رواية جوازة ميراث الفصل الثالث3والرابع4بقلم رانيا عماره
••بعد ما داليدا قامت تفتح، لقيتها صفاء بنت عمها وده اللي خلاها استغربت خصوصاً انها مابتجيش عندهم!••
داليدا(مبتسمه) :ازيك ياحبيبتي عامله ايه؟
صفاء:الحمدلله.. انتي عامله ايه؟
داليدا:الحمدلله.. طب اتفضلي
طاهر:تعالي ياصفاء يابنتي..حماتك بتحبك..داليدا لسه حاطه الأكل دلوقتي.. تعالي
صفاء:ازيك يافريده؟
فريده:الحمدلله
••قعدت صفاء معاهم على السفره، وكانت مبتسمالهم••
داليدا:بتحبي الفراخ ولا اللحمه؟
صفاء:لا انا مش جايه آكل..انا جايه اتطمن عليك ياعمي
طاهر(بيضحك) :ودي تيجي برضه ياداليدا يابنتي؟..طيب كلي أي حاجه احنا أهل كرم
صفاء:طبعاً ياعمي عارفه، ربنا يزيدكم من واسعه
طاهر:ماهر وسامي وماما عاملين ايه؟
صفاء:الحمدلله كلنا بخير..معلش لو جيتلكم وقت الغدا
داليدا(بتضحك) : لا ده العشا..بس ايه الحلاوه دي؟
صفاء:شكرا ياحبيبتي انتي بس علشان عينيكي حلوين..عامله ايه في المذاكره يافريده؟
فريده:الحمدلله كويسه
صفاء:الحمدلله..طيب عايزين حاجه بقى انا همشي
طاهر:وهو انتي يابنتي كملتي دقيقتين على بعض؟
داليدا:في ايه ياصفاء وهى دي تعتبر زياره؟ مش نقعد سوا شويه
صفاء:معلش والله انا قولت اخطف نفسي على السريع اتطمن على عمي
طاهر:فيكي الخير..سلميلي على الكل
صفاء:من عينيا الاتنين ياعمي...يلا بالإذن
داليدا:ماشي ياحبيبتي... مع الف سلامه
••وراحت وراها توصلها لحد باب الشقه ولما مشيت..رجعت داليدا قعدت على السفره وكانت مستغربه زيارتها دي••
فريده:مالك ياداليدا؟
داليدا(بتنهيده) :مستغربه زيارتها دي..مش فاهمه وراها ايه؟
طاهر:ليه بتقولي كده ياداليدا يابنتي..ولاد عمك بيحبونا.. والبنت جات بنفسها تطمن عليا..
••راح رافع ايديه الاتنين ودعا••
طاهر:ربنا يسترها معاك يا ماهر..صحيح عرفت تربي صح..ربنا يكرمك وييسرلك طريقك
داليدا:كمل أكلك يابابا...كلي يافريده
فريده:حاضر
<عـنـد مـصـطفـى أخـو رشـاد>
••بعد مارجع البيت، كان قلقان جداً على أخوه..دخل على مراته مروه الأوضه وقالها••
مصطفى:دينا خدي بالك من نفسك انا مسافر دلوقتي
مروه(مستغربه) :مسافر؟..مسافر ده اللي هو ازاي يعني؟
مصطفى:هسافر أشوف رشاد فين!
مروه:ياسلام؟.. ده على أساس انك عارف مكانه!
مصطفى:ايوه انا عارف مكانه..بس هروح واتأكد
مروه(منفعله) :وانت مش خايف حد يمشي وراك يراقبك؟..بما ان حياتنا بقيت معرضه للخطر في أي لحظه!..طب بلاش انت.. مش خايف عليا انا يحصلي حاجه بسببكم؟
مروه(منفعل) :مروه..احنا في نفس المركب ولازم نستحمل سوا..وأكيد لما أخويا يختفي مش هقعد اتفرج من بعيد وانا حاطط ايدي على خدي!..أكيد يعني لازم أشوف حل
مروه:طيب ياسيدي انا معاك مختلفناش..بس بالنهار.. على الأقل النهار له عنين!
مصطفى:اللي عايز يإذي بالليل هو هو اللي هيأذي بالنهار..اقفلي على نفسك كويس متفتحيش لحد!.. وانا هكلمك اطمنك!
مروه(بزعيق) :وانا مش هسيبك تخرج من هنا
••مشى مصطفى ومردش عليها وهى مشيت وراه تزعق••
مروه(بزعيق) :مش هستنى لما تروح مني..ولا هستنى حد يتصل بيا يقولي جوزك مش لاقينه..كفايه يامصطفى.. استنى انا بكلمك!
••لحد ماخرج من الشقه..وركب عربيته وكل ده ومروه بتبص عليه من الشباك وهى بتعيط••
مروه(بعياط) :برضه عملت اللي في دماغك!
