رواية جوازة ميراث الفصل الثالث والعشرون23والرابع والعشرون24بقلم رانيا عماره
عائشه(بصويت) :انت بتقول ايه يارشااد!!..مروه؟؟..ازااي!!
رشاد:انا زي زيك مصدوم من اللي سمعته عنها..دي خلاص اتجننت ومابقتش عارفه هى بتعمل ايه!..مروه دي لا يمكن تكون عاقله ابداً!
عائشه(بعياط) :ياحبيبتي يا هدى..اتظلمتي من بنتك زي مااحنا اتظلمنا منها..انا عمري ماكان يجي في بالي ان مروه تطلع بالوحاشه دي كلها!..تقتل أمها؟..امها اللي كبرتها؟
سلمى(بحزن) :طب انت اتأكدت يا رشاد؟
رشاد:انا متأكد من غير أي حاجه.. اللي تقتل وتسرق عشان الفلوس تعمل اي حاجه عادي..المهم متجيبوش سيره قصاد مصطفى مش كل مايحاول ينساها تفكروه بيها تاني.. كفايه عليه اللي هو فيه
عائشه(بعياط) :بجد مصدومه اوي ومش قادره أصدق!..لا حول ولا قوة الا بالله العلي العظيم...يارب احفظنا من اذيتهم احنا مابقناش قدها
رشاد:خلاص الواحد مابقاش يتصدم فيها انا بقيت متوقع كل منها ومن جايده عادي..انا كل اللي يهمني دلوقتي داليدا
عائشه(بعياط) :لا حول ولا قوة الا بالله العلي العظيم
••قام رشاد وطلع البلاكونه..واتصل بـ داليدا تاني فا ردت!••
رشاد(بحزن) :كل ده يا داليدا علشان تردي عليا؟..انتي عارفه كويس ان انا مليش ذنب في أي حاجه وأديكي شوفتي كل حاجه قصاد عينيكي.. انا مكدبتش عليكي في حاجه..بلاش تستسلمي لـ شيطانك يا داليدا..واعرفي كويس ان انا بحبك ومحبتش حد قدك!
داليدا(بحزن) :بقيت اخاف يارشاد..خايفه اتعلق بيك أكتر من كده وفي الآخر تبعد وتسيبني.. وفجأه الاقي نفسي وحيده بعد مااتعلقت بيك ومليت عليا حياتي!
رشاد:صدقيني يا داليدا انا محبتش حد قدك..ومش هقدر ابعد عنك مهما يحصل..انتي اللي مليتي عليا حياتي..بعد ماكنت تايه ووحيد..مليش حد يسندني ويقف في ضهري!..انتي نصي التاني اللي مقدرش اسيبه..علشان خاطري يا داليدا انتي اللي متبعديش عني..وخليكي دايماً معايا..انا مش طالب منك حاجه اكتر من كده!
داليدا(بحزن) :انا عارفه انك ملكش ذنب..وواثقه فيك وعارفه انك مش هتبعد عني ولا هتخذلني زي ما غيرك خذلوني!
رشاد:وانا قد ثقتك دي وعمري ماهخونها..ارجوكي ارجعي الشغل بكرا انا مش عايز حد يفرق مابينا! بلاش تديهم الفرصه!
داليدا(بحزن) :حاضر يا رشاد
رشاد:حقك عليا يا داليدا انا آسفلك!
داليدا:ماشي خلاص
رشاد:قوليلي صحيح خالتك كلمتك ولا لسه؟
داليدا:ايوه خالتو كلمتني النهارده وقالتلي ان جوزها في انتظاركم.. شوف انتوا هتيجوا امتي وبلغوني!
رشاد:حاضر يومين تكون الدنيا راقت..ماما اعصابها تعبانه اوي بعد ماعرفت ان مره قتلت امها
داليدا(مصدومه) :معقول ده بجد؟
رشاد:للاسف ايوه.. انا كنت في قسم الشرطه من شويه بقدم بلاغ..اكتشفت الظابط بيقولي ان مروه قتلت امها وهربت
داليدا(بصدمه) :معقول تقتل مامتها!..هى مروه دي ايه شيطان ماشي على الأرض؟
رشاد:لا شيطان ايه ده الشيطان أرحم منها..كلنا اتخدعنا فيها وكنا فاكرينها الملاك البرئ..طلعت ملعونه..ده انا لحد دلوقتي خايف مصطفى يعرف آخر خبر وبعد الشر يحصله حاجه!
داليدا:لا اوعى تحكيله حاجه..مادام هو طلقها خلاص مالهاش لازمه مادام كده كده مفيهاش رجوع
رشاد:انا نفسي ربنا يعوض مصطفى عن كل الاذيه اللي شافها من مروه..مصطفى متدمر من كل ناحيه!
داليدا:خير يا رشاد..تفائلوا خير..كله هيعدي
رشاد:انا واثق من كده!
<بـعـد يـومـيـن>
••اتفق رشاد مع أهله يروحوا يقعدوا مع أهل داليدا..وقبلها كانت داليدا وفريده عند خالتهم••
صابرين:ايه ياداليدا..العريس جاي في الطريق ولا لسه؟
داليدا:ايوه ياخالتو جاي في الطريق اهو
صابرين:يوصلوا بألف سلامه
داليدا:يارب
••وفي العربيه كان رشاد سايق ومعاه أهله..لحد ماوصلوا••
رشاد:يلا وصلنا
عائشه:انزلي يا سلمى
••ونزلوا من العربيه وطلعوا على السلم وخبطوا على الباب فا غاده فتحت••
غاده:اهلاً وسهلاً اتفضلوا
والد رشاد:متشكرين
••ودخلوا الشقه••
غاده:اتفضلوا اقعدوا
صابرين:يااهلاً وسهلاً...ازي حضراتكم؟
عائشه:الحمدلله
صابرين:اعرفكم بنفسي انا خالة العروسه..وده أستاذ عصام جوزي
والد رشاد:اهلاً بحضرتك
••جات فريده من جوا وسلمت عليهم••
فريده:ازيك ياطنط عائشه وحشاني
عائشه:وانتي كمان ياحبيبتي
فريده:عامله ايه ياسلمى؟
سلمى:الحمدلله وانتي يا فريده؟
فريده:الحمدلله..ازيك ياعمو.. ازيك يااستاذ رشاد؟
والد رشاد:الحمدلله
رشاد:الحمدلله
••راحت صابرين قاعده معاهم هى وجوزها وبنتها••
والد رشاد:طبعاً أكيد داليدا حكيت لـ حضراتكم كل حاجه
عصام:ايوه طبعاً
والد رشاد:انا الحقيقه طالب ايد أستاذه داليدا لـ ابني الأستاذ رشاد
عصام:ده احنا يشرفنا ويسعدنا اننا نناسبكم
والد رشاد:ربنا يخليك كلك ذوق
عصام:الله يعزك..طيب عرفنا على نفسك يااستاذ رشاد
رشاد:انا عندي 26 سنه..وصاحب كافيه مشهور الحمدلله..ومعايا بكالريوس تجاره..وعندي شقه وفيلا تمليك
عصام:ماشاءالله ربنا يزيدك من فضله
رشاد:ربنا يخلي حضرتك..احنا مش طالبين أي حاجه منكم غير موافقتكم بس..وداليدا انا عايزها بشنطة هدومها
صابرين:والله انا من أول ما داليدا حكيتلي عنكم قولت دول ناس محترمين و بإذن الله تكون جوازة السعد
عائشه:ربنا يخليكي..داليدا طالعه محترمه وأصيله زيكم
صابرين:الحمدلله
والد رشاد:فا شوف حضرتك طلباتك ايه واحنا معاكم للآخر
عصام:داليدا انا بعتبرها بنتي التانيه هى وأختها..ربنا العالم معزتهم عندي عامله ازاي.. فانا هطلب منك كأني بطلب لبنتي بالظبط..بس قبل أي حاجه داليدا دي غاليه وتشيلوها في عينيكم.. البنت يتيمه والدنيا جايه عليها..وانا كان نفسي في يوم زي ده والدها ووالدتها هما اللي يقعدوا القاعده دي واحنا نكون ضيوف في بيتهم..بس الاعمار بيد الله
رشاد:طبعاً داليدا في عينيا الاتنين..انا عارف قيمتها ومقدرها كويس وانا والله ما عايز أي حاجه من الدنيا غيرها
صابرين:ربنا يخليكم لبعض ويفرح قلبكم
رشاد:يارب
عصام:انا عايز شبكه ومهر لـ داليدا بـ ٣٠٠ ألف
رشاد:استسمحك في حاجه.. انا حابب اكتب الفيلا بإسم داليدا
عصام:والله بقى انت وكرمك..وان شاء الله الشبكه تكون في حدود 70 جرام
والد رشاد:اللي تؤمرونا بيه..تحت أمركم في أي حاجه
رشاد:انا مش حابب اننا نعمل خطوبه يعني ياريت نخلي الفرح عالطول
عائشه:ازاي بس يا رشاد ياحبيبي؟..الخطوبه مهمه علشاني تعرفوا بعض أكتر!
