رواية عذراء الرعد كامله بقلم بسمه ) جميع الفصول حتى الاخير الخاتمه

 

رواية سما 

الفصل الخامس 5

بقلم وسام الفراجي

هديل مدري منو معلمها تدوس ع رجل العريس علمود يعني مسيطرة .. 

داست ع حذاء زوبع جان اضحك واشاور رنا ..

ـ اول مرة اشوف عروس رقم حذائها 44 اكبر من حذاء العريس

رنا خزرتني وكالتلي ..

لتظلين تتنمرين ! 

كافي بالاخير هاي صديقتج المقربة ..

سحبت نفسي وكلت اروح اشاهد وجهي شوي لان انهد حيلي واني اهز واشمر جكليت .. 

و لمة نسوان هواي والمكان صار يخنك ..

طلعت ع سنك المطبخ كلت بلكي المي مالها بارد حتى اغسل وجهي .. 

طبيت وجان اتذكر صابغه وجهي شلون اغسله ولو هو ماع من الركص .. 

بس للامانة مو مثل هسة يعني تلزيك

مبردة بغرفة الاستقبال مشتغلة رحت ابرد نفسي بلكي محد بيها ..

طبيت لكيتها مشتغلة وحدها وعالشباك دولكة مي باردة مثلجة من هاي الكزاز و اني ميتة عطش ..

شربت منها 

وبعدين حطيت راسي عليها وفتحت ثوبي شوي حتى هوى بارد يطب يبردني شوي 

جان ما حس الا واحد حضني من ورة و ايد ع حلكي و ايد ع صدري وكلي متفلتين مني اليوم..

كمت اطلع صوت بس خانك الصوت بيده وصرت ارفس برجلي ليورة لان عرفته عمي عنتر .. 

وصار يلزك جسمه بية واني اهز بنفسي اريده يبعد 

مد راسه ع جتفي .. 

ويحاول يسوي شغلات حتى ابليس ما يرضاها .. 

نزل حلكه ع جتفي ورفعت جتفي هزيته ليفوك بقوة ضربته بحيث عض لسانه وابعد ايده

وهدني ولزم حلكه .. 

لزمت  دولكة المي كزاز جانت ..

شلتها بدون وعي هي وميها وضربتها براسه بلحظة غضب هيج فقدت السيطرة ع نفسي ..

صاح عمي وتكسرت الدولكة 

ووكع بالكاع و الد/م صار يوكع من راسه ينزل ع عيونه وخدوده الى ركبته ..

صار يحط ايده ع راسه من فوك 

وينزل يشوفها مليانة دم ..

من شفت هيج اني 

انخرعت بحيث صرت اصيح لا ارادي .. 

بمكاني ما تحركت .. 

كعدت ع رجليه وحطيت ايديه ع وجهي واصيح وابجي ..

حدما اجوا ع صوتي يركضون النسوان وزوبع ..

شاف ابوه هيج كبل رفعه راد يشيله ويطلع بي 

ما كدر .. 

نسوان صارت تصيح 

شكو شبي شهالدم منو ضربه 

هديل بلبسة الخطوبة ركضت رفعته وسحبته وشالته هي وزوبع من ايديه ورجليه وطلعوا برا ..

صاروا يوكفون اي سيارة ماشية بالشارع حتى يشيلوه للمستشفى ..

اني بحالة صدمة من الي صار .. 

هيج احسها كابوس بسرعة يمر من اتذكر ..

رنا لازمة ايدي .. 

ـ شسوالج هالحقير ..

ـ ما سوة شي عوفيني هسة

ـ حمرتج واصلة لخدودج احجي شسوالج 

ـ هاي بيده مسحها مو بغير شي 

ـ اعتدى عليج ؟

ـ انسان بلا شرف شنو تترجين منه!

ـ كومي نروح للبيت ..

سمعت صياح امي.. 

ركضنا عالصياح .. 

لكيت امي وعمتي مرت عنتر متشاعفات ومتكافشات ووحدة تشد شعر الثانية .. 

