رواية ابي بواب وامك خدامه الفصل السابع7والثامن8بقلم رانيا عماره
منذر(بعصبيه) :أتتسائل مالذي أفعله هنا؟...بأي وجه حق تتحدث معي بهذة الطريقة؟..هل نسيت نفسك؟؟
{قرب حاتم منه ومسكه بكل غل من دماغه}
حاتم(بصوت حاد) :اللي حصل ده ميتكررش تاني!!..وملكش دعوه بـ مهره ولا تقرب منها..ولو حصل وجالي خبر، هزعلك اوي!!
منذر(بعصبيه) :وأنا أقول لك في وجهك..انت لا تستطيع فعل شئ بي، ولا تنسَ أنك هنا غريب بيننا، نحن أصحاب البلدة، أما أنتم فغرباء!!
حاتم(بصوت حاد) :انا خلصت علي نص قبيلة السمتاء لواحدي، تفتكر مش هقدر أخلص عليك زيهم؟...أحب أقولك لا انا اقدر..بس مش هعملك حاجة مش من أجل سواد عيونك..لالا..عشان خاطر خالك رامز، وعشان هو راجل جدع فاانا هديك فرصه تانيه، ولو كررت اللي عملته النهارده، هوريك كلامي بالأفعال علي أرض الواقع!!
{بص له رامز بـ غل، لحد ما حاتم زقه برا ومشي..ومهره كانت باصة في الأرض ومحرجة}
حاتم:عملك ايه يا مهره؟
مهره:انا كنت بعمل شعري قصاد المرايا لقيته دخل مره واحدة بدون استئذان، اديته اللي فيه النصيب، ولقيتك دخلت انت كمان!
حاتم:انا دخلت عشان عارف ان حاجة زي دي كان ممكن تحصل، علي العموم لو دايقك عرفيني وانا مش هسيبه
مهره:ماشي يا حاتم
{خرج حاتم، وراح في الغابة القريبة منهم، وفي ايده الأدوات الرياضية، لحد ما ابتدا يلعب رياضة..وحس بـ حد وراه ولما بص لقاها نانيس}
نانيس:كنت بتتخانق مع منذر ليه يا حاتم؟
حاتم:حاجة متخصكيش
نانيس:انت بقالك شهرين وشوية عايش معانا، المفروض يعني تكون خدت علينا..انا مش لاقيه سبب للرفض بصراحة.
حاتم:رفض ايه؟
نانيس:رفضك ليا..مانت عالطول بترفضني كل مااجي واتكلم معاك..مش فاهمه ليه يعني وعشان ايه؟
حاتم:انتي بتلفي وتدوري حواليا ليه؟.. وعايزه ايه؟
نانيس:يمكن عشان معجبه بيك مثلاً؟
{اتغيرت ملامح حاتم للتعجب}
نانيس:أه معجبه بيك مستغرب ليه؟..وحوار انك متجوز ده مش داخل دماغي بصراحة..وكل الكلام اللي قولتوه ده مدخلش دماغي..انا مرتاحالك اوي يا حاتم، ومشدوده ليك..انت ليه مش بتبادلني نفس الشعور؟
{قام حاتم وهو مستغرب كلامها..لحد ما نانيس قربت أكتر، ومسكت ايده}
نانيس:ولا انت في حد في دماغك؟
{راح حاتم باعد ايديها عنه بعنف}
حاتم(بصوت حاد) :انتي ازاي بجحه كده بجد؟..ولا الرجالة اتقطعوا من حواليكم ملقتيش غيري انا؟..بصي يا نانيس عشان نكون علي نور وواضحين مع بعض، انا معنديش أي مشاعر ليكي، ولا ببادلك نفس الاحساس، وياريت نخلي في دم ونبعد شوية
نانيس(بحزن) :ده آخر كلام عندك يا حاتم؟
حاتم:اه آخر كلام، ويلا امشي من هنا متجيبيلناش الكلام...يلااا
{مشيت نانيس والحزن مالي قلبها}
============فـي الـمـشـرحة==========
{بعد ما عدد الضحايا زاد بعد التحقيق في قضية أشرف العقاد، قرروا انهم يوقفوها شوية لحد مايشوفوا هيعملوا ايه..كان الدكتور واقف في المشرحه وبيشرح جثة تانية..وبعد ما خلص وغسل ايده ورجع المكتب وسط زمايلة..جاتلة مكالمه من وكيل النيابة (حسني شاهين)}
الدكتور:الو... اه انا دكتور طارق
الظابط:وكيل النيابة حسني شاهين معاك
الدكتور:اهلاً بحضرتك.
الظابط:احنا فتحنا ملف قضية قتل أشرف العقاد وهنرجع نشتغل عليها من تاني..حبيت أبلغ ادارة المستشفى، اننا هنبعتلكم حراسة مشدده أثناء التحقيق في القضية تجنباً لأي ضحايا جديدة
الدكتور(بخوف) :ايوه بس حضرتك...احنا فقدنا زمايل كتير لينا من ورا قضية أشرف العقاد..ومش مستعدين ان اللي حصل ده يحصل تاني بأي شكل من الأشكال!
الظابط:وعلشان كده احنا هنبعتلكم حراسة مشدده، ومش عايزكم تقلقوا من أي حاجة..المره دي كل حاجه هتكون تحت السيطره.
الدكتور(بتردد) :يافندم ولو...برضه احنا مش ضامنين، ومش عارفين ايه اللي في نية المجهول اللي اتسبب في كل ده!
الظابط:دي أوامر من النيابة العامة ولازم تتنفذ، سواء رفضتوا او وافقتوا، واتصالي بيكم ده كان عشان أبلغكم مش أكتر
الدكتور:طيب يا فندم، احنا في انتظار الحراسة
{وقفل السكة مع الظابط، والدكتور هم الدنيا كله اتجمع فوق دماغة بمجرد ما عرف ان القضية رجعت اتفتحت تاني، وياعالم ايه اللي ممكن يحصل!..لحد ما بقيت زمايله لاحظوا}
_في ايه يا دكتور طارق؟
الدكتور:النيابة فتحت ملف قضية قتل أشرف العقاد لتاني مره!...حاجة زي دي كفيلة انها تفتح علينا أبواب جهنم!
==============عـنـد زهـرة=============
{كمال خدها ورجعوا الفيلا..دخلت زهرة أوضتها وقبل ما كمال يقفل عليها}
زهرة:انت لو عايز تساعدني فعلاً..يبقي فكر معايا في حل، وإلا هتكون نهايتنا احنا الاتنين وحشه!
كمال:انا عارف هعمل ايه يا زهرة..متقلقيش
زهرة:ممكن تعرفني ايه اللي انت ناوي عليه؟
كمال:بعدين يا زهرة، هتعرفي كل حاجة بعدين
{وقفل عليها الباب ونزل، قعدت زهرة علي السرير وهي بتفكر هتعمل ايه..لحد ما ابتسمت وكأنها أخيراً لقيت الحل.. وتحت كان كمال بيتصل علي غسان}
كمال:وصلت ولا لسه؟
غسان:وصلت
كمال:ايه الصوت اللي جنبك ده؟.. هو انت فين؟
غسان:كمال!!.. متسألش وخليك في حالك
كمال:خلاص يا سيدي انا غلطان، انا كنت بتطمن عليك مش أكتر
غسان:هكلمك بعدين، سلام
كمال(بإستغراب) :سلام!
{وقعد علي الكنبه قصاد التلفزيون}
كمال:أمرك عجيب اوي يا غسان، ونفسي اعرف ايه اللي وراك عشان اهدى وقلبي يرتاح!!
=============عـنـد علاء==========
{كان في العربية، واتصل علي بنته فيروز}
علاء:الو يا فيروز، عاملة ايه؟
فيروز:كويسه
علاء:ياحبيبتي انا مش عايزك تزعلي مني، ده انا مهما كان أبوكي وبحبك..ده انا معنديش غيرك يا فيروز واوعي تصدقي كلام أمك وجدتك عني..هما بس عشان فاهمين بابا غلط، انما لو فهموه صح مكنش هيبقي ده كلامهم!
فيروز:لا يا بابا، انت بقيت تعامل ماما وتيته وحش، وهما زعلانين منك وبالذات ماما
علاء:ده انا بحب أمك حب، ربنا العالم بيه..عايزك تيجي وتقعدي معايا كام يوم، ده انا بقالي كتير مقعدتش معاكم ياحبيبتي، بقي ده كلام يرضي ربنا؟
فيروز:ماما مش هتوافق
علاء:ليه ده انا هجيبلك حلويات كتير اوي اوي، وهوديكي الملاهي، وهخليكي تشوفي صحابك، مش بذمتك امك حابساكي عند جدتك ليل نهار ومش بتشوفي صحابك ولا بتخرجي صح؟
فيروز:اه انا مبخرجش، عشان ماما بتخاف عليا
علاء:زمانك زهقتي وجالك اكتئاب كمان، انا هاجي بالعربية تحت البيت، وانزليلي بشنطة هدومك من غير ما حد ياخد باله
فيروز:بس كده ماما هتزعقلي!