رشاد:الفتره اللي داليدا اشتغلت معايا فيها انا عرفتها وهى عرفتني كويس فا بالتالي مش محتاجين خطوبه
عصام:بس كده يابني دي هتبقى جوازه مستعجله!
رشاد:بالعكس ده خير البر عاجله..وبعدين انا اعرف داليدا من فتره طويله..ولحد مانخلص تجهيزات الفرح نكون عرفنا بعض أكتر
صابرين:انا شايفه رأي أستاذ رشاد صح..الخطوبه مالهاش لازمه طالما هما عارفين بعض كويس
والد رشاد:والله يابني اللي انت عايزوا
رشاد:انا قولتلكم اللي انا عايزوا..فا ممكن نتفق على كتب الكتاب والفرح!
عصام:خلاص مفيش اي مشكله..ننده عروستنا الأول وبعدين نتفق على كتب الكتاب والفرح.. قومي يا فريده اندهي اختك
فريده:حاضر
••قامت فريده تنده داليدا من جوا••
فريده:داليدا...عمو عصام عايزك برا
داليدا:ايه اللي حصل؟
فريده:كانت قعدة تعارف..بس رشاد عايز يكتب الكتاب وتتجوزوا عالطول من غير خطوبه
داليدا:وانا هلحق أجهز نفسي؟
فريده:اه ممكن تلحقي.. اطلعي بس علشان عايزينك
داليدا:ماشي
••خرجت داليدا ووراها اختها فريده..وكانت داليدا محرجه..ولكن رشاد أول ما شافها ضحكلها وهى برضه!••
عائشه(بإبتسامه) :يااهلاً بعروستنا القمرايه
داليدا(بتحضنها) :اهلاً بحضرتك ياطنط.. ازيك ياعمي؟
والد رشاد:الحمدلله
داليدا(بتحضنها) :ازيك ياسلمى؟
سلمى(بتحضنها) :الحمدلله وانتي اخبارك ايه يا داليدا؟
داليدا:الحمدلله
صابرين(بتضحك) :طب و عريسك مش هتسلمي عليه؟
داليدا(بتضحك) :ازيك يارشاد؟
رشاد(بيضحك) :الحمدلله ياداليدا
••وقعدت معاهم وهى محرجه••
عصام:دلوقتي أستاذ رشاد عايز يكتب الكتاب وتتجوزوا عالطول انتي ايه رأيك؟
داليدا(بإحراج) :اللي حضرتك تشوفه
عصام:لا مش اللي انا أشوفه..الرأي رأيك انتي..انتي رأيك ايه؟
داليدا(بإحراج) :موافقه
عصام:على بركة الله
رشاد:معلش حاجه كمان لان انا حابب أدخل على نور..هى اه داليدا عارفه بس لازم حضراتكم تعرفوا برضه..انا عندي ابن اسمه يوسف عمره سنتين
صابرين:يعني انت كنت متجوز قبل كده؟
رشاد:ايوه بس توفيت
عصام:لا حول ولا قوة الا بالله... ربنا يرحمها ويغفر لها
رشاد:يارب
والد رشاد:هل دي حاجه مدايقه حضراتكم؟
صابرين:لا..انت ظروفك زي ظروف داليدا الفرق بس انها مخلفتش من الجوازه الأولى
والد رشاد:طب الحمدلله اهي تبقى بطولها
عصام:خلاص على بركة الله.. نقرأ الفاتحه بقى!
••رفعوا كلهم ايديهم يقروا الفاتحه وبعد ماخلصوا••
غاده:لولولولولوي مبروك ياداليدا
داليدا(فرحانه) :الله يبارك فيكي وعقبالك
••وقامت فريده حضنت أختها من الفرحه••
فريده:مبروك يا قلبي
داليدا:الله يبارك فيكي يا فريده ياحبيبتي
والد رشاد:هننزل نجيب الشبكه امتى؟
عصام:من بكرا ان شاء الله
والد رشاد:توكلنا على الله.. الف مبروك يارشاد
رشاد:الله يبارك فيك يا بابا
<عـنـد جـايـده>
••كانت بتموت من كتر الغل اللي جواها..سواء من ناحية مروه أو رشاد...مروه خدت فلوس تعيشها 20 سنه لـ قدام مرتاحه...ورشاد رفض رجوعها في حياته،وخصوصاً لما ارتبط بواحده تانيه!••
جايده:وآخرتها ايه ياجايده؟؟..هتفضلي حاطه ايدك على خدك كده كتير؟؟..ماتشوفيلك حل بدل مانتي بتلفي حوالين نفسك!..بقى تديني على قفايا يامروه وتهربي!!..انا مش عارفه اتصرف بجد مش عارفه!