••راحت مروه طلعت موبايلها واتصلت على حماها••
مروه(بعياط) :الو يااونكل
<تـانـي يـوم>
••صحيت داليدا وراحت تدور على شغل..لحد مادخلت محل ملابس••
داليدا:صباح الخير
_صباح النور
داليدا: انتوا كنتوا منزلين اعلان عن شغل..وانا عايزه اشتغل.. في حد جه ولا لسه؟
_لا محدش جه..طب ممكن بياناتك؟
داليدا:تمام
••وطلعت الـ CV بتاعها من الشنطه••
داليدا:اتفضل
••وبعد ما صاحب المحل بص فيها••
_طيب تعالي بكرا و ان شاء الله هنرد عليكي
داليدا:خلاص شكراً
••وخدت نفسها ومشيت..وقالت بالمره تعدي على رشاد تطمن عليه..وهى داخله سألت الـ Receptionist••
داليدا:استاذ رشاد لسه في أوضته ولا اتغيرت؟
_للأسف استاذ رشاد هرب من المستشفى
داليدا(مصدومه) :هرب؟
_للاسف
داليدا(مصدومه) :خلاص شكراً
_العفو
••ومشيت وهى مصدومه وفي دماغها مليون سؤال••
<عـنـد سـامـي>
••كان بيراقب داليدا وماشي وراها في كل حته..لدرجة انه دخل لـ صاحب المحل••
سامي:السلام عليكم
_وعليكم السلام ورحمة الله وبركاته
سامي:هى الاستاذه اللي كانت عندك من شويه دي كانت عايزه ايه؟
_مين؟
سامي:اللي كانت عندك من شويه..لابسه طرحه سوده
_ااه..دي عايزه شغل..بس انت مين؟
سامي:انا جوزها.. بص عايزك تمشي معايا للآخر
••وراح مطلع من جيبه رزمة فلوس وادهاله••
سامي:الاخت دي هتجيلك تاني..تقولها مفيش شغل
_وانت ايه مصلحتك من كل ده؟
سامي:ياعم ملكش فيه بقى مش شغلانتك.. انت معاك ١٠٠٠ جنيه مقابل انك تقولها مفيش شغل..ألفلها أي حوار
_يااستاذ مينفعش الكلام ده
سامي:طب خلاص نزودهم شويه، ايه رأيك ٢٠٠٠؟
••بصله الراجل وسكت كان محتار••
سامي:السكوت علامة الرضا.. ومادام انت ساكت يبقى موافق.. يبقى على بركة الله.. اتفقنا؟
_خلاص تمام
••مشى سامي وبعدين افتكر حاجه و رجعله••
سامي:لو اشتغلت عندك انا هعرف.. ومش هَحلك..اللي أوله شرط آخره نور.. آمين؟
_تمام
سامي:تعجبني
••وسابه ومشى••
<عـنـد صـفـاء>
•• راحت لـ عمها طاهر للمره التانيه، ومكنش في حد غيره في البيت.. قام يفتحلها وهو كله تعب••
صفاء:افتح ياعمي انا صفاء بنت أخوك
طاهر:جاي اهو يابنتي
••وفتحلها وسلمت عليه أول ماشافته••
طاهر:الدنيا كلها نورت
صفاء:ده بنورك انت..ايه ده امال فين داليدا وفريده؟
طاهر:داليدا بتدور على شغل..وفريده عندها دروس.. تعالي اتفضلي
صفاء:مينفعش تقعد لواحدك ياعمي..لازم يكون معاك حد يراعيك
••ودخلت وراه لحد الأوضه••
طاهر:ماهما مبيتأخروش..شويه وهتلاقيهم جم
صفاء:يجوا بألف سلامه..انا قولت اتطمن عليك.. بس خايفه اكون تقيله على قلبكم إكمني جيت امبارح
طاهر:لا ده بيتك.. تيجي تنورينا في أي وقت
صفاء:ربنا يخليك ياعمي
••وفجأه ابتدا يتألم وده كان باين على ملامحه••
صفاء:في حاجه ولا ايه ياعمي؟
طاهر:معلش.. اسنديني لحد الحمام بس
صفاء:حاضر من عينيا الاتنين
•• وقامت تسنده لحد مادخل الحمام..وأول مادخل.. طلعت تجري على الأوضه وفتحت الادراج تدور على علاجه..لحد ما لقيته وفتحته تبص فيه••
صفاء:الحمدلله ان الحبايه دي شبه اللي معايا..لو مكنتش شبهها كانت هتبقى مشكله
••وحطتله حبايه وسطهم..ورجعت كل حاجه زي ماكانت••
صفاء:خلصت ياعمي ولا لسه؟
طاهر:اه يابنتي خلصت
••وطلع من الحمام وسندته لحد السرير••
طاهر:ربنا يخليكوا ليا..ولاد أخويا زي ولادي بالظبط.. نفس المعزه والله.. ربنا يباركلكم في حياتكم
صفاء:يارب ياعمي
صفاء:احنا وانت.. واحد..صحيح خدت علاجك ولا لسه؟
طاهر:لا لسه كويس انك فكرتيني..انا كنت نسيت الموضوع ده خالص..بيني وبينك بقيت أكسل
صفاء:لا ياعمي لازم تهتم بعلاجك احنا ميهمناش غير صحتك..انا هجيبلك كوباية المايه واديك العلاج
طاهر:مش عايز اتعبك ياصفاء
صفاء:لا متقولش كده هزعل منك..ثواني أجيب المايه
••وراحت تجيب المايه ورجعت..تديله البرشام•••
صفاء:بألف صحه وهنا..انا همشي بقى علشان ابويا ميتأخرش عليا
طاهر:ماشي خدي بالك من نفسك
صفاء:حاضر.. يلا سلام
••ومشيت وهى دقات قلبها بتزيد!… وبعد دقايق كان طاهر ابتدا يتعب وكان بيتألم ومحدش سامعه!..لحد ماوقع على الأرض وبقى يزحف لحد ما قطع النفس!••
<عـنـد مصطفى>
••وصل شقة أخوه اللي في الجونه..خبط على الباب وكان كله يقين انه هيلاقيه هنا..لحد ما رشاد فتحله وهو بيعيط.. أول ماشاف أخوه في الحاله دي رماه في حضنه••
مصطفى:كان قلبي حاسس انك هنا..ليه مشيت من المستشفى!.. احنا محتاجينك وسطنا..وانت أكيد محتاجنا معاك!.. مينفعش تبقى لواحدك يا رشاد!
رشاد:انا عايز أبقي لواحدي..مش عايز حد..انا تعبان يامصطفى وتعبي بيزيد كل يوم عن اللي قبله..أكيد قتلوا يوسف زي ماقتلوا دينا!
مصطفي:لا بعد الشر.. إن شاء الله يوسف هيكون عايش.. متخافش..تعالى معايا.. بابا وماما هيموتوا عليك
رشاد:صدقني مش قادر..ليا مليون ذكرى هناك..مش قادر انسى..انا مش قولتلك عايز أبقي لواحدي؟
مصطفى :صدقني مش هينفع..اهدى طيب وتعالى معايا..مانا مش هسيبك لواحدك!
رشاد:طيب بس ياريت يامصطفى تبلغهم ان انا مش مستحمل أي كلمه!.. وإلا خليني هنا أحسن!
مصطفى:هقولهم وهنعمل كل اللي انت عايزوا بس ارجع!
••بص له رشاد وهز راسه..ودخل يلم حاجته ونزل معاه••
<عـنـد دالـيـدا>
••رجعت من برا، وكان كلها أمل تتقبل في الشغلانه.. فتحت الباب ودخلت••
داليدا(بصوت عالي) :عامل ايه يا بابا.. انت كـ...
••ولسه بتكمل الجمله لقيته مرمي على الأرض ونازل من بؤه رغاوي!..وجسمه بارد مبيتحركش.. صوتت وجريت عليه••
داليدا(بصريخ) :باباااا.. حبيبي...مالك؟
••هزته متحركش!..مسكت ايده تشوف النبض مفيش!..حتى جسمه متلج وابتدا لونه يزرق..تنحت وفقدت النطق!••
داليدا(بتلعثم) :با..... ياب... بابا!... با... با!!!