ركضت اني حتى افازعهن ..

وبعض النسوان الي انهزمت من الصياح والهوسة ورجعن لأهاليتهن 

..و الي ظلن حاضرات ويفازعن ..

ماحسيت الا وحدة سحبتني من جذيلتي ودفعتي بقوة ليورة باوعتلها لكيتها سدير بنت عمي عنتر!

جان تكلي سدير 

ـ لومو شايف منج خفة ما اعتدى عليج يا بربو*

ـ اني لو ابوية هيج اطم نفسي 

ـ طمي نفسج هسة ماظل احد ما تحرش بيج والمنطقة كلها عرفت منو يدز ابنه ياخذ وحدة متحرشين بيها الشباب وساكتة ..

رنا كبل ضربت سدير راشدي وكالت مع الاسف عليج ..

تشاعفنا و النسوان فكن امي وسحبنها لبيتنا ورجعت اني ورنا و يا امي ..

شهالفضيحة هاي كل نسوان الديرة عرفت عمي تحرش بية ..

وهاي سدير العوبة غثتني مغثة بسوالفها بس الله يعلم بيها ..

اجه ابوي وعمي هلال جانوا برا شكو شصاير شهالصياح فهموني ..

امي طلعت لابوية كلتله ..

كتلك خلي نبني سياج لان اخوك مو راحة ما تسمع كلامي الا صرنا علج بكل حلك بالمنطقة هسة 

ـ شجاي تحجين شبي اخوي ..

ـ اعتدى ع بنتك وتحرش بيها عود جهاله بطوله المايستحي 

ـ انتِ شجاي تخبصين ..

طلعت اني وكتله اي تحرش بية ويهددني كل مرة يتحرش بية 

عمي هلال صاح بية وكلي طبي جوة العنبوج لابو 

ويباوع بالكاع يدور شي يشمرني بي واني اباوع ورى واركض كدام خايفة لا يشمرني بشي ..

 و طرد رنا وابوي كال لامي طبي جوة ويا بناتج ..

اجينه كلنا بغرفة وحدة واني ابجي وامي تمسح ع شعري وتكلي وين تلمسج ؟

ـ يمة يرحم والديج بيا حال اني هسة

 

رنا عاكدة حواجبها وطلعت لكت ابوي وعمي رايحين يلحكون عمي عنتر .. 

رجعت وكالتلي

ـ كل الصوج منج من يوم امي سألتج عمج يسويلج شي كلتي لا! ليش تغطين ع فعايله ليش ساكتة شهالغباء هذا! 

ـ جان يهددني يكول لامي عكس الي يصير وكل مرة يتحرش بية جنت اخاف امي تدري 

ـ وهسة امج درت وعرفت بنتها ساكتة عالتحرش!

- احترمي نفسج شنو ساكتة قابل برضاتي ساكتة

ضربتني راشدي وكالتلي 

ـ انتِ تحتاجين تربية من جديد وهاي اجر اذني للكاع اذا احد يباوع بوجهج بعد لان كلها عرفت متحرشين بيج 

ـ مامحتاجة احد يعترف بية ومو اول وحدة تتعرض للتحرش مو ذنبي اني تلومين البنت ماتروحون تلومون الزلمة الي رجليه بالكبر ويتحرش بوحدة اصغر من جهاله ..

عفتها ورحت للمطبخ ابجي .. 

اسمع صوت زوبع يصيح وين سما وين سما 

طلعتله هاي سما كدامك .. 

اجه وضربني ونزع شالي وسحلني بالكاع من شعري سحل ويكلي .. 

صايرة ايدج طويلة ابوية بي نزيف براسه ولو يلحكوني لوما يلحكونه ..

جاي يضرب بية .. 

جان ما احس الا واحد دفع زوبع وضربه من ظهره ..

باوعتلها لكيتها هديل ..

جان تكله .. 

انتَ لو زلمة صحيح ما مديت ايدك ع بنية بس بيك رس و عرج من ابوك تتحرشون وتعتدون عالبنات ..

