رواية ذئاب لا تعرف الحب الجزء الثاني2الفصل الثامن والاربعون48بقلم نجمه براقه
اسراء
دخلت عند بابا لقيته ماسك اجندة ريان وبيمرر نظره علي الأسطر ودموعه بتسيل علي خده من عيونه الدامية بسبب حزنه عليه ولما شافني مسحها بضهر ايده وقال وهو بيستجمع نفسه
_ في حاجه يا اسراء
_ جاية اطمن عليك.. ليه بتقراها تاني مش كفاية
قال بصوت مختنق
_ دي اللي فاضلة منه مقرهاش ليه
_ ياحبيبي ان شاءلله هيرجع خلي املك في ربنا كبير
_ ونعم بالله بس اخوكي خلاص راح مش هيرجع تاني
_ متقولش كده ونبي.. انا قلبي حاسس انه هيرجع وهتقول اسراء قالـ
بترت كلمتي لما جاني صوت جرس الباب ف قالي
_ شوفي مين
_ ماما هتفتح ، المهم انك لازم تخرج من الاوضه كفاية كده
_ مش قادر يابنتي حاسس حيلي اتهد و ضهري اتكسر ، كل الناس بتفرح بهلفة الولاد وانا....
قاطع كلامه صوت ماما وهي بتزعق زي المستغيث وتقول
_ سبع!!!! يا اسراء!!!
قولت بقلق وانا بتجه ناحية الباب
_ ياساتر يارب في ايه
فتحت الباب واتقدمت للخارج وقتها وقفت مكاني للحظات متجمده وعنيه جاحظة من شدة المفاجأة وبعد ما استعدت تركيزي قولت بذهول قبل ما اتحرك
_ رياااان... بابا ريان رجع يا بابا
جريت عليه في الوقت اللي ماما حضناه وبتبكي ف بعدتها عنه وقولت بذهول وانا بترمي في حضني
_ ريان حبيبي ... انا مش مصدقه نفسي .. انت رجعت بجد
كملت وانا ببعد عنه
_ والله لسه قايله لبابا انك هترجع.. كنت فين كل ده .. رعبتنا عليك.. معقول مكنتش قادر تكلمنا.. ريان حبيبي
كان واقف قدامي وساكت مبيتكلمش و وشه متلبد ف قولت
_ ريان! ساكت ليه؟
قالت ماما وسط بكاها
_ حمدالله علي سلامتك ياحبيبي ، ليه مشيت حرقت قلوبنا عليك ، ده ابوك كان هيروح فيها من حزنه وقلقه عليك
كمل في سكوته بشكل يقلق ف بصيت للي معاه وقولت
_ هو ماله.. في ايه يا ريان
قال بدر
_ خليه يرتاح الاول ودول هيقولوكم علي كل حاجة.. عن اذنكم وحمدلله علي سلامته.. هقابلك تاني يا ريان
قالها ومشي هو ومليكة وفي نفس الوقت شوفت نظرات ريان اتعلقت علي جوه ولما بصيت علي موضع عينه لقيت بابا واقف دموعه بتسيل وفكة بيرتجف ومش متحرك من مكانه ف رجعت بصيت ل ريان وقولت
_ طيب تعاله سلم علي بابا
مشالش عينه من عليه وفضل ساكت ف قالت ماما وهي بتقف جمبه وتمسك في دراعه
_ مالك يا حبيبي ساكت ليه
بصت للي معاه وقالت
_ هو ايه اللي حصله
بصو لبعضهم ف قالت البنت بتردد
_ هو فاقد الذاكرة ومش فاكر حاجة ولا فاكر حد منكم للاسف
#مليكة
خرجنا من هناك وسيبناهم مع بعض واتجهنا احنا الاتنين ناحية عمارتهم وعند المدخل وقف وستدار ليه وقال
_ ايه دة انتي رايحه فين
_ اكيد مش طالعه معاك رايحه لجويرية
_ اه احسب ، هتقوليلها؟
_ اقولها ايه
_ ان ريان رجع
_ مش عارفه
_ ليه ايه الصعب فيها دي
_ مفيش
_ خايفه تقوليلها ان خطيبته جت معاه
_ لا مش كده بس...
_مترددة تقولي انها بتحبه وهتتصدم لو عرفت
_ هي مجبتليش سيره اذا بتحبه او بتكرهه
_ مش معقول
_ ليه مش معقول مانت عارف ان جويرية كلامها قليل
_ كان.. دلوقتي ما شاءلله عليها بقت بتعرف تواجه.. دا انا سمعت انها هترجع المدرسة وطبعاً الفضل يرجع ل ريان وقصته عنها
_ انا مش فهماك بجد انت شايلة ضغينة تجاهه ولا نسيت ولا ايه بالظبط ، ساعات بحس انك بتدور عليه علشان تنتقم منه
_ مش من عاداتي اني اضرب في الضهر ولا اخدع حد ، لو عايز انتقم كنت انتقمت من اول ما شوفته ، واصلاً الحوار مبقاش ينفع فيه انتقام ، لو علي دخلته وراها الحمام ف خد اللي فيه النصيب
_ بس بردو متقولش انك بتدور عليه علشان هو صاحبك مفتكرش انك هتنسا اللي حصل ولا هو كان هينسا لو مفقدش الذاكرة وترجعوا زي الاول
_ صح مستحيل هنرجع زي الاول .. يلا انا طالع ومش هقولك اتفضلي علشان اهلي مربيني
_ يعني مربينك انك متجبش بنات ونسيوا يقصروا لسانك اللي بينقط دبش ده
_ السان بتاعي طبيعي هاخده معايا البيت ، لكن البنات مش بتاعتي
_ ولا عمره هيكون في بنت بتعاتك انت مش هتجوز علشان لسانك ده
_ هرجع اقولك تاني ملكيش دعوة واكسفك زي كل مره
مطيت بوقي بقرف وقولت
_ طيب يا ابو لسان اااامشي
قلد حركتي وقال
_ اااامشي.. بتعوجي بوقك ليه علشان تعرفيني انك حلوة وانتي نكدية يعني
تراجعت خطوة وقولت بربكة
_ ما تحترم نفسك دي تاني مره تقولي اني حلوة النهاردة
_ جبر خاطر انتي لا حلوه ولا شوفتية
حول عينيه وقال
_ انا احلي منك
_ هههههههه انت عبيط يابني
_ هتصاحبيني ولا ايه امشي شوفي رايحة فين
قال كده ودخل وبعد ما طلع كام سلمة رجع يبصلي ويقول
_ قوليلي صحيح يا مليكة
_ ااافندم عايز ايه
قال بإبتسامة
_ المرة دي هكلمك بأدب
_ قول
_ هو انتي ابوكي فين
_ ليه
_ بسأل هو السؤال حرم
_ بابا مات
_ من امتي
_ من وانا صغيره
_ الله يرحمه ، طيب معاكي اخوات ولاد
_ بتسأل ليه
_ معاكي ولا لا
قولت بإبتسامة
_ مش معايا ، وعايشه انا ماما بس
طالت نظرته ليه بإبتسامة خفيفه ف قولت بربكه
_ بتبصلي كدة ليه
_ علشان
_ ايوة ، عشان إيه
_ علشان دلوقتي فهمت
_ فهمت إيه
_ فهمت ليه محدش بيقولك رايحه فين وجاية منين
كلمته وجعتني بس اسريتها في نفسي وقولت وانا بتجه ناحية شقة جويرية
_ تقوليه ايه ، مليش حد
قولتها وشيحت بنظري عنه ورنيت الجرس ف قالي
_ انتي زعلتي ولا ايه
قولت من غير ما ابصله
_ لا مش بزعل من الناس الهبلة
بعدها جويرية فتحتلي ف دخلت وقفلت الباب وقولت
_ قاعدة لوحدك ولا ايه
_ ايوة.. كنتي فين كل ده
_ كنت مشغوله في شوية حاجات... عندي ليكي خبرين خبر مش حلو وخبر حلو
قالت بترقب
_ خبر إيه
_ تدفعي كام
قالت بترقب شديد
_ قولي بس.. في حاجه عن ريان
قولت بإبتسامة
_ ايوه
قالت بتلهف
_ إيه
_ رياااان!
_ ايووه
_ رجع
قالت بذهول
_ بتتكلمي جد.. طيب احلفي بالله انه رجع.. فينه طيب.. في البيت
_ اهدي هقولك اهو.. اه في البيت
قالت بسعادة
_ يعني رجع بجد
كملت بعد ما تلاشت ابتسامتها
_ ايه الخبر الوحش.. حصله حاجة
_ للأسف
_ حصله إيه؟
_ فقد الذاكرة مش فاكر اي حاجة
_ اية! ، مش فاكر حاجه خالص
_ للاسف
شردت شويه بوش عابس وبعدين خدت نفس عميق وقالت
_ يعني نسي اللي حصل.. نسي ضربه و حرق القصص بتوعه
_ مش فاكر اي حاجة خالص
_ طيب قوليلي ، هو كويس يعني
_ ايوة هو كويس قوي مفهوش اي حاجة غير انه عمل حادثة جديدة شكله وفقد فيها الذاكره
شردت بتفكيرها ف قولت
_ بتفكري في ايه
_ بفكر ان احسن انه نسي كدة مش هيفتكر اي حاجة كانت مزعلاة
_ بس ده مش هيفتكرك انتي كمان
_ وحتي لو افتكرني هيعمل بيه إيه.. احنا ملناش نصيب يكون لينا قصة مع بعض ف عادي.. المهم يكون بخير
_ قادر ربنا يبدل الامور مين عارف مش يمكن يحصل نصيب
_ تؤ.. مش هيحصل نصيب ، باينة من زمان قوي قوي
اترجف فكها ورغرغت الدموع في عينيها وهي بتقول
_بس انا مش عارفة ايه الحكمة في وجود مشاعر اذا كان مع الوقت بيزيد الحاجز اللي بينا
#ريان
شوفت الصدمة في وشوش الكل وجفاف دموع بابا اللي كانت مغرقة وشه قبل ثواني وهو بيتقدم ناحيتي ويقولي
_ مش فاكر ازاي ، ايه اللي حصل ضيعلك الذاكرة
قال عاصم
_ لقيناه عامل حادثة وناسي كل حاجة
قرب مني متفحص وشي بعينه وقالي باستنكار
_ مش ممكن ، انتوا بتهرجوا
مسك وشي بين ايديه وقال
_ انت مش فاكرني؟ مش فاكر حد فينا
شيلت ايده عني ورغم حالته دي بس محستش بالشفقة عليه ومكنتش فاكر غير حرقه للقصص ، كنت شايف مشهد حرقهم اللي مفارقنيش من ساعتها ويمكن هو ده اللي خلاني اقدر اكون ثابت قدامهم عكس بدر وحتي اسراء كنت قادر اثبت قدامها لأنها خانت الامانه وادت القصة ل بدر بعد ما أمنتها عليها.
بقوا كلهم مصدومين من اني مش فاكرهم وحاولوا يفكروني بس للأسباب دي انا محبتش افتكر وقعدت معاهم شوية وبعدين قولت بعد ما حسيت نفسي اتخنقت من البيت
_ انا عايز امشي
وقفوا قدامي كلهم وقالت ماما
_ تمشي فين ده احنا ما صدقنا رجعت
كملت اسراء علي كلامها وقالت
_ صح يا ريان ده احنا دوخنا السبع دوخات علشان نلاقيك هتسبنا بعد ده كله
قولت بجديه
_ انا مش فاكركم علشان اقعد معاكم ، هروح مع عاصم وخديجة.. يلا بينا
قولتها ومشيت ناحية الباب واسراء ورانا بتحلفني ممشيش وفجأه جاني صوت بابا وهو بيقول
_ سيبيه يا اسراء
_ اسيبه ازاي ده هيمشي يا بابا
_ هو جاي يعرفنا انه عايش.. اخوكي مش ناسي حاجة .. سيبيه
مردتش عليه وقولت
_ يلا
قولتها وطلعت متجاهل نداء اسراء عليه لغيت ما وصلت الشارع وعاصم و خديجة ورايا وهناك وقفت للحظات عيني متعلقة علي شباك جويرية بشكل لا ارادي ساعتها وقفت جمبي خديجة وقالت
_ شبكاها
بعثرت نظراتي وانا بقول متجاهل سؤالها
_ امشوا
#زيد
دخلت عندها لقيت هاجر معاها وكان واضح انها بتهون عليها في حاجه ولما سألت في ايه كانت هاجر هتتكلم بس هي وقفتها وقالت
_ مفيش حاجه
قولت متجاهل اسلوبها واللي بيحصل
_ اه طيب انا كنت جاي اقولك حاجه وماشي
_ حاجة إيه
قولت وانا بخرج التليفون من جيبي وافتح صورة إسلام واكبر شكل البنت بس
_ عايز اوريكي حاجه الاول
_ حاجة إيه
اتقدمت ناحيتها و وريتلها الصورة
_ تعرفي دي
دققت في الصورة وبعدين بصتلي وقالت
_ ايوه دي هي البنت اللي ضربتني انت لقيتها فين
_ ما ده اللي كنت جاي عشانه
صغرت الصورة واظهرت إسلام وقولت وانا بوريهالها
_ مش ده إسلام
دققت في الصورة تاني وبعدين بصتلي وقالت بهدؤء
_ اه هو
قولت باستنكار لهدؤئها
_ اه هو؟
_ ايوه هو إسلام
_ طيب وملفتش نظرك ان واقف مع البنت اللي ضربتك وان ممكن يكون بينهم حاجة او هو اللي بعتها من الاول
شاحت بنظرها عني ف قالت هاجر
_ إسلام كان هنا دلوقتي وحكالنا عليها يا زيد
_ حكالكم عن مين
_ عن البنت دي
_ نعم! إسلام جه حكالكم عنها عادي كدة ، طيب وحكالكم ايه بقي
_ قالنا انها كانت بتجري وراه وعاوزة تجوزه بالغصب ولما عرف انها هي اللي عملت كده في خلود خدها وسلمها للبوليس
_ لا يا شيخة.. إسلام عمل كدة
_ ايوة
بصيت لخلود وقولت
_ وانتي صدقتيه
_ ومصدقهوش ليه
_ علشان نصاب من شويه كان معاها في خرابه
_ ماهو قال انه رحلها ووقعها في الكلام
_ وهي وقعت في الكلام عادي كدة ... انتي عاوزة تجننيني ده حرامي وصايع وماشي معاها وبيخدها في حتت مقطوعة
بقت بصالي من غير ولا كلمة بس فهمت من نظراتها انها بتفتكر اللي حصل في العيادة ف خدت نفس وقولت
_ خلود افهمي الولد ده نصاب ، انا كنت ممشي وراه واحد وقالي انه شافه معاها في وضع غلط... ده ولد صايع
قالت ببرود
_ اه... يعني قصدك اللي بيكون في وضع غلط مع واحده بيكون صايع
تعلقت نظراتي لعنيها ومبقتش شايف غير اللي حصل في العيادة واللي هي كانت بتقصده بالظبط وبتلمح ليه ويمكن لولا وجود هاجر كنت رديت عليها رد يفوقها من البجاحه اللي فيها
_ اتأخرت عليكي
قالها إسلام اثناء دخوله فوقني من شرودي ولما بصتله قالي بمكر وخبث الدنيا في عينيه
_ مساء الخير يا دكترة
_ مساء النور يا بطل .. سمعت انك سلمت المجرمة للبوليس قال.. صحيح الكلام دة
_ حصل اباشا وهي دلوقتي في السجن ، مفيش حد يمس خطيبتي واسيبه حر
_ برافوا عليك ، انت جامد ، بس عرفتها ازاي بقا
_ عرفتها من كلام خوخة عنها
بصتلها وقولت
_ خوووووخة؟!!
قالت هاجر وهي بتمط بوقها بسخرية
_ اه ، خوخة
_ حلو قوي دلعك يا خوخة
لاحت ابتسامة علي شفايفها وهي بتقول
_ متشكرة يا إسلام احلي دلع والله انا عمر ما حد دلعني قبل كده
قال
_ انتي لسه شوفتي دلع استني بس نتجوز وانا هوريكي الدلع كله
قولت
_ انت هتلبخ.. اترزع
كملت وانا بقعد
_ ولا مروح
_ لا قاعد لسة مطمنتش علي خوخة
_ اه... طيب اقعد
بصتلها لقيتها بتداري ابتسامتها وشكلها مبسوطه باللي بيحصل ف سكت وبقيت بحاول اخفي غضبي منه ورغبتي في تكسير عضمه وبذات لما قعد وقال
_ الف سلامة عليكي يا نجمة قلبي ، والله الناس حاشتها من تحت ايدي بالعافية
قولت
_ من تحت ايدك بردو
قال بمكر
_ ايوة يا باشا من تحت ايدي امال هيكون إيه
سكت وتعلقت عيني عليه للحظات وانا شايف كمية الخبث اللي في كلامه ولما وجهت نظري ليها لقيتها لسة مبتسمة ومبسوطة باللي بيحصل ساعتها اتمنيت امسكها واقتلها قتل ورغبتي دي كانت بتزيد كل ثانيه اكتر من اللي قبلها كل ما كان بيوجه ليها كلمة شبة المتحرشين وهي عادي مبتوقفهوش عند حده وعلشان متغاباش قومت واتجهت ناحيته وقولت
_ اتفضل هنسيبهم يرتاحوا
_ لسة مطمنتش اباشا
قولت وانا بشده من قفاه
_ ابقي اطمن في التليفون ياخويا احنا صعايدة وبنت عمي هنا وانت غريب اتفضل
قولتها وزقيته قدامي لغيت ما خرجته وقبل ما اخرج وراه رجعت ابصلها لقيت ابتسامتها زادت اكتر من الاول ونظراتها مركزاها لعنيه بقوة مش عارفه جابتها منين وقتها فهمت اني اتغابيت وادتلها كلمة السر اللي هتضايقني بيها ويمكن تفتكر اني بغير عليها
#خلود
بعد ما كنت زعلانه وخايفة من وجود إسلام في حياتي بسبب اللي حصلي من وراه واسلوب حياتهم اللي يرعب بقيت مبسوطة ان وجوده حرق دم زيد.. كنت مبسوطه قوي وتخيلت لبعض الوقت ان تصرفه ده ممكن يكون غيره وانه ممكن يكون بيحبني بس بعد ما مشي راحت سعادتي لما جه علي بالي كلامه معايا وانتقاده ليه طول الوقت وان هو شايفني باسؤء صورة.
وبقيت ساكته وشاردة بتفكيري في الموضوع ده لغيت ما قالت هاجر
_ بتفكري في ايه
_ ولا حاجه
_ متاكده انه ولا حاجه
_ بتنيل بفكر فيه بس ، بفكر اني هضيع نفسي علشان زعلانه منه ، واني مسحت بكرامتي الارض عشان بحبه وهو مش بيضيع فرصة علشان يثبتلي اني وحشة وفي نهايتي اللي شكلها مش مطولة بسببه ، هو انا ليه بعملي في نفسي كده واخرتها إيه يا هاجر.. لا حول ولاقوة الابالله
اتنهدت بعمق وانا حاسه بهمومي حمل جبال علي قلبي وفجأه سمعتها بتقولي
_ علي فكره زيد بيحبك
التفت ليها بتفاجيء وقولت
_ بيحبني؟
_ ايوة بيحبك
_ لا لا بيتهيالك ، مبيحبنيش ولا عمره هيحبني
_ بيحبك اسمعي الكلام
_ ليه يعني عشان متضايق من إسلام
_ وده سبب منهم... زيد بيحبك
_ هاجر اسكتي
_ والله والله بيحبك بشر نفسه خد باله انه بيحبك
زادت خفقات قلبي بعد كلامها ده وقولت باستنكار
_ لا.. مبيحبنيش هو لو بيحبني كان قال
_ ولا عمره هيقول.. زيد مش متقبل ان مراته تكون بلوجر عرق الصعيد بينقح عليه
قولت بتوتر
_ ايوه بس بردو مبيحبنيش يا هاجر اسكتي ونبي بلاش تخليني اعشم نفسي
_ لو مش بيحبك مش هيغير عليكي ولا هيجري زي المجنون لما لقاكي تعبانه ولا كان هيخطفك ويجري علي المستشفي ويفضل لساعات واقف لوحده مش قادر يتكلم وكأنه خرس ، ولا كنا هنشوف اللهفة في عينيه وقت خروج ماما من عندك علشان يطمن عليكي
تقوس فمي بحزن وانا بقول بصوت متحشرج
_ هو بيعمل اكتر من كدة يخليني اقتنع انه بيعشقني مش بيحبني بس ، بس هو متخلف كدة لوحده و مبيحبنيش ولا حاجه
_ طيب والله ....
قولت بمقاطعة
_ اسكوتي مش عاوزة اسمع حاجة.. انا كل مره برجع من عنده مجروحه لو عشمت نفسي وطلع ده وهم هموت فيها ، انا لوحدي مخلياه محور حياتي ورغم كل اللي بيعمله مش قادره اكرهه ، لو صدقت كلامك ورجع يقولي نفس الكلام اللي بيقوله هموت بجد
#هاجر
بعد ساعة تقريباً جه الظابط و وراه زيد وقال بإبتسامة ودودة موجه كلامه لخلود
_ بقينا احسن اهو
قالت
_ الحمدلله
_ انا جيتلك تاني قولت اكيد لسه تعبانه ومش هتقدر تيجي
_ متشكرة قوي يا فندم
_ طيب كنت حابب ندردش شوية في اللي حصل ومتعتبريش اني بكلمك ك ظابط وتحقيقات وكدة ، انا المره دي جايلك ك حد عاوز مصلحتك
لما قال الكلمه دي عيني راحت تلقائي لزيد لقيته مش علي بعض وشكله اتضايق من كلامه ولكن مكنش هيقدر يتكلم وزاد غيظه لما قال بإبتسامة
_اولا انتي شكلك بنت ناس ومحبوبه دي حتي بنت اختي لما عرفت اني قابلتك حلفتني ابعتلك السلام
قالت بإبتسامة وهي بتقاوم رغبتها في النظر لزيد
_ متشكرة قوي يافندم ربنا يخليك.. اتفضل
قال وهو بيقعد
_ اوكي يا خلود انا جاي ابلغك ان الولد اللي اسمه!... اسمه اسلام اه هو إسلام، جاب البنت اللي ضربتك لغيت القسم وسلمها بس في حاجة كنت عايز اقولك عليها
قال زيد بمقاطعة
_ وجت عادي من غير مقاومه
_ لا طبعا دي دخلت القسم بهصية
كمل موجه كلامه ل خلود
_ ولما حققنا معاها اعترفت فوراً ان هي اللي ضربتك عشان خطفتي خطيبها
قال خلود
_ بس هي مش خطيبته يا فندم هو جه وحكالي
قال زيد بنرفزة
_ اني هتعرفي اكتر منها
قال الظابط
_ براحه في ايه
قال وهو بيبعثر نظراته
_ انا اسف بس الولد ده مش كويس هو السبب الاول في اللي حصلها
تفحصه بنظراته بعد ما لاحظ اهتمامه الشديد وقال
_ هو انت تقربلها إيه
_ انا ا......
قاطعت خلود كلامه وقالت
_ انا خدامة عندهم
ركز نظره عليها ومنطقش بكلمه ف قال الظابط ولسه نظراته علي زيد
_ اه.. تمام.. علي العموم هو عنده حق انا عملت عنه هو تحريات بعد ما شكيت انه علي صله باللي حصل قبل ما ابتدي ادور علي البنت دي واتضح ان سمعته مش كويسة وكل يوم مع واحدة شكل .. انتي لقتيه فين ده
قال زيد
_ لقته في الزبالة ، ده رايي اللي انا بقولهولها وهي شيفاني بضايقها
قالت
_ ايوة يافندم كلامك ممكن يكون صح المهم انه اختارني انا ودخل البيت من بابه
وزع نظراته بينهم وبالتاكيد فهم اللي فيها ف قال
_ اه ، بس ده غلط يا خلود ، مليون واحد ممكن يدخل البيت من باب المهم اللي بعد كده.. انا شوفت فيديوهات ليكي عند بنت اختي وشوفت النصايح اللي بتقدميها للبنات مينفعش تكوني بتنصحي بالشكل ده وتيجي انتي تحتاجي اللي ينصحك ويقولك ايه الصح.. واضح انك ذكية
سلط عينيه علي الظابط وكنت حساه عايز يضربه في الوقت اللي قالت خلود بإبتسامة
_ متشكرة.. بس ده نصيب وربنا يهديه
_ بردو..علي راي الفيسبوك مش لازم تشرب مية البحر كلها عشان تقتنع انها مالح ، بس تمام دي حياتك وانا مش بقولك تعملي ايه انا بقدم النصيحة مش أكتر لأن واضح انك مش وش بهدلة
قال زيد
_ طيب لما حضرتك عارف انه شخص مش كويس وصايع سايبينه ليه
_ يعني ايه سيبينه ليه ، للأسف لسة مفيش قانون بينص اننا نقبض علي الصيع ولا اللي كل يوم مع بنت شكل
_ بس يافندم البنت اللي عملت فيها كدة عملت كده بسببه
_ هو مش شريك معاها ولا حرجها علي الجريمة دي وكمان سلمها بأيده
كمل موجه كلامه ل خلود
_ بس حتي لو عمل كده ف انا لو معايا اخت مستحيل اجوزهاله
سكتت ف قال
_ علي العموم البنت دي في الحجز دلوقتي وهتاخد جزائها ومفيش اي خوف منها .. والف سلامة عليكي.. لو اي حاجه حصلت تاني متتردديش تكلميني.. انا اسمي مصطفي وده الكارت بتاعي
ادالها الكارت قدام نظرات زيد اللي مكنش قادر يثبت في وقفته وزاد غيظه لما قالت بإبتسامة وهي بتاخد الكارت
_ الله يسلمك يافندم .. متشكرة قوي.. وصل سلامي لبنت اخت حضرتك
_ يوصل دي هتمبسط قوي ، يلا عن اذنكم
رجع يبص لزيد ويقول
_ مع السلامه
_ مع السلامه
مشي وبعد ما زيد وصله رجع وقال بعصبية
_ بتقولي ربنا يهديه...ياشيخة ربنا ياخدك وياخده ، عاوزه ايه تاني علشان تقتنعي انه ميناسبكش
ردت بنرفزة
_ انا مسمحلكش تكلمني كدة .. وبعدين مين يناسبني يا دكتور.. حد قالهالي قبل كده مش هقدر اتقبل ان مراتي يكون ليها صور عند الشباب ، مش سهل الاقي واحد يقبل ب ده بس إسلام قبل اجي انا ارفضه
_ هو جواز وخلااااص ، خلاص كبرتي قوي كده وخايفة تعنسي ولا انتي بتفكري ازاي
_ انا اللي مش عارفه انت بتفكر ازاي.. ليه مهتم.. مالك انت بيه اتجوز إسلام ولا غيره
_ علشان في مكانة اختي
_ اختك؟
قال بنرفزة
_ اه اختي.. اختي وبس
خدت نفس وقالت
_ هاجر ممكن ميه بارده الميه دي سخنت
_ حاضر
#زيد
بعد ما كررت تلميحها عن اللي حصل في العيادة مبقتش مستني فرصة علشان اتكلم معاه بالمكشوف والمها ، وكأنها حاسة بيه ومشت هاجر وقالت
_ كمل
_ اكمل اقول ايه
_ قولي ازاي اختك... ولا انت نسيت افكرك
_ لا فاكر كويس قوي ، وكل ما احب انسا بتفكريني بتلمحاتك ، مالك حابه تفكريني ليه ، ليه حياتك وتصرفاتك كلها بقت مايلة ، لدرجة دي وشك بقا مكشوف ومفيش اي حياء
_ اه انا وشي بقا مكشوف واديني بعترف احسن منك اللي مش عارف انت بتعمل ايه.. انت متنفعش دكتور ، انت اللي عاوز دكتور نفساني يعالجك ، تقدر تقولي بتتصرف معايا كده ليه... مره تمدحني وفي نفس الوقت تقلل مني وتهني بكلامك ، مره تهتم ومره تحسسني اني شفافه مش شايفني.. مره تخاف عليه ومره تقسي.. مره تقولي منفعكش وبعدها بثانية تعمل عكس كلامك وتـ...
قولت بمقاطعة
_ لا بصي مهما كان اللي حصل يومها ، بس في المعايرة والتلقيح الراجل في الموقف ده بذات هو اللي بيلقح .. كان ممكن جدا اقولك ده انتي اللي بداتي واترميتي في حضني وسيبتيني اقربلك وممنعتنيش عنك ، الراجل في دي بذات مش بيتلام ف بطلي عشان مقولكش كلام يزعلك
نزلت دموعها وهي بتقول
_ ماشي انا غلطانه وسيبتك تقرب وانا اللي اترميت في حضنك.. بس ممكن نقول علشان بحبك مثلا .. بس انت بقا اللي شايفني وشي مكشوف ومبتحبنيش قربت ليه
_ علشان دي طبيعة الرجاله.. امنع نفسي ليه عن واحده معترضتش وانا وهي لوحدنا... عادي بتحصل هي كده الطبيعة اللي خلقنا بيها ربنا وكانت هتحصل معاكي او مع غيرك .. بس ده ميمنعش اني شخص محترم وميمنعش كمان ان مفيش اي مشاعر تجاهك ، ارتحتي دلوقتي
_....
