوا لقوها مهره.. راحت مهره شاده الوزن من ايد حاتم واديتهولها}
مهره:لما تحبي ياحبيبتي تشيلي أوزان عرفيني وانا أجيبهملك لحد عندك
نانيس(ببرود) :وانا أعرفك ليه؟..هو انتي بتلعبي رياضه؟
مهره:لأ.. بس هلعب رياضه من دلوقتي حالاً.. علمني يا حاتم
{وبصيت لـ حاتم بنظرة حادة}
مهره(بصوت حاد) :علمني
حاتم:طيب
{بصيتلهم نانيس وهي رافعه حاجبها ومش عاجبها كلام مهره، وخدت بعضها ومشيت..راحت مهره حادفة الوزن علي الأرض بـ غل}
حاتم:ايه هيتكسر!!!!...في ايه مالك؟؟؟
مهره(بتريقه) :هو ممكن تدربني معاك
{وكانت بتتريق على كلام نانيس وهي بترفع في صوتها ..لحد ما مشيت هي كمان، وحاتم بصلها بإستغراب، وكمل رياضه...وعلي الناحية التانيه جه منذر ابن أخت رامز.. وفي ايده شنطة سفر}
نانيس:ايه ده منذر، انت جيت امتي؟؟
منذر:الآن...أين خالي رامز؟
نانيس:خالك في شغله...ده انت مرات خالك هتفرح بيك اوي
{جات مهره وعدت من جنبهم، فأعجب بيها منذر}
منذر:انها حقاً جميلة...هل تعرفينها؟؟
نانيس(بقرف) :اه اسمها مهره..بس مش جميله ولا حاجة، دي دمها واقف...ياساتر عليها!!
منذر:أول مره أراها هنا..هل هي جاءت حديثاً؟
نانيس:اه من شهرين..المهم سيبك منها...وتعالي معايا
{وخدته ودخلوا جوا عند دينا}
دينا(مصدومة) :مُنذر؟؟
============فـي بـيـت غـسـان===========
{كان ليل نهار بيقرأ كتب عن الإلحاد ده غير كتب تحضير الجن...برفقة صاحبة كمال}
كمال:ماتسيبك من الكتب دي دلوقتي وخليك معايا
غسان:عايز ايه؟
كمال:انت هتفضل حابس زهرة لحد امتي؟
غسان:وانت مالك؟..انشالله أحبسها سنة كاملة، ملكش فيه!!
كمال:ياعم حرام عليك، البت هتموت لو مسيبتهاش في حالها، دي بقيت جلد علي عضم
غسان:حرام عليك؟؟...حرام عليا من مين؟؟.. انا مش قولت مفيش حاجه اسمها لا حلال ولا حرام؟...كل ده وهم الكتب الدينيه بتعيشهولنا، ده فرض سيطره!!
كمال:مش قصدي يعني..هي كلمة وطلعت كده...المهم بس احنا دلوقتي مش متفقين نسافر؟
غسان:اه متفقين
كمال:فين بقي وانت مقعدنا بتاع شهر هنا؟
غسان:يا كمال انا كل مشكلتي في زهره، هنعمل فيها ايه؟...اخاف اسيبها فا تهرب!!
كمال:مانا قولتلك ناخدها معانا!!
غسان(بزعيق) :ناخدها معانا ايه، انت عبيط ولا ايه حكايتك؟...آخدها معايا عشان تفضحني وسط الناس وتقول ده بيعمل وبيخلي وبيسوي؟ والناس تصدقها بقي ويصدقوا دور المشيخه اللي هي لابساه!
كمال:طب والحل ايه، مااحنا كده متعطلين!!
غسان(بزعيق) :اطلع من دماغي دلوقت
{وقام وطلع فوق لـ زهرة وفتح عليها الباب لقاها بتقرأ قرآن..راح واخد المصحف منها وحاطة وشدها بكل غل}
غسان(بزعيق) :انتي ايه مبتحرميش؟؟..عامله فيها شيخه عشان الناس تشكر فيكي ويشتموا فيا انا؟؟...ماتطلعي من دور الشيوخ اللي انتي لابساه ده!!
زهرة:استغفر الله العظيم واتوب اليه
غسان(بزعيق) :بتستغفري مين؟...بتستغفري حد مش موجود؟؟..ضحكوا عليكي وفهموكي حاجات غلط، انتي مغفله وعبيطه يازهره ولازم أفوقك
زهرة(بصويت) :بس بقي كفاااايه كفاااايه...انت كل ما بتغلط كل مابحس ان المصيبه بتقرب منك زيادة..يكون في علمك مش عشان انت سليم ورايح جاي يبقي ربنا غافل عن أفعالك وكلامك عنه!!...ربنا يمهل ولا يهمل!!!...اطلع من الغفلة السوده اللي انت فيها دي قبل فوات الأوان!!!
غسان(بضحكة سخرية) :تصدقي كلامك بيضحكني، انا لما ببقي مدايق باجي اسمع كلمتين من بتوعك دول عشان أضحك واطلع من المود..فوقي لنفسك، والطرحة دي اقلعيها..وعيشي سنك، ساعتها غسان هيكون راضي عنك
زهرة(بصويت) :انشالله عنك ما رضيت!!!... اهم حاجة رضا ربنا...ربنا اللي خلقني وخلقك...يامغفل هتروح في داهيه الحق نفسك قبل ما وقتك يجي!!!
