رواية سما
الفصل الرابع 4
بقلم وسام الفراجي
كلي اي الله يديم عليج السعادة
لعد هديل بنت عمي هلال شلون فرحتها وهي العاروسة ..
كتله شنو ؟
جاي تشاقة مو ؟
شنو عاروسة مو حاجيت عليه ومتفقين ماتصير لغيري !
ليش هديل بشنو احسن مني وتقدمتلها وعفتني بين النار ..
اني عندي استعداد اعوف اهلي علمود اظل وياك ..
اذا تريدني والله اعوف كلشي بس علمود اصير مرتك!
و انت تعوفني!
اذا انتَ زلمة عوفني!
والله لو تنجمع كل بنات العراق ماراح يحبونك ويخافون عليك بكدي!
روح تزوجها بس والله ماترتاح لان وجهي راح تشوفه بكل مكان تروحله وتكعد بي ..
صورتي راح تظل كدامك حتى يظل ضميرك يأنبك شلون عفتني وتركتني بعدما وعدتني وخلفت بوعدك
ما راح تتجاوزني والخلقك وراح تشوفني حتى بمرتك ..
تدري ليش ؟
لان حبيتك حب طفولة حب بريئ واني ما اعرف كلشي ..
حبيتك و اني مو واعية شنو زواج ..
اذا هسة ماحركت مشاعرك!
وما تراجعت عن هديل وقررت تتركها وتاخذني ..
واروح وانت ع قرارك !
بعد تحلم اعيشك داخل صدري
كلبي اذا يدك بإسمك الزمه و ادوسه ..
قسمًا عظمًا الي ما يريدني ربح ما اريده خسارة روح تزوج الله يسعدك ويسعد هديل لان هديل هم خوش بنت الله شاهد
بس حزنانة ع كلبي الي دك عشك وهو بعده كلشي ميعرف الي ينتظرك ببراءة وهو يعرف بيك اكبر مني ب 7 سنوات
قرر هسة صير زلمة وقرر وكول اريد هديل ..
كلي ..
- الي كلته يكفي اعتقد ..
- صير زلمة وكول اريد هديل ..
- حتزوج هديل
كتله الله وياك لفت ظهري وعفته وحسيت انكسارات الدنيا كلها براسي امشي وكلامه حتزوج هديل يتردد بإذني ..
عيوني السافلة صارت تبجي ..
لتبجين ياعيني ع ناس باعوج لتبجين .. لتبجين وتخلين الكل يتشمت بيج ..
ميخالف هاي كلها دروس تصنع مني انسانة صلبة اكثر
هذا درس اترك فطارتي واعيش فطنة ..
دا امشي وتصيحني امي ..
اني شنو كتلج ؟
مو كتلج مصطفى ابن خالج ما يتضيع !
ترا خوش زلمة ويريدج ومن جيلج وفلوسهم جثيرة ..
وبيتهم طابقين وعنده وهو اعزب غرفة فوك وحده
امي تحجي واني مو يمها
اني وين وهي وين هههه
كلت الها فلوس!
فلوس تقضي حاجة صح بس ماتعيشني بسعادة اذا ماجنت راغبته ..
ماريده يمة ..
عفت امي ومشيت واني اردد بداخلي عفية سما ميصير علمود زوبع وقراره تصيرين غبية وتعيشين ويا شخص عمر كامل علمود بس اقهر زوبع!
لااا ميستحق اقهره واعيش ويا شخص بس علمود اقهر زوبع ..
لازم امحي زوبع من راسي وابدي حياتي من جديد ..
احسبها تجربة فاشلة والملم كسرات كلبي واجبرهن والحياة بعدها طويلة نعيش ونشوف ..
اني متأكدة ميحب هديل ليش قرر هيج قرار ما ادري معقولة عمي عنتر غير رأيه رغم اعرفه عمي عنتر بس يريدني ببيتهم ..
او عمتي ما رادتني ..
هسة اني ليش افكر بي مو كلت لازم امحي ..
اجذب اذا كلت تجاوزت بسرعة ..
صرت قليلة الكلام .. انام هواي .. شقة ولعب مثل كبل ماكو ..
التزمت بصلاتي .. وبلبسي .. وصرت اقرأ كل يوم جزء بالقران .. بس اريد اتجاوز هالايام وارجع ع حيلي..
وكلشي لبس ضيك و دلع ما البسه ..
صارت تطلع ندوب زركة بجسمي ..
شلت طشت مال مي وجبت تايت وصرت اغسل بالهدوم وافرك بيهن بالطشت وعندي سطل بسدي احطهن بيهن ينشفن بعد العصر ..