••وفجأه جاتلها فكره..ودي اللي خليت ملامحها تتحول من حزن وبؤس لـ ابتسامة شر..لحد ما راحت لـ ضياء لاشين••
جايده:عايزه ادخل
_ممنوع
جايده:هو ايه اللي ممنوع؟.. بقولك عايزه أدخل..قول لـ ضياء..جايده عايزاك
_خليكي هنا متتحركيش
جايده(بتريقه) :لا مش هتحرك
••دخل اللي شغال مع ضياء يبلغه بالخبر••
_في واحده عايزه سعادتك ياضياء بيه
ضياء:مين؟
_بتقول اسمها جايده
ضياء:خليها تدخل
_اوامرك
••وخرج لـ جايده••
_ادخلي
••دخلت جايده..وكان ضياء قاعد على الكرسي كالعاده..وباصص على صورة بناته الاتنين..هنا ويمنى..وأول ما جايده وصلتله..بصلها بقرف••
ضياء:ايه اللي جابك هنا.. عايزه ايه!
جايده:مروه بلغت عنك وانا جيت الحقك
ضياء(بضحكه عاليه) :هاهاهاهاهاها...بلغت عني ازاي؟
••ولما جايده لقيته بيضحك اوي كده..خافت وجابت ورا••
جايده(بخوف) :ايه اللي بيضحك؟
••ابتسملها ضياء وبص ناحية الباب..لقيت مروه واقفه••
ضياء:مش تباركيلنا؟
جايده(بخوف) :على ايه؟
ضياء:مروه اتجوزتني..بقيت مراتي هههههه
••تنحت جايده ومعرفتش تنطق بكلمه ••
ضياء:تعالي ياحياتي
••قربت مروه منه ووقفت ورا ضهر الكرسي ومالت عليه حضنته••
مروه(بتحضنه) :احضرلك حاجه تاكلها؟
ضياء:لا انا لما بشوفك بشبع
جايده(بتوتر) :ازاي؟.. اتجوزتها ازاي؟
ضياء:زي الناس..امال هيكون ازاي يعني؟
مروه:هو انا مقولتلكيش يا جايده؟..ضياء هو اللي بعتني أجيب يوسف..وكان عارف مكانه من قبل ماانتي تعرفي بس قال يلعب معاكي شويه ههههه خطير ياضياء
ضياء:ههههه تعيشي وتاخدي غيرها يا جايده
جايده(بخوف) :انتوا بتلعبوا معايا؟..بتتفقوا عليا؟
••راح ضياء مكشر على أنيابه..وقاملها واتكلم بصوت حاد••
ضياء:لو حد عرف مكاني..انا مش هيكفيني قتلك!..مفهوم!
••بصت له جايده بـ رعب ومشيت من غير ماتنطق نص كلمه••
مروه:مقولتليش بقى مش هتاكل معايا؟
<تـانـي يـوم>
••كان رشاد وأهله وداليدا وأهلها بيجيبولها الشبكه ••
فريده:مبروك يا داليدا
داليدا:الله يبارك فيكي
رشاد:ايه عجبك؟
داليدا:لو سمحت هى الاسعار دي ايه؟
_في خاتم بـ 30 الف وفي بـ 15.. وده بـ50 وفي بـ 57 وفي بـ 80 وده بـ 120 ألف
داليدا:انا عايزه اللي بـ 15
رشاد:لا يا داليدا مش هيحصل!..انا عايز أغلى حاجه لـ داليدا!
_يبقى الـ ب120 ألف
رشاد:انا عايزوا
داليدا:مينفعش يا رشاد!!.. ده غالي جداً!!
رشاد:مفيش حاجه تغلى عليكي يا داليدا..انا لو أطول أجيبلك الأغلى من كده هجيب..انتي مقامك أعلى من كل ده!
داليدا:بس صدقني ده غالي اوي.. ممكن توفر الفلوس في حاجه تانيه!
رشاد:انا هجيبلك الخاتم ده.. وهجيبلك برضه كل اللي انتي عايزاه ده غير ان انا ناوي اكتبلك الفيلا بإسمك ان شاء الله
داليدا:لالا طبعاً كل ده كتير عليا اوي!..انا عايزه أعيش في الشقه اللي فوق شقة طنط
رشاد:بس الفيلا أكبر وأحسن بكتير!
داليدا:انت عارف ان انا اتحرمت من بابا وماما..وبجد انا معتبره أهلك انهم أهلي انا كمان وعايزه أكون جنبهم..انا عايزه أكون متطمنه!
رشاد:خلاص ده اختيارك انتي..ومادام انتي مش عايزه الفيلا فانا هبيعها وهعملك أحلي شغل في الشقه بتاعت بيت اهلي
داليدا(بحب) :ربنا يخليك ليا يا رشاد.. انا بحبك اوي!
رشاد:ويخليكي ليا يا داليدا!
••ورفع ايديها وباسها••
_خلاص استقريتوا على ده؟
رشاد:ايوه هناخده
عائشه:مبروك ياحبيبي
رشاد:الله يبارك فيكي ياماما
••وقرب يدفع تمن الخاتم الالماس بعد ما عد الفلوس••
رشاد:معلش كان نفسي ادفع بالفيزا بس للاسف فيها مشكله
_لا ولا يهمك يافندم..المهم انكم نورتونا
رشاد:شكراً ده بنوركم
••وطلع الفاتوره من على الجهاز..وخرجوا برا••
والد رشاد:ايه يابني الخطه الجايه؟
رشاد:داليدا مش عايزه الفيلا..عايزه تعيش في الشقه بتاعتي
عائشه:دي فيلا كبيره ياحبيبتي وأحسن بكتير
داليدا:لا ياطنط صدقيني انا هكون مرتاحه كده أكتر
عائشه:داليدا دي بنت حلال وجدعه..كل ده من دعواتي ليك
رشاد(بيضحك) :شوفتي بقى ان اختياراتي انا أحسن من اختياراتكم بكتير!
صابرين:ربنا يهنيكم ببعض ياداليدا ويسعد قلبكم
داليدا:يارب ياخالتو
رشاد:تعالوا اتفضلوا هنروح على بيت أهلي نشوف الشقه
عصام:توكلنا على الله
<عـنـد هـنـا ويـمـنـى>
••كانت هنا ضميرها بيأنبها ولكن بتكابر!..لحد ماراحت عند أختها••
هنا(بتردد) :انا غلطانه وعارفه كده كويس..وعارفه انك عمرك ماحسيتي ان ليكي أخت زي بقيت البنات..بس ماهو برضه غصب عني..فاقد الشئ لا يعطيه!..طول عمري وانا مش لاقيه الامان من أهلي..طبيعي هكون كده معاكي انتي كمان!.. ماهي دي نتيجة أفعالهم!..بس اللي بقيت أفكر فيه الفتره دي ان خلاص مامي ماتت..وبابي انا ذات نفسي مابقتش اتمنى اشوفه.. انسان شر ومالوش أمان
يمنى:مانتي طالعاله يا هنا..شاربه منه!
هنا(بعصبيه) :بطلي تقولي ان انا زيه!..انا عمري ماكنت زيه ولا هبقى زيه..دي ظروف واتحطت عليا لحد ماوصلتني لكل ده
يمنى:وانتي ايه اللي مخليكي جايه تقولي الكلام ده؟
هنا:علشان مش عايزاكي تفتكريني بحاجه وحشه..وكل ماتفتكري اختك يبقى بالخير مش بالشر
يمنى:مش قادره اصدقك!