{ضربها غسان بالقلم، وشد الطرحه من عليها وحدفها من الشباك بكل عصبيه}
غسان(بزعيق قوي) :عشان تبقي تتحديني...عشان تبقي تقفي قصادي...عشان تبقي تتكلمي كلام أهبل بعد كده...مش انتي اللي هتعرفيني أعمل إيه ومعملش ايه، فاهمه؟؟؟
{جه كمال وشده بسرعه، ولسه غسان بيزعق}
غسان(بزعيق قوي) :انتي رصيدك معايا بيخلص يا زهرة..وآخرة ما هزهق منك، هضربك بالنار وياتموتي، ويا تعيشي عاجزة، ساعتها ابقي خلي الكتاب اللي كان في ايدك ده ينفعك...تمااام؟؟؟
كمال:خلاص يا غسان
{وشده وخرجوا برا وقفل الباب.. وزهره كانت بتعيط عياط هيستيري}
==============عـنـد بـيـري===========
{خدت أختها غادة وراحوا شقتها..وهناك كان متولي لسه راجع بالطلبات ولما شافهم وقف من بعيد يبص عليهم، وبعد ما طلعوا ووصلوا الشقه..جات بيري تفتح الشقه لقيت الكالون متغير والمفتاح مش بيفتح }
غادة(بإستغراب) :ايه يا بيري في ايه؟؟
بيري:مش بيفتح
غادة:طيب حاولي تاني
{ولما بيري حاولت تاني، مرضاش يفتح}
بيري:مفيش فايدة!!...غير الكالون!!
غادة(بعصبية) :وهو بيغيره ليه اصلاً؟؟
بيري:ده انا هودية في ستين داهيه، بس يصبر عليا
{اتفتح باب الأسانسير وخرج منه متولي}
متولي:حمدالله على السلامه ياست بيري
بيري:بقولك ايه ياعم متولي..هو علاء غير كالون الباب؟
متولي:مش عارف، بس يمكن غيره، انا مش قاعد في العمارة ٢٤ ساعه
بيري:أمال لازمتك ايه في العمارة؟.. مايشوفوا غيرك بقي!!
غادة:خلاص يا بيري براحة...طب تعرف تفتح الباب ياعم متولي؟
متولي:نحاول وأمرنا إلي الله
{وخرج حديدة صغيره من جيبه، وقرب من الباب.. وبعد ربع ساعة كان الباب اتفتح..دخلت بيري من غير ماتشكره ووراها غادة}
غادة:شكراً ياعم متولي، تعبناك معانا
متولي:الشكر لله وحده
{لفيت بيري لقيت العفش زي ماهو، راحت مطلعه موبايلها وعملت مكالمه}
بيري:مساء الخير، شركة High-end furniture معايا؟....تمام لو عايزه ٥ عربيات ينقلولي العفش في تلات ساعات تتكلف قد ايه؟؟
==========عند حـاتـم ومـهره==========
{كانت الدنيا ابتدت تليل، وحاتم ومهره قاعدين علي الجبل بيشربوا شاي، وبعيد كان رامز ودينا ونانيس ومنذر قاعدين مع بعض}
مهره:مزهقتش؟
حاتم:من ايه؟؟
مهره:من قعدتنا هنا..ولا انت القاعده عجبتك؟
حاتم:بالعكس...خلاص كلها كام يوم ونمشي
مهره:قولتلي كده المره اللي فاتت، والكام يوم وصلوا شهرين...وانا بصراحة ابتديت احس ان دينا ورامز اتدايقوا مننا..هما مهما كان برضة عايزين ياخدوا راحتهم في بيتهم
حاتم:ده أكيد يامهره..ومن قبل مانتي تتكلمي انا كنت لسه بفكر في الموضوع ده
مهره:حتى لو احنا مش هنمشي دلوقتي، ياريت نبني خيمتين، بس مشكلتنا كلها في ان احنا ممعاناش فلوس!..هو انت مش ناوي تشتغل؟
حاتم:هشتغل ايه هنا؟
مهره:جاتلي فكرة!!
{ضحك حاتم وقالها}
حاتم:فكرة ايه دي؟
مهره:انا سمعت ان الناس هنا بتشتري أي حاجة غريبه ومختلفه، احنا نفتح مشروع ونبيع فيه أكل مصري!
حاتم:بس انا مليش في الطبخ!
مهره:خلاص... بص... انا هطبخ وانت تبيع، ها ايه رأيك؟
{بصلها حاتم في عينيها، وسرح}
مهره(بإستغراب) :حاتم انت معايا؟.. هو في حاجة في وشي؟
حاتم(بإبتسامه) :كملي كلامك انا سامعك!
مهره:انا خلاص خلصت كلامي!!
حاتم:ماشي ياستي، لو انتي شايفه ان دي حاجة هتساعدنا نجيب فلوس، انا معنديش مشكله
مهره(بتضحك) :خلاص اتفقنا
حاتم(بيضحك) :اتفقنا
{فجأه قام رامز ومنذر ودينا ونانيس، وطلعوا يجروا، حتى الناس الموجوده خرجت من خيمها وطلعت تجري، وحاتم ومهره مستغربين في ايه}
حاتم:هو في ايه؟؟
رامز(بصريخ) :قبيلة السمتاء قادمة لـ قتلنا!!...اهربوووا
الفصل السادس
{هربوا كلهم ماعدا حاتم، فضل واقفلهم بكل شجاعة وثقة وكان في دماغة انه يشوفهم ويهزمهم كمان!!..بصيت مهره وراها لقيت حاتم لسه واقف بعيد، رجعت وهي بتصرخ وبتشد فيه عشان يتحرك}
مهره(بصويت) :اهرب ياحاتم...واقف مستني ايه؟؟؟
حاتم:امشي يا مهره..انا لازم أنتصر على الناس دي، واعرفهم مقامهم، هما زيادة عننا في ايه عشان يهزمونا؟؟
مهره(بتشده) :هو ده وقته يا حاتم؟؟..بقولك يلااا
{زقها حاتم، وكانت ملامحه مستعده للشر}
حاتم(بيزقها) :امشي يا مهره بقولك، انا مش هعيد كلامي مرتين
{مشيت مهره وهي بتبصله بخوف، وأول ما القبيلة وصلت، ضربهم حاتم، وكان بيفلت من واحد ويضرب التاني وهكذا..لحد ما جه أقوي واحد فيهم، وكان حاتم بيعافر عشان ينتصر عليه، لحد ما ضربه في رجله، صرخ حاتم من الألم، وقام وهو بيعافر ولسه المحارب هيقتـ..ـله..فجأه المحارب سكت ووقع في الأرض، بص حاتم لقاها مهره وفي ايديها سكينه}
مهره(بخوف) :مالك يا حاتم، حصلك ايه؟؟
حاتم(بألم) :ضربني... في... رجلي... اااه رجلي
{وطت مهره، وخلعت الطرحه ولفيتها حوالين رجله، وسندته ومشوا بعيد بعد ما ضرب القبيلة، ومهرة قتـ.ـلت واحد منهم...لحد ماقعدوا فوق الجبل..راح حاتم قالع التيشرت واداه لـ مهره}
حاتم:غطي شعرك!