علاء:لالا تزعقلك دي لما تبقي رايحة لحد من صحابك، انما انتي مع ابوكي.. هو انا حد غريب يا فيروز؟.. ليه مصممين تزعلوني منكم كده بس!
فيروز(بتفكير) :ماشي يا بابا، انت هتيجي امتي؟
علاء:هاجي كمان شوية، بس من غير ما حد ياخد باله ها!!
فيروز:ماشي
علاء:يلا ياحبيبتي اجهزي، وانا جاي في السكه اهو، سلام
فيروز:ماشي، باي
{قفلت فيروز مع باباها، وجهزت شنطة صغيره فيها هدومها من غير ما حد ياخد باله..لحد ما بيري دخلت الأوضه ولما لقيت بنتها فاتحة الدولاب استغربت}
بيري:انتي بتعملي ايه يا فيروز؟
فيروز(بتوتر) :انا بطبق الهدوم عشان أرتبها في الدولاب
بيري:ومن امتي وانتي بتهتمي بترتيب الهدوم؟
فيروز:أصل يا ماما.. كل صحابي بيساعدوا مامتهم في البيت، وانا قولت لازم اساعدك واتعود علي كده من دلوقتي!
بيري:برافو عليكي يا فيروز، بعد ما تخلصي، اغسلي ايديكي كويس عشان نتغدا
فيروز:ماشي يا ماما
{خرجت بيري من الأوضه، وفيروز بصيت عليها ولما اتأكدت انها مشيت..حطيت الهدوم في الشنطة}
فاتن:ميعاد جلستكم امتي يا بيري؟
بيري:بكرا الصبح
فاتن:يارب يتسجن ويروح في ستين داهيه تاخده
بيري:ياارب ياماما ياارب..واشفي غليلي منه ومن اللي عمله فيا، لأ وبعدين هو لسه شاف حاجة؟
فاتن:جدعة يا بيري، اديلة علي دماغه.. ده اللي هو يستاهله، خليه يعرف إن الله حق
بيري(بشماتة) :من ناحية ياخد علي دماغة فا هو هياخد علي دماغة كتير اوي، بس كله علي الهادي
=========عـنـد نانيس بعد ما رجعت========
{رجعت نانيس الكحل سايح علي وشها، والروج ملطش علي شفايفها..وهدومها فيها قطع كتير، وبتعيط..ولما أختها دينا شافتها صوتت وجريت عليها}
دينا:مالك يا نانيس، ايه اللي حصلك؟؟
نانيس(بعياط) :حاتم... حاتم يا دينا..كنت ماشية بشم شوية هوا أفك عن نفسي وعن اللي شايفاه من الدنيا، لقيته شدني مره واحده، انا اتبهدلت يا دينا...هاتولي حقي من حاتم...انا مش هرتاح غير لما حقي يرجع!!
مهره(بصدمه) :حاتم؟؟...حاتم مستحيل يعمل كده!!!
رامز(بعصبية) :حاتم قام بالاعتداء عليكي يا نانيس؟؟
نانيس(بصويت) :لو بتحبوني رجعولي حقي منه، انا مش هسيبه ولا هسيب حقي مهما حصل!!
منذر(بزعيق) :كيف يجرأ على ما فعله؟؟.. هل نسى أننا خلف ظهرها، نقوم بحمايتها؟...قومتوا بإدخالة بيننا في قبيلتنا..يأكل ويشرب معنا، وينام بجوارنا في خيمنا التي نصبناها بأيدينا حتي هلكت..تعاملنا معه علي أنه واحد مننا وليس بغريب!!.. وبعد كل هذا ينسي المعروف، ويتعدي حدوده معنا؟؟
رامز(مصدوم) :انا مصدوم في حاتم..لم أتوقع ان يصدر منه فعل كهذا في يوم من الايام!!
{جريت مهره وراحت عند حاتم، كان لسه بيلعب رياضه}
مهره(بصوت حاد) :اللي انت عملته ده بجد؟
{قام حاتم وهو مستغرب كلام مهره}
حاتم:عملت ايه؟؟
مهره(بصوت حاد) :نانيس راجعه متبهدله وبتقول انك اتعديت عليها!!... الكلام ده حصل ولالا؟؟؟
حاتم(بزعيق) :انتي عبيطه!!...انا أعمل كده؟؟.. دي كدابة وستين كدابة..هي اللي جات وقالتلي انها معجبه بيا ولما صديتها وكلامي معجبهاش، راحت راجعه بـ فيلم هندي اللي زمان كلكم صدقتوه!!
مهره:حاتم انا مصدقاك!!...انا من أول يوم شوفت فيه نانيس وانا مش مرتاحالها، ولا مرتاحه لـ كلامها ولا تصرفاتها..انا شايفه اننا لازم نمشي من هنا وكفاية علينا كده
حاتم:بس قبل ما نمشي يا مهره، لازم أبرأ وادافع عن نفسي وأبين الحقيقة..انا مظلوم ومعملتش حاجة، و ربنا شاهد عليا وعليها وعلى كدبها!!!
مهره:مش لازم ياحاتم يلا نمشي ونشوف حد يرجعنا مصر، يلا
{وسمعوا صوت ناس جايين وهما بيزعقوا مستعدين لـ خناقة..لحد ما رامز ومنذر ودينا ونانيس وصلوا}
رامز(بزعيق) :اعتبرنا أنك واحد مننا..كنت أتخيل أي شئ إلا انك تقوم بالتعدي علي نانيس، واليوم سوف أأخذ بتارها منك
{ولسه هيضرب حاتم، راح حاتم ضاربه هو ومنذر.. قربت نانيس تضرب مهره، راحت مهره ساحباها من شعرها وخدتها علي الأرض وضربتها هي كمان.. وكانت دينا بتبعدهم عن بعض.. وبعد ما حاتم ضرب منذر ورامز.. خد مهره وجروا بعيد لحد مااختفوا من قدامهم... وطيت دينا ونانيس يشدوا رامز و منذر}
رامز(بتعب) :يا إلهي، أشعر بألم في سيقاني وكأنهم كسروا!!
منذر(بتعب) :أشعر وكأنني أموت!
{وبعد ما حاتم ومهره هربوا مسافة طويلة جداً تكاد تكون ١٥ كيلو علي رجليهم..وصلوا جزيرة جديدة، وقعدوا قصاد البحر علي الشاطئ..كان حاتم بيتألم من رجله، ودي حاجة خليت مهره قلقت عليه}
مهره:رجليك بتوجعك صح؟
حاتم(بتعب) :اوي
مهره(بحزن) :الف سلامه عليك يا حاتم..هتكون أحسن!
{وطبطبت عليه وهي زعلانه عشانه}
حاتم:عارفة يا مهره..أكتر حاجة مصبراني علي ده كله، هو انك معايا من أول الرحلة..رغم اننا جينا هنا بالغلط، بس انا مبسوط!
مهره(بإبتسامه) :يا حاتم احنا جيران، يمكن منعرفش بعض من زمان اوي بس باباك ومامتي فيه معرفة قديمه مابينهم
حاتم:في مره زمان وانتي في الابتدائي تقريباً يعني، قصاد العمارة ..جه ولد رخم وشد منك الطياره الورق بتاعتك، وانتي يوميها زعلتي وعيطتي..بس رجع وجابهالك تاني واعتذرلك وادالك ورده صغيره وانتي ضحكتي ونسيتي اللي حصل
{كانت مهره بتفتكر المواقف لحد ما تنحت}
مهره:انت عرفت الكلام ده منين يا حاتم؟؟
حاتم:عشان الولد ده يبقي انا
مهره(بصدمه) :انت بتهزر صح؟...طب وعرفت منين ان دي انا، مش يمكن واحده تانيه؟
حاتم:ملامحك متغيرتش من يومها..وكنا بنشوف بعض كل يوم بس مفيش كلام بينا..لحد مانا سافرت ٤ سنين مع والدتي في بلدنا...ورجعت العمارة تاني عند والدي
مهره(بتضحك) :يبقى احنا نعرف بعض من زمان اوي، مش من شهرين تلاته زي مانا كنت فاكره!!
حاتم:الموقف ده عدي عليه حوالي ٩ سنين
مهره(بتضحك) :انا بجد اتفاجئت اوي يا حاتم...متخيلتش خالص اننا نكون نعرف بعض من الفتره دي كلها!!.. بس ليه عملت انك مش عارفني أول يوم قابلتك فيه؟
حاتم(بيضحك) :لان انا فعلاً مكنتش اعرف اسمك، بس اديني عرفته اهو..مُهره..اسم حلو اوي!
