رواية ابتليت بحبها الفصل السادس6 بقلم نجمه براقه

رحمة 

خرجت من البيت الصبح بدري واتجهت علي بيت سيكا اطمن عليه قبل ما اروح الشغل ولما فتحلي حسين شوفت ملامحه يعتليها الضيق والحيرة ف قولت بتخوف  وانا بخطي لداخل

_ مالك.. سيكا كويس 

_ لا مش كويس حرارته عالية جداً وقبلت معاه بحمي  

قولت بقلق وانا بتجه لاوضته

_ يالهوي 

توقفت عند الباب لقيته نايم والكمدات علي جبهته رجعت بنظري لحسين وقولت 

_ طيب وبعدين هنعمل ايه  كدة ممكن يموت مننا

_ مقدمناش حل غير اننا نوديه لدكتور

_ مش هينفع الكل هياخد باله واهل المنطقة كلهم وحتي المعلم كريم  ورجالته هيعرفوا انه هو العفريت 

_ نهربه  ونوديه مستشفي بعيدة ان شاءلله في محافظة تانية 

_ طيب وهنهربه ازاي مش هنقدر بردو نخلي اي عربية من المنطقة توصلنا 

_ متشغليش بالك انا معايا عربية

_ معاك فين 

_ راكنها بعيد بره المنطقة 

قولت باستفاهم

_ طيب ومدخلتهاش ليه

_ يعني.. انا هروح اجيبها واجي

قالها وتأهب للخروج ف وقفته وقولت بامتنان 

_ لتاني مره بشكرك علي اللي انت بتعمله معانا 

_ ولتاني مره بقولك حاسس اني ضمن التيم بتاعكم وبطلي بواخة

كمل بإبتسامة 

_ بس لو لازم تشكريني ف ممكن تيجي معانا 

_ فين 

_ نروح المستشفي.. انا مش هعرف اركز مع السواقة ومعاه في نفس الوقت 

سكت افكر ف قالي 

_ عارف  بتفكري في  ايه  ، بس انتي ممكن تقوليلهم في الشغل انك تعبانه النهارده ومش هقدر اشتغل  ، ومتخافيش عربيتي ازازها اسود محدش بيشوف اللي جواه

قولت بإبتسامة 

_ صح  ، طيب.. روح هات العربية وانا هروح اعمل عيانة واجي

قال بإبتسامة 

_ مثلي كويس  هتعرفي ولا اخبطلك دماغك في الحيط ف تتعوري ويكون عندك حجة بجد 

قولت ضاحكة

_ هعرف امثل ومتدنيش اقترحات تاني 

_ انا بقدم المساعدة بس شكلك مش وش مساعدات.. سلام رايح اجيب العربية

قالها وسابني ابتسامتي علي وشي واحساس بالسعادة متملكني مش عارفه ايه سببه او عارفة بس هيكون من الجنان والخفة اني اديله مسمي بسرعة دي 

#حسن 

جبت العربية ورجعت بيها عند بيت سيكا ف طلعتلي رحمة وقالت وهي بتبص حوليها

_ حد شافك

_ لا غموا عنيهم.. ايه هو اللي حد شافك.. ماشي في شارع طبيعي اتشاف 

دخلت الاوضه وهي ورايا وبتقولي

_ سؤال اهبل معلش  ، بس الخوف دلوقتي ان حد يشوفنا واحنا مطلعينه

_ طيب ايه رأيك بدل ما ترغي تروحي تراقبي الطريق وانا هجيب سيكا 

_ مش واخد بالك انك بتهزقني من غير سبب 

_ دي مشكلتك انتي اللي مش مدياني سبب اهزقك عشانه 

_ فكرني اضربك طيب علشان يكون عندك سبب كافي  ، هروح اراقب المكان 

قالتها وطلعت وانا رجعت لسيكا ميلت عليه وقولت 

_ عامل ايه دلوقتي 

قال بصوت خافت متعب 

_ بموت 

_ يا راجل متقولش كدة.. انت زي الفل.. يلا قوم معايا  "

وقفته علي رجليه ومشيت بيه سانده علي كتفي لغيت الباب وهناك لقيت رحمة بتفتح باب العربيه وبتقولي وهي بتبص حولية

_ بسرعه بسرعه 

دخلته في العربيه واتمدد في المقعد كله ودي اكتر حاجه كنت مبسوط بيها وهي ان رحمة هتقعد جنبي وبعد ما قفلت الباب قولت بضجر مصطنع

_  مفيش مكان تقعدي فيه الظاهر قدري انك تقعدي جنبي 

_ تبقي اول انسان هينول الشرف ده 

قالتها ودخلت العربية وانا دخلت من الجهة التانيه ف قالت 

_ اية ده  ، انت قولت ان ازاز عربيتك مش بيبن اللي جوه وانا شايفه عكس كده 

_ انا بتكلم عن اللي ورا والجوانب مش اللي في الوش

_ طيب ما كد هيشوفوني

_ طيب اقولك انزلي

_ انزل فين 

_ انزلي هنا انتي كلك متر ودي هتشيلك 

قطبت حاجبيها وقالت بامتعاض وهي بتنزل 

_ انا مش هرد عليك 

طلعت بالعربية لغيت ما عدينا المنطقة بمسافة وقتها طلعت من تحت وقالت وهي بتبص حوليها