مهره(بإستغراب) :شعري ايه اللي أغطيه بالتيشرت بتاعك؟؟
حاتم(بتعب) :اسمعي الكلام يا مهره وغطي شعرك قبل ما حد يجي ويشوفك!!
{خدت مهره منه التيشرت ولبسته في دماغها، وكان شكلها مضحك جداً..وفجأه اتبدل حاتم من التعب لـ حالة من الضحك}
مهره(بتضحك) :علفكرا انت السبب ها!!
{وضربته بهزار علي كتفه}
حاتم(بتعب) :اه
مهره:ضربك في رجلك مش في كتفك متستعبطش!!
{ضحك حاتم وسكت}
===========عـنـد بيري و غـادة==========
{بعد ساعتين كانت الشركة وصلتلهم العربيات اللي هتنقل العفش...وكانت بيري علي أعصابها وخايفة علاء جوزها يرجع في أي لحظة}
بيري:بسرعة...انجزوا
غادة:اهدي شوية يا بيري..انا مقدره خوفك، بس اهدي مش للدرجادي!
بيري:حاسة ان انا اتسرعت، كنت استنيت لحد ما يسافر واعمل ما بدالي، علي الأقل هكون متطمنه انه مش هيجي في أي لحظة!
غادة:وانتي ايه ضمنك انه مكنش هيلعب بـ ديله، ويتغدي بينا قبل مانتعشي بيه؟..مش كان ممكن ياخد كل العفش ويسبقنا؟
بيري:ممكن برضة، أصله مش مضمون..يلا خلصوا
_حاضر قربنا خلاص
{دخلت بيري الأوضة، وحطيت الهدوم في الكراتين بمساعدة غادة أختها..لحد ما متولي دخل الشقه}
متولي:مش عايزين أي مساعدة؟
بيري:بقولك ايه ياعم متولي...اياك تحكي حاجة لـ علاء لما يرجع..اللي يسألك ايه اللي حصل..قول معرفش.. قول انك كنت في مشوار ومش في العمارة، ألف اللي تألفه بس متقولش الحقيقه!!
متولي:حاضر تحت أمرك
بيري:شيل الكراتين اللي في الريسيبشن وقولهم يخلصوا بسرعة!!
متولي:تحت أمرك
{وشال مع الناس}
===========فـي بـيـت غـسـان===========
{الباب خبط علي زهرة فااستغربت، خصوصاً إن أخوها بيفتح عليها الباب بدون استئذان!}
زهرة(بحزن) :ادخل
{لقيت كمال دخل، ووقف علي الباب من برا}
كمال:غسان مشي، راح مشوار وقالي أحطك قصاد عينيا أحسن تهربي
زهرة(بحزن) :لا اتطمن زهره مش هتهرب..واضح ان زهرة اتحكم عليها تعيش وتموت هنا
{بص كمال وراه، وبعدين بص لـ زهره وكمل كلامه}
كمال(بصوت واطي) :انا هساعدك يا زهرة..بس اياكي تجيبي سيره لـ غسان لانك عارفه ايه اللي هيحصل كويس اوي
{قامت زهره من مكانها وهي كل أمل}
زهره:هتساعدني بجد؟؟...هتساعدني؟؟
كمال:شششش ايوه هساعدك..انا عارف انك عايزه تروحي لأمك ومرات أبوكي، بس موعدكيش ان انا أقدر اساعدك النهارده، انا مش ضامن، ممكن غسان يرجع في أي لحظه!
زهره(بحزن) :قولي امتي طيب؟
كمال:في أقرب فرصة
{وفجأه سمعوا صوت باب الفيلا بيتفتح}
كمال(بسرعة) :خلاص اتفقنا...هقفل عليكي دلوقتي ماشي؟
{هزيت زهره راسها مع ابتسامة خفيفه، وكمال قفل الباب ونزل لقي غسان في وشه}
غسان:انت كنت بتعمل ايه فوق؟
كمال:الست أختك كانت بتخبط وصدعتني، طلعت أشوف في ايه..قال ايه طلعت عايزه تشرب..قولتلها انا مقدرش اعملك أي حاجة من غير إذن غسان..وقولت استني لحد مانت تيجي
غسان:هبقي أطلعلها ماية بعدين
{وقعد يرتاح علي الكنبه}
كمال:مش ناوي تقولي كنت فين؟
غسان:جرا ايه ياعم هو كل حاجة اسئله اسئله؟؟..ماتسيبني في حالي وتِحل عني بقي!
