رواية كاظيمة
الفصل الثالث3
بقلم وسام الفرجاني
طلعت والدرب كوة اعرفه .. حرت بين اروح لاهلي لو لرسول لو شنو اسوي ؟
كلت لازم اروح لرسول واحجيله كلشي وما اخفي عنه الحقيقة ..
رحت واتمشى ومن بعيد عرفت البيت و صرت اتقربله بس كلبي يدك مليار واني اعرف وراي كتل وطعن وكلشي .. بس ماعندي حل ثاني يعني شنو مفروض اسوي غير انو اتحمل الفهاوة مالتي وخطأي واروح اواجه بالاخير اني ماسويت شي ولا جبت شي يكسر العين .. دا امشي وتتلكاني رواء عين بعين !!
تفاجئت من شافتني
رواء : هلا هلا انتِ وين جنتي شنو ماعندج بيت ماعندج زوج !!هذا مو بيت اهلج حتى تطلعين وتروحين بكيفج ..
كاظمية : والله لأفضحج كدام الكل ياعوبة وينه رسول ..
جان تضحك ضحكة بصوت عالي
رواء : شوفوا منو يهدد !! بيا حضن نايمة ؟ شبعتي منه لو بعد ..
كاظمية : حسبي الله بيج وبكلامج حسبي الله
(كبل ماتحملتها اندفعت عليها ولزمتها من شعرها وهي هم لزمتني وصار صياح ومكافش واني غاثتني كلش اريد اكلها واشمرها عظام ..)
حتى طلعوا ع صياحنا وطبعا هم من نوع يكعدون ويا شروق الشمس ناس فلاحة وهيج شي مو مال ضحاوي ..
طلعت عمتي ورسول من شافوني مثل الي شهگوا
رسول : هاي شنو وين دايحة وين غايبة
رواء : دباوع ع دشداشتها مو هي شوفوا وين شامرته ومنو منطيها دشداشة جديدة هاي اقوى دليل انه مو شريفة هالبنت وحطوها براسك رسول بس ميفيد بيك كتلك لتاخذ غريبة لتاخذ غريبة
كاظمية : اسكتي وانجبي والله يارسول ويا عمتي ما احجيلكم غير الصحيح هاي رواء السبب هي الي سجنتني وسوت بية كل هذا وحجيتلهم شلون بالتفصيل ..
رواء : صدكتها يعني هو شعرفني بيها !! شنو اريد منها حتى اسويلها شي عم بنية خال وليد حتى اهتملها اشو لا جمال ولا خلقة ولا اخلاق
شو هذا لزمني سحل من راسي بالتراب حدما وصلني الغرفة .. فوتني وقفل الباب وين جنتي ؟ ويضرب بية ويا منو نايمة ويضرب وانت مو شريفة وماخله فشار وطعن ما حطه بية وكلي امشي بهذا المنظر ع ابوج خلي يشوف .. كتله احلفك بالله لا كمل اضرب اكتلني هنا واذبحني بس لا ادزني لابوية كال امشي بنت الـ ***
جنت ماريد اروح لابوية لان من غير شي ابوية متحجج عليه ويريد يخنكني مو عود جايبتله سالفة شكبرها
يابوية وياخذني كلت انفضحت بين الناس
كاظمية : رسول احلفك بالله وبكل غواليك افتهم بلا توديني
رسول : ماريد افتهم فهمي ابوج
واخذني بدون لا رحمة ولا شي وحطني بيد ابوية كال اله هاي بنتك ربيها زين وعود زوجها لان دايحة من حضن لحضن وبدربك اسالها الملابس منو ملبسها اياها ..
شمرني وراح .. تشاهدت اني لان ابوي واني ممسوية شي ما يطيقني مو عود هيج سالفة .. شفت جهنم بوقتها ماخله بية روح ..
لزمني من ياختي ..
ابوية : شنو يكول ملابس شنو قصده
كاظمية : والله يا يابه (ماكملت سالفتي و رعط دشداشتي )
امي ركضت دا تفكني منه تكله يمعود مو هيج شكيت ملابسها العالم منا تلتم ع صوت شبيك ..
جان يدفعها وتوكع خطية ويكلها : لوما انتِ مثلها ومكيفة ع سوالفها ماتدافعين عنها
فشار مسبات كتل اريد بس افهمه ماكو مجال .. اتذكرها لهسة قفل باب الغرفة وراح يدور ع عود مال سعف مال نخل كطعها ولزمني بيها دك .. زلغني تزلغ الا الجيران البعيدين فكوني منه ومن عصبيته بصراحة اريد اذكر اسم عشيرتهم بس علمود ماتنكشف القصة وصاحبها المهم ناس طيبين ..
يكول للجيران الي فكوني اخذوها اشبعوا بيها فلا اتكلم لان هاي شغلتها هيج
غطوني بالحصيرة لفوها لف بينما وصلوني بيتهم ونطوني دشداشة من بناتهم
اخذوني للمشفى وعلاجات وتضميد وكعدت يمهم يعتنون بية وخطية عدهم ولد اسمه #امير ابتلى بية ويدزونه هنا وهنا و دوة مال عرب ومدري شنو ..
