رواية جوازة ميراث الفصل السابع عشر17والثامن عشر18بقلم رانيا عماره
••قام ضياء وهو كله عصبيه••
ضياء:قدامي بسرعه
••وخدهم ومشوا من المكان السري..ولما الشرطه طلعت تدور••
الظابط(بيشاور) :هناك
••ولما العساكر دخلوا يدرورا في كل حته ملاقوش حد••
_ملقناش حد يا باشا
الظابط:ازاي ملقيتوش حد؟
_دورنا في كل حته ملقيناش حد
الظابط(مدايق) :يبقى حد بلغهم وهربوا!
<عـنـد رشـاد و داليدا>
••فريده طلعت الموبايل علشان تتصور معاهم••
فريده:يلا نتصور صوره
رشاد:يلا
••وقربت منهم واتصوروا••
داليدا:حلوه اوي
رشاد:ايوه فعلاً
فريده:تعالي صوريني هناك يا داليدا
داليدا:حاضر
••وقامت ورا أختها وصورتها••
فريده:تحفه
داليدا:زي القمر يا فريده
فريده:لا انتي احلى...انتي قمرين مش قمر واحد يا داليدا
داليدا(بتحضنها) :حبيبتي
••وفي الوقت ده والد رشاد اتصل بيه••
رشاد:ايوه يابابا
والد رشاد:ابقى تعالى نرجع أخوك البيت
رشاد:انا في مشوار دلوقتي وهرجع بالليل...بعد مااخلص هعدي عليكم
والد رشاد:واحنا هنفضل قاعدين لحد بالليل لحد مانت تخلص مشاويرك وترجع؟
رشاد:طيب ما هعمل ايه طيب؟..ولما انتوا عارفين ان مصطفى خارج والنهارده... مقولتوش الكلام ده امبارح ليه؟
والد رشاد:انا مش عايز مساعده منك..خليك في اللي انت فيه
رشاد:يا بابا هى مش بتتقاس كده!..كل الفكره ان انا معايا ناس ولو مشيت هيبقى شكلي وحش!
والد رشاد:انت حر..تيجي منين ماتيجي..احنا هناخد اخوك وهنرجع البيت
رشاد:ماشي اللي تشوفوه
والد رشاد:سلام
رشاد:سلام
••رجعت داليدا واختها على الترابيزه••
فريده(بتضحك) :ماتخديلنا شقه هنا يا داليدا
داليدا(بتضحك) :ياريت..انا لو معايا فلوس مش هتأخر ثانيه
••وبعد ماقعدوا لاحظت ان رشاد متغير••
داليدا:مالك يارشاد؟
رشاد:مفيش حاجه
داليدا:ازاي مفيش وانت مدايق اوي كده؟
رشاد(بتنهيده) :بابا اتصل وعايزني اروحلهم..بس مش هينفع انا فضيت نفسي النهارده علشان أفصل المود شويه
داليدا:طيب وايه المشكله؟..روحلهم أكيد محتاجينك!
رشاد:مانا عارف بس..انا مش كل يوم فاضي..حتى اليوم اللي بكون عايز أعدل مزاجي فيه بيبوظ!
داليدا:طيب هو أستاذ مصطفى عامل ايه دلوقتي؟
رشاد:لسه زي ماهو..مفيش جديد...المفروض يرجع النهارده ويكمل علاجه من البيت
داليدا:طيب ممكن بعد ماناكل..نروح نتطمن عليه سوا؟
••ابتسملها رشاد..وهز راسه بمعنى ماشي••
داليدا:خلاص اتفقنا
رشاد(بتنهيده) :ماما هتفرح بيكم اوي!..علفكرا هى ارتاحتلكم جداً وكل شويه بتسأل عليكي
داليدا(بإبتسامه) :انا كمان ارتاحت لـ طنط اوي..ربنا يخليهالكم
رشاد:يارب..الأكل وصل
••وبعد ما الاكل اتحط••
رشاد:شكراً
_العفو..نورتونا يافندم
داليدا:شكراً
رشاد:يلا كلوا
••وابتدوا ياكلوا••
<عـنـد مـصـطـفـى>
••كان مامته وباباه ساندينه وأخته شايله الشنطه••
عائشه:على مهلك ياحبيبي
مصطفى:رشاد هيجي امتى؟
والد رشاد:رشاد في دنيا تانيه..من الواضح ان في حاجه اهم مننا
عائشه:لا انا متأكده ان رشاد هيجي ده ابني وانا عارفاه
سلمى:رشاد عمره مااتأخر عن حد فينا في حاجه
والد رشاد:ربنا يهدي
••لحد ماخرجوا من الأوضه..لقوا بنتين جايين من بعيد في عُمر الـ 17 والـ 18 سنه..كان ساهر متابعهم من بعيد لحد مادخلوا أوضة لميس..ووقتها اتأكد ان دول بنات ضياء••
عائشه:في حاجه ولا ايه ياساهر؟
والد رشاد:لا مفيش حاجه
••لحد ماوصلوا عند العربيه ونزلوا مصطفى من على الكرسي المتحرك وركبوه في العربيه ومشوا..دخلت هنا ويمنى الأوضه عند لميس..وهى كانت في دنيا تانيه..وأول ماشافوها جروا يحضنوها••
يمنى(بعياط) :وحشتيني اوي يامامي..البيت وحش من غيرك..انا بجد زعلانه اوي على اللي حصلك..ياريت انا اللي كنت حصلي كل ده وانتي لا...ياريتك فضلتي سليمه وسطنا
هنا(ببرود) :سلامتك يامامي
لميس(بتعب) :الله يسلمكم يابنات..انتوا جيتوا ازاي؟
يمنى(بعياط) :احنا جينا من ورا بابي..لانه رافض ان حد يجيلك..بس انا مقدرتش استحمل اكتر من كده وقررت أجي اتطمن عليكي انا وهنا
هنا(ببرود) :فعلاً
لميس(بعياط) :أول مااخف وأقف على رجلي..هاخدكم ونهرب بعيد..قبل ما ضياء يعمل فيكم حاجه
هنا(ببرود) :ده لو قومتي منها يا مامي
••وقربت منها وهمست بصوت واطي••
هنا:أصل انا سمعت بابي وهو بيتفق مع رجالته انهم هيخلصوا عليكي النهارده بالليل.. فا قولت ألحق أودعك..بس بلاش تجيبي سيره قدام يمنى علشان هتزعل عليكي اوي
لميس(بتعب) :انتي بتقولي ايه ياهنا؟؟؟...ضياء عايز يخلص عليا؟..ليه كل ده؟؟.. قوموني من هنا بسرعه
يمنى(بإستغراب) :بابي ايه اللي عايز يخلص عليكي؟
هنا(مدايقه) :أوحش حاجه فيكي يا مامي انك بتطلعي الاسرار.. انا مكنتش عايزه حد يعرف الموضوع ده
يمنى(بزعيق) :موضوع ايه؟؟..ماتتكلمي
لميس(بعياط) :مشووني من هنا أبوس ايديكم!!..علشان خاطري يا يمنى
يمنى(بزعيق) :انتي من الواضح يا هنا ان عقلك ضرب منك..وإيه البرود اللي انتي فيه ده؟
••ابتسمت هنا ببرود وقفلت التسجيل الصوتي..وخرجت من الأوضه وأول ماخرجت بعتته لـ أبوها••
يمنى:متخافيش يامامي انا معاكي.. اديني ثانيه بس
••وخرجت لـ يمنى وسحبت الموبايل من ايديها••
يمنى(بزعيق) :انتي كنتي بتعملي ايه؟؟
هنا(ببرود) :ولا اي حاجه..وهاتي الموبايل ده علشان متزعليش
يمنى(بزعيق) :بتسجلي كلامنا وبتبعتيه لـ بابي؟؟.. انتي انسانه خاينه للثقه..معندكيش أمانه...انتي ازاي بتعملي كل ده مع مامي!..دي لو عدوتك مش هتعملي كده!
هنا(ببرود) :على اللي عملته معايا تستاهل أكتر من كده
يمنى(بزعيق) :ايه اللي هى عملته معاكي؟؟
<فـلاش بـاك>
••كانت هنا بتتكلم مع ولد في الموبايل..و بالصدفه كانت لميس معديه وفجأه فتحت الباب ودخلت••
هنا(بتضحك) :بس انت أحلى!...ايه ده مامي؟..انتي ازاي تدخلي من غير ماتخبطي!!
لميس(بزعيق) :انتي ليكي عين تتكلمي يا قليلة الأدب؟.. مين اللي بتكلميه ده؟... مين!!
••وشدت الموبايل منها بكل عنف وملامحها غضب••
هنا(بخوف) :انا كنت بكلم واحده صاحبتي
لميس(بزعيق) :وهى صاحبتك هتقوليلها "انت" برضه؟
هنا(بخوف) :خلاص يامامي محصلش حاجه لكل ده!
لميس(بزعيق) :ابوكي لازم يعرف علشان تبطلي قلة الأدب دي!!
••ووقتها اترميت هنا تحت رجل لميس وهى بتعيط••
هنا(بخوف) :لا اوعي تقولي حاجه لـ بابي.. علشان خاطري..بابي بالذات لا...كلنا عارفين انه يقدر يعمل أي حاجه عادي!..علشان خاطري ده ممكن يعمل فيا حاجه!!
لميس(بقسوه) :وايه المشكله...الناس هتقول في الآخر انه كان بيربي بنته!
هنا(بخوف) :ابوس ايديكي متتكلميش في حاجه!!
__________________________________________
هنا(بـ غل) :ومن وقتها وهى بتستغل اللي حصل لـ صالحها..لوي دراع يعني..ياانفذ اللي هى عايزاه يااما هتفضحني!
يمنى(بزعيق) :مش مصدقاكي...عارفه ليه؟..لانك كل نفس بتتنفسيه كدب في كدب!!
هنا(بزعيق) :انشالله عنك ماصدقتي..براحتك
••وسابتها ومشيت..ورجعت يمنى لـ لميس••
<عـنـد ضـيـاء>
••بعد ماهرب هو ومُساعدينه••
_واحنا ايه ضمنا ان محدش هيعرف المكان الجديد؟
ضياء(بزعيق) :لإن اللي قال قبل كده انا عارفوا..وعارف هو مين كويس اوي!
••وفضل يلف حواليهم وهما مرعوبين منه••
ضياء(بصوت حاد) :انا اللي يشتغل معايا لازم يكون انتماءه ليا انا وبس..يكون أمين وصادق..الحرف اللي يدور مابينا مفيش مخلوق على وجه الأرض يسمعه..اللي عايز يكمل وخايف على نفسه بحق وحقيقي هيفهم كلامي كويس اوي..وهيعمل بيه..غير كده ملكش عندي غير ضربة الرصاصه..وانا من النهارده هفلتركم..واللي يستحق الشغل هيفضل واللي ميستحقش..هيغور
••وطلع المسدس من جيبه وضرب واحد فيهم..والباقي كانوا مرعوبين وبيترعشوا••
ضياء:دي قرصة ودن صغيره..ياريت تتعلموا من أخطاء غيركم..علشان ميبقاش الدور الجاي على واحد فيكم! مفهوم؟
كلهم:مفهوم
ضياء(ببرود) :كل واحد يشوف وراه ايه
••ورجع قعد..ومسك الموبايل لقى بنته باعتاله ريكوردات بينهم وبين لميس..وبعد ماسمعهم..ضحك بصوت عالي ضحكة شر..ونده على شادي••
ضياء:شااااادي
••جه شادي بسرعه وراسه في الأرض••
شادي:اوامرك ياضياء باشا
ضياء:تخلص
شادي:اوامرك
••هزله راسه ناحية الباب بمعنى امشي..لحد ما مشى••
<عـنـد رشـاد و دالـيـدا>
••كانوا خلصوا أكل وسابوا الفلوس ومشوا..متجهين لـ بيت أهل رشاد ومعاهم فريده..لحد ماركبوا العربيه..ورشاد طلع الموبايل واتصل بـ عائشه••
رشاد:الو ياماما
عائشه:ازيك يارشاد يابني عامل ايه؟
رشاد:الحمدلله..انتوا رجعتوا البيت ولا لسه؟
عائشه:اه لسه واصلين..ايه مش هتيجي برضه؟
رشاد:لا انا جاي.. بس مش جاي لواحدي..انا معايا داليدا وفريده أختها...مصممين يتطمنوا على مصطفى
عائشه:كتر ألف خيرهم...يجوا ينوروا الدنيا
رشاد:انا قولت اعرفك علشان تعملي حسابك ومتتفاجئيش
عائشه:ماشي ياحبيبي توصلوا بألف سلامه
رشاد:الله يسلمك.. سلام
عائشه:مع ألف سلامه
••وبعد مارشاد قفل معاها••
رشاد:مش قولتلك هتفرح اوي!
داليدا(بإبتسامه) :طنط باين عليها طيبه
رشاد:اوي ولسه لما تعرفيها أكتر
داليدا:معرفة الخير ان شاء الله
<عـنـد عائشه>
••راحت لـ ساهر في البلاكونه••
عائشه:مش قولتلك ان رشاد هيجي؟
ساهر:ايه وطلع جاي فعلاً؟
عائشه:اه جاي.. ومعاه داليدا وأختها.. فاكرهم؟
ساهر:ايوه فاكرهم ماهو كانوا عندنا من كام يوم
عائشه:البنت شكلها محترمه اوي..بس ملقتش اللي يقدرها
ساهر:انتي بتتكلمي عن ايه؟
عائشه:اصل اللي عرفته عنها ان ابن عمها اتجوزها بالغصب وبعدين هربت منه..ده غير انه كان بيجري وراها في كل حته..تخيل ياساهر ان كل ده حصل بعد موت ابوها بيومين؟
ساهر:معقول ياعائشه بعد يومين بس؟
عائشه:علشان كده البنت قلبها موجوع ورشاد بيعمل معاها خير...ربنا يجبر بخاطرهم.. هما الاتنين قلبهم موجوع
ساهر:انتي شوقتيني اقعد معاها
عائشه:انا هقوم اعمل اي حاجه قبل مايوصلوا..زمانهم على وصول
••ودخلت أوضة مصطفى••
عائشه:نص ساعه وهديك علاجك..اخوك جاي ومعاه ناس
مصطفى:ناس مين؟
عائشه:داليدا وأختها..جايين يتطمنوا عليك
مصطفى:ماشي
<عـنـد شـادي>
••دخل المستشفى في صمت وهو لابس كمامه..واتجه لأوضة لميس..وكان قلقان حد يشوفه...كان بيبص يمين وشمال..لحد مادخل الأوضه وقفلها وراه..وقرب من لميس وهى نايمه..وطلع السكينه من جيبه..وقتلها!..ورجع السكينه في جيبه.. وكان في ورقه جنبها خدها ومشى..كل ده وهو لابس جوانتي!..لحد ما مشى ورجع لـ ضياء..ولما الممرضه جات تدخل الأوضه شافت المنظر وفضلت تصرخ..وجريت على الأمن ندهتهم••
الممرضه(بصريخ) :الحقووا حالة قتل...في واحده اتقتلت
الأمن(بصدمه) :فين دي؟؟؟
الممرضه(بصريخ) :تعالوا وراياااا بسرعه
••ولما دخلوا الأوضه لقوا لميس مقتوله!••
الأمن:دي اتقتلت!
••فضلت الممرضه تصرخ والمستشفى كلها اتلمت في الأوضه..لحد ماالشرطه جات تشوف ايه اللي حصل••
الظابط:ايه اللي حصل؟
الممرضه(بخوف) :انا طلعت أشوف الحاله...لقيتها سايحه في دمها
الظابط:مين آخر حد جالها زياره؟
الممرضه:ثواني هشوفلك سجل الزيارات
الظابط:اتفضلي
••راحت الممرضه تشوف سجل الزيارات..وكان آخر حد زارها هما بناتها هنا ويمنى..لحد ماالممرضه خدت السجل وراحتله••
الممرضه(بخوف) :زي ماحضرتك شايف كده..آخر زيارتين كانوا هنا ضياء محمد لاشين و يمنى ضياء محمد لاشين
الظابط:ارقامهم موجوده؟
الممرضه(بخوف) :ايوه موجوده
الظابط:هاتيها
••وخد منها الأرقام وهناك في القسم اتصلوا بالبنات••
الظابط:الو معايا هنا ضياء محمد لاشين؟
هنا:ايوه انا خير.. حضرتك مين؟
الظابط:انا المقدم جمال الدين حسن إبراهيم...ظابط بقسم مدينة نصر
هنا:اهلاً بيك.. في حاجه ولا ايه؟
الظابط:انتوا مطلوبين في تحقيق قضية قتل والدتكم السيده لميس متولي الحسيني
هنا(بخوف) :ايه؟؟؟...قتل؟...قتل ايه؟؟؟
الظابط:قضية قتل..وانتوا مطلوبين في التحقيق
هنا(بصويت) :الحقيني يا يمنى.. الحقي... مامي اتقتلت... مامي اتقتلت يا يمنى
يمنى(بصويت) :مامي؟؟؟...يانهار اسود!!!... ازاااي!!!....لا يا هنا لالالا...اتأكدي منهم..ايوه اتأكدي ساعات بيحصل غلط!...يابنتي احنا كنا عندها وكانت كويسه!