كمال:خلاص براحتك، انا مش هضغط عليك
============فـي بـيـت هويدا===========
{عملوا قاعدة عربي، أو بما يسمي قاعدة ميعاد..كان بيحضرها جيران هويدا و سميح، و عبدالله}
سميح(بصويت) :بجى آني مرا تمد ايديها اللي تتجطع عليا؟؟.. آني يتشبشبلي وسط الخلج؟...وهيبتي فين؟؟
{تدخل نسمة وهي رافعة حواجبها الاتنين، وحاطة ايديها في وسطها، والغل علي وشها}
نسمه(بزعيق) :ونكسر عضمك كمان، لما تبقي تحترم أمي وأختي أبقى احترمك
عبدالله(بزعيق) :خشي جوا يانسمه، ومتعكيهاش زيادة عن كده..ومتقليش مننا قصاد الناس
سميح(بزعيق) :آني هَجوم آخد حجي بدراعي
{وقام عشان يضرب نسمة، راحت قالعه الشبشب لتاني مره ورافعاه عليه، وفي الوقت ده صوت الرجالة على..دخلت هويدا وزعقت لـ نسمة}
هويدا(بزعيق) :انتي ايه اللي دخلك وسط الرچالة؟؟...ادخلي چوا يابت...ادخلي
{دخلت نسمة وهي بتبص لـ سميح بـ غل..قام عبدالله والرجالة وشدوا سميح وقعدوه}
عبدالله:استهدى بالله يا عمي، شيطان ودخل مابينا..تلاقيها عين حد من العدوين!
سميح(بزعيق) :مراتك دي مش متربية..وتستاهل ضرب الشباشب..و متفكرش عشان آني سكت يبقي خلاص لاااا.. ده انا مرجدلها وهطلع كل اللي عملته فيا على دماغها!!
_الصراحة الحاچ سميح عنده حَج، مراتك مش تمام، وانت لو راچل بحج وحجيجي اشكمها، مهما وصلت المشاكل في أي بيت، بس متبقاش للدرچادي!
عبدالله(بزعيق) :وايه اللي دخل الرجولة في الموضوع ياعم الحاج؟..نسمه عصبية ومبتعرفش تداري..اللي في قلبها على لسانها
=حقك علينا ياعم سميح، انت مهما كان في مقام أبونا الحاج..متاخدش علي خاطرك منها، دي مهما كان زي بتك
سميح(بزعيق) :لاااا آني مبخلفش، ولو كنت بخلف وعندي بت زي دي كنت وأدتها
عبدالله(بصوت حاد) :ماخلاص بقي ياعم سميح، انت نازل غلط فيها من ساعتها ومش عامل اعتبار انها مراتي!!
سميح(بزعيق) :سهله يابا...خدها وغوروا علي بيتكم ووجتها مش هتسمع اللي آني بجوله
_احنا جايين نحل مش نعقد الدنيا، دلوقتي ست نسمة هتيجي تحب علي راسك وتتأسفلك و يا دار ما دخلك شر
سميح(بزعيق) :لااا آني مش عجبلها، ولو هوبت ناحية داري آني هكسرلها رجليها الاتنين
{قام عبدالله وهو متعصب}
عبدالله(بزعيق) :انشالله عنها مااتحلت، بالإذن يا رجالة
{وخرج برا}
سميح(بعصبيه) :شايفين؟؟
=معلش طول بالك، دول شباب ومتهورين مش زينا عاقلين وعقلنا يوزن بلد بحالها!!
=========عـلى الجبل عـنـد حـاتـم=========
{كانت الدنيا ابتدت تليل، وسامعين أصوات حيوانات مفترسة..ومهره خايفة ومش علي بعضها!!}
مهره:يلا نمشي من هنا يا حاتم، احنا مش هنشوف حاجة لو الدنيا ليلت علينا هنا..قوم معايا!
{قام حاتم وسند عليها لحد ما رجعوا عند الخيم..ومكنش في حد في المنطقه كلها غيرهم..ودخلوا الخيمه..وقعدوا علي الأرض}
مهره:الجرح عميق؟
حاتم:اوي يا مهره..بس الحمدلله انها جات علي قد كده أحسن ما كنت أموت
مهره:بعد الشر عليك!!
{بص لها حاتم وابتسم}
مهره:قصدي يعني بعد الشر..أكيد مامتك هتموت عليك من ساعة ما اختفيت!!..حتى عم متولي.. الله اعلم حاله عامل ازاي دلوقت!
حاتم:انا مش مصدق ان عدي شهرين علي اللي حصل ده..ومش عارف ايه مصيرنا لو رجعنا مصر..واللي يجنن يا مهره..ان انا مش عارف مين بيعمل كده و ليه؟
مهره:يعني انا اللي أعرف؟...بقولك ايه يا حاتم غير الموضوع ده، انا بجد قلبي بيوجعني جدا كل ماافتكر، انا مش عايزه أفكر في الموضوع ده تاني...يااما نشوف حل يااما خلينا ساكتين أحسن!
{وقامت مهره واتجهت للمطبخ}
حاتم:انتي رايحه فين؟
مهره:هسخن مايه عشان أعقملك الجرح
حاتم:لا يا مهره.. بقولك الجرح عميق انا مش هستحمل!!