مهره(بإبتسامه) :شكراً يا حاتم..انت اللي اسمك حلو اوي، صحيح مين اللي سماك.. مامتك ولا عم متولي؟
حاتم:بصراحة أختي نسمه هي اللي سمتني
مهره:نسمه؟...انا أختي اسمها نسمه برضه...دي صدفه صح؟
حاتم:اه يعتبر صدفه، وانتي مين اللي سماكي؟
مهره:بابا الله يرحمه
حاتم:الله يرحمه، كان بيفهم!
مهره(بتضحك) :فعلاً
============في بيت فاتن==========
{كانت في المطبخ مع بيري، وبيري كانت قاعدة علي الترابيزه ماسكة موبايلها بتقلب فيه..لحد ما فيروز عدت بسرعة من غير ما حد ياخد باله..وفتحت باب الشقة بدون مايعمل صوت..وقفلته براحة ونزلت عند علاء كان مستنيها في العربية}
علاء:ايه يا فيروز خلاص؟
فيروز:اه يا بابا..انا بصراحة كنت خايفه ماما تاخد بالها
علاء:الحمدلله انها عدت علي خير، يلا بينا بقي؟
فيروز:يلا
{واتحرك بالعربية ومشوا...وفوق كانت فاتن خلصت طبخ..وحطيت الأكل في الاطباق}
فاتن:قومي يا بيري، حطي دول علي السفره برا
بيري:ليه يا ماما، ما ناكل هنا أحسن!!
فاتن:مش هتكفينا احنا التلاتة، وديهم وانا هروح انده فيروز
بيري:حاضر
{قامت بيري وخدت الاطباق طلعتها برا، وفاتن دخلت الأوضه تنده فيروز}
فاتن:فيروز...انتي فين؟
{وخرجت برا تدور عليها في بقيت الشقه}
فاتن:فيروز!!!...يانهار اسود... البنت مش موجوده!
بيري(بإستغراب) :في ايه ياماما؟
فاتن:بنتك مش موجوده في الشقه!!!
بيري(بصويت) :مش موجودة؟..مش موجوده ازاي يعني؟؟
{ولفيت تدور عليها، لدرجة انها فتحت باب الشقه تنده عليها، وفاتن خرجت تبص من البلاكونه }
بيري(بصوت عالي) :فيروووز...فيروووز
فاتن(بخوف) :بنتك راحت فين يا بيري؟؟...ازاي تسيبيها تخرج لواحدها؟
بيري(بصويت) :ايه ياماما اللي بتقوليه ده؟؟...انا زي زيك معرفش حاجة!!
فاتن(بصويت) :بنتك اتخطفت يا بيري، اتخطفت
بيري(بصويت) :مستحيل تكون اتخطفت دي كانت لسه في أوضتها من نص ساعة!!..أكيد نزلت من ورايا وراحت لحد من صحابها
{ورنيت علي فيروز، ولما علاء سمع صوت الموبايل راح واخده من فيروز وقفله خالص}
بيري:مبتردش
{واتصلت تاني لقيته اتقفل}
بيري:اتقفل!!!!....اتقفل ياماما...أعمل إيه طيب؟...اعمل ايه بس...بااارب
{اتصلت فاتن علي غادة}
فاتن:الحقينا يا غادة...بنت أختك اختفت من البيت ومش لاقينها!!!
=====في الطريق عند هويدا ونسمه وضحي=====
{كانوا رايحين زيارة لـ متولي، وأثناء ركوبهم المواصلات}
نسمه:ابويا وحشني اوي...ياترى عامل ايه دلوقتي؟
هويدا:ادينا هنشوف يا نسمه، بس لعلمكم آني مش چايه معاكم تاني..عاوزين تشوفوه روحوا لواحدكم
نسمه:انا مش فاهمه انتي ليه رافضه تيجي معانا؟...اعتبريها فسحه اهو مش أحسن من قعدتك في البيت وبوزك في بوز الكلب سميح
هويدا(بزعيق) :احترمي نفسك يا نسمه متنسيش ان اللي بتتكلمي عليه دهوَن يبقي چوز أمك!!
ضحى:انتي مزعله نفسك ليه ياما؟...نسمه مقالتش حاجة غلط برضه!
نسمه:قوليلها
هويدا:مسمعش صوتكم انتوا الاتنين، ويلا انزلوا
{وبعد ما العربية وقفت في الموقف..نزلوا منها وركبوا تاكسي وداهم عند متولي..ولما وصلوا كانت وجيده قاعده تحت قصاد الأوضه مع متولي}
هويدا:ازيك يا وجيده عاملة ايه؟
وجيده:الحمدلله ياست هويدا، انتي عاملة ايه انتي والبنات؟
هويدا:بخير.. ازيك يا متولي؟
متولي:الحمدلله
{قربت نسمه وضحي وسلموا علي متولي}
نسمه:وحشتني اوي يابا
متولي:وانتوا كمان، عامله ايه يا ضحي؟
ضحى:الحمدلله يابا بخير بفضل الله
{قامت وجيده}
وجيده:تعالوا اقعدوا
هويدا:قومتي ليه، كنتي خليكي جاعدة!
وجيده:لا انا ورايا شغل فوق، حمدالله على سلامتكم
هويدا ونسمه:الله يسلمك
{وقعدوا جنب متولي}
متولي:عاملين ايه يا بنات كويسين؟
نسمه وضحى:الحمدلله
هويدا:عامل ايه من غير حاتم؟
متولي(بحزن) :انا من غيره ضايع...مش عايش ولا حاسس بطعم الدنيا..اسكتي ياهويدا الله يسترك متقلبيش عليا المواجع!!
هويدا(بحزن) :المواچع اتجلبت علينا كلنا وحياتك يا متولي..والنار ميحسش بيها غير اللي ماسكها، وآني ماسكاها ليل نهار..مكلبشة على جلبي..ياضنايا يا حاتم..من يومك وانت ملكش حظ في الدنيا
متولي(بحزن) :الله يرحمك يا غالي، اااه ياوجع قلبي عليك..ربنا يصبرني، ويصبر ست وجيده اللي عيالها التلاته راحوا مرة واحده
هويدا(بـ غل) :يصبرها هي بس؟...وآني روحت فين، ايه مش عامل حساب وچع جلبي على ابني حاتم؟..ولا هو محدش بيحس غير ست وچيده؟؟
متولي:جرالك ايه يا هويدا؟..ربنا يصبرنا كلنا ويربط علي قلوبنا..كل واحد فيه اللي مكفيه
{بصيت هويدا لـ نسمه وهي مش عاجبها كلام متولي}
============فـي بيت غادة============
{لبست شنطتها ونزلت عند نبيل، وركبت العربية وراحوا لـ فاتن وبيري...وهناك كانت بيري منهاره..فتحتلهم فاتن، وأول ما بيري شافت غادة اترميت في حضنها}
بيري(بعياط) :بنتي اختفت...مش عارفة أروح فين ولا آجي منين ولا اعمل ايه طيب؟
نبيل:فيروز كانت في البيت لحد امتي؟؟
بيري(بعياط) :دخلتلها الأوضه، كانت بتعدل الهدوم و...
{وفجأه افتكرت حاجة}
بيري:كانت بتجهز الهدوم؟؟...ايوه كانت بتجهز الهدوم وارتبكت لما شافتني،وقالتلي انها بترتب الأوضة!!...معناه ايه الكلام ده؟؟...معناه انها هربت؟؟
{ودخلت الأوضه بسرعة، ولكنها ملقتش هدوم فيروز}
بيري:فيروز هربت من البيت، متخطفتش!!!
غادة(مصدومه) :وهي هتهرب ليه يا بيري؟؟
بيري:مفيش تفسير منطقي للي حصل غير كده!!!
غادة:قصدك يعني انها....انها يعني هربت مع حد؟؟؟
نبيل:ايه اللي بتقوليه ده بس يا غادة؟...البنت لسه صغيره في الاعدادي، هروب ايه وكلام فارغ ايه...أكيد ابوها هو اللي خدها
بيري(بصويت) :مفيش غيره اللي يعمل كده...علاء هو اللي خطف البنت!!!...انا اتأكدت بعد كلامكم وبعد اللي شوفته بـ عيني!!
نبيل:اهدي بس يا بيري، انا هتصل بيه
{َاتصل نبيل بـ علاء ولما رد، فتحلهم الاسبيكر}
نبيل:الو يا علاء..انت خدت فيروز؟
علاء:انا؟؟؟...هاخدها فين وازاي؟؟
نبيل:انا اللي بسألك..فيروز عندك ولالا؟؟
علاء(بزعيق) :ده انتوا نهاركم اسود ومنيل...بنتي فين؟؟؟...بنتي ضاعت وجايين تسألوني انا؟؟...تصدق بالله انا غلطان ان انا سيبتها معاكم، المفروض كنت خدتها عندي ولا كان كل ده حصل...كله من اهمال امها ليها..انا لو بنتي حصلها حاجة هوديكم في ستين داهيه!!!
