رواية ابتليت بحبها الفصل السابع7 بقلم نجمه براقه
حمزة
كان واقع علي الارض بيصارع الموت وبيجاهد علشان يقدر ياخد نفسه واحنا كلنا كنا حوليه ومكنش حد فينا عارف يعمله حاجة .
ويدوب قدر جدي نبيل يتصل بالإسعاف وينده الأمن وفي وسط ارتباك الكل وعدم القدرة علي التفكير واحد من الامن دخل علينا واسرع في محاولة إنقاذه بأنه فكله ازرار القميص واستمر في تحريك ايده فوق موضع قلبه لغيت ما وصلت الاسعاف وخدوه ومشيوا وجدي راح وراهم بالعربية وانا وطنط نادية وقفنا نتابع إبتعاد الاسعاف عن الفيلا وانا كلي خوف وقلق انه يموت وافضل عايش بذنبه طول عمري وفي وسط شرودي قالت طنط نادية
_ ربنا يلطف ، تعاله ياحبيبي انت تعبان
اومأت بالموافقة ف سابتني ورجعت وانا فضلت واقف مكاني عقلي مشغول باللي حصل لغيت ما لمحت شخص واقف بعيد التفت ليه فوراً لقيته هو نفس الراجل واقف ومتابعني بعينيه
ف حلفت ما هسيبه غير لما اعرف هو مين وليه بيراقبني وبسرعة اتحركت من مكاني اجري عليه علشان الحقه قبل ما يختفي زي كل مرة ولكن بعد مسافة صغيرة حسيت بألم شديد في دماغي ومقدرتش اكمل وقفت مكاني ماسك دماغي بين ايديه وبتوجع وانا مغمض عيني من شدة الألم ولما فتحت وبصيت للمكان اللي كان فيه كان اختفي و واحد من الامن بيسندني ويدخلني جوه وهناك لقيت ماما بتمسك ايدي وتقولي
_ انت ايه موديك وراهم ، اديك تعبت.. اطلع فوق
بعدت ايدها عني وقولت
_ ليه يا ماما .. افرضي مات دلوقتي
_ ما يموت ولا يغور في ستين داهية انت ملكش دعوة
_ هيموت بسببي ازاي مليش دعوة
_ وانت مالك بنته هي اللي جابتله العار.. يستاهل عشان بعد كده يعرف يربي ده ان عاش
قولت بعصبية
_ يا ماما البنت معملتش حاجة انا اللي ...
تراجعت عن اللي هقوله ف قالت مستفهمه بنبرة شك
_ انت اية
_ مفيش.. بس انا هروح اتنازل وكفاية كدة
_ لا مش هتتنازل ، انت تطلع فوق وملكش دعوة بالموضوع ده انا اللي هتصرف فيه
_ يا ماما دي حاجة تخصنـ...
قالت بمقاطعة
_ ولا كلمة.. اطلع علي اوضتك فوراً
_...
_ بقولك اطلع
_ ماشي يا ماما بس انا بردو هتنازل ده موضوع يخصني لوحدي
رفعت حاجبها وقالت بسخرية
_ اااالله حمزة حبيب مامي كبر وبقا بيعاندها... اطلع فوق ياقلب ماما.. يلا يا روحي
قولت بنرفزة
_ اتريقي واتمسخري عليه براحتك
قولتها وطلعت درجات السلم بسرعه دخلت اوضتي وبقيت الف حولين نفسي بعصبية وانا قادر احس بفوران دمي بيفور داخل عروقي بسبب الكلمتين بتوعها واحساسي بأني ممكن في لحظة الراجل يموت واعيش بذنبه طول عمري وعشان اهدا شويه كلمت حازم اقوله اللي حصل
_ فينك
_ مع الشباب ، مال صوتك
_ ابو رقية بيموت
_ رقية مين... اااه البنت اياها؟!
_ ايوة
_طيب وانت هتعمله ايه ما يموت
_ يا حمار افهم ، هو جه هنا اتعصب شوية وطلب نتنازل بس ماما شتمته وقالتله انها هتفضحها و هتوديها في داهيه ف وقع وخدوه بالاسعاف علي اخر نفس
_ طيب ما اديك بتقول اتعصب.. يعني غلطان وكمان بجح ، يستاهل خليه يموت
_ ما لو مات انا هشيل ذنبه يا متخلف
_ اية يابني رهفية الاحساس اللي بقيت فيها دي.. ذنب ايه ، لتكون اتنيلت علي عينك وحبيت البت يخربيت سنينك
قولت بنرفزة
_ حازم! ه****.. بقولك الراجل هيموت بسببي وهشيل ذنبه تقولي حبيت واتنيلت ده انت عيل معندكش دم.. انا في ايه وانت في ايه.. حد مات بسببك قبل كدة ف شايف انه عادي يعني ولا ايه
_ لا محدش مات بسببي.. بس ادام هو وبنته اللي بدؤا بالغلط ف فكك بقا.. بقولك ايه ما تيجي احنا عند زهرة ، وكل الشلة متجمعة هناك والبت علا مش مبطلة اسئله عنك وهتموت وتشوفك.. تعاله واحنا هنفرفشك وننسيك رقية وابوها وضميرك اللي بقا بيوجعك علي حاجات ملهاش لازمة
_ حازم !
_ قلبوا؟!
_ انت **** يا **** ولو جيتلك *****
_ طيب ليه الغلط ده
_ انت لو قدامي هوريك الغلط اللي بجد ، غور يلا
قولتها وقفلت السكة في وشه واتصلت ب صدام فوراً علشان يجيلي ف رد عليه وقال
_ ايه يا حمزة
_ انت فين
_ ليه
_ فين يا صدام
_ في سفرية تبع الشغل عاوز ايه
_ طيب تعلالي دلوقتي
_ بقولك في سفرية ، مالك
_ تعاله يا صدام وبعدين سافر تاني
_ طيب مش تفهمني في ايه الأول
_ هروح اتنازل ومحتاجك تيجي معايا
_ ماما وافقت
_ لأ
_ امال هتتنازل ازاي
قولت بنرفزة
_ يعني اية ازاي ياعم متضيقوناش هي مش ناقصة. هروح اقول لظابط خلاص يافندم انا متنازل شوفت بسيطة ازاي
_ يابني طيب وماما
قولت بنرفزة
_ تصدق بابا مغلطش لما قال انك ابن امك
_ بتغلط فيه يا حمزة
_ ما انت تنرفز اعملك ايه
_ طيب اقفل واتصرف لوحدك انا مش فضيلك
قالها وقفل السكة في وشي ولأني تعبان واقل حركة بتتعبني مكنتش هقدر اروح لوحدي ولكن فضلت متمسك ب رأيي ومش موقفني غير انتظاري لجدي او بابا.
#سامح
بعد ما حكتلي اللي حصل قولت بعصبية
_ ومقولتليش لية علي تصرفاته معاكي من الاول.. يعني لو مكنش حصل اللي حصل كنت فضلت مغفل
_ انا مكنتش بستغفلك وكنت بوقفه عند حده، بس بردو مكنتش عاوزه مشاكل لحد انتوا مش قده
_ يعني انا مش مالي عينك وشيفاني عيل مش هقدر اجبلك حقك منه
قالت بسنت
_ وانت متعصب لية قوي كدة ، عملت ايه يا سامح لما سمعت اللي حصل.. روحت مسكت فيه.. طيب تعبت نفسك وكلمت محامي عشان رقية تطلع
_ اطلعي منها انتي انا بتكلم مع خطيبتي
_ اديك قولت خطيبتك مش مراتك علشان تزعقلها هي لو غلطت في انها خبت ف غلطها كان عشان مقالتش لبابا مش ليك
قالت رقية وهي بتمنعني اتكلم
_ اسكتي يابسنت انا فيه اللي مكفيني
بصتلي وقالت
_ هو ده اللي حصل يا سامح ، انا مقولتش خوف عليكم مش علشان بغلط
_ تاني هتقولي خوف
_ اه خوف.. احنا مش قد الناس دي
_ مصممة تقللي مني ، ماشي يا رقية لينا كلام تاني لما تخلص المشكله دي.. انا ماشي
قولتها ورجعت البيت ف استقبلتني ماما بالموشح بتاعها واللي هو ليه مفسختش خطوبتك لسة قفلت معاها الكلام ودخلت اوضتي قعدت علي السرير افكر في مصيري معاها اكمل ولا انفد بجلدي وبسمعتي اللي اتبهدلت من دلوقتي وفي الوقت ده كلمني عاطف وقالي
_ اية ياعمي هتفضل كدة لامتي
_ في ايه يا عاطف
_ ياحبيبي الراجل عمال كل شويه يكلمني ويقولي هيشوف حد يشتري السايبر وهيضيع علينا
_ طيب وانا اعمل اية مش معايا
_ ازاي مش معاك.. امال الفلوس اللي محوشها
_ تاني يا عاطف
_ تاني وتالت وعاشر.. مخبيها ليه علشان تتوكس بيها وتركب نفسك العار.. فوق لنفسك انت خسران فيها الجوازة دي
_ مش عايز اتكلم في الموضوع ده
_ طيب بس اقول ايه لراجل.. يا سامح حرام لما نضيع فرصة زي دي
قولت بتنهيدة
_ طيب اقولك.. انا هقسم الفلوس ادخل معاك بفلوسي واسيبلها فلوسها
_ ليييه يابني... يا سامح افهم من مكسب السايبر في سنة هيجيلك عشر اضعاف المبلغ اسمع مني وهات الفلوس كلها وبعد شوية ارميلها فلوسها
_ وانا اضمن منين اننا منخسرهمش
_ انا اضمنلك
_ طيب سيبني افكر وارد عليك
_ ماشي يا حبيبي بس رد عليه بسرعه وحيات ابوك
_ ماشي ، سلام
قفلت معاه وبقيت قاعد مكاني بفكر واحسبها.
