رواية مزاولة حب الفصل الخامس والعشرون25والسادس والعشرون26بقلم دودو محمد
اشرقت شمس صباح يوم جديد بنورها الساطع فى سماء القاهره لتبدء تمارا بفتح عيونها على صوت تليفونها بصت فيه لاقته ياسين قامت قعدت على السرير وردت عليه وقالت
تمارا :- صباح الخير يا ياسين
ياسين :- صباح الورد والفل والياسمين على احلى عيون فى الدنيا دى بحالها
تمارا :- ابتسمت وقالت كل ده
ياسين :- ده كده ولا حاجه انتى الكلام الحلو كله ميكفيش عيونك يا قلبى
تمارا :- شكرآ
ياسين :- يلا قومى اجهزى علشان هاجى اخدك
تمارا :- تخدنى فين
ياسين :- اليوم ده بتاعى انا وانتى هنقضيه كله مع بعض
تمارا :- طيب والشغل
ياسين :- بلاش النهارده يا تمارا انا عايز نقضى اليوم النهارده مع بعض
تمارا :- اتنهدت وقالت ماشى يا ياسين انا هاخد النهارده اجازه
ياسين :- بموت فيكى يا تمارا يلا جهزى نفسك وانا هكون عندك باى
تمارا :- قفلت السكه وقامت من على سريرها وراحت بصت من الشباك على يوسف لاقته قاعد بيشرب قهوته أبتسمت بحب واتنهدت بوجع ودخلت الحمام وبعد وقت خرجت أدت فرضها وغيرت هدومها ونزلت تحت وقالت صباح الخير
الكل :- صباح النور
تمارا :- بابا انا خارجه النهارده مع ياسين مش هروح الشغل
عماد :- ماشى يا بنتى بس خلى بالك على نفسك
تمارا :- حاضر
سميه :- حافظى على نفسك واوعى تخليه يقرب منك فاهمه
تمارا :- ايه اللى انتى بتقوليه ده يا ماما هو انا صغيره علشان اعمل كده انا متربيه كويس وبخاف ربنا
سميه :- انا من واجبى كأم انصحك واخاف عليكى
تمارا :- ربنا يخليكى يا امى بس انتوا عرفتوا تربوا متقلقيش وفى الوقت ده جات الشغاله بلغت تمارا أن ياسين مستنيها بره قامت وقفت وقالت يلا انا همشى سلام وخرجت عند ياسين وابتسمت ليه وقالت انا جاهزه
ياسين :- مسك ايديها ولسه هيبوسها من خدها
تمارا :- رجعت لوراه وقالت انت بتعمل ايه يا ياسين
ياسين :- عادى يا تمارا بسلم عليكى
تمارا :- تسلم عليا بالايد وبس احنا مش مكتوب كتابنا علشان تسلم عليا كده
ياسين :- انا اسف متزعليش مكنتش اقصد ازعلك
تمارا :- حصل خير بس ابقى خد بالك من تصرفاتك بعد كده
ياسين :- ابتسم ليها وقال حاضر يلا بينا
تمارا :- يلا
ياسين :- امال فين عربيتك
تمارا :- عطلانه بقالها يومين عند المكانيكى
ياسين :- امممم ماشى تعالى نركب تاكسى
تمارا :- اوك يلا وخرجوا الاتنين مع بعض من الفيلا تحت نظرات يوسف ليهم
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى بيت انس
صحيت ندى من نومها على صوت تليفونها بصت فيه لاقته مالك ابتسمت وردت عليه وقالت
ندى :- صباح الخير
مالك :- صباح الهنا يا قلبى واحشتينى اوى هموت واشوفك
ندى :- اعمل ايه بس انس مش راضى ينزلنى الشغل
مالك :- طيب بالنسبه أن هو قال هيسأل عليا ايه كل ده ده انا لو مسجل خطر مش هيقعد كل ده يسأل عليا
ندى :- ماما سألته امبارح قال بيعمل عليك تحريات بدقه
مالك :- تحريات ايه هو انا جاى اتقدم وواخد مطوه فى وشى اخوكى ده سبحان من صبرنى عليه لحد دلوقتى
ندى :- مش قدامنا حاجه غير الصبر
مالك :- ادينى متنيل على عينى وصابر اياكش بس يوافق بعد كل ده
ندى :- ضحكت وقالت إن شاءالله هيوافق
مالك :- يارب يلا هسيبك علشان عندى شغل
ندى :- اوك باى
مالك :- باى
ندى :- قفلت السكه وقالت ربنا يهديك يا انس يا ابن ام انس وتوافق بقى وفى الوقت ده دخل انس عليها وقال
انس :- هاتى رقم اللى اسمه مالك
ندى :- ها ر.ر.رقمه
انس :- ايه مش معاكى
ندى :- احم ل.ل.لاء معايا ب.ب.بس انت عايزه ليه
انس :- ملكيش دعوه هاتى الرقم اخلصى
ندى :- خد اهو
انس :- سجل الرقم عنده وخرج وسابها
ندى :- ربنا يستر قلبى مش مطمن وقامت خرجت من اوضتها لاقت امها قاعده راحت قعدت جمبها وقالت ماما متعرفيش انس اخد رقم مالك ليه
ام ندى :- هيرد عليه وهيتفق معاه على ميعاد يجى يتقدم ليكى
ندى :-بفرحه لاء بجد يعنى انس خلاص وافق عليه
ام ندى :- ضحكت وقالت ايوه
ندى :- باستها فى خدها وقالت ربنا يخليكى ليا يا احلى واجمل ام فى الدنيا
ام ندى :- ضحكت وقالت ويخليكى ليا يا حبيبتى
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى الشركه
فى مكتب البنات
قعدت يارا على المكتب الخاص بتاعها وبصت على المكتب بتاع تمارا وقالت
يارا :- هى تمارا مش جايه النهارده ولا ايه
رحمه :- لاء دخلت سألت عليها امها قالت انها خرجت النهارده مع ياسين
يارا :- المكتب بقى وحش اوى من غير تمارا وندى وحشتنى اللمه بتاعتنا وخفة دم البت ندى اللى كنا مش بنبطل ضحك عليها
رحمه :- طيب ما انتى كلها اسبوع وهتتجوزى وندى كمان هتتجوز وتمارا هتبقى مشغوله مع خطيبها وهبقى انا لوحدى
يارا :- يا عبيطه احنا عمرنا ما هنبعد عن بعض محدش يقدر يفرقنا مهما حصل وبعدين يا ست رحمه وحيده ازاى ها امال بدر اخويه بيعمل ايه
رحمه :- اتنهدت وقالت بدر ربنا يعينه على اللى هو فيه من يوم ما انس اتقدم ليكى واتفق على الجواز اخر الشهر وهو مطحون فى الشغل ومش بيعرف يكلمنى خالص احنا ساعات بنقعد بالايام منكلمش بعض
يارا :- بدر صعبان عليا اوى شال شيله تقيله عليه مبقاش ينام خالص اي شغل يقابله فى سكته يشتغله علشان يقدر يجهزنى حاولت كتير اقنعه أنه يريح شويه ونأجل الفرح مش راضى
رحمه :- بحب بدر راجل وبيحب يلتزم بالاتفاق اللى اتفق عليه علشان كده بيضغط على نفسه علشان ينفذ كلامه
يارا :- ربنا يرحمك يا ماما لو كانت عايشه كانت هتبقى جمبى فى اهم لحظات حياتى
رحمه :- احنا جمبك وعمرنا ما هنسيبك لوحدك
يارا :- انا تقريبآ بخرج من الشغل كل يوم بنزل اشترى الحاجه اللى نقصانى بس مش عارفه اللى انا جبته ده صح ولا ايه
رحمه :- انا هروح معاكى بعد الشغل ونشوف ايه اللى ناقص وايه اللى خلص بس انتى عامله ايه مع البأف ده