مهره:لا هتستحمل، انا عارفة بقولك ايه كويس
حاتم:ماشي اللي تشوفيه
{دخلت مهره المطبخ وسخنت مايه وبعد ١٠ دقايق رجعتله بالمايه وقماشة ولزق..وقعدت جنب منه، وفكيت الطرحه من علي رجله..وابتدت تعقمله الجرح، وكان حاتم بيتألم ولكنه بيحاول يستحمل بأي طريقة..وبعد ما خلصت، وحطيت اللزق،و لفيتله رجله}
مهره:علفكرا الجرح مطلعش عميق ولا حاجة زي مابتقول
حاتم:امال انا ليه حاسس انه عميق؟
مهره:لا ده مجرد احساس لكن الحمدلله انك بخير، سلامتك يا حاتم
حاتم :الله يسلمك يا مهره
{قربت مهره من الخيمه وقفلتها من جوا..ودخلت الخيمه التانيه}
مهره:انا هانام، تصبح على خير
حاتم:وانتي من أهله
{اتحرك حاتم من مكانه وقرب يبص علي مهره من بعيد، كانت مهره بتلف الطرحه اللي عليها الدم حوالين دماغها وبتداري شعرها، ابتسم حاتم واستغرب لما لقاها لبست الطرحه رغم ان عليها دمه!.. ورجع نام}
==============عـنـد عـلاء===========
{رجع البيت ونزل من عربيته، وأول ما متولي شافه ارتبك واتوتر وده بان علي وشه}
علاء:ازيك ياعم متولي؟
متولي:يااهلاً يا بيه نورت عمارتك
{وقامله، لحد ما علاء طلع..ولما فتح الشقه لقاها علي السيراميك..دخل يجري وهو مصدوم}
علاء:يانهار اسود ومنيل... انا اتسرقت!!!...اتسرقت!!!!!...بقي بتسرقيني يا بيري؟؟... طب وهي دخلت ازاي اساساً؟؟؟... امال البواب اللي تحت لازمة أمه ايه!!!!!
{ولسه بيكمل كلامه، لقى واحد جايله ومعاه ورقه}
علاء:ايه ده؟؟
_ده جواب من محكمة الجنح بتبديد منقولات عفش الزوجية من زوجتك السيده بيري فريد يسري الوالي.. ممكن إمضة حضرتك؟
{تنح علاء من الصدمة، ومضى واستلم الجواب، وبعد ما الراجل مشي..فتحه واكتشف ان بيري رافعة عليه قضية تبديد منقولات الزوجية}
علاء:سرقت العفش لأ وكمان رافعه عليا قضيه؟؟؟...وحياة أمك يا بيري لأوريكي
{وحدف الجواب علي الأرض بكل غل ونزل تحت لـ متولي والشر طالع من عينيه، ولما متولي شافه خاف}
علاء(بزعيق) :ده انا هوديك في ستين داهيه، انت نهايتك في العمارة دي قربت
متولي:انا... انا مش فاهم انت بتتكلم عن ايه يا علاء بيه؟
علاء(بزعيق) :سايبهم ينقلوا العفش وانت واقف تتفرج؟؟
متولي(بتوتر) :لالالااا... لا يا علاء بيه انت تقصد السكان الجداد؟.. انا أصلي كنت في مشوار طويل لـ جارك جاسر اللي فوقيك، ده انا والله ضهري اتقطم في المصلحه الحكوميه اللي وداني فيها، الله لا يكسبه ولا يربحه ويتعبه زي ما....
علاء(بزعيق) :بس بس بس... ايه هتحكيلي قصة حياتك؟؟...يعني كنت هنا ولا كنت متنيل علي عينك فين؟؟؟
متولي:اه اه يابيه كنت في مشوار، انت بتتكلم عن مين بالظبط انا مش فاهم؟
{شوحله علاء ومشى وهو كله غل لحد ما ركب عربيته ومشي، قعد متولي ياخد نفسه بعد الموقف اللي اتعرضله}
==============تـانـي يـوم===========
{صحى حاتم، ملقاش مهره..قام يدور عليها في كل حته ولكنها مكنتش موجوده}
حاتم(بصوت عالي) :مُهره... مُهره!!!
{وخرج برا ينده عليها ملقهاش..كان بيلف وبيدور عليها في كل مكان..لحد ما طلع لأعلى حته في الجبل رغم تعبه و يبص يمكن يشوفها!}
حاتم(بصوت عالي) :مهره...ردي عليا لو سامعاني...انتي روحتي فين... يامهره!!
{وإذا بفجأةً صوت من وراه بيكلمه}
_مُهره لدينا، لقد انضمت لـ قبيلة السمتاء وأصبحت واحدة منهم!
{لف حاتم، لقى راجل شكله وحش وفي ايده سيف}
حاتم(بزعيق) :مهره عندكم؟؟؟...خطفتوها ازااااي!!!!
_نحن لم نخطفها..لقد جاءت معنا بكامل إرادتها!
{غلي الدم في عروق حاتم لما عرف انهم خطفوا مُهره، ومحسش بنفسه غير وهو بيضربه!!}
حاتم(بزعيق) :انتوا اللي جيبتوه لنفسكم!!!..مهره لو مرجعتش، انا هخلص عليكم كلكم واحد واحد!!
{وضربه بكل قوته، كان الراجل بيتألم}
_إن قضيت عليّ.. فلن تستطيع القضاء علي قبيلة بأكملها!
حاتم(بيضربه) :ده انا هصفي دمكم، ومستعد أحاربكم طول حياتي في سبيل إن مُهره ترجع!!...انتوا جيتوا على اللي مبيرحمش!!!
{وضرب الراجل وزقه من فوق الجبل، وحاتم مسح بإيده علي بؤه استعداداً لإستكمال المعركة..لحد ما مشى وهو رايح للقبيله بنفسه..لحد ما لقي ايد بتخبط عليه ولما بص لقاه رامز}
رامز:سمعت ما حدث لكم، وقد جئت لمساعدتكم!
حاتم(بزعيق) :انا مش عايز مساعدة من حد!!...اللي معاه ربنا مبيخسرش!!
رامز:ولكن لا تنسَ..أن الكتره تغلب الشجاعة يا حاتم وأن يد الله مع الجماعة!!...هيا بنا!!