نبيل(بزعيق) :يعني فيروز مش عندك؟؟؟
علاء(بزعيق) :هو البعيد مبيفهمش؟...ولا انتوا تعملوا المصيبة وتيجوا تلبسوهالي..ماهو خلاص مابقاش في غير علاء هو وش المصايب، لكن ست بيري الملاك البرئ أبو جناحات...لعلمكم اللي حصل ده انا مش هسكت عليه وهرفع قضية اهمال واللي له حق هياخده واهو كله بالقانون
بيري(بزعيق) :اه ياحرامي..بتخطف البنت عشان تلبسني في الحيط؟؟؟
علاء(بزعيق) :اسمعي كويس..مش انتي عايزه تطلقي؟..انا هطلقك...بس حق بنتي مش هسيبه...وياريت بلاش تتكلمي بعد كده من غير دليل.. سلام
بيري(بصويت) :خطف البنت يا غادة...خطفها...اااااااه
فاتن(بصويت) :منك لله يا علاء، روح ربنا ينتقم منك وياخدك أخذ عزيز مقتدر!!
===========عـنـد حـاتـم ومـهره==========
{مهره اتسلقت فوق النخلة اللي علي الشاطئ عشان تجيب جوز الهند..وتحت كان حاتم قاعد وباصصلها}
حاتم:قولتلك أطلع انا.. مسمعتيش الكلام!!
مهره:انت مش شايف رجلك عامله ازاي؟...قولي كنت هتطلع ازاي بقي؟؟
حاتم:ياستي مش مهم كنت هقدر والله...خدي بالك لا تقعي!!
مهره:متخافش، ده انا مهره
{ولسه بتطلع اتزحلقت ووقعت جنب حاتم}
مهره(بتعب) :اااه يا رجلي...اااه
{ولسه حاتم هيعدلها رجليها، صرخت مهره}
مهره(بصويت) :متقربش من رجلي..متلمسهاش!!!
حاتم:مش قولتلك هتقعي!..عاجبك اللي انتي فيه ده؟
مهره(بتعب) :بقيت انا وانت..ياخسارة مجهودي اللي راح علي الأرض!
حاتم:هعدلك رجلك طيب، دي اتلوحت!!
مهره(بألم) :اتلوحت ااه...اتلوحت...ابعد ايداااك
حاتم(بخوف) :خلاص طيب..طب حركي رجلك براحة!
مهره(بألم) :مش قادره احركها
حاتم:يبقى تسكتي وتسمعي الكلام!
{وعدلها رجليها، وقام، ومدلها ايده}
مهره:مش قادره أقوم
حاتم:انتي كده هتضطريني....
مهره(بألم) :هضطرك لـ ايه؟
{وشالها وهي مصدومه، ومشى بيها}
مهره:انت بتعمل ايه؟؟...نزلني!!!
حاتم:هو انا خاطفك؟؟..انا هوديكي هناك، انتي مش سامعه اللي انا سامعه؟
مهره:ايه هو اللي انت سامعه؟
{سكت حاتم وادا فرصة لـ مهره انها هي كمان تسمع، واللي سمعته كان صوت قبائل جايه عليهم}
مهره:يانهار اسود لا يكونو قبيلة الزفت اللي بتحاربنا!!
حاتم:شوفتي بقي..عرفتي انا بقول ايه؟
{وخدها حاتم ومشي مسافة طويله لحد ما تعب ونزلها..قعدت مهره...وحاتم وقف قصاد الشلال..وقرر ينزل النهر}
مهره:انت هتعمل ايه تاني؟؟
حاتم:هنزل النهر !..خليكي هنا متخافيش
مهره:هتغرق!
حاتم:لا انا بعرف أعوم
{وقلع التيشرت، ونط في النهر، وابتدا يعوم..كانت مهره بتضحك من بعيد..ولما حاتم شرب من المايه اكتشف انها عذبة..فقرب منها}
حاتم:المايه هنا عادبه، اشربي!
مهره:بجد؟..هشرب في ايه، احنا ممعاناش أزايز ولا كوبايات!
حاتم:قربي واعملي زي
{قامت مهره ببطئ وقربت من النهر وقلدت حاتم وشربت..وبعدين قعدت ترتاح}
حاتم:انا كل يوم بكتشف حاجة جديده في البلد دي...حاجات أول مره أشوفها..ولا بصي شايفه الشجره اللي في نص النهر دي...تقريباً فيها فاكهه!!
مهره:طب هاتلنا منها يا حاتم بسرعه
{لف حاتم واتجه ناحية الشجره، ولما لف ضهره ورجع لقى حريث وساندرا مكتفين مهره وفي ايديهم اسلحه}
حريث:مرحباً بك في مملكتنا يا حاتم
=========تـانـي يـوم فـي الـمحكمه=========
{دخلت بيري ومامتها وأختها وجوزها قاعة المحكمه، في انتظار نطق القاضي بالحكم، وبعد ما المحامي قدم الورق للقاضي.. وبصوا في الأوراق..حكم القاضي علي علاء بالسجن، وبالفعل سجنوه}
فاتن:لولولولولولوي
{قامت بيري ووقفت قصاد الحديد اللي ورا منه علاء}
بيري(بشماتة) :برضه مش ناوي تقولي فيروز فين؟
علاء:وحياة أمك لأخرج منها وهندمك ندم حياتك كله، بقي تسرقي الشقه وترفعي عليا قضية؟؟..البادي أظلم.. وانتي اللي ابتديتي
بيري:تؤ تؤ تؤ...مش انا اللي ابتديت، انت اللي ابتديت يوم ما بيعت البيوتي سنتر واستغلتها فرصه وانا في السجن!
علاء:ده تمامك وده اللي تستحقيه بعد ما أمي ماتت بقهرتها بسببك!!!
=========فـلاش بـاك (١)========
{بعد ما بيري اتهمت حماتها بالسرقة في بيتها}
دلال:مخدتش حاجة!!..والله ما خدت حاجة..انا مظلومه، ماتقول حاجة يا علاء
علاء:هقول ايه بعد اللي شوفته بـ عيني؟
دلال:حرام عليك يابني ده انا أمك!!!...حتي لو انا وحشه، تعالى في صفي وانصفني قدام مراتك!!
بيري:ينصفك ليه؟...مانتي حرامية فعلاً، الساكت عن الحق شيطان أخرس
==========فلاش باك (٢)===========
{بعد ما مشيت دلال، كانت في حالة صعبه لمدة ٢٠ يوم بعد ما ابنها ومراته ظلموها، وماتت بقهرتها واتشخصت سكتة قلبية...وقتها أخت علاء اتصلت بيه وهي في المستشفى و بتصرخ}
_ماماااا ماتت ياعلاااااء ماتت!!
{وقتها نزل الخبر عليه زي الصاعقه}
علاء(مصدوم) :أمي؟؟؟؟
=============================
بيري:الست الوالده اللي بتتكلم عنها دي، ياما ظلمتني وجات عليا وأذتني..وكنت ساكته مبتكلمش، لكن خلاص جيبت أخري منها..واياك اسمعك بتقول انها ماتت بسببي تاني!!..انتوا اييه مش لاقيين مصيبه تلبسوهالي، فماصدقتوا؟؟...طبعاً ماهو عشان بتكرهوني وأختك دي هي اللي اتسببت في كل المشاكل اللي مابينا... اشرب ياعلاء.. كل اللي عملتوه فيا هيطلع على جتتكم
علاء:ورحمة أمي ما هحلك يا بيري
بيري(بقرف) :انسان حقير
{وسابته ومشيت، ووقتها كان علاء كل الأفكار الشيطانية متجمعه جوا دماغه}
===============عـنـد حاتم============
{صحى لقى نفسه في زنزانة تحت الأرض، والزنزانه اللي قصاده فيها مهره، كانت مهره مرميه على الأرض}
حاتم:مهره...مهره!!!
{فاقت مهره وقامت عدلت نفسها وقامت قربت من الحديد}
مهره:احنا فين يا حاتم؟؟...وايه اللي جابنا هنا؟؟
حاتم(بعصبيه) :قبيلة السمتاء هما اللي جابونا هنا..وانا مش هسيبهم...مش هسيبهم يا مهره!!
{وكان بيخبط بإيده علي الحديد بعصبيه}
مهره:اسكت ياحاتم خلينا نعرف نتصرف!!
حاتم(بعصبيه) :وحياة أبوهم وأمهم لأندمهم علي اليوم اللي جابونا فيه هنا وهتشوفي يا مهره
{سمعوا صوت باب بيتفتح}
حاتم(بصوت واطي) :اعملي نفسك نايمه بسرعة
{رميت مهره نفسها علي الأرض، وحاتم رجع زي ما كان..لحد ما حريث جه ومعاه اتنين تانيين}
حريث:حفلة اليوم ستكون برعاية حاتم و مهره
_اعتقد انه سيكون حفل ممتع للغاية!