يارا :- هتصدقى لو قولتلك أنه متكلمش معايا ولا مره من يوم الخطوبه حتى لما نزلت اشترى فرش الشقه سابنى ماشيه مع أمه ومعبرنيش بولا كلمه انا حتى معرفش شكل الشقه اللى هعيش فيها ايه بعد ما خلصت وادهنت
رحمه :- انا لو مكانك كان زمانى قاتلته من زمان يخربيت سنينه ابو الهول ده انا مش عارفه يوم الدخله هيعمل معاكى ايه هيبوسك بالمراسله ولا هيعمل ايه بالظبط
يارا :- انا اصلا مش متخيله نفسى وانا فى حضنه يا نهار اسوح اسكتى انا مجرد التفكير بس بحس أن قلبى هيوقف عليا ده غير أن هو حالف ليطلع عينى بعد الجواز وانا عملت فيها قويه اوى واتحديته انا خايفه اوى والله من اللى هيحصل معايا
رحمه :- مش اللعب ما بينكم بقى على المكشوف وهو اللى اتحداكى
يارا :- ايوه
رحمه :- اشطا يبقى خلى اللعب فى ملعبك انتى
يارا :- ازاى يعنى
رحمه :- امشى معاه بنظام شوق ولا دوق يعنى البسى الهدوم المغريه كلها اللى عندك وخليكى قدامه ملكة جمال وفى نفس الوقت متخلهوش يلمسك كل ما يحاول يقرب منك ابعدى انتى وشوفى النتيجه
يارا :- ب.ب.بس انا اتكسف البس حاجه مكشوفه قدامه
رحمه :- بت انتى عندك خال اهبل ده جوزك يا عبيطه على سنة الله ورسوله حلالك ومسموح تقعدى قدامه بأى حاجه يبقى البسى وادلعى وخليه هو يولع
يارا :- يخربيت افكارك السم دى بتجبيها منين
رحمه :- بضحك ربنا يقدرنى على فعل الخير
يارا :- ضحكت وقالت ده لو انس عرف اللى انتى بتقوليه ده هيمحيكى من على وش الارض
رحمه :- وانا سعتها ولا اعرفك مع نفسك يا حبيبتى العمر مش بعزقه
وقعدوا الاتنين يضحكوا
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
عند تمارا وياسين
نزلوا عند مطعم ودخلوا قعدوا وطلبوا الاكل وبص ياسين لتمارا وقال
ياسين :- مسك ايد تمارا وقال انا مش قادر اصدق نفسى انك بقيتى خطيبتى وقاعده معايا انا بحبك اوى يا تمارا عشقتك من اول مره شوفتك فيها حسيت فيكى بحاجه بتشدينى ليكى كلامك ضحكك حركاتك كل حاجه فيكى عشقتها ده انا مش بقعد فى بيتنا غير فى المكان اللى انتى كنتى قاعده فيه لما جيتى عندنا
تمارا :- ابتسمت ليه بتوتر وسحبت ايديها من أيده وقالت ا.ا.انا يمكن هظلمك معايا شويه لحد ما اتقبل فكرت أن انا خطيبتك بس اكيد هتقبل ده بعدين وهبادلك نفس شعورك بس استحملنى شويه يا ياسين
ياسين :- ابتسم ليها بحب وقال براحتك يا تمارا انا جمبك وهستحملك العمر كله ومش مستعجل عليكى فى حاجه وانا متأكد أن هقدر اخليكى تحبينى
تمارا :- ابتسمت ليه وقالت انت طيب اوى يا ياسين وبجد انا محظوظه بيك
ياسين :- انتى اللى جميله اوى يا تمارا وعيونك حلوين علشان شيفانى بيهم كده
تمارا :- ابتسمت ليه ومردتش عليه وفى الوقت ده الاكل جه على الترابيزه بصت ليه تمارا وقالت انا جعانه اوى مش عارفه ليه كده
ياسين :- كلى الاكل ده كله ولو عايزه تانى اجبلك والله
تمارا :- ضحكت وقالت لاء مش لدرجاتى انا هاكل طبقى وهشبع وبدأت تاكل
ياسين :- فضل يبص عليها وهى بتاكل بحب
تمارا :- بصت ليه وقالت انت مالك بتبص ليا كده ليه ما تاكل
ياسين :- مش هاين عليا انزل عينى من عليكى
تمارا :- ابتسمت ليه وقالت هتبقى انت الخسران الاكل هيبرد ومش هيكون ليه طعم كل يلا
ياسين :- ابتسم ليها وبدء ياكل هو كمان وبعد وقت خلصوا اكل وحاسب ياسين على الاكل وخرجوا هما الاتنين من المطعم وبص ياسين لتمارا ومسك ايديها
تمارا :- اتوترت وابتسمت ليه وشدت ايديها وعملت نفسها بتشوف حاجه فى شنتطها
ياسين :- اتنهد وقال بدورى على حاجه يا تمارا
تمارا :- ها ا.ا.اه بشوف الفون بتاعى
ياسين :- اوك يلا بينا
تمارا :- ي.ي.يلا ومشوا مع بعض
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى الشركه
فى مكتب يوسف
دخل مالك يجرى عليه وحضنه بفرحه وقال
مالك :- اخيرآ اخوها وافق ورايح بكره اخطبها
يوسف :- بأستغراب هى مين دى
مالك :- ندى يا يوسف اخوها لسه مكلمنى وقالى أنه مستنينى بكره علشان نتفق على كل حاجه
يوسف :- بفرحه مبروك يا صاحبى
مالك :- الله يبارك فيك يا جو اعمل حسابك انك انت وابوك هتيجوا معايا بكره
يوسف :- اكيد طبعآ ورجع قعد على الكرسى
مالك :- مالك يا يوسف لسه برضه زعلان علشان خطوبة تمارا
يوسف :- يا مالك تمارا مش راضيه تصدق أن البنى ادم ده مش كويس ده بنفسه قايل ليا أن هو عايز جسمها
مالك :- تمارا مش صغيره وتقدر تحمى نفسها كويس اوى المهم ركز انت فى اللى بتعملوا وقولى وصلت لايه
يوسف :- على خطتنا يا مالك تولد بس وكل حاجه هكشفها
مالك :- اكبر غلطه عملتها فى حياتك يا يوسف وبتدفع تمنها دلوقتى
يوسف :- عمرى ما كنت أتخيل انها تطلع كده يا مالك يلا محدش بيتعلم ببلاش
مالك :- ربنا يريح قلبك يا صاحبى يلا هروح اشوف شغلى انا جيت بس اشركك فرحتى
يوسف :- ربنا يسعدك يا مالك
مالك :- خرج وقفل الباب وراه
يوسف :- رجع لوراه وقال وايه تانى هيحصلك يا يوسف غلط زمان وبدفع التمن دلوقتى وبدأ يشوف شغله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
انتهى وقت العمل وروحت رحمه مع يارا البيت ودخلوا الاتنين على الاوضه بتاعة يارا واترمت على السرير وقالت
رحمه :- انا مش قادره افتح عينيا امشى بت اعمليلى واحد نسكافيه علشان افوق واركز معاكى
يارا :- وحياة امك حد قالك أن انا خدامة أهلك ما تتحركى يا اختى واعملى لنفسك
رحمه :- علشان خاطرى يا يويو مش قادره وربنا
يارا :- عاااا انتى ايه جابك معايا هوف وسابتها وراحت على المطبخ تعمل ليها واحد نسكافيه
رحمه :- غمضت عينيها وراحت فى النوم وفى الوقت ده وصل بدر ولاقه الباب مفتوح بتاع اوضت يارا فكر أنها جوه لوحدها دخل وبص لاقه رحمه نايمه على سرير يارا دخل وقعد على حرف السرير وابتسم ليها وهى نايمه ومشى أيده على وشها
