رواية كاظيمة
الفصل الاول1
بقلم وسام الفرجاني
بليلة عرسي وهو نايم سمعته يهذي ب اسم بنت ثانية ما اعرفها بس يكول #روكة وينج روكة ..
اني حسيت بخنكة شهالموقف باول يوم العرس ..
نطيته ظهري وراسي ع المخدة ومغمضة بس عقلي يشتغل ويفكر منو روكة ؟
بس كلت اسكتي يجوز ظن سوء هذا لان اصلا ما اعرف منهم احد زواج تقليدي ..
زفوني بدون ما ياخذون رأيي ..
واني الجنت من اروح اجيب حشيش اكو واحد جان دائما يباوعلي يصيحوله رافد بس مدري شعور مراهقة او يمكن نقص حنان من الاهل جنت اشوف نظرته اليه بيها حنان وامان كلش رغم جانت بس نظرات واسوي نفسي ما اهتم ..
اجيت من الهوايش والمعز كملت اكلهن ونظفت مكانهن ورجعت ريحتي تسطر ..
ورحت حضرت ملابس حتى اسبح .. دا اسبح وسمعت 3 نسوان او اربعة اجوا لبيتنا جان بيتنا بدون باب وعادي عايشين طبيعي ..
جان اكو زرف او فتحة من باب الحمام وطبعا الحمام مالنا برا اني اسبح وامي تصيحلي #كاظمية وينج سويلنا جاي ..
باوعت من فتحة الباب هيج صغيرة ردت اعرفهن ماعرفتهن وبصراحة استحي اطلع كدامهن من حمام كبل ..
لان بالبيت دائما يتنمرون عليه لان سمرة ومو حلوة كلش ونوبات يصيحوني ب اسم ولد (دحّام يتنمرون عليه ب اسم ولد نص عقل بالمنطقة ووسخ ع اساس مثله يعني)...
المهم .. كملت سبح وبدلت وانتظرتهن يروحن شو تأخرن وامي خبصتني كاظمية فضيها عاد ساعة تسبحين ..
كلت خل اطلع مبين شغلتهن مطولة .. فتحت الباب وطلعت وهن كاعدات بالثيلة بالحديقة واجيت سلمت عليهن رغم ما اعرفهن ..
كالتلي امي كاظمية بنتي جاي ع سريع وهن يكولن لا مستعجلات ورحت اسويلهن جاي كالت لامي اسمعها هاي بنتج ؟
امي : اي هاي كاظيمة سبعة ام بيت
العجوز : شكد عمرها ؟
امي : 14
اني علكت الچولة وشغلته ع قوري الجاي وكعدت انتظره وصاحتني امي كاظمية تعالي ..
كتلها بس يخدر الجاي بصراحة جنت خايفة يقلدن عليه لان كلما يجون ضيوف اهلنا يسوون مضحكة الهم ويكولون باعي هاي بنية بالله ملامحها ملامح رجال ..
المهم .. كالت تعالي بنتي
اجيت وكالتلي اكعدي عند خالاتج اني اكمل الچاي كتلها لا يمة هسة يكمل كالت اكعدي ..
كعدت وهن يباوعلي وصارن يسألني
ايمت تكعدين ؟
الصبح ايمت يعني !!
وتعرفين تطبخين ؟
كتلها خالة منو مايعرف يطبخ هسة
وتعرفين تعلفين الحلال ؟
يقصدون الهوايش والحيوانات وهيج .. المهم شلون كاعدة بمحكمة واني اطك اصبع ب اصبع ايدي ترجف ومتوترة اخجل كلش واستحي منهن وما اعرف ليش هالاسئلة ..
المهم امي جابت الجاي وكعدت صبيتلهن .. ورحت اني خليتهن كاعدات ..
بالليل مشغلين الفانوس ..
بغرفة كلنا اني واخوي (سند)واخواتي اصغر مني بشوي وجاي نلعب ع خيالنا بالفانوس ونضحك واني ويا الجهال ..
جان امي تاخذني لغرفة الثانية وهو بيتنا بس غرفتين ومطبخ وطبعا بيتنا كبير بي عمامي 2 بس كل عم اله بيت مخصص بس شنو مجتمعين كلنا بمكان واحد..
امي : بنتي هذولي اجوا يريدونج لإبنهم
كاظمية : شنو يمة ويني وين زواج ماريد
امي : شنو شبيج بنتي يريد يزوجوج لابنهم شتكولين وهم حياتهم حلوة وبيتهم اكبر وماعندهم هوايش وحلال وطبعا تضحك عليه تروحين مدللة وفلوس وكذا المهم صارت تقنع بية واني صغيرة ما اعرف كتلها ماريد اتزوج اني ..
ثاني يوم
ابوي : مو هذا الخميس !.. الخميس الجاي يزفونج اله ماعدنا بنات بكيفهن يتزوجن ..