_ عدينا صح

_ ايوة 

رجعت بصت لسيكا ونادت عليه ولكن مجلهاش رد ف قالت بقلق

_ هو ماله

_ داخ من العربية ونام 

_ اكيد 

_ اكيد وبطلي قلق 

اعتدلت في جلستها وقالت

_ قدامنا كتير

_ احنا لسه اتحركنا.. قدامنا مش اقل من ساعه عشان نوصل اقرب مستشفي بعيدة

قالت مفكرة في جملتي وهي بتستعرضها بأيدها 

_ اقرررب مستشفي بعيدة 

كملت ضاحكة

_ جيبتها ازاي دي 

_ مش هقولك علشان متجبيش زيها

_ هاهاهاها 

_ هي هي هي هي

قالت ضاحكة

_ بس بقا..

كملت وهي بتبص للعربية

_  بس ايه ده 

_ اية 

_ عربيتك كبيرة وفخمة قوووووي دي عربية ولا سفينة

ضيقت عينيها لما لاحظت تخميسي في وشها وقالت

_ بتخمس في وشي

_ اقل واجب العربية لسة جديدة ملحقتش اتهنا بيها وكدة هتتكسر

_ طلعت بتخاف من الحسد، ايوووة وانا اقول راكن عربيتك بعيد ليه  

_ ايوووة صلي علي النبي في سرك بقا

مر وقت واحنا بنهزر وبعدين قالت 

_ شغل ايه اللي انت جاي عشانه انا مشوفتكش بتعمل اي حاجه من وقت ما جيت  

_ لا ده سر 

_ طيب ما تقول 

_ بقولك سر تقولي قول 

_ اهو بندردش 

_ لا لو كده ف هقولك.. شوفي ياستي  انا بدور علي بنت عم خالي  اللي طفشته منه  

ضحكت وقالت

_ بنت خال امي من ام تانية  ، مبفهمش انا العلاقات اللي ابعدمن ابن خاله او ابن عم..  بس هي بجد طفشت منه

_ ايوه 

_ بتتكلم بجد 

_ لا بهزر.. انا بتكلم معاكي ليه علي راي خالي كلكم واحد

_ كلناااا واحد.. مالك النهارده بتقول كلام غريب  منين كلنا ومنين واحد 

_ لا بقولك ايه جاريني مبحبش اشرح الافيه

_ هو فين الافيه

_ بردو مبحبش اشرح الهبل اللي بقوله جاريني وخلاص 

تعالت ضحكاتها ف قولت بإبتسامة 

_ عارفه انك تحملي اكتر من شخصية 

تلاشت ضحكاتها وقالت مستفهمة

_ ازاي يعني 

_ يعني 

_ ايوة ازاي

_  يعني  قويه .. حزينة .. طفلة ...ست بيت شاطرة.. فيكي حنية الام  ،  وراجل 

_  متشكرة والله ويسلم ذوقك بس ايه راجل دي  شايفني بشنب

_  لا لا متفسديش كمية الصفات الحلوة اللي فيكي بالغباء  مبدائياً كدة الرجولة في الغالب بتكون طبع مش نوع في ذكور كتير بس الرجالة قليلين وانا وانتي رجالة الحمدلله 

قالت ضاحكة

_ راجل راجل  المهم ان مقصدكش اهانة  ده بعيد انك بتجمع نفسك معانا بكل ثقة

_ افندم.. قصدك ايه 

_ ولا حاجه.. وانت كمان راجل وده بان من وقفتك معانا من غير ما تعرفنا ... ومش هجيب سيرة انك هربت من رجالة المعلم كريم في اول مره شوفتك فيها عشان متحسش اني بقلل منك 

_ يخربعقلك.. هتقفليني منك ليه.. اسكتي حاولي متخلنيش المحك علشان انتي بتضغطي علي حته حساسة جداً عندنا 

قالت ضاحكة 

_ عنيا هختفي ما انا عفريـ... 

بترت كلمتها لما سمعت صوت أنين سيكا ولما التفت ليه لقيت وشه جامد وزعلان رغم التعب اللي هو فيه  ،  ف تابعت السواقة وسيبتها هي تكلمه بعد ما حسيت اني بقل بأصلي وباخد حاجه مش من حقي واكرر وطينة صدام معايا مع اني مفتكرش ان رحمة ممكن يجي يوم وتفكر فيه 

#صدام 

خرجت من الحمام بالفوطة والصابون علي  جسمي قبل انتهاء الدش بتاعي علي صوت التليفون وكان المتصل بابا ف رديت وقولت

_ ايوة يا بابا 

_ فينك يابني.. مشوفتكش من اول امبارح 

_ في سفرية تبع الشغل  سوري يا بابا نسيت اعرفك 

_ اية الاستهتار ده ودي حاجه تتنسي طيب مفتكرتش تتصل بيه وتقولي 

_ اتلخمت شويه انا اسف.. في حاجه 

_ في حاجات 

_ خير يا بابا 

_ اخوك

_ ماله 

_ الله واعلم هبب ايه مع رقية الموظفة في الشركة ف فتحتله دماغه وراح المستشفي وهي اتحبست