هنا(بصويت) :هى...هى والله...اااااه
••وحضنوا بعض وفضلوا يصرخوا••
<عـنـد رشـاد>
••خد داليدا وفريده وطلعوا لـ اهله..جات عائشه وفتحت وأول ما شافت داليدا حضنتها هى وأختها••
داليدا:ازيك ياطنط عامله ايه؟
عائشه:الحمدلله ياحبيبتي انتي اللي عامله ايه؟
داليدا:بخير
عائشه:ازيك يا قمرايه اخبارك ايه؟
فريده:الحمدلله ياطنط
عائشه:تعالوا اتفضلوا
رشاد:امال بابا فين؟
عائشه:في البلاكونه... يا ساااهر...سااااهر
••يجي والد رشاد من البلاكونه وهو مبتسم••
والد رشاد:يااهلاً وسهلاً شرفتونا ونورتونا
داليدا:اهلاً بحضرتك يااونكل
والد رشاد:داليدا صح؟
رشاد:ايوه انت لحقت تنسى ولا ايه؟
والد رشاد:ماشاء الله زي القمر هى وأختها..اتفضلوا اقعدوا
داليدا:شكراً
••وقعدوا وعائشه دخلت المطبخ..وشويه وجات سلمى••
والد رشاد:دي بقى سلمى أخت رشاد ومصطفى
سلمى(بتحضنها) :عامله ايه ياداليدا؟
داليدا(بتحضنها) :الحمدلله وانتي؟
سلمى:الحمدلله.. ازيك يا حبيبتي؟
فريده:الحمدلله
رشاد:دي أختي الوحيده..تقدري تقولي دلوعة العيله
والد رشاد(بيضحك) :ايوه اصلها البنت الوحيده
داليدا:ربنا يخليهالكم وتفرحوا بيها
والد رشاد:يارب..وانتي بقى عايشه في شقة والدك ولا سيبتيها؟
داليدا:سيبتها وأستاذ رشاد جابلي شقه قريبه من الشغل.. مؤقتاً يعني لحد ما ربنا يسهل وأشوف شقه تانيه
والد رشاد:انت مش يا رشاد عندك شقه فوق مجيبتهاش فيها ليه؟
سلمى:مش دي شقة الجواز؟
رشاد:انا كنت ناوي اعمل كده بس الشقه ناقصها كتير..انا هشوف لـ داليدا شقه أحسن من اللي هى فيها
والد رشاد:على بركة الله.. انا عايزك تيجي تشوفينا عالطول ياداليدا.. احنا بصراحه قلبنا اتفتحلك وارتحنالك
سلمى:فعلاً.. انا شوفت داليدا كام مره وقلبي ارتاحلها
داليدا(بإبتسامه) :ربنا يخليكي..انا كمان قلبي ارتاحلك...أستاذ مصطفى عامل ايه دلوقت؟
والد رشاد:الحمدلله..انا عارف انكم جايين تطمنوا عليه.. اتفضلوا معايا
رشاد:اتفضلي يا داليدا
••قامت داليدا وأختها ورا ساهر ورشاد..ودخلوا أوضة مصطفى.. كان نايم على السرير وجنبه أدويه..وأول ما شافهم قام يعدل نفسه••
رشاد:خليك مرتاح يا درش..عامل ايه دلوقتي؟
مصطفى:الحمدلله أحسن
والد رشاد:داليدا وفريده جم مخصوص يتطمنوا عليك
داليدا:حمدالله على سلامتك يااستاذ مصطفى
مصطفى:الله يسلمك..اتفضلوا اقعدوا
••وقعدوا على الكنبه..ورشاد شد كرسي وقعد قصادهم..وشويه وجات عائشه بالعصير••
عائشه:انا عارفه مقامكم أعلى من كده بكتير بس ده اللي موجود.. لو كان في حاجه أحسن من كده مكنتش هتأخر عليكم
داليدا:لا ياطنط تسلم ايدك.. تعبتي نفسك ليه بس؟
عائشه:ولا تعب ولا حاجه انتوا زي بناتي
••ووزعت عليهم العصير وقعدت جنب مصطفى••
عائشه:انتي في سنه كام يا فريده؟
فريده:داخله أولى ثانوي
عائشه:ماشاء الله لسه صغنونه...عقبال ماتكبري كده وتبقي عروسه
فريده:ان شاء الله
داليدا:ربنا يخليكي ياطنط
والد رشاد:وانتي يا داليدا عندك كام سنه؟
داليدا:انا عندي ٢٤ سنه
والد رشاد:العمر كله ليكم يارب
داليدا:شكرا لـ حضرتك
عائشه:انتي تستاهلي كل خير ياداليدا ياحبيبتي...انا حاسه انك شبه مامتك مش عارفه ليه!
داليدا(بتضحك) :ايوه فعلاً.. انا فيا شبه من ماما الله يرحمها
عائشه:ربنا يرحمها ويغفرلها
داليدا:يارب
رشاد:ماتاخدي فريده توريها اوضتك!
سلمى:اه طبعاً اتفضلي يا فريده
••وخدت فريده وراحوا أوضة سلمى••
عائشه:والله يا داليدا احنا ما كان يلزمنا الجوازتين دول..الاتنين طلعوا أنيل من بعض
والد رشاد:طب ولازمته ايه الكلام ده يا عائشه؟ يعني البنت جايه تزورنا وتفك عن نفسها شويه تقومي حاكيالها اللي حصل.. كده تمشيها من عندنا مدايقه!
داليدا:لالا يااونكل سيبها تحكي على راحتها
رشاد:داليدا مش غريبه يابابا
والد رشاد:لا طبعاً دي صاحبة بيت..انا بس بقول علشان متدايقش مننا
داليدا:لا يااونكل صدقني مش هدايق ولا حاجه..ليه ياطنط بتقولي كده؟
عائشه(بحزن) :اتصدمنا فيهم يابنتي..يمكن دينا مشوفناش منها الشر اللي شوفناه من مروه..بس المشاكل بينها وبين رشاد مكنتش بتنتهي يلا الله يرحمها ويغفرلها..لكن مروه اتصدمنا فيها صدمة عمرنا..بعد ماطلعت ليها علاقه بـ ضياء عدونا.. وهى اللي فتحتله سكة اذيتنا..ربنا يعوضك يامصطفى ويعوضك يارشاد
داليدا:هيعوضهم ياطنط لانهم طيبين ويستاهلوا كل خير
رشاد:الطيبين في الزمن ده هما اللي بياخدوا على دماغهم وبيتضحك عليهم..لازم الواحد ميكونش طيب وسهل علشان ميكونش صيده سهله لأعدائه
داليدا:صح عندك حق بس يكفي ان نواياك سليمه وصافيه
عائشه:عمرنا ماأذينا حد وطول عمرنا ماشيين جنب الحيط.. بس هقول ايه ولاد الحرام مبيصعبش عليهم حد ولا بيفرق معاهم.. دايسين ومكملين لو ايه هيحصل كده!
داليدا:هيروحوا من ربنا فين؟.. ده ربنا العدل!..مهما زادوا في ظلمهم وافتروا على الناس بس في الآخر ليهم نهايه!
عائشه:عندك حق..حسبنا الله ونعم الوكيل
••وعند فريده كانت قاعده مع سلمى في أوضتها••
فريده:اوضتك حلوه اوي ماشاء الله
سلمى:شكرا يا فريده..انتي بتروحي فين وقت شغل أختك؟
فريده:انا بكون في الدروس بتاعتي وبالليل بعدي على داليدا نروح البيت سوا
سلمى:طب وبتجيبي وقت تذاكري امتى؟
فريده:بعد مابروح بذاكر شويه..بحاول ألم المنهج قبل الإمتحانات
سلمى:ربنا معاكي وينجحك
فريده:يارب وانتي في سنه كام؟
سلمى:انا في تالته ثانوي ادعيلي اجيب مجموع عالي!