تمد ايدك عليها اكسرها!

وكفت كدامي ولملمت شعري وحطت حجاب ع راسي ..

جان تطب امي وتشوف المنظر!

شبيج سما هذا ضربج مو ؟

ـ عوفي يمة محروك ع ابوه 

هو سمع كلامي ولف راسه وراح .. 

باوعت لهديل بعيونها حيل وحضنتها ..

صارت تضرب ع ظهري وتكلي ..

اني حفسخ منه ما اكدر اعيش بهيج بيئة ابو الولد متحرش وسافل والزوج يضرب بالنسوان و يكتل بيهن والله اذا اتزوجه الا اشبعه كتله اخلي عينه تطفي شحن ..

ـ لا هديل كملي نصيبج لتخربينه علمودي

ـ ومنو كال علمودج! طبج حريش انتِ شعليه بيج بس اني ما اتقبله بعد وما اعيش ويا هيج نماذج ..

بهاللحظة اجوا كم ولد من جيرانه فاتوا ع بيت عمي عنتر يريدون بطانيات ..

طلعت هديل عليهم وسألتهم شكالوا ع عمي عنتر شطلع بي ..

كالوا يمكنك عينه اليسرى انعمت ونزيف براسه ..

داخل هسة طوارئ وما ندري ..

اففف بعد ايدي ان شاء الله ينعمن اثنينهن .. 

اول مرة اسوي شي براسه خير .. 

بس جاي افكر ابوي شنو ممكن يسوي ..

وشنو راح يصير اذا انعمت عين عمي صحيح ..

امي اجت علينا كالت

ـ تعالن يبنات 

لموا هدومجن بس لتكثرن كل وحدة لبستين ثلاثة 

وحطنهن بالجنطة هاي الجبيرة

ـ ليش يمة ؟

ـ لمن هدومجن عالسريع بلا ليش 

حطيت لبساتي اني و رنا .. 

عالسريع .. 

وكالتلنا اطلعوا يلا عالسريع ولتوكفون لأحد  ..

طلعنا ..

شافتني هديل ركضت علينه 

ـ وين وين

ـ والله يحبيبتي مدري امي كالت اطلعوا

ـ عمة عمة بالله عليج كولي وين رايحة 

امي : ارض الله واسعة 

باوعت لهديل كلت الها ديربالج ع نفسج زين ..

هديل ظلت تباوعلنا حدما فرينا من الفرع كله

رحنا وعفنا البيت ..

طلعنا بالسيارة ونمشي نمشي 

طلعت امي ماخذتنه ع بيت خالي جاسم ابو مصطفى..

دكينا الباب ..

وطلعت خالتي الي هي مرت خالي .. 

شهكت من شافتنا وكالت

خالتي :ـ الله حيو شجابكم شورطكم شهالمفاجئة الحلوة هاي

امي : جابتنا المصايب والله يمرت اخوي

خالتي : ليش شكو ؟

امي : دطببينا هسة موكفتنا بالباب يا ام مصطفى

خالتي: ههههههه والله التهيت حياكم الله فوتوا جوة البيت بيتكم هلا بيكم 

طبينا جوة جان مصطفى نايم بالغرفة وطبينا وخالتي تصيح بي بيت عمتك اجوا علينا اكعد .. وهو غاطس ..

اني تعوذت مية مرة منه لان هذا يرادله دولكة مي كزاز هم حتى يجر عدل .. 

كعدنا وشربنه مي وجاي وشوي واجه خالي جاسم ..

وتفاجئ بينه و بوسنه كلنا وهلا بيكم 

جان امي تحجيله كلشي الي صار بالتفصيل .. 

جان يكول رجعه بعد الهم ماكو ..

يريدوج يعزلوج ببيت بعيد عنهم واذا ماقبلوا هذا طابق الثاني اكعدوا بي ومو بمانية احد ..

