رواية ابتليت بحبها الفصل التاسع9 بقلم نجمه براقه
رحمة
بعد ما استعدينا علشان نرجع المنطقة "حسين" استأذن وقالنا نستناه شوية وفي الوقت ده اتكلمت مع سيكا في حكاية الدهب ف قالي
_ وانتي هتخبية فين
_ عندي في البيت
_ وافرضي شموا خبر بيه
_ هيشموا خبر منين محدش فينا هيقولهم
_ مين قالك انتي مش يمكن الراجل ده يقولهم علينا ف يدوروا عندك ويلاقوه
__ انت بتقول اية يابني حسين مش ممكن يغدر بينا
_ انا هموت واعرف انتي لية مطمناله قوي كدة ما يمكن يطمع في المكافأة ويقولهم تعرفيه منين انتي
_ سيكا انت شوفت عربيته
_ ايوة مالها نيلته
_ طيب شوفت تليفونه
_ ايوة لية يعني
_ طيب اكيد مشوفتش الكارت بتاعه اللي بيحاسب منه... ياسيكا ياحبيبي هو مش محتاج علشان يغدر بينا
_ وافرضي غدر
_ مش هيغدر
_ وديني ما حد هيلبسنا في الحيط غيرك يا أبلة ، انتي كد بتسلميله رقبتنا وبتحطي حياتنا علي كف عفريت
_ يابني حرام عليك امال لو مكنش هو اللي لحقك من المعلم كريم ورجالته وهو اللي مهتم بيك وبتعبك دلوقتي، ده انتي مفتري قوي
قال بنرفزة
_ خلاص انتي حرة انا حذرتك وعملت اللي علية بس يارب بعدين ما ترجعي تندبي لما يخزوقك
_ يخزوقني؟! طيب والله عيب عليك، انت مش هتورد علي جنة عشان ضميرك السو ده.
رمقني بسخط ف سكت تحاشي لأي جدال بيني وبينه وبعد دقايق رجع حسين مخبي ايده ورا ضهره وبينادي علي برق اللي جري عليه، ف التفتنا ليها باهتمام وترقب لظهور الحاجة اللي ورا ضهره ف قال وهو بيطلع سلسلة مكتوب عليها كلمة بانجليزي
_ ايييية رأيك في دي ، يارب تعجبك
قولت باستفهام
_ ايه ده
_ سلسلة
قولت باندهاش
_ سلسلة للكلب؟! طيب ده انا عمر ما حد افتكرني بخيط اشعلقة في رقبتي ولا حتي حلق فالصو من اللي بيصدي ده
_ هي حظوظ ، انا كمان محدش جابلي سلسلة ولا حلق قبل كدة
اجابته ضاحكة
_ يمكن علشان مش فاتح ودنك
_ والله يمكن لية لا
_ طيب اية المكتوب علي السلسلة ده اوجعلي بطني اكتر
_ مش بتعرفي تقري
_ مليش في الانجليزي
_ ايوووة... طيب ياستي دة اسمه ب الانجلش
قولت بإبتسامة
_ حلو قوي.. قوله شكراً يا برق
مسك رجله الامامية يسلم عليه وقال
_ العفوا متقولش كده احنا اخو....
مط بوقه بعبس وقال
_ اية اللي انا بهببه ده ، افتكر اني لازم مقولش كل حاجه تيجي في بالي
قولت ضاحكة
_ وانا افتكر كدة حتي برق يفتكر كدة
التفت لسيكا وقولت
_ حتي سيكل يفتكـ...
