رواية كاظيمة
الفصل الثاني2
بقلم وسام الفرجاني
بصراحة ما كدرت عليهن كلهن ودخلت اسبح والحمام السقف مالته حديد هيج مو صب و الباب ماله بي قفل من داخل وخارج من هذا القديم ناس الي عدها هيج باب يعرفون هيج ابواب
وهو هذا الي مخوفني لان بعدني توة طابة صرت اسمع بسبسة منهن وحركة ما تطمنت عليها وحسيت دا يوكعني بسالفة كتلهن انطيني الملابس ..
كالتلي انطيني ثوبج هسة حت ما يوسخ الجديد اني صرت ثولة وانطيتهن ملابسي شو ذني قفلن الباب من ورة وعافني!! وحدي بدون ملابس والباب مقفول ..
صحتهن رواء رواء وينجن ليش رحتن الباب مقفول .. جان تكلي لحظة اجيب الدشداشة من جوة .. وهسة تجي وشوي تجي تأخرت عليه
يارب دخيلك شنو من سالفة هاي شلون اطلع نفسي .. يابه هم لو ملابس عندي عادي .. هسة شيخلصني .. منو حيصدكني اذا تاخرت وين جنت ..
منو يصدكني واني بلا ملابس محجوزة بالحمام مكدر اطلع .. زين اي شخص اذا اجه يساعدني شلون حكله مالابسه !! اكيد حيسويلي شي يارب طلعني من هالسالفة بستر يارب يارب استرني فوك الارض وتحت الارض .. راح صوتي واني اصيح رواء رواء رواء بس ما ظل احد منطقة زراعية وبيت بالجولة كل بيت يبعد عن الثاني 200 متر و150 متر وكلها زرع #جت علف حيوانات ونخل وبساتين يعني ..
ظليت اتحسب ع ابوية الي حطني بنص ذولي الي مايخافون الله
هسة منو يصدكني حيطعنون بشرفي واني بعدني جديدة عاروسة حسبي الله عليج يا رواء حسبي الله عليج
ولج شمسويتلج بس اني ثولة وغبية اي والله شلون طبيت شلون قبلت ..
زلة وحدة هاي حتكلفني هواي .. وظليت واكفة انتظر رحمة الله يارب لا تفشلني يارب كلشي ماشفت بحياتي .. وصارت قريب الظهر وماكو بشر ..
بالجهة المقابله
اجه رسول للحقل وللـصريفة وللهوايش وماشاف بس بنات عمه ..
رسول : وين كاظمية ؟
رواء : ما ادري احنه نشتغل هنا هي بالداخل (بالصريفة او العش بعض يسموه )
فات رسول يدور ع كاظمية ماكو .. رواء وشلتها ولا كأنما يعرفن .. مغلسات .. اجه رسول يركض يابه وين كاظمية شبيجن
رواء : مدري مرتي لو مرتك
رسول : تعالن شوفنها خاف تيهت
رواء : والله من اول ما اجت مرتك مو عاجبها الوضع وهي جانت خدامة ببيت اهلها لكمة ما شابعه وهسة تتفيك علينه
راد يروح رسول للبيت الثاني مالهم القريب ع مكانهم يدورلها صاحته رواء .. (تعال تعال اني ادورلها هنا انت روح لغير مكان) و اجت ع اساس تدور .. بهاللحظة هاي..
كاظمية متعرف الي دا يصير وينحاك الها ..
تكول كاظمية ..
حسيت بحركة واحد اني فاتحة اذاني فتح بس اريد اسمع احد قريب من المكان وبنفس الوقت خايفة ..
صحت .. منو هنا ؟ يا عرب منو هنا ساعدوني ؟
واختفى الصوت فجأة اوف ع حظي ..
استسلمت عاد لأمر الواقع .. ردت ادفع السقف الي فوكي بي حديد مغطاي وفوكاه حجار كبار تسنده حتى يثكل .. ردت من عنده ماكدرت اولا مكدرله ثكيل وثانيا ما ألوحه بيدي زين ..