بس سالفة عنتر ما راح تمر سلامات 

امي: يمعود بين الحياة والموت حتى عينه طافية عوفه اخذت حكها وزيادة سما

صاحني خالي وباسني بين عيوني وكلي الي يمسج بوردة اطكه بطلقة معليج ولا تخافين ..

خالي صاح خالتي وكاللها جهزي الطابق الثاني الهم وجبتلج بامية ع لحم ترد الروح .. 

امي كالتنا عوفن خالتجن متكدر تنظف روحن انتن نظفن مكانجن فوك ..

جان خالي يكول وغرفة مصطفى الفوك خلوها للبنات ومصطفى ينزل جوة ..

مصطفى كعد بهاللحظة يفرك بعيونه وشافنه ومثل المو المصدك 

خالتي ام مصطفى تضحك عليه وتكله ترا مو حلمان هاي عمتك هنا كوم سلم عليها ..

اني من كعد هذا الغثيث كمت اخذت رنا وصعدنا فوك نرتب بالطابق الثاني .. 

ردت افتح غرفة مصطفى و رنا كالتلي لتتقربين يمها الا هو يجي يفتحها ويكول طبوا بيها ..

عفتها ورحت للغرفة الثانية نظفتها وكملتها .. 

ورنا نظفت الممر ..

جان نسمع صوت الباب يندك قوي يارب سترك منو هذا 

نزل مصطفى يركض وخالي طلع كدامه فتح الباب طلع ابوية ووياه هديل هي كالتله طلعوا وشايلين هدوم ويمكن لخوالهم ..

طبت هديل كبل عليه للبيت حضنتني ..

تفاجئت شجابج هنا كالت مو وكتها 

وابوي عالباب كال ..

ـ وين البنات وامهن

ردله خالي ..

ـ جوة بالبيت!

 ـ صيحلي امهن بالله عالسريع 

ـ دفوت جوة منو يركض وراك 

ـ مكدر هسة بس صيحلي اياها كلمتين وياها واروح 

ـ دفوت مو راهمة واكف عالباب

ـ ابو مصطفى والله مستعجل راح يحولون عنتر ع بغداد ولازم اروح وياه وزلم طابه طالعة والمشكلة شكللهم شصاير للي يسأل ..

ـ والله ادري بموقفك لازم تشوف تالي اخوك شيصير بي ومن يسألوك ليش متكدر تحجي السبب وصاير بالوسط

ـ لا مو بالوسط اني ويا بنتي و سما سوت الشي الي يستاهله ولو صاحي هو افججه اني بس مو صاحي ..

صاحني وباسني وكلي ديربالج ع نفسج بنيتي انتِ و رنا ولتخافون هي تنحل حتلو ابيع بيتي لان بس نشوف تالي عمكم 

الشيخ رايدنا واكو كعدة احنه العمام سوة ..

حط بيد امي فلوس وراح ..

اني الصراحة تأثرت وبجيت شسويت بأهلي وشصار بية .. 

صعدت فوك طبيت لغرفة الثانية مو مالت مصطفى وكعدت ابجي ..

لحكتني هديل وياي ..

واجه مصطفى كلي ليش تبجين؟ ترا عادي مو كل الناس سمعت بيج يتحرش عمج بيج ولابد يجي واحد مفتح عين اعمى كلب ويتقدملج 

ـ ليش ششايفني ناقصة ايد رجل لو ميتة حتى اتزوج اشرف منك ومن عشرة من امثالك ..

راح وظليت ابجي لان سالفته دكت بكلبي ..

وهديل كالتلي مشتهية اغسله برزالة بس بعدني جديدة هنا..

راح شوي والتهيت اني وهديل فوك ..نسولف باللي صار..

جان ما احس الا جلب يعوي بصوت عالي بحيث شاطت روحي وهجم عليه ..

صرخت اني و هديل وطلع مصطفى خاتلنا ويريد يفززنا ..

وصار ينبح

هديل  كالتله ..

جايب صوت الجلب بالمضبوط خربئنة شلون هيج صاير جلب عبالك صحيحي..

