رواية رونز قلبي الفصل الحادي عشر11والثاني عشر12 بقلم رونز مراد
(11)
رونز بقهر وعياط : لكن بمزاجك تخوني وتخون ثقتي فيك صح!
أدهم بصدمة: رونز انت بتقولي ايه؟!
عمر بغضب: رونز عيب مهما كان دا خطيبك انت ازاي تقولي على أدهم كدا
رونز بعياط: هو دا اللي حصل..فين الفون بتاعي هات الفون
أدهم ساكت..
أدهم بهدوء مخيف: يعني انت تصدق عني حاجة زي دي؟
رونز بغضب: تصرفاتك الأيام اللي فاتت هي اللي أثبتت ليا
عمر بتحذير: رونز..
أدهم بمقاطعة: سيبها تقول اللي عندها لو سمحت يا عمر..من امبارح لما قفلت معاها وانا مش عارف خطيبتي مالها سيبها تتكلم
عمر اتنهد : اتفضلي الفون أهو بس صدقيني انت كدا بتغلط غلط كبير
رونز خطفت الفون بعصبية وفتحته على رقم غريب واتس بعت ليها صور كانت بنت زميلتها اسمها سارة في حضن أدهم بس كان لاعب في الصور بطريقة مختلفة
رونز بغيرة وعياط: اتفضل أهو ايه دا يا أدهم..انت فاكرني صغيرة وعبيطة طيب؟
عمر شاف الصور ودقق فيها وأدهم أخد منه الفون
أدهم بعتاب: لو حضرتك يعني واخدة بالك إنه البت دي عينيها مني من أول ما جات عندي ولو عندك قوة ملاحظة يعني الصور كلها باين فيها إني بحاول أبعد وايدي اللي على خصرها مش متمسكة بيها ودا معناه إنه كان غصب عني الوضع دا وانت عارفة كويس برضو إنه لا ديني ولا أخلاقي تسمح ليا بكدا ،انت كان ممكن تعذريني مثلاً كنت تفكري إنه أكيد حاجة حصلت علشان أعمل حاجة زي دي أما إنك تشك فيا بقى أنا المفروض أعذرك على ايه؟! ، بس عموماً هريح قلبك بعض المواقف اللي في الصورة دي حصلت بس حصلت لما البنت كانت هتقع وهي بتركّب زينة رمضان وقبل ما تقولي وانت مالك البنت أصرت انها تعلقها ومسكتها وبدأت تعلق وفجأة لقيتها بين دراعي وقبل ما تفهم غلط برضو كان معانا زمايلك وانت عارفة كويس إني مش بدخل أوضة فيها بنات بس وبص لـ عمر أنا هروح أشوف الدكتور لو كدا نروح البيت أحسن
رونز بتحط ايديها على وشها وبتعيط من كل حاجة حاسة إنها بتخسر كل حاجة فجأة
عمر بقلق من نظرات أدهم الخالية: أدهم اهدى رونز مش قصدها انت عارف بتغير عليك ازاي وبتحبك قد ايه
أدهم بنظرات عتاب لـ رونز: صحيح الغيرة نوع من الحب بس العتاب هو الحب إنه نعاتب حبيبنا ونفهمه أنا زعلت من تصرفك دا علشان على الأقل أحاول أبعد عنه لكن مش أستغنى عنك في أول مشكلة واخد بالك يا عمر!
رونز بتبص بتوتر ولقيت نظرات من أدهم أول مرة تشوفها في عيون حبيبها والصمت بقى هو سيد الموقف
أدهم خرج يشوف الدكتور لو ينفع رونز تروح والدكتور قاله إنه جاي معاه يطمن عليها الأول وبعد كدا يكتب ليها خروج
أدهم دخل وقال لـ رونز ببرود: الدكتور هيدخل يشوفك ، شعرك باين واعدلي الخمار كويس وبص لـ عمر اطلع برا على ما تعدل الخمار
عمر ببلاهه: أطلع فين دي أختي
أدهم بصرامة: تعالى معايا يا عمر مش نقصاك وبص لـ رونز لما تخلص نادي علينا وطلع
ورونز بدأت تعدل في الخمار وخايفة من اللي هيحصل لما يروحوا ومن قرار أدهم بعد اللي قالته وخصوصاً إنه أدهم مش بيحب الإهانة من أي شخص..
وصلوا البيت المغرل كان بيأذن وهما في العربية على ما خلصوا التحاليل وطول الطريق أدهم ساكت وعمر بيطمن سهير إنها كويسة بعد ما عرفت من شهد إنه مكنش فيه درس النهاردة واتصلت على أدهم بس عمر اللي رد
أدهم بصرامة: هتقدري تنزلي ولا عمر يسندك؟
رونز بتوتر: عمر اللