رواية مواجهة القدر كاملة الجزء الثاني2 ترويض ملوك العشق جميع الفصول مكتملة حتي الاخير الخاتمه بقلم لادو غنيم

 

رواية سمرة

الفصل الخامس 5

بقلم وسام الفراجي

 

نزع فانيلته واجه يتمشى عليه .. الشباب الوياه يضحكون ويكولون اله لتستعجل هي هنا للصبح تبياته! 

والله مجنت شايفة بحياتي كدامي عرگ لذلك ماعرفته هذا شي كلت ممكن تايكر ممكن ببسي او هيج نوعيات او مقويات .. 

لزموه وكلوله اصبر خلي يجي القائد اول شي لان والله اذا يسمع جايبين وحدة وماكايليله ياخذ البيت وما يأجره النا ابد ..

تلوكوا اله مصلحتنه عنده ..

 خلونه نشرب بينما يجي احنه كاعدين كدام باب الغرفة متكدر تطلع او تنهزم ليش مستعجل متكلي ..

قائد شنو تبياته شنو هذولي نيتهم مو صافية انهزمت من ام حودي وابنها المنغولي ولزموني ذولي مبين ع وجوهم الحرام عدهم كلش عادي ولمة مال شياطين مو شباب .. 

كعدوا وجابوا شغلات بسفرة وكاعدين ملتمين واني مكدر افتح الباب اخاف بس اباوع من فتحة السركي الي بالباب بيت شوي قديم بابه واشوفهم يجيبون صحون ويمهم كل واحد بيده بطل واباوع اكو زلاطة مدري ليمون ونركيلة و صايرة هوسة 

صرت الوم بنفسي شجابني هنا شورطني شنو من مشكلة هاي ولا واحد ولا اثنين كلهم شباب مجموعة وكلهم مبين عليهم عركجية وسفلة شيطلعني منهم وهم اصلا ميخافون الله وكل شوي واحد بيهم يكلهم بصوت هيج كوة يسولف مبين شارب مكثر ..

ـ خلوني اروحلها اشوفلكم شنو فوائدها مضراتها من كل النواحي ومن اكمل اكلكم ع كلشي 

صاروا يضحكون ف واحد منهم كله لا هسة بالطريق قائدنا هذا سوة هاللمة هاي كلها .. 

انتظروا ماتخسرون شي لوما مستفاد مايخلي هالبيت خاص بالسوالف هاي ولا ثانية بس مستفاد واحنه جاي نطي لحسة اصبع منها وساكت لهالسبب

ديسولف واحس صوته معروف عندي باوعتله من فتحة الباب الي يم القفل طلع نفسه سايق التكسي الي جابني لهنا ..

فهمت عاد اللعبة جابني هنا ولملم جماعته علمود يعتدون عليه ..

رحت حتى افتح الشباك واشمر نفسي منها لكيته مقفل بحديد مايعبرني ..

ع باب اقفله ..

سديت الباب ع سريع وقفلته وسمعوا صوت قفل الباب وصاروا يضحكون كلهم ..

هاي شبيهم تخبلوا !! صاح صاحب التكسي يكلي ترا نسخة عدنا منه لتاكلين هم نوصلج نوصلج بس خلي يجي هالنفر هذا مو من عوايده يتأخر ع هيج امور يحب يلزم الفريسة اول واحد .. 

صاح واحد بيهم اجه اجه كله الثاني شمدريك ؟

جاوبه سمعت الباب انقفل .. #وسام_الفراجي 

اني خلص استسلمت هو زلمة واحد مكدر اشرد منه مو عود 5 .. 

صار صوت عالي و سلام وشلونك ومدري شنو كالوله تعال اشربلك شوي كاللهم خلي اشوف الخبصتوني بيها شلون صايرة اليوم لان جوعان ع النسوان .. 

صرت اسمع صوت مفتاح بالباب مال غرفتي اني كبل دفعت الباب بيدي وسندته بجتفي 

واني ما اسمع بس صوت المفاتيح بعدين حاول يفتحه عرف اني ساندته بعدين دفعه شوي وصار يدفع اقوى دفع بدون ضرب طبعا .. 