_ بتقول ايه يا بابا رقية تضربه ليه اساسا

_ هو بيقول انه متجوزها عرفي ف ضربته عشان كلم بنت غيرها.. بس ده معقول فذمتك يدخل دماغك الكلام ده 

_ رقية عبدالوارث متجوزه حمزة عرفي  طيب ده دي تعتبر من علامات الساعة 

_ انا بقول كده بردو  وحاسس اخوك مخبي حاجه عننا  والمصيبة ان امك مسانداه وحالفة ما تشوف كدبة اللي باين في عينيه  ، ودي موصية المحامي يعمل كل اللي يقدر عليه علشان البنت متخرجش 

_ ماما عملت كده 

_ ايوة.. هي كدة مفيش حد مبوظة غيرها 

_ اه.. ما يمكن يكون صح يا بابا 

_ هو ايه اللي صح 

_ انه يكون رقية متجوزاه عرفي  

_ مالك يابني.. لا في ايه بجد  ده انت لسة قايلها انها تكون من علامات الساعة 

_ خلاص يا بابا انا هاجي واشوف الحكاية 

_ تيجي متجيش بقا طالما امك قالت الواد مبيكدبش والبت تتحبس يبقا ده هيكون رايك انت كمان  ، اقفل "

قفل السكة في وشي وسابني بفكر في اللي قاله وانا حاسس ان في حاجه غلط.. رقية اكتر بنت مشيها مستقيم في الشركة وبشهادة الكل وكان واضح والكل شايف ان حمزة بيضايقها  ، وكنت من جوايا مش مصدق اللي سمعته ومتأكد ان بابا عنده حق  ،حمزة بيكدب  بس مكنتش عارف اعمل ايه اطلع منها واسيب ماما تتصرف ولا اتكلم مع حمزة وبعد تفكير  قررت اكلم حمزة واسمع منه ولما رد محستش باي تعب في صوته ف قولت 

_ ايه يابني قالولي انك متكسح في المستشفي 

_ توك افتكرت 

_ لسة سامع حالًا.. في ايه بقا.. ايه اللي انا سمعته ده 

_ سمعت ايه

_ سمعت انك متجوز رقية عرفي قال.. وكمان فتحت دماغك.. بس مش عارف ليه يا حمزة ياخويا الكلام ده مدخلش دماغي وحاسس ان دي  حركة من بتوعك

_ وانا هكدب ليه.. انا وهي كنا مرتبطين واتجوزنا بورقة عرفي واختلفنا ف فتحتلي دماغي هو ده اللي حصل بالحرف

_ حمزة؟!! 

_ مش مصدقني

_ لا مش مصدقك يا حمزة.. احكيلي ايه اللي حصل 

_ يازعيم هو ده اللي حصل انا مبكدبش وانت عارفني

_ماهي المصيبة اني عارفك، اخر مره بطلب منك تقولي ايه اللي حصل وبعد كدة هسألها وهصدقها هي مش انت 

_ يا واطي بقا تكدب اخوك وتصدق واحده متعرفهاش

_ علشان انت كداب وملاوع وانت نفسك عارف كدة .. احكيلي مش هضرك في حاجة 

سكت ف قولت 

_ ما تتكلم مش فضيلك

_ طيب احلف مش هتقول لحد 

_ مش هقول لحد 

_ لا احلف 

_ وغلاوتك ما هقول لحد 

_ احلف بحياة ماما 

_... 

_ كدة يبقي هتقول 

_ ماشي وحياة ماما ما هقول  ،  اتكلم بقا 

_ بصراحه انا... 

_ ايووووة 

_ انا مضيتها علي ورقة عرفي من غير ما تاخد بالها وظبطت حوار كدة خليتها تروح برجلها لغيت الشقة اللي مأجرها وهناك... 

_ ايوووة  كمل... وهناك حصل ايه 

_ حاولت اغتصبها.. بس هي اللي بدات يا صدام.. هي اللي ضربتني بالقلم واهانتني

_ بقا كدة

_ ايوة.. بس انت وعدتني متقولش لحد 

_ وعدتك مقولناش حاجه ومش هقول.. بس انت راضي ان البنت تتحبس ظلم

_ مش ظلم ماهي ضربتني بقولك.. مش المفروض تتعاقب علي ضربها ليه 

_ ايوة بس هي مش هتضربك كدة من غير سبب 

_ ولو بسبب انا مديرها ميحقلهاش تضربني 

_ طيب قولي مين غيري يعرف كلامك ده 

_ محدش غيرك حتي ماما مقولتلهاش

_ اه

_ ناوي علي ايه 

_ ولا حاجه   ،  انا سمعت ان ماما وكلت محامي و وصته يبعتها ورا الشمس.. يعني كل حاجه في ايد امك دلوقتي 

_ طيب بقولك يا صدام 

_ قول 

_ هو ينفع اتنازل وتخرج منها وننهي الحوار هنا 

_ صعبت عليك ولا ايه 

_ لا مش صعبانة عليه بس هي اللي لحقتني و ودتني المستشفي 

_ كمان؟!  