ردلها شقصدج!  مو من هسة بديتي تناكرين بية

صحتلها هديل خلي نكمل السوالف ماتفيد

صار الليل نمنا بالغرفة الثانية

وغرفة مصطفى فارغة وهو نايم جوة لان خالي كاله الطابق الثاني خليه فارغ بس النا ..

كعدنا الصبح وتريكنا اعتيادي .. 

وطلع خالي للشغل وهذا مصطفى دب مال نوم .. 

كملنا كل شغلنا ..

تغدينه بس اني وخالتي وامي و رنا وهديل ..

مصطفى نايم 

وخالي بالشغل ..

العصريات اندك الباب 

ومصطفى افندي توة كاعد وجاي يسووله غدة 

طلعت افتح الباب! 

تفاجئت جارتنا ام ياسين وياسين ومروة اخت ياسين

صراحة ابنها درة درة من الاخلاق بس هم شوي حضريين وعايشين بنصنا  من كم سنة مدري شنو السبب بس يعني مياخذون من القرى ابد 

كلت الها ..

هلا عمة شلونج فوتي فوتي ..

بستها هي ومروة

و ياسين ظل واكف برا ع زاوية كتله فوت ماكو احد كلي اكو زلم او ولد هنا اذا ماكو مافوت ..

رحت فوتت ام ياسين ومروة وصحت مصطفى يطلع لياسين يفوته للربعة ..

متفاجئة من ام ياسين شجابها شوداها ..

اخر مرة شفتها بيها قبل خطوبة زوبع علمود تعلمني كم شغلة تخص العرس  ..

كعدنا وشربنا جاي واني كاعدة يمها شاورتني علمتي هديل الي كتلج عليه ؟

ـ خالة ام ياسين لو تدرين شصار بالخطوبة عبارة عن مسرحية وضحك 

ـ لعد ليش خليتج انتِ تفهميها لان اعرف هديل متعبة مو مال هالسوالف مال تلعب توكي لو شدة يا ورد 

ـ بس والله نسيت هواي تفاصيل حجيتيها الي 

ـ جان خليتي امج تعلمكم ؟

ـ استحي منها واصلا متقبل 

جان هديل تكول هسة جاي تكصن بينة مو ؟ شو تتشاورن وتبسبسن! لو جاي تحجيلها هالجكليت مالج الصايرة شدة مصنوع ..

ضحكت ام ياسين وكالت لا والله شغلة عادية 

المهم طلعت برا ولكيت وجه بوجه مصطفى كلي منو هذا المرتب نفسه وجاي من هناك علمودكم

كتله مكان ما واكف برا اكعد يم الزلمة عيب عايفة وحده 

رجعت كعدت يم النسوان جان ام ياسين تكول اني جاية من هناك لهنا اول شي علمود شوفتكم واعرف شصار عليكم لان اصلا من انضرب ابو زوبع وشفته ماتحملت اخذت مروة ورحنا للبيت وثاني شي جايتكم بشغلة

امي كالت شنوو الشغلة.      #وسام_الفراجي 

كالت ..

ابن اخوي يريد يتزوج ثانية ويكعدهن بنفس البيت وكلت الهم ع سما ماتتضيع ف اني جاية عليكم ابلغكم بالموضوع واشوف رأيكم اذا تنطون سما ع ضرة!

رنا : وليش ننطيها ع ضرة ترا يا خالة راح تطب 14 يعني مو معنسة وكدامها عمر شطوله قابل شايلينها ع كتوفنا وياريت متفتحين هيج موضوع مرة ثانية 

امي : سما مو ناقصها شي حلاوة صلاوات وصغيرة ومازوجها منا الما توعى شوي وبهيج وضع صعب ازوجهن اثنينهن

ام ياسين: بس ع كيفكم وياي اني ماحجيت شي ضد البنت ولتنسون البنت صارت عليها اشاعات وكلام و اي شخص يجي يتقدم راح يسأل المنطقة واكيد المنطقة تحجي شصار ويبعدون وهي قبل خطبة هديل اجتني تسألني عن شغلات تخص الزواج والدلع وكثير امور فكلت اكيد تريد تطلع ع هيج شغلات ووو ...