{وخد حاتم واتجهوا لـ موقع القبيلة الأشد شراً علي الإطلاق!..وكان شرط من دخول القبيلة، انه يرسم علمهم، ويلبس نفس الإسورة اللي في ايديهم..ولكن قرر حاتم انه يلف من ناحية تانيه، وينط من مكان سري}
رامز:اقفز ولا تخف!
{نط حاتم وهو حذر جداً ان حد يشوفه..ووراه رامز..وبعد ما نطوا..كانوا بيبصوا في كل الأماكن على مهره..لحد ما شافوها..ولكن مهره تنحت لما شافتهم وكانت بتهز راسها يمين بمعنى (امشوا بسرعة).. ولكن حاتم ورامز مرضوش يمشوا واستخبوا لما لقوا حد جاي..وبعد ما اتأكدوا انه مشى..دخل حاتم بسرعة وفكها}
مهره:بسرعه يا حاتم...بسرعه
{وبعد ما حاتم فكها ولسه هيخرجوا.. لقوا واحد من القبيلة واقفلهم علي الباب وفي ايده سيف..راح حاتم ضاربة بـ رجله لحد ما وقع علي الأرض، وشد مهره وخرجوا برا.. كانوا بيبصوا يمين وشمال خوفاً من إن حد يشوفهم..لحد ما قابلهم ناس كتير من القبيلة، محاوطينهم من كل مكان..بص رامز لـ حاتم وهز راسه بمعني (استعد)... وبالفعل المعركة ابتدت!!}
=============في بـيـت فـاتـن==========
{رن رقم غريب علي بيري، ولما ردت}
علاء(بصوت حاد) :بتسرقيني يا بيري؟... لأ وكمان رافعة عليا قضية تمكين؟...بتطالبي بحقك اللي انتي واخداه زياده ونص؟؟
بيري(ببرود) :أنا؟؟...محصلش!..ده انت اللي حرامي ونصاب..نصبت عليا في مَحلي وشقتي.. طب أقولك ده انا لسه هرفع عليك قضية طلاق..وهتطلقني وهاخد حقوقي كامله مكمله، ايه رأيك بقي؟
علاء(بزعيق) :لااا دي كده هبت منك علي الآخر..بس وحياة أمك لأوريكي اللي عمرك ماشوفتيه.. وابقي خلي أمك اللي بتلعب في دماغك تنفعك
{وقفل السكة في وشها}
بيري(بـ غل) :اه يا كلب يا حرامي، وكمان بتقفل السكه في وشي؟؟...انت اللي هتوريني؟... لااا مش بيري، شكلك معرفتنيش كويس في الكام سنه اللي عيشت معايا فيهم، ده انا هوريك النجوم في عز الضهر
============في فيلا غسان=========
{كانت زهرة نايمه، اتفتح الباب عليها وصحيت، لقيته كمال}
كمال:قومي بسرعة..غسان مسافر وهيجي علي آخر اليوم، يادوب تلحقي تشوفي أمك وترجعي تاني
زهره:انا لو مشيت مش هرجع تاني!!
كمال:انتي لو مرجعتيش تاني فاانتي كده بتعرضيني للخطر من غسان... ولا أقولك انا برضه مش ضامن، انا هاجي معاكي، رجلي علي رجليكي في أي مكان تروحيه!!
زهره:ماشي أمري لله، ثواني طيب
كمال:بسرعة!!
زهره :طيب
{قامت زهره وظبطت الطرحه في المرايا، ومشيت مع كمال، وبالفعل خدها وراحوا مستشفى الأمراض العقليه..وأول ما زهره شافت والدتها أنيسه، اترميت في حضنها وعيطت}
زهره:وحشتيني اوي ياماما، انا حياتي اتبهدلت من بعدك ومن بعد اللي حصل..انا مابقتش عارفة أعيش من غيرك..حياتي بقيت صعبه اوي اوي
أنيسه(بعياط) :وانتي كمان اوي اوي يا زهره يابنتي..وحشتيني بقالي شهور مشوفتكيش ولا اعرف انتي فين ولا عايشه ازاي!!
زهره(بعياط) :غسان مبهدلني، بيضربني ليل نهار، حتي مش قادره اسيطر عليه، غسان ألحد ومبقاش في حاجة بيعملها في حياته غير قراية كتب الإلحاد وسب الدين والتشكيك في الإله..انا مش خايفه على نفسي منه.. انا خايفه عليه من انتقام ربنا!!!
أنيسه:متقوليش كده قصاد ليلي...دي حالها اتدهور اوي من بعد اللي ابنها عمله فينا...نفسي حد يساعدنا ويخرجنا من هنا، احنا عمرنا بيضيع هنا يابنتي!!
كمال:أوعدكم ان انا هساعدكم، بس مش دلوقتي، هساعدكم في الوقت المناسب..بس ياريت متعرفيش غسان ان احنا جينا هنا
أنيسه:وهو فين غسان اللي انت بتتكلم عنه ده؟؟... ده انا بقالي شهور مشوفتوش ولا اسمع عنه حاجه غير دلوقتي ومنكم!!
كمال:غسان ربنا يعينه علي اللي هو بقى فيه، انا بقيت أطاوعه عشان نفسي..وعشان ميإذنيش ويضرني زي ما بيعمل مع ناس كتير
أنيسه:وهو غسان بيإذي مين؟ ولا بيعمل ايه في حياته؟
كمال:الف سلامه عليكي
{مردش علي السؤال، وسابهم وخرج من الأوضه}
زهره(بعياط) :مش مهم أي حاجة...المهم ان انا شوفتك، ياعالم هقدر أشوفك تاني امتي!!