_ اه

_ مش عارف يا حمزة.. انا جاي النهاردة ونشوف مع بعض 

_ طيب بس متنساش انت وعدتني  

_ ماشي  ماشي.. مش هقول حاجه.. اقفل طالع من الحمام بالفوطة

قفلت معاه ورجعت نهيت حمامي وبعدين طلعت علي طول علي هناك

#رحمة 

بعد ساعة تقريباً وصلنا مجمع عيادات متلاصقة في منطقة مزدحمة بالمباني والناس ف قولتله

_ بقولك يا حسين

_ قولي 

_ ما نخلي اي دكتور متخصص في اي عيادة من دول  يكشفله وبلاش مستشفيات  واهو احنا ممكن نقنع الدكتور انه ميبلغش مش زي المستشفي  فيها مواظفين كتير واستقبال وكدة  

_ هي فكرة بس المستشفي هنلاقي فيها كل حاجة عكس العيادة

_ ماهو يمكن ميحتجش اكتر من علاج 

_ ماشي نطلع ونشوف  

_ متشكرة قوي 

_ لو قولتي متشكرة دي تاني هتغابا عليكي 

قولت بإبتسامة 

_ ماشي مش متشكرة 

نزلنا ساندين سيكا علي اكتافنا وطلعنا السلم قصاد بعض وبعد درجات حسيت انه هيسقط مننا ف حركت ايدي علشان اسنده ولتاني مرة ايدي تيجي علي ايد حسين  ف شديتها وسيبت سيكا ف انزلقت رجله عن السلم وكان هيوقع لو هو ملحقهوش بأيديه الاتنين ف تعالت اهات سيكا بسبب الألم اللي حصله ف قالي حسين وهو بيحاول يخفي بسمته

_ كان عندك نظرة ابعدية لما سميتي نفسك عفريته بس انا اللي مفروض اتخض مش انتي 

قولت متجاهلة مقصده

_ مش تمسك كويس اهو كان هيوقع"

كملت وانا بسند سيكا

_ يلا يابني ده هيموتنا في مره 

_ ده انا 

_ اه انت مش عارف تسند كويس 

زق كتفي بصباعه وقال

_ طيب اوعي كدة انا هشيله لوحدي

سيبتهم وهو كمل بيه لفوق وانا تابعتهم لغيت ما وصلنا وقابلنا الشخص اللي  قاعد علي مكتبه وقالنا وهو بيشاور علي مقاعد بجانب الحائط 

_ ريحوه هنا  

ريحناه ف قال

_ الكشف ب اسم مين 

قولت 

_ سيد  

_ سيد مين 

فكرت في اسم ف قال حسين 

_ سيد حسين 

التفت ليه وقولت بخفوت

_ مين قالك علي اسم ابوه

_ اسكوتي 

قولت بنفس النبر

_ متقولش اسكوتي 

_ طيب هقولك بقا   ، اسكوتي اسكوتي اسكوتي 

قولت بعد ما غلبتني ابتسامتي

_ ماشي انا مش هعمل عقلي بعقلك 

فضلنا قاعدين لغيت ما طلع واحد من جوه والتمرجي دخل بدالة ورجع يقولنا اتفضلوا دخلنا عند الدكتور وريحنا سيكا علي سرير الكشف والدكتور اتقدم ناحيته وقال وهو بيلبس السماعة 

_ سلامتك بتشتكي من ايه 

بصيت لحسين بتخوف ف قال بتعجل

_ تقريبا عنده حمه 

مردش وتابع الكشف وبعدين قلع السماعه وبصله وقال

_ هي فعلاً حمه.. هو اتعرض لحاجة سببتله الحمـ... 

بتر كلمته وقال متفحص ملامح حسين اكتر  

_ انا شوفتك فين قبل كده 

حسين ركز في وشه وبعدين ضحك وقال باندهاش

_ شريف ؟!  

_ حسن العمري؟!!!  انت لسة عايش 

قال بضحك وهو بيحضنه

_ لا ده عفريتي  لسة دمك يلطش وافيهاتك رخمة زيك..  بس ايه يابني ادكترت امتي 

_ يوووة بقالي شهرين وشوية فاتح العيادة.. انت اللي فينك وفين ارضيك

_ في الدنيا... والف مبروك العيادة  ، بس انا مكنتش متخيل اشوفك تاني.. سبحان الله ياخي الدنيا صغيرة قوي وتخنت يافقري هو انت بتاكل العيانين ولا بتعالجهم 

قال وهو بيتجه ناحية مكتبه

_ ام النبر اللي هيخسرنا الزباين 

_ زباين ايه ياعم العيادة مفهاش غير الغلبان اللي بره 

_ ده حقد انا عارفك.. بس ولا انا تخيلت اني اشوفك تاني ده انا قولت انك عيشت مع اهلك في الكويت ومش هترجع 

_ رجعت من زمان 

_ حمدالله علي سلامتك

كمل وهو بيأشر علي سيكا 

_مقولتليش مين ده 

_ ده صاحبي 

بصله وقال

_ صاحبك؟!  طيب ازاي.. ما علينا مانت كدة من زمان ، المهم هو محتاج يعمل تحاليل 

قرب منه  حسين وقال بخفوت

_ شوف انت مش غريب بس الولد واخد رصاصة ومخرجنهاله بسكين سخنة

_ نعم ياخويا.. ليه هو اتصاب في الصحرا 

_ اللي حصل ومش عاوزين شوشرة 

_ ياحسن يا حبيبي ده حتي لو مات هدفنه معاك وننسا ضميرنا المهني 

_ حبيبي يا شريف طول عمرك راجل 

_ وانت طول عمرك عبيط.. الولد جتله حمه قاتلة بسبب العك اللي عملتوه.. انا هستر عليك بس لو مماتش انما لو مات هبلغ عنك 