••وفتحت باب الشقه وخرجت تصوت••
داليدا(بصويت) :الحقووووني... الحقوووني.....بابااااا...الحقوووووني!!!
••ولما الجيران سمعوا صويتها..طلعوا يجروا يشوفوه••
داليدا(بصويت) :الحقوووني ابوس ايديكم
••ولما دخلوا جوا وحركوه اكتشفوا انه ميت.. وده كان باين على ملامحهم..وداليدا كانت متنحه من الصدمه••
_لا اله الا الله.... لا اله الا الله
=ده مات.. جسمه ازرق
_ايوه...انا لله وانا اليه راجعون
داليدا(بصويت) :لاااااا... بابااااا لاااااا... يابابااااا
••واترميت على الأرض تحضنه وتصوت••
داليدا(بصويت) :لا يابابااااا لااااااااا
••وأغم عليها ولما فاقت لقيت نفسها نايمه على السرير وأختها ومرات عمها وكام ست من قرايبها قدامها..وكانت فريده أختها وشها أحمر من كتر العياط!••
حسناء:شدي حيلك يا داليدا.. كلنا لها ياحبيبتي
_لا حول ولا قوة الا بالله
داليدا : __________
فريده(بعياط) :مش قولتلك يا داليدا ان بابا هيموت! مصدقتنيش ويومها زعلتي مني
داليدا(بصويت) :انا مش عايزه اسمع حاجه.. مش عااايزه!
حسناء:خلاص يافريده بلاش تزودي الهموم على أختك هى زايده خلقه..ربنا أعلم برضه بكل واحد واللي فيه
_كان طيب لـ شهادة ربنا
داليدا(بصويت) :باباااا مات مسموم!!!مماتتش من الكانسر!..انا هتجنن ازاي!!!..ازاي ده حصل!
فريده(بعياط) :انا هموت نفسي لو بابا مرجعش تاني..انا مش هقدر أعيش من غيره يا داليدا
داليدا(بتحضنها) :بعد الشر عليكي...متقوليش كده تاني
•• وبعد ماخدت أختها في حضنها..سابتها وقامت من على السرير وابتدت تبص في كل الأماكن زي المجنونه..وابتدت تصرخ بشده••
داليدا(بصويت) :يا بابااااااااا... يابابااااااااا
••قامت حسناء مرات عمها وحضنتها••
_لا اله الا الله
داليدا(بصراخ) :هعيش من بعده ازاي؟؟.. ده هو كان كل حاجه لينا من بعد ماما..ده كان أحن علينا من نفسنا..ماهو الموت كده مابياخدش غير الطيبين
حسناء:هدي نفسك ياحبيبتي.. ربنا يرحمه...ده في مكان أحسن دلوقت...ده عند اللي خلقه..ادعيله بالرحمه
داليدا(بصراخ) :بابا عمره ما أذى حد ولا دايق حد منه!..ليه راح من وسطنا بدري كده؟..ده احنا اتفقنا محدش فينا يبعد عن التاني مهما حصل..ده انت عمرك ماخلفت وعدك معانا.. جاي في دي وتخلف وعدك؟
حسناء:مش بمزاجه ياداليدا ياحبيبتي.. ده قضاء وقدر..وبعدين انا هنا أمكم التانيه
داليدا(بصريخ) :اطلعواااا براااا انا مش عايزه حد معايا... يلااا براااا
••خرجوا كلهم وسابوا داليدا لواحدها.. لحد مافتحت الدولاب وطلعت صورة باباها وحضنتها وهى بتبكي••
<عـنـد مـصـطـفـى و رشـاد>
••رجعوا البيت وأول ما أهله شافوه جروا عليه وخصوصاً مامته عائشه••
عائشه:رشااد ابني...وحشتني اوي..كده تخوفنا عليك؟
رشاد:انا مش قادر اتكلم في حاجه..هدخل أنام
عائشه:ماشي ياحبيبي هنسيبك على راحتك
••ودخلت معاه الأوضه لحد ما نام على السرير وهى خرجت.. ورجعت قعدت في الصالون وهى بتعيط ••
والد رشاد:الحمدلله ان رشاد بخير..ضربتين في الراس بتوجع يا عائشه
عائشه(بعياط) :عندك حق..انا كنت خايفه عليه اوي..لو كان حصله حاجه انا كنت هروح فيها
والد رشاد:مينفعش نسيب حقنا لـ ضياء لاشين.. حقنا لازم يرجع
عائشه:كفايه مشاكل بقى احنا مش ناقصين وجع قلب.. كفايه اللي حصل
والد رشاد:وهو بعد كل اللي عمله فينا من بداية مشكلة العربيه لحد دلوقت وهنقعد حاطين ايدينا على خدنا؟
<فلاش باك>
••في يوم كانت الأسره خارجه خروجه عائليه،واللي كان سايق هو حما رشاد..وفي الوقت ده اتصل بيه صديقه..ولما بص في الموبايل..مكنش مركز للسواقه وده اللي خلى عربيته تخبط في عربية ضياء••
مديحه:ركز في السواقه بلاش التليفون دلوقتي...وجدي...الحق!
••وللاسف خبط فيه غصب عنه..نزل ضياء هو والبودي جارد.. وكان متعصب جداً وابتدا يغلط في وجدي••
ضياء(بزعيق) :ايه ياحيوان مش تاخد بالك؟
••ولما رشاد لقى إن حماه بيتغلط فيه مكنش ينفع يسكت..ونزل من عربيته وبعد منه حماه••
رشاد(بزعيق) :لولا غلطك فيه كان زمان اتأسفنا والموضوع انتهى.. لكن انت زودتها
ضياء:أخرس ياكلب.. ده انتوا شوية رعاع متسووش جنيه..انا هدفعكم حق العربيه كويس اوي
وجدي(بزعيق) :احترم لسانك.. هتغلط فينا..احنا كمان هنغلط فيك محدش هيسكتلك
رشاد(بزعيق) :استنى بس ياعمي..انا هوديك ورا الشمس وهعلمك ازاي تحترم لسانك بعد كده
ضياء(بسخريه) :اخرس يا هلفوت..انت والجربوع اللي معاك
••وبعد الكلمتين دول..راح رشاد ماسك في ضياء وحاول يضربه هو وحماه..نزلت مراته وحماته من العربيه••
دينا(بصويت) :خلااص بقى خلاااص
مديحه(بصويت) :بلاش يا وجدي أرجوك
رشاد(بزعيق) :مش انا اللي اتهزق من كلب زيك
••والمشكله كبرت مابينهم لدرجة انها وصلت للقسم••
الظابط:ايه اللي حصل؟
••وبعد ماحكوله اللي حصل.. كان الظابط جاي في صف ضياء لاشين..وهما ماشيين كان ضياء مبتسملهم.. لحد مادير وشه ومشى..وبعد شويه اتصل على رشاد..رقم غريب أثناء ما كان هو سايق••
وجدي(منفعل) :بقى انا يتعمل فيا كل ده؟.. ويجي في صفه؟.. قانون ايه ده اللي بيحمي المواطنين؟دي كوسه!