لو المشروع ده خسر مش هقدر اردلها فلوسها لو سيبتها ولا هقدر اشتري الشقة لو اتجوزتها كنت في حيرة كبيرة قوي لساعات وفي النهاية قررت اقسم الفلوس بنص هي اه ليها اكتر مني بس اقدر من شغلي اكملهملها وخرجت من اوضتي ناديت علي ماما ف طلعت من اوضتها وقالت
_ عاوز ايه يا خطيب المتجوزة
قولت بحنق
_ امه الله يخليكي اسكتي دلوقتي.. فين الفلوس
_ فلوس ايه ياخويا
_ الفلوس بتاعتي انا ورقية
_ مالك بيهم
_ عايزهم
_ عايز تديلها فلوسها
_ لأ مش دلوقتي انا هاخد نصهم افتح بيهم مشروع
_ اه...
_ طيب فين
قالت وهي بترجع مكانها وبتتهرب مني
_ يابني اعقل بلا مشاريع بعدين لما نخلص من البت دي نبقي نشوف
قولت وانا بتبعها
_ يعني ايه نخلص منها ايه دخل دي في دي
التفتت ليه وقالت
_ يا فالح يا ابن الفالحة انت لو دخلت مشروع دلوقتي هتيجي وتقولك عايزة نصيبي من الارباح وتاخد اللي وراك واللي قدامك
_ يامه هدخل بنصيبي انا وبس
_ لا وانا اضمن منين
قولت بعصبية
_ يعني ايه لا.. فين فلوسي يامه
_ معايا بس مش هتطولهم غير لما تخلصنا من البت دي
قولت بحنق
_ ماشي هاتي هاخد فلوسها ارميهم في وشها واخلص منهم.. هاتي يامه
_ ترميلها ايه ياخويا
_ فلوسها يامه.. مش هي ليها اكتر من نصهم ولسة بتدفع في الجمعيات
_ فلوس ايه يا ابو فلوس ، وهي ليها عين تقول فلوسي بعد الفضيحة اللي عملتهالك ومنظرك اللي بقا يعر ، لااا والله ما هتطول منهم قرش هي ملهاش حاجة عندك دي فلوسك ولغيت ما تغور في داهيه مش هخليك تشوف قرش منهم وكمان مش هتتصرف فيهم غير برأيي انا وقدام عيني
#حسن
شريف قال لازم يتحجز عنده يومين يتابع فيهم حالته ويديله المحاليل والادوية اللي محتاجها ويعقمله الجرح وافقنا وانا ورحمة قعدنا جنبه لساعات في الاوضه بتاعته الموجودة في نفس العيادة لغيت ما تعبنا من القعدة وحسينا بالملل الشديد وخاصة هي وهي بتتاوب بتملل
فضلت متابعها بعيني وبراقب حركاتها لغيت ما خدت بالها ف قولت
_ عماله تتاوبي من الصبح ، عاوزة تنامي؟
_ لأ بس مليت من القعدة دي
_ وانا ، طيب ايه رأيك نخرج نمشي رجلنا شوية وبالمرة نجيب اكل انا جعان
_ اه ياريت
طلعنا سوا ونزلنا لشارع وسط الزحمة الشديدة اللي تحت مرينا ب محل شاورما ف قولت
_ تاكلي شاورما
_ ماشي بس انا هجيب
همت انها تمشي ف مسكت دراعها تعلقت نظراتها بأيدي وفوراً بعدتها عنها وقولت
_ تجيبي يعني ايه.. اقعدي
_ لأ .. انا هحاسب علي اكلي
_ عرفنا ان معاكي فلوس كتير وغنيه بس انا هجيب المرة دي وانتي ابقي شربيني الشاي عندك ببلاش.. استنيني هنا
سيبتها ودخلت المحل جبت شاورما ورجعتلها وقولت وانا بديها الساندوتشات بتاعتها
_ اتسضلي
_ اتسضل؟!.. اية اتسضلي دي
_ يعني اتفضلي بلغة الأطفال.، كنت اعرف عيل بيقول علي اتفضل اتسضل وانا من وقتها مش بعرف انطقها عدل
قالت ضاحكة
_ لا بس حلوه.. اتسضلي!