كعدت يمي رنا جان تكلي ..
ـ باجر ابوي وعمي عنتر وكرابتنه يمشون مشية صغيرة ع عمي هلال علمود زوبع
ـ هههه اي الله يتمم على خير
ـ وحسب الي سمعته الاثنين خطوبتهم وعمي عنتر مستعجل جدا ع زواج زوبع!
- هم الله يتمم ع خير
ـ ترا اني اعرف كلشي وملاحظة
- شنو ملاحظة رنا!
- ملاحظة تغييرج وتأثير زوبع وزواجه
ـ لا ما تهمني الله يسعده شي ماضي وراح ..
- المهم لتنقهرين رايحة وكملي شغلج زين
ـ تمام ..
راحت رنا واني اجلف بالهدوم وافكر شهالتغييرات السريعة وهم قبل يومين يتعاركون علمودي ويريدوني ..
مافهمت اللغز والسر بالموضوع شنو ..
بس كلت لنفسي الا اخلي يعرف خسارتي شكبرها بس بدون ما خرب ع بنت عمي هديل ..
لان احبها كلش
اجه علينا يدور #رباط من ابوية ..
فات من يمي ..
وكف يمي رفعت راسي باوعتله ..
جان يكلي ..
ـ وين عمي ؟
نزلت عيني بالطشت واغسل الملابس بيدي وكتله
ـ فوت جوة تلكاه
انتظر شوي وراح حسيته يريد يسولف شي وشافني ما منطيته مجال وراح بس ما اهتميت شنو يريد يكول ..
طلع زوبع شايل رباط من هاي العريضة مالت كبل الي يلبسوها اهلنا..
يباوع للرباط ويكلب بي .. ويباوعلي ..
كلي ..
ـ سما سما تكدرين بس تنظفيلي اياه هيج بس مسح ..
ـ اي اخوية ادلل انطيني اياه ..
تفاجئ جان يكلي
ـ لا خلص شكرا ..
لف راسه وراح .. من بعد هالكلمة صارلي واهس اجلف هدوم العيلة كلها ..
قالب ثلج وصار ع كلبي ..
تريد تغثني !
والله الا اندمه لان ضيع وحدة جانت لو يريد روحها تنطيه اله وتخاف عليه من الهوى ..
ثاني يوم بالمشية مالت زلم خوش صارت مشية ومتحاجين ومتفقين ع كلشي ..
والخميس الجاي خطوبة مالتهم ..
اذا اكلكم ما ضجت اجذب عليكم ..
شعور اي انسان يشوف الانسان الي جان يتمناه وياه
راح يلزم ايد شخص ثاني راح يضوج بكل تأكيد ..
لمة النسوان وقال وقيل واللبس وناس مخبوصة ..
واجه اسم زوبع بالدورة مالت جيش مدري شنو اسم الي مقدم عليها ..
يوم الاحد يريدوه يعني خطوبته الخميس والاحد يلتحق لان الوضع صاير مو زين ومخربط ويريدون متطوعين هواي بكافة المسميات ..
صرت اكنس بالحوش و اجه يمي كلي
ـ انتِ تستاهلين احسن مني
رفعت راسي وباوعتله لكيته زوبع دنكت اكنس وكتله ..
ـ مو انتَ الي تقرر منو الي استاهله
ـ ليش ؟
ـ عندك نثية الافضل تروح تنصحها هي وتحجي وياها ومعليك بنسوان العالم
ـ وليش تحجين معلگ قابل شكتلج ..
باوعتله بعيني ورجعت اكنس ومارديت
هو حس ع روحه وراح ..
كلما يتقرب وقت خطوبته كلما اني اختنك بس ما اظهر لأحد الضعف الي بية ..
اجت هديل عليه وسلمت عليه وكالتلي محتاجتج ترتبين وياي شغلات الخطوبة والفستان والمكياج ع ذوقج لان انتِ تعرفين اكثر مني ..
كتلها تدللي ومبارك عليج مقدمًا ..
ورحت وياها لبيتهم وصرت اختارلها الي يناسبها واحجيلها العنايات الي مفروض تسويها واعلمها بعض الامور ..
و جاي احجيلها شلون تختار لون الفستان ..
و سمعت يكولون زوبع يريد هديل ..
هديل عافت البيدها وراحتله وبعد شوي طب للغرفة لكاني كدامه كلي تمنيتج انتِ بمكانها ..
كتله صير زلمة وحط عينك بس ع مرتك مو مسموحلك تحجي هالحجي مرة ثانية وياي ..
