رواية كاظيمة
الفصل الرابع4
بقلم وسام الفرجاني
بالليل عاد اجوا ضيوف ع البيت وكعدوا برا بالحديقة ورحت اسويلهم جاي واسمع سوالفهم بس شنو سمعت صوت شعر راسي وكف منه .. الصوت بالضبط صوت الزلمة الملثم الي انقذني من الحمام ونطاني الدشداشة !!
بصراحة خفت لا يحجي شي يخرب عليه او صرت افكر معقولة يعرف البنت الي انقذها هنا وصرت اخربط يمكن يعرفني وهو شافني اسلك هالشارع هذا والله مدري بس شجابه هنا وشيصير لرسول هاي الي دوختني
اني ظليت كلبي يدك حتى حرارتي صعدت انوب منين اجه هذا عاد لو اعرف شيريد اول مرة اشوفه يجي هنا .. المهم شربوا جاي وخلصوا جان يجي رسول كالي حضريلي هدومي باجر نطلع ويا جماعتي سفرة للبساتين مالت القرية الفلانية
كتله هاي شنو من سفرة كل كم يوم تروحون تباتون مدري وين وسفرة وسفرة ؟ شو اول مرة اسمع بهالشغلة سفرة واحد يظل ويجي العصر جان يكول هاي كل كم يوم نلتم الشلة نطلع هيج سفرة نغير جو ونسبح بالشط ونبات ببيت واحد من جماعتنا ونجي الصبح .. القصة خاصة بصفحة وسام الفراجي
كاظمية : رسول عوف هالشغلة هاي وانتبه لشغلك ميفيدك شي ترا
رسول : قابل شمسوي متكليلي
كاظمية : ممسوي شي بس حياتك وشغلك اهم
وتعالي حضري اكل و زهاب وياهم وخبصة كتله ادلل وصرت بهالليل احضرله اكله وملابس يغير بيها من يسبح بالشط بس ظل بكلبي سؤال هذا الولد شجابه عليكم ..
كاظمية : رسول رسول
رسول : ها
كاظمية : هذا الولد الي كاعد ع يمين اول واحد منو ؟ اول مرة اشوفه بالديرة
رسول : هذا حارس هنا بالمنطقة ماصار كثير ع مشتل بيت عمي
كاظمية: اها تمام
رسول :ليش ؟
كاظمية :لا هيج بس اتاكد منه
رسول :سؤالج احس مو لله اكو شي ؟
كاظمية :شبيك رسول هو سؤال كفرت قابل ماكو شي شعندي وياه قابل
بولزت اني وهو شافني زعلت وصار يتودد اليه ويشمر كلمات حنينة طبعا اني فاقدة هيج حنان حتلو كان بوقت مو مناسب بس ع الاقل اكو شخص حنين عليك بوقت الاهل نفسهم قاسين عليك ..
رسول : اكو وحدة بلوزتها صارت شبر
(بصراحة عجبني الموضوع مال يتودد اليه حتى ما ازعل صرت اجر بظهري واتعزز)
كاظمية : مو زعلانة
رسول : والله وكت كظومة تحجي بس كلمتين وهو تثرد بالحجي من تحجي تكول شادة محرك بحلكها
(كوة سيطرت ماضحكت ع سالفته)
كاظمية : راح اروح احضرلك ملابسك
رسول : اوكفي شنو هاي الي تحت اذنج !!
كاظمية : شنو ياستار
رسول : شامة تضوي
كاظمية : اها عبالي عندك شي
(معت بس ماردت اوضح عجبتني السالفة لعد وين الكرامة بالموضوع هههه)القصة خاصة بصفحة وسام الفراجي
زهبت اله ملابسه واكله وراحوا من شروق الشمس واني طلعت غسلت الملابس بالطشت والتايت وفرك بيدية احس ايدي انتهت و شريتهن ع الحبل ورجعت كنست الكاع واني دا اكنس شفت رواء توة طالعة من باب غرفتي !!
شعندج بالغرفة ؟
رواء : ادور ع رسول وينه!
كاظمية : وشكو طابه للغرفة محد علمج الادب وكلج ميصير تطبين لغرفة غيرج دون استأذان
رواء : ايباه صارت تنطي حكم ام جعوب دسكتي اسكتي لا اندمج ع سوالفج ديربالج مني
كاظمية : اعلى ما بخيلج اركبي وبعد اذا رجلج تطب الغرفة احشها حش انطيني شنو شايلة بيدج بالعلاكة
رواء : مو شغلج هذا
كاظمية : شوفي سوالف كبل واغلس وابلع بسوالفج صارت قديمة لازم عليج لزمة افضحج بيها بين العربان خليج زينة
رواء : شنو هي بالله اتحفينا
كاظمية : بالوقت المناسب اكلج
(شو هي من هددتها هيج اني والله ع نيتي هيج بس تخويف شو انخطف لونها وحسيتها خافت واكيد عندها شي والا ما جان هزتها هالكلمة)
صار عندي فضول اتبعها وين تروح وين تجي خصوصا هم بالبيت المقابيلنا مباشر ..
العصريات مر علينا زلمة وطلعتله عمتي ..
وبعد شوي اجتني كالت هذا الزلمة منو ؟ يسال عن رسول يكول بيناتنا اتفاق واجيت عليه
كتلها والله عمة ما ادري اول مرة اشوف شكله من يجي رسول اكله ..
راحت للزلمة وعزمته يظل ع عشه وماقبل وكاللها بس من يجي رسول بلغوه لان امر مستعجل كالت امر
اجه رسول ثاني يوم وسلمت عليه وكتله شلون سفرتك كال وناسة البارحة عبرت الشط سبح ورجعت كتله خاف يصيرلك شي حبيبي ديربالك كال افا يقلد يعني اني سباح الديرة لتخافي ...
كتله رسول المي ميعرف سباح ومو سباح بوكت يريد يبلع زلمة لا سامح الله يبلعه اتوسل بيك لتروح بعد
رسول : خاف اشتاقيتي وتتحججين بهالسالفة مم
كاظمية : شوفوا وين سوالفه وتفكيره
رسول : اي لعد اكو غير هالسبب
كاظمية : اي خايفة عليك واني مرتك ومن حقي
رسول : ويلي كلبي فدوة للي يكول مرته
كاظمية : عوف الشقة اجه عليك زلمة يسأل عليك
رسول : شلون صاير شكله
كاظمية : اصلع وشواربه ثخينة
رسول : اها هذا الي عاملته ع البيت بس ها ممنوع تطلع سالفة البيت من الغرفة خليها بيناتنا ..
كاظمية : ادلل اصلا اني ردت اكلك لتخلي احد يحس بالشغلة هاي ..
كال حطلع ع هالزلمة اشوفه خاف غير رايه كتله لتتأخر شو احس نفسي مو زينة تعبانة شوي ودا ادوخ كال ان شاء الله
راح رسول واني تمددت شوي واندك باب الغرفة طلعت لكيت رواء بوجهي
كاظمية : خير ان شاء الله شتريدين
رواء :رسول موجود
كاظمية : لا خير ان شاء الله شرايدة
رواء : هيج سؤال بس ها تذكرت شتقصدين اليوم من تكولين لازمة عليج لزمة شلازمة
( اني صرت ذكية عرفت جاية ظلت بكلبها سالفة الصبح بس كلت والله فلا اريحج الا اخليج تعيشين بعذاب التفكير )
كاظمية : هئ بالوقت المناسب اسولفها ونطيتها غمزة بخبث
رديت الباب وراحت .. تمددت بس صرت احس بوجع وتأخر رسول ..
اجه رسول شافني متمددة واتأوه كال خير شبيج كتله مدري شو احس نفسي حيلي منهد مدري شبية كالي خاف تعبانة من الشغل كتله لا
صاح عمتي واجت اخذتني لعجوز بالديرة خاصة هاي بسوالف النسوان وهي تجيّب النسوان من يطلكن ومن هالسوالف راحت وياي عمتي ومرت عم رسول الي هي ام رواء جان تكول بنتكم حامل !
عمتي و ام رواء طارن من الفرحة واني مصدومة وفرحانة خبط .. القصة خاصة بصفحة وسام الفراجي ومنشورة بالواتباد
رجعنا للبيت وعمتي تهلهل وطلع رسول
رسول : ها خير ؟!
عمتي : مرتك حامل !
واجه لزم ايدي وصدك كاظمية حامل انتِ كتله اي والله بس اش لتحجي شي استحي
باوعت يمين رواء تهز بخصرها وماعاجبها تكول شبيكم قابل حتجيب ابن ولي العهد وراحت
كتله لتهتم امشي لغرفتنا ..
كتله شسويت رسول هسة صار ضروري البيت لازم نأمن مستقبل الاطفال قابل يظلون عايشين هيج بهالقرى
رسول : ترا اخذت البيت ظل بس نتكاتب ونكمل اوراق البيت
تقربت منه وكتله رورو البيت تسجله بإسمي مو علمود يظل حق لاطفالك اذا بإسم اهلك ياخذوا اهلك واحنه لازم نأمن مستقبلهم شتكول رورتي
رسول : هم صحيح ميخالف ماكو فرق اني او انت
ويروح بعد كم يوم ويسجل البيت بإسمي لا من عرف ولا من درة بس امه عرفت وكاللها شنو الفكرة وظلت ساكتة واني صراحة ما اعرف اقرأ وكالي وعادي ضميت السندات والاوراق جانت عدنا جنطة سودة مالت ابو رسول يمكن جايبها من جيش تنقفل هيج شلون دبلوماسية حاطين بيها المستندات والهويات والاوراق المهمة..
وجان يشتري بيت ويسجله بإسمي واوراقه موجودة نطاني اياهن بس شنو كلي لتطلعينه من جنطة هاي ولا تشوفي لاحد و مانتحول نخلي لوقت نعتازه كتله ميخالف لان اصلا اني بس اريد شي امتلكه بعدين لكل حادث حديث ..
يومين واندك باب غرفتنا بالليل وانها رواء خير يرواء
رواء : باجر نطلع للصريفة نوكل الدواب ونحش الحشيش ونجي
فز رسول وهو يسمع كلامها
رسول : لا عيني كاظمية متروح تعبانة ومو زينة
رواء : اهااا نسيت حامل طلعت اي مبروك مبروك تخيلي كاظمية ورسول اهله! ..شيطلع هو مفحّم
كاظمية : روحي عيني وصرت اهزلها بيدي دا اذكرها ترا احجي السالفة وهي فهمت ولفت ظهرها وراحت
كتله لرسول اذا ظلينا مكابلين هاي ترا عادي عدها تسوي شي للطفل وبكيفك عاد .. مم خليت السالفة براسه حتى نحول ع بيت ونخلص منهن ..
كم يوم وسمعت هوسة بالمطبخ لكيت رسول وعمتي اني اجيت ركض طلع كايللها اريد اعزل منا وعمتي متقبل تريده يظل وتكله حسافة التربية بيك ومتكاونين وطبعا ابو رسول مريض مقعد لسانه ثكيل ميحجي يعني عمتي هي بيدها كلشي ..
بعدين سولف ويا عمتي وكلت الها رسول مو قصده يعوفكم لا بس يشتري ويبيع يعني تجارية كالت عمتي بنتي كاظمية منو يشتري بهالزلك هذا والوضع محد يشتري بيوت بس كولوا نريد نعزل وحدنا اكلج اي صحيح كلامك ..
المهم حاولت افهمها القصة بس حسيتها قافلة ..
رسول تحول لملاك صار يسمعني حجي بعمري ما سامعته الي خلصت حياتي تنمر
جاي اطبخ واجه فات للمطبخ جان يشاورني يكلي شو حلوة طالعة اليوم ع كيفج ببنات عمي ترا محروكات من جمالج ..