اتدخلت وقولت

_ تف من بوقك يموت ايه بعد الشر 

بصلي وميل عليه وقال برفعة حاجب

_ مين دي... دي مش يسرا  التانيه كانت فرعة 

تجمدت ملامحه وقال بجدية 

_ ربنا يسترها.. المهم هو تعبان اكيد مش هيقدر يتنقل من مكان لمكان عشان التحليل ما تاخد عينة منه وانا انزل لأي معمل يحللها

_ اوكي.. 

كمل وهو بيتجه ناحية الدرج

_ هتروح لمعمل الحياة اللي علي يمين العيادة تديلهم العينة وتقولهم دكتور شريف باشا سعدون  بيقولكم استعجلوا

_ ايوة مظبط معاهم انت 

قال وهو بياخد حقنة من الدرج

_ يااه يا ابو علي لسة فيك الطبع المنيل دة لسة بتدخل في اللي ميخصكش  الزمن بيغير مغيركش ليه 

بعد ما خد منه عينة دم ومشي بقيت قاعدة محتارة وبفكر هو اسمه حسن ولا حسين ومين يسرا دي ولا اتضايق لما جت سيرتها 

#صدام 

 لما وصلت الفيلا لقيت عمي نبيل ونادية مراته في الصالون سلمت عليهم ف قالي عمي

_ كنت فين 

_ كنت في سفرية تبع الشغل 

_ سفرية ايه دي

_ تبع الشغل ياعمي طمني عليك انت عامل ايه 

_ انا تمام.. سمعت اللي حصل مع اخوك

_  ايوة سمعت

_ طيب مش تعقل امك 

_ ليه 

_ مصممة تحبس البنت.. قولنالها يتنازل ونخلص وهي مش راضيه 

_ ماهي البنت غلطانه بردو يا عمي 

_ واخوك غلطان انت مش عارفة يعني   ، كدة احنا بنفضح نفسنا يابني قولها حاجة 

_ حاضر ياعمي هشوف.. انا طالع لها 

طلعت فوق وقبل ما ادخل اوضة ماما شوفت يسرا بتطلع من الاوضة تجاهلتها وهميت اني افتح الباب ف قالت 

_ صدام 

اتنهدت بزهق وقولت 

_ نعم 

جت عندي وقالت

_ مسلمتش عليه 

_ هنسلم بعدين

_ ماشي يا حبيبي مستنياك في اوضتنا 

_ طيب 

قولتها ودخلت وهي لسة واقفة لقيت ماما واقفة بتبصلي وتقولي 

_ حمدالله علي السلامه 

قولت وانا بحضنها

_ الله يسلمك.. وحشاني

_ وانت كمان.. ها قولي عملت ايه؟!  البنت طلعت بنت نبيل ولا تشابة اسماء

_ مش عارف لسة 

هتفت بعصبية 

_ يعني ايه مش عارف امال مين اللي يعرف.. بتعمل ايه بقالك يومين هناك.. قاعد بتتسلي وانا متكلة عليك 

_ يا ماما من فضلك اهدي شوية   ، انا لسة هرجع تاني وهشوف حكاية البنت دي  ، انا بس جايلك دلوقتي علشان حمزة والبنت اللي ضربته 

_ هممم مالهم حمزة والبنت اللي ضريته ياحبيبي ماما 

_  بابا حكالي  ، وانا مش عجبني الشوشرة اللي حصلت،  ومن فضلك انهي المهزلة دي فوراً يا ماما  ، حمزة يتنازل والبنت تخرج ونخلص 

قالت ببرود متجاهلة كلامي عن حمزة 

_ اه...  مقولتليش ناوي تعمل ايه علشان  تعرف حكايتها 

_في اية يا ماما  ،  انا بكلمك في موضوع اهم دلوقتي 

_ وانا معنديش اهم من موضوع البنت دي.. وقدامك حل من الاتنين تتصرف وتعرف هي بنته ولا لا او تسيبني انا اتصرف

_ هتتصرفي تعملي ايه 

_ اعمل اللي اعمله بقا ميخصكش

قولت بعد ما رجع الشك يدخل قلبي من ناحيتها

_ ماما 

_ هااا

_ انتي متاكده انك مش انتي اللي بعتي اللي حاولوا يقتلوها

_ وانا من امتي بكدب ومن امتي بخاف من حد عشان اخبي حاجة عملتها.. نضف مخك يا صدام متسبش المهم وتمسك في حاجات تافهة.. انا قولتلك يمكن هي عملت مصيبة او مصاحبة حد وهو اللي حاول يقتلها

_ جايز 

_ طيب  ناوي تعمل ايه 

_ مش عارف لسة، بس انا قابلتها واتكلمت معاها 

_ عرفت انت مين 

_ لأ 

_ طيب قولتلها ايه وقالتلك ايه 

_ قالتلي ان ابوها ميت من صغرها  ، مع اني قولتها اني شوفت بطاقتها وقولتلها ان اسم ابوها هو نفس اسم شخص اعرفه قالتلي اه  انا بتعرض لسخرية علشان تشابه الاسماء ده 