مديحه:بقى انا اشوف جوزي وجوز بنتي بيتهانوا قصاد عيني؟
دينا:لو سمحتي ياماما بلاش الطريقه دي..بابا و رشاد هياخدوا حقهم بالقانون
مديحه(بتريقه) :وهو بعد اللي سيادة الظابط قاله..بقى في قانون؟
رشاد:الو
_لو عايز تحافظ على نفسك ومراتك وابنك يبقى اتنازل عن المحضر.. ده لو عايز يعني
رشاد(بزعيق) :مش هتنازل عن حاجه وتهديد مبتهد...
••ولسه بيكمل كلامه السكه اتقفلت في وشه..وده اللي أثار عصبيته أكتر••
رشاد:ده قفل!!..مش هيحصل ولو على جثتي!
-------------------------------------------------------
••راح والد رشاد مطلع موبايله واتصل على بنت يعرفها••
والد رشاد:ازيك يا مايا عامله ايه؟
مايا:الحمدلله يااونكل
والد رشاد:كنت عايزك في مهمه حلوه زيك
مايا:مهمة ايه دي؟
والد رشاد:لا الكلام في الموبايل مينفعش.. احنا نتقابل ونتكلم وجهاً لـ وجه.. قوليلي انتي فاضيه امتي؟
مايا: فاضيه دلوقتي
والد رشاد:خلاص حلو اوي نتقابل
مايا:خلاص يااونكل تمام
والد رشاد:مع السلامه
••وبعد ماخلص كلام معاها..كانت عائشه سامعه كل كلمه••
عائشه:مين دي وفي ايه؟
والد رشاد: دي مايا بنت نور.. نور صاحبي مش فاكراه؟
عائشه:لا فاكراه بس انت عايزها في ايه؟
والد رشاد:مش عايز أتكلم وأقاطع مش يمكن متوافقش؟
عائشه:ماهو فهمني انت عايز ايه!
والد رشاد:عايزها في مهمه..انا كنت عايزها تدخل تحت جناح ضياء لاشين وتجيبلي سره
عائشه(بسخريه) :ياه وبالسهوله دي؟.. ايه عرايس في ايدك هتحركهم على مزاجك!
••واتغيرت نبرة صوتها من السخريه لـ زعيق••
عائشه:مش كفايه اللي حصلنا من تحت راسه..رحم الله امرأ عرف قدر نفسه!..ماقولنا بلاش لعب معاه..انت عايز توصل لـ ايه؟
والد رشاد:دي غلطتي اني حكيتلك..على العموم انا حطيته في دماغي خلاص
عائشه:استنى هنا..متضيعناش بسبب أفعالك الغلط دي!
••ومشيت وراه تكلمه لحد ماخرج من الشقه••
عائشه:طبعاً ما دي عادتك ولا هتشتريها؟
<عـنـد دالـيـدا>
••كانت قاعده وحاضنه اختها..وبيعيطوا هما الاتنين..مكنتش مصدقه اللي حصلهم وإن باباهم خلاص مات!..لحد ما جات حسناء ووراها بنتها صفاء••
حسناء:عامله ايه ياحبيبتي دلوقتي؟
داليدا:___________
حسناء:ليكي حق بصراحه..الأب مبيتعوضش برضه..خصوصاً بقى لو كان حنية الدنيا فيه..أبوكي ده كان غالي عندنا كلنا
صفاء:انا كنت قاعده معاهم امبارح!.. كان كويس ومفيهوش حاجه!.. معقول راح بالسرعه دي؟
حسناء:الدنيا مبتدومش لحد..محدش عارف ايه اللي الأيام مخبياه!
صفاء:عندك حق...ربنا يرحمه
حسناء:يارب...طبعاً انتوا الاتنين زي بناتي ربنا العالم بغلاوتكم جوا قلبي..أي حاجه تحتاجوها هتلاقوني تحت رجليكم
داليدا(بحزن) :شكراً منجيلكيش في حاجه وحشه
••يجي ماهر من وراهم هو وابنه سامي••
ماهر:ازيكم يابنات؟..انا هنا أبوكم.. ورقبتي سداده..شاوروا بس وهتلاقوا الدنيا كلها تحت رجليكم
حسناء:كنت لسه بقولهم نفس الكلام ده
سامي:شدي حيلك يا داليدا
حسناء:طيب احنا هنسيبهم بقى على راحتهم وكل يوم هنعدي نتطمن عليكم
سامي:لا كل يوم ايه.. كل ساعه.. ده احنا هنبات هنا
حسناء:كان على عيني ابات معاكم.. بس مش هينفع..هبقى اعدي كل شويه وخلاص
داليدا(بحزن) :ماشي ياطنط
حسناء:يلا بينا ياماهر..سلام يابنات
••وخدت جوزها وعيالها ومشوا..وقامت داليدا تطفي النور وفردت نفسها على السرير رغم ان مش جايلها نوم••
<عـنـد والد رشاد>
••راح يقابل مايا بنت صاحبه..ركبت جنب منه في العربيه بعد ماسلمت عليه••
مايا:مقولتش عايزني في ايه؟
والد رشاد:في ولد حلو شغال عند ضياء..عايزك تتصاحبي عليه
مايا:وانا اتصاحب عليه ليه؟
والد رشاد:علشان لو اتصاحبتي عليه هتاخدي دول
••وطلعها رزمة فلوس محترمه!..ابتسمتله وهزت راسها••
الفصل الرابع
مايا:هعمل ايه بقى؟
والد رشاد:هقولك..واسمعي كلامي بالحرف الواحد
<عـنـد مـصـطـفـى>
••رجع البيت لقى مراته قاعده مستنياه في الريسيبشن…وأول مادخل الشقه..قامت وقفت وهى ملامحها غضب••
مروه:لسه فاكر ترجع بيتك دلوقتي؟
مصطفى:انا لقيت رشاد..والحمدلله رجع وسطنا تاني
مروه:مش مشكلتي يامصطفى..انت دورت على نفسك..مفكرتش فيا ولا في اللي كان ممكن يحصلي..دخلتونا وسط المشاكل والقرف!..مابقتش لاقيه الأمان وسطكم..وحاسه إن في أي لحظه ممكن يا ااتخطف يااتقتل
••فضل مصطفى مستني مراته تخلص كلامها..وكان مستغرب كمية الانانيه اللي فيها لحد ماقرر يتكلم••
مصطفى:خلصتي كلامك يامروه؟..انا بس عايز أسألك سؤال..ايه الانانيه اللي انتي فيها دي؟..انتي مش همك غير نفسك وبس؟..كل حاجه انا انا انا..طب وانا فين؟
مروه:طلقني يامصطفى
••وأول ما مصطفى سمع الجمله دي من مراته..اتصدم ومابقاش عارف يعمل ايه!..وقرر يتمالك أعصابه••
مصطفى:انا مش هرد عليكي..وهسيبك تفكري مع نفسك وتعرفي حجم غلطك..اللي متقفش جنب جوزها في الظروف اللي زي دي متستحقش انها تبقى على ذمته ثانيه واحده.. بس انا مش هطلقك..لان انا مش زيك..قليل الأصل وبنسى كل المعروف لمجرد انها جات عند مصلحتي
مروه(بصدمه) :انا قليلة الأصل؟...رد عليا!