هنا:مش لازم..يكفي ان بيني وبين نفسي صادقه..تعالي ننسى اللي فات ونبدأ صفحه جديده
يمنى:كان نفسي بس مش هينفع
هنا:لا هينفع عادي..انتي بس اللي مش عايزه..خلاص كرهتيني؟
يمنى:انا مبكرهش حد..بس اللي شوفته منكم مش شويه!
••قربت هنا من أختها يمنى وحضنتها وعيطوا هما الاتنين••
يمني:مامي وحشتني اوي
هنا:الله يرحمها..خلاص بقى حقك عليا
يمنى(بعياط) :ماشي يا هنا..انتي اختي برضه ومهما كان مقدرش استغنى عنك!
هنا:حبيبتي!
<عـنـد سـامـي>
حسناء:مش هتيجي معانا واحنا بنجيب شبكة اختك؟
سامي:لا مليش مزاج..روحوا انتوا
حسناء:طيب يلا بينا ياصفاء
••وخدت صفاء وسابوه في البيت لواحده..راح مطلع الموبايل ومكلم زينه••
سامي:الو يا زوزا عامله ايه؟
زينه:ايه ده سامي بنفسه بيتصل عليا؟
سامي(بيضحك) :ههههه اه..عامله ايه؟
زينه:كويسه عشان كلمتني..بقى تغيب عليا كل ده؟
سامي:غيبت عليكي فين ده انا لسه مكلمك امبارح!
زينه:وايه يعني ده انت المفروض تكلمني كل ثانيه
سامي:لا كل ثانيه ايه ده انا كده آجي ابات عندكم أسهل
زينه(بيضحك) :ده انا ابويا واخويا يقطعوك
سامي:لا ماتعدلي كده..سامي محدش يقدر عليه ولو كان مين كده!.. ده انا مفيش حد زي ولو مش عارفه انا هعرفك!
زينه:الله في ايه ياسامي مكنتش كلمه بهزار!..مانا عارفه كل اللي بتقوله ده.. ده انت سيد الرجاله ومحدش يقدر يقول غير كده
سامي:يبقى خدي بالك من كلامك بعد كده عشان مزعلش وانا لما بزعل بهد الدنيا
زينه:خلاص حقك عليا، متزعلش
سامي:مقبوله منك يازوزا..اوعي يكون ابوكي وامك عارفين حاجه!
زينه:لا متقلقش محدش يعرف حاجه
سامي:طب كويس
زينه:اما صفاء هتجيب شبكتها امتى؟
سامي:نزلوا يجيبوها من شويه
زينه:ومروحتش معاهم ليه؟
سامي:مليش مزاج اروح في حته..مرتاح في البيت أكتر..أصل انا هوجع دماغي ليه؟..خليهم هما يروحوا ويتمرمطوا وانا قاعد هنا مريح دماغي
زينه:شكلك مش بتاع لف
سامي:لا مليش في الجو ده..الأنتخه حلوه برضه
زينه:اما مقولتليش شغال ايه؟
سامي:انا مبشتغلش بس كل يومين بروح أشقر على أبويا في الورشه ولو محتاج حاجه اجيبهاله
زينه:يعني قاعد من غير شغل
سامي:اه..كده أحسن
زينه:طب بقولك ماتيجي تشتغل مع جمال أخويا..ده عايز حد يساعده وهيديله مرتب 10 ألاف جنيه في الشهر
سامي:10 ألاف ليه شغال في شركه؟
زينه:شغال في الأحسن من الشركه بكتير..أصل بيع الموبايلات ده بيكسب مكاسب بالعبيط
سامي:طب ويفرض اشتغلت ومدانيش حاجه؟..مع انه ميقدرش بس انا بقول يفرض يعني
زينه:لا هيديك..وعلشان تصدق هتاخد مرتبك مقدماً
سامي:ياسلام وهو ايه ضمنه ان انا هاخد الفلوس واشتغل مش يمكن أخلع؟
زينه:ماهو مبيعملش كده مع أي حد..هو علشان عارف انك كويس ومش بتاع حوارات فا هيديك المرتب مقدم انت بس وافق
سامي:خلاص هبقى أعدي عليه واجيبله سيرة الشغل وهو لو عايزني معاه هيتكلم..انما لو مش عايزني مش هيفتح سيره
زينه:لا انا متأكده انه ماهيصدق انت بس روحله
سامي:اعتبريني روحتله.. مسافة السكه وأكون عنده.. سلام
<عـنـد رشـاد و دالـيـدا>
••كانوا وصلوا بيت أهله..وطلعوا الشقه يتفرجوا عليها••
صابرين:بسم الله ماشاء الله..ماهي الشقه جميله اهي وزي الفل
عائشه:هى ناقصها شوية حاجات..معلش بقى أصل الشقه دي مركونه بقالها سنين
داليدا:لا ياطنط عادي..مع الاهتمام هتكون آحسن
رشاد:انا هبدأ شغل فيها من النهارده
والد رشاد:وليه يابني السربعه دي؟..ماتخلي كل حاجه واحده واحده
عصام:ده نفس كلامي..الاستعجال وحش..انما خلوا كل حاجه على أقل من مهلكم
رشاد:والله انا مش شايف أي فايده من التأجيل..انا كده كده عارف داليدا كويس..والفلوس الحمدلله جاهزه يبقى ليه؟
والد رشاد:ماهو كل حاجه جاهزه..بس يعني براحه..داليدا مش هتطير منك..وواحده واحده كله هيخلص
داليدا:والله يااونكل انا قولتله نفس كلام حضرتك بس دي رغبته بقى هنعمل ايه!
عائشه:سيبكم من أي حاجه كفايه اننا كسبنا ناس محترمه زيكم
عصام:ربنا يخليكي يااستاذه..ويجعل مابينا كل خير
صابرين:اللهم آمين
رشاد:قوليلي بقى نفسك في الألوان تكون ايه؟
••ودخل هو وداليدا عند الأوض، ووراهم فريده••
داليدا:انا ميفرقش معايا ألوان الشقه هتكون ايه.. على قد مايفرق معايا فريده أختي هتروح فين لما اتجوز؟
رشاد:هتقعد معانا طبعاً وهنعملها أحلى أوضه وعلى مزاجها
داليدا(بإبتسامه) :مش عارفه أقولك ايه بجد يارشاد..بس انت خليت كل حاجه سهله قصاد عينيا بالعكس مصعبتهاش عليا!
رشاد:ومقدرش اعمل كده!..انا عايز أشوفك مرتاحه وبس!
داليدا(بحب) :انا مرتاحه طول مانا معاك!
سلمى:الله الله على الكلام الحلو.. ده انت مابتقولش كده لأختك!
