رواية سما
الفصل السادس 6
بقلم وسام الفراجي
وكفله خالي وضربه راشدي وصار يكفخ بي الا امي فزّعتهم وطلع وكف عالباب جان يكول لخالي ..
هاي الي تريد تزوجني اياها من جنت يمكم بنص الليالي نايمة بحضن ابن عمها !
يريد يزوجني وحدة ما ظل واحد ما شامها ويلحكه خالي و تلزمه امي تحلف عليه والله ما تلمسه ..
طلع لزم الباب وضربه حيل وراه ..
#وسام_الفراجي
اني موقفي صار محرج!
امي كالت الج حساب عسير بس يفضالي وكت جاي يطلع خياس الج هواي و انتِ بكد البيضة
كوموا لملموا ملابسكم نطلع ..
خالي ميدري ..
صعدنا نلملم نزلنا شايلين غراضنا جان يطلك خالي محد يطلع عتبة الباب ..
كعدنا بس خالتي صارت تضوج من عدنا وتكول مصطفى ولا مرة انضرب من ابوه بس من اجيتوا
وثكلت وجهها علينا وماتحجي بصورة طبيعية بس ويا رنا ما اعرف شنو سر رنا..
مشت اسبوع الامور طبيعية بس امي تتحلف بية ..
واحنه فوك شبه منعزلين وهم جوة وخالي يشتغل لليل يلا يجي ..
وامي صارت تدزني اشتري خضراوات وطماطة وبتيتة من المحل القريب على بيت خالي ..
يسموه محل #البركة محل مواد غذائية
لان خالتي صارت تسمعنا حجي!
" المصاريف صارت هواي واحنه عائلتين .. "
وامي فهمتها وصارت تتسوك وياهم ..
مرة مرتين امي الي راحت
وبعدين صارت تدزني اروحلهم ..
حتى نتشارك بالمسواك وما تصير مانية وطبعا خالي مايرضى ع تصرفات خالتي بس ميدري ..
فالعصريات اندك الباب وطلعله مصطفى
جان يفوت و انه عمي هلال ..
طلعت اسلم عليه وما مد ايده عليه دفعها وكلي وخري لهناك وين هديل!
صحنا هديل وكاللها يلا امشي لبيتج شعندج هنا!
رادت من عنده هديل تظل ما قبل..
اجت امي سلمت عليه حتى تعرف اخر الاخبار ..
كاللها عنتر نجحت عمليته بس عنده عينه بعدها ميشوف بيها ونازل مي من عدها!
بس حاجيت الدكتور كال اقل شي شهر لازم يظل ..
وزوبع التحق للدورة وهو باله مشغول ع ابوه بس مكدر يأجلها ..
#وسام_الفراجي
والكعدة الاثنين الجاي ويا شيخنا حتى نعرف شيكول وشنو رأيه ب الي صار ..
وجاية الشرطة استفسار ورادوا افادات ومن هالسوالف وغطينه الموضوع وماردنا يكبر ..
باوعلي وكلي ..
ابوجن مو زين ووجه معبس ومهموم ..
حافظن ع نفسجن اقل شي علمود تعب ابهاتجن!
نزلت راسي
حط ايده بجيبه شال فلوس كال لأمي ذني مصرف من رجلج يسلم عليكم كلكم ويكلكم عينكم ع نفسكم وظلوا يم خوالكم جاي ادورلكم ع بيت ايجار ..
سلم علينا واخذ هديل وراح ..
خالتي من سمعت الخبر كيفت وفرفحت كل حيلها ..
جان تكلي امي هاج اخذي فليسات ذني جيبي بيهن فخاذ من المحل واشترينا معجون وبهارات وكيلوين تمن و زيت ..
رحت اخدت الفلوس ورحتله
جاي اتمشه وصارت قريبة عليه بنت ثانية ما اعرفها ..
طبينا سوة للمحل
لكيت الولد بي هيج حنطاوي مملوح يعني يطلع عمره تقريبا 20 او 19 بهالحوالي ..
كتله بلا زحمة رايده دجاج وزيت وبهارات ..
كلي تدللي اختي لحظات وتكون جاهزة
كم كيلو فخاذ ؟
قاطعتنا البنت تكله الله يستر عليك اكو ولد اثنين من اول الفرع وراية حدما طبيت هنا ممكن افوت شوية هنا بينما يروحون شو خوفوني!