المهم فهمتهم كل السالفة وبيهم صدك وبيهم لا وخطية ظليت يمهم شهر واهلي ما سالوا عليه اصلا امي تجي بالبوكة حتى ميعرف ابوية تجي تشوفني وتروح بسرعة و كوة تمشي من دفعها ابوية رجلها مو زينة ..
واني اكول ليش لو اني حلوة يصير بية هيج يشمرون بية هنا وهنا وبعدين استغفر ربي واكول الحمد لله .. وبعدين راحوا زلم من بيت جيرانة ولمة زينة ع ابوية وكعدوا وياه ع موضوعي ومسولفين وياه ومستحي من الزلم وكايللهم ترجع بشرط تحلف ع القران ممسوية شي ..
واني اذا ترجعون لكلبي اعيش بكوخ او گن مال دجاج ولا اشوف ابوية .. انسان قاسي مابي اي رحمة يعاملني مثل العبيد
وكالولي ابوج يكول هيج وهيج وكتلهم حيكتلني والله لترجعوني كالوا شبيج مو زلم وسادة وشيوخ راحت وسولف وياه قابل هيتة الشغلة .. وجابوني عنده واني ارجف من عنده .. وقسمت ع القران اني شريفة والقصة كلها جانت من ايد بنت عمه حتى توكعني بهالمصيبة ..
تخيلوا طعنوا ببنته وما سوة اي ردة فعل ولا راح لاهل البنت الي طعني ولا يم السالفة اصلا شكد مو مهمة عنده لعد ..
رجعت بس شنو من اشوف ابوية احسها روحي تريد تطلع ..
محبوسة بالغرفة حيشاكم مثل الكلب قسما بالله الصحن مقدرينه عليه تقدير ميشبعني الا امي من شباك تدزلي
عيشني بعذاب واهانة ..
بعد شهر بالضبط او شهر وشوي اجت ام رسول تسأل عني كلبي فرفح اريد اروح هناك ماريد اظل عند ابوي هذولاك ارحم من ابوي لان قاسي جدا .. يجوز بيكم يستغرب بس والله اعيش بنص كاولية حيشاكم ولا عند ابوية
كعدت امي يمها واني اسمع صوتها وف ثلج ع كلبي يارب يريدوني اريد ارجع بعد شوي فتحت امي الباب وكالتلي عمتج تريدج كتلها ابوي يدري كالت اي هو كال دزوا عليها تكعد يمها ..
سلمت عليهم وسألت عني وكعدت يمها ومدنكة راسي وصرت ابجي لا ارادي عدها وضمتني لحضنها وكالتلي اصبري بنتي دزني رسول كلي شوفيها وشوفي اخبارها وتاكدي من قصتها لان كلام بيناتنا
هو دور ع بنت ثانية يتزوجها بس محد انطاه خصوصا تزوج قبل شهرين هيج يكولون اكيد محد يعيش يمهم ومن هالسوالف وكذلك قصتج اثرت ع سمعته ف اذا تحبين ترجعين اله كوليلي (يعني يرجعني مو حبا بية بس محد قبل بي وجنت اعرف بس مابيدي حيلة يعني اريد ارجع بأي وسيلة بس اخلص من عذاب ابوية ) ..
دنكت راسي وحطت ايدها ع خدي كالت الي ارفعي راسج بنتي كوليلي لتخجلين .. كتلها اي اريد ارجع لرسول بس خاف ابوي كاطعتني كالت ماعليج يمي .. روحي هسة ..
وصاحت ابوية واني اباوعلهم من شباك ومرتبكة ويارب يوافق ..
جان يصيحني ابوي كااااظمية يكااظمية وينج
ها بوية امرني .. كال حضري نفسج تروحين ويا عمتج ولو شتحضرين وجهج ابكع ميبين بي ضحكتله وطلعت بكلبي خلي يظل يقلد بس اخلص
.. لبست واخذتني وياها بكل بساطة واني رايحة اكول معقولة واحد يدفعني ع الثاني محد يريدني اصلا بس هيج مصلحة رسول وجودي والا مو سائل عني وكذلك بهالسهولة تركني ابوي اروح واني فكرت بعد ما يشوفني الشمس ..
طبيت الفرع مال بيتهم وشفت رواء وبنات عمها ملتمات وعبرت من عدهن ماسلمت بس عمتي سلمت .. وسمعتهم يبسبسن بس ما اهتميت .. ورحت لغرفتي بس رسول ماكو ..
بهاللحظات فكرت تفكير غيرلي حياتي شوي ..
كلت دام دور ع ثانية هو كان ناوي يطلكني بس شاف محد نطاه بنته وصار شهر محد يباوع بوجهه هو اصلا نفسي الطركاعة حتى الشيطان يتعوذ من وجهه منو ينطي مرة
يعني هيج وكعت ايده ع الحديدة وماظل عنده خيار بس اني وهيج يعني راح يحسبلي حساب وكذلك راح يعرف قيمتي بس شلون اني اكوم ادلل عليه واتمختر لان وحدة تظل فقيرة تنأكل ..