حريث:نعم سيكون ممتع إذا نفذنا قواعد مملكة السمتاء..إنهم نائمين
{وفتح باب الحديد عند حاتم ودخل، ولما حركوه كان نايم..والحرس التاني فتح باب مهره، وخرجوهم برا الزنزانه وخدوهم وقبل ما يخرجوا برا الزنزانة الكبرى، راح حاتم ضاربهم بـ سيف السلسلة اللي معاه، وشد مهره وهربوا!! وهما بيطاردوهم!}
حريث(بزعيق) :لن نترككم..اليوم هو حفل إعدامكم!!
الفصل الثامن
{أثناء ما كان حاتم بيجري هو و مهرة..وقعت مهرة ومقدرتش تجري بسبب رجليها!!..ولما حاتم بص وراه، قرر يرجعلها تاني، ولكن في اللحظة دي كانوا مسكوا مهرة، ولما حاتم ضربهم، جه اتنين غيرهم، وخدوا مهره ومشوا..كان حاتم بيبص وهو كله توتر وخوف انهم يعملوا حاجة في مهره!..طلع يجري يدور عليهم، ولكنهم كانوا اختفوا!!}
===========بـعد تـشريح الجـثة==========
{رجع الدكتور بيته، وبعد ما دخل الشقه وغسل ايده وغير هدومة وقعد في الصالون، لمح حاجة عدت من الطُرقه!..قام ببطئ لحد ما وقف في الطُرقة..وسمع صوت دولاب أوضة النوم بيتفتح، ولما دخل الأوضة وبص، طلعلة المجهول من الدولاب، طلع يجري الدكتور برا وقبل مايفتح باب الشقة ويخرج، كان المجهول قـتـلـ..ـه..وبعد ساعة بالظبط من وقوع الجريمة كان وكيل النيابة والشرطة والاسعاف في موقع الجريمة..كان الظابط بيفكر في مليون سؤال ونفسه يوصل لإجابة..وبعد ما الظابط غطى وش الدكتور وقام، اتجه لرجال الاسعاف}
الظابط:انقلوا الجثة على المستشفى
_تمام
{وبعد ما دخلوا الجثة في الكيس، وشالوها حطوها في عربية الإسعاف، خرج الظابط مع العساكر، وشمعوا باب شقة الدكتور...وبالتحديد في القسم، كان الظابط قاعد في اجتماع مع بقيت زمايلة}
الظابط :الموضوع كل يوم بيزداد سوء عن اليوم اللي قبلة..احنا من دلوقتي هنحط خطط نهائية وقاطعة لكل الجرايم اللي بتحصل دي!..احنا حالياً بنتشارك معلوماتنا، كل واحد يقول رأيه ايه في اللي بيحصل ده
_انا من رأي يا حسني باشا..اننا نعمل طُعم للمجرم..كمين يعني،بحيث نعرف مين هو، ونمسكه متلبس!!
الظابط:ماهو ده اللي انا جايبكم فيه النهاردة، عشان نعمله كمين..الفكره هنا الكمين ده هنعمله ازاي؟
=هقول لـ حضرتك..احنا في البداية ، كل ما دكتور بيشارك معانا في القضية، وبيبتدي في تشريح الجثة وأخذ العينات المطلوبة، فجأةً وبدون أي مقدمات، بيموت موتة بطريقة بشعة، ودي مش أول ولا تاني ضحية!..إذاً يا فندم احنا مضطرين نتعامل مع دكتور من الموجودين ويكأنة فار تجارب بمعني أصح، هيكون هو طُعم القضية دي..وهنحطة تحت المراقبة المشددة ٢٤ساعة..وهنسلمة جهاز مراقبة صغير بالإضافة إلي جهاز تتبع نعرف بيه كل تحركاتة، وأول ما نحس ان في حاجة مش مظبوطة، هنكون جاهزين للقبض على المجرم!
الظابط:واحنا هنعرف منين اذا كان في شئ مش مظبوط؟
=زي ما قولت لحضرتك هنكون جاهزين ومستعدين طول الـ ٢٤ ساعة، وأي حاجة هتحصل، هنقدر نتابعها من غرفة المراقبة!
الظابط:حد عنده اضافات تانية؟
{الجميع في صمت}
الظابط:تمام
==============عـنـد حـاتـم============
{قرب من صوت أغاني..وبص بحذر لقى حفلة فيها ناس كتير..قرر انه يرسم علي وشه زيهم ويتنكر ويدخل وسطهم، لحد ما جاب مادة لونها اسود من علي الشجره، ورسم علي وشه وجسمه بشكل عشوائي، وخلع القماشة اللي حوالين راسه، ونط من ورا السور، وبعيد كان حريث وساندرا ساحبين مهره وهي بتصرخ وبيقربوها من آلة الاعدام}
مهره(بصويت) :سيبووووني...انا مش عايزه أموت!!...مش عايزه أموت...ابوس ايديكم، سيبوني
حريث(بضحكة سخرية) :هاهاهاها ستنقطع رأسها عن جسدها، سيستمتع الجميع من هذا المشهد..هيا أسرعوا!
{صُعق حاتم لما شافهم واخدين مهره عشان يعدموها بالطريقة البشعة دي!!..كانت مهره بتعافر علي آخرها..لحد ما حاتم اندفع وطلع يجري ناحيتهم ضرب حريث واللي معاه، وشد مهره..كانت القبيلة اتلمت حواليه ومسكوه}
_جيد...كنا نبحث عنك..كان أمر إيجادك صعب، ولكن بفضل غبائك وحماقتك أصبح الآن سهلاً
حاتم(بـ شر) :ملكوش دعوة بـ مهرة..الا وديني أمسحكم من علي وش الأرض!!
{ضحك الراجل ضحكة سخرية وقرب منه}
_ههههه أضحكتني، أشكرك...و هل ستقوم بمسحنا بالأقمشة أم بالمِكنسة؟
{قرب حاتم منه وضربة بالراس، صرخ الراجل..وحاتم طاح فيهم ضرب، وسحب مهره وجرى، والقبيلة بتجري وراهم بتطاردهم..و فضلوا علي الحال ده نص ساعة لحد ما اختفوا منهم، كان حاتم ومهره مستخبين في الجبل في حتة صغيره محدش يقدر يشوفهم، وسامعين أصواتهم وهما بيجروا يدوروا عليهم، ولما فقدوا الأمل ومشوا، فضل حاتم ومهره في نفس المكان لحد الصبح...صحيت مهره وهي بتتألم من رجليها..قام حاتم وخرج يبص ويتأكد مشوا ولالا..وبعد ما اتأكد..رجع لـ مهره وشدها برا..وقعدوا علي الأرض}
حاتم:حاسة بـ اية يا مهره؟
مهره(بتعب) :رجليا الاتنين تعبوا اوي يا حاتم بعد ما جرينا المسافة دي كلها
حاتم:الف سلامه عليكي يا مهره...احنا لازم نرجع مصر
{فرحت مهره أول ما سمعت انهم هيرجعوا مصر}
مهره:امتى طيب؟؟
حاتم:مش عارف، بس هنرجع...رجليكي تخف وهنمشي من هنا
مهره:لا يا حاتم..يبقي هنقعد هنا فترة طويلة، انا خلاص مابقتش قادرة..ده انا لا عارفة انام..ولا عارفة آكل ولا اشرب ولا قادرة ارتاح..احنا لازم نشوف طريق نمشي منه ونرجع مكان ما جينا
حاتم:انا بعمل كل ده عشانك يا مهره
مهره(بإستغراب) :عشاني؟
حاتم:طبعاً عشانك، انا بخاف عليكي زي أختي بالظبط..وبعمل كل ده عشان ست وجيده، انا عارف انها ست محترمه وتستاهل كل خير، لازم أرجعك لأهلك سليمه زي مانتي!
{اتغيرت ملامح مهره للغضب بعد كلام حاتم}
مهره:زي اختك؟...طب والله كويس..وانا برضة معتبراك زي اخويا، ولازم انت كمان ترجع لأهلك سليم، عايزين نفرح بيك بعد ما نرجع مصر وانت مع بنت الحلال اللي تستاهلك
حاتم(بيضحك) :هي مين دي اللي بتتكلمي عنها؟
مهره(بغضب) :بنت الحلال
حاتم:ده علي أساس انها قاعدة مستنياني أرجع؟...مهره..هو انتي ليه قولتي لـ نانيس ان انا متجوز ومراتي مستنية رجوعي؟
{اتغيرت ملامح مهره للصدمة والتوتر}
مهره(بإرتباك) :امممم انا مقولتش حاجة دي كدابة..مانت عارف انها بتعشق حاجة اسمها كدب!!
حاتم:بس دي بالذات حاسس انها حقيقة..معرفش ليه!