رشاد(بيضحك) :بطلي كدب ياسلمى
سلمى:ههههه حاضر، هو الصراحه كويس معانا كلنا بس انا بهزر
داليدا(بتضحك) :ربنا يخليكم لبعض
سلمى:يارب
<عـنـد سـامـي>
••راح عند محل أخو زينه "جمال"، ولكن كان مقفول••
سامي:ايه النحس ده..هفضل منحوس كده لحد امتى؟
••وطلع الموبايل واتصل بـ زينه••
سامي:الو يا زينه..بقولك محل اخوكي مقفول هو راح فين؟
زينه:تلاقيه راح يصلي وراجع تاني
سامي:وانا هفضل مذلول لحد ما سعاته يجي!
زينه:معلش يا سامي ده هما بالكتير 10 دقايق بس..
خليك معايا لحد مايرجع
سامي:لا اخليني معاكي ايه انتي عايزه اخوكي يرجع ويلاقيني بكلمك ويعرف اللي بينا؟..اقفلي وهكلمك لما أخلص الحوار ده
زينه:طيب ماشي سلام
سامي:سلام
••وبيلف لقى جمال واقف وراه••
الفصل الرابع والعشرون
جمال(بإستغراب) :ايه ده سامي؟
سامي:اه..انت كنت قافل محلك ليه؟
جمال:كنت بجيب حاجه..تعالى اتفضل
••ودخل جوا ووراه سامي لحد ماقعدوا••
سامي:انا كنت معدي قولت لا مينفعش اعدي كده..لازم ادخل اسلم عليك
جمال:كلك ذوق يا سامي..اما الحاج ماهر عامل ايه هو والحجه؟
سامي:كويسين..انا شايف يعني ان الشغل واقف عندك
جمال:واقف عندي ازاي؟
سامي:يعني الجو مريح ومفيش زباين
جمال:لا ده الشغل تمام بس عشان ده وقت صلاه..ده المحل بالليل بيكون متروس زباين
سامي:ربنا يزيدك ياعم..ده انا كنت لسه راجع من عند واحد بسأل لو في شغل..قالي مفيش..ده انا كل مااروح حته الاقيها متقفله قصاد وشي
جمال:ليه بس كده؟..طب ده انت الحجه أمك داعيالك.. ده انا كنت بدور على حد يشتغل معايا
سامي:بجد؟.. طب ومقولتوش ليه؟
جمال:مانا فاكرك شغال مع الحاج
سامي:لا مانا شغل الورش ده ميعجبنيش..انا عايز حاجه أعلى..ده انا ابويا بيرجع بالليل متبهدل يادوب ينام ساعتين ويرجع الشغل تاني
جمال:طب ايه رأيك تشتغل معايا؟ وهديك مرتب حلو اوي
سامي:كام؟
جمال:10 آلاف في الشهر
سامي:ياه بس ده كتير اوي
جمال:ولا كتير ولا حاجه أصل شغلانة الموبايلات بتكسب دهب
سامي:طب عندك كارت اتصالات بـ 10؟هههههه
جمال:عندي كل اللي تحبه بس ليه؟
سامي:هتصل على أبويا اتطمن عليه
جمال:ده انا اعملك باقه بـ 100 جنيه.. ولا أقولك انا هقدملكم على راوتر مره واحده هههههه
سامي:هههههه كلك كرم..طالع لأبوك وأمك برضه
جمال:الله يخليك ياسامي..قولت ايه؟
سامي:أديني فرصه أفكر
جمال:على أقل من مهلك..لما تاخد وقتك في التفكير ابقى رن عليا رنه وانا اللي هتصل عليك
سامي:لأ وكمان بتوفرلي ههههه
جمال:طبعاً ده احنا هيبقى مابينا عيش وملح
سامي:طب خلاص انا موافق
جمال:بالسرعه دي؟
سامي:وأكتر من كده كمان..هستلم الشغل امتى؟
جمال:بكرا الصبح أكون رتبت أموري
سامي:ده انا أمي داعيالي..يابركة دعاكي ياأمي
••وراح قايم علشان يمشي••
جمال:رايح فين؟.. مش تقعد تشرب حاجه الأول وتاخد واجبك؟
سامي:الواجب في البيت..أشوفك بكرا سلام
جمال(بإستغراب) :سلام
<تـانـي يـوم>
••كان رشاد وداليدا قاعدين في المكتب بيشوفوا ألوان الشقه والديكورات على الأيباد••
داليدا(بتفكير) :انا عايزه ديكورات سقف هاديه..مش عايزه شغل كتير
رشاد:طيب الاضاءه عايزاها ايه؟
داليدا:أزرق هيكون حلو اوي ولا انت ايه رأيك؟
رشاد:لا هيبقى حلو فعلاً..طيب الأرضيه عاجباكي ولا أغيرها؟
داليدا:لا حلوه خليها زي ماهي..احنا هنغير ألوان الشقه بس وهنعمل شوية Decorations في الشقه
رشاد:خلاص ماشي..طيب بالنسبه للبيبان والشبابيك نخليهم زي ماهما ولا نغيرهم؟
داليدا:لا نغيرهم أحسن..وياريت نغير مفاتيح الكهرباء بالمره
رشاد:حاضر ياداليدا
••لقى المهندس بيتصل بيه••
رشاد:الو يا بشمهندس أيمن..هتشتغل في الشقه النهارده؟
المهندس:ايوه ان شاء الله
رشاد:طيب الشقه من أولها لآخرها تاخد معاك كام يوم؟
المهندس:يعني حوالي 13 يوم كده..مش هتاخد كتير
رشاد:طيب انا هبعت لـ حضرتك الالوان اللي انا عايزها..بس ياريت تطلع زي اللي في الصوره..لإن انا ساعات كنت بتفق مع النقاش على لون ويطلع لون تاني خالص
المهندس:لا متقلقش دي شغلتنا احنا..كل حاجه هتطلع زي ما حضرتك عايز بإذن الله
رشاد:انا ثقتي فيك كبيره..ده غير ان انا مش بختار أي حد..بس حضرتك ماشاء الله شغلك نضيف
المهندس:ربنا يخلي حضرتك يااستاذ رشاد..نتمنى اننا نكون عند حسن ظنكم
رشاد:ربنا يخليك يابشمهندس..طيب حضرتك هتيجي امتى؟
المهندس:ساعه كده وأكون عندك
رشاد:تمام توصل بالسلامه
المهندس:الله يسلمك
رشاد:مع السلامه
المهندس:سلام
••وقفل معاه••
رشاد:ساعه وهيكون المهندس عندنا في البيت
داليدا:ماشي..رشاد هو انت ليه مستعجل اوي كده؟..انا حاسه انك كده بتضغط نفسك!
رشاد:يا داليدا ياحبيبتي انا مش بضغط نفسي ولا كل الكلام ده...كل الموضوع ان انا مابقتش قادر على بعدك عني..انتي في مكان وانا في مكان!..طيب مانتجوز ونكون سوا!..على الأقل هكون متطمن عليكي وانتي معايا ومحدش هيقدر يقربلك!..ده غير برضه ان انا شقتي جاهزه هى بس ناقصها حاجات بسيطه..والفلوس الحمدلله جاهزه..وانا وانتي عارفين بعض كويس يبقى ليه خطوبه؟
داليدا:ماشي بس يعني اديني فرصه اجهز نفسي..انا مش هلحق اعمل اي حاجه في الـ 13 يوم دول!