قولت بإبتسامة
_ طيب وانتي ، عندك كلمة علقتك معاكي زي كدة
دورت قزاحيتها تفكر وبعدين قالت
_ اممم لا مفيش حاجه علقت بس كان في عيل زمان بيقولي يا لحمة
_ شكله كان جعان
قالت ضاحكة
_ شكله كدة بس حلو كلام الأطفال عموماً وبعشق الجمع بتاعهم
_ ازاي
_ يعني مثل لما يحبوا يقولوا كتير
ضحكت وقولت
_ كاتيرات
قالت ضاحكة
_ او كاتيرين ولما يحبوا يقولوا ابواب يقولوا بابات
_ ايوة شوفت كتير كدة، طيب انا هقولك حاجه غريبة ومحرجة قالها عيل قبل كده
_ اوووعا
_ لا لا مش قلت ادب
_ طيب قول
_ في مرة اخ بيعلم اخوة ف قاله حمام يعني تويليت.. وقاله مثال صغير علشان يفهم.. قاله اختي دخلت التويليت.. واخته دي مش متجوزه ف الولد حفظ الكلمة وراح لباباه وسط صحابه قاله
_ بابا بابا.. اختي دخلت تولد
_ ياااانهار اسود طيب وباباه عمل ايه
_ بقا منظره زبالة وفضل ساعة يحاول يفهم بنته دخلت تولد ازاي وهي لسة متجوزتش وكانت هتبقا مدبحة
قالت ضاحكة
_ عيال فضيحة وربنا
_ بس جميلين يعني
_ وعسلين
_ وطعمين
_ لا لا دي كدة لوحدها
_ صح، طيب استني هلاقي غيرها..
فكرت شويه وبعدين قولت
_ بس لقيتها ، بريئين
_ قمرين
_ حلوين
_ هههههه هي كده بردو
_ ياااعم بقا ، كفاية اللعبة دي انا زهقت
قالت ضاحكة
_ كفاية
_ طيب نمشي انا حاسس رجلية مربطين
_ نمشي
طلعنا نتمشا سؤا ومرينا ب اتنين واقفين جنب محل دهب بيشتروا شبكة وجهت انظارها ناحيتهم بإبتسامة ف قولت
_ متخيل شكلهم بعد اسبوع من الفرح وهو جاي لوحده يبيعهم
فاقت من احلامها وقالت
_ ابو ام كدة ، ياخي حطمت الصورة اللي في خيالي
_ ده انا مردتش اقولك متخيل شكلهم بعد سنة وهما في محكمة الاسرة
ضحكت وقالت
_ يا ساتر عليك ، ما يمكن ميروحوش وهما كل اللي بيتجوزوا بيتطلقوا يعني
_ لا بس الاغلبية الأيام دي بيزوروا محكمة الاسرة
_ ربنا يبعدهم عنها ويسعدهم في حياتهم
_ يارب
كملت بإبتسامة
_ وعقبالك
_ شكرا
_ طيب بالمناسبة ، ممكن سؤال
_ ممكن
_ ارتبطتي قبل كده
_ ده منظر واحده ليها في الارتباط، يعني تتخيلني ببعت رسايل ويجيني دباديب وكدة
_ مش لازم دبدوب ورسايل ممكن ورد وشيكولاته
_ لا محصلش قبل كده
_ معقول محدش حاول حتي
_ اكيد في اللي حاول بس كلهم هُبل
_ هُبل ازاي يعني
_يعني، عيال عاوزة تتسلي تلاقي الواحد منهم معلق خمسة سته وعاوز يخليني انا رقم سبعة.. الشباب بقوا بيتسابقوا مين يعرف بنات اكتر مفيش حد فيهم بيحب بجد
_ مش كلهم
_ مش عارفه بس انا كل اللي بشوفهم بيكونوا كدة همهم يجمعوا إعداد وخلاص وفي بنات عبيطة بتصدق.. مش عاوزه اقولك كمية الفضايح اللي بتحصل في المنطقه كل يومين تلاقي فضيحة جديده. مره صور مره محادثات مره.. اسفة.. بس بتوصل للحمل ساعات
_ اسفة علي اية ، ده في العن من كده كمان بس يعني هي البنات عبيطة قوي كدة علشان متعرفش الصح من الغلط ويهبطوا مع اي حد
_ مش عارفه بس بيقولوا ساعتها مبيكونش فيهم عقل وبيتصرفوا بعواطفهم وده غلط طبعا.. غلط وحرام كمان انا مفتكرش ممكن يجي عليه يوم واكون بضعف اللي يخليني اتنازل عن مبادييء وتربيتي علشان واحد ولو روحي فيه
_ مش بشكك في نيتك بس فعلا في الوقت ده مش بيكون في عقل، الإنسان ساعتها بيتصرف زي ما قلبه بيقوله مبيفكرش بقا في تربية ولا مبادئ ولااهل، العواطف بتكون هي المتحكم للاسف يعني
قالت بعد تردد كتير
_ حصل معاك قبل كده
سكت ف قالت
_ اسفة
_ لا عادي واه حصل
_ حب ولا إرتباط رسمي
_ حب
_...