بترت كلمتي وتلاشت ضحكتي لما شوفت وشه جامح ف ميلت عليه وقولت بخفوت
_ اعدل خلقتك ، الراجل جايب سلسلة للكلب في اكتر من كدة اثبات انه مش وحش
رمقني بجمود ورجع يبص لبرق اللي بيلعب مع حسين ف قولت بخفوت
_ ياالصبر
كملت موجهة كلامي لحسين
طيب هنمشي ولا لسه قاعدين
اعتدل وقال وهو بيتقدم ناحية سيكا وايده في جيبه بيطلع منه حاجه
_ نمشي بس في حاجة بسيطة جايبها لسيكا يارب تعجبه
كمل وهو بيعرض قدامه ساعة رجالي
_ اية رأيك في دي
ناظرها نظرة سريعة بامتعاض وقال
_ ماشي حالها
ابتسم وقال
_ماشي حالها؟!.. اوووكي.. طيب ممكن تتواضع وتقبلها مني هي مش دهب ولا بعشروميت مليون بس شكلها حلو
راقبت نظرات سيكا وامتعاضه الثابت علي وشه و عدم مد ايده واخدها منه ف خدتها من حسين وقولت وانا بلبسهاله
_ معلش اصل الرصاصة أثرت علي لسانه
كملت وانا برفع ايده
_ لايقة عليه مش كدة
قال حسين
_ اها.. مبروك عليك يا سيكا
_ مكنتش تعبت نفسك انا مبلبسش الحاجات دي
_ جرب تلبسها هتعجبك
كمل وهو بيمسك كيس الادوية
_ يلا نمشي
مسكت ايده ساعدته يوقف ولما هميت انا اسيبها تمسك ب أيدي وقال
_ كملي جميلك لغيت تحت انا كده هقع
_ بس كده عنيا ده انت لو عايز اشيلك وانزلك تحت مش هقول لا.. يلا بقا
محدش فيهم اتحرك بينما نظرات حسين متعلقة علي ايدينا المتشابكة ساعتها حسيت بالتوتر وفلت ايدي منه وقولت وانا بمسك دراعه من فوق
_ يلا في ايه
#حسن
مش بيفوت فرصة عشان يثبتلي اني مليش مكان بينهم وان رحمة مش ممكن هتبصلي وحتي لما طلعنا بالعربية صمم انها تقعد جنبه في الخلف وطول الوقت مبطلش كلام معاها في كلام انا مش هعرف اشاركهم فيه ولا اعرف عنه حاجة لنفس السبب وبعد وقت من السكوت لقيت برق بيتنقل من مكانه يجي جنبي ويبص لشارع مسحت علي فروة وقولتله بإبتسامة
_ مكنتش متخيل ان يجي يوم وكلب يقعد جنبي في العربية.. بس ايه رايك مريحة صح.. تحب اشغلك اغاني .. ماااشي.. بتفضل مين بقا.. متقولش ذوقنا واحد يا كلب
_ انت بتشتمه قدامي
_ ليه هو مش كلب بردو
_ كلب بس ليه اسم
_ ماشي اسفين ياكلب اننا قولنالك كلب
_ تاني بتغلط فيه
_ ياستي ماهو كلب ابوه كلب وامه كلبة فين الغلط اللي قولته
كملنا طريقنا في الكلام والهزار لغيت ما وصلنا بيت سيكا ونزلنا كلنا دخلنا هناك ف قال موجه كلامه ل رحمة
_ روحي انتي كفاية عليكي كده
_ اطمن عليك طيب
_ انا كويس.. روحي ارتاحي انتي منمتيش خالص
_ ماشي وانت خلي بالك من نفسك خد دواك بانتظام
_ طيب
التفتت ليه وقالت بإبتسامة ممتنة
_ متشكرة قوي
_ معملتش غير الواجب
قالت بإبتسامة
_ واجب مش مطلوب منك تعمله ، وحد غيرك كان استغل وضعنا ويمكن كان وقعنا في مشاكل بس انت ابن حلال و... و
_...
_ و شهم
_ مجيش حاجة في شهامتك وجدعنتك مع اللي حوليكي
اخفضت جفونها خجل من نظراتي وقالت
_ اه. شكراً . طيب انا ماشية ولو في حاجه كلموني
قال بجمود
_ مفيش حاجه هتحصل.. روحي ومتشغليش بالك
_ اها، طيب ، سلام
قالتها ومشت وهو وقف قدامي يمنعني من النظر اليها وهي بتبعد وقال وهو بيديني الساعات
_ خد ساعتك يا باشا انا مليش في الحاجات النضيفة دي
_ مقولتش كدة قدام رحمة لية
_ ملكش فية.. خد ساعتك
_ تؤ ، مش هاخدها.. مبستردش هدايا من حد
قال بنرفزة
_ وانت مش هتجاملني ولا هتكسر عيني بحتت حديدة زي دي.. خدها وامشي اديك وصلتني ودورك خلص معانا
_ امشي واسيبلك فلوسي
_ فلوس اية
_ انا ادتلك 1500 لعشر ايام بس، ومقضيتش منهم غير سبعة، هسامحك بالالف هات 500 بقا
_ انا مش معايا دلوقتي، هبعتهملك اول ما يكون معايا
_ للاسف يا سيكا، انا معرفكش ومضمنش هتردهم ولا لا.. خليني لغيت ما تجيبهم
قولتها ودخلت جوه ف جه ورايا وقال بعصبية
_ انت عايز مننا اية يا اخ انت ، اللي بتفكر فيه مش هيحصل
_ اية هو اللي بفكر فية ، عايز اوصل لرحمة قصدك؟!
_...
_ فلنفترض اني بفكر في كدة ، مش انت بتقول إني مش هقدر اوصلها علشان هي مش هتقبل وبميت راجل والكلام ده كله ، وانا مش باقيلي غير تلات أيام وامشي خايف من ايه بقا.. ولا انت حاسس انها ممكن تحبني
_ مش هتحبك ولا هتشغلها
_ طيب قلقان من إيه اصبر كلها تلات أيام ويمكن مقدرش اقابلها فيهم كمان
#رحمة
رجعت البيت ورجعت اتصل ب بابا اطمن عليه ف جاني رد اللي معاه وقالي
_ ايوة يابنتي
_ اهلا ياعمي ازاي حضرتك
_ الحمدلله .. عاوزة ابوكي؟
_ ايوة هو فين بتصل عليه من امبارح مبيردش
_ اه ، لا هو بس تليفونه وقع منه اتكسر وهو حط الخط بتاعه معايا بس هو دلوقتي طلع يشوف البضاعة
_ هو كويس
_ اه كويس
_ طيب ممكن لما يجي تخليه يكلمني
_ عيني حاضر بس لو اتصلتي ولقيتي التليفون مقفول متقلقيش المكان هنا مفهوش شبكة وبالعافية بتجمع
_ مش مشكله المهم انكم بخير
_ الحمدلله بخير
#صدام
رجعت البيت لقيت ماما وحمزة في الجنينة اتجهت ناحيتهم وقولت موجه كلامي لماما اللي ماسكة تليفونها وبتقلب فيه باهتمام شديد
_ اديني رجعت اعمل ايه
قالت من غير ما تبصلي
_ انت هتسأل تاني
_ ما انا مش عارف ازاي يعني هخليهم يوافقوا غصب، هو الجواز في غصب دلوقتي يا ماما
قال حمزة
_ ماهي مراتي يا صدام ايوة مش رسمي بس مراتي
نظرتله نظرة ذات مغذي في حد من نظرته يسكتني وقال
_ ولا اييييه
_ طبعا ، مراتك والمفروض انت اللي تتصرف مش انا.. ماهي مراتك
_ انت الكبير وانت الخير والبركة وانا اقدر اتصرف وانت موجود
_ امال اتصرفت ليه لما خدتها الشقـ...
رمقني بحده وقال
_ صدااام.. ايييية.. هتدخل في تفاصيل راجل ومراته
_ راجل اه.
رمقته بسخط وبعدين قولت موجه كلامي لماما
_ حاضر يا ماما انا هروحلهم البيت واتكلم معاهم
_ هي في المستشفي دلوقتي قاعدة مع ابوها
_ اوكي
_ وعاوزة الموضوع ده يخلص في ظرف يومين
_ يومين اية يا ماما.. انتي فاكره ان حاجة زي دي ممكن تنتهي في شهرين حتي
_ اتصرف.. يومين وتكون مراته رسمي
استغربت اصرارها واستعجالها ده وكذلك حمزة اللي قال
_ يومين يا ماما ، لية
_ ايوة يومين عاوزين نلم الحكاية كفاية فضايح
كملت وهي بتقوم وفي ايدها تليفونها اللي مشالتش عينها من عليه لحظة
_ بلغني بالجديد
قالتها ومشت ف وقف حمزة جنبي وقال باستغراب وهو بيتبعها بعنيه
_ انت فاهم حاجة
_ انت بتسألني انا
_ ما انا مش فاهم هي اية غير موقفها بشكل ده
_ مش عارف ولا هاممني
_ هي بتقول حست بالذنب بس انا مش مقتنع بكدة.. متاكد ان في سبب تاني
_ ملناش دعوة.. رايح المستشفي
وقفني وقال
_ طيب استنا
_ اية
_ اوعا تسيبها غير لما توافق
رمقته باشمئزاز وقولت
_ سؤال يا حمزة ، انت هتتفطم امتي
_ لما تتفطم انت نتفطم سوا.. متسبهاش غير لما توافق ها
_ امشششي خليني اعدي.. عيل صايع
#سامح
لما رقية كلمتني وقالتلي انها طلعت من السجن رجعت اطلب من امي انها تديني الفلوس وحاولت اضغط عليها بكل الطرق بس موصلتش معاها لنتيجة وفضلت متمسكة برأيها وحالفة ما تدهمني لغيت ما رقية اتصلت بيه تاني وطلبت مني بتعجل إني اروحلها المستشفي حاولت اتلكك بأي حاجة بس هي اصرت اني اروحلها وبالفعل روحت وانا بدعي متسألنيش علي الفلوس ولما صلت هناك لقيت راجل واقف قصادها وباين انهم كانوا بيتكلموا في حاجه مهمة ولما شافتني قدمتني ليه وقالت
_ ده سامح خطيبي يا مستر صدام وانا وهو عاوزين بعض ومش هيتخلا عني
بصلي وقال بشيء من الكبر وهو بيتفحصني بعنيه
_ اه
رجع بصلها وقال
_ بس انتي تعتبري متجوزة ايوة عرفي بس بردو متقدريش تجوزي تاني غير لو اتطلقتي ، ومتنسيش ان في ورقة بتثبت ده يا رقية
قالت بعصبية
_ الورقة دي تبلوها وتشربوا ميتها انا مضيت علي استقالة مش علي ورقة جواز
_ اي ان كان اللي مضيتي عليه ف انتي في النهاية بقيتي مراته وانا مش عايز اضرك وجايلك بتكلم معاك براحة علشان مصلحتك وسمعتك انتي واختك وابوكي التعبان ده
_ انت بتهددني؟!