رشاد:لا هتقدري..واللي متعرفيهوش ان انا وانتي كمان شويه هنروح الشقه نتابع الشغل مع المهندس.. وبعد كده هاخدك من ايديكي انتي وفريده ونروح نختار موبيليا الشقه
داليدا(بتضحك) :انت بتهزر صح؟.. طب والشغل؟
رشاد:لا طبعا انا بتكلم بجد..داليدا انا مش هرتاح غير وانتي مراتي وفي بيتي!
••ضحكت داليدا هى ورشاد وبعدين قالت••
داليدا:انا بجد كل يوم بحبك اكتر من الأول..وهفضل أدعي ربنا اننا نفضل مع بعض لآخر يوم في عمري!
رشاد(بحب) :انا زي الغرقان اللي بيتعلق بـ قشايه..وانا كنت غرقان في حياتي من مشاكل وحزن وانتي جيتي أنقذتيني..وخلتيني أحب الحياه وأحس ان لسه في أمل في بكرا..انتي ادتيني حاجات انتي ذات نفسك في أمس الحاجه ليها.. بس مبخلتيش عليا!..انا نفسي اعملك كل حاجه انتي عايزاها المهم تكوني راضيه ومبسوطه!.. مش عايزك تحسي بـ فقدان اهلك..انا هكون ليكي الأب والأخ والابن والزوج والحبيب والصاحب وكل حاجه!
••عيطت داليدا من كلام رشاد ليها وحسيت ان ربنا عوضها عوض كبير اوي من عنده!..بعد ماابن عمها اتجوزها وأهانها..من ضربه وشتيمته ليها!..عكس رشاد..كان سندها وضهرها ومش بيتأخر عليها في اي حاجه وطول الوقت بيحاول يراضيها وبس••
رشاد:بتعيطي ليه يا داليدا؟
داليدا(بعياط) :انا عمري ما كنت أتخيل ان ربنا هيعوضني اوي كده بعد وفاة بابا..انا اللي كنت فاقده الأمل..بس انت ادتني كل حاجه انا محتاجاها من غير مااتكلم!..كان نفسي بابا يكون عايش..ويشوفني وانا مع الانسان الصح اللي يستاهلني!..بابا كان هيفرح بيا اوي!
رشاد:ربنا بيبعت لكل انسان اللي شبهه.. اللي يستحقه..مفيش اتنين عكس بعض وبيكملوا!..اللي بيبعدوا كانوا مجرد محطه في حياة بعض..ولإنهم مش شبه بعض مبيكملوش!..بس هنا لـ حكمه وهى إن ربنا بيعوضهم باللي شبهم وزيهم..وانا وانتي شبه بعض حتى ظروف حياتنا قريبه!..وأكيد ربنا كاتبلنا نقابل بعض من زمان!..بس كل حاجه بتيجي في ميعادها
داليدا(بعياط) :دي أحسن حاجه في حياتي إني قابلتك!
رشاد:انا اللي ربنا عوضني بيكي..بعد تعب سنين!..ممكن متعيطيش يا داليدا؟..ممكن؟
داليدا:حاضر
رشاد:حتى وانتي بتعيطي زي القمر!
••اتبدلت دموع داليدا..لـ ضحكه جميله!••
<عـنـد مـصـطـفـى>
••كانت عائشه قاعده جنبه على السرير وبتأكله••
عائشه:عامل ايه دلوقت يا مصطفى؟..الجرح لسه بيوجعك؟
مصطفى:ايوه
عائشه:الف سلامه عليك ياحبيبي
مصطفى:الله يسلمك..هو رشاد هيتجوز امتى؟
عائشه:تقريباً بعد 10 أيام
مصطفى:هو لحق..ده انا لو مكانه هاخدلي 20 سنه علشان بس انسى اللي حصلي!
عائشه:لانك كنت بتحبها..فا متأثر باللي عملته معانا كلنا..لكن رشاد مكنش بيحب دينا واحنا اللي غصبناه عليها..ده احنا كنا كل يوم عايشين في نار وعذاب نفسي انت نسيت؟
مصطفى:طب بلاش دينا..عارفين ان رشاد كان مغصوب عليها..طيب يوسف ابنه مش فارق معاه؟..ازاي واحد يبقى ابنه ضايع وهو رايح يتجوز من تاني ناحيه؟
عائشه:ياحبيبي انت نسيت اخوك في الاول كان تعبان ازاي بعد خطف يوسف؟..بس دي الحياه ولازم تتعاش..هيضيع من عمره كتير لو فضل قاعد مستني يوسف يرجع!.. هو يعني كان قاعد ساكت!..ده قدم كمية بلاغات وعمل محاضر بعدد شعر راسه وكل شويه كان في القسم!..من حقه يفرح شويه!..وبعدين داليدا مش هتفضل قاعده مستنياه لحد ما يحل مشاكله..ممكن لو رشاد كان فضل ساكت..كانت تضيع من ايده وتروح لحد تاني!
مصطفى:بس ياماما ده مش وقته المناسب..كان استنى شويه
عائشه:معلش خليه يفرح..وبكرا انت كمان تفرح زيه وربنا يعوضك بـ بنت الحلال اللي تصونك.. مروه دي مش شبهنا ولا زينا.. دي كلبة فلوس..تجري وراها جري..وأفوض أمري إليك يارب في مروه..حسبنا الله ونعم الوكيل فيها..دمرتلنا حياتنا من ساعة مادخلتها
مصطفى:ممكن ياماما لو سمحتي متجيبيش سيرتها تاني؟..انا مش طايق اسمع اسمها!
عائشه:خلاص يا مصطفى.. كل ياحبيبي وقوي جسمك علشان تاخد علاجك
مصطفى:مش عايز آكل!
عائشه:لازم تاكل علشان تخف..ده انا وقفت مخصوص اعملك الاكل ده وفي الآخر تكسف مامتك حبيبتك؟
مصطفى:مابقاش ليا نفس لـ حاجه..انا بجد مش مبسوط
عائشه:بكرا تروق وتحلى..و الظالم هياخد جزاءه..ده احنا في رحلة كما تدين تدان..والظالم مسيره يدوق من نفس الكاس اللي داق منه المظلوم!
مصطفى:مستني حقي يرجعلي ياماما!..ساعتها هانام مرتاح!
عائشه:هيرجع والله بس كل.. يلا ياحبيبي
مصطفى:حاضر
<عـنـد مـروه>
••كانت قاعده مع ضياء لاشين على السرير..وفجأه قامت وقفت قصاد المرايا وحطت ميك اب••
مروه(بسهوكه) :أحطلك روج أحمر ولا بينك؟
ضياء(بإبتسامه) :بحب الأحمر..بس هو مين اللي هيحطه انا ولا انتي؟
مروه(بتضحك) :انا طبعاً هو في راجل بيحط روج برضه؟
ضياء:بس انتي أي حاجه عليكي حلوه
مروه:حياتي انت ياضياء..بجد انا مستغربه ازاي مراتك كانت وحشه معاك اوي كده!