ظليت ساكتة اني مارديت جان يكول ..
ما إلجن الا بيت رجولتجن .. هم لو خلقة وجمال مو زين العالم راضية بيج وبشكلج هم لو اني انطيهم مهر اقبل بس تمشين راح تكسدين عندي وتعنسين منو يرضى بيج ..
ههه شوفوا قساوة الكلام هو اني صح مو حلوة وزركة بس ع الاقل مشاعري وخاطري ينكسر اذا سمع هالكلام من اهلي بالذات ابوي
مكدرت احجي يم ابوي واستسلمت لامر الواقع .. رغم ماجنت اعرف شيصير وشنو مطلوب مني ..
امي : بنتي اول تالي راح تزوجين وتعرفين ابوج بعد من يقفل
كاظمية : تمام سووا الي يعجبكم ..
المهم جهزوا جهاز قبل هيج امور بسيطة واني واللع بعض شغلات ما اعرفهن ليش موجودات بالجهاز
وكعدت وياي امي ونسوان عمامي يحجون ويعلموني انوب خربوا معنوياتي كتلهن ماريد اريد اظل هنا بالبيت ..
ابوي سمع صوتي وصاح سكتوها لا اجيها ..
هنا خلصت كل محاولاتي واستسلمت لأمر الواقع وانزفيت بوكت جنت اريد امي من شفت هوسة العرس والدوخة .. شفته مرتين وماحبيته كشكل بس منو يسمعني لان كلت لامي تكلي ع اساس انتِ هسة ملكة زمانج اثنينكم نفس الشي ههه ..
المهم رضيت غصب ومشت الامور ..
زفوني ومن اجوا اخذوني من البيت جان اكو وحدة تريد تاكلني بالعرس يعني واني امشي ويمشون بية وهي تدوس ع ملابسي يعني ع اساس متدري
هي اابنت متوسطة العمر احسها تريد تاكلني وتندس بية تريد تكرصني وتضربني من كد ما شايلة حقد بداخلها حسيتها مفترسة يا ستار يارب دخيلك شيعيشني هنا شيخلصها وين انطي وجهي وين اكدرلهن اني ..
لكن مثلما كلت الكم اول ليلة العرس كمل كلشي ونام واني ارجف وخايفة وطاير نوم من عيني اريد ارجع لأهلي ومتوجعة بس منو يرجعني ..
وهذا يشخر ونايم غاطس ميدري شصاير .. يهذري وهو نايم ويحجي ويصيح مرات .. وكلما يحجي افز .. الله يسامحك ابوية جبرتني ع هالعيشة ..
صرت اسمع يصيح اسم بنت .. ركزت زين بس بدون ماحرك نفسي او اسوي صوت ماريد يكعد خلي نايم علواه اسبوع ..
روكة يصيح منو روكة هاي وليش يصيح ب اسمها صار الوسواس يضرب براسي..
بس جنت صغيرة مو واعية كلش وماعندي كيد اكدر اعرف هيج امور .. فكرت فكرت بعدين كلت شعليه يجوز حلم بس شنو ظل ببالي هالإسم..
ثاني يوم جابوا ريوك .. واسمع ابوهم يصيح اني هاي الزواج كله ماراضي عليه ..
اكو واحد ياخذ وحدة صغيرة كلشي ما تعرف راسها من رجليها اني ثولتها سويت نفسي ما سمعت لان سامعة هالكلام من ابوية ما اعتب ع الغربة ..
3 ايام مرت .. اجت جارتهم وبنتها .. تسلم عليهم وتبارك وشايلة بيدها بطانية يعني( نگول ) نسمي .. ومن اجت عمتي كالتنا ام ذياب اجب تسلم عليكم شو رسول زوجي فز حسيته يريد يطير كلي رتبي نفسج واطلعي سلمي عليهم .. رتبت الربطة مالتي جانت بوكتها الربطات طاشة يعني اخر موديل .. طلعت كعدت عدهن واسمع ام ذياب تشاور برسول
ام ذياب : تصوم تصوم وتفطر ع بصلة ..
رسول : غلسي خالة لتركزين هواي ويضحك
اني ملامحي انشفطت حسيت نفسي مو حلوة كلش واقل منهم بكثير بس ماعندي حل غير اتعايش ويا هالعائلة الجديدة ..
ام ذياب : شلونج عاروستنا
.. كاظمية : الحمد لله و انتِ
ام ذياب : شلون رسول وياج ؟
كاظمية : زين ودنكت راسي .. باوعت لايدي افرك بيهن
بنت ام ذياب : شو ماكو جاي لا شي خاف ازعجناكم من اجينا ..
كاظمية : لا حبيبتي كل الهلا بيكم هسة الجاي ع نار ورحت ..