••سابها مصطفى ودخل الأوضه وهى دخلت وراه وهى مصدومه من كلامه عنها••
مروه(بزعيق) :انا هروح بيت أهلي وورقتي توصلي..حقيقي نزلت بمستوايا من ساعة مااتجوزتك..جوازه تِعر
••اتصدم مصطفى من كلامها وفضل ساكت مبينطقش لحد ماخدت حاجتها ومشيت وكل ده وهو مصدوم منها..كان متوقع انها تقف جنبه ولكن اتفاجئ انها انانيه! ••
<تـانـي يـوم عـنـد دالـيـدا>
••صحيت من النوم بعد محاولات نوم كتيره..كان قلبها واجعها جداً بعد وفاة والدها..ومش عارفه هتتصرف ازاي من غيره..هتصرف على أختها ازاي؟..مابقاش ليهم ضهر ولا سند… ولما صحيت ملقتش فريده جنبها… خرجت من الأوضه لقيت فريده قاعده على الانتريه وماسكه صورة باباهم وبتعيط…قربت منها وحضنتها ••
داليدا:متعيطيش..انا متأكده ان بابا مرتاح دلوقتي..انتي كنتي شايفه قد ايه هو تعبان ومتدمر..انا مش عارفه هو ازاي مات مس...
••وكل ماتيجي تكمل كلمة "مسموم" مبتقدرش وبتعيط••
داليدا:مات مسمووم!..وازاي وهو كان لواحده!..انا مش عارفه آخد أي خطوه حاسه كأني متربطه في مكاني..فراقه قطم ضهري نصين..هنعيش ازاي من بعده؟
فريده:انا مابقاش ليا حد غيرك يا داليدا..انتي مامتي قبل ماتكون اختي
داليدا:عارفه والله..انا مش هكون مامتك وبس.. انا هكون مامتك وباباكي واختك وكل الناس ليكي..اوعدك ان محدش هيقدر يمسك طول مانا معاكي..وهعيش علشان أسعدك..احنا ملناش غير بعض...ياااارب
••رن جرس الباب..قامت داليدا تفتح لقيتها حسناء مرات عمها وصفاء..ومعاهم أكل وعصير••
حسناء:شدي حيلك كده..كلنا لها ياحبيبتي
••وقربت منها تحضنها، ودخلت جوا..وصفاء قربت تحضنها••
صفاء:ربنا يجعلها آخر الأحزان
داليدا(بحزن) :يارب
••ودخلوا المطبخ يحطوا الأكل،ورجعوا قعدوا تاني••
صفاء:ربنا يرحمك ياعمي..ويجعل مئواك الجنه
حسناء:يااارب..المهم قومي ياداليدا انتي واختك انا مجهزالكم فطار حلو من عمايل ايديا..مش معقول ياحبيبتي من امبارح وانتوا مكلتوش حاجه
داليدا:ويجيلي نفس آكل منين؟
حسناء:هو زعلك يعني هيرجع اللي راح؟..اهو أمر ربنا ياحبيبتي..الدنيا مبتقفش على حد!
داليدا(منفعله):بابا مكنش أي حد!..بابا كان كل حاجه لينا في حياتنا!
حسناء:طيب اهدي بس..انا هقوم احطلكم الأكل..لازم تاكلوا وإلا هتضعفوا..الصحه مبتتعوضش اسأليني انا
••وقامت دخلت المطبخ..وشويه وجات جارتهم أم خالد وفي ايديها ٢٠٠ جنيه••
ام خالد:ازيكم يابنات..ازيكم ياحبايبي؟..انا جايه اتطمن عليكم
••وقربت من داليدا حضنتها واديتها في ايديها الفلوس••
داليدا:لالا مش عايزه حاجه!..بابا كان مدينا اللي يكفينا وزياده
أم خالد:اسمعي بس متكسفيش ايدي..خديهم دول حاجه بسيطه..ولما تقفوا على حيلكم ابقي رجعيها..اعتبريها سلف
داليدا:لا انا مش هاخد حاجه..احنا معانا ربنا
صفاء:ماتاخدي منها ياداليدا..حد يقول للرزق لا؟
داليدا:انا مش عايزه حاجه..شكراً
صفاء:برضه اللي فيكي فيكي
<عـنـد مـايـا>
••كانت قاعده في كافيه باللابتوب.. و بعد ماعرفت اسم الولد اللي والد رشاد عايزوا..عملت سيرش على الفيس بوك علشان تجيب الاكاونت بتاعه..ومكنتش لاقيه الاكاونت !..ولكن استمرت لحد ماأخيراً لقيته واكتشفت انه معاها في نفس الجامعه!..وقتها ملامحها اتبدلت لـ فرح..دخلت على موقع الجامعه وابتدت تعمل سيرش تعرف عنه تفاصيل أكتر..في فرقه كام ومدرج كام وهكذا!..لحد ما لقيته! وقتها الابتسامه زادت أضعاف..وقررت تاني يوم انها تروحله المدرج وتخترع أي حجه علشان تتكلم معاه••
مايا(مبتسمه) :That's great
••جه الجرسون يسألها تشرب ايه••
الجرسون:حضرتك طلبتي حاجه ولا لسه؟
مايا:لا لسه..ممكن white iced mocha
الجرسون:تحبي حاجه تانيه؟
مايا:لا ميرسي
الجرسون(مبتسم) : You Are Welcome
<عـنـد رشـاد>
••كان قاعد على السرير وماسك الموبايل بيشوف صور ابنه وهو بيبي..و دموعه نازله كان خايف انه يكون اتقتل زي مراته وأهلها!..لحد ما أخته سلمى دخلت وهى حزينه••
سلمى:رشاد..في ناس برا جايين ياخدوا عزاء دينا وأهلها
••راح رشاد حادف الموبايل علي السرير وقاملها بكل شر..وابتدا يقرب من أخته لدرجة انها خافت ورجعت لـ ورا••
سلمى:ايه يارشاد مالك؟
رشاد(بعصبيه) :قوليلهم يمشوا..انا مش هاخد عزاء حد..دينا ملهاش عزاء غير لما حقها يرجع!فاهمه ولالا
سلمى:يارشاد من فضلك وطي صوتك هيسمعوا!