_ ده مش تهديد ، انا بنصحك خوف عليكي من اللي ممكن يحصلك انتي واهلك .. يلا ، فكري يكون رجعتلك تاني
_ مش هفكر واعلي ما في خيلكم اركبوه
قال وهو بيلبس نضارته
_ اوكي افتكري بس اني جيت لغيت عندك ونصحتك ، هنتقابل تاني
قالها وطلع ف قالت بعصبية
_ مش خايفة منكم ومش هتقدروا تغصبوني علي حاجة
قالت بسنت وهي بترجعها
_ اهدي اهو مشي.. خلينا نفكر في حل
_ انا عندي الحل مش لسة هفكر
بصتلي وقالت
_ مستعد تكتب عليه دلوقتي
_ اكتب ايه
_ كتابنا يا سامح
_ اه بس انتي مش سامعه اللي بيقولو
_ يقول اللي يقوله دي ورقة كراسة متشغلنيش.. مستعد تكتب عليه دلوقتي ولا لأ
قولت بتوتر
_ طيب بس نستنا
_ نستنا ايه .. ياسيدي انا موافقه ناخد اعفن شقة بالفلوس اللي معانا
_ ماهو بس
_ بس ايه.. في ايه يا سامح انت مش عايزني
_ لا لا مش موضوع مش عايزك بس بصراحه يعني
_ بصراحه ايه اتكلم
_ ماما
_ مالها ماما
كملت بتوتر
_ خدت الفلوس من ورايا ودخلت مع خالتي في مشروع
قالت بصدمة
_ مشروع ايه؟!! فلوسنا اللي بنحوشها بقالنا سنين تاخدها وتدخل بيها مشروع من غير ما تقولنا.. وانت ازاي تسبهملها
_ انا كنت مخبيهم معاها مكنتش اعرف انها هتعمل كده بس هترجعهم اول ما المشروع يكسب
_ يااااربي ترجعهم اية بس
لفت حولين نفسها وبعدين وقفت قصادي وقالت
_ طيب اسمع!
_ اية
_ احنا نكتب الكتاب ومش مهم اي حاجة ان شاءلله نعيش في بيتكم او نتأجر شقة صغيرة.. بس لازم نتجوز بسرعة
_ اه طبعاً ماشي سيبيني ارتب اموري وبعدين نجيب المأذون
_ لا لاااا، احنا نكتب دلوقتي وظبط امورك بعدين
_ طيب بكرة ، ده انا مش هلحق حتي اكلم المأذون
_ ماشي بكرة ، نستنا لبكرة ميجراش حاجة ، وانا هتصل بخوالي يجوا علشان يجوزوني "
مقدرتش ارفض ومشيت من عندها خايف اقول لأهلي وخايف اقول لأي حد ف قررت اسكت واروح بكرة نكتب الكتاب
#بسنت
مبحبش حمزة وامنيتي ان رقية تقدر تنتقم منه بس بنسبالي احسن مليون مره من سامح اللي لهف الفلوس مستغل انها مش هتقدر تتكلم لحاجتها ليه ف خرجت من الاوضه واتصلت بالراجل قولتله
_ رقية اتفقت مع خطيبها انه هيجي بكرة يكتب كتابه عليها
_ وهو وافق بعد اللي حصل
_ وافق
_ يعني كده خلاص
_ لا لا مش خلاص خطيبها ده نطع نصب علي فلوسها وبيقول دخلتهم في مشروع ومش عارف اية ، وأهله كلهم انطاع زيه وانا مش عاوزه رقية تجوزه.. اصلا مش من حق حد يلم الفضيحة اللي حصلت غير ابن الكلب اللي فضحها
_ احم.. صحيح طيب خليكي ورا اختك وحاولي تقنعيها زي ما اتفقنا وانا من ناحيتي هحاول اساعد "
قفلت معاه ورجعت ل رقية لقيتها قاعدة جنب بابا ماسكة ايده ودموعها بتسيل بغزارة ف قولت
_ انتي صدقتي اللي قاله سامح
_ قال ايه
_ ان امه دخلت فلوسك في مشروع
_ لأ
_ يعني عارفة انه نصب عليهم
_ مش عارفة
_ لا عارفة يا رقية انتي متاكده ان فلوسك مش هيرجعولك
_ وحتي لو مرجعوش انا المهم عندي دلوقتي اكتب كتابي واخلص من الناس دي وتهديدهم لي