_ خرس لسانك دلوقتي ، احسن كدة بس متزعليش انتي اللي خلتيني اتكلم .. انا ماشي احسن
قولت كده واتجهت ناحية الباب ف قالت بصوت متحشرج
_ لو جه يوم ولقتني مموته نفسي اعرف ان بسببك وبسبب كلامك اللي مفيش مره تشوفني غير لما تقولهولي وكل مره بيكون اقسي من اللي قبله... انا ذنبي الوحيد اني انشغلت بيك انا لو مكنتش انشغلت مكنتش قربت علي نت ولا كنت قبلت اني اسمع الكلام ده كل مره... المصيبة اني مش قادره اكرهك..انا نفسي بس اكرهك او اقسي علي نفسي واعملها كرامة.. اعملها ازاي دي انصحني
قولت بعد ما رجعت ابصلها
_ انا قولتلك قبل كدة ان الواحد يفكر بعقله انتي اللي ركنتيه وبقيتي بتتصرفي بعواطفك.. حاولي تستخدمي عقلك وانتي مش هتحتاجي تنتحري و هتكرهيني في دقيقة بعد ما كلامي يوجعك
_....
قولت بضيقة
_ العواطف والقلب بيودوا صاحبهم في داهيه ويشقلبوله حياته ويحرموه الراحه ، المعلومة دي كانت بتتاكدلي كل يوم مع كل حالة بتجيني وخاصة لو في صراع بين قلبهم وعواطفهم اللي بتنبع من القلب.. وده مش غلط اللي قدامك ده غلطك انتي علشان سمحتي لان ده يحصل من الاول .. حاولي تستخدمي عقلك من تاني او تتعذبي شويه لغيت ما يكون عادي وجودي او عدمه "
قولتها وانا مش شايف غير معاناتي انا ، من وقت ما ركنت دماغي وعواطفي بقت تمشيني وانا مش مرتاح وحياتي متلخبطة ومتمزق بين كلام العقل وعاطفتي اللي بتجبرني بعد كل مره ارجع تاني ومحطش حد بيني وبينها
#بشر
روحت المستشفي لقيته ماشي علي طول من غير توقف وقفت في طريقة قولت
_ في ايه
قال وهو بيبعدني ويكمل طريقه
_ مفيش انا مروح
_ استنا بس في ايه
قال بنرفزة وهو مكمل طريقه
_ مفيش يابشر سيبني في حالي
قالها ومشي وانا دخلت لخلود لقيت هاجر عندها وبعد ما اطمنت عليها وقعدت شويه جت جميلة مرات عمي وقالت تقدر تمشي ف اصرت هاجر انها تروح معاها البيت وفعلاً روحنا كلنا وهي قعدت بيت عمي شبل وانا طلعت فوق ودخلت ل زيد اوضته لقيته بيشتغل علي الاب توب قعدت مقابل ليه وقولت ونا بقفل الغطا
_ سيب الشغل شوية مش هيطير
_ ليه ، انا في جلسة دلوقتي
_ قول النت فصل.. وقولي مالك فيك ايه
_ مفيش يا بشر
_ مش هسيبك غير لما تقول مالك ، شديت مع خلود؟
_ العادي
_ طيب ليه
_ مش عارف تقريباً من كتر ما انا اتعودت مبقتش اركز في اسباب وبنشد وخلاص
_ مش لازم سبب ملموس ممكن يكون سبب انت حاسس بيه
_ عاوز تقول ايه يا بشر.. عاوز تقول اني بحبها يعني
_ ده اللي انا شايفه واللي واضح وضوح الشمس
_ ايوة يا بشر بحبها طيب وبعدين.. انا مستحيل اقبل ان واحده زيها تكون مراتي هتقولي مغلطتش هقولك اللي حصل واسلوب حياتها كفاية قوي يخلوني مربطش اسمي وشرفي ب واحده زيها.. تخيل كده يجي واحد عندي في العيادة يكون سمعلها فيديو من اياهم او حافظ صورتها عنده وعارف اني جوزها بصته ليه هتكون عامله ازاي.. لما واحد معفن زي اسلام يشوفها معايا ويجي يسلم عليها علي اساس نجمة وكده انا هيكون منظري عامل ازاي
_ ياخي يلعن ابو شكلك علي ابو منظرك في يوم واحد ده بس اللي هامك
_ ليه وانت تقبل تجوز هاجر لو كانت بشكل ده
_ لا بس هاجر مش زي خلود انا حبيت هاجر وعجباني بكل اللي فيها مروحتش حبيت واحده انا نفسي مش راضي عنها.. بس لو حصل كنت هدور علي حل ، كنت همنعها تكمل وشوية
هتتنسي وصورها هيتحذفوا ويجي صور لوحده غيرها
_ اه صح اصلك جاهل في النت قوي ومش فاهم حاجة ، يابني ده انا احيانا ببحث عن فيديوهات قديمه من يوم ما اخترعوا حاجه اسمها كاميرا وبلاقيها علي اليوتيوب.. مفيش حاجه بتتمسح كله موجود
_ وانت لو حبيتها بجد هتلاقي حل مش هترفض من اولها كده
_ مينفعش يابشر في حاجات مينفعش نتنازل فيها دي حياه هتتبني ومتأكد اني حتي لو قولت عادي وكفاية انها تبطل بعد ما زهوت الحب دي تروح هرجع احس اني غلطت.. هي مش شبهي ولا حياتها تناسبني للاسف.. لا مش هقدر يا بشر
_ طيب وهتقدر تشوفها متجوزه واحد تاني
_ لا.. انا مش قادر حتي استحمل ان حد يكلمها.. ده انا من شويه مسكت نفسي بالعافيه علشان ممسكش في الظابط عشانها.. ده انا لو اتجوزتها همشي اضرب في الناس زي المجنون
#مليكة
رجعت متأخّرة للبيت ف لقيت ماما في وشي وبتقولي بعصبية وبدون اي مقدمات
_ من غير خناق وزعيق انا عاوزاكي تقطعي علاقتك بجويرية والناس دي
_ في ايه يا ماما ايه اللي حصل
_ مش هستنا يحصل كفاية انك من اول ما عرفتيها وانتي مبتقعديش في البيت
_ ياماما جويرية بنت كويسة وانا مبغلطش