رحمه :- حست بأيد على وشها فتحت عينيها بصدمه وقامت قعدت وقالت ب.ب.بدر انت هنا من امته
بدر :- ابتسم ليها وقال لسه داخل دلوقتى
رحمه :- مش عارفه عينى راحت فى النوم ازاى
بدر :- تعرفى انك حلوه اوى وانتى نايمه
رحمه :- رجعت شعرها وراه ودنها وبصت على الارض بكسوف
بدر :- واحشتينى اوى
رحمه :- لو كنت واحشتك بجد كنت كلمتنى فى الفون اطمنت عليا انت بقالك اكتر من تلت ايام مكلمتنيش
بدر :- قام وقف واتنهد وقال غصب عنى والله يا رحمه موضوع جواز يارا ده واخد كل وقتى بحاول اشتغل اى حاجه علشان اقدر اجيب ليها كل اللى ناقصها
رحمه :- قامت وقفت وقالت عارفه والله وعذراك ومش زعلانه منك
بدر :- اخلص بس من جواز يارا وارجع اتكلم معاكى علطول زى الاول
رحمه:- أن شاءالله
بدر :- مسك ايديها وقال طيب انا مش واحشك
رحمه :- لاء طبعآ واحشتينى واوى كمان
بدر :- ولما واحشتك مكنتيش بتيجى ليه مع يارا علشان اشوفك
رحمه :- ما يارا مشغوله وبتنزل تشترى الحاجه بتاعتها وانا كنت مشغوله مع تمارا علشان خطوبيتها
بدر :- عقبالنا احنا كمان لما ننشغل بتحضير جوازنا
رحمه :- بدر كنت عايزه اقولك حاجه
بدر :- قولى يا قلبى
رحمه :- ا.ا.انا ممكن اساعدك فى جواز يارا
بدر :- ساب ايديها وقال ازاى يعنى
رحمه :- يعنى شوف محتاج مبلغ قد ايه وانا هدهولك ليك
بدر :- صدقه يعنى
رحمه :- لاء والله العظيم مقصدش انا قصدى تخدهم سلف وبعد كده ابقى اشتغل وردهم ليا تانى براحتك
بدر :- انتى شيفانى واحد رخيص اوى كده يا رحمه
رحمه :- لاء انا شيفاك احسن راجل فى العالم بس انا صعبان عليا تعبك ده، انت خسيت من قلة النوم وشغلك ليل ونهار من غير اكل انا خايفه عليك يا بدر
بدر :- بص ليها مده وسابها ومشى
رحمه :- طلعت تجرى وراه وقالت بدر يا بدر
يارا :- وهى جايبه النسكافيه وجايه قالت فيه ايه يا رحمه وبدر راح فين
رحمه :- بدر زعل منى ونزل تانى يا يارا
يارا :- زعل منك ليه هو ايه اللى حصل
رحمه :- ع.ع.علشان عرض عليه اساعده فى جوازك
يارا :- ليه تعملى كده يا رحمه ليه بدر اخويا حساس اوى واى كلمه بتزعله
رحمه :- والله العظيم كان قصدى اخفف عنه التعب شويه مقصدش اجرح مشاعره
يارا :- اتنهدت وقالت طيب خدى اشربى النسكافيه وهو دلوقتى يهدا ويرجع
رحمه :- قعدت على الكنبه وقالت مش عايزه حاجه
يارا :- أهدى يا رحمه بدر طيب ومش بيعرف يزعل من حد شويه وهتلاقيه راجع
رحمه :- مش هعرف اعمل اى حاجه وهو زعلان منى يا يارا
يارا :- قومى بس و تعالى يلا معايا نشوف اللى ورانا
قامت رحمه ودخلت الاوضه مع يارا
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى فيلا حسام
دخل يوسف الفيلا وحدف المفاتيح على الترابيزه وقعد على الكنبه وحط راسه على كتف أمه
سميحه :- مالك يا حبيبى
يوسف :- مفيش يا ماما تعبان بس من الشغل
سميحه :- طيب ادخل يا حبيبى غير هدومك وتعال كل
يوسف :- لاء مليش نفس انا هطلع اريح شويه وقام وقف وقال امال فين الهانم
سميحه :- قصدك ارين
يوسف :- ايوه
سميحه :- راحت النادى علشان زهقانه
يوسف :- ماشى وساب امه وطلع على اوضه غير هدومه ونام على السرير وقعد يفكر فى تمارا وقلق عليها مسك تليفونه واتصل بيها وانتظر ردها
تمارا :- ايوه يا يوسف
يوسف :- عامله ايه
تمارا :- تمام الحمدالله
يوسف :- انتى فين كده
تمارا :- انا مع ياسين فيه حاجه
يوسف :- لاء انا بس بطمن عليكى علشان منزلتيش الشغل النهارده
تمارا :- انا كويسه بس النهارده مقضياه مع ياسين علشان كده مروحتش الشغل
يوسف :- هتغيبى
تمارا :- مش عارفه لسه عايز حاجه
يوسف :- لاء خلى بالك على نفسك بس
تمارا :- اوك باى
يوسف :- قفل السكه وداس على التليفون جامد بأيديه وقال لازم أبعده عنك قبل ما يأذيكى لازم
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
عند تمارا وياسين
تمارا قفلت السكه مع يوسف وبصت لياسين لاقته متعصب قالت
تمارا :- مالك يا ياسين
ياسين :- مفيش امشى يلا
تمارا :- استنا هنا ممكن افهم مالك
ياسين :- انتى شايفه اللى حصل ده شئ طبيعى هو قصد يتصل بيكى وانتى معايا علشان يعصبنى
تمارا :- لاء يا ياسين هو ميقصدش هو بس بيسأل انا ليه مروحتش الشغل النهارده
ياسين :- لاء يا تمارا هو شيفنا واحنا ماشين مع بعض الصبح هو عايز ينكد علينا
تمارا :- طيب خلاص متزعلش وانا هفهمه ميكلمنيش وانت معايا
ياسين :- ميتكلمش معاكى اصلا ولا انا معاكى ولا انا مش معاكى
تمارا :- ياسين انا سبق وقولتلك انا ويوسف اصدقاء وياريت تتقبل ده وانا حفاظآ على مشاعرك هقوله ميتكلمش معايا وانت موجود لكن غير كده مش هيحصل
ياسين :- افهمى يا تمارا انا بحبك وبغير عليكى
تمارا :-خلاص بقى يا ياسين وياريت يلا بينا أنا تعبت وعايزه اروح
ياسين :-دلوقتى ؟! لسه بدرى
تمارا :- معلش عايزه اروح
ياسين :- اللى يريحك ووقف تاكسى وراحوا على الفيلا وبعد وقت وصلوا ونزلوا من التاكسى وحاسب ياسين ولسه هيدخلوا
يوسف :- تمارا يا تمارا
تمارا :- غمضت عينيها ووقفت وبصت لياسين ورجعت بصت على يوسف وقالت ا.ا.ايوه
يوسف :- اتأخرتى كده ليه
ياسين :- وانت مالك هى خطيبتك ولا خطيبتى
يوسف :- انا موجهتش ليك الكلام انا بكلم تمارا
ياسين :- وهى مش واقفه مع خروف هى واقفه مع خطيبها وبعد كده ملكش دعوه بيها فاهم
يوسف :- تمارا قولى لشخص ده يحترم نفسه علشان معرفهوش قيمته
ياسين :- انا عندك اهو ورينى هتعمل ايه
يوسف :- لسه هيروح عنده
تمارا :- وقفت قصاد ياسين وقالت ممكن بعد اذنك ملكش دعوه بيه وبعدين ياسين عنده حق مش من حقك تسألنى اتأخرت ليه وهو معايا وياريت اللى قال عليه ياسين تنفذه
يوسف :- تمارا ايه اللى انتى بتقوليه ده
تمارا :- اللى انت سمعته يا يوسف ياسين من حقه يغير عليا وياريت ملكش دعوه بينا بعد كده