كالتلها امي كافي ام ياسين كافي رحمة لابوج .. 

اني خليتها تسولف كمت وطلعت ابجي لان اول شي انحرجت وثاني شي قهرتني من تكول سمعتها صارت عليها ملاحظات  .. 

رحت صعدت فوك وشمرت نفسي ع جرباية مصطفى نمت ع بطني جاي ابجي .. لحكتني رنا وصارت تكلي معليج بيهم وخليهم يولون و انتِ احسن نصيب راح يجيج ..

وصاحتها امي ونزلت .. 

جاي ابجي وايد تمسح ع فخذ رجليه وصعدت لفوك ظهري كتلها 

ـ هديل عوفيني لخاطر الله خليني وحدي اني بيا حال ..

جان يكول .. 

جيبيلنا هذا الولد يكول لامه نروح لولا 

طلع مصطفى!

 لفت ظهري 

كعدت زين

مسحت دموعي بجف ايدي ..

كتله مديت ايدك عليه! 

شوف اذا تحسب مثل قبل اسكت ف انتَ غلطان حتى و انتَ نايم اجيب شي واضربه براسك واخليك حالك حال عمي عنتر! 

ـ انطيني مجال واوعدج سر بيناتنه محد يعرف بي

ـ امشي ترا الملم عليك البيت قسما عظما

لف راسه وراح هالغثيث ..        #وسام_الفراجي 

اجه خالي من الشغل .. ونطوه ملابس يسبح وكالوله عدنا ضيوف .. 

و ام ياسين كالتلهم اني اروح و انتو فكروا زين ب الي حجيته .. 

طلعت وطلع ياسين هالهيبة والخجل ويمشي ومدنك راسه ولحيته تجنن .. 

رجعت و مصطفى شمرلي سالفة ..

جان توكف هديل كدامه وتحط ايدها ع اساس ع شواربها وتكول ..

يسلم عليك ابو حسن ويئلك الحمل جاي بعد يومين والئمحات مرطبين وبدهن نشر عالحارك ودير بالك من الئيئان السود 

وانا من عند مني بئلك دير بالك من العميان المفتحين اصطيف كان امفتح وشايف كل شي بالحارة يا عگيد ومن كل بد هوا الي ئتل الزعيم وابو سمير الحمصاني

مصطفى: شبيج عكيد شجاي تمسلتين وين مجطلة 

اني متت ضحك شلون حجتها وصفطت الكلام 

هديل: انتم الزلم كلشي متعرفون عن الحب اصلا الحب الحقيقي تشوف شوارب مرتك عالشمس وتظل تحبها ف جر منا لا اعلمك شلون تشمرلها سوالف

مصطفى: نزل ويدبج هالسطح .. منين الله جابج عليه ايدج بيها 3 كيلوات فخذ

سحبت هديل لان اذا تظل راح تعاركه ومو ناقصنه ..

ورا ما راحوا بيت ابو ياسين وخالي كمل سبح ورحنا كعدنا يمه وخالتي راحت تسوي اكل جان يصيح رنا يكعدها بسده ويكلها شتكولين تصيرين جنتنا! 

اني ضاكت بية الدنيا جان كبل يكولها الي ..

بعدين كال انتِ رنا لو سما والله دوختيني ..

كالتله لا رنا كاللها لا اريد سما اني جنتي هاي سما ..

جان مصطفى يكول اظل اعزب طول عمري ولا اخذ وحدة شامينها! 

وكفله خالي وضربه راشدي وصار يكفخ بي الا امي فزّعتهم وطلع وكف عالباب جان يكول لخالي ..

هاي الي تريد تزوجني اياه من جنت يمكم بنص الليالي نايمة بحضن ابن عمها !

الفصل السادس من هنا

لقراءة باقي الفصول من هنا

تعديل المقال