مهره:انت عايز ايه من الآخر يا استاذ حاتم؟
حاتم(بإستغراب) :استاذ حاتم؟
مهره:طبعاً مانا لازم أحترمك..مانت برضة في مقام أخويا الكبير، مش كده ولا ايه؟
{قام حاتم وهو رافع حاجبة، وملامحه حادة}
حاتم:اه يا مُهره..وانتي في مقام أختي الصغيرة
{وخرج برا الجبل، قامت مهره وراه وهي بتقوم بصعوبة}
مهره(بألم) :انت هتسيبني لواحدي ولا ايه؟
==========عـنـد بـيـري في البيت=========
{كانت منهاره علي بنتها، وفجأة جاتلها مكالمة}
فاتن:ردي يابنتي يمكن حاجة مهمه حد عايز يقولهالك!
{ردت بيري وكان الرقم غريب}
بيري:ايوه مين؟
مجهول:لو عايزة بنتك ترجعلك، اتنازلي عن القضية وخرجي علاء، انما بقي لو مش عايزه تشوفيها للأبد يبقي خليكي زي مانتي
بيري(بزعيق) :انا عارفة انك تبع علاء.. وهو اللي زاقك تسمعني الكلمتين دول عشان أضعف وأنكسر بس لا ياحبيبي، انا مش هتنازل عن القضية، ورغم كل ده وفيروز هترجعلي سواء بمزاجكم او غصب عنكم!
مجهول:براحتك يا بيري، بس هتسمعي حاجة هتزعلك اوي اوي قريب، ووقتها هتقولي ياريتني، بس كلمة ياريت مش هترجع اللي راح!!
بيري(بزعيق) :تقصد ايه بالكلام ده؟؟..انطق تقصد ايه؟؟
مجهول:انا قصدي واضح كويس اوي..خدي بالك وانا حذرتك..فكري في الكلام و ردي عليا، سلام
{وبعد ما قفل السكة، بيري عيطت}
فاتن:في ايه يابنتي طمنيني!!
بيري(بعياط) :مش عارفة ياماما..والله ما عارفة
============فـي بـيت غـسان============
{كان قاعد هو و كمال بيلعبوا بلايستيشن، فجأة سمعوا صويت زهرة، بص غسان بلامبالاة}
كمال:أختك بتصوت يا غسان، قوم نشوف مالها!!
غسان:انا مش قايم في حتة، لما تتعدل معايا وتعرف غلطها أبقي أقوم واشوفها
كمال:ياغسان بقولك شكل في مصيبة حصلت!!..قوم بس!!
{قام غسان ورا كمال وهو متغصب..ولما طلعوا وفتحوا الباب، جريت عليهم زهرة وهي بتصرخ}
كمال:مالك في ايه؟
زهرة(بصويت) :بمووت..تعبانه اوي...تعبانه...ودوني المستشفى بسرعة أبوس ايديكم
غسان:عندك ايه؟؟
زهرة(بصويت) :سكاكين في بطني، جسمي كله فيه نار...عشان خاطري يا غسان انقلوني المستشفى بسرعة!!
{بص غسان لـ كمال وهو مش مقتنع}
كمال:الحقها بدل مايجرالها حاجة ويبقي ذنبها في رقبتك!
غسان:شيلها معايا
{قرب غسان وكمال من زهره وشالوها، وخدوها علي المستشفى، وكان غسان وصاحبه واقفين برا مستنين الدكتور يخرج}
غسان:الصراحة انا الحوار ده مش داخل دماغي ولا جاي معايا سكة..حاسسها بتحور
كمال:وهو في حد بيحور هيوصل للمرحلة دي يا غسان؟..انت مش شايف هى تعبانة ازاي؟
غسان:هي واللي في نيتها بقى
{خرج الدكتور من أوضة الكشف}
غسان:زهرة مالها يا دكتور؟
الدكتور:زهرة عندها فيرس متنقل، ولازم تتحجز في المستشفى كام يوم.
غسان:فيرس ايه ده يا دكتور؟
الدكتور:فيروس الحمى الصفرا..مينفعش أي حد فيكم يتعامل معاها نهائي لحد ما تخف منه
كمال:طب وهو بياخدلة وقت قد ايه في العلاج؟
الدكتور:حوالي ٤ أو ٥ أيام
{خد كمال، الروشته من الدكتور...وبعد ما الدكتور مشى}
كمال:انا هروح أجيب الأدوية اللي في الروشتة
{مشى كمال، وغسان قعد علي الكرسي شايل الهم، وحاطط ايده على راسه بيفكر في تعب زهرة!}
==========عـنـد متولي و وجيدة==========
{كان متولي قاعد مع وجيدة في مدخل العمارة كالعادة، وكان متولي حزين، والحزن مأثر علي صحته}
وجيدة(بحزن) :ده نصيبنا مهما روحنا ولا جينا...انت زعلان على ابنك..وانا كل يوم بموت مليون مرة على عيالي التلاته اللي راحوا دفعة واحدة..الله يكون في عوني وعونك يا عم متولي.
متولي(بحزن) :طب ايه رأيك يا ست وجيدة ان انا قلبي حاسس ان حاتم ابني عايش!
وجيدة:وانت ايه عرفك؟
متولي:قلبي حاسس..عندي أمل ألاقيه!
وجيده:ما بلاش يا عم متولي تعشم نفسك بحاجة مش صح..خلاص موت حاتم وعيالي بقى أمر واقع ولازم نصدقه!
متولي :بتخلي اليأس يملى قلبي ليه يا ست وجيده؟...ماتسيبيني أحلم..حتي الحلم مستخسرينة فيا؟
وجيده:انا عاوزاك تفوق لنفسك، ومتمشيش ورا أوهامك!
متولي:كتر خيرك..ما ده اللي انا كنت ناقصه.
===========عـنـد حـاتـم و مـهره==========
{مشوا مسافة طويلة لحد ما وصلوا عند البحر..وهناك كان في سفينه جاية، استخبي حاتم ومهره ورا الشجره وكانوا بيراقبوها من بعيد..ولما وصلت، نزل ناس منها...وأول ما ديروا وشهم، استغلوها فرصة وراح حاتم ومهره ودخلوا السفينة بسرعة..وخدها ونزلوا في المخزن..كانوا سامعين أصوات رايحة وجايه وخايفين حد يشوفهم..لحد ما استخبوا في كابينة صغيره، مساحتها متر×٢ متر...وكان فيها شباك صغير اوي، كانوا شايفين البحر منه..وبعد مرور ساعة، كانت السفينة اتحركت، ووصلت لـ نص المحيط..قام حاتم وخرج، ودي حاجة أثارت فضول مُهره}
مهره(بإستغراب) :انت رايح فين؟
حاتم:انا مابقتش قادر على الحبسة دي يا مُهره!..خليكي هنا وانا هتصرف
مهره(بعصبيه) :حاتم استنى انت رايح فين؟..هتودينا في ستين داهيه!!
{خرج حاتم ووصل لـ طُرقة كبيرة، ولما لقى ناس معدية، استخبي ورا الحيط..ولما مشوا، كمل في طريقه..لحد ما وصل أوضة ولقى فيها ملابس البحرية، دير وشه وبص يمين وشمال يتأكد ان مفيش حد جاي، وبعدين خد الجاكت والبنطلون ولبسهم وهو كله توتر..لحد ما خرج ولما لقي ناس في وشه كان مضطر يبتسملهم وإلا بالشكل ده هيتكشف!..وإذ بفجأةً..لقى راجل قصاده وبيوقفه}
نائل:انت مين؟
حاتم(بتردد) :انا حاتم
نائل:وايه اللي جابك هنا؟
{بانت ملامح التوتر علي وش حاتم، لحد ما كمل كلامه}
حاتم:انا شغال هنا
نائل(بإستغراب) :غريبة دي..مع إني عمري ما شوفتك، انت مين يالا؟
{ولسه هيمد ايده ويشد حاتم من هدومة، راح حاتم زاقق ايده بعيد}
حاتم(بعصبيه) :اللي عملته ده ميتكررش تاني، فاهم؟
نائل(بعصبيه) :انت مين يالا وايه اللي زاقك علينا؟؟
حاتم(بعصبيه) :اعدل لسانك، متخلنيش أندمك على كل اللي عملته!
نائل:طب نقول للمسئولين الأول وبعدين تبقى تندمنا كلنا مع بعض
{ولسه هيمشي، راح حاتم ضاربة بقوته، وقعه علي الأرض، وسحبه في المكان اللي هما مستخبين فيه، ولما مُهره لقيته جايب واحد وساحبه، صوتت}
حاتم:شششش اسكتي يا مهره!!
مهره(بعصبيه) :مين ده؟..وايه اللي انت عملته فيه؟؟
حاتم:وطي صوتك بقولك!!...احنا كده هنتكشف!!
{خرجت مهره من المكان اللي كانت فيه، ووقفت قصاد حاتم وهي كلها عصبية}
مهره:وانا مش هسيبك غير لما تقولي مين ده!!..وليه عملت فيه كده!
حاتم(بعصبيه) :مُهره!!!