ياسين :- بص بتحدى ليوسف وضحك ليه بأستفزاز
يوسف :- تمارا البنى ادم اللى معاكى ده شيطان انا خايف عليكى هو مش بيحبك زى ما قالك هو عايز
تمارا :- قطعته وقالت مليون مره اقولك انا حره وانا واثقه فى ياسين لابعد الحدود اتفضل بقى ابعد عن حياتنا
يوسف :- تمارا ارجوكى اسمعى كلامى
تمارا :- مسكت ايد ياسين وقالت يلا بينا يا ياسين سيبه يتكلم مع نفسى
ياسين :- ابتسم وقال يلا يا حبيبتى وبص ليوسف من فوق لتحت ومشوا
يوسف :- بص على أيديهم وهما ماسكين بعض وخبط على الباب بأيديه بعصبيه وقال بلاش عند يا تمارا ارجوكى اسمعينى
ياسين :- وقف على الباب عند فيلا تمارا وقال بحب انا فرحان اوى بالكلام اللى سمعته ده يا تمارا وانا بوعدك اكون قد الثقه دى يا قلبى
تمارا :- ابتسمت ليه بتوتر وقالت ا.ا.ان شاءالله تصبح على خير
ياسين :- وانتى من أهله
تمارا :- سابته وطلعت على اوضتها
ياسين :- بص عليها وهى ماشيه وبعد ما أتأكد انها دخلت من الباب مسك تليفونه وطلب رقم وانتظر الرد عليه وقال انا موافق على كلامك وجاهز ليه وسمع الرد وقفل السكه وبص على فيلا يوسف ووقف تاكسى ومشى على بيته
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى بيت بدر ويارا
رجع بدر على البيت ودخل بص على اوضت يارا سمع صوت رحمه لسه جوه اتنهد وقعد على الكنبه ونام من غير ما يحس وبعد وقت خرجت رحمه ويارا من الاوضه واتفاجئوا ببدر نايم على الكنبه راحت رحمه عنده ونزلت على ركبتها قصاده ومشيت ايديها على وشه وقالت
رحمه :- بدموع حقك عليا يا بدر انا اسفه
بدر :- حس بأيد على وشه فتح عينه وقام قعد وقال انا نمت ازاى وبص لاقه رحمه دموعها نازله منها اتنهد ومد أيده ومسح دموعها وقال ممكن بلاش دموع
رحمه :- طيب انا اسفه مكنتش اقصد ازعلك
بدر :- وقف ووقف رحمه وقال انتى بدموعك دى بتزعلينى اكتر
رحمه :- طيب خلاص مش هعيط مش زعلان منى
بدر :- ابتسم ليها وقال مقدرش ازعل منك يا رحمه
رحمه :- وانا مقدرش على زعلك منى يا بدر
يارا :- وانا مقدرش على المحن بتاعكم ده
رحمه :- ضحكت وقالت متغاظه ليه علشان ابو الهول مش بيعمل معاكى كده
يارا :- اللهى يكسروا دماغه دى يارب وتنفك عقدة لسانه ياااااارب
رحمه :- يااااارب يا اختى يلا انا لازم امشى الوقت أتأخر واعملى حسابك أن احنا هنروح بكره بعد الشغل نجيب الحاجه اللى اتكتبت فى الورقه اللى معاكى دى
يارا :- اوك
بدر :- يلا تعالى اوصلك
رحمه :- لاء خليك انت تعبان انا هروح
بدر :- مينفعش اسيبك تمشى دلوقتى لوحدك يلا امشى
رحمه :- ابتسمت ليه وقالت يلا ونزلوا الاتنين مع بعض وراح بدر يوصلها
يارا :- هيييح يقطع الحب وسنينه امته يا ابو الهول هتكون رومانسى معايا بقى ولسه هتدخل اوضتها جرس الباب رن بصت على الباب وقالت ده مين ده اللى جاى لينا دلوقتى وراحت فتحت الباب ووقفت مصدومه وقالت ا ا انت
انس :- ايه مكنتيش حابه تشوفى وشى
يارا :- ا.ا.انت جاى دلوقتى ليه
انس :- لسه هيدخل
يارا :- وقفت قصاده وقالت م.م.مش هينفع تدخل محدش موجود فى البيت مش المفروض تتصل تستأذن قبل ما تيجى ولا حتى دى مستكبر تعملها وتستأذن
انس :- انا مش جاى اشاهد جمال حضرتك ولا جاى اشوفك علشان واحشتنى وهموت عليكى انا جاى اخد منك الاوراق اللى هديها للمأذون علشان كتب الكتاب
يارا :- هوف ده مش كتب كتاب دى جنازه اقف هنا ثوانى وسابته ودخلت الاوضه عندها
انس :- اتنهد بغيظ وقال زيدى حسابك معايا يا يارا
يارا :- جات وقالت اتفضل خد شوف كده
انس :- اخد منها الورق وقال ناقص صوره
يارا :- هما دول اللى عندى
انس :- بص ليها بغيظ ولسه هيمشى
يارا :- انت رايح فين
انس :- انتى شايفه ايه ماشى
يارا :- ها ط.ط.طيب أتأكد من الورق كويس
انس :- أتأكد ولسه هيمشى
يارا :- ل.ل.لا اتأكد كويس
انس :- نفخ وبص على الورق
يارا :- قعدت تبص ليه بحب
انس :- رفع راسه علشان يقولها أن الورق مظبوط لاقها بتبص ليه بحب وسرحانه فيه ابتسم وقال خير
يارا :- ها م م.مفيش الورق مظبوط
انس :- مظبوط اوى ولسه هيمشى
يارا :- ط.ط.طيب اتأكد تانى
انس :- ابتسم وقرب منها وقال انتى عايزه ايه بالظبط
يارا :- اتصدمت وبصت ليه ومقدرتش ترد عليه
انس :- قرب اكتر ليها وقال ما تردى
يارا :- احم ا.ا.ايه اللى انت ب.ب.بتعمله ده
انس :- انتى اللى عايزه ايه كل ما اجى امشى توقفينى وعماله تسرحى فيا عايزه ايه بالظبط وسندها على الحيطه وقرب منها وقال انطقى وردى عليا
يارا :- غمضت عينيها وقالت ا.ا.ابعد عنى لو سمحت
انس :- قرب من وشها وقال بصوت واطى كلها اسبوع وتبقى فى بيتى وابقى ورينى هتقدرى تعملى ايه يا يارا وغمض عينه واخد نفس عميق وبعد عنها وسابها ونزل يجرى
يارا :- فتحت عينيها واخدت نفسها بصعوبه وقالت نهار اسوح انا قلبى كان هيوقف عليا وهوة بأيديها على وشها وقالت احيه شوق ولا دوق ايه ده انا داخله على ايام فله وقفلت الباب ودخلت حدفة نفسها على السرير وافتكرت اللحظه اللى كان قريب منها ابتسمت وحطت ايديها على وشها بكسوف
🦋مزاولة حب🦋26
🐝الفصل السادس وعشرون 🐝
مر اسبوع على ابطالنا واتقدم مالك لندى وتم الاتفاق على الشبكه وكتب الكتاب فى يوم واحد يوم جواز انس ويارا وجهزت يارا نفسها والبنات كانوا قاعدين معاها فى الاوضه منتظرين مالك وانس يوصلوا وقالت ندى
ندى :- يا بنات ده ظلم والله مليش دعوه انا عايزه اتجوز
رحمه :- امال اللى هيحصل ده ايه
ندى :- لاء انا مش عايزه اروح على شقة امى انا عايزه اروح على بيت مالك عايزه اتحضن يا بنات
تمارا :- قد ايه انتى سافله يا ندى دى البت اللى دخلتها النهارده معملتش زيك
ندى :- لاء يارا دى قلبى عندها والله دى داخله على منعطف تاريخي اقسم بالله
يارا :- قصدك تقولى داخله على ايام ما يعلم بيها الا ربنا