_ حابة تعرفي ومش قادره تسألي
_ بصراحه اه
_ الموضوع مفهوش حاجة صعب انها تتحكي ف عادي هقولك
بصتلي بترقب ف قولت بتنهيدة
_ وانا في الجامعة.. علي فكرة شريف ده كان معايا في نفس الجامعه وكنا صحاب بس انا في كلية وهو في كلية
_ ايوة خدت بالي من معرفته بيك
_ اه.. المهم من اول دخولي الكلية شوفت بنت كانت معايا في نفس الكلية بس في قسم تاني ، كانت جميله جداً ومرحة ودلوعة بشكل يلفت الانتباه ولفت انتباهي بقيت شهور واخد بالي منها ونفسي اكلمها كلمة واحدة بس مكنتش قادر اتجرء واخد الخطوة دي ، وكنت زي الاهطل اجي عند شلتها وافضل واقف متنحلها هي بذات ومفوقش غير علي صوت تريقة صحابها عليه ، وهي كانت واخده بالها جداً من اني معجب بيها واستمرينا علي الحال ده لغيت ما في يوم هي جت عندي بنفسها ومعاها قهوة.. مش هقولك كان شكلي عامل ازاي ، ده انا من كتر التوتر دلدقت القهوة علي ايدي وهدومي
_ باين عليها كانت حلوه قوي
_ الصراحة كانت حلوة قوي قوي.. كانت طويله ورشيقة ده غير عينيها وشفايفها ، ليدي ليدي يعني
_ ما شاءلله... اه طـ.. طيب وبعدين حصل ايه
_ بدانا نتكلم مع بعض في الكلية وقالتلي انها واخده بالها مني من اول يوم وانها كانت مستنياني اتجرء واكلمها وتطور الامر لكلام في التليفون وبعده مقابلات في اي مكان بره و...
سكت لاني محبتش احكيلها عن التجاوزات اللي حصلت بيني وبينها واحنا لوحدنا ف قالت
_ وبعدين سكت ليه
_ مفيش المهم قربنا جداً من بعض ويومي مكنش بيعدي من غير ما اكلمها كنت بحس ان روحي متاخده مني.. حبيتها زي المجنون وعيشت سنة ونص كانوا اجمل ايام حياتي لغيت ما في يوم بدء اهتمامها بيه يقل وكانت بتنهي المكالمة بسرعه وبتتلكك بأي حاجه علشان تقفل وخاصة لما سافرت في الاجازة علشان اقضيها مع اهلي في الكويت كنت بتصل بيها مبتردش. كنت ببعتلها تشوف الرسايل بعد ايام ومتردش ، وفي نفس الوقت قالولي ابن خالي واللي هو اكتر انسان بيكرهني من غير اسباب هيتجوز وانهم عزمينا علي فرحه ولأني مبطقهوش انا كمان منزلتش مع أهلي وفضلت هناك في الكويت وانا لسة بتصل بيها وببعت رسايل وفجأة وبدون مقدمات رقمها اصبح طول الوقت مقفول وكذلك صفحتها علي الفيس بوك اتهجرت وكمان حساب الانستجرام وكل الطرق اللي بتوصلني ليها اتقطعت واختفت تماماً من غير ما تقولي حاجة ، وانا عيشت زي المدمن اللي مش لاقي الجرعة كنت بتعذب واهملت في نفسي ،في اكلي وشربي ، حتي النضافة انا تقريبا مكنتش بستحما اكتر من في الاسبوع وبمجرد ما رجعوا اهلي تاني للكويت نزلت مصر وانا مقرر اروح بيتهم او اسأل حد من صحابها، صحابها اتهربوا مني واهلها قالولي الصدمة اللي بجد انها اتجوزت.. اتجوزت؟! طيب ازاي ومين وليه وامتي كنت بنهار حرفيا لغيت ما اييييه
قالت بترقب
_ يارب ما يكون اللي فهمته صح
_ هو ايه اللي فهمتيه
_ اتجوزت ابن خالك
_ حصل
قالت بذهول
_الله يخدها الواطية ، طيب وعملت ايه.. فضحتها؟!