ملابسي بغرفتي مثلما هي طلعت دشداشة وطبيت سبحت تعطرت واني اعرفه هسة مشتاقلي وهالامور
صرت امشط بشعري بس شنو ع كيفي ردت يطب واني امشط .. وبالفعل طب لكاني امشط وسويت نفسي مدري جان يجي يمي وكالي كاظمية حليانة وقرب يمي ..
كتله رسول قبل كلشي خلي نكعد نتفاهم كال ع شنو كتله ع نقاط قبل لا تمسني ولا امسك واذا ما اتفقنا رجعني لاهلي عايشة لا قيل ولا قال وطبعا كذب هو اني هربت من اهلي بس يعني الكيد شوي صار يشتغل .. كلي شلون يعني مدا افهمك !! القصة خاصة ب وسام الفراجي
كتله ع القصة الاخيرة احلفلك بكل كتب الله السماوية ماصار شي بس القصة وما بيها رواء وبنات عمك هيج وهيج كالن الي وهيج صار وصرت احجيله القصة وهو كال تمام صدكتج بس مدري يمكن مجبور او صدك بالفعل ما ادري ..
مد ايده ع كتفي كتله اوكف ظل عندي شي ولتكول استغلال بس هذا حقي وماريده هسة بس اريده منك من يصير عندك
كلي شنو ؟ كتله اريد نبني بيت نطلع من هاي القرية او نشتري بيت حتلو صغير .. قابل تظل هيج بالقرية تعال شوف المدن حلوة هسة وبيوتها حلوة وشوارعها ونشتغل بتجارة اي شي قابل نظل هيج بهالعيشة بين الهوايش والدجاج !!
كلي هاي صعبة لان عيشتنا هيج من وعينا ع الدنيا وهاي بيوتنا وشغلنا وثانيا شلون اعوف امي !! ترهم يعني كتله لا مو راهمة بس انت عندك خير من الله ع الاقل اشتريلك بيت صغير بالمدينة يفيدنا عود اذا اجاك شراي وبسعر زين بيعه
كال افكر بالموضوع بس هسة عوفينه من هالشروط خلي نسولف تعالي ..
كتله لا اصبر اوعدني اول شي بس ترهم الشغلة تاخذ بيت كال والله والله هاهية ؟ احلفلج انوب والله هاي الثالثة تعالي نسولف هسة عوفينا من شروطج ..
رحنا نسولف وصاير يحجي ويغازل كتله هاي شنو الشوك لاعب بيك لعب صاير لسان حلو وحركات كالي شهرين عنج اكيد اشتاكلك يحلو ..
تقرب لي من كتفي من ورة ونزل شوي من دشداشة وجان يشوف طبع !! كلي شنو هاي ليش هيج ظهرج ؟ ابتسمت اله وكتله غير انت وديتني بيدك لأبوية (القصة خاصة بوسام الفراجي )
وابوية ماقصر هاي سعفة مال نخل طابعة بظهري من الكتل
كلي خلي نشوف الطبعات الباقية كتله عيب استحي رسول
ضحك وتقرب اليه لمسني لزمت ايده ابعدتها عني ولزمت ايدي خليتها ع خده
كاظمية : اوعدني ما تتركني
رسول : منو يترك هالعيون الحلوة ؟
كاظمية : رسول لتقشمرني اوعدني
رسول : وعد وعد وعد دفضيها يا كوكو تعالي
بهالتوقيت اندك الباب
رسول : غلسي ع اساس نايمين لتردين
كاظمية : وين اكو نوم هسة اطلع شوف منو بالباب
رسول : اهو وكته والله ما افتحه ديلا تعالي
خلينا الباب مقفول وسوينا الي سويناه بس شنو سبحان الله رب ضارة نافعة شكد صارلي وشكت شبعت كتل وصارت فضيحتي بفلس بلسان العالم بس بسبب هالشي كدرت احسن شوي علاقتي برسول واطلب عليه بوقت المناسب
واذا صار الي بالي ولكينا بيت برا هاي احسن شغلة واطلع من هالحياية هاي .. طلعت اسبح ولكتني رواء هاي بعدج عايشة اني طنشتها لان الي مايخاف من الله كلشي يسوي ..
القصة خاصة بوسام الفراجي
ردت اسبح بس دام رواء هنا ما طبيت رجعت لغرفتي حدما راحت .. المهم رسول عرفت نقطة ضعفه من يشتاك اطلب منه وصرت اهتم بنفسي صح مو كلش حلوة بس الترتيب مطلوب ..
وصار كلما تصير فرصة مناسبة افتح موضوع البيت .. وهو يأجلها الما يترتب وضعي .. حدما احد ذاكرله بيت بالمدينة خوش سعر ورايح عليه ومتعامل وياهم وشبه موافق ع سعره .. اني صرت احس نفسي مو زينة مدري شبيه شو دوران وكذا ..
بالليل عاد اجوا ضيوف ع البيت وكعدوا برا بالحديقة ورحت اسويلهم جاي واسمع سوالفهم بس شنو سمعت صوت شعر راسي وكف منه .. الصوت بالضبط صوت الزلمة الملثم الي انقذني من الحمام ونطاني الدشداشة 😮