كلي افتحي شبيج قابل شمسويلج هي نومة والصبح تروحين ..

يربي والله هالصوت مو غريب عليه ..

دفع الباب اقوى بعد ماسيطر ع الباب رجعت ليورة وفتح الباب اني وكعت بالكاع .. 

رفعت راسي عليه وياريتني مارفعتها 

رفعت راسي جان اشوفه وساعة السودة الي شفته .. 

شجابه هنا شنو قائدهم شو هيج يسوي هاي من ايمت عود هذا الشخص الوحيد من كرايبي حنين عليه ..

طلع عمو #رباح .. 

اني مصدومة وهو مصدوم .. 

واحد يباوع للثاني شحجي وياه شكول واني جنت اظن نفسي غالية عليه جدا معقولة مسويلي فخ ويريد يأذيني معقولة هيج يفكر لا لا ابد مستحيل

ظلينا واحد صافن ع الثاني جان واحد من البرا كال يمكن القائد انصدم من جمالها شو ساكت .. 

كتله عمو رباح !

صوت الشباب الوياه وصفير كأنما متفاجئين هيج 

كلي

ـ سهام ! شنو شجابج هنا 

ـ انتَ شجابك هنا عمو معقولة الي جاي تشوفه عيوني ! 

- مو تزوجتي ومن المغرب اخذوج بيت اهل جنتكم !

- عمو عوفك مني مصدومة اني بيك معقولة انتَ هيج معقولة كل هالسنين اني ماخذة نظرة عنك زينة وطلعت هيج انسان 

- سهام معليج بية كولي شجابج هنا بهالمكان الوسخ

- دام تعرفه مكان وسخ شجابك عليه

- تعودت ع هالمكان 

- هسة شتريدون مني تعتدي عليه عمو ؟

- لا سهومة محد يمسج بشي (غلطت غلطة وياج مرة وماتتكرر ان شاء الله ) بس احجيلي سالفتج دوختيني شجابج هنا

- مافهمت بشنو غلطت وياي زين والوياك الي ناوين يعتدون عليه !

- انسي شي ماضي وراح وذولي الوياي امرهم وانهيهم هذولي معليج بيهم تحت ايدي

صاح واحد بيهم جان شارب هواي وطافي انتَ ماتريد لكن اني اريد اشوف هالبنية الحلوة هاي واجه يتمشى عبالك اعرج ويباوع عليه من فوك ليجوة 

جان يلزمه عمو رباح من ياخته وكله كتلك هاي بنية من بناتي تفهم ؟ كله شجابها هنا ؟ كله معليك ماكو شي اليوم .. دفعه ووكع بالكاع ولزم ايدي وكلي امشي وياي .. 

مريت من يمهم وواحد منهم مد ايده ع رجليه وعثرني ..

ومن عثرت الكل صار يضحك ..

عمو سحبني وكلي ذولي سكرانين مو واعيين امشي نطلع للثيلة بالحديقة ..

طلعني من الغرفة واخذني للحوش للحديقة كعد وياي كلي راح اتخبل شجابج هنا .. 

كتله عمو رباح السالفة هيج وهيج وهيج كلي كل الي صار من تحت راس امج مايوم حبتج وتقبلتج 

كتله عمو هسة شنو ؟ شلون ؟ شسوي ؟ تعبت من التفكير شلون ارجع لبيتنا شلون اخلص من ام حودي 

كلي يمي معليج باوعي شكلج وافهمي زين .. 

انتِ مو كلتي انهزمت من المستشفى كتله اي !

كال بسيطة كوليلهم فقدت و حولوني للمستشفى المركزية وفتحت عيوني لكيت عمو رباح ماخذني ما ادري شصاير ومنو اخذني وشلون 

كتله والله فكرة لان بالاصل ماعندك اي مصلحة انك تطلعني وماراح يشكون بكلامي كذب ابد .. دام انتَ عمو رباح الي ماخذني كلي لعد عليها امشي ..