••ورجعت قربت منه تاني••
مروه:ده انت الحلاوه كلها..ازاي قلبها جابها تعمل فيك كل ده؟..حد يبقى معاه ضياء مره واحده ويعمل كده؟
ضياء:أصل المرحومه كانت عاميه..مابتشوفش..مع ضياء لاشين اللي يتبطر على النعمه مابتغورش من وشه لالالا.. هو ذات نفسه اللي بيغور من الدنيا كلهاااا..وده اللي انا عملته معاها
مروه(بتضحك) :بس انت مالك مِحلو والنهارده كده ليه على غير العاده؟
ضياء:عشان قصاد عيونك بس..عارفه يا مروه..انا من زمان كان نفسي أتجوز بنت وظوظه صغيره في السن زيك كده ههههه عشان تفضل طفله قصاد عينيا ومتكبرش بسرعه
مروه(بسهوكه) :انا يادوب بس أكبر من بناتك بسنتين تلاته..يعني من دور بناتك..وده اللي انا كان نفسي فيه..كنت عايزه اللي يعاملني اني بنته الصغيره مش مراته وده اللي انا لقيته معاك
ضياء:وانا معتبرك بنتي الصغيره يامروه
مروه:ماتبطل مروه دي بقى وتدلعني بما اني بنتك!
ضياء:يا مروتي هههههه
مروه:ههههه حلوه منك
<عـنـد سـامـي>
••راح عند أبوه في الورشه..وكان قاعد معاه••
سامي:مش انا لقيت شغل بس ايه بقى من الآخر!..10 ألاف في الشهر
ماهر:ازاي؟
سامي:شغل في محل موبايلات..وعارف عند مين؟
ماهر:مين؟
سامي:جمال ابن الحاجه جليله
ماهر:وانت روحتله امتى ولا عرفت ازاي؟
سامي:كنت معدي من الشارع قولت اعدي عليه..وجات سيرة الشغل فا قالي انه عايز حد..وقالي ماتيجي تشتغل معايا قولتله على البركه.. امال هتجوز ازاي؟
ماهر:تتجوز من ورث عمك طاهر الله يرحمه..ده سايب مبلغ انما ايه..يجوز عيله بحالها..هو احنا محتاجين شغل ومرمطه؟..خد الـ ٣ مليون..افتحلك بيهم مشروع
سامي:مانا خايف أفتح مشروع وأخسر.. مانا مش ضامن
ماهر:متحطش البيض كله في سله واحده..جرب بـ جزء..ويا يصيب يا يخيب
سامي:مش عارف ياحاج..سيبها بـ ظروفها..واهو زيادة الخير خيرين
ماهر:على رأيك..ده انا عايز أجهز صفاء أختك بـ أحسن حاجه..مش عايزها تبقى أقل من حد
سامي:ده انا شايفلك شوية معارض موبيليا انما ايه فاخر من الآخر..انا هخلي الواد رجب يجيبلها منهم دول هيخيطوه في مبلغ جامد بس مش كتير على صفاء..انا أختي يوم ماتتجوز لازم الناس تحكي وتتحكاكى عنها بس بالخير طبعاً
ماهر:وهو حد يقدر يجيب سيرتنا بحاجه وحشه؟..ده احنا ناس بريمو..ده كل اهل المنطقه بيحلفوا بينا
سامي:انا عايزك تسيبك من شغلانة الورشه دي وتشوفلك حاجه في العلالي..الورشه مبتأكلش عيش..انا عايزنا نعلى نعلى لحد مايبقى لينا فلل وقصور في كل حته
ماهر:ربك يسهل
••لقى حسناء بتتصل عليه••
سامي:الو ياأمي
حسناء:بقولك ياسامي انت فين؟
سامي:انا عند الحاج في الورشه
حسناء:طب حلو اوي..عايزاك تعدي على الست اللي اسمها أم خالد اللي في بيت عمك..كانت واخده مني حله كبيره..ومرجعتهاش لحد دلوقت وبالمره خد منها علبة السمنه الـ٣ كيلو..انت عارف خطوبة اختك قربت وعايزين نجهز الأكل من دلوقتي
سامي:مانتوا متعرفونيش غير في المصالح وبس
حسناء:قلبي هيفضل غضبان عليك إن كسرتلي كلمه..ان مطلبش من ابني هطلب من مين؟.. من الجيران؟
سامي:يادي النيله الاسطوانه اشتغلت..طيب ياأمي هخلص كام مشوار كده وهعدي عليها..مرضيه؟
حسناء:مرضيه
سامي:سلام
ماهر:ايه في ايه؟
سامي:الحجه عايزه مني شوية حوارات..هعدي أخلص مشاويري وهعدي على الست اللي اسمها أم خالد دي
ماهر:طب ماتجيبلي معاك الشيشه اللي في قهوة الحاج محمد
••راح سامي قايم وهو متعصب من طلباتهم••
سامي:لا بقولكم ايه هو أبو بلاش كتر منه؟..انا ماشي قبل ماصفاء تتصل عليا وتطلب مني حاجات هى كمان.. سلام
••ومشى..راح ماهر نادهه بصوت عالي••
ماهر:انا لسه مخلصتش كلامي!