تعبت من الوقوف كعدت مرت الساعات راح الظهر اجه العصر راح العصر اختنكت حسيت نفسي راح اموت ما بية بعد صبر دا اتخيل شراح يكولون !! هاي اذا خلوني اسولف اصلا..
صار الليل وهنا الرعب الحقيقي اضرب بالباب لعل احد يسمع الباب ماكو !!
صرت اسمع صوت كلاب تنبح واني اخاف جدا منها وليل وصراصر وظلام ورعب رعب هندس صاير المكان
بالليل سمعت واحد دا يتمشى صوت رجلين دتسحل بحذائها بس مدري شو خفت ومكدرت اتحرك لا يسمعني ردته بس يروح مدري ليش صارت عندي هاي ردة الفعل
يمكن لان ليل وخفت يعتدي عليه او يستغل هالشي او خفت يطلع مو بشر يعني هيج تخيلات شيطانية يعني تخيلوا مكان فارغ وحمام صغير اظلم ومقفول عليك وبنص الجول شسوي يعني الزلمة هم تصير عنده ردة فعل مو عود اني 14 سنة بنية والظيم بدون دشداشة ..
يعني هاي الي زادت الطين بله بس عجبتي ع رواء شلون كدرت تنام وتحط راسها ع مخدة وهي ظالمتني وهي حابسة هيج بنية ممسويتلها شي ولا تعرفها اريد بس افتهم السبب ..
ثاني يوم نفس الحالة ومحد مر بية حدما اجه الليل سمعت نفس حركات البارحة وهم شكد ردت اتشجع اكله بس كلت اصبر مع العلم متت جوع وعطش بس كلت اصبر نفسي ليلة احسن ما اخطأ خطأ يدمرني .. واكيد تعرفون ليش مدا اكله بالليل لهالشخص يعني شخص غريب وليل وبنت بهيج منظر وبهيج مكان وبعد التفكير يمكم ..
.............
بالجهة المقابلة
رسول روح لهلي وكللهم كاظمية انهزمت من البيت طلعناها تحش علف للدواب وراحت هي الروحة ..
- ابوي : يمعود صدك تحجي ؟
- رسول :اي والله هاي القصة وعبالي انهزمت يمكم لذلك اجيتكم
- ابوي : ما اجتنا ولا شفناها ومتحضرين نعزمكم هاليومين
رسول : والله يا عمي مدري
_ابوي: والله الا اطم عارها فشلتني اخر عمري تجيني هيج سالفة والله ربيتها احسن تربية
-رسول : رايح لعد ادور عليها واذا مالكيتها انتو دوروا بنتكم
وربوها زين
.........
اجه الليل وماظل عندي حل غير استنجد بهذا الشخص الغريب لان متت جوع وعطش صرت عبارة عن خيط ورجليه متشيلني وشيريد يصير خلي يصير لان ما ظلت اي طاقة الي تسعفني اظل ليل اخر بدون اكل وشرب وبهالحالة التعبانة هاي ..
صار بداية الليل وسمعته يتمشى ديعبر من المكان الي بي اني .. صحته خالي خالي وصرت اضرب بالباب هيج كأنما دا ادكه هو سمعت صارت حركته اقوى وديصيح منو انت وينك اطلع شعندك هنا ؟ كتله خالي اني بنت تسمعني ..
الغريب : منو انتِ ووينك؟
كاظمية :اني بالحمام خالي هنا قريبة عليك دضربلك بالباب
الغريب : لا تتحركين ..(خاصة وسام الفراجي)
حسيته ديتقرب يفتح الباب بس خايف وما ادري شنو بيده سلاح لو شنو
كاظمية: خالي بذمتك لتفتح الباب هسة
شو هذا تفاجئ كالي ليش انت وراج مصيبة الله يجيرنا منها
كتله خالو والله ممسوية شي بس اني مظلومة ومالابسة استرني الله يستر عليك وبعدين اشرحلك كلشي وراح تعرف
فتح الباب 💔
اخ صرت اريد اختل بالحايط كتله لا لا الله يخليك لتفتحه اني بحالة ميصير تشوفني بيها الله يستر ع خواتك استر عليه
رجع ليورة
الغريب : هسة شتريدين والله دوختيني ؟
كاظمية : دشداشة استر نفسي بيها بس حاليا كال ظلي هنا لزم الباب وقفله عليه انوب وراح
صرت ارجف من الخوف والله ثم والله هالنص ساعة الي انتظرته بيها حسيتها اسبوع الف فكرة اجت براسي حيجيب رسول ويشوفني لالا حيجيب ابوية ويشوفني هيج ..