_ يا رقية ياحبيبتي اسمعي مني.. انتي كده كده اتفضحتي ليه متجوزهوش وتنتقمي منه علي اللي عمله
بصتلي وقالت
_ انتقم منه ازاي.. اقتله واروح السجن ولا اعمل ايه
_ مش عارفة بس في طرق كتير غير القتل.. ممكن تخليه يتنازلك عن كل حاجه يملكها وبعدين تخلعيه.. ممكن تبوظيله حياته ، اعملي اي حاجة ، طول مانتي معاه هتعرفي ازاي تنتقمي منه
_ مستقوية اختك قوي انتي.. انا جبانه معرفش اعمل كده.. ده انا من جُبني مقدرتش اجري واسيبه وكنت هساعده لا يموت واتحبس ، ده حتي إن وافقت علي كلامك ده انا مش هقدر أمنعه عني يعني هيكون بوظلي حياتي ، وبابا يمكن يموت بسببه وفي الاخر ياخد مني اللي هو عاوزة ، وواللة بعدها هو اللي هيرميني
#حمزة
استقبلت صدام عند دخولة وقولت بإهتمام
_ عملت ايه
_ ولا حاجه البت بتقول تموت اهون ما تجوز واحد زيك
_ هي قالت كده
_ ايوة وجابت خطيبها علشان تثبتلي انه مش هيسيبها
_ وهو مش هيسيبها بعد اللي حصل.. ده راجل ده
_....
_ لا متبصليش كده الراجل اللي يقبل يتجوز واحده سمعتها اتشوهت ولا حد غيره لمسها ميبقاش راجل
_ طيب احترم نفسك
_ انا عليه هو ، مالك
قال بنرفزة
_ مش مالي بس كمان يا رمز الرجولة ، اللي يبص لواحده علي علاقة مع غيره ميبقاش راجـ....
بتر كلمته وقال بنرفزة
_ اخرس دلوقتي ، انا داخل اقول لماما
_ استنا بس.. صدام حبيبي؟! اتصرف! انا لو متجوزتش البنت دي وجبتها خدامة ليه مش هصبح عليك بعد كدة.. البنت دي تحدتني كتير وكانت هتقتلني ، ولازم تتربا
_ والمصحف ماحد عايز يتربا غيرك ابعد
قالها ودخل لماما وانا وراه ولما شافته قامت من مكانها وقالت باهتمام
_ عملت ايه؟!
_ كلمتها وهي قالت لو هتموت مش هتجوزه
_ وهو بمزاجها لا ده انا ابعتها ورا الشمس هي واهلها واحد واحد
_ هنعمل ايه يعني يا ماما
_ نعمل كتير.. اخطف حد من عيلتها.. وقفها قدام المأذون وانت رافع عليها مسدس ، اعمل اي حاجه ، في مليون حل بس انت شغل مخك
_ خطف ومسدس اية يا ماما الله يهديكي ، انتي لية محسساني اننا عصابة
قولت
_ ماما قصدها تهديد وبس يا بجم
_ طيب اسكت انت دلوقتي علشان مقلبش عليك.. ماما! من الآخر كدة، مش هقدر اعمل حاجة في الموضوع دة ، خطيبها عاوزها
قولت
_ خطيبها المفلس ده ، ده فاشل ، ده خطيبها ليه سنين وركنها جنبه لما كلتها العتة
وقفت قصاد ماما وقولت
_ ماما مليش دعوه انا عايز مراتي هتهالي يا ماما
بصلي صدام باشمئزاز وقال
_ ياحبيييب ماما
_ ما بلااااش ااانت
رمقني بسخط وفورا تجاهلته وقولت لماما
_ها يا ماما ناوية تعملي ايه علشان ترجعهالي .. ماهو وديني ما انا سايبها البت دي لازم تكون مراتي رسمي انتوا فاهمين ولا لا
قالت
_ فاهمين وانا قولتلك هجوزهالك يعني هجوزهالك.. صدام اسمع هقولك ايه
_ نعم يا ماما
#فيروز
حتي بعد ما شكوكي زادت في ماما وعم سعيد وبعد اللي بكتشفه وبسمعه كل شويه محاولتش ادور ولا اسأل تاني وبقيت طول الوقت بحاول اتجاهل كل الأفكار دي ولكن اهرب من قدري فين.