ويدرون بيك شكد تحبني وغالية عليك .. 

و انتَ كلهم شفتها فاقدة ومحد يمها اخذتها بسيارتي قابل انتظرها تموت الما تجون يلا اخذها .. 

صاح جماعته وكلهم شوي واجيكم وواحد منهم صاح وين ماخذها خليها للصبح شخسران .. 

باوع عليه كلي سكرانين ميخالف غلسي .. 

فتح الباب وطلعنا لابسة النقاب جان يكلي لا ديربالج هسة يعرفون انج ام النقاب الي وكعتي .. تعالي نروح اقرب اسواق او محلات نسائية تفتح وناخذ منه شال ..

كتله حتلو اخذ شال يظل النقاب يمي ماعوفه هذا نقذني انقاذ مو طبيعي ..

دنيا ليل و توة اذن الفجر وماكو ولا محل مفتح والكهرباء طافية والشوارع ظلمة وامشي وعمي لازم ايدي بيده وكلي سهام ماجبت سيارتي وياي جان طلعنا بيها !

كتله الله ياعمو من تصيحني سهام حيل اكيف واحس الدنيا متشيلني لان اهلي كلهم يكلولي سمرة بس انتَ و بابا تصيحولي بإسمي الصحيح

كلي انتِ قطعة من روحي حاسبج بنتي مو بنتهم 

لكينا رصيف كعدنا شوي بي حدما شفنا سيارة اجرها عمو واخذنا لبيتهم 

فتح الباب ولكيت #خالد ابن عمو رباح شعره منثور وعيونه كوة فاتحهن توة كاعد من النوم .. 

يتثاوب ويحجي .. 

- ها يابه هاي مو سهومة لو متوهم ..

بداخلي مدري شيصير من اسمع اسم سهام ..

-اي بابا سهام هاي جانت متخربطة واخذتها للمستشفى المركزية بالمحافظة لان مستشفى مالتنا مامنها فايدة لا كادر لا صيدلية لا علاج بي خير ..

ـ بس الدنيا مكلوبة عليها !

- شلون ؟

- يكولون انهزمت من المستشفى وماتريد تتزوج 

- كذابين اني اخذتها لان فقدت قابل انتظرهم حدما يجون تموت البنية 

- ما ادري تريد تخليها عدنا و الي يمسها بوردة اضربه بطلقة تريد توديها لبيت عمي ابو رشا ..

باوعلي خالد سلم عليه شلونج سهومة ؟ هلا خالد عليكم السلام اعذرني تعبانة ومابية حيل للوكفة 

 كال لابوه خلي ترتاح تتريك عود نوديها اني وياك و البي خير يمد ايده عليها ..

كلي عمو رباح اكعدي ارتاحي تريدي تسبحين اسبحي بس يطلع الضوة زين نروح لأهلج 

كتله عمو خايفة والله يذبحوني  

- خالد : سهااام شبيج انتِ وياي ماحب التبجبج والفعاليات هاي ما مسوية شي غلط واذا مايردوج اجيبج يمنه

- تمام سكتت .. 

اخواتي وامي من لحمي ودمي ماعمرهم دافعوا عني هيج .. 

صار الصباح زين وطلعت الشمس زين ورحنا بسيارة عمو رباح ..

اني وخالد وعمو رباح .. 

خالد يسوق .. عمو رباح كاعد بصفه .. اني من ورة .. 

باوعلي بالمراية الي بنص السيارة وكلي ..

ـ اذا خايفة ارجعج عادي وطبيعي سهومة !

- هو خايفة خايفة بس اروح احسن ..

ـ سهام !