فريده:ربنا معاكي ياسلمى..وتجيبي أحلى مجموع
سلمى:يااارب ومعاكي
<عـنـد ضـيـاء>
••رجع شادي وهو خايف..كان ضياء قاعد على الكرسي بكل برود ولامبالاه••
ضياء:ها عملت ايه؟
شادي:خلصت عليها
ضياء:عفارم عليك ياشادي.. خد
••وطلع من جيبه رزمة فلوس وحدفها في وشه بكل بجاحه••
ضياء(ببرود) :يلا امشي
شادي:شكرا ياضياء بيه
ضياء(بتجاهل) :يلا
••خرج شادي من الأوضه وهو حاسس بالذل والاهانه من ضياء بعد ما رماله الفلوس في وشه..فضل واقف قصاد الشباك يفكر مع نفسه••
شادي:معلون أبو الفلوس اللي تخليك كلب ذليل لـ ضياء..لحد امتى هتستحمل قرفه!..لو كملت هتخسر كتير!.. ولو مشيت هتخسر أكتر وأكتر!..انا مابقتش عارف اعمل ايه!...لو مشيت هصرف على أهلي ازاي!.. وهجيب مصاريف الجامعه منين؟..خصوصاً انها آخر سنه ليا..ده انا حتى مش عارف هتجوز ازاي!.. ازاي هيجيلي نفس انام وانا رفيق ضياء لاشين؟.. ده ممكن يخلص عليا في أي لحظه!..ده بعتني اقتل مراته اقرب حد له!...يعني مالوش غالي ولا عزيز!...لازم تتصرف وتلاقي حل وإلا كده هتضيع نفسك!
<عـنـد هـنـا ويـمـنـي>
••راحوا المشرحه يتأكدوا من جثة أمهم.. وكانوا بيترعشوا وبيقدموا رجل ويأخروا رجل..ودموعهم نازله زي الشلال.. لحد ماقربوا منها ورفعت هنا الغطا وأول ماشافوها صوتت يمنى وأغم عليها••
الفصل الثامن عشر
هنا(بصويت) :يمنى...يمنى!!
••واتلموا اللي في المكان وحاولوا يفوقوها..ورغم كل ده كان لازم يروحوا قسم الشرطه علشان التحقيق••
الظابط:انتوا كنتوا آخر زياره لـ والدتكم السيده لميس
هنا(بحزن) :ايوه احنا
الظابط:هل في اعداء لوالدتكم؟
هنا(بحزن) :لا مفيش
الظابط:علاقتها بـ والدكم ضياء محمد لاشين عامله ازاي؟
هنا(بحزن) :علاقتهم ببعض كويسه جداً
يمنى(بتعب) :لالالا..علاقتهم ببعض وحشه..بابي هو اللي اتسبب في كل ده لـ مامي الله يرحمها
الظابط:تقصدي ان والدكم له يد في اللي حصل؟
يمنى(بتعب) :ايوه..بابي طردها من البيت بعد مااكتشف انها بتكلم حد غيره..ولما حاولت تهرب بينا..ظهرلنا وعرف مكانا..وخدها مننا..ومن وقتها ومكناش نعرف مكانها لحد مااكتشفنا انه ضربها بالنار.. ولما طلبنا منه نشوفها رفض..والنهارده وانا بزور مامي مع هنا أختي..سمعت هنا بتقولها ان بابي ناوي على قتلها وكانت بتحاول تحذرها
هنا(بخوف) :انتي كدابه انا مكنتش اعرف!!
الظابط:متخافيش يا هنا...ساعدينا نرجع حق والدتكم..انتي كنتي عارفه ده فعلاً؟
هنا(بخوف) :ايوه..سمعت بابي وهو بيتكلم مع حد من اللي شغالين معاه..بيقولهم خلصوا عليها النهارده
الظابط:يعني هو مذكرش اسم المجني عليها؟
هنا:لا محددش مين بس انا كنت عارفه انها مامي خصوصاً ان كان في مشاكل كتير مابينهم
الظابط:آخر مره شوفتي والدك امتى؟
هنا(بخوف) :يوم ما سحبنا من العربيه..ومن ساعتها مشوفناهوش تاني وكل مانسأله هيجي امتى بيتهرب بحجة الشغل
الظابط:والدكم متهم في مصايب كتيره..واحنا حالياً بنسعى بقدر الامكان اننا نلاقيه قبل مايرتكب مصايب أكتر..واه صحيح احنا هنعمل عليكم مراقبه مشدده لان وارد واحده فيكم تكلم ضياء وتعرفه الخطه ويهرب مننا..انا لو عرفت ان واحده فيكم كلمته في اللي حصل هفتحلها قضيه وهتبقي متستره عليه، واحنا مش عايزين كده
هنا(بخوف) :لا حضرتك متقلقش من حاجه احنا كل اللي يهمنا دلوقتي رجوع حق مامي
الظابط:اتفضلوا
••قامت هنا وهى سانده أختها يمنى لحد ماخرجوا••
<عـنـد دالـيـدا>
••كانت مامت رشاد لسه بتحكي لـ داليدا..وطبعاً والد رشاد نزل شغله..وكان رشاد هو اللي قاعد معاهم••
عائشه:مصطفى اتجوز في سن صغير ودي غلطتنا..حتى مروه عقلها عقل عيال..تفكيرها لسه منضجش!
داليدا:معلش ياطنط محدش بيتعلم من غلطه بالساهل..حتى الغلط اللي بنتعلمه مش ببلاش!
عائشه:يلا الحمدلله
••لقوا فريده وسلمى جايين••
عائشه:ايه رايك في الاوضه يا فريده؟
فريده:حلوه ياطنط
عائشه:مش أحلى منك..أختك ماشا الله عليها عسوله اوي
داليدا:ربنا يخليكي ياحبيبتي..وسلمى قمر برضه
عائشه:حبيبتي..انتوا منورنا والله
داليدا:ده بنور حضرتك
••وقامت داليدا علشان يمشوا••
عائشه:وانتوا لحقتوا تقعدوا؟
داليدا:معلش ياطنط هنسيب مصطفى يرتاح..كانت قعده لطيفه
رشاد:هو احنا لحقنا نقعد ياداليدا؟
داليدا:اه الحمدلله احنا قعدنا شويه حلوين
••قامت عائشه وهى مستغربه••
عائشه:خدي بالك دي مش آخر زياره انتوا هتيجوا يوم نتغدا سوا...لان القعده دي متتحسبش!
داليدا(بإبتسامه) :حاضر ان شاء الله
••وباست عائشه وسلمى.. وسلموا على بعض وخرجوا••
عائشه:خدوا بالكم من نفسكم
داليدا:حاضر
رشاد:يلا عايزه حاجه ياماما؟
عائشه:سلامتكم توصلوا بألف سلامه
داليدا:الله يسلمك
سلمى:باي يافريده
فريده:باي يا سلمى!