رشاد:يسمعوا ميسمعوش مش شغلانتي!..عرفتي هتقوليلهم ايه!.. مفيش عزاء لـ دينا لحد ما حقها يرجع!
سلمى(بخوف) :طيب خلاص ماشي
••وخرجت من الأوضه وهى خايفه..لحد ما قابلتها عائشه••
عائشه:رشاد جاي؟
سلمى:مش هيجي يا ماما..ادخليله انتي حاولي معاه..انتي مشوفتيش عمل ايه! بجد رشاد بقى خطر علينا!
عائشه(بإستغراب) :خطر علينا؟ ياحبيبتي ده اخوكي متقوليش عليه كده هو بس طبيعي يكون متأثر..روحي انتي بس اقعدي معاهم وانا هشوف الموضوع ده
سلمى:حاضر يا ماما
••وسابتها ودخلت الأوضه لـ رشاد..كان واقف قدام المرايا بيبص لـ ملامحه الباهته الحزينه••
عائشه:رشاد ياحبيبي..الناس برا مستنياك..مينفعش كده مش عايزين حد يزعل مننا!
رشاد(منهار) :مش قادر أشوف حد ولا اتكلم مع حد..انا تعبان اوي يا ماما..ليه كل ده بيحصلي؟..ده انا ملحقتش اتهنى بـ شبابي..وخدت الألم بدري!
عائشه:بعد الشر عليك من أي حاجه وحشه..تفتكر ان انا مبسوطه بعد اللي حصل؟ مانا كمان قلبي بيتقطع..حبيبي يا يوسف..عارفه انك خايف عليه..بس احنا مسكتناش!..احنا قدمنا بلاغ وان شاء الله هـ...
••راح رشاد منفعل زياده وقاطع كلامها••
رشاد(بزعيق) :بلاغ ايه؟؟..دول هيبتدوا يتحركوا بعد مالدنيا اتخربت..واحنا هنا بناكل في نفسنا وبنموت بدل المره مليون..حرام اللي بيحصل ده حراااام!
عائشه(بعياط) :مش قادره أشوفك كده..انتوا عيالي واللي يمسكم..يمسني.. بس ان شاء الله قريب كل حاجه هتتعدل
رشاد(بعياط) :ولو كل حاجه اتعدلت..تفتكري ده هيرجع اللي راح؟..انا عن نفسي معتقدش لان اللي راح مش هيرجع مهما حصل
••قربت عائشه منه وخدته في حضنها وطبطبت عليه••
<عـنـد سـامـي>
••كان قاعد مع ماهر في الورشه..لأ وبيشربوا شاي!••
سامي:وانت مش خايف اننا نتكشف قدام الناس وتبان عاملتنا السوده دي؟
ماهر:ونتكشف ليه؟..إذا كان أختك كانت مخبيه وشها وهى داخله البيت..يبقى هيتعرف منين؟
<فـلاش بـاك>
••قبل ما صفاء تدخل الشارع كانت لابسه نقاب..وبمجرد انها دخلت البيت..قلعته وحطيته في الشنطه..ولما طلعت لـ عمها وخلصت المهمه..وهى نازله لبسته تاني••
_____________
سامي:وتفتكر داليدا هتوافق عليا لما تبقى مكسوره من غير أبوها ولا هترفض؟
ماهر:داليدا مش هتوافق غير في حاله واحده..لما كل الأبواب تتقفل في وشها ومتلاقيش غيرنا..وقتها هتوافق ورجليها فوق رقبتها..وبعدين هو طاهر كان بيعملهم ايه؟ بالعكس ده كان تعبان 24 ساعه وراقد في السرير..هو كده كده كان ميت ومش كان بيدعي ربنا وبيقول يارب عجل بـ لقائي بيها؟..ادينا اهو حققناله مطلبه
سامي:لأ والأنيل من كل ده..كانوا هيلهفوا بتاع ٣ مليون جنيه مش احنا أولى بيهم؟ على الأقل هو عنده بنات..لكن انت عندك ابنك اللي عايز تجوزه!