واني رايحة للمطبخ اسمع ضحكهم وعرفته عليه او يقلدون عليه ما اهتميت بس صار عندي شك اريد اعرف اسم بنت ام ذياب منو معقولة هي روكة نفسها الي يهذي بيها بالليل
صبينا الجاي وشربن جان تكلي بنت ام ذياب ..
.. الجاي خفيف مو خدران زين
عمتي ام رسول : ليش بالعكس طيب روحي خدري كاظمية
بنت ام ذياب : لا لا ميحتاج شربته هسة عود من اجي مرة ثانية ان شاء الله تعرف تسوي جاي ..
ابتسمت عمتي ورسول ما حرك ساكن واني انغثيت بس عادي صم بكم كالعادة ..
بيت عمه ساكنين جيرانهم بس ماكو سياج وحياطين هيج كبل جفت .. اجتي بنت للبيت شفتها وين شايفتها هاي قربت قربت تذكرتها هاي البنت الي تكرص بية بالعرس وتريد تفترسني ..
اجت حتى ما سلمت كالت رسول وين كتلها مدري بس شنو اني عندي ردة فعل منها خايفة منها .. كالتلي شكد عمرج كتلها 14 .. كالت ايع ليش مستعجلة مشايفة وممصدكة رجال يتقدملج كبل وافقتي بدون شروط ولو حقج من يرضى بهيج جهرة زفرة ..
مارديت الها ونطيتها ظهري ورحت دا امشي للبيت ..
جان اسمعها تكول لعمتي شفتي عمة سلمت عليها عافتني وراحت هاي تالي الي ياخذ غريبة ..
اجت عمتي ام رسول وسلمت عليها وكالت الها لا يجوز ما شافتج مو كاظمية كلت الها اي عمة ماشفتها .. اجيت رجعت سلمت عليها .. بس شنو معاجبها تباوعلي من فوك ليجوة
من راحت توقعتها هي روكة كلت الها عمة هاي شسمها كالت هاي اسمها رواء بنت عم رول رجلج رواء
كتلها اذا كل هالبنات عدكم ما زوجتي رسول منهن .. كالت نصيب بنتي هذا نصيب .. واني ماريد منهن ..
خرب بهالنصيبة بكلبي كلت شو كلها معبسة ومبولزة هنا عبالك حرب
بالليل كاعدين سوة
رسول : باجر نكعد من صبح نروح للحلال والهوايش نعلفهن ونظف مكانهن ..
كاظمية : وين عدكم انتم ؟ ماكو
رسول : موجودات ببيتنا الثاني ..
كاظيمة : ادلل ..
صار الصبح تلثمت ولبست واخذت وياي هيج كونية طحين او علاكة هيج مفتوحة ومنجل احش بيها للدواب ..
رحت ووصلنا لبيتهم الثاني الظاهر بيتهم وودونا للصريفة لان بعيدة عن البيت لكيت رواء وبنات عمه الثاني ومرت عمه كدامي ..
جان من شافتني تكول لرسول
رواء : متعلمة ع نوم الضحاوي يمكن ..
تعالي نظفي تكرمون الفضايل مالت الدواب والحيوانات ..
رسول : لا اني اخرتها حتى تعرف المكان خاف تجي احد الايام وحدها ..
اني محجيت صرت انظف بيهن وهن مانظفن وياي صارن يعلفن ويسون شغلات ثانية بس اني اشيل الفضلات تكرمون ..
كملنا ورسول مدري وين راح جان رواء تتقرب اليه
رواء : امشي للبيت هذا الثاني اسبحي واحنه ننتظرج
كاظيمة : لا من ارجع لبيتنا اسبح وابدل ..
رواء : اييع وتروحين بهيج ريحة جايفة للبيت اسبحي هنا وفضيها ترا كل مرة نسبح وحدة ورى الثانية
كاظمية: ماعندي ملابس ..
رواء : جبتلج دشداشة وملفع فوتي اسبحي ننتظرج كلنا وراح نسبح هاي كلما نجي هنا نبدل هنا ونروح بعدج جديدة متعرفين ..
بصراحة ما كدرت عليهن كلهن ودخلت اسبح والحمام السقف مالته حديد هيج مو صب و الباب ماله بي قفل من داخل وخارج من هذا القديم ناس الي عدها هيج باب يعرفون هيج بوب وهو هذا الي مخوفني لان بعدني توة طابة صرت اسمع بسبسة منهن وحركة ما تطمنت عليها وحسيت دا يوكعني بسالفة كتلهن انطيني الملابس ..
رواء : انطيني ثوبج هسة حت ما يوسخ الجديد
اني صرت ثولة وانطيتهن ملابسي شو ذني قفلن الباب من ورة وعافني وحدي بدون ملابس ومقفول الباب ..