••وخدهم رشاد ونزلوا يركبوا العربيه••
رشاد:كانت زياره حلوه..كرروها تاني بقى
داليدا:أكيد طبعاً ان شاء الله
••وركبوا العربيه وساق••
رشاد:بس احنا ملحقناش نقعد..ايه رأيكم نخرج في مكان تاني؟
داليدا:لا كفايه كده...نرجع البيت بقى
رشاد:خلاص زي ماتحبوا
<عـنـد ضـيـاء>
••جاله شادي ومعاه ورقه صغيره••
شادي:في حاجه انا نسيت اديها لـ حضرتك يا ضياء باشا
ضياء:حاجة ايه؟
شادي:الورقه دي لقيتها جنب لميس
ضياء:فتحتها؟
شادي:لا طبعاً مقدرش..انا قولت اديها لـ حضرتك تكون أول حد يفتحها
ضياء(ببرود) :افتحها انت...انا مليش مزاج
شادي:اوامرك
••وبعد مافتحها لقى مكتوب فيها ساهر••
شادي:مكتوب فيها ساهر حاجه ياباشا
ضياء:ساهر ايه؟
شادي:مش عارف الاسم مش واضح
••راح ضياء ساحب منه الورقه..وشاورله بـ ايده على الباب بكل تجاهل بمعنى امشي••
ضياء(بسخريه) :هو في ساهر غيره؟..ايه علاقتك بيه يا لميس؟..كنتي ماشيه معاه هو كمان؟..ده انتي مسيبتيش لا كبير ولا صغير.... هههههه...ماهو انا ضياء المغفل
••وقام من مكانه وكسر الفازه بكل قوته••
ضياء(بزعيق) :انا مغفااااااال.... مغفااااااال
••وبعدين هدى وبص حواليه ورجع قعد! ••
<عـنـد هـنـا ويـمـنـى>
••لبسوا الاسود وراحوا مع قرايبهم يدفنوا والدتهم..وكانت يمنى منهاره والناس ساندينها••
ثناء(بصويت) :الله يرحمك يا لميس ياحبيبة أختك ياغاليه...اااه ياوجع قلبي عليكي يا لميس... روحتي في سن صغير وسيبتي البنتين دول لمين؟؟؟
_استهدي بالله، بلاش صويت انتي كده بتعذبيها
ثناء(بصويت) :وهو في عذاب اكتر من اللي انا فيه؟؟
هنا(بحزن) :الله يرحمها ويغفرلها
ثناء(بصويت) :ملحقتش أشوفك!!.. يوم ماارجع من برا أرجع على خبر موتك يا لميس؟؟
=لا حول ولا قوة الا بالله العلي العظيم
يمنى(بعياط) :هتوحشيني اوي...رغم ان كلنا كنا بعيد عن بعض بس بجد هتوحشيني اوي يامامي
_ربنا يرحمها ويغفر لها
يمنى(بعياط) :ياااارب
••وبعد ما دفنوها كانت يمنى وهنا بيعيطوا وقرايبهم بيواسوهم لحد مارجعوا الفيلا..وشغلوا القرآن وكان حزن الدنيا موجود على وشهم••
ثناء(بعياط) :ربنا يرحمك ياحبيبتي..بناتك كانوا محتاجينك معاهم..امال لما يتجوزوا مين اللي هيعدلهم فستانهم؟
_ربنا يديكي الصحه وتكوني ليهم امهم وسندهم
ثناء(بعياط) :والله ما هتأخر عنهم..دول ولاد أختي عارفه يعني ايه؟..يعني زي عيالي بالظبط...عمري ماهتأخر عنهم في أي حاجه يطلبوها!
••قامت هنا واختها يمنى وحضنوا خالتهم وفضلوا يعيطوا••
<بـعـد ٦ شهور>
••كانت حاجات كتير اتغيرت..ومنها نفسية داليدا ورشاد اللي كانت عالطول متدمره بسبب اللي بيحصلهم!..دخلت فريده ومعاها ورقه ووشها مبتسم••
فريده(مبتسمه) :داليدااا
داليدا:ايه؟
فريده:انا نجحتتتتت
••قامت داليدا وقفت وهى مبتسمه..ومش مصدقه••
داليدا:انتي بتتكلمي بجد؟
فريده:ايوه طبعاً انا نجحت وجيبت 90٪
رشاد:الف الف مبروك يا فريده عقبال شهادة الثانويه العامه
••حضنت داليدا اختها وهى بتعيط من الفرحه••
فريده:الله يبارك فيك
داليدا(بعياط) :مبروك ياحبيبتي الف مبروك..ياه لو بابا كان عايش كان فرح بيكي اوي!
فريده:الله يرحمك يا بابا كان زمانك فخور بيا دلوقتي!
رشاد:انا متأكد انه فرحان بيكي دلوقتي..وفخور بيكي وسط أصحابه في الجنه!
داليدا(فرحانه) :أكيد فرحان..ده احنا كلنا طايرين من الفرحه.. اللهم لك الحمد والشكر
رشاد:بمناسبة نجاح فريده..اطلبي اللي انتي عايزاه وانا هعمله حلاوة نجاحك!
فريده(بحزن) :انا عايزه ازور بابا..عايزه اتكلم معاه شويه!
••بصيت داليدا لـ رشاد بحزن..ولكن قرر انه ينفذ طلب فريده وياخدهم المقابر يزوروا والدهم..وأول ما داليدا قربت من المقابر كان قلبها مقبوض وعينيها بتدمع ولكن خايفه تعيط.. لحد مادخلوا المقابر..وفريده قربت من قبر باباهم ••
فريده(بحزن) :بابا انا نجحت! وبقيت في أولى ثانوي!..مش هتيجي معايا تقدملي في المدرسه زي ماكنا متفقين؟..طب مين هيجيبلي هدوم المدرسه قبل المدرسه بيوم ونفضل نجري مش عارفين هنلحق نجيبها ولالا؟
••وافتكرت لما كانت لسه داخله الإعدادي وباباها خدها هى وداليدا يشتريلها هدوم المدرسه وكانوا بيجروا عايزين يلحقوا••
طاهر:يلا يابنات خفوا شويه
فريده:كده يابابا كل سنه تعملها فينا؟
طاهر(بيضحك) :معلش حقكم عليا هاتوها فيا...وانا عقاباً ليا مش هتكلم حتى لو اخترتوا أغلى حاجه.. برضه مش هيغلى عليكم
داليدا(بتضحك) :ربنا يخليك لينا يا بابا وميحرمناش منك
••فاقت فريده على صوت عياط داليدا..واللي من كتر عياطها راحت آخر المدافن وحطيت ايديها على قلبها..ورشاد كان زعلان على عياط داليدا لحد ماراح وراها••
رشاد(بحزن) :داليدا...بلاش عياط.. دي مناسبه حلوه.. يعني يوم ماتقابلوه تعيطوا وتزعلوه منكم؟
داليدا(بعياط) :مش قادره...بابا وحشني اوي..كان حنين علينا اوي اوي...انا مش قادره أصدق..والله العظيم ما قادره!