رحمه :- انتى بس اسمعى كلامى شوق ولا تدوق
يارا :- يا شيخه اتنيلى ده قرب منى مره كان قلبى هيوقف عليا امال هعمل ايه لما ابقى معاه فى شقه واحده ومراته كمان يا اختتتتتتى انا قلبى بيدق جامد اوى
تمارا :- طيب والله انا حاسه ان انس ده هيطلع رومانسى اخر حاجه
ندى :- مين ده اللى رومانسى انس اخويه شكلك غلطى فى العنوان يا تيمو شوفتى ابو الهول ايوه اللى فى الجيزة ده ابو راس انسان وجسم اسد اهو ده ممكن ينطق واخويا انس لاء
يارا :- ربنا يطمنك
رحمه :- انتى بطمنيها ولا بتخوفيها يا مخفيه انتى
ندى :- الله مش لازم افتح عينيها على اللى داخله عليه وقعدوا يضحكوا وفى الوقت ده الباب خبط راحت رحمه فتحت الباب وقالت
رحمه :- بدر فيه ايه
بدر :- انس ومالك والمأذون بره يلا يا بنات
يارا :- بصت للبنات وقالت انا خايفه اوى
تمارا :- أجمدى يا يويو يلا يا حبيبتى ربنا يهنيكى ويسعدك
ندى :- جماعه هو انا مش خايفه ليه مبقاش عندى احساس باين كده ولا ايه
البنات ضحكوا على كلام ندى وخرجوا مع بدر
يارا :- اول ما شافت انس مسكت ايد تمارا وقالت انا حاسه ان رجلى مش قادره اقف عليها
تمارا :- أجمدى يا بت تعالى اقعدى وقعدوا على الكنبه
ندى :- قعدت جمب مالك وقالت إنبى قمر
مالك :- ده انت اللى قمر وعسل اخيرآ كلها دقايق وهتبقى مراتى
ندى :- هبقى مراتك بس مع ايقاف التنفيذ
مالك :- انا لو عليا هموت وانفذ بس يلا كلها شهرين ونتجوز وانفذ براحتى بقى
ندى :- ضحكت بدلع
مالك :- يا مهون يا بختك يا انس هتنفذ براحتك النهارده يا ابن المحظوظه
ندى :- ايه هتقر عليه وضحكت
انس :- يلا علشان تكتب الكتاب
مالك :- اشطا يلا وقعدوا الاتنين جمب المأذون
رحمه :- قعدت جمب ندى وحضنتها بفرحه
ندى :- عقبالك يا رحومتى
رحمه :- يارب يا اختى يارب
وبدء المأذون يكتب الكتاب وانس ومالك يقولوا وراه المأذون تحت نظرات الفرح ما بين تمارا ويارا وندى ورحمه والاربعه قعدوا جمب بعض وحضنوا بعض بفرحه وبعد وقت خلص المأذون كتب الكتاب وقالت ندى
ندى :- بأندفاع اجى أمضى
الكل ضحك على اندفاع ندى
انس :- أهدى شويه
ندى :- بزعل حاضر
المأذون بضحك تعالى أمضى يا عروسه
ندى :- ايوه بقى هو ده وقامت وقفت وقالت صورى منك ليها اللحظه التاريخيه دى
تمارا :-بضحك امشى يامجنونه خلصى
ندى :- طيب متزوقيش كده وراحت مضت وبصمت وبصت للبنات وورتهم صوبعها ما كان ما بصمت بفرحه وقالت بصوت عالى بقيت مراته رسمى نظمى
التلاته بصوا لبعض وقعدوا يضحكوا على جنانها
مالك :- وهو مش قادر يمسك نفسه من الضحك قام وراح عندها وباس راسها وقال مبروك يا مجنونه
ندى :- لاء مبروك كده حاف مفيش حضن زى ما بشوف فى الفيديوهات
مالك :- ضحك وقال مجنونه وهتجنينى معاكى وشدها فى حضنه وقال بحبك
ندى :- بفرحه وانا بموت فيك
انس :- مش هنخلص بقى ولا ايه
مالك :- بصوت واطى لندى يخربيت غلاست اخوكى ده
ندى :- ضحكت وراحت عند البنات وحضنتهم وقالت اخيرآ بقيت حرم سي مالك
التلاته حضنوها بفرحه وباركوا ليها
انس :- نفخ وقال يلا انت كمان خلينا نخلص
بدر :- اتنهد وراح قعد جمب المأذون وحط أيده فى ايد انس وبدء يقول وراه المأذون
يارا :- بنات الحقونى قلبى هيوقف عليا
رحمه :- ششش اسمعى
وبعد وقت خلص المأذون وقال
المأذون :- بارك الله لكم وبارك عليكم وجمع بينكما في خير
بدر :- اخد الورق ومضى يارا اللى كانت ايديها بتترعش من الخوف والتوتر وابتسم ليها بدر وباسها من راسها وقال مبروك يا حبيبتى ربنا يسعدك
يارا :- اترمت فى حضنه وقالت الله يبارك فيك يا حبيبى عقبالك يارب
بدر :- خدى بالك على جوزك اوعى تزعليه
يارا :- حاضر ودموعها نزلت منها وقالت الله يرحمك يا ماما كان نفسى تبقى موجوده معانا فى يوم زى ده
بدر :- مسح دموعها وقال الله يرحمها اكيد هى حاسه بينا دلوقتى وفرحانه بيكى يا حبيبتى بلاش دموعك فى يوم زى ده
يارا :- حاضر
رحمه :- وقفت وحضنتها وقالت مبروك يا يويو بلاش نكد بقى فى يوم زى ده
يارا :- الله يبارك فيكى يا رحومتى عقبالك يارب
رحمه :- بصت لبدر وقالت يااااااااارب وابتسمت لبدر
ندى :- مبروك يا يويو مين يصدق أن انا وانتى يتكتب كتابآ فى يوم واحد وحضنتها وقالت بصوت واطى يا بختك يا بنت المحظوظه هتتباسى النهارده
يارا :- بكسوف اتلمى يا قليلة الادب
تمارا :- مبروك يا يويو ربنا يسعدك يا حبيبتى
يارا :- الله يبارك فيكى يا تيمو عقبالك يا حبيبتى
تمارا :- بصت على يوسف ورجعت بصت لياسين وابتسمت بوجع وراحت قعدت
ام ندى :- مبروك يا مرات ابنى
يارا :- الله يبارك فيكى يا خا قصدى يا ماما
ندى :- ايه ده يا ماما انتى ازاى تباركى ليارا وانا لاء هو انا مش بنتك ولا ايه
ام ندى :- ضحكت وقالت انتى هتروحى معايا البيت إنما يارا هتروح مع جوزها على بيتها
ندى :- اااااه
يارا :- بصت على انس لاقته قاعد وحاطط رجل على رجل ومش سأل فيها بصت لرحمه وقالت انا هتشل
رحمه :- بأستغراب ليه
يارا :- الجبله ده مش سأل فيا ده حتى مجاش قالى مبروك
رحمه :- اعملى بس اللى قولتلك عليه وطلعى عينيه
يارا:- شكله هو اللى هيطلع عينى يا رحمه
رحمه :- أجمدى يا بت بلاش قلبك مرهف الاحساس ده اللهى يسترك
يارا :- يارب نص بروده ده مش طمعانه فى اكتر من كده والله
ندى :- انتوا بتقولوا ايه
رحمه :- يخربيتك خضتينى انتى سايبه جوزك وجايه عندنا ليه
ندى :- هييييح جوزى امته تتوثق اللحظه دى رسمى يارب
يارا :- انتى ايه يا بنتى مفيش غير الأفكار السوده دى اللى فى دماغك
ندى :- ضحكت وقالت الصراحه اه
رحمه :- امشى يا ندى روحى عند مالك
ندى :- ابن الورمه سابنى وراح قعد مع يوسف من اولها بيبقى صاحبه عليا
يارا :- على الأقل سأل فيكى وشاركك فرحتك الدور والباقى على ابو الهول بتاعى مسألش فيا