_ خروجك كل ده بره البيت في حد ذاته غلط الناس كلت وشنا
_ طيب وجويرية ذنبها ايه.. انا هقلل زيارتي ليها كده كده علشان الكلية بس مينفعش تطلبي مني اقطع علاقتي بيها
_ يابنتي الناس دول خطر مينفعش تتعاملي معاهم
_ والله أبداً دول ناس محترمين جداً ومامتها ست متعلمه ومحترمه وابوها راجل قمة في الاحترام واخوها معيد في الجامعة وميقلش عنهم
_ معرفش انا الكلام ده تقطعي علاقتك بيها وخلاص
_ لا يا ماما مش هقطع علاقتي بيها وخلاص.. هي مغلطتش والناس كلهم محدش غلط معايا اقاطعها ليه
_ بتعارضيني
_ يا ماما مش بعارضك بس انتي عارفه اني مش بصاحب اي حد كده وخلاص
_ انا قولت اللي عندي يا مليكه مش عاوزه اسمع انك قربتي لناس دي تاني فاهمة ولا اتصل بعمامك واقولهم
#بجاد
جه اول يوم في الدراسه قومت بدري غسلت وشي وطلعت علشان اوصل جويرية ولكن لقيت الكل نايم وباين ان ماما راحت عليها نومه علشان اتاخرت امبارح في الشغل ف دخلت جهزت الساندوتشات زي ما كنت بعمل معاها زمان وحطيت جبنه وبيض ومربي وكباية اللبن ودخلت عندها فتحت الشباك وانا بصحيها واقول
_ جووووويرية اصحي اتأخرتي علي المدرسة... جوجو اصحي لا ادلق عليكي مية
كملت وانا بشد من عليها الغطا
_ قووومي الوقت اتاخر
قالت بنعاس
_ اه.. صحيت اهو
_ طيب قومي... فووقي الحصه الاولي هتبدء
كملت وانا بشدها من دراعها اقومها
_ ها يلاااا
مصحتش ف شيلتها علي كتفي دخلتها الحمام وسقطت دماغها تحت الحنفيه بقت تشهق زي اللي بتغرق ف سيبتها وقولت
_ معاكي دقيقتين تخلصي الحمام وتخرجي تفطري.. فين الانش بوكس
_ في الدرج اللي جمب السرير
_ والدرج شاله ازاي
قولت كده وخرجت فتحت الدرج ملقتهوش ف فهمت انها تقصد الكوميدينو نفسه وكنت هقفل بس عيني جت علي ورقة في الدرج مقدرتش اقاوم رغبتي بأني اشوفها وفعلا خدتها وقريتها وفهمت انها من ريان وبيقول فيها
_ ازيك يا جويرية.. انا ترددت كتير قوي علشان اكتبلك الرسالة دي ودلوقتي وانا بكتبلك حاسس اني بغدر ب بدر ، وحتي لما جيتلك وخبطت علي شباكك ولما دخلت الحمام في القاعه كنت حاسس بالاحساس دة بس انا كنت بحاول افهم ايه معني كلامك اللي بعتهولي علي لسان اسراء ، يعني إيه عاوزة تفهمي عملت معاكي كدة ليه ، انا مش فاكر اني عملت معاكي اي حاجة ... لو بتتكلمي عن القصة ف انا نسيتها ومكتبتش اكتر من عشر صفحات زمان وقطعتهم كمان .. ولو انتي فهمتي وعدي ليكي بيها بطريقة تانيه غير انها هدية عيد ميلادك تبقي غلطانه.. انا لا بحب ولا بفكر في جواز.. ولما وعدتك بالقصة كان احراج منك بعد ما انتي اللي طلبتيها بنفسك... ف من فضلك ننهي الحوار ده هنا وابعدي صحبتك عني.. مش عايز اخسر بدر علشان حاجة في دماغك انتي وهي ملهاش اي اساس "
بعد ما قريتها كان هاين عليه ادخل اجيبها من شعرها وقبل ما اتصرف اي تصرف لقيتها ورايا خايفة وبتقولي
_ دي رساله قديمة من قبل اللي حصل
_...
_ بجاد والله ما بينا حاجه والرسالة بتوضح ده
_ وايه حكاية القصة
قالت ببكاء
_ قصة من اللي بيكتبهم
_ يعني طلع كان بينكم كلام وهدايا وقصص اهو
_ هما كام مره والكلام كان علي القصص وبس والله
_ طيب احكي إيه الموضوع بالتفصيل ومش عايز كدب
خدت لحظات تحاول تهدي علشان تعرف تتكلم وبعدين قالت
_ انا كنت بروح اقعد مع اسراء زي ما انت عارف وكمان انت عارف اني بحب القصص قوي ايامها عرفت ان ريان بيكتب قصص بصدفه ، وهو مكنش عايز حد يشوفهم ف لما لقيت قصه من بتوعه دخل قالي هاتيها استأذنته اقراها ف وافق وبقيت كل ما اقرا قصة ارجعاله واخد واحده جديده لغيت ما قريت كل القصص العاديه مفضلش غير الرعب ف قالي ساعتها انه هيكتب تاني من النوع ده ويخليني اقرها وطول شويه علشان يكتبها ف لما عيد ميلادي جه سألته عنها وقولتله اني مستنياها ساعاتها قالي هكتبها وهتكون هدية عيد ميلادك
كملت ببكاء
_ وقالي كمان ان مدام هتكون هدية لعيد ميلادي ف هكون انا البطلة علشان كده سألت عنها كنت عاوز افهم اللي مكنتش فهماه ده كل اللي حصل والله
_ يعني طلع بينكم كلام واتفاق وطلع واعدك بهدية.. امال كنتي عامله مظلومة ليه.. مانتي السبب انتي اللي ادتيله الفرصة يعمل اللي عمله
_ لا لا.. هو كان سكران مكنش حاسس بنفسه والله.. هو كتب القصة وكتب عن نفسه كمان مذكرش خالص الموقف ده كان ناسي
_ قصة كتبهالك هديه يكتب فيها عن نفسه ليه؟ ولا تكون قصه مشتركه بينكم.. وشوفتيها فين ومين جبهالك
_ بدر خدها من اسراء وبعتهالي مع مليكة
_ كمان بدر...اها.. طيب يلا اجهزي بعدين نتكلم