- ها خالد 

- بيج شي شو وجهج انكلب لونه صرتي عبارة عن بطل عمبة

- شنو السالفة كلشي مابية بس خايفة من امي

- والله لوما يكولون عمتي والا بيها شحم يتوزع ثواب ع منطقة كاملة 

- خااااالد

ـ شبيج ؟

عمو رباح : ميصير تحجي عليها ابني هاي عمتك زينة او شينة 

فتح حلكه حتى يحجي عليها كال .. عمتي ام لغلوغ بعد ماكمل سالفته كسرت علينه سيارة رادت تضربنا وهو تلاحكها وابعد عنه و وكف ووكفت السيارة الثانية ..

ونزل خالد عليه بعصبية عيونه تجدح صارت ياستار بعدين ابو السيارة الثانية كله عمي اني العايل اعتذر منك 

وكله روح عمي روح والله لوما شيباتك وبكد ابوية ..

رجع خالد وصعدت ويحجي عالزلمة يكول ..

ـ انتَ شايب رجليك بالكبر تمشي الف عليش بس اريد افتهم 

عمو رباح : ع كيفك خالد بالعالم بكدي هذا ميصير

ـ يابه هو شاف وعاف حتلو يموت عاش هواي بس اني لا ولد لا تلد لا بابا لا شفنا شي من حياتنه كبل يريد يكسرنا ويشوفنا عزرائيل ..

ـ هسة سهام تحسبك عاقل وفاهم وهسة كشفت انك طباكات وفيوزات وماتنجرع

باوعلي خالد بالمراية وابتسم وهو مايضحك ابد نادرا فقط يبتسم وكلي ..

ـ صدك كشفتي اني فيوزات ؟ 

ـ تريد صراحة عبالي اصلا ماتحجي لان نادرا شايفتك تسولف وجدا هادئ بس طلعت نصك جوة الكاع 

ـ هه شلون

ـ عصبي جدا 

ـ مو اني اظل ظامهن ظامهن حدما توصل حدها واطك طكة وحدة 

ـ عمو رباح : وصلنه اهلج بعد شوي خليج طبيعية والباقي يمي ..

كلما اقترب من شارعنا توتري يزيد ..

وصلنا نزلنا فتنا للبيت البنات منى ورشا وايناس ببيت ابو حودي بعدهم متفاجئين من الي صار ويدورون عليه .. 

لكيت امي وجه بوجه اني انخرست ورجليه بعد ماتشيلني 

هي وكفت ع رجليها ومصدومة وتقربت اليه ..

هي تتقرب وخالد يوكف كدامي حتى ماتمسني او تضربني جان تصيح امي .. قصة خاصة بـ #وسام_الفراجي 

- بربوك وين جنتي ليش انهزمتي والله لا أأدب بيج كل سفيه اليوم

- خالد : ع كيفج عمة مو زلم واكفة وياها افتهمي شصار اول شي

- ماريد افتهم اريد اطم عار هالمفحمة هاي بس الصوج مو صوجج صوج ابوج الكلبة رجيج و رباج وتحمل ظيمج 

- خالد : شنو هالحجي عمة هسة تحجين ع سهام افتهمنا ومقبولة بس مال تحجين ع عمي ابد مامقبولة

ـ خااااالد وخر عن كدامي خليني ابرد كلبي بيها 

كمزت عليه تريد تلزمني .. صاحني كلي لتخافي ظلي وراي مد ايده ع طولها حتى يحميني وامي تريد توصلني 

بالاخير كاللها كل عقلج تمسيها بخدش وهي يمي .. 

ماتريديها اخذها يمنه ولا هالمذلة .. 

كالت امي اخذها من الله لا جابها من يوم الاجتي ماشفنا خير 

عمو رباح ظل طول هالشي ساكت .. 

خالد باوع لعمو رباح كله يابه شغل السيارة امشي ناخذها هذولي ناس امورهم بيد نسوانهم 

باوع عليه كلي روحي اصعدي رحت صعدت ومغثوثة حيل من سوالف امي جان تلحكني امي وتكلي اني مو ثولة اذا حضرتج فاقدة ورايحة لغير مستشفى الفستان الي لابستي وين ؟ منو نزعج اياه ؟

                الفصل السادس من هنا

لقراءة باقي الفصول من هنا

تعديل المقال