ندى :- بصت على انس ورجعت بصت لرحمه وقالت لاااااا انتى اتعودى يا ماما ده انتى متجوزه تلاجه اقسم بالله انتى صعبانه عليا من الشلل اللى هتشوفيه على ايد انس
يارا :- ربنا يبشرك بالخير يا اختى
مالك :- قمرى سيبنى وبيعمل ايه
ندى :- يا راجل لسه فاكر روح عند صاحبك زى ما كنت
مالك :- نعم يا اختى
ندى :- ايوه مش انت سبتنى وروحت عند يوسف صاحبك خليه بقى ينفعك
مالك :- بصلها بأستغراب وقال انتى بتكلمينى انا
ندى :- اه
رحمه :- معلش يا مالك يا اخويا أصل ندى ست مصريه اصيله بس بدأت معاك بدرى شويه وضحكت
ندى :- ههه خفه
مالك :- لالالا مقدرش على زعلك ابدآ تعالى اصالحك وغمز ليها
ندى :- احم انت قصدك ايه
مالك :- ايوه قصدى اللى جه فى دماغك دلوقتى
ندى :- اتلم يا قليل الادب
مالك :- اه صح انا نسيت أن دماغك سو انا قصدى اجيبلك شيكولاته يا قليلة الادب ، عايزه تتحركشى بيا يا لئيمه وابتسم
ندى :- ضربته على كتفه وقالت والله العظيم انت غلس وبارد وسابته ومشيت
مالك :- قعد يضحك عليها وراح وراها وقال استنى يا مجنونه
رحمه :- اتنين مجانين واتلموا على بعض اقسم بالله
انس :- راح عند بدر وقال خلى اختك تيجى علشان نمشى كفايه كده
بدر :- تمام ثوانى وراح بلغ يارا
يارا :- وهو حضرته مجاش قالى بنفسه ليه
بدر:- يا يارا كبرى دماغك يا حبيبتى وبلاش نكد فى يوم زى ده يلا يا حبيبتى روحى مع جوزك
يارا :- انا خايفه يا بدر
بدر :- مسك ايديها وطبطب عليها وقال طبيعى تخافى من الدنيا الجديده اللى داخله عليها بس مجرد ما هتروحى بيت جوزك وتتعودا على بعض الخوف ده هيروح وهتعيشى اسعد ايامك مع جوزك
يارا :- اترمت فى حضنه وقالت انا مش عايزه اروح معاه انا عايزه افضل معاك يا بدر
بدر :- ضحك وقال يا هبله انتى دلوقتى ملك جوزك ليكى بيتك وجوزك و بيت ابوكى هيفضل مفتوح ليكى فى اى وقت يا حبيبتى وبعد عنها ومسح دموعها وقال يلا روحى مع جوزك
يارا :- بصت على انس لاقيته بيبص على الساعه بعصبيه بصت لبدر بخوف
بدر :- يلا يا حبيبتى امشى معايا
يارا :- ثوانى اسلم على البنات وسلمت على البنات بقلق وخوف وراحت مع بدر عند انس
بدر :- مراتك اهى يا انس بس ليا رجاء عندك حطها فى عينيك وخلى بالك عليها ولو فى يوم من الايام حصل ليا حاجه هيبقى ملهاش حد فى الدنيا دى غيرك خليك انت أهلها
يارا :- بدموع بعد الشر عليك ربنا يخليك ليا يا بدر متقولش كده تانى
بدر :- طبطب على كتفها وقال يلا روحى مع جوزك
انس :- متقلقش عليها وبص ليها وقال امشى يلا
يارا :- بصت ليه بتوتر ونزلت قدامه وركبوا العربيه وراحوا على شقتهم وطول الطريق متكلمش معاها ولا كلمه
مالك :- امشى يلا يا ندى اوصلك انتى وماما على البيت
ام ندى :- ربنا يخليك يا ابنى امشى يا ندى
ونزلت ندى مع مالك وامها وراح مالك يوصلهم لحد البيت
يوسف :- راح عند رحمه وقال يلا يا رحمه وبص لتمارا وقال امشى يا تمارا علشان نروح
ياسين :- لاء ملكش دعوه بتمارا هتروح معايا
يوسف :- تروح معاك فين الوقت متأخر تمارا هتركب معايا وهروحها على بيتها
ياسين :- انت ايه يا اخى مش بتحرم مليون مره تقولك ملكش دعوه بيها ولا انت غاوى تتكسف كل شويه
يوسف :- داس على أسنانه وقال اتلم انا ماسك نفسى عليك بالعافيه علشان احنا عند الناس
رحمه :- اهدا يا يوسف وبصت لتمارا وقالت امشى يا تيمو
ياسين :- شد تمارا من دراعها بعصبيه وقال انا قولت تمارا هتروح معايا انا
تمارا :- بصت على ايد ياسين اللى ماسكه دراعها وسحبت دراعها من أيده وقالت انا هروح مع ياسين يا يوسف
يوسف :- مينفعش يا تمارا
تمارا :- انا بس اللى اقول ايه ينفع وايه مينفعش وبصت لياسين وقالت يلا بينا يا ياسين
ياسين :- بص بقرف ليوسف وقال يلا يا حبيبتى ونزلوا
يوسف :- داس على أسنانه وقال انا هوريك ونزل يجرى وراهم
رحمه :- طلعت تجرى وراه ومسكته من دراعه وقالت اهدا يا يوسف هو خطيبها برضه تعال احنا نركب العربيه يلا يا يوسف بالله عليك امشى
يوسف :- بص على تمارا ويوسف بغيظ ومشى مع رحمه وركب العربيه وشغلها ومشى
تمارا :- بعصبيه انت ازاى تسمح لنفسك تمسكنى من دراعى كده انا مرضتش اكلمك قدامهم فوق بس اياك تكررها تانى ماشى
ياسين :- انا اسف يا تمارا مكنتش اقصد والله بس اتعصبت من اللى اسمه يوسف ده ومكنتش عارف انا بعمل ايه
تمارا :- مليون مره اقولك خد بالك من تصرفاتك يا ياسين
ياسين :- خلاص حقك عليا متزعليش هحاول اخد بالى بعد كده
تمارا :- اتنهدت وقالت ماشى اركب يلا
وركبوا الاتنين عربية تمارا وراحوا على الفيلا ونزل ياسين من العربيه واطمن أن تمارا دخلت الفيلا ووقف تاكسى وروح على البيت
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى شقة انس
وصل انس ويارا على البيت وطلعوا عند الشقه وفتح انس الباب ودخل من غير ولا كلمه
يارا :- اتغاظت منه اكتر أنه مش معبرها نفخت ودخلت الشقه وقفلت الباب وراها ودخلت جوه لاقت انس فى الاوضه وبيغير هدومه رجعت لوراه بسرعه وقعدت على الكنبه بتوتر وقعدت تدعك ايديها فى بعض
انس :- خرج من الاوضه وقال اوعى من على الكنبه
يارا :- م.م.ما تقعد فى اى مكان لازم الكنبه يعنى
انس :- اه لازم الكنبه
يارا :- قامت من على الكنبه وقالت اهى عندك اهى اشبع بيها وسابته ودخلت الاوضه وقعدت على حرف السرير
انس :- بصوت عالى غيرى هدومك وقومى سخنى العشا عايز اكل علشان انام
يارا :- بقرف من اولها هيعيش عليا دور سى السيد ونفخت وقامت تغير لاقت ام ندى حاطه ليها قميص ابيض قصير بالروب بتاعه على السرير اخدته حدفته فى الدولاب وطلعت ترينج من الدولاب وغيرت هدومها وخرجت دخلت المطبخ سخنت الاكل وحطته ليه على الترابيزه وقالت العشا جاهز
انس :- راح قعد على الكرسى وبدء ياكل
يارا :- بصت ليه بغيظ ولسه هتمشى
انس :- رايحه فين
يارا :- داخله الاوضه
انس :- مش هتاكلى