كللها اكيد طبي اكعدي هنا اشوفلج منو ذولي!
كالتله لا لا باليستر ع عرضك لتسوي شي ماريد مشاكل بس هم يروحون واروح
وكف ورجع ..
اني حسيت بإحساسها لان عايشة بنص التحرش واباوع لايدها ترجف متوكف ..
دخلوا الشباب الاثنين للمحل وسلموا عالولد ابو المحل وبكل صلافة طلبوا منه بطلين ببسي وهو عرفهم مو عالببسي ..
كاللهم ماعندي ..
كالوا بس هاي كدامنا ..
ردلهم مبيوع ..
اني شسويت صرت اسحب بنفسي حتى اطلع هسة يتعاركون واني اخاف من هيج هوسة ..
هم راحوا جان يصيحني كلي اعتذر منج هواي والله بس شغلة متتحمل تتأجل ..
حطلي المسواك وكال للبنت بيتكم بعيد كالتله لا فرعين منا كاللها تمام حقفل الباب واوصلج لهناك وابن امه الي يوصلج ..
اني اخذت المسواك ورحت بالطريق الثاني وافر براسي شلون يمشي كدامها
ومن فروا للفرع الثاني طلعت عاد للبيت شو وصلت البيت
تلكاني مصطفى كلي وين جنتي
مارديتله وطبيت وطب وراية احجي وياج!
مارديتله وصلت لامي نطيتها المسواك شافته طلعت ناسية التمن مو جايبته ..
وارجع عليه للمحل لكيته بعده مو مفتح قافل الباب البرا ..
صراحة خفت صاير شي وجاي ادعيلهم تمر سلامات رغم ما اعرفهم بس حتى توصل البنت سلامات ..
رجعت واتلفت ورة خاف يجي حدما وصلت اريد افر بالفرع ع بيت خالي شفته بآخر الفرع طلع ورجعتله
مدنكة راسي واعدل بدشداشتي وامشي ..
و هو ما انتبه عليه حدما وصل المحل فتحه
وكلي تفضلي ..
كتله عمي بس نسيت التمن!
ـ عمي!؟ ههههه اخذي اخذي التمن بذيج العلاكة السودة
اخذته وطلعت ..
رجعت للبيت واني ادردم ..
العالم شلون عدها كرايب واحنه عدنا زوبع ومصطفى والله يربي ..
رجعت مسموطة من الحر وصارت امي تطبخ وتعاونت وياها واجت خالتي جان توكف عالباب مالت المطبخ وتكول ..
ـ والله جاي نعذبكم ويانه ليش جاي تطبخون انتم
امي ـ كلنا واحد ام مصطفى ان شاء الله ماكو فرق
امي صاحت رنا وكالتلها روحي للمحل جيبي جلافة زينة ..
ردت اروح اني بس استحيت اكلهم اني اروح ينتبهون وهم خفت اوكع نفسي بشي مصيبة بس هي الحقيقة غير ..
اني بنت عانيت من تحرش ونظرتي صارت ع كل زلم هيج ف الي اشوفه ضد التحرش احسه ملاك او من كوكب ثاني وهذا كلما في الامر ..
راحت رنا واجت وبعدين دزتها انوب وكالت لامي فتح ورقة حساب بإسمي ..
والمرة الثالثة اني انتظرها ع نار واباوع للباب ايمت تفوت ..
فاتت ووكعت من ايدها ورقة وشالتها وعقجتها وحطتها بصدرها عالسريع ومشت اعتيادي واني شفتها انخطف لونها
يعني مبينة الورقة بيها شي ..
كالتلي ماكو شي وراحت صعدت فوك ..
اني المصيبة ما اعرف اقرا بس الحروف ومعرف اجمعهن وهي تعرف القراية والكتابة
من لحيت عليها طلعت الورقة وكالت مكتوبة بيها ايات قرانية وشلتها حتى ماتظل بالورقة واني اباوع بالورقة هيج مو مال ايات بس ما اعرف اقرا ..
صرت اتحجج تحجج بس اريد اوصل للمحل واني ما اعرف الشعور الي بداخلي شنو
شو احس بإشتياق او شعور غريب لهذا الولد مدري لان فزع للبنت وكبر بعيني مدري هو جذبني ..
والله ماعايشة هيج شعور ابد واحس نفسي اريد ابجي من كدما متحمسة اشوفه ..