<عـنـد دالـيـدا>
••راحت هى ورشاد وفريده..الشقه اللي في بيت اهله في وجود مامته واخته طبعاً••
رشاد:انا عايز الحيطه دي..باللون البني الفاتح
المهندس:طب ايه رأيك نخلي الريسيبشن كله أبيض ماعدا الحيطتين دول؟
رشاد:زي ماحضرتك تشوف.. انت برضه ادرى مننا في الألوان
المهندس:سيبوا نفسكم خالص وبإذن الله النتيجه هتكون مبهره
داليدا:خلاص يا بشمهندس احنا رامين ثقتنا فيك
المهندس:تمام وألف مبروك مقدماً
داليدا ورشاد:الله يبارك فيك
عائشه:ربنا يهنيكم يا رشاد يابني،وأشوفكم من السعداء
رشاد:يارب ياماما
••وأثناء ما هما واقفين..لقيت داليدا..خالتها بتتصل••
فريده:مين؟
داليدا:دي خالتو
••وخدت الموبايل وراحت بعيد••
داليدا:الو يا خالتو
صابرين:عامله ايه ياداليدا؟
داليدا:الحمدلله
صابرين:يدوم الحمد..خلاص استقريتوا ان كتب الكتاب والفرح الجمعه الجايه اللي بعدها؟
داليدا:ايوه زي ماهو اتفق مع اونكل عصام..انا بس طالبه من حضرتك خدمه
صابرين:اؤمريني ياحبيبتي..عينيا ليكي
داليدا:تسلملي عينيكي..انتي عارفه ان انا مينفعش اروح بيت بابا..علشان المشاكل اللي بيني وبين عمي وعياله
صابرين:ايوه عارفه
داليدا:في ورق لـ فريده اختي..عايزاكي تجيبيه من دولاب بابا وتبقي تعديه عليا في اي وقت او انا اللي اعدي عليكي
صابرين:يانهاري بس كده؟..طب قوليلي ورق ايه ده؟
داليدا:الشهاده الابتدائيه وكمان في ورق ليا وحاجات مهمه.. عموماً هما كلهم متجمعين مع بعض.. انتي كل اللي عليكي هتجيبي الكيس من الدولاب وانا هبقى اعدي عليكي آخده
صابرين:حظك ان انا كنت لسه نازله مع غاده..رايحين للدكتور كويس انك قولتي عشان اعدي بالمره
داليدا(بخوف) :ليه غاده مالها؟
صابرين:عندها حساسيه بقالها كام يوم وكل ماتاكل حاجه الحساسيه تزيد..ودناها لـ دكتور ومجابش نتيجه..فا هنروح لواحد تاني بيقولوا شاطر وبيجيب نتيجه
داليدا:ألف سلامه عليها، بإذن الله هتخف وتبقى كويسه
صابرين:الله يسلمك ياحبيبتي..طب انا معايش المفتاح هدخل ازاي؟
داليدا:متقلقيش انا عامله حسابي وسايبه نسخه تحت عتبة الباب
صابرين:تحت المشايه؟
داليدا:لالا تحت عتبة الباب الرخام..أصلها مكسوره بس انا مثبتاها على خفيف وشايله تحت منها المفتاح.. المهم رجعيه زي ما كان عشان محدش ياخد باله
صابرين:ماشي ياداليدا..هعدي اجيبلك الورق
داليدا:ماشي ياخالتو..شكراً تعبتك معايا
صابرين:لا متقوليش كده ده انتي بنتي الغاليه
داليدا:ربنا يخليكي..مع السلامه
صابرين:مع سلامة الله
••ورجعت داليدا عند رشاد وفريده وعائشه••
عائشه:ربنا معاكم
المهندس:يارب
<عـنـد صـابـريـن>
••خدت غاده بنتها وراحوا بيت داليدا••
صابرين:على جنب ياحاج
••وقف السواق ونزلوا من التاكسي ودفعوا..وهما طالعين شافتهم رادار المنطقه "أم خالد"..لحد ماطلعت من شقتها واستنتهم على الباب••
ام خالد:على مهلكم..مش انتي خالة داليدا برضه؟
صابرين:ايوه عرفتي منين؟
أم خالد:شوفتك قبل كده جايالهم..وكمان فيكي شبه من منى الله يرحمها
صابرين:ماشاءالله على قوة الملاحظه عندك
ام خالد:هى داليدا رجعت هى وأختها؟
صابرين:لا داليدا سابت الشقه مابقتش مرتاحه فيها
ام خالد:أمال انتي جايه لمين مادام هى مشيت؟
صابرين:أصل داليدا طالبه مني شوية أوراق ليها ولأختها
ام خالد(بخبث) :طب وهى مجاتش تجيبها ليه بنفسها؟..ولا كانت بعتت سامي هو اللي يجيبها
صابرين:لا سامي ايه ما خلاص طلقها..وربنا عوضها باابن الحلال اللي يستاهلها
ام خالد(مصدومه) :هى داليدا اتجوزت تاني؟
صابرين:لا لسه متجوزتش..بس خلاص فرحها قرب.. ادعيلها ربنا يكملها على خير
ام خالد:داعيالها من كل قلبي والله...ربنا يفرحك ويسعدك ياداليدا يابنت منى..اما الفرح امتى؟
صابرين:ان شاء الله الجمعه الجايه اللي بعدها..هي مقالتلكيش؟
ام خالد:لا والنعمه ما قالتلي..كده يا داليدا متعزميش جارتك أم خالد.. ده احنا كان بينا كل خير..ده انا كان نفسي ومنى عيني احضر فرحها ده انا معتبراها بنتي
صابرين:طب خلاص اعتبري ان انا عزمتك..مانا وداليدا واحد برضه..إن شاء الله تيجي تنورينا
ام خالد:الله يخليكي..طب الفرح هيبقى فين؟
صابرين:هو في 6 أكتوبر..اسمه ايه ياغاده انا ناسيه اسمه!
غاده(بتفتكر) :اسمه كان على بالي..اسمه...ااه..اسمه نوفوتيل
صابرين:لا استني بقى اكتبيهولي في ورقه الا الاسم تقيل على لساني
غاده:حاضر
••دخلت ام خالد جابت ورقم وقلم واديتهم لـ غاده راحت كاتب العنوان واديتهولها••
ام خالد:يلا الف مبروك عقبال بنتك
صابرين:الله يبارك فيكي
••وطلعت هى وبنتها وجابوا المفتاح وفتحوا ودخلوا..وشويه وجه سامي وخبط على شقة أم خالد فا خرجت••
ام خالد:ازيك ياسامي
سامي:تمام..هاتي الحله بتاعت أمي..وبرطمان السمنه
ام خالد:سمنة ايه ملكوش سمنه هنا!
سامي:بقولك ايه متخلنيش اتغابى عليكي وانتي في السن ده..أمي دافعالك 600 جنيه حق السمنه..وانتي قولتيلها هتبعتيها ومبعتيش حاجه!
ام خالد:اه خلاص افتكرت..ايوه انتوا ليكوا عندي سمنه..ده البرطمان مركون عندي لحد ما قرب يزنخ
••وسابته ودخلت جوا••
سامي(مستغرب) :يزنخ ايه؟..الست دي عبيطه ولا ايه حكايتها!
<فـوق عـنـد صـابـريـن>
••كانت بتدور على الورق..لحد ما لقيته••
صابرين:خدي امسكي في ايدك يا غاده
غاده:طيب يلا علشان منتأخرش على ميعاد الدكتور!
صابرين:حاضر يلا بينا
••وخرجوا من الشقه وقفلوها ورجعوا كل حاجه زي ماهي..ونزلوا كانت أم خالد بتدي لـ سامي الحله والسمنه••
ام خالد:خد كله كان في الأمانات عندي
سامي:طب اصبري
••وشال الحاجه ولما صابرين وصلت عندهم••
ام خالد:ايه جيبتوا الورق اللي انتوا عايزينه؟
صابرين:ايوه الحمدلله..انتي معزومه بقى متنسيش
ام خالد:مع انها مجاتش من داليدا ذات نفسها بس انا مش زعلانه منها..وهاجي أفرح معاكم ان شاء الله
صابرين:تيجي تنورينا ياحجه.. يلا السلام عليكم
ام خالد:وعليكم السلام ورحمة الله وبركاته
••وبعد مانزلوا كان سامي متنح••
ام خالد:ايه مالك؟
سامي:داليدا مين؟
ام خالد(بتضحك) :هو انا مقولتلكش؟... هيهيهيه...اصل داليدا هتتجوز الجمعه الجايه اللي وراها
سامي:داليدا مين؟؟
ام خالد:داليدا بنت عمك هو في كام داليدا غيرها؟