يارا :- لاء
انس :- براحتك وكمل اكل
يارا :- بصت ليه بغيظ وهو بياكل ودخلت على الاوضه وقعدت على السرير وقالت بغيظ بنى أدم مستفز وقعدت تهز فى رجليها بغيظ وبعد وقت طويل جدآ استغربت يارا غياب انس قامت فتحت الباب وخرجت براحه وراحت تبص عليه ووقفت مصدومه لما لاقت انس نايم على الكنبه دخلت تانى على اوضتها وقالت عااااا هتشل فيه عريس ينام على الكنبه ليلة دخلته هوف عين مين دى ياربى اللى بصت فى الليله مفيش غيرها الفقر ندى وجوزها مالك ونامت على السرير وهى متغاظه من انس لحد ما عينيها راحت فى النوم
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
اشرقت شمس صباح يوم جديد بنورها الساطع فى سماء القاهره لتبدء تمارا بفتح عيونها على صوت تليفونها بصت فيه لاقته انس نفخت وسابت التليفون بتاعها وقامت من على سريرها دخلت الحمام وبعد وقت خرجت وأدت فرضها وغيرت هدومها ونزلت تحت وقالت بصدمه
تمارا :- ياسين انت هنا من امته
ياسين :- من شويه واتصلت بيكى علشان اقولك ان انا تحت مردتيش عليا
تمارا :- ي.ي.يعنى فيه حاجه
ياسين :- لاء جيت اخدك اوصلك الشركه
تمارا :- م.م.ماشى يلا بينا
سميه :- مش هتقعدى تفطرى يا بنتى
تمارا :- لاء يا ماما مليش نفس
كريم :- ياسين كنت عايز اسألك على حاجه
ياسين :- أسأل يا كيمو
كريم :- انا شوفتك امبارح الصبح مع ارين مرات يوسف هو انتو تعرفوا بعض منين
ياسين :- بتوتر ها د.د.ده امته ا.ا انا مشوفتش ارين دى غير مره واحده فى الخطوبه
كريم :- بس أنا متأكد من كلامى ده يا ياسين انا شايفك امبارح وانت واقف معاها
ياسين :- و.و.وانا لو وقفت معاها هنكر ليه تلاقى بس حد يشبهنا يلا يا تمارا هتتأخرى وخرجوا الاتنين مع بعض
كريم :- بس انا متأكد أن هو اللى كان واقف معاها يا بابا
عماد :- يا ابنى يخلق من الشبه اربعين
كريم :- هو والله العظيم هو وقام وقف وخرج وسابهم
سميه :- يا ترى كان واقف بيعمل ايه مع ارين وليه بينكر أن هو
عماد :- انتى هتصدقى كلام كريم تلاقى واحد شبه يا سميه بس ابنك مش بيصدق غير نفسه وبس
سميه :- جايز
عماد :- وقف وقال انا رايح مشوار مع حسام ويمكن أتأخر شويه متقلقيش
سميه :- مشوار ايه ده
عماد :- مشوار يا سميه مشوار وسابها ومشى
سميه :- بغيظ البيت ده حاله بقى صعب كل واحد شغال من دماغه ولا كأن فيه بنى ادمين معاهم فى البيت هوف
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى شقة بدر
فاق بدر من نومه على صوت تليفونه بص فيه وقام قعد بسرعه وقال
بدر :- ا.ا السلام عليكم
المتصل :- وعليكم السلام
بدر :- انا عارف انك متصل علشان فلوسك اصبر عليا بس يومين اختى لسه متجوزه امبارح والله
المتصل :- اخرك يومين يا بدر لو مجبتش الفلوس اللى عليك هقدم الشيكات فاهم وقفل السكه فى وش بدر
بدر :- حدف التليفون جمبه وحط أيده على وشه وقال يارب افرجها من عندك يارب وتليفونه رن اخد التليفون وبص فيه لاقها رحمه رد عليها وقال صباح الخير يا قلبى
رحمه :- صباح النور لسه نايم ولا ايه
بدر :- لسه صاحى اهو هقوم اجهز علشان اروح الشغل
رحمه :- انا عارفه انها صعبه عليك النهارده علشان اول يوم يارا تكون مش معاك فى البيت
بدر :- اه طبعآ صعبه بس اهم حاجه ربنا يسعدها ويهنيها
رحمه :- يارب
بدر :- عقبالى انا وانتى يا رحمه
رحمه :- يارب يا حبيبى انا بحلم باليوم اللى هكون فيه مراتك على سنة الله ورسوله
بدر :- بس انا خايف لكون بحلم وميتحققش الحلم ده يا رحمه
رحمه :- ليه بتقول كده يا بدر انا مش هكون غير معاك وليك
بدر :- انا عايزك تعرفى أن انا بحبك ولو لاقدر الله مبقتيش ليا عمرى ما هكون لحد تانى غيرك
رحمه :- مالك يا بدر كلامك غريب اوى النهارده كده ليه
بدر :- ابتسم وقال ولا غريب ولا حاجه يلا هسيبك بقى علشان اجهز لشغل باى يا قلبى
رحمه :- بقلق باى
بدر :- قفل السكه وقام دخل الحمام وبعد وقت خرج ولبس هدومه واده فرضه ونزل راح شغله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى شقة ندى
كانت ندى قاعده بتفطر مع امها وتليفونها رن بصت فيه وابتسمت وقالت
ندى:- جوزى حبيبى هدخل أكلمه
ام ندى :- ضحكت وقالت ربنا يسعدكم يا حبيبتى
ندى :- دخلت اوضتها وقفلت الباب وراها وقعدت على السرير وردت بحب وقالت صباح الخير
مالك :- احلى صباح على عيون حبيبتى واحشتينى
ندى :- وانت كمان واحشتنى اوى اوى
مالك :- هتنزلى الشغل النهارده صح
ندى :- مش عارفه خايفه انزل النهارده من غير ما انس يعرف
مالك :- ماله انس دلوقتى انتى مراتى انا فاهمه
ندى :- م.م.ما انا عارفه بس انا لسه فى بيت اهلى يعنى احنا لسه فى حكم المخطوبين
مالك :- ندى اجهزى وانا هاجى اخدك بالعربيه
ندى :- بس
مالك :- سمعتى قولت ايه نفذى اللى قولتلك عليه يلا باى
ندى :- باى وقفلت السكه وخرجت عند امها وقالت ماما كنت عايزه اسألك على حاجه
ام ندى :- أسألى يا حبيبتى
ندى :- هو انا لو نزلت الشغل النهارده هيحصل حاجه
ام ندى :- والله يا بنتى انا مش عارفه اخوكى ناوى يعمل ايه فى موضوع شغلك ده
ندى :- طيب مش انا خلاص اتكتب كتابى وبقيت فى حكم راجل تانى هو ماله بقى
ام ندى :- انتى اه اتكتب كتابك بس انتى لسه فى بيت أهلك يعنى ملهوش حكم عليكى لما تبقى فى بيته هو حر لكن طول ما انتى لسه هنا الكلمه الاولى والاخيره لاخوكى يا ندى
ندى :- ا.ا اه ما انا عارفه بس انا زهقت من قعدت البيت ووحشنى الشغل
ام ندى :- سكتت شويه وقالت طيب انزلى الشغل وانا هبقى اجبها لاخوكى بطريقتى
ندى :- الله عليكى يا ماما وباستها وقالت هدخل اجهز بقى ودخلت اوضتها جهزت نفسها وبعد وقت وصل مالك واتصل بيها علشان تنزل ليه خرجت من اوضتها وقالت انا نازله يا ماما وفتحت الباب ونزلت وركبت العربيه جمب مالك وابتسمت ليه وقالت هاى