••قرب رشاد داليدا..وطبطب على ايديها••
رشاد:هو مرتاح دلوقتي..في مكان حلو..مكان مفيهوش كدب ولا نفاق ولا خيانه..مكان أطهر بكتير من الدنيا بمشاكلها وقرفها...صدقيني هو دلوقتي مرتاح..صحته بقيت أحسن من صحة شاب عنده ٢٠ سنه..لا مشاكل ولا امراض..ادعيله ياداليدا وبلاش عياط
داليدا(بعياط) :اللي يوجع انه مماتش من مرضه!..بابا مات مقتول...اتسم!..انا شاكه في عمي ومراته...بس مش في ايديا الدليل.. هروح للشرطه اقولهم انا شاكه في عمي يكون قتل بابا؟.. هيقولولي ايه دليلك؟..طيب ليه يإذوه ويوجعولي قلبي؟..وعارف اللي يأكد كلامي أكتر ان بعد يومين بالظبط من وفاته.. اتلموا عليا هما الأربعه من كل ناحيه!..مش هقول بعد شهر ولا شهرين... دول يومين بس يارشاد!... انت متخيل قد ايه كانوا مستنين موته علشان يدمروني انا وأختي؟؟
رشاد:انا جنبك ومعاكي يا داليدا..وهفضل ضهرك وسندك..متفكريش بعد موت باباكي كده ضهرك اتكسر! لأ...انتي ضهرك سليم وهيفضل سليم طول مانا معاكي انتي وفريده أختك..محدش هيقدر يقربلك ولا يكسرك بنص كلمه..شاوريلي بس على اللي يدايقك واستني خبره!..وإن كان على اللي قتل أبوكي..فا متخافيش هيتكشف هيتكشف..كل ظالم وله نهايه..وإن كان على ورثكم اللي عمك مش عايز يديهولك لحد دلوقتي...انا عارف ازاي هرجعهولك وعلى داير مليم لا ينقص جنيه ولا يزيد جنيه
داليدا(بعياط) :انت ملكش ذنب لكل ده..دي مشاكلي وانا هحلها..كفايه عليك مشاكلك يا رشاد..انا من ساعة ماظهرت في حياتك وانت بتفكر ازاي تحل مشاكلي انا... ونسيت تحل مشاكلك..صدقني انا كده بعطلك اوي!
رشاد:الكلام اللي قولتيه ده ميتقالش تاني..اللي بيعمل خير بيلاقيه..وانا حابب اساعدك علشان تفتكريني بالخير
داليدا:انت بتعمل كل ده لمجرد انك بتعمل خير؟.. طيب مانت ممكن تعمل الخير ده مع أي حد يقابلك!
••بص رشاد في الأرض واتنهد..وسكت شويه وكمل كلامه..وداليدا لسه بصاله!••
رشاد(بتردد) :انا مبعملش كده مع أي حد يا داليدا..انا بعمل كده مع اللي يستاهل ان انا اعمل معاه كده
داليدا(بحزن) :شكراً يارشاد مش عارفه أودي جمايلك عليا فين!
فريده(بحزن) :يلا نمشي يا داليدا انا قلبي بيوجعني
••حضنتها داليدا...وخدتها وخرجوا ووراهم رشاد••
داليدا(بحزن) :يلا ياحبيبتي
<عـنـد صـفـاء>
••طلعت من الأوضه وقعدت قصاد حسناء وهى متردده••
حسناء(بتضحك) :هههههه حلو اوي المسلسل ده
صفاء(بتردد) :بقولك
حسناء:ايه؟
صفاء:انا جايلي عريس
حسناء:مين سعيد الحظ؟
صفاء:رجب اللي قولتلك عنه..كلمني وعايز يتقدملي
حسناء:طب واخوكي هنعمل فيه ايه؟
صفاء:هنعمله ايه يعني.. هو اللي زودها معاه لو كان سكت كان زمانها ماشيه زي السكينه في الحلاوه
حسناء:طب مانتي اخوكي مش هيوافق..وهيعملنا حوار
صفاء(بسهوكه) :دي مهتمك انتي بقى يا ماما..حاولي معاه علشان خاطري..قوليله كلمتين يهدوه من ناحية رجب
حسناء:ويفرض مرضاش نعمل ايه ساعتها؟
صفاء:حاولي مره واتنين ومليون لحد مايوافق..علشان خاطري ده انا نفسي أفرح.. ورجب شاريني وبيحبني
حسناء(بتضحك) :رجب حوش صاحبك عني..رجب صاحبك جنني هههههههه
صفاء(مدايقه) :كده بقى بتتمئلسي عليا؟..ده بدل ماتقفي جنب بنتك وتفرحيها!
حسناء:من عينيا نجرب..بس لو مرضاش انا مليش دعوه
••لقوا سامي جاي من برا••
سامي:وحياة امها ماهسيبها...مش علشان قعدت ٦ شهور ساكت يبقى انا خدت على قفايا..ده هدوء ما قبل العاصفه.. ومش علشان هى اتطلقت مني يبقى كده خلاص..انا رايحلها واللي عندها تعمله
حسناء(بزعيق) :برضه؟ انت مابتحرمش؟..عايز منها ايه ماتريح علشان ترتاح...ماقولنا انها بت متمرده وراكبه دماغها.. يابني مش دي اللي تنفع معانا
سامي(بعصبيه) :لا دي اللي تنفع معانا..وابنك راجل وسيد الرجاله ويقدر يكسرلها دماغها الناشفه دي..أجرتلي تلاته أربعه.. عااادي أأجرلها عشره عشرين واحد يكسروا عضمها ولا يهمني!