_ لا
_ لييييه
_ لأني كنت متخيل انه ضحك عليها واتجوزته غصب ، وبقيت طول الوقت بحاول اكلمها لدرجة ان في غيابه كنت بدخلها الاوضه وفي الاخر قالتلي ايه
_ إيه
_ قالتلي اني مش فتي احلامها واني شبه العيال وهي عايزة راجل مش عيل.. عايزة تحس انها ست ، اصلي انا كنت رفيع واحساسي مرهف الصراحة كنت اعرض من سيكا بحاجة صغيرة وهي لما شافت ابن خالي اللي طول الوقت رياضة وجيم وفلوس وعربيات استهيفتني
_ طيب وعملت آيه
_ بعدت عنها ومش هقولك نسيتها وشيلتها من دماغي ، لا خالص عيشت سنتين شبه الميت لغيت ما خالي خد بأيدي واجبرني افوق لنفسي وفعلا رجعت لحياتي ، بس بردو منستهاش.. ده انا كنت بشتغل وبروح جيم وبسعي اني اكون احسن بس علشان اثبتلها اني بقيت احسن لما بعدت عني.. وحصل اللي كنت متمنيه
_ ايه هو
_ جت لغيت عندي مرتين تعيط وتطلب اسامحها ونرجع لبعض
شهقت بصدمة وقالت
_ وهي متجوزه
_ قالتلي هتطلق بس واحده تيجي لواحد بيته تقوله الكلمتين دول مفتكرش لو هو وافق كانت هتمشي من غير حاجة ويتقابلوا تاني بعد ما تطلق
دارت وشها عني بحرج ف قولت
_ اسف مش قصدي حاجه بس انا عايز اقول انها استغلالية تعمل اي حاجة علشان مصلحتها حتي لو هتجمع بين اتنين
_ اعوذ بالله هو في كده.. ربنا يكفينا شرهم.. لا لا مش ممكن
_ بتحصل متستغربيش قوي كدة
_ بردو غلط وحرام.. انا متخيلش ان ممكن يجي عليه يوم وافكر مجرد تفكير اني افكر في واحد تاني غير جوزي.. مجرد نظرة حتي ، دي ناس مبتخافش ربنا.. اوعا تكون طاوعتها
قولت ضاحكة
_ لا طبعاً اطاوع مين.. لا انا مستحيل تحلالي ست تكون معايا وبالليل تكون مع واحد تاني مستحيل افكر فيها حتي ، ثم ان هو اه واطي وندل وخدها مني قصد علشان يضايقني بس ابن خالي مخونهوش
_ طيب وهو ليه بيكرهك
_ مش عارف بس هو بيكرهني من صغره جيت علي الدنيا لقيته بيكرهني ، كتير كان بيزقني يوقعني ف انجرح ويقول مقربتلهوش لا ويحلف كمان انه مقربلي او وقعني بالغلط ، وكنت مجرد ما اعمل حاجه يجري يقول لخالي .. في مرة العيال زمايلي في اعدادي بقوا يزنوا عليه علشان اشرب معاهم سجاير وانا يدوب مسكتها ولصدفة هو شافني جري قال لخوالي واتصل بماما في الكويت حكالها وحكا للكل في البيت حتي اخوه الصغير حكاله ، يومها الدنيا اتقلبت عليه وكانوا مصممين يسفروني واعيش مع اهلي بس خالي بقا اصر ممشيش وبعد شوية بعد ماكبر واتخرج من الجامعة وخلص جيش ورجعنا نتقابل تاني بقا يتلون ويعمل انه بيحبني بس عمري ما صدقته
_ هو أصغر منك ولا ايه
_ لأ اكبر مني ب خمس سنين
_ غريبة ده انا افتكرته أصغر او قدك ف بيغير منك ، طيب محاولتش تسأله عن السبب
_ تعاملنا مع بعض ميسمحليش احكي معاه بس هو كده حقود من صغره
_ هو طبعه كدة يعني
_ بصي مش عارف بس الحقيقه مشوفتهوش بيكره حد غيري لدرجة اني بستعجب من اسلوبه في الكلام مع اللي حولينا.. بيحبهم جداً وخاصة خالي ومرات جدي وامه وابوه واخوه.. لا بصي هو بيحبهم كلهم الا انا
_ يبقي اكيد بيغير منك
_ ما انا بقول كده بس مش عارف ليه معنديش حاجه اكتر منه بالعكس هو اللي عنده اكتر مني
_ في ناس كدة غلاوية قلبها مليان بالحقد
_ فعلاً
_ طيب سؤال قد كدة لو مش هضايقك
_ اسألي
_ انت حسن ولا حسين
_ هتفرق هو حرف لو مزعلك شيليه وقولي حسن
#صدام
بعد ساعات قضيتها في الاوتيل في انتظار معاد البنت لمركز التحفيظ وصلني اتصال من يسرا رديت وقولت بتملل
_ اية
_ وصلت
_ وصلت فين
_ المكان اللي انت رايحلة
_ وانتي لسة فاكره المشوار اللي انا رايحله
_ حقك عليه يا حبيبي بس البيت كان مقلوب
_ ليه
_ ابو البنت اللي ضربت حمزة جه هنا وبقا يزعق ويقول خرجوا بنتي وبعدين وقع وراحوا بيه علي المستشفي
_ عايش ولا مات
_ جدك نبيل بيقول انه عنده ذبحه صدرية وحطوة في الانعاش