ماهر:عرفت ان كل ده كان من مصلحتنا احنا؟..وبعدين احنا مبنظلمش حد..بكرا لما تتجوز داليدا هتبقى فلوسك وفلوسها واحد يعني مكلناش حاجه عليهم برضه
سامي: ده زائد يعني هما هيعملوا ايه بالـ ٣ مليون مره واحده؟.. انت ممكن تراضيهم بـ ٢٠٠٠ جنيه وبـ خالصو
ماهر:ممكن برضه بحيث لو عايزين يشتروا طلبات للبيت..انا عايزك بس دلوقتي تروح تعرض عليها المساعده عايزك تكبر في نظرها عشان تحبك
سامي:ايوه كده يا ماهر ياجامد.. هو ده الكلام الصح.. أحبك وانت فاهمني وعايز مصلحتي
ماهر(بيضحك) :ربنا يخليني ليكم
••وقام من مكانه، ومشى راح لـ بيت عمه طاهر••
حسناء:يلا يابنات كلوا..هتفضلوا قاعدين كده لحد امتى؟
أم خالد:ماتدوقيني من الأكل..انتي قاعده تعزمي عليهم وسايبه الست الغلبانه اللي قاعده معاكم دي؟
حسناء:لا انتي بالذات انا شايلالك حاجه انتي بتحبيها ياام خالد..مش انتي اسمك ام خالد برضه؟
ام خالد:أم خالد او ام مدحت..شوفي يعجبك ايه واندهيني بيه
حسناء:ماشي ياام خالد..تعالي معايا اوريكي نصيبك
••وخدت أم خالد معاها ودخلوا المطبخ..وفتحتلها العلبه••
حسناء:دول ليكي
ام خالد:فطير مشلتت مره واحده؟ ده ايه الهنا اللي انا فيه ده.. أما قوليلي انتي عرفتي منين ان انا بحبه؟
حسناء:العصفوره قالتلي..ومعاه العسل والجبنه وكل اللي قلبك يحبه
••رفعت أم خالد ايديها وابتدت تدعيلها••
ام خالد:روحي ربنا يسترها معاكي ويرزقك بالخير..ويخليلك عيالك ويراضيكي ويفرحك
حسناء:اللهم آمين يارب
••ولسه بتمد ايديها تاكل،راح حسناء باعده ايديها وكشرت••
حسناء:مش هتدوقي لقمه غير لما تسمعي اللي هقولك عليه
أم خالد(مستغربه) :ايه.. ماتتكلمي؟
حسناء(بصوت واطي) :على الله حد يعرف حرف من اللي هقولهولك ده
ام خالد:لا متخافيش ده انتي سرك في بير..يلا اتكلمي
حسناء:انتي عارفه ان انا عندي عريس زي القمر..معرفش شوفتيه قبل كده ولالا!
ام خالد:شكلي كده شوفته..بس ماله عايزه ايه برضه؟
حسناء:عايزاكي تقنعي داليدا بالعريس اللي هو ابني يعني..تقوليلها كلام حلو عنه..تحببيها فيه بمعنى الكلمه
ام خالد:من عينيا دي قبل العين دي.. بس كده؟
••وراحت معليه صوتها••
ام خالد:ده عريس زي الفل...عريس زي السكر...هتحبيه اوي.. ده كل البنات بتج...
حسناء(بتقاطعها) :مش دلوقتي! بلاش غباء! متوديناش في داهيه..عرفتي هتعملي ايه؟
ام خالد:حاضر يا....
حسناء:اسمي حسناء او أم سامي
ام خالد:عاشت الاسامي ياام سامي.. هيهيهي لا لايقه
••دخل سامي شقة عمه طاهر..وكانت داليدا قاعده جنب فريده ولابسين إسود ووشهم حزين..ومعاهم ستات بيعزوا..قرب منها هى وأختها واتكلم••
سامي:قلبي عندك يابنت عمي..صعبانه عليا
••بصتله داليدا بـ قرف وسكتت متكلمتش••
سامي:عمي ده كان غالي علينا كلنا..الله يرحمك ويغفرلك ياعمي ياحبيبي
داليدا(بـ ذكاء) :عايز ايه ياسامي؟..وبتلف وبتدور كتير ليه؟
••وراحت قايمه وواقفه قدامه بكل ثقه وهى مربعه ايديها••
سامي:هو ايه اللي عايز ايه؟..واحد جاي يواسيكي في شدتك ده بدل ماتقوليله شكراً وتشيليهاله جِميله فوق دماغك لأ بتقوليله عايز ايه؟
داليدا:ماهو بص..جو اواسيكي والله يرحمك ياعمي ده مدخلش دماغي..انت اللي زيك ميقربش غير وفي دماغه حاجه عايز يوصلها
سامي:طب وليه سوء الظن ده؟ ليه متقوليش ان انا جاي اعمل خير؟
داليدا:انزل تحت مش عايزه أشوفك هنا
••ابتدا سامي نبرته تتغير للعصبيه وقرب منها أكتر وهمس في ودانها بصوت واطي••
سامي:انتي فاكره انك لما تعملي كده هطلعك من دماغي؟..لا انا كده بحطك في دماغي أكتر من الأول ياداليدا!..سامي ميترفضش.. وايه رأيك ان انا وانتي هنتجوز الخميس الجاي
داليدا(بزعيق) :انت عبيط؟؟..تتجوز مين؟ تتجوزني انا؟.. ده انت بتحلم!..انا مستحيل اتجوزك لو آخر راجل في الكون مش هيحصل!
سامي:تيجي نتراهن ياداليدا؟
••تيجي حسناء من المطبخ هى وأم خالد على الصوت••
حسناء:مالك يا داليدا صوتك عالي ليه؟
داليدا(بزعيق) :خدي ابنك واطلعوا برا..انا مش عايزه اتجوز..دي حياتي وانا حره فيها!
حسناء:تتجوزي وايه اللي جاب سيرة الجواز دلوقت؟
صفاء:ماله أخويا يا داليدا مش قد المقام ولا ايه؟إكمن مقامك عالي
داليدا(بزعيق) :لا مقامي عالي ولا مقامي واطي.. انا عايزاكم تسيبوني في حالي..ولا بتستغلوا موت بابا علشان تتلموا عليا زي الغجر؟
حسناء(بزعيق) :احنا غجر يا داليدا؟ كتر الف خيرك يامحترمه..يلا ياصفاء يلا ياسامي دي غلطتنا اننا قدرناها.. الله يرحمك يا طاهر معرفتش تربي صح
سامي(بزعيق) :مش هسيبك يا داليدا..انا وراكي والزمن طويل
••وخد أمه واخته ومشوا..وداليدا اترميت على الكنبه تعيط••
<عـنـد والد رشـاد>
••بعد مارجع البيت لقى ضيوف عندهم جايين يعزوا في دينا وأهلها..قرب يسلم عليهم••
والد رشاد:يااهلاً بـ حضراتكم نورتونا
هشام:اهلاَ بـ حضرتك..احنا كنا جايين نعزي في أستاذه دينا الله يرحمها
••قعد والد رشاد جنب بنته سلمى••
والد رشاد:كتر ألف خيركم منجيلكمش في حاجه وحشه
جايده:البقاء لله ياعائشه شدوا حيلكم
عائشه: ونعم بالله..الحمدلله..متقدرش نقول غير كده
مروان:اللي حصل اه كان صعب..بس ده اختبار من عند ربنا
عائشه:طبعاً أكيد.. واحنا ان شاء الله قده وقدود
جايده:ربنا يصبركم
••وأثناد ماهما قاعدين بيتكلموا..والد رشاد افتكر في خياله..لما كان حما رشاد بيحكي لـ صاحبه الموقف اللي حصل مع ضياء لاشين••
<فـلاش بـاك>
••وجدي ووالد رشاد كانوا قاعدين مع صاحبه فاروق في بيتهم••
وجدي:وبس يا سيدي ده اللي حصل..مش عارف أرجع حقي ازاي..انت عارف مبحبش اسيب حقي مهما حصل!