{بصتله مهره وهي مدايقة، ورجعت مكانها تاني، كان حاتم بيقفل بؤ نائل بـ قماشة!..وبعدين دخل يستخبي جنبها}
حاتم:انا هفهمك كل حاجة!
مهره:وانا مش عايزة اعرف حاجة خلاص!
حاتم:انتي سألتي وانا واجب عليا الرد!
مهره:اعتبرني مسألتش، ولو سمحت ابعد عني، وخلي في مساحة شوية!
{خرج حاتم من المكان خالص، وبعد ما كانت مهره مدايقة منه..بقيت تبص حواليها تشوفه راح فين!}
مهره:ده مشي بجد!!
==========في المستشفى عند غسان=========
{رجع كمال بالعلاج، وبعد ما الممرضه اديت العلاج لـ زهرة وخرجت، قام غسان يسألها}
غسان:وهي هتفضل علي الحال ده كتير؟
الممرضة:فترة لحد ما تخف، وإلا هتتعدوا منها!
{مشيت الممرضة وغسان بيبص لـ كمال بشك}
كمال:في ايه مالك يا غسان؟؟
غسان:لو طلع اللي في دماغي صح، انا مش هرحمها
كمال:ايه هو اللي في دماغك؟
{سكت غسان ومشي من غير ما يرد، وكمال مشي وراه..وبالتحديد في الأوضة كانت زهرة نايمة علي السرير، والممرضة دخلتلها مرة تانية، وقربت منها تكلمها بصوت واطي}
الممرضة:احنا عملنا زي ما قولتي، فين الحلاوة؟
________فلاش باك_____
{كان كمال وزهرة متفقين مع الدكتور والممرضة قبلها بيوم..قرب كمال وادا فلوس للدكتور، فاابتسمله!}
___________________
زهرة:هديكي اللي فيه النصيب أول ما كمال يرجع..متقلقيش!
الممرضة:ماشي
{خرجت الممرضة من الأوضة، وزهرة عدلت قعدتها}
زهرة(بصوت داخلي) :ياترى ايه اللي ممكن يحصل لو غسان عرف اللي فيها!..انا خايفة على نفسي أوي!..وكمان مش ضامنة..يارب انت القادر تحميني من شره وأذاه!
{وفي البيت بعد ما غسان وكمال وصلوا..دخل غسان الحمام، وكان كمال بيراقبة من بعيد وأول ما دخل، راح كمال مطلع موبايلة واتكلم بصوت واطي}
كمال:كل حاجة تمام عندك؟
زهرة:انا خايفة اوي يا كمال ومش عارفة هعمل ايه!
كمال:متخافيش، انا بخطط كويس وان شاء الله التخطيط اللي في دماغي ينجح
زهرة:طيب اية الأخبار عندك؟..غسان مصدق؟
كمال:بيني وبينك..لأ غسان مش مصدق أي حاجة حتي قالهالي وش..بس مش عايزك تخوفي نفسك أكيد ليها مخرج يعني
زهرة:ياريت، على العموم انا بشكرك على مساعدتك ليا..بجد ألف شكر !!
كمال:انا بعمل كل ده لإني مش راضي عن اللي غسان بيعملة وكمان يـ.....
{ولسه بيكمل كلامة...خرج غسان من الحمام}
كمال:ياستي مانا قولتلك مش راجع في زفت..هو انا هفضل أعيد وأزيد؟..خلااص العلاقة اللي مابينا انتوا الاتنين هدتوها، أبقوا افرحوا بعمايلكم دي!!..سلام!
غسان:أمك كلمتك تاني؟؟
كمال:دي بقيت حاجة زفت، كل يوم على نفس الحوار وانا بصراحة بقى زهقت وقرفت.
غسان:فكك منها مانا قولتلك اللي ميقدركش، ولا توريلة وشك تاني حتى لو كانوا آبوك وأمك.
كمال:عندك حق
غسان:هاتلي تليفونك أعمل مكالمة..تليفوني فاصل
{ارتبك كمال أول ما غسان طلب منه يتكلم من موبايلة! ومكنش عارف يقولة اية!
كمال:انا ممعايش رصيد، ده هى اللي رنيت عليا
غسان:خلاص انا طالع أشحن الموبايل.
كمال:طيب
{طلع غسان...وكمال قعد على الكنبة بيبصلة من بعيد}
===========فـي الـسـجن عـند علاء=========
{بعد ما اترحل على السجن..دخل عسكري ونده عليه}
العسكري:علاء الدين محمد جمال الدين
علاء:انا أهو
العسكري:تعالى
{قام علاء وقرب من العسكري، راح ملبسة الكلبشات في ايديه الاتنين وخده علي الحجز الانفرادي}
علاء(بإستغراب) :انت جايبني في الإنفرادي ليه؟؟
{راح العسكري مطلع الموبايل واداهوله}
علاء:الو...الو
نويري:الو ياعلاء..انا نويري متستغربش!!
علاء(بلهفه) :الو يا نويري الحقني أبوس ايديك..انا ضيعت وروحت في ستين داهية بسبب بيري..أبوس ايدك تخرجني من هنا
نويري:هتخرج، تفتكر انا هسيب حقك؟
علاء:كنت عارف انك مش هتسيبني..ده احنا ملناش إلا بعض يا نويري..ده لما واحد فينا بيقع كان التانيه بيسنده..فاكر ولا نسيت؟
نويري:وانا مقدرش أنسى حاجة زي دي عشان كده هساعدك متقلقش، هجيبلك أكبر محامي يخرجك من القضية زي الشعره من العجين
علاء:امتى طيب قولي؟؟
نويري:قريب اوي..حبيت أطمنك لان انا عارف كويس انك هتاكل في نفسك لحد ما يخرجوك..لكن لأ اتطمن وحط على قلبك تكييفات مركزية كمان
علاء:شكراً يا نويري متحرمش منك...شكراً
العسكري:خلاص كفاية
{وشد منه الموبايل وقفله، وخد علاء ورجعه الزنزانة}
===========في السفينة عـند مُهره==========
{خرجت مهره من المخبأ السري..وكانت بتدور على حاتم..ولما ملقيتهوش خرجت في الطُرقه..فضلت ماشية تبص في كل الأماكن، وبرضة ملقيتهوش!..وفجأه وهي بتلف خبطت في حد، اتخضت وحسيت انها اتكشفت!!..ولما بصيت في وشه لقيته حاتم..ولما سمعوا حد جاي..شدها حاتم بسرعة ورجعوا علي المخبأ السري}
حاتم:انتي ايه اللي خرجك؟
مهره:كنت بدور عليك!..انت كنت فين!!
حاتم:انا خدت جولة في السفينة..كان لازم أعرف كل حاجة فيها، ماعدا كام أوضة مقفولين معرفتش ادخلهم!
مهره:يخربيتك انت ازاي تعمل حاجة زي دي..انت مش خايف تتكشف؟
حاتم:ولو اتكشفت ايه اللي هيحصل يعني؟
مهره:ايه البرود اللي انت فيه ده يا حاتم!!..طيب لو مش خايف علي نفسك..خاف عليا..هو مش انا زي أختك برضه ولا ايه؟
{بص لها حاتم وضحك}
حاتم:ومين قالك ان انا مبخافش عليكي؟..يا مهره احنا بقالنا شهرين وشوية هنا مع بعض ليل نهار..انا اتعودت عليكي وانتي اتعودتي عليا، ده غير اننا نعرف بعض من سنين بس مكناش واخدين بالنا!!..يبقي ازاي بعد ده كله ومش هخاف عليكي؟
مهره:طيب يا حاتم لو بتخاف عليا فعلاً..يبقى اسمع الكلام بقى..ممكن؟
حاتم:حاضر
{جه راجل ودخل الأوضة اللي فيها المخبأ السري..ولما شاف نائل مرمي على الأرض..وطي علية وهو كله خوف وتوتر}
_نائل...شو صابك؟..نائل رد عليّ..يا الله على هيك الكوارث اللي عم تحصل يوم ورا يوم!
{وخرج يجري برا الأوضة..وبعد ما رجع مع تلات رجالة..شالوا نائل وخدوه برا في أوضة على سرير..وابتدوا يفوقوه}
=حصل ايه؟
_نائل مريض تقريباً..لا أدري شو صابة!!
{وفي المخبأ السري كان حاتم مركز اوي مع صوتهم}
_أكيد حدا غريب دخل هون..ابحثوا في الغرفة!!
{ولما حاتم سمع كلامهم،شد مهره عشان يخرجوا}
مهره:انت هتعمل ايه تاني؟؟
حاتم:هنمشي من هنا قبل مايشوفونا...يلااا
{خرج حاتم وفي ايده مهره، كان متوتر وقلقان حد يشوفهم..كانت خطواتهم سريعة وكلها خوف..وأول ما واحد منهم خرج من الأوضة، شاف حاتم ومهره، صرخ ونادى بأعلى صوته}
_انتوا ميين؟؟؟
{زادت خطوات حاتم ومهره لحد مااتحولت لـ جري سريع..لحد ما خرجوا برا في الهوا! ولسه الناس بتطاردهم..وفجأه نط حاتم بمهره في قلب الماية وغطسوا تحت}
=مَبَيْن إنهم لصوص قفزوا في السفينة، ولكن لن نتركهم!..اقفزوا خلفهم!!
{وقبل ما ينطوا لقوا القبطان جاي يزعق}
القبطان:في ايه؟؟...ايه اللي حصل... سايبين شغلكم وقاعدين تتخانقوا هنا؟؟
_في لصـ....
القبطان(بيقاطعه بزعيق) :ولا كلمة..مش عايز اسمع أي مبررات ملهاش لازمة..يلااا كل واحد على شغله!!
=يا قبطان انت ماتدري ما....
القبطان(بزعيق) :انا قولت ايه؟...هنعيد ونزيد في نفس الكلام مش هنخلص؟...يلا اتفضلوا
{دخلوا جوا وكل واحد رجع لـ شغلة..وقف القبطان يبص حواليه وبعدين رجع مكانة...وعند حاتم ومهره كانت مهره بتغرق لحد ما مسكت في حاتم}
مهره(بعياط) :انا مبعرفش أعوم!!...مش عايزه أموت هنا!!..مش عايزه أموت ياارب...يارب عشان خاطري...عايزه أعيش وارجع بلدي!!
حاتم:متخافيش يا مهره انا معاكي
مهره:هو ايه اللي مخافش؟؟...احنا بقينا في نص البحر لواحدنا!!!..هنفضل هنا لحد مانموت؟؟؟
حاتم:مش هتموتي!!...محدش فينا هيموت!!.. اهدي يا مهره!
مهره(بعياط) :انا مش مصدقة ان كل ده بيحصل..انا كأني جوا فيلم...عقلي مش قادر يستوعب ان كل ده حقيقة وبيحصل!!
حاتم:انا زي زيك...بس اوعدك يا مهره ان انا مش هسيبك، وهترجعي مصر سليمه!
مهره(بعياط) :يارب
=============فـي بـيت فاتن===========
{كانت بيري قاعدة علي السرير وقصادها اللابتوب بتكلم شخص مجهول الهوية على الفـيس بوك}
بيري:هديلك كل اللي انت عايزوا بس وريني موبايل ولابتوب علاء، انا عايزاه كأنه معايا هنا!!
مجهول:انا عايز ٢٠ألف جنية
بيري:بس ٢٠ ألف كتير اوي علي انك تهكرلي شوية أجهزة!!..ماتنزلها شوية عن كده!
مجهول:هتدفعي هتاخدي..مش هتدفعي يبقي شوفي حد غيري وخلاص خلصنا
بيري:طيب خلاص، انا موافقة مقداميش للأسف أي حل تاني، مكانك فين؟
مجهول:انا مليش مكان، الفلوس علي فودافون كاش
بيري:وانا ايه ضمني انك صادق، مش يمكن تطلع نصاب؟
مجهول:انتي مالك كده من ساعة ما كلمتيني وانتي الوسواس لمؤاخذة راكبك..بصي يا استاذة لو مش واثقة فيا، هتدفعي عربون ١٠آلاف وبعد تمام المهمة هتبعتي الـ ١٠ آلاف التانيين، ها؟
بيري:خلاص متفقين، بس ابقى اعدل لسانك عشان متخسرش زباينك
مجهول:دي حاجة متخصكيش، هتبعتي امتى؟
بيري:من بكرا لو عايز
مجهول:اشطاا
============فـي بـيـت غـادة===========
{كان عادل وبنته عند أخوه نبيل، جات غادة بالعصير وقعدت}
غادة:منوره الدنيا كلها يا ملك
ملك:شكراً ياطنط غادة
{وحطيت العصير وقعدت معاهم وهي مبتسمه}
غادة:اتفضلوا
عادل:انا ممكن أشوفلك الموضوع ده عادي!
نبيل:خليك برا المشاكل وخلاص، مش كفاية ان انا دخلت فيها؟..هيبقى انا وانت كمان؟
غادة:تقصد ايه بالكلام ده يا نبيل؟
نبيل:مش قصدي يا غادة..انا مش عايزك تفهميني غلط..انا كل اللي أقصده ان علاء ده بني آدم مش سهل،ويمكن يوصله خبر، يقوم حاطط عادل في دماغة!
غادة:وهو ايه اللي هيعرفه؟
نبيل:مش عارف هو أه مسجون وكل حاجة..بس له علاقات برا وأكيد في ناس بتبلغة بكل حاجة بتحصل
عادل:تقصد انكم متراقبين؟
نبيل:لأ دي بقي حاجة انا مش عارفها..الله اعلم متراقبين ولالا..المهم يا سيدي سيبك من كل ده وخلينا فيك انت..مش ناوي تتجوز بقى؟
عادل:وانا لو اتجوزت مين هيربي ملك؟..مين هيهتم بيها وهيراعيها زي؟
غادة:انت نقي بس واحدة كويسة تكون بنت حلال وملكش دعوه بأي حاجة تانية!
عادل:حتى لو طيبة وبنت حلال زي مابتقولي...عمرها ما هتبقي زي أبوها وأمها...عمرها ماهتشيل همها زي مانا شايل همها لانها بنتي!..انا مش عايز أي حاجة تعطلني عن تربية ملك!
نبيل:انت ليه بتسبق الأحداث بس يا عادل؟..مش يمكن كل اللي بتقوله ده ميحصلش؟
عادل:انا مش بسبق الأحداث..انا بفهمكم اللي فيها!
نبيل:ولا انت لسه بتفكر في طليقتك؟
عادل:لا خلاص كل شئ قسمة ونصيب..محدش عارف الخير فين..وهو انتوا كنتوا جايبني هنا عشان ندخل في محكمة سين وجيم؟..ولا عشان نقعد مع بعض شوية؟
نبيل:خلاص يا عادل ولا كأننا اتكلمنا..حقك عليا
==========تـانـي يـوم فـي الـبحر=========
{كان حاتم ومهره لسه في البحر.. ومهره ماسكه في حاتم..لحد ما تعبوا من كتر المقاومة..وضاع الأمل لوهلة..ولكن ربنا كان بيبعت رسالة ليهم إن لسه في أمل للنجاة!!..جات سفينة صغيرة..ولما شافوهم}
حاتم(بصوت عالي) :الحقوونااا احنا بنموووت...الحقوووناااا
{حدفلهم القبطان لايف جاكت و حبل...وشدهم لحد ما طلعوا..كانت مهره تعبانة وبتترعش..مال حاتم ناحيتها وحط ايده تحت راسها وقعد جنبها وسندها على رجلة}
مهره(بتعب) :مش قادرة..انا تعبانه اووي
حاتم(بخوف) :الف سلامة عليكي يا مهره!!..حاسة بـ ايه؟
القبطان:ما الذي جاء بكم إلى هنا؟؟
حاتم(بتعب) :ده موال طويل، هيطول شرحه..هقولك عليه بعدين!!
القبطان:على العموم أهدأ..سأقوم بمساعدتكم!
{دخل القبطان جوا وجابلهم فوط، ورجع اداهالهم}
حاتم:شكراً
القبطان:لا شكر على واجب!..حمدالله على سلامتكم
حاتم:الله يسلمك
===========فـي بـيت هويدا============
{كانت هويدا ماسكة صورة حاتم وقاعدة قصاد البيت تعيط}
هويدا(بعياط) :يا حاتم ياحبيبي..الله يرحمك يا غالي ويصبرني على فراجك اللي جطم وسطي نصين..لو كنت أعرف اللي هيچرالك والله ماكنت سيبتك دقيقة بعيد عني..كنت فضلت في حضنك يابني ياحبيبي
{خرج سميح من البيت وعلى وشه غضب ربنا}
سميح:احنا هنفضل في الموال المهبب ده لحد امتى؟..هو آني كل مااخرچ من الدار ألاجيكي ماسكة. صورة عيل من عيالك وبتبكي؟
هويدا(بعصبية) :حتى البكا مستخسره فيا يا سميح؟..ايه بلاش أنفث عن زعلي واللي چوايا؟..ولا يكونش عاوزني أطرشج؟
سميح(بزعيق) :عليا الطلاج بالتلاتة منك يا هويدا إن لاجيتك ماسكة صورة عيل من عيالك مرة تانية، لأكون مطلجك وراميكي في دار أهلك..وأظن انتي عارفه اني دار أهلك عامل ازاي، آني مش محتاج أتكلم!
{قامت هويدا وهى متعصبه}
هويدا:انت بتهددني بالطلاج يا سميح؟
سميح:ايوه بهددك بالطلاج واتحشمي!!
{جات نسمة ووقفت قصاده}
نسمه(بثقة) :عاوز تضرب المره دي بالشبشب ولا بالجزمة يا جوز أمي يامحترم؟