_ اه
_ انا خايفه يموت ويتهموكم فيه الناس دي وحشه قوي ومش بيخافوا ربنا
قولت بشيء من السخرية
_ طبعاً طبعاً.. ماما اخبارها ايه
_ جدك ومراته وابوك وحمزة حالياً بيحاولوا معاها علشان تخلي حمزة يتنازل وهي معترضه
_ حمزة قال حاجه جديده عن اللي حصل
_ حاجة زي إيه
_ خلاص ولا حاجه
_ في حاجه يا حبيبي
_ لا.. في حاجه انتي
_ لأ
_ امل متصأله تسألي يعني
_ عاوزة اطمن عليك بس
_ اه تطمنننني... ميضرش
كملت بتردد
_ طيب وحسن جه
_ لا
_ ولا جه في اليومين اللي فاتوا
_ لأ
_ اها
_ طيب قولي انت فين دلوقتي وراجع امتي
_ في الشغل ومش عارف راجع امتي.. عاوزة إيه
_ عاوزة سلامتك وعاوزة اطمن عليك وبس
_ لا انا كويس
_ ماشي يا حبيبي خلي بالك من نفسك وابقا كلمني
_ طيب سلام
قولتها وقفلت السكة وبعدين اتصلت ب ماما فتحت الخط وسمعت صوت زعيق بابا وصوتها وهي بتقولي
_ عاوز ايه دلوقتي
_ بطمن عليكم.. ايه الزعيق ده
_ مفيش حاجة كلمني بعدين
بعد ما نهت جملتها سمعت صوت اتصال عندها في الوتينج ولكن مهتمتش وطلعت في طريقي لمركز التحفيظ مشي من غير العربية كان في نفس معاد البنت تقريبا وكنت ماشي عقلي شارد وبفكر في اللي بيحصل معانا وفي طريقة اقرب للبنت بيها وفجأة حد شدني من ايدي التفت حولية لقيت عربية بتعدي بسرعة شديدة وبحيري جنبي بيقولي
_ ايه يا باشا العربية كانت هتخبطك
خدت نفس وقولت
_ مكنتش مركز ، اية الاخبار
اشارلي بعنيه ورايا إلتفت لموضع عينه لقيت البنت واقفة هي وصاحبتها وحاطه ايدها علي قلبها و تعابير الخضه علي وشها ف اشرت لبحيري انه يمشي وتقدمت ناحيتها وقبل ما اوصلها لفت انتباهي واحد واقف ورا شجرة بعيد وتهيألي انه بيراقبنا ولكن بسرعه وضحت الصورة لما لقيته بيتكلم في سماعه وكمل طريقه مرورا بينا واثناء ماهو معدي وقفت قصاد البنت وقولت
_ انتي هنا
قالت بارتباك شديد وجسمها بيترعش بشدة
_ اه.. العربية كانت هتخبطك لولا ان الراجل لحقك
_ كنت ماشي شارد شويه ومخدتش يالي
_ حد يشرد في الطريق.. افرض الراجل ملحقكش
_ يبقي نصيبي.. انتي عامله ايه
استعدت هدؤئها نسبياً وقالت
_ الحمدلله
_ رايحة المركز بردو
_ اه
_ باين حظي حلو عشان اشوفك مره تانيه.. وشكلي هشوفك تاني كتير
قالت بتلعثم
_ ليه
_ في شغل بعمله وبروحله من نفس طريق المركز
_ اه.. كـ.. كويس قوي ربنا معاك
_ سوري بس عاوز اعرف ، حد حاول يضايقك تاني؟!
_ لأ
_ كله تمام يعني
_ ايوة
_ الحمدلله.. يلا خلي بالك من نفسك
_ طيب
مشيت وسيبتهم ف جاني صوت صحبتها وهي بتقول بذهول
_ مش هو ده اللي من قوم عاد اللي خبطتي فيه.. ايه الطول ده كله انا دماغي وجعتني وانا رفعاها لفو...
رجعت بصتلهم لقيتها حاطة ايدها علي بوقها وبتسكتها ولما شافتني نزلت ايديها وقالت بارتباك شديد
_ بـ... بتهزر هي هبلة شوية
قولت بإبتسامة
_ مفيش مشكله وبنسبة لطول ف انا مش طويل انتوا اللي قصيرين
ضحكت صحبتها وقالت
_ انا طويلة 159 سم هي 157 بس
نغزتها بكوعها وقالت بربكة
_ هي كدة بتحب تهزر
تابعت وهي بتشدها من دراعها
_ امشي امشي
#فيروز
طول المسافة المتبقية للمركز وانا بوبخ الاء علي اللي قالته وقبل ما ندخل وقفت وقالتلي
_ يهدك يا فيروز كلمة قولتها والراجل امبسط اهمدي
_ عيب قوي ، يقول عليه ايه دلوقتي ، يقول بحكي عنه لصاحبي
_ طيب ما يقول واهو يعرف انه لفت انتباهك مش يمكن يكون بيدور علي عروسة ، انا مشوفتش دبله في ايده
_ انتي بتستهبلي.. منظري ايه قدامه دلوقتي
_ سيبك من منظرك قدامه واهتمي بمنظرك وسمعتك اللي هبهدلهالك.. انتي مقولتليش ان حصل بينكم كلام بس اللي انا شوفته وسمعته بعنيه بيثبت انه حصل بينكم كلاااام اعترفي بالحسنة
_ سمعتيه بعنيكي
_ متغلوشيش علي الكلام وقولي ايه اللي بيحصل من ورا ضهري
_...