كعدت ويا نفسي شجاي اسوي قبل كم شهر جنت كلش بريئة ومااعرف كلشي عن هالامور ولا نتفة
الله لا ينطي عنتر ولا غيره الي يخلون البنت تفكر بامور ماجان المفروض تفكر بيها بس غريزتهم هي الي دمرتنا وخلتنا نتعلم ليش هم هيج يسوون وشنو يستفادون ..
المهم كملت امي الطبخ واكلنا كلنا وشبعنا وشربنا جاي وكاعدين كلنا بالطرمة والباب الخارجي مفتوح جان المح هذا الولد فات من البيت المقابيل بيت خالي!
شعنده هنا معقولة بيتهم!
صرت احوص اريد اعرف بيت منو هذا ..
كلت خالتي هاي جيرانكم منين هذولي وهذولي وهذاك البيت
وخليت البيت الي اقصده اخير شي حتى ميشكون بشي ..
صارت تعدد النا ومن وصلت بيت الولد كالت ذولي بيت ابو ايهاب ناس من العشيرة الفلانية ..
خوش ناس وولدهم وبناتهم مؤدبين بشكل ينحلف براسهم ..
وايهاب هو صاحب المحل الي براس الفرع ولد اسمراني لحية خفيفة عنده
كتلها اي عرفته بس ماعدكم اي علاقات بجيرانكم ليش احسكم مكطوعين عن الكل ..
كالت يعني هم شوي مبتعدين ميختلطون ..
فكرت براسي اسمه ايهاب واخيرا عرفت اسمه وحظي الحلو كدام بيت خالي ..
ثاني يوم الصبح دزتني امي اجيب بيض بألفين ورحت عالمحل جان الاكي هو
كتله ..
ـ ايهاب اريد بيض بألفين
باوعلي صفن شوي و ردلي
ـ ايهاب! من وين عرفتي اسمي ذيج المرة سألتي عن اسمي وكتلج ما اكلج!
اني صارت عندي خربطة صرت اراجع نفسي ايمت كتله ع اسمه ولا مرة كتله شسمك شبي هذا يمكن مخربط من كثر النسوان الي تجي
المهم غلست عرفته متوهم ..
كتله بس انطيني البيض ..
حطلي البيض وراح كتب بورقة مدري شنو وكلي اقريها ..
اني ابتسمت ع اساس قريتها خجلانة اكله ما اعرف اقرأ ..
اجيت للبيت واني مترددة اشوف الورقة لرنا تقراها الي لو لا اشوفها لو لا ..
ما شوفتها الها وظميتها كلت خاف كاتب شي مايعجب او مدري المهم خفت بالمختصر ..
امي كالتنا الحديقة والصبة عوزهن غسيل انتِ واختج اغسليهن ولا تخلن الكاع كلها طين هالله هالله بالمي ..
رنا ترش واني اشطف ونغسل بالطرمة والصبة للباب والصبة الس هالباب جاي اغسل بيها وطلعت بنية حلوة الله يستر عليها من بيت ابو ايهاب ..
شافتنا وسلمت علينا ..
شايلة زبالة تكرمون وجان مقابيل بيتهم برميل مال وساخة مو مثل هسة حاويات ..
شمرتهن وفاتت بعدين طلعت كالت النا ..
ـ شلونجن
ـ الحمد لله حبيبتي و انتِ ؟
ـ الحمد لله شنو ساكنين جدد هنا هلا بيكم
ـ لا والله يم خالي جاسم كاعدين
ـ تعالن عدنا عالبيت مابي احد اني والماما بس
ـ منكدر والله ميخلونه تعالي انتِ
ـ لا يبو غير يكسرني ايهاب!
- ههههه تمام لعد نتلاكة عود مع السلامة
جان تكلي رنا مبين ايهاب متشدد عالبنات
كتلها اي واضح بس ماينلام
فاتت رنا جوة واني ظليت احوص اطلع وارجع حدما شفت ايهاب جاي لبيتهم ..
انتظرت حدما تقرب ع بابهم جان اطلع ..
باوعلي و طب جوة شوية وطلع شاف ولد صغير كله تعال روح انطي هاي الورقة لهالبنت!
صاحني مصطفى من الحديقة شعندج برا ..
والولد اجه واني رجعت للبيت وكلي فوتي جوة ..
وطلع هو عالباب وكلبي وكف يمكن الولد الصغير راح يسلم الورقة لمصطفى !