قدري اللي اظهرلي كل الحقائق واكدلي كل شكوكي ومخاوفي كلها دفعه واحده لما وصلني اتصال من رقم غريب ولقيت ست بتقولي
_ فيروز معايا؟
_ ايوة انا ، انتي مين؟
_ واحدة خايفة عليكي وعايزة مصلحتك
_ خايفة علية من اية ، انا مش فاهمه حاجه انتي مين وجبتي رقمي منين؟
_ مش مهم كل دة المهم اللي هقولهولك دلوقتي
_ عاوزة تقولي ايه
_ عاوزة اقولك تخلي بالك من الراجل اللي بقا يصادفك كل شويه..
اعتدلت في قعدتي وقولت باهتمام
_ بتتكلمي عن مين
_ عن صدام... صدام زيدان اللي ابوكي نبيل فياض يبقي عم ابوه
_ مين ده اللي ابويا يبقي عم ابوه ... انتي بتقولي ايه ، انتي مين ياست انتي
_ اسمعي بس.. ابوكي يبقي نبيل فياض الراجل اللي بيجيلك كل شهر واللي مش قايلك انه هو نفسه ابوكي.. انا مش فاهمه ليه مقالش بس انا بقولك انه ابوكي وامك كانت خدامة عندهم زمان ومشت بفضيحة علشان اكتشفوا انها حامل ، ومحدش كان يعرف هي حامل من مين وابوكي متجرأش يقولهم انها حامل منه
قولت بصعوبة بعد ما قدرت استجمع نفسي
_ استني.. ازاي يعني حامل منه.. قصدك حملت من غير جواز
_ المفروض ماهي كانت عايشة في نفس البيت معاه ومحصلش انها اتجوزت
احتشدت الدموع في عيني واختنق صوتي وعجزت عن الكلام وانا بسمعها وهي بتكمل وتقول
_ المهم لازم تخلي بالك لأن هو كتبك بأسمه يعني قانونياً انتي تكوني بنته وده اللي مخوف صدام منك بمجرد ما شم خبر ان جده مخلف جه يدور وراكي علشان يخلص منك قبل ما تورثي من ثروة ابوكي اللي هي نص ممتلكات عيلة فياض كلها ، هو طمعان في فلوسه وهيعمل كل اللي يقدر عليه علشان ميكونش لنبيل وريث غيره ولو مش مصدقة روحي القاهرة انا هديكي عنوانهم وهتشوفي بنفسك
#يسرا
بعد ما قفلت معاها طلعت من اوضتي وانا مبسوطة إني بوظت خطة كاميليا وصدام وخليت نص املاكهم تضيع في غمضت عين قدامهم ويمكن ربنا يكون بحبني ويحاولوا يقتلوا البنت ف يتحبسوا.