صفاء:وانت ايه اللي فكرك بيها الساعه دي؟
سامي:اسكتي انتي يا بتاعت رجب.. اركني على جنب
صفاء(بزعيق) :انت مش هتبطل الكلمه دي؟ هتفضل تقولهالي لحد امتى؟
سامي:لحد ما ربنا يسهل ورجب يموت ونرتاح منه
••بصيت صفاء لـ حسناء بيأس وهى كلها غضب••
حسناء:اقعد بس كده واستهدى بالله..انا عايزاك في موضوع وياريت تهدى وبلاش عصبيه..انا بكلم راجل عاقل مش عيل صغير
••راح سامي قاعد وحاطط رجل على رجل••
سامي:موضوع ايه؟
••بصيت حسناء لـ صفاء بخوف وتردد واتكلمت••
حسناء:انت زعلان من الواد اللي اسمه رجب اوي كده ليه؟
سامي:ده عيل صايع ماشي مع بنتك في الشارع، وأخوها قاعد في البيت قُرني
حسناء:تؤ تؤ بلاش الكلام ده ياسامي..علفكرا انت فاهم رجب غلط.. ده ولد محترم وكويس..ووقتها مكنش في بينه وبين صفاء حاجه ده هى كانت خارجه تخلصله مصلحه من واحده صاحبتها اللي شغاله في البنك
سامي:هاهاها ده على أساس ان في بنوك فاتحه بالليل؟ مش بقول وسعت منك!
حسناء :لا هى كانت رايحه تدله على عنوان بيتها مقولتش انهم رايحين البنك ذات نفسه..الواد جه امبارح وطالب منك السماح..واتأسفلي كمية أسفات ملهاش آخر
صفاء:اعتذارات ياماما
حسناء:اعتذرلي كمية اعتذارات ملهاش آخر..وقالي اللي سامي عايزوا انا هعمله بس يصفالي
سامي:وهو ماله ومالي عاوز مني ايه؟
حسناء(بتردد) :عاوز منك كل خير والله..اديله فرصه بس
سامي:فرصة ايه؟..انتي بتلفي وتدوري ليه؟ اتكلمي عالطول!
حسناء(بتردد) :رجب عايز يخطب صفاء أختك
••قام سامي وهو متنح وكله عصبيه••
سامي(بزعيق) :صفاء أختي انا؟؟...الولا ده شكله عايز يتسكع علقه تانيه علشان يحرم ويبعد عن سكتنا
صفاء(بزعيق) :والله العظيم كويس...مش زي مانت فاكر
حسناء:استني بس انتي ياصفاء.. اقعد وصلي على النبي
سامي:عليه الصلاة والسلام.
حسناء:هو لو بيعمل حاجه غلط كان جه وطلب ايد اختك؟.. ده عايز يدخل البيت من بابه..وبعدين ده نفسه يتصالح عليك والعلاقه مابينكم تكون حلوه
سامي(بزعيق) :وانا مش عايز الجوازه دي..مبحبوش ولا بقبله
حسناء:اسمع بس ياسامي وجرب مش هتخسر حاجه
سامي(بزعيق) :ولا أجرب ولا مجربش..انا كلامي انتهى.. الجوازه دي متلزمناش.. خلص الكلام
••ودخل..الأوضه ورزع الباب وراه بكل غل••
صفاء(بعياط) :كان قلبي حاسس ان ده هيحصل
حسناء:اصبري بس..الزن أمر من السحر..ربنا يهديك يا سامي
<عـنـد مـصـطـفـى>
••راح يشوف مروه في السجن وهو راكب على الكرسي المتحرك وسلمى أخته بتزقه ومعاه عائشه..ومكنش عارف هيعمل ايه لما يشوفها لأول مره بعد اللي حصل••
عائشه(بكره) :ازيك يامروه..مرتاحه دلوقتي؟
مروه(بعياط) :وحشتني اوي يامصطفى...حياتي صعبه من غيرك..مش عارفه أعيش في حاجه ناقصاني!
مصطفى(بسخريه) :ههههه ضحكتيني...انتي يطلع منك كل ده؟..وانا اللي بقول انك الملاك البرئ اللي مفيش منه اتنين!.. تطلعي انتي ورا كل ده!..اديكي لبستي اعدام
مروه(بعياط) :انا مقتلتش حد!..ضياء هو اللي بعت ناس تقتل لكن انا مليش زنب!
مصطفى(بزعيق) :بس شاركتي فيها وانتي اللي ساعدتيه ويسرتي الطريق..من غيرك مكنش عمل كل ده ولا عرف...انا مش مصدق...انتي يامروه؟؟
مروه(بعياط) :ليه كلكم بتيجوا عليا ومحدش عايز يرحمني ولا يحس بيا!
مصطفى(بعياط) :ليه كنتي انتي حسيتي بيا وانا زي المجنون بدور عليكي بعد مااتخطفتي؟..كنتي حسيتي بيا لما عجزوني بسببك!..شايفه اللي انا فيه ده؟... ده بسببك انتي..شوفتي عملتي ايه؟..ساعدتي في قتل دينا وأهلها وخطف ابن اخويا..وعجزتي جوزك اللي مكنش في حاجه تهمه في الدنيا غير انه يسعدك ويشوفك مرتاحه!....4 سنين حب و اتنين خطوبه...في داهيه...كله على الأرض..هيفرق معاكي في ايه قصاد الفلوس؟...قوليلي بقى الـ 5 مليون اللي خدتيهم نفعوكي بـ ايه؟.. ولا اي حاجه.. مرميه في السجن وسط قتالين القتله والنصابين..ومستفدتيش بيهم في أي حاجه..بالعكس اللي خدتيه من ورا كل ده..كره الناس ليكي..تفتكري ولو نفترض انك خرجتي لو يعني مع انه مش هيحصل..هل حد هيتقرب منك؟.. أكيد لا... كل الناس هتبعد عنك وكل واحد هيخاف على نفسه من قااتله زيك!
عائشه(بحزن) :كفايه يامصطفى
مصطفى:بس قبل ما امشي هما ٣ كلمات
••وأول ما مروه سمعت الكلام ده تنحت! ••
مصطفى:انتي طالق بالتلاته
••شدته سلمى..ومشوا بيه...ومروه فضلت تعيط عياط هيستيري••
<عـنـد سـامـي >
••وهو قاعد في أوضته..لقى رقم غريب بيرن عليه••
سامي:الو مين
زينه:ازيك ياسامي عامل ايه؟
سامي:مين معايا؟؟
زينه:انا زينه بنت الحاجه جليله
سامي:زينه؟