_ انتي هتتكلمي ولااا
_ هتكلم بس احلفي انك مش هتجيبي سيرة لحد
_ وحيااااة بابا ما هجيب سيرة لحد
_ ابوكي ميت يا الاء شوفي غيره
_ طيب ان شاءلله اعدمك ما هقول لحد
_ ماشي هقولك.. انا اول امبارح كنت هتدبح
_ تدبحي ازاي يعني
_ هتدبح زي ما بيدبحوا
_ مين دول اللي بيدبحوا ، فيروز بتتكلمي جد
_ بجد طبعاً وانا هكدب ليه.. اتنين وقفوني في الطريق كانوا هيدبحوني
كملت بإبتسامة
' بس هو لحقني علي اخر لحظة
_ ياربي.. طيب لية ومين دول
_ معرفش
_ يكون متفق معاهم يابت.. ماهي دي حركة معروفة كتير بيعملها
_ لا لا ياشيخة مفتكرش
كملت بحيرة بعد ما دخل الشك قلبي
_ لا مش باين انه يعمل كدة
رجعت بصيت لجهة اللي جينا منها وشوفته بيقرب مننا ف بصت لموضع عيني وقالت
_ ده جاي ناحيتنا.. بت انا بجد مش مطمنة والله مش بعيد يكون هو اللي خطط لكدة
شردت عيني وانا بصاله لغيت ما وصلنا ووقف لثواني يبصلنا بإبتسامة وبعدين كمل طريقه والاء مشيت وراه كام خطوة وبعدين رجعت وقالت
_ بت انا مش مطمنة ، لو الواد ده قابلك تاني واتلكك عشان يتكلم معاكي ويفتح اي كلام اتأكدي ان اللي حصل ده هو اللي عامله ومتفق مع التانين عليه
#بسنت
وانا قاعدة جنب بابا في المستشفي الباب اتفتح وشوفت راجل في الخمسين او أكتر واقف بيبصله ف اتقدمت ليه وقولت
_ انت مين
_انا عز.. باباكي عامل ايه
_ تعبان
_ الف سلامة ، طيب واختك اخبارها إيه.. هديت دلوقتي
_ انت تعرف اختي كمان.. انت مين
_ انا واحد كنت معدي بصدفة عند شقة الولد اللي حاول يعتدي علي اختك وسمعتها بتصرخ عشان حد يلحقها منه
اتسعت عيني بذهول وقولت
_ يعني انت شاهد علي اللي حصل
_ ايوة
_ طيب ومروحتش تشهد ليه دي هي في عرض حد يوقف جنبها
_ يوقف جنبها فين واشهد قدام مين
_ هو انت متعرفش انها اتحبست
_ معقول اتحبست... ازاي ده حصل احكيلي
_ هو اتبلي عليها بعد مضاها علي ورقة عرفي علي انها استقالة وبعدين سحبها لشقة من غير ما تعرف انها شقته وحاول يعتدي عليها ف ضربته عشان تدافع عن شرفها بس هو استغل الورقة دي وقال انهم متجوزين عرفي واحنا اتفضحنا وبابا تعب وشهادتك بس اللي هتخلصنا من الفضايح اللي حصلت
_ بقا كدة مع انها مرضتش تهرب وتسيبه يموت.. طيب وياترا اهلة يعرفوا ان الورقة مزورة
_ اكيد يعرفوا
_ شافوة وهو بيمضيها يعني
_ لا
_ بس والله رقية ما بتكدب وطيبة بس طيبتها دي جت مع واحد زبالة هو وامه اللي مصممه متخلهاش تخرج.. ارجوك اوقف معانا وانا هشيلك جميلك ده فوق دماغي طول عمري
اتنهد بعمق وقال بعد تفكير حسيته مصطنع وانه كان جاي من الاول وعارف هيقول ايه
_ انا اكيد هعمل اللي يرضي ضميري علشان تخرج والحق يظهر بس الولد ده لازم يتربا بنات الناس مش لعبة ف انا وانتي هنتفق مع بعض علي حاجة الاول
_ حاجة اية
_ هقولك بس توعديني توافقي.. علشان حق اختك اولا وثانياً علشان الولد ده ياخد جزائه