وبعد ما نزلت السلم وانا بدور علي صدام بعيني لقيته قاعد مع نادية امه التانية وبيدردشوا مع بعض واول ما شافني شاح بعينه عني بتذمر وقفت شوية ابصلهم وهنا جاتني فكرة لمشكلة واهانة جديدة من امه الحقيقية ليه ف قولت بإبتسامة
_ بحب شكلكم قوي مع بعض ، طيب والله ما حد يصدق انك مش مامته يا طنط
_ طيب ماهو ابني مش انا اللي مربياه
_ وهو برضوا بيموت فيكي دايما يقول مرات عمي هي امي، هي اللي ربتني وشوفت منها حنان مشفتهوش من امي .. مش كده يا حبيبي
ابتسم بمجاملة لنادية وقال
_ طبعاً
_ حبيبي ربنا يخليك ليا والله انت ابني اللي ربنا عوضني بيه
باس ايدها وقال بإبتسامة باهتة
_ ربنا يباركلنا في عمرك
قولت
_ لا كده نشرب حاجة بقا تشربوا آية
قالت مرات عمي
_ اقعدي الشغاله هي اللي تعمل
_ بسيطة ، انا هعمل "
دخلت عملت نسكافية وانا ناوية ارجعلهم وازيد في كلامي عشان نضايق كاميليا ومتعديش يومه النهارده ولكن لما رجعتلهم ملقتهوش ومرات عمي قالتلي أنه في الجنينة ف اخدت المج بتاعه وروحتله لقيته شارد واول ما قعدت قدامه فاق من شروده ف قولت بإبتسامة
_ النسكافية
قال بشك ممزوج بالعصبية
_ انتي عاوزه توصلي لأيه بالظبط
_ اوصل لأية ازاي ، في ايه يا حبيبي مالك
_ ايه هو اللي بيعتبرك امه وشاف منك حنان مشفهوش من امه .. ايه غرضك في كدة
_ ايه ياحبيبي الست ربنا مرزقهاش غير ببنت واحده وراحت وهي محتاجه جبر خاطر.. فيها ايه كلمة زي دي
_ فيها ان هي عارفة معزتها من غير رغيك ده ، لما تحبي تجبري بخاطرها بعد كدة متبقيش تجبريه علي حسابي
_ انت خايف مامتك تزعل لو حست انك بتقرب لنادية.. طيب ماهي اللي ربتك فعلاً ايه يزعل في كدة
قال بتحذير
_ يسرا! مش عايز كلام كتير، حطي لسانك جوة بوقك واسكتي
قولت بزعل مصطنع
_ انا اسفة.. عاوز مني حاجة اعملهالك
_ لأ
_ طيب انا طالعه فوق
_....
سيبته وطلعت ل كاميليا وقبل ما ادخل اوضتها وقفت اتسنط يمكن اسمع حاجة جديدة نعرف نمسكها عليه ولما لقيت ان كل حاجه ساكته خبطت الباب ولما اذنتلي دخلت بوش عابس بتصنع ف تلاشت ابتسامتها اللي انا مش عارفة سببها وقالت وهي بتنزل التليفون
_ ايه الخلقة دي.. مالك في إيه
_ في إني تعبت من ابنك يا حماتي
قالت بسخرية
_ ليه ياقلب حماتك
_ مش عارف كل اللي حصل إني لقيته قاعد مع طنط نادية وحلوين مع بعض زي امه وابنها ف قولت والله ولا كأنه ابنك بجد ف هب فيه علشان الكلمة دي
_ تستاهلي برافو عليه كان اداكي علي خلقتك احسن
_ ليه بس انا قولت ايه ما ده اللي بشوفه.. انتي مش بتشوفيه وقت ما بيخرج من عندي متضايق ويحب يفضفض مبيروحش غير ليها وبيرجع من عندها مبسوط ومرتاح "
مردتش وشردت بتفكيرها للحظات وبعدين اشارتلي بأيدها اني اطلع ومشيت من عندها وانا متأكدة ان شرودها ده كان رحلة من التفكير في اللي هتعمله فيه لما تشوفه ، هي كدة كاميليا متقبلش ان حد يقرب لحاجة بتاعتها وخاصة صدام اللي لو وقف ضدها في يوم كل اللي عملته هيضيع في لحظة .
وبعد ما طلعت من اوضتها وقفت جنب باب اوضتي في انتظار دخلته عليها وبعد وقت قصير جه ودخل عندها ف جريت علي هناك وبعد ما اتأكدت ان محدش شايفني قربت بودني من الباب ف سمعته بيقولها
_ نفس الرقم بردو؟!
قالت بصوت غير متزن
_ اه.. لا لا كنت بشوف التليفون عادي.. في حاجه؟!
_ لا كنت جاي اطمن عليكي بس
_ انا كويسة ، روح ارتاح "
كان بنسبالي اعجوبة تامنة من عجائب الدنيا ان كاميليا تعدي حاجه زي دي من غير ما تهتم ولا تعاقبه عليها وتتعامل معاه بالهدؤء ده.
ف نزلت تحت وانا بفكر ومشغوله في اللي حصل وبسأل نفسي اية اللي حصلها اية خلاها تتصرف بالهدوء ده اكيد في سر ودخل الشك في قلبي من ناحيتها.