_ يعني ايه.. هي متعرفش ان اللي مشيت معاه ده هو نفسه نبيل 

_ شكلها متعرفش 

_ اية اللي بيجرا ده  ، انا مش فاهمه حاجه

_ ولا انا 

مطت بوقها بسخرية وقالت

_ ولا انت؟!  هممم

قولت بحنق

_ انا اعمل ايه يعني ماهو ده اللي حصل  البنت اسمها فيروز نبيل فياض وفي نفس الوقت متعرفش ان اللي بيروحلهم ده اسمه نبيل فياض  انا هعرف اكتر منها يعني 

رفعت صوابعي تسكتني وقالت بعقل شارد 

_ اششش

قالتها ودارت في المكان تفكر وفجأة وقفت قدامي وقالت

_ اسمع! 

_ نعم 

_ انت تروح تاني وتلعب علي البنت دي لغيت ما تعرف منها كل حاجه 

_ يا ماما ياحبيبتي ما انا بقولك هي متعرفش ان نبيل فياض هو الل بيجيلهم .. وانا اعتقد ان هو مش معرفها انه هو نفسه ابوها

_ يعني هيكتبها باسمه وميعرفهاش انه هو 

_  افتكر كدة   ، وفي حاجة كمان   ، هي قالتلي ان صاحب باباها بيجي يزورهم وان البنات لما شافوه قالوا انه هو ده نبيل فياض.. يعني وارد جداً متكونش عارفة انه ابوها وهو مخبي عنها انه هو وبيروح ويجي عليهم بأي اسم تاني غير اسمه الحقيقي 

_ ليه؟!!  ما لازم نفهم 

_ مش عارف 

_ لا اعرف يا حبيبي.. شاغل البت دي خليها تحكيلك كل حاجه عن حياتها 

_ اشاغلها ازاي يعني 

_ شاااغلها زي ما شاغلت يسرا قبل كده  ايه متعرفش 

_ اه بس دي بنت متدينة مفتكرش هيمشي معاها الكلام ده 

قالت بسخرية 

_ ياااقلبي  ، متدينة.. وايه يعني متدينة  ،  معندهاش قلب ولا مبتحسش 

_ عندها بس.. 

_مبسش اعمل اللي بقولك عليـة... وصحصح معايا  شوية مش كل حاجة انا  اللي هقولك تعملها ازا... 

بترت كلمتها لما رن تليفونها بصتله جاهلة لرقم اللي بيتصل ف ردت وقالت 

_ الو..  الوو

كملت بحنق

_ الوو

قولت 

_ في ايه يا ماما 

قالت وهي بتقفل السكة

_ مش عارفة شكله حد فاضي  ده تاني رقم يتصل وميتكلمش

_ يمكن حد بيعاكس

_ ايوة هو كدة.. يلا امشي ابقا وبلغني بالجديد 

_ طيب ممكن تقوليلي ناوية تعملي ايه في موضوع رقية 

_ صدام انا مكرهش قد الرغي في حاجه ملناش فيها.. سيبك من القصة دي انا هتكفل بيها 

_... 

_ امشي واقف ليه 

_ حاضر 

طلعت من الاوضه وانا بدعي اني مقابلش عمي نبيل او اي حد ممكن يسألني اذا اقنعتها ولا لا  ،  ولكن قابلت الاسؤ  ، يسرا، لقيتها واقفة عند اوضتنا واصبح امر مفروض عليه اني اروحلها رغم عني وانا حاسس بثقل خطواتي ناحيتها ووقفت قصادها وقولت بضيقة

_ في ايه 

مسكت ايدي وقالت وهي بتشدني لداخل

_ تعاله هنتكلم هنا 

بعد ما دخلت قفلت الباب ورجعت وقفت قدامي ايديها بتتمادا في لمسي وهي بتقولي بنعومة 

_ وحشتني قوي

حاولت اشيل ايديها وانا بدير وشي عنها بضيق ولكن تمسكت بيه اكتر لامست رقبتي بشفايفها وانفاسها الحارة بتدغدغ جلدي  وايديها بدأت تتسلل  لنزع القميص عني ف قولت بضيق وانا بحاول ابعدها

_ يسرا!!!  مش فاضي للكلام ده دلوقتي انا ورايا شغل 

قالت بهمس وهي بتتمادا في قربها مني 

_ مفيش اهم من شغلنا سوا.. انت وحشتني ومش هسيبك 

بدأت في الهمس بكلمات مثيرة محركة للمشاعر والرغبة بالإضافة  للمساتها الجريئة  الي بتجبرني من غير اي مقاومة اعمل اللي هي عايزاه ومقدرتش اقاوم لاكتر من دقيقة وبعدين تبدد اعتراضي وعدم رغبتي لرغبة جامحة خلتني اخضع لرغبتها زي المغيب وحصل اللي حصل وقبل ما انفصل عنها افتكرت مانع الحمل بس افتكرته بعد فوات الأوان ومبقاش قدامي غير اني ادعي ميحصلش حمل ومفيش حاجة تربطني بيها اكتر من كده 