اني حسيت بشعور فظيع يخبل كتله ديلا ع اساس من جمالي دتضحك عليه كالي والله انت لبوة حياتي كمر اربعطعش معليك بسوالف الناس انتِ منو يهمج رأيهم لو رأيي ؟
كتله اكيد انتَ .. كال لعد انت احلى بنت بعيوني كتله رسووول كافي عمتي حتجي .. كلي فدوة لليخجل اني اروح ... رسووووول حبيبي كافي اطلع لحد يحس
هذا وكف عندي وصار يذبلي سوالف وطبت عمتي وهو فز وغلس ع اساس ديشوف الطبخ ..
عمتي : صاير تفوت للمطبخ مو من عوايدك ممم
رسول : جوعان وجاي اشوف شطابخه
عمتي :سوالفكم ماتعبر عليه صير ثكيل ابني رسول منا العالم متباوع لمرتك شلون تنطي الوان
رسول : ههههه يمة ترا شايلة ابني ببطنها
عمتي : اي بس اثكل خلي البنية تشتغل وعوفها
رسول : من زماااان يا يمة احب اسم امجد واني ابو امجد من هسة وهاي الحلوة ام امجد
اني محجيت حرف صرت معرف الجدرية من الجفجير من كد الاحراج
رسول : شطابخين
عمتي : كلبك المطبوخ ومستوي هسة
سكت رسول وكال هالبيت مو مال رومنسيات واحد مايغازل مرته .. ضحكت عمتي وكالتلي اطبخي هذا رسول ما وراه بس هالسوالف التعبانة
صبيت الغدة وملتمين عمتي ورسول والولد واسمعه يكول لعمتي والله الي ياخذ غريبة يظل مرتاح بحياته لا عم يتدخل ولا خال
عمتي : دكافي مو سحلت روحك سحل اليوم شبيك تخبلت
رسول يضحك وكمل اكل ..
تغدوا وكملوا وجان اغسل مواعين واجه رسول
رسول : اغسلهن عنج
كاظمية : رسول مو راح تجي امك وتخبصنا انوب ليش تفشلنا
رسول : مشتاك لهالعيون
كاظمية :رسوووول بالله عليك روح والله فشلة من عمتي وعيب كل شوي تكبسنا
مد راسي ديبوس خدي وطبت عمتي يبو يبو
جان تجي عمتي وتلزم رسول من اذانه تكله مو فضحتنا شبيك اليوم انت كابة هورموناتك وصايرلي رومنسي بالمطبخ
وطلعته ع باب وهو يضحك ..
عمتي : كملي يابه وروحي للغرفة لا يفضحنا
كاظمية : عمة والله معليه صار ساعة اكله اطلع
رسول : تجذب يمة هي كالت بوسني
كاظمية : يبو يبو يرسول ايمت كتلك
عمتي : لتخافي اعرف سوالفه يلا اطلع وصير ثكيل خلي مرتك تكمل شغلها ابني
بهاللحظة اجوا اصدقائه وراحلهم وكالوله نطلع سفرة باجر
كملت شغلي ورحتله وكالي باجر طالع لتعبين نفسج وخاف يدزون عليج ع صريفة تروحين وياهم كوليلهم منعني رسول مفهوم ؟ كتله اي تدلل
كتله متشوف نفسك صاير تروحون سفرة كل يومين ثلاثة كال شسوي شغل ونكمل واحد يوَنّس نفسه ويغير جو
راح رسول ثاني يوم وحسيت بفراغ جبير جدا خصوصا متعودة عليه صرت وهذولي كل كم يوم رايحين وصارت تزعجني هالشغلة خصوصا وقت حمل احتاجه يمي
المغرب صار صياح عمتي ويمها زلم وحطيت ع راسي وطلعت شكو وشكو شبيكم شصاير كلبي حسني رسول بي شي جان يكولون رسول غرك بالشط !!