وفي طريقي لنزول السلم صادفت حمزة اعاق طريقي واحتارنا مين فينا يعدي الاول ف وقفت وقولت
_ عدي
_ تاانك يو
قالها وطلع ف رجعت ابصله ورجع يمر بذاكرتي كلامها مع زيدان عن التحليل اللي عمله وشكه فيها زمان ولكن وقتها مدتش اهتمام للموضوع ده لأن زيدان اتأكد انه ابنه وكمان المشكلة دي عدت عليها زمن
#حسن
وانا قاعد بفكر في حل لمشكلة رحمة وسيكا مع المعلم وكل همي هو إني انهيها قبل ما امشي واسيبهم جاني اتصال من خالي وقتها بس افتكرت اني محاولتش ادور تاني بعد ما قالولي ان مفيش حد بالاسم ده في المنطقة ورديت عليه وانا مقرر اخبي
_ حبيبي!.. عامل اية ياغالي
_ عامل كويس يابن اختي.. ايه يابني دة انت مكنتش تعدي يوم متكلمنيش فيه خمس مرات
_ فاهم، بس غصب عني الشبكه هنا بايظة خالص يا خالي
_ ولا يهمك ، قولي عملت ايه ، عرفت الراجل ساكن فين
_ لا ماهو...
_ ماهو ايه
_ الراجل اللي قالي عليه لما رجعت عشان افهم منه اكتر لقيته سافر وهيجي بعد يومين ، انا هستناه وهسأله وهقولك اية الجديد
_ تمام
_ تمام يا حبيبي
_ طيب قولي كلمت باباك؟!
_ نهار فل.. لا... والله نسيت
_ هي اية حكايتك ، عندك الزهايمر ولا دي ندالة
_ شكله زهايمر بس هكلمهم، عنيا يا خالي
_ اهتم يا حسن وبطل استعباط امك بتقول ابوك تعبان ومقدرش يكمل شغل امبارح
قولت باهتمام
_ لا والله ، طب ايه اللي تاعبه
_ بتقول طول الوقت دماغه تنقح عليه وبيدوخ
_ اه.. تمام هكلمهم واسأل عنه
_ لازم افكرك يعني.. مالك يا ابن اختي ايه شاغلك
_ مفيش اي حاجة يا حبيبي انا زي الفل
_ متأكد
_ اه طبعاً.. ليه
_ مش عارف بس حاسس انك ملهي في حاجه عندك
_ ملهي اية بس يا خالي انت تعرف ان ابو علي حبيبك حاجة تلهية ، مش ملهي ولا حاجه بس انت عارف انا في مطروح قريب من البحر وزي ما تقول بستجم شويه
_ ومين بيستجم معاك يا ابو علي
_ لوحدي
_ حسن؟!!
_ وربنا لوحدي ياخالي.. المفروض تكون عارف اخلاق ابن اختك ده انت اللي مربيني
_ هحسن ظني فيك مع اني مش مرتحلك ، استجم بس متنسنيش مش كل مرة انا اللي هتصل
_ بس كدة عنيا يا غالي بس قولي انت راجع امتي
_ اربع ايام
_ قولت اسبوع
_ اللي حصل بقا
_ طيب بتكلم الجماعة
_ ولا هما بيكلموني
_ زعلانين ولا اية
_ لأ
_ اوووكي تيكير
_ تيكير عليك ياخويا سلام
قفلت معاه وطلعت من البيت اتمشي وبالمرة اروح المطعم عند رحمة اشوفها بحجة شرب الشاي ولما دخلت استنيت في انتظار خروجها من المطبخ وبعد وقت تفاجأت لما دخلت المطعم وجت عندي تقولي بإبتسامة بتوصف سعادتها
_ انت هنا من امتي
_ نص ساعة تقريباً.. بس انا فاكرك جوة ، مش بعادة تتأخري كدة
التفتت حوليها وبعدين رجعت بصتلي وقالت بخفوت
_ كنت بجيب الدهب من سيكا ممكن نتقابل بعد الشغل علشان تاخده
_ اه ممكن بس نتقابل فين
_ استناني في نفس المكان اللي اتمشينا فيه اول مره هناك مفيش حد
لاحت ابتسامة خفيفة علي وشي وانا بقول
_ وانا بقول كده بردو
قالت بإبتسامة
_ طيب... تـ، تطلب حاجة.. اكل ، شاي ، عصير
_ ماشي هاتي اكل انا جاي جعان
_ تطلب حاجة معينة
_ هاكل علي ذوق الشيف
ضحكت وقالت
_ حاضر
قولت بإبتسامة وانا بتأمل جمال ضحكتها
_ حاضر اية، عندكم فار بيطبخ جوه؟!
بعثرت نظراتها بخجل وقالت
_ عندنا عفريت.. دقيقة والاكل يجي
قالتها واتجهت ناحية المطبخ وقبل ما تختفي خلف الحائط رمتني بنظرة اخيرة حسيت منها ان اللي صابني اصابها وتمنيت ان الوقت يعدي بسرعة ونتقابل مش علشان اتأكد من اللي حسيته ولكن علشان دي هتكون اخر فرصة ليه اني اشوفها واتكلم معاها قبل ما امشي