_ ايه يا روحي شردت في ايه 

قالتلي الكلمة دي وهي بتلامس وشي بأيديها وتفوقني من شرودي ف بعدت عنها قعدت علي طرف السرير وقولت بضيق 

_ مفيش 

قعدت جنبي وقالت وهي بتسري بصوابعها علي دراعي بنعومة

_ امال انا لية حاسة ان فيك حاجة شغلاك  

_ احساسك غلطت.. مش خلاص خدتي اللي عايزاه سيبيني دلوقتي 

قالت بإبتسامة 

_ اوكي يا بيبي... اموووة 

قالتها بمياعة وهي بتقبض علي شفايفي  بين اصابعها ف دفعت ايدها عني ضحكت وقالت

_ انت عارف اني بعشق عصبيتك.. هاخد شاور واجيلك اوعي تمشي.. اصلك وحشتني قوي قوي

رجعت تمسكني تاني نفس المسكة وهي بتقوم من جنبي ولتاني مره ازق ايدها عني ف كملت طريقها للحمام وهي بتضحك لغيت ما دخلت وقفلت وراها  وسابتني  متنرفز  بسبب ضعفي قدامها وقدام اغرائها ليها لتاني  مرة  

#فيروز 

قبل معاد المعهد بساعة اتصلت ب الاء صحبتي وقولتلها تعدي عليه علشان نروح الدرس مع بعض مع اني متعودة اروح لوحدي كل مره ولكن المرة دي كنت خايفة امشي لوحدي بسبب  اللي حصل امبارح واثناء انتظاري ليها قالت ماما مستغربه تصرفي ده 

_ مش بعادة تخلي حد يعدي عليكي يعني 

_ اهو نروح مع بعض بدل ما امشي لوحدي في الشارع 

_ وده من امتي

_ من النهاردة 

_ اشمعنا  ، في حاجه حصلت معاكي انا معرفهاش

_ حاجة ايه.. مفيش اي حاجة 

قالت بشك

_ فيروز 

_ مفيش يا ماما وانا من امتي بخبي عنك حاجة  

استمرت في اسألتها بدون كلل ولا  ملل لغيت ما انجدني منها وصول الاء وبسرعة سلمت عليها وطلعت اجري لبرا كنت فاكره نفسي بهرب بس مكنتش اعرف ان الاء هتكمل ما بدأته امي ولكن بشيء من الخبث

_ يعني مش بعادة تطلبي نروح مع بعض الدرس .. في حاجه حصلت كدة ولا كدة ولاااا كدة

_ لااا مفيش حاجه كدة ولا كدة ولا كدة   ، كل الحكاية اني مش حابه امشي لوحدي النهاردة 

فتحت بوقها وقالت بخبث

_ اهاااا انا لو منك هعمل كده وعلي الاقل الاقي حد يلحقني وانا بتخبط في الناس في الشارع 

_ قصدك ايه 

قالت 

_ يعني سمعت انك ارتطمتي بأمير صراف اغلو..  هو مين ده يابت قولي كل حاجه متخبيش

قولت باستغراب

_ مين امير صراف اوغلو ده 

_ مش عارفه امير يخيبك يابت امير حبيبة فريحة 

ابتسمت لما افتكرت الشخص اللي انقذني وقولت

_ مين اللي قالك انتي علي الكلام ده 

_ هو في غير اللي ما يتسموا،  البنات كلموني وقالوا انك خبطتي في واحد واصدمك اكتر 

قولت بترقب

_ اصدميني

_ واحده قالتلهم ان الشخص ده قريب نبيل فياض اياه 

قولت بزهق

_ هو مين نبيل فياض ده؟!!!  يا ما نفسي بس اشوفه هو مشهور قوي كده يابنتي.. بيطلع في التلفزيون طيب 

_ يابنتي ده راجل غني جدا بس الصراحة انا مش عارفه شكله وبحثت عنه ملقتش اي صورة لية 

_  انا نفسي بس افهم حاجه واحده انا لو حابه ابان غنية واني بنت نبيل فياض ده  ، هقول بابا ميت ليه 

_ دول بنات فاضيه سيبك منهم وقوليلي امير صراف اوغلو شكله عامل ازاي سمعت انه موووووز موز 

قولت بإبتسامة 

_ مخدتش بالي 

_ يااابت 

_ ايييه 

_ ازاي يعني مخدتيش بالك دول قالوا خبطتي فيه وكنتي هتوقعي بس هو لحقك وسندك بدراعه وبقيتي في  حضنه وعنيكي جت في عينيه  وبقيتوا بتاع عشر دقايق باصين لبعض 

انفجرت ضحكاتي علي كلامها وانا بقول 

_ ايه المسلسل الهندي ده يخربيت التليفزيونات اللي بوظت دماغك.. مفيش الكلام ده  انا كنت معدية وخبطت ف حيطة ولما رفعت عيني لقيته انسان عادي والحاجة الوحيدة اللي فكراها انه كان  طووووويل.. اصلي تعبت علي بال ما وصلت بعيني لوشه

قالت ضاحكة

_ من قاوم عاد ولا ايه 

_ اعتقد  منهم.. امشي بقا هنتأخر 

مشينا مع بعض في طريقنا للمركز وطول الطريق وانا مكلبشة في ايدها وببص حولية خوف من انهم يجوا تاني ومع وصولي المركز تبدل خوفي لتمني وتلهف لظهور الشخص ده  اللي كنت من جوايا متأكدة اني مش هشوفه تاني 