مالك :- شاور على خده وقال البوسه بتاعتى بسرعه
ندى :- مالك اتلم
مالك :- اخلصى هاتى البوسه
ندى :- بكسوف يوووووه خلاص بقى يا مالك
مالك :- يلا
ندى :- بتوتر قربت من خده وباسته
مالك :- غير اتجاه وشه والبوسه جات على شفايفه
ندى :- ضربته على كتفه بغيظ وقالت والله العظيم انت قليل الادب ومتربتش
مالك :- ضحك وقال احلى صباح ده ولا ايه
ندى :- غلس وبصت من الشباك
مالك :- عسل يا اخواتى وشغل العربيه وراح على الشركه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى الشركه
دخل يوسف المكتب عند تمارا لاقها قاعده وشغاله لوحدها قعد على حرف المكتب وقال
يوسف :- اول مره ادخل عليكى المكتب الاقيكى لوحدك
تمارا :- يوسف فيه حاجه
يوسف :- لاء كنت معدى من قصاد المكتب لاقيتك لوحدك فيه
تمارا :- ما انت عارف يارا كان فرحها امبارح وندى اخوها منعها تنزل الشغل ورحمه اختك معرفش مجاتش ليه لحد دلوقتى
يوسف :- رحمه جات معايا بس بتخلص شغل فى مكتب مالك على ما يجى
تمارا :- اوك فيه حاجه تانى
يوسف :- تمارا انا نفسى اتكلم معاكى فى موضوع ياسين وتسمعينى للآخر كل مره تقاطعينى وترفضى تسمعى كلامى
تمارا :- علشان انا عارفه انت بتحاول تشوه صورته قصاد عينى ليه
يوسف :- يا تمارا ايوه انا بحبك وبغير عليكى منه بس فعلا والله الشخص ده مش كويس ده بيحاول يقرب منك علشان حاجات وسخه فى دماغه
تمارا :- انا شايفه أنه محترم وبيتعامل معايا بمنتهى الادب وحتى لو هو فى دماغه حاجه مش كويسه متقلقش انا أقدر احافظ على نفسى منه
يوسف :- طيب ليه تخدى واحد انتى مش واثقه فيه انتى بتعاندى نفسك وبتعندينى يا تمارا
تمارا :- انا مش بعاند حد بس فعلا انا شايفه ياسين شخص كويس وبيحاول يعمل اى حاجه علشان يسعدنى
يوسف :- انتى طيبه وعلى نياتك اسألينى انا راجل زيه وعارف اللى فى دماغه ايه
تمارا :- ابتسمت ليه بتريقه وقالت مش كل الرجاله شهونيه زيك يا يوسف
يوسف :- انا عارف ان غلط لما جريت وراه شهوتى بس أنا بشر مش ملاك وكلنا بنغلط محدش مبيغلطش
تمارا :- بالظبط كده احنا بشر وكلنا بنغلط علشان كده حتى لو ياسين طلع مش كويس زى ما انت بتقول فأنا هسامحه لانه هو كمان هيكون بشر وغلط
يوسف :- انتى عناديه اوى على فكره وعنادك ده هيوديكى فى داهيه يا تمارا وسابها ومشى وهو متعصب
تمارا :- بصت عليه وهو خارج واتنهدت بوجع ورجعت تشوف شغلها تانى
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى شقة انس
فاق انس من نومه وقام قعد على الكنبه وقعد يدلك رقابته بألم من نومت الكنبه وقام بص على باب الاوضه وهو مقفول واتنهد وراح فتح الباب ودخل عند الدولاب علشان ياخد هدوم من غير ما يبص على يارا واخد الهدوم ولسه هيخرج سمع يارا بتنادى عليه استغرب وبص عليها لاقها نايمه هز كتفه ولسه هيخرج سمعها بتضحك وبتقول
يارا :- بس يا انس بقى الله لا اوعى كده بطل قلة ادب
انس :- راح عندها ووقف قصادها وضحك عليها وهى بتتكلم
يارا :- لالالا اوعى يا انس بس بقى واتقلبت ووقعت فى الارض وفتحت عينيها وقالت اااااه ولاقت رجل انس قصادها رفعت راسها لفوق ببطئ وقالت ا.ا.انت و.و.واقف هنا بتعمل ايه وقامت من على الأرض
انس :- كنت بتفرج عليكى وانتى بتحلمى بيا
يارا :- بصدمه بحلم بيك و.و.وانت عرفت منين
انس :- حضرتك كنتى بتنادى عليا وبتقولى بطل قلة ادب
يارا :- وشها احمر من الكسوف وقالت نهار اسوح ومنيل ا.ا.انا قولت كده
انس :- ربع أيده على صدره وقال ايوه
يارا :- اديته ضهرها وقالت ت.ت.تلاقيك س.س.سمعت غلط ب.ب.بس
انس :- لاء انا متأكد أن سمعت صح وشوفت ملامح وشك كأننا كنا بنعمل
يارا :- بصت ليه بكسوف وقطعته وقالت م.م.محصلش
انس :- اتنهد وقال جايز ومشى خطوتين لقدام ورجع تانى عندها وقرب من ودنها وقال توترك ده أكد ليا ان اللى فى دماغى صح وبعد عنها وخرج من الاوضه
يارا :- كانت واقفه مصدومه ونفسها سريع من قرب انس ليها وقعدت على حرف السرير وقالت انتى غبيه كان لازم تتكلمى وانتى نايمه وبتحلمى بيه وهو بيبوسك هوف بقى وفى الوقت ده سمعت صوت انس بينادى عليها قامت تجرى وخرجت من الاوضه وقالت ن.ن.نعم
انس :- حضرى الفطار على ما ادخل اخد شاور
يارا :- وهى بصه على الأرض بكسوف قالت م.م.ماشى
انس :- بصلها مده وسابها ودخل الحمام
يارا :- وقفت حضرت الفطار ليه وحطته على الترابيزه وبعد وقت خرج من الحمام وقعد على الترابيزه وبدء ياكل
انس :- وهو بياكل اقعدى كلى
يارا :- شويه ابقى اعمل سندوتش واكل وسابته ودخلت الاوضه وقعدت على السرير ومسكت تليفونها واتصلت على رحمه وانتظرت الرد
رحمه :- صباحيه مباركه يا عروسه
يارا :- صباحيه مباركه ايه يا شيخه اتنيلى
رحمه :- فيه ايه يا بت قلقتينى مطلعش تمام ولا ايه
يارا :- لاء يا اختى بس هو نام على الكنبه بره وانا نمت فى الاوضه لوحدى
رحمه :- نهار اسوح يخربيت اللوح اللى معاكى ده فيه حد ينام على الكنبه يوم دخلته
يارا :- اعمل ايه يا اختى نبر الزفته ندى على الليله اهو كل واحد نام فى مكان والمصيبه السوده اللى حصلت من شويه
رحمه :- حصل ايه تانى الله يحرقك
يارا :- كنت نايمه بحلم بيه وهو بيهزر معايا وبيبوسنى والمصيبه السوده إن كنت بتكلم وانا نايمه وصحيت لاقيته واقف بيتفرج عليا وانا بتكلم وبقول اسمه
رحمه :- يا نهار كسوف ده انا لو مكانك كنت حدفت نفسى من فوق السرير وانتحرت
يارا :- لاء ما انا بتقلب من على السرير وقعت فى الارض بس كان نفسى الارض تنشق وتبلعنى لما لاقيته واقف كده بس اللى زعلنى اكتر أن صحيت من الحلم كان حلو اوى وانس كان شقى اوى اوى وعليه بوسه هييييح
انس :- احم احم
يارا :- اتصدمت لما سمعت صوت انس وبصت ليه بصدمه لاقته واقف ومربع ايديه التليفون وقع من ايديها و.............