فاروق:متقلقش انا هرجعلك حقك..سيبها عليا ده احنا عِشرة عمر ياأخي.. انا اتدايقتلك..كأن انا اللي حصل معايا كل ده
وجدي:هو انت شايفني قدامك عيل صغير علشان ترجعلي حقي؟.. انا هرجع حقي بـ ايدي
فاروق:عيب عليك بلاش الكلام ده ولا انت عامل فرق مابينا ولا ايه؟
وجدي:لا طبعاً..بس الصراحه مش حابب أدخلك في مشاكلي هو انا عويل يافاروق؟
فاروق:ماقولنا بلاش الكلام ده..اخوك وبيساعدك ايه المشكله يعني؟
وجدي:ربنا يباركلي فيك
والد رشاد:ربنا يخليكم لـ بعض يارب
••وبعد ما حما رشاد حكى لـ صاحبه..كانت الصدفه هنا إن فاروق صاحب أخو ضياء لاشين!..واللي حكاله الموقف••
علاء:ياه..ويطلع مين الراجل ده؟
فاروق:ده زميلي من زمان..من أيام الجامعه..وجدي الحصري
علاء:طيب مادام هو غالي عليك اوي كده..انا هساعدكم نرجعله حقه..الناس برضه لـ بعضها
فاروق:ياسيدي ده خير الناس انفعهم للناس..ربنا يجعلنا سبب لحل مشكلته
علاد:ليها حل انا واثق من ده
••وفضل الخبر يتنقل من شخص لـ شخص لحد ما في يوم كان علاء قاعد مع أخوه ضياء لاشين وحكاله بـ حسن نيه ومن وصف المشكله..ضياء عرف انه وجدي ولكن حب يتأكد••
ضياء: مين حد احنا نعرفه؟
علاء:هو كان قايلي اسمه واجد او وجيد الحصري... لالا انا افتكرت اسمه وجدي الحصري
••وأول ما ضياء سمع اسمه برق وسكت منطقش بـ حاجه••
علاء:بص انا داخل التويلت..هرجعلك تاني
ضياء:البيت بيتك خد راحتك
••واستنى لما اخوه دخل الحمام..وراح ماسك موبايله بكل حذر وطلع رقم صاحبه "فاروق" وسجله في موبايله وبعد مااخوه مشى اتصل عليه هدده••
ضياء:اسمع كويس..لو مطلعتش نفسك من مشكلة وجدي الحصري انا هطربقها فوق دماغك..وأظن انك عندك عيال عايز تربيهم.. فلو خايف فعلاً يبقى تبعد عن سكته..سلام
••ولما فاروق كان لسه هيرد كان ضياء قفل السكه في وشه••
فاروق:الووو... الوووو
••وفعلاً خاف على نفسه ومقدرش يساعد وجدي••
<عـنـد مـروه فـي بـيـت أهـلـهـا>
••كانت قاعده مع أهلها بتعيط••
هدى:خلاص يابنتي كفاياكي.. حد قالك تطلبي منه الطلاق؟
مروه:انا مابقتش حاسه بحب مصطفى ليا يا ماما..بقيت حاسه إني مش فارقه معاه ولا حاسه بـ خوفه عليا!
هدى:استهدي بالله ياحبيبتي..ماهو مكنش ينفع تندفعي أوي كده..كنتي اصبري لحد مايهدى.. ماهو برضه اللي هو فيه مش سهل..مرات اخوه اتقتلت هى وأسرتها..وابن اخوه اتخطف..واخوه ذات نفسه عنده حاله نفسيه صعبه..كان لازم تصبري شويه
مروه:اصبر لحد ما مصيرنا يبقى زي مصير دينا وأهلها؟.. مش لازم أخاف على نفسي!..ده حتى الخوف مستخسره فيا
هدي:معلش ياحبيبتي اهدي بس وكل حاجه وليها حل
مروه:ياماما احنا بقالنا شهرين متجوزين! ملحقناش نفرح!
هدى:بكرا الدنيا تروق وتفرحوا..خليكي جنبه وبلاش الشيطان يدخل مابينكم أكتر من كده!
مروه:لا ياماما مانا مش هرجع البيت خلاص
هدى:محدش قالك ترجعي..خليكي هنا لحد ماالأمور مابينكم تهدى وهو ذات نفسه هيجي يرجعك
مروه:تفتكري؟
هدى:طبعاً قومي بس خدي شاور وروقي دمك لحد ماأجهز الغدا
مروه:ماشي ياماما
<عـنـد دالـيـدا>
••كانت أعصابها متدمره بعد اللي حصل وبتاخد مهدئات علشان تقدر تكمل اليوم..لحد ما لقيت الباب بيخبط وقامت تفتح..لقيتها خالتها وجوزها وعيالها وأول ماشافتهم اترميت في حضنها••
داليدا(بعياط) :بابا مات يا خالتو...مات وسابنا لواحدنا
صابرين(بعياط) :ياقلبي..الدنيا جات عليكم كتير اوي..ياحبايب قلبي اتيتمتوا في سن صغير
داليدا(بعياط) :ضهري اتقطم ياخالتو
صابرين:بعد الشر عليكي ياقلب خالتك
عصام:البقاء لله ياداليدا يابنتي
داليدا:ونعم بالله اتفضلوا
••راحوا يقعدوا..وصابرين حضنت فريده••
عصام:البيت متغيرش من ساعة وفاة والدتك
داليدا:ايوه ربنا يرحمها
غاده:ربنا يرحمهم ويغفرلهم
داليدا:يارب
عصام:قوليلي يابنتي محتاجين ايه..ومش عايز اسمع كلمة شكراً انتوا زيكم زي غاده بنتي
داليدا:صدقني احنا بجد الحمدلله على كده
صابرين:ازاي بس ياداليدا.. قولي بس وهتلاقوا كل حاجه لحد عندكم
داليدا:صدقيني شكرا
••رن الجرس وراحت داليدا تفتح لقيته سامي••
يتبع