#رقية 

يومين وانا قاعدة في الحجز وسط المساجين واللي حظي طلع حلو شوية لما ملقتش فيهم واحده تضربني ولا تطلعلي موس من بوقها زي ما بشوف في المسلسلات  ومفيش واحده منهم قربتلي أصلا كان واضح ان عندهم اللي مكفيهم 

وبعد يومين وانا علي نفس الوضع ضامة رجلية لصدري محتضناهم بدرعاتي ومتوسدة الحائط اللي جنبي اتفتح الباب ونادا العسكري 

_ رقية عبدالوارث 

التفت ليه وقولت بتلهف وانا بقوم من مكاني 

_ ايوة 

_ الظابط عايزك 

اتحركت من مكاني بتعجل ولما وصلته قبض علي دراعي ومشيت معاه لغيت اوضة الظابط وهناك شوفت بسنت وسامح ف اتقدمت ناحيتهم واستقبلتني بسنت بالحضن وهي بتبكي وبتقولي 

_ رقية حبيبتي 

حررتني من حضنها وقالت

_ شدة وتزول   

قولت بتبلد

_ ولو زالت هي سمعة وباظت واللي حصل حصل.. بس محدش فيكم سأل ليه 

_ بنسأل ومش ساكتين وموكلين ليكي محامي علشان يخرجك بسرعة 

_ وبابا فينه دلوقتي 

_ بابا تعبان قوي ربنا يكون في عونه

_ لسة مش مصدقني

_ طبعاً مصدقك  هو بيقول مش ممكن بنتي تعمل حاجه زيي دي 

_ عشان كدة ضربني اول ما سمع 

_ غصب عنه هو اتصدم باللي اتقال قدامه  ، متزعليش منه هو معذور بردو  

بصيت لسامح وقولت

_ وانت قولت ايه؟! صدقت؟ 

_ انا ساكت لغيت ما اسمع منك اللي حصل 

_ يعني شايف اني غلطت ولا لا 

_ مقولتش غلطتي بس في حاجه حصلت انتي مقولتيش عليها.. مستني اسمعك يا رقية  

_ اها حقك طبعا لازم تعرف 

#حمزة 

وانا بكلم جيداء وبنستيعد ذكرياتنا سوا في آخر ليلة قضيناها مع بعض جاني صوت راجل بيزعق داخل الفيلا ف قفلت معاها وطلعت من الاوضه وقفت فوق وشوفت ابو رقية وجدي نبيل ومراته نادية وماما واقفين كلهم وبيقول وهو بيبكي 

_ بنتي مش ممكن تعمل كده  انا مربيها كويس وعارف اخلاقها عاملة ازاي  ،  ابنكم هو الغلطان  

قال جدي مقاطع كلام ماما قبل ما تكمل كلمتها الأولي

_ يا حج هما الاتنين غلطانين وتقدر تشوف ورقة الجواز العرفي بنفسك في القسم 

_ كدب طالما بنتي قالت كدب يبقي كدة  

كمل برجاء 

_ بس انا مش عايز حاجه غير ان بنتي تخرج من السجن.. خليه يتنازل وكل واحد يروح لحاله 

قال جدي 

_ حاضـ.... 

قالت ماما مقاطعة كلامه

_ لأ!!  مش هيتنازل خليها تتأدب مدام جنابك شايفها محترمة قوي ومش مصدق انها مبتغلطش 

قولت وانا بنزل درجات السلم 

_ ماما 

التفتوا ليه كلهم بما فيهم ابوها اللي دموعه بتسيل وفكة بيرتجف بضعف ومهانة ف قالت ماما بصيغة الامر

_ اطلع فوق 

قولت وانا مكمل هبوط درجات السلم

_ لا يا ماما  ، انا هتنازل وكفاية اللي حصل  ، كدة هي خدت جزائها 

قال بغضب وهو بيحاول يتهجم عليه 

_ جزائها يا كلب اتبليت عليها وتقول جزائها 

كمل وهو بيحاول يبعد جدي عن طريقه 

_ حسبي الله ونعم الوكيل فيك  ربنا يوريني عجائب قدرته  في رد حقي وحق بنتي وسمعتنا اللي اتمرمغت في التراب بسببك "

انفعلت ماما بشكل مبالغ فيه وقالت بصوت يصدء في حيطان الفيلا 

_ انت بتحسبن في ابني بدل ما تربي بنتك  ، وانت فاكرنا زيك يا راجل يا ناقص عشان ربنا يخلص مننا في سمعتنا.. طيب ورحمة امي بنتك ماهي طالعه من السجن وهخلي اللي ما يشتري يتفرج عليها ويعرفوا تربيتك الو***ة

كان بيسمعها وهو بيقبض علي صدرة وبيصك علي اسنانه بألم ف ديرت ليه ضهري وقولت وانا بقف قدام ماما وبحاول اهديها 

_ ماما من فضلك براحه مش كد... 

بترت كلمتي لما سمعت صرخة نادية مرات جدي نبيل والتفت ورايا بفزع وشوفت الراجل واقع علي الارض و مش قادر يتنفس