===========عـنـد علاء و نويري===========
{كان علاء قاعد بيشتكيله حالة في جنينة بيت نويري}
نويري:طبعاً ليك حق تدايق...وتدايق اوي كمان...انا لو مكانك مش عارف ايه اللي كان ممكن اعمله...الصراحه ده ظلم..والمصيبه انك مش عارف تمسك دليل....ولا صحيح تاهت وجاتلي..مش العمارة فيها كاميرات؟
علاء:كان فيها واتحرقوا..أمال انا دمي محروق ليه؟... عشان مش عارف امسك دليل في ايدي..انا بفكر في فكره ويارب تنفع
نويري:خير طمني!
علاء:لا مبحبش أحكي عن حاجة قبل ما اعملها، أصل انت عارف الخطط اللي بتتحكي بتتنظر وتبوظ قبل ماتتعمل
{وقام}
نويري(بيضحك) :هههههه الكلام ده مش هنا ياحبيبي، احنا عنينا بارده اوي
{قرب منه علاء وباسه وسلم عليه}
علاء:ماشي ياباشا، يلا بالإذن انا
نويري:رايح فين الساعة دي؟
علاء:لا ده مشوار هبقي أحكيلك عنه بعدين، سلام
نويري:سلام
{ركب علاء عربيته، وتظهر رجل حد جايه بدون ما وشه يظهر}
نويري:ابدأ
=============عـند حاتم ومهره===========
{هربوا هما ورامز بعد ما ضربوا نص القبيلة..ورجعوا علي مكانهم..وهناك كانت دينا ونانيس و منذر، بينقلوا حاجتهم عشان هيغيروا المكان ويروحوا مكان جديد}
حاتم:هما رايحين فين؟
رامز:يبدو أنهم ينفذوا اتفاقنا بالهجرة من هنا إلي بقعة أرض جديدة وآمنه.
{دخلت مهره جوا عندهم}
مهره:احنا هنروح فين؟
دينا:هنروح مكان جديد، المكان هنا مبقاش آمن علينا، وممكن في أي لحظة يرجعولنا تاني
{سكتت مهره ولقيت منذر مركز معاها زيادة عن اللزوم لحد ما قرب منها}
منذر:منذ أن رأيتكِ وأنا أشعر بالإرتياح، كأني لم أري امرأه مثلك من قبل، هل انتي مصرية حقاً؟
مهره(بذكاء) :اه مصرية، ومالوش داعي الكلام ده
{خرجت نانيس من الخيمة بعد ما سمعت كلامهم وقربت من حاتم وهمستله في ودنه}
نانيس:حبيبة القلب شكلها مظبطه الدنيا مع منذر، مش انت بتحبها علي مراتك برضه ولا انا بيتهيئلي؟
حاتم(بصوت حاد) :مهره زي أختي ومفيش حاجة مابينا، وياريت متدخليش في اللي ملكيش فيه بعد كده!!... مفهوم؟؟
نانيس:طيب
{وبعد ما لموا كل حاجة، خدوا حاجتهم وراحوا قطعة أرض جديده في مكان بعيد، وسط قبائل جديدة..وهناك بنوا الخيم، ووقت النوم، كانت مهره مخنوقه ومش جايلها نوم..خرجت برا تشم شوية هوا..كان حاتم واقف ومدي ضهره ليها}
مهره:ايه ده انت صاحي؟
حاتم:----------------
مهره:حاتم!!
{وقربت أكتر، لحد ما لف}
مهره:انت منمتش ليه لحد دلوقتي؟
حاتم(نبرة صوت ضعيفه) :عادي...مش جايلي نوم
مهره:انا كمان مش جايلي نوم، وزهقانه ومخنوقه اوي اوي
حاتم :------------
مهره:هو انت ساكت ليه؟...صحيح رجليك دلوقتي بقيت أحسن؟
حاتم:شوية
مهره:شكراً يا حاتم انك انقذتتي انت ورامز...بجد انا متشكره ليكم اوي، لولاكم كان زماني مت أو حصلي حاجة
حاتم:بعد الشر عليكي يا مهره، الحمدلله انك بخير
مهره:وايه يعني كان ممكن يحصل لو كنت مت؟
حاتم:حاجات كتير محبش أقولها..أولهم قهرة أهلك عليكي..قرايبك او صحابك
مهره(بحزن) :انا مليش حد غير ماما واخواتي، اللي معرفش عنهم حاجة، وكل يوم بقول لنفسي عايشين ولا ماتوا!!
حاتم:وانا بقولك انهم عايشين
مهره:عرفت منين؟
{قرب حاتم من مهره، وشد ايديها حطها علي قلبه}
حاتم:قلبي... قلبي بيحس بكل حاجة.. وحشه او حلوه قلبي بيحس بيها وبيعرفها!!
{اتحرجت مهره، وشدت ايديها وحسيت ان حاتم كلامه بيقصد حاجة هي مش فاهماها!}
مهره:امممم قولي يا حاتم..بما ان كلنا واحنا شباب بيعدي علينا مواقف اعجاب او حب، عمرك حبيت واحده او ارتاحتلها؟
حاتم:مره واحده
مهره:وايه اللي حصل؟
حاتم:محدش بيعرف المستقبل، دي حاجة في علم غيب ربنا... تصبحي على خير
{ودخل الخيمه، ومهره بتحسب الكلام في دماغها}
مهره:وانت من أهله!
===========في شغل نـبـيل===========
{اتفاجئ بدخول علاء عليه في شغله}
نبيل:ايه ده علاء؟... ده ايه الزيارة الحلوه دي
علاء:طول عمري بقول عليك محترم من أول يوم شوفتك فيه.. ابن ناس وتفهم في الأصول
نبيل:ربنا يخليك، طب اتفضل
{قعد علاء، وكان بيبص علي المكتب شمال ويمين}
علاء:حلو مكتبك، منظم وديكوراته علي الشعره
نبيل:تسلملي ده من زوقك، عامل ايه انت وبيري، رجعت البيت ولا لسه؟
علاء:هههه ياراجل بقي معقول غادة مقالتلكش، ده انتوا ماشاء الله عليكم، مبيتبلش في بؤكم فوله..مادام واحد عرف يبقي بقيت العيله عرفت
نبيل(بإستغراب) :ايه الكلام الغريب اللي بتقوله ده ياعلاء؟.. وبعدين ايه الردود الثعبانية دي ماترد رد مناسب!!