قولتها واتجهت ناحية الباب ف وقفت قدامي وقالت ببكاء
_ بجاد ونبي اسمعني والله ده اللي حصل مفيش بيني وبينه ايه حاجة
_ اااجهزي
قولت كده وطلعت من الاوضه وفي ايدي الرساله ودخلت المطبخ حرقتها وقبل ما تتحرق بشكل كامل جت ماما وقالت باستفهام
_ بتعمل ايه ، ورقة ايه دي
_ ورقة كنت مسجل فيها شويه حاجات علشان الرساله
_ اها طيب.. مين عمل الساندوتشات دي
_ انا عملتهم ل جويرية
قالت بإبتسامة
_ ربنا يحفظك وميحرمهاش منك ولا من حنيتك عليها.. يلا روح غير وانا هجهز الفطار
_ حاضر
قولت كده ومشيت وانا متضايق منها ومش طايق اشوفها ولما دخلت الاوضه ومسكت التليفون لقيت رساله من فاطمه بتقولي فيها
_ صباح الخير.. هتيجي تاخدني توديني الكلية ولا اروح مع بابا
_ لا ونبي روحي مع بابا.. اخر مره تقولي الكلمة دي .. هوصل جويرية المدرسة وهجيلك علشان نزوغ ساعه زي ما اتفقنا
_ اوكي متتأخرش عليه
_ Okay , I love you
_ I love you to
قفلت معاها وغيرت هدومي وبعدين طلعت لقيتها واقفة في الصالة بتحاول تخبي دموعها ف قولت وانا بتجه ناحية الباب
_ يلا
مشينا في طريقنا لمدرستها اللي بتبعد نص ساعة بالعربية بسبب اننا ملحقناش اماكن فاضيه في مدرسة قريبة وفي الطريق وبعد سكوت مننا احنا الاتنين بصت من الشباك ودارت بدماغها كأنها شافت حاجة ولما بصيت من المرايا ملقتش حد ف سكت ومعلقتش وبعد خمس دقايق بالكتير وصلنا المدرسة ونزلنا دخلتها جوه وقولت
_ علي معاد خروجك هتيجي ماما تاخدك انا هكون في الكلية ومش هقدر
_ ماشي
_ مش عايز لعب ولا غلط
_ حاضر
_ ولسة كلامنا مخلصش لسه لينا قعدة تاني تفهميني كل اللي بيحصل
اومات ايجابا وانا شاورت لاستاذ هناك وجاني وقال
_ اهلا وسهلا امرني
_ الامر لله..انا بجاد ودي اختي هي وقفت شويه عن التعليم ورجعت تكمل ياريت محدش يضايقها بخصوص فرق السن بينها وبين زمايلها
_ متقلقش محدش هيقدر يضايقها.. اتفضلي
خدها ودخلوا وسط الطلاب وانا بقيت واقف مكاني شوية وشايف توترها وهي واقفة في طابور الصباح وبعدين مشيت قولت خليها تواجه خوفها شوية
#جويرية
كنت متوترة جداً لسببين السبب الاول هو اختلاطي بالناس بعد كل السنين دي وكمان اطفال اصغر مني بخمس سنين وانا الشحطة الوحيدة اللي وسطهم والسبب التاني هو اني شوفت ريان واقف أمن علي فيلا قريبة من المدرسة... مش عارفه ايه حكاية قصتي معاه لا هو بعيد البعد اللي ينسي ولا قريب القرب المُرضي.
بعد دقايق من التوتر وانا واقفة في طابور الصباح والاطفال حوليه بيحيوا العلم بصوت عالي وكأنهم بيتسابقوا مين صوته اقوي جه الوقت اللي المفروض ندخل الفصول ساعتها انا بقيت واقفة مكاني متحركتش لغيت ما جه الأستاذ اياه وقالي
_ مدخلتيش ليه
قولت بتوتر
_ معرفش ادخل فين
قال بإبتسامة
_ تعالي هوريكي وبالمناسبة انا هديكم الحصة الاولي
_ اه
_ انا الاستاذ وليد
_ اهلا
_ طيب اتفضلي ومفيش داعي للخوف ده كلنا هنا اهلك
_ شكرا
روحت معاه لغيت الفصل وقالي ادخلي انتي وانا هجيب حاجه وهاجي
اومأت ايجابًا ودخلت وقتها العيال كلهم وقفوا في اماكنهم ف قولت بتوتر
_ صباح الخير
ردوا بصوت واحد
_ صباح النور يا مس
قولت بتوتر وانا بمرر عيني عليهم
_ انا مش مس.. انا.... انا طالبة زيكم
كلهم ضحكوا ف قالت واحده منهم
_ احلي طالبة دي ولا ايه بس هما ليه غيرو مستر وليد
_ مغيرهوش انا طالبه بجد
كلهم بصوا لبعض ف قال ولد منهم
_ انتي طالبه زينا
قال التاني
_ يعني انتي هتقعدي جمبنا علي التخته
قالت بنت
_ تعالي اقعدي جنبي انا
قالت التانيه
_ طيب وانتي ليه جايه تتعلمي متعلمتيش ليه من زمان
قال واحد تاني
_ يمكن سقطت
قالت البنت الأولي
_ ما تبس بقا.. انا ماما دلوقتي بتدرس في الجامعة وهي عندها 38 سنه
قال ولد
_ وانا كمان خالتي بتدرس في ثانوي وهي قد الاستاذ محمد
فجأه الكل وقفوا بأحترام ولما بصيت لموضع عينهم لقيت الاستاذ وليد داخل وبيقولي بابتسامة
_ شكلهم حبوكي
_ وانا كمان
كملت مشيرة علي البنت اللي طلبت مني اقعد جمبها
_ هقعد هنا
_ تمام اتفضلي
قعدت وانا كلي احراج بسبب قعدتي وسط اطفال أصغر مني بكتير وانا اللي مفروض اكون دلوقتي قاعدة في مدرجات وسط بنات في سني ولكن مر الوقت وبسرعة حسيت بالراحة وسطهم وفي الفسحه اتعرفت علي شوية منهم وعلي اربعة من المدرسين الستات اللي في سني وطبعا الكلام معاهم مخليش من سبب رجوعي لتعليم وسط الأطفال
كان يوم علي قد الضغط النفسي اللي حسيته فيه بس كان حلو وكان بداية لحياة جديدة ووجع جديد