رواية سما
الفصل الثاني 2
بقلم وسام الفراجي
دقيقتين او ثلاثة سمعت صوت رنا وصياحها ..
خفت حيل لا يطلع معتدي عليها وهو انسان ما يفكر الا بهيج شي
تقدمت حتى اروح لبيت عمي بعدين رجعت صرت افرك ايد بإيد وبالي عند رنا شصار بيها ..
اريد اشوف رنا وبنفس الوقت خايفة
طلعت رنا من بابهم تبجي وتكول مو مرباي والله لاكول لابوية عليك ..
وهو شمرها تكرمون بحذاء ويكلها الا اخلي ابوج يطيح حظج و انتِ طولج شبر لابسة هيج ماعندج ام اب يكلج شلابسة..
ركض وراها ولزمها من زندها وكفخها راشدين ودفعها كلها ولي لأهلج ..
من دفعها وكعت ع ايدها بالتراب وجف ايدها الجلد مالها تشلع شوي منه وطلع د'م
فات زوبع عالصياح وشاف الي جاي يصير ..
سحب رنا من ايدها وفوتها لبيتنا ..
اسمعه يكلها مو كلتلج ..
اني كبل طلعت نفسي حتى يعرفها رنا مو سما ..
لان عرفته مشتبه بيها ..
بعدين ركضت اني لبيتنا للداخل خفت من صياح عمي وصار يفر بالقصة ويخوف برنا بطريقة ثانوية حتى متحجي وهو كل عقله يحسبها اني ..
لأن يعرف بفطارتي فحاول يغير الموضوع لصالحه بس ميدري الي كتلها هي رنا ..
فاتت رنا للبيت وهي تبجي واني رحت جبتلها مي كتلها شبيج شصار كالت عوفيني هسة خليني ارتاح رجليه ماتشيلني ..
وتضرب ع خدها وتكول والله لأكول لأبوية اخلي يعلمه شلون يمد ايده عليه والله الا احجيله شيسوي ..
كتلها ارتاحي بس ع كيفج واحجيلي شصار ليش هيج ضربج..
كالت طبيت للغرفة امسحها وشفته يحوص مرة يتمدد ع جربايته مرة يروح ع التعلاكة مالت الهدوم و اني لازمة وصلة مبللة وسطل مي انشف بي و مدنكة امسح بالصبة ..
وهو يتقصد يمر من يمي ..
صرت اعدل بنفسي وامسح واني كاعدة ..
بعدين رد الباب ع كيفه وفتح الباب مرة ثانية طلع راسه يشوف اكو احد و رجع رد الباب واجه يرفع بالثوب يكلي لابسة ملابس داخلية ونزلت ثوبي ولزم ايدي يكلي لتنزلي رفعه ونزلته كتله عيب الا اكول لابوية عليك وضربني ..
وطلعت اركض ولحكني برا ..
سمع الكلام زوبع ابنه وهو واكف عالباب صار يضرب ع راسه بيده ..
واشرلي تعالي رحتله وكلي ممنوع منعا باتا تتقربين يم ابوية والمكان فارغ جاي تفهميني ؟ كتله اي
وراح ..
اني خفت من الحجي همزين ما اني رحت جان مكدرت اسوي شي ..
كلت خل استغل الموقف واكلها لرنا تبلغ ابوية ..
لان هي اشجع بلكي ابوية يوكفه عند حده
كلت الها كولي لابوية شسوة بيج كالت بس يجي ..
وظلت تتنهد وتبجي وتصيح وكلبت الدنيا وهذا عمي عنتر متفاجئ شلون حجت وهو كل عقله يعباليها اني لذلك متفاجئ!
وجان عدنا ديتول ببطل مال ببسي حاطينه وزارفين القوطية ببسمار ..
جبت وصله وحطيت الديتول وشديت ايدها ..
حدما اجه ابوية جان برا وطب للبيت اني هنا اخذت استعداد لان خفت وجبانة حيل ..
جان يشوف رنا تبجي وايدها ملفوفة
شبيج رنا منو كاتلج ؟
ـ عمي عنتر مو متربي
ـ لج ادبسز ليش تحجين ع عمج!
- يابه كلي امسحي غرفتي وبعدين يكلي لابسة ملابس داخلية شو دشوف
اني كلت هسة ابوية راح يكلب الدنيا ويكسر البيت وراح تصير بالتوثية !
جان يضحك ومسح ع شعرها ويكلها ..
- هذا عمج بنتي مثل ابوج يعتبر خايف عليج ويريدج تلبسين
..اقوي بنفسي حتى احجي الي جاي يسوي عمي واتردد اشجع بنفسي واتردد وكلما اريد احجي وارتب جملة اسكت ..
صارت ادية ترجف كلش تضوجني هالحالة تحسسني شكد اني جبانة!
اكيد هواي مثلي واني بريئة وارجف بحيث الي يشوفني يكول انتِ ام المصايب بس هي طبع الرجفة الي تصير لا ارادية ..
راح ابوية واني محجيت حرف ..
ومن اجت امي ..
رنا اخذت امي للمطبخ وحدهم مدري شحجت بعدين صاحتني
ـ سمااا سمااا تعالي
يارب دخيلك بس لا كشفوا الي يصير وتنكلب السالفة عليه ..
ـ اجيت يمه
ـ عمج عنتر سوالج شي تحسينه جاي يسويلج شي
" امي تلمحلي جاي يتحرش بيج اني ثولتها "
ـ يعني شنو يسويلي شي!
ـ يسولفلج شي او يلزمج من خصرج او غير مكان ..
"فكرت لحظة وتراجعت كتلها .."
ـ لا ماسوة شي
ـ روحي يلا ..
خفت اصارح امي بالسالفة مدري ليش ..
هنا امي صارت تطلب من ابوية يسوي فاصل بين البيوت وتكله البنات كبرن وولد عمهن كبروا ولازم نفصل الوكت مو مثل وكتنا!
ابوية رفض وكال طول عمرنا سوة مو لاحكة هسة نفصل وبعدين هن اول تالي لولد عمهن ..
تكله بناتك كبرن ولازم ياخذن راحتهن
يكلها ترا ماصارلهن جثير يلعبون سوة شبيج
رحت كلت لرنا امي تريد تسيج البيت و رنا صارت تحجي لبنات عمي وهيج ..
طلعت اني لكيت زوبع ينتظرني برا ..
خطية وجهه مصفر و خايف
جان يكلي
ـ سما !
- هلا زوبع
- سمعت امج تريد تحط سياج بيناتنه!
- اي والله بس ابوي رفض
- الحمد لله لعد
- ليش؟
- هيج بس ماريد نفصل وعينج من ابوية ترا عينه زايغة وابعدي عنه اني قدمت ع جيش وبعد شهر اقل او اكثر تطلع اسمائنا ..
ـ تمام زوبع ..
ردت اروح جان يصيحني يكلي سما اني اريدج بالحلال انتِ الي وانتظرج هسة وبعد خمسين سنة وخلي يكولون تزوج اصغر منه ب 7 سنين ميهمني كلام اي بشر ..
مارديتله ورحت بس ظلت سوالفه ببالي ..
اني خفت وارتاحيت بنفس الوقت ..
خايفة من ابوه شلون ممكن اعيش وياهم وابوه هيج يتحرش واني ببيتنا شلون لو اصير مرت ابنه ..
وارتاحيت لان زوبع شاب طموح وثگيل هواي صح فرق عمر 7 سنوات بس مدري ..
خليت سالفته بكلبي ورحت للبيت ..
و امي صاحتني وصارت تمنعني اروح لبيت عمي زوبع ..
المنع صار بوقت جدا محرج صح خايفة عليه بس جنت اتأمل اشوف زوبع هواي هسة قلت روحاتي الهم ..
مشت الايام وصارت امي تشدد علينه البنات وتلبسنه لبس مستور اكثر وتنتبه وتدقق ع تفاصيل ..
وتكوللنا صرتوا بنات كبار وعيب هيج تسوون وعيب هيج ..
واني صرت انتظر زوبع يمر من بيتنا او يجي او يدزه عمي عنتر حتى اشوفه ..
صرت اهتم لوجوده وحضوره ..
بعدين صارت هلاهل ببيت عمي عنتر ..
ورحنا اني و رنا وامي نشوف شكو
كالت امي لمرت عمي عنتر خير ان شاء الله شصاير ..
كالت #خطبنا لزوبع وصارت تضحك
اني حسيت سجين بخاصرتي انصدمت وهاي اول صدمة هيج اعيشها ..
استحي اكول لاختي اني احب زوبع او واعدني بالزواج لان اصلا يباوعولي اني صغيرة ومو مال هيج سوالف
اني ظليت صافنة من الحجي ما ادري اضحك ابجي
بعدين عمتي كالت لا اشاقيج طلع اسمه بالجيش وراح يروح دورة.. بس يكولون اله تعال يروح ..
حسيت روحي رجعت اليه
رغم ماكو اي شي رسمي بيناتنه ..
طلعت لكيت #هديل تصيح بزوبع تعال نتباطح يالجندي ونشوف منو يفوز ..
وكف بطارف واجه زوبع ولزمته من ايده وطعجت اصبعه وصار يصيح راح تكسرينه هدي ايدي يمعودة
وهي تكله انتَ بنعجتين ما اسرحك بيها انوب تروح جيش ..
عمي هلال واكف وصار يهف بيده ويضحك ..
يكوللنا هديل راح ادخلها دورة ضباط!
طلع عمي عنتر جان يضحك ع سالفة عمي هلال
ضحكنا كلنا وصاحتني امي ..
باوعتلها ..
اشرتلي بعينها وهزت راسها
يعني روحي منا ..
رحت لبيتنا ولحكتني ورا شوي امي ولزمتني من شحمة اذني ..
وكالتلي ..
ـ كم مرة حذرتج من يكون عمج عنتر موجود تبتعدين عنه ولتوكفين بأي مكان بي هو
ـ والله جان ما موجود وجنت اشوف هديل شلون طعجت ايد زوبع وصار يتسول بيها هههههه
ـ ههههه الله يعين الي ياخذها يشبع كتل ..
ضحكت ويا امي شوي بعدين رجعت لجوة البيت ورجعت لخيالي واستندت ع الحايط وصرت افكر لو تقدملي هل ممكن امي توافق ؟ لان ابوي متأكدة منه يوافق لان بالاصل هو يريدنا لعمامنا. ..
بنفس اليوم العصر اجوا بيت #خالي_جاسم و بناته وابنه #مصطفى الغثيث والثكيل عالمعدة علينا زيارة ..
هم كل فترة يجون زيارة نهارين ثلاثة ويروحون ..
سلمنا عليهم كلهم واعتيادي ..
وامي صاحتني انظف المطبخ وطبيت ولحكني مصطفى الغثيث للمطبخ واكف يمي ونتسولف وهو من نوع شقاوجي وكوميدي ويضحك بس اغلب سوالفه بايخة ..
كدما غثيث يعني مرات لو تشرب تيزاب وراه ما ينهضم
واني اضحك ع سوالفه مرات ومرات لا والله انغث ..
بهاللحظة طب زوبع علينا واني مدري بي جاي انظف بالمطبخ واسمع بسوالف مصطفى واضحك ..
شافنه نضحك .. لف راسه وطلع اني تغير لوني واختفت ضحكتي وكلت بس لا فكر بشي مو صحيح ..
مصطفى يحجي واني مو يمه كلي شبيج احسج تغيرتي كتله لا ماكو شي خلي نطلع نشوف البنات ..
طلعت وصرت اتحجج بأي شي حتى اروح لبيت عمي عنتر واشوف زوبع شنو فكر ..
كلت لامي راح اجيب الصينية الجبيرة من بيت عمي واجي ..
رحت وتلكتني عمتي وكلتلها اريد صينية .. وعيوني تروح يمين يسار اريد اشوف زوبع ..
طلعت من بيتهم وصرنا وجه بوجه اني وزوبع ..
كتله
ـ شلونك
ـ زين
ـ شبيك مبولز مو من عوايدك من تحاجيني هيج
ـ شتريديني احجيلج نكت مثل مصطفى ؟
- ليش تحسست منه ماعندي شي وياه والله ابد
- بس اني ماحب هيج حركات و خفة
- لتجاوز مو خفة هاي بس ابن خالي وعادي هيج احنه من زمان ليش هسة دققت
- اصفكلج واكلج بعد صوت ضحكتج ارفعي انوب تريدين هيج ؟
- ترا جاي تغلط بتفكيراتك هاي لا تشك من هسة وتخلي الشك يكتلنا اثنينه
ـ روحي ودي الصينية لتتأخرين ع مصطفى منتظرج
رحت بس مغثوثة من التفكير الي فكر بي زوبع بالرغم جانت عفوية السالفة ..
صرت اخذ حذر من كل تصرف لا يشوفني زوبع لان عرفت طبعه شوي متشدد وغيور ..
وخايفة يجي يوم ويشك بية عندي تصرفات ماتعجبه ويعوفني لان بصراحة اني رايدته ومشتريته وهو زلمة كلف ما يتضيع ..
يعني ب اختصار صرت احبه واتعلق بي واني بعز مراهقتي وحب بريئ ما يشوبه شي
وهو رايدني بس العثرة الوحيدة هي ابوه لان اني وهو ندري يتحرش بية ..
امي تطبخ بالمطبخ و رنا عد مرت خالي وابوي وعمي عنتر عند خالي جاسم كاعدين ..
واني جاي اساعد امي اجيبلها صينية اسوي زلاطات يعني شغلات خفايف ..
فكالتلي امي فوك الرف اكو علبة كاري انطيني اياها وجان الرف عالي عليه ..
جان عدنا كرسي حديد والقاعدة مالته خشب جبته وصعدت عليه واجه مصطفى ديشاقيني وطبعا امي عدها جدا عادي مصطفى ويانه يشاقي ويحجي ويكعد يمنه يعني احسها هي تريد قربه علينه
المهم صعدت وهو لزم الكرسي وصار يهز بالكرسي علمود اخاف ..
وهو يضحك شكد مغثة يربي
.. فـ ردت اوكع ولزمت بجتفه ..
حظي المصخم باوعت ع الباب لكيت زوبع يباوعلنه ..
عبالك مخلوق بس حتى يشوف الشغلات الي ماتنشاف وهذا ابن خالي فد ثكيل هالمعدة هواي ..
اني ماظلت خيط روح بية شلون موقف كدامه شيخلصني بعد منه ومن لسانه ..
هو طب ولا كأنما شاف شي ولا باوعلي ولا عبرني جان يكول لأمي
عمتي عمتي ..
امي تكلج لتكثرين مي عالتمن ترا تمن الوجبة هذا يعجن ..
وراح واني مصدومة بس لا ياخذ عليه نظرة مو زينة وانوب هذا مصطفى يلح واستحي اكله اكعد ميصير شلون افهمه ..
بهاللحظة اجت سدير بنت عمي عنتر وكلت الها ساعدي امي عفية شوية واجيج ..
وطلعت ادور ع زوبع حدما لكيته بالحوش مالتهم كتله
- شبيك ليش هيج تتصرف
- شتصرفت ليش
- سلامتج
- احجي زوبع شبيك فهمني لتخليني بين حانة ومانة
- من اسولف آذيج
- سولف اترجاك
- روحي اشمري نفسج على هالشباب رخصي نفسج حيل البنية اذا ما تكون حتى بالحلم الشاب يطخها فهاي متستاهل حتى تزوج
- جاي تقصدني ؟ شنو شايفني كل يوم بحضن واحد
- سما اششش حافظي ع نفسج اكثر اذا حابة تكملي اني هيج تصرفات ماتعجبني وادوس ع كلبي اذا نطق وسولف
- ومنو كلك اقبل بيك ؟ ترا حيل شايف نفسك
- ماتقبلين ؟ ماشي اخذي راحتج
- الله وياك
عفته ورحت واني احجي ويا نفسي شسويت اني وليش هيج حجيت و اني اعرف نفسي جبانة مكدر اعوفه ..
صار العشا وابوي عزم عمي عنتر وهلال ويا خوالي ..
والكل اجه وصرت ادور ع زوبع وباوعتلهم من الشباك بالغرفة المجتمعين بيها الزلم ومالكيته ..
قلقني بصراحة وما اعرف شنو قرر هسة لان خبل واعرف كرامته فوك كلشي ..
طلعت لبيت عمي عنتر مالكيته ..
عبرت لبيت عمي هلال لكيته هو وهديل بنت عمي هلال كاعدين سوة ..
انقهرت رغم عادي شايفتهم الف مرة سوة بس مدري حسيت هيج كعدة مخصصة حتى يقهرني او مدري ما ارتاحيت ..
امي صارت تسأل عليه ودزت رنا تدورلي ورجعت للبيت ورزلتني وينج ليش ما تعشيتي ويا النسوان
كتلها مو مشتهية كالت اغسلي المواعين عالسريع وتعالي ..
وكفت ع السنك وصرت اغسل وبالي كله مو يم الغسيل بس اديه تتحرك وعقلي شغال ..
وصافنة كل حيلي ..
ماحسيت الا صوت بزون ..
وشي لزم رجلي اني كبل انخرعت وفزيت وبمكاني بالكاع ..
صوت زوبع يكول شهالتصرفات الطفولية هاي عيب هيج تصرف بنت هاي مو صديقك حتى تسوي هيج
طلع مصطفى جاي بالختلة وفززني ..
مصطفى : و انتِ شدخلك ؟
زوبع : ادخل بنص عينك مو بس بهالشغلة يلا اطلع منا ..
لزم ايدي ورفعني اني كيفت
من كمت كلي ..
حطي حجرتين بجيبج بلكي تثكلين
وراح ..
ظليت صافنة ومصطفى كلي شبي ابن عمج معقد ونفسية ..
كتله مصطفى لتشاقيني كدامه عفية الف مرة كتلك وطلعت ..
رحت كعدت بالغرفة واجت رنا عليه كالتلي ..
خالي يصيحج
وين يصيحني ؟
بالربعة كال ماشفتها شبيها
استحي عمامي هناك والكل موجودة
مو يصيحج امشي روحيله ..
رحت و رنا تدفع بية تدفع حتى اطب واني استحي اطب متأخرة ع الضيوف احسها كلها تباوعلي ..
طبيت و من كد ما مستحية سلمت ع ابوية عبالي خالي ..
والكل صار يتكهكه ويضحك واني بعد ما اميز عمي من خالي من الخجل ..
جان اسلم ع خالي جاسم وكلي اكعدي يمي
لزم ايدي وصار يعصر ب اصابعي ويكلي توجعج
اني بس ساكتة و اطعج بركبتي ..
مصطفى ابن خالي كاعد ..
واجه زوبع سلم وكعد ..
وخالي بعده يشاقي بية ..
جان يكول لابوية هاي البنوتة محجوزة ومن حصة خوالها ..
اني كبل صارت عيني ع زوبع ..
زوبع من سمع السالفة ربع تربيع بالكعدة ورفع راسه ..