طبت هديل و سمعتني احجي عليه . ووكفت ع باب الغرفة ..
باوعت عليه وباوعت لزوبع ..
وكالت
شبيكم ليش صوتكم طالع! خاص ب #وسام_الفراجي
كتلها ماكو شي ..
زوبع لف راسه وطلع ..
حطت ايدها ع خصرها و كالتله خاف ماعجبك سؤالي ؟
نزل ايدها وباوعلي نظرة ورجع باوعلها وراح ..
من راح كالتلي هديل ..
ـ بالله عليج شبي وليش طلع ضايج
ـ صدكي ماكو شي ..
ـ كوليلي والله امسح بي الكاع ترى لتحسبيني عنده شارب يصير زلمة عليه والله اشوفه نجوم الظهر!
ـ ع كيفج بيهم هدهد شوي شوي صيري رومنسية مو مثل قبل تتباطحين وياه وترجدي بالكاع
اختلف وقت السابق عن هسة ..
هسة انتِ مرته لازم تدلعين كدامه تتنغوجين ..
ـ لا ادلع ولا اتنغوج قز القرط اسويله
ـ لج هديل شبيج افهميني خلي عندج انوثة شوي وتعلمي حركات كدامه
ـ بالله هذا الزواج هيج لازم تغييرين من نفسج علمود ابو شوارب يعتدل مزاجه
ـ اي زوجج هذا و الدين يطلب هيج حتى تصيرين بارة بزوجج
ـ الي يسمعج يكول ماخذة عمار كوسوفي هو تالي زوبع شواربه بيهن تخديرة مال جاي ..
ظليت وياها اريد اعلمها الي عليها و المو عليها بس هي متكدر تغير من نفسها ..
تحسها زلمة اكثر من هي بنت ..
صرت اعرف من حركاته وتصرفاته لزوبع هو مو رايد هديل زواج بكد ما هو يفكر يغثني ويعاند بية بس اني راح اعلمه المغثة شنو ..
اجه الخميس ورتبنا كوشة بيدنا احنه سويناها و هديل كذلك وصار وكتها للخطوبة وناس تركص وناس فرحانة ..
اني ما طبيت بعدني وكشخت كشخة بوكتها جانت مرتبة مو هسة هههه
جان كل همه يخليني اشوفه هو وهديل سوة بالخطوبة حتى يحسسني بالندم او يقهرني ... خاص ب #وسام_الفراجي
فكلت اني الك ..
لبست وعدلت نفسي وما يوم طلعت بترتيب مثل هالترتيب ..
من طبيت من الباب اهلهل بكل علو صوتي الا بح صوتي ..
والكل تباوعلي شبيها هاي ..
واهز هز ذبيت لحم بعرسي ماراح اركص هيج
وتصفيك وصياح وجكليت اشيل واشمر عليهم بحيث فججتهم تفجج ..
امي لزمتني من ايدي بنتي شاربة شي ؟
- عوفيني يمة غير بنت عمي انخطبت شعندي غير هدولة ..
والجكليت يابس من هذا القوي بحيث نصه شمرته ع راس زوبع وميكدر يحجي ..
حدما اجت اختي رنا كالتلي يمعودة اوكفي
هذا حجر ومغلفته مستحيل جكليت
زوبع شفته عبالك رايحة بفاتحة مو خطوبة ..
كاعد بصفها وساكت احسه يكول شجابني شورطني ..
جان تصيحني هديل وتشاورني ..
ـ يكرابتي ترا جاي ترجمينه رجم ما تطشين جكليت وحدة وكعت بخشم زوبع صار يعاطس ...
اني فرطت من الضحك ع سالفتها ..
عفتها ونزلت اركص بعرسي ما اركص هيج ..
الكيك كدامهم اجه وقت يكطعونه ..
جان زوبع يحط ايده ع ايد هديل علمود يكطعونها سوة ..
هديل ايدها اكبر من ايد زوبع ..
ومن كطعوا الكيكة انطينا قطعة لهديل وقطعة لزوبع ..
لزمت الكيكة مالتها هديل وصارت تاكل وكع من الكريم مالت الكيكة ع ايدها جان تطلع لسانها وتشفطها!
زوبع سوة نفسه ما شاف وصار يعدل برباطه وغلس..
اني طلعت برا الا غصيت من الضحك
هديل مدري منو معلمها تدوس ع رجل العريس علمود يعني مسيطرة ..
داست ع حذاء زوبع جان اضحك واشاور رنا ..
ـ اول مرة اشوف عروس رقم حذائها 44 اكبر من حذاء العريس ..