علاء:يعني متعرفش؟
نبيل:لا معرفش
علاء:ست بيري المحترمه اللي طالعه من بيت محترم مانا مقدرش أغلط لو غلطت في البيت اللي طالعه منه هبقي بغلط في مراتك ماهي طالعه من نفس البيت برضه
نبيل:إنجز!!
علاء:سرقت العفش، ورافعه عليا قضية تمكين..ده علي أساس ان انا هشك في عم متولي البواب ولا في الست اللي بتيجي تمسح السلالم كل يومين؟...أكيد هي بيري يعني مفيش غيرها..ده انا حتى ماشي بمبدأ ابحث ورا المستفيد وهي الصراحه أكتر واحده مستفيده من الليله دي كلها!
نبيل:بيري لا يمكن تعمل كده، أكيد انت اللي سرقت العفش زي ما سرقت محلها
علاء:مش بقولك مش بيتبل في بؤكم فوله؟؟.. سبحان الله كلامي طلع صح اهو... انا ياحبيبي لا بسرق ولا بتنيل...حد الله بيني وبين الحرام...ده انا أجيبلكم ستين مصحف أحلفلكم عليه ان انا مسرقتش حاجة وان بيري هي اللي حراميه ونصابة
نييل:قالوا للحرامي احلف، قال جالك الفرج
{قام علاء وهو متعصب ومسك في رقبة نبيل}
علاء(بزعيق) :تقصد ان انا حرامي يا نبيل؟؟...بتسَرقني وانا جاي آشتكيلك من أخت مراتك الحراميه النصابة اللي تاكل مال النبي؟
نبيل(بزعيق) :متنساش ان أخت مراتي اللي بتتكلم عليها دي، تبقي مراتك وأم بنتك في المقام الأول..يعني أي حاجة هتقولها عشان تشوه صورتها، فانت بتشوه صورة نفسك قبل أي حد!!
علاء(بزعيق) :مين يشهد للعروسه؟... جوز أختها...بقي بتدافع عنها وبتترابطوا عليا؟..طب ماشي يا نبيل انا اللي غلطان ان جيت لواحد زيك، كنت فاكرك بعقلك طلعت زيهم
نبيل(بزعيق) :احترم نفسك والزم حدودك وكفاياك غلط لحد كده، واتفضل اطلع برا...لما تحترمني وتعرف ازاي تتكلم معايا ابقي تعالي
علاء(بـ غل) :بقي بتطردني يا نبيل؟... طيب... ماشي
{وسابه ومشي، ورجع نبيل قعد علي الكرسي وهو مدايق!!}
=============في بـيت هويدا==========
{دخلت علي سميح الأوضة..لقيته بيقطع في صور عيالها بما فيهم حاتم.. جريت عليه وهي بتصوت}
هويدا(بصويت) :صور عيالي...بتعمل فيهم ايه... بتعمل ايه...هي الناس تكبر وتعجَل وانت تكبر ومخك يفلت أكتر من الأول؟؟؟
سميح(بزعيق) :وسعي يا مرا من جدامي..عيالك دول مالهمش خير في چوز أمهم...واللي مالوش خير فيا ميستاهلش يتحطله صور عندي
{شدت هويدا الصور من ايده بكل غل}
هويدا(بصويت) :ارحمنا بجى، ده انت مريض نفسي ياشيخ..عيالي عملولك ايه بس.. ماهما في حالهم اهو
سميح(بزعيق) :اخرسي مسمعش حِسك هنا فاهمه ولالا؟... ولا تحبي تنضربي عَلجه زي زمان؟
هويدا(بزعيق) :بجولك ايه ياسميح..شيل ده من ده يرتاح ده عن ده...رَيَح وارتاح..اوعى من وشي
{وزقته وخدت الصور وخرجت برا}
سميح(بـ غل) :مااشي يا هويدا.. ماشي
==========تـانـي يـوم عـنـد مُهره==========
{صحيت من النوم، ودخلت الخيمه التانيه، كانت بتسرح شعرها قصاد المرايا، فجأه لقيت وراها منذر}
منذر(بإبتسامه) :صباح الخير
مهره:صباح النور
منذر:أول مره أرى شعرك...إنه ناعم كالحرير!
مهره(بعصبيه) :لأ وكمان بتتغزل فيا؟...انت ازاي بجح كده وازاي تدخل من غير ماتعمل صوت؟
منذر:ولماذا كل هذا؟...لماذا تتحدثي هكذا وكأنني دخلت عليكِ المرحاض وليس الخيمة؟
مهره(بزعيق) :وانا كمان هستني لما تدخل عليا الحمام؟...بقولك ايه انت شكلك مش مظبوط، بس مش عليا انا ياحبيبي، يعني سمعت ان البنات المصريين حلوين، لكن مسمعتش انهم جدعان وفي الغُربة بميت راجل؟؟
منذر:لالالا سمعت...قد سمعت بالفعل...انا اعتذر لكِ عن سوء الفهم...وإن تسببت لكي في أي ضيق، فااسمحيلي ان اعتذر لكي عما بدر مني!!
{دخل حاتم ولقي منذر واقف مع مهره جوا الخيمه، اتبدلت ملامحه في ثانيه من ملامح عادية لـ غضب}
حاتم(بصوت حاد) :انت بتعمل ايه هنا؟؟؟