زين ليش راح وليش تأخر شيريد يجيب شيريد يسوي
يبو عقلي حينفجر .. لج اتحسر ع شي بس استر بي نفسي اي شي ماكو ساترة نفسي ب ايدي ..
شوي واسمع صوت واحد جاي صرت اتخيله رسول او لا ابوية اكيد .. كلبي صار ينبض بقوة ايدي مكدر الزمها شكد ما ترجف .. قرب للمكان اني خلست بمكاني حسيت لحظة اعدامي .. جان يصيحني وينج. .. القصة خاصة بصفحة وسام الفراجي!!
نفس صوت ذاك الزلمة الي جان موجود قبل شوي حمدت ربي الف مرة كلي افتحي الباب كتله بذمتك استر عليه وغمض عيونك .. فتحت شوي من باب فوت ايده نطاني دشداشة ما صدكت ع الله الزم دشداشة .. كبل قفلت الباب ولبستها ع سريع وجابلي ممسحة مال وجه نسمي خاولي كالي مالكيت ربطة غطي راسج بي ..
ظلام وهندس وطلعت من الباب .. وهو مدنك راسه ويمشي كدامي كلي الحكيني ما انسى هاللحظة ولا غزر عينه عليه ولا صارت عنده اي تلميحات ..
رجال ب الف رجال .. ردت فقط اعرفه منو جان حاط الشماغ ع وجهه بس الرجل واضح شباب بعده صغير وطلع يشتغل حارس هنا خطية ..
كتله وين ماخذني كال الحكيني معليك لتخافي .. اخذني لغرفة بتالي المنطقة كلي هاي الي عندي بس .. كتله رحم الله والديك بس انت منو ؟
كالي مو ضروري يا اختي تعرفيني المهم لتكولين الي صار واني ما احجي حرف ولا اعرفك ولا تعرفيني
كتله زين انت تعرفني ؟ كلي مو مهم ..
نامي ومن يصير الفجر ارجعي لاهلج واعتذر منج ماعندي غير هالغرفة ..
كتله و انت كالي اني ما انام للصبح تطمني اقفلي باب الغرفة ونامي محد يقرب عليج .. القصة خاصة ب وسام الفراجي
صار عندي فضول يعرفني لولا وصار عندي فضول اعرفه منو بس للاسف ما حصلي الشرف اعرفه ماشفته زين اصلا لان ظلمة بس حافظه نبرة صوته ..
صار الفجر واني لا صلاة ولا عبادة صار كم يوم ..
صاحني يالغريبة يلا قبل ما تشرق الشمس ويشوفوج عندي ويطعنون بيج استري عليه وعليج وتوكلي لأهلج وشايل بيده ربطة كالي البسيها دبرتها ..
شكد كبر بعيني وشكد رجال وشريف وابن ناس ..
المهم ماكدرت اعبرله لداخلي شكد هو انسان نظيف بس من طلعت كتله الله يرزقك ببنت حلال الي تسر عيونك ويستر عليك دنيا واخرة ضحك هو وكلي ماريد استغرب من ردة فعله بس سكتت..
طلعت والدرب كوة اعرفه .. حرت بين اروح لاهلي لو لرسول لو شنو اسوي ؟
كلت لازم اروح لرسول واحجيله كلشي وما اخفي عنه الحقيقة ..
رحت واتمشى ومن بعيد عرفت البيت و صرت اتقربله بس كلبي يدك مليار واني اعرف وراي كتل وطعن وكلشي .. بس ماعندي حل ثاني .. دا امشي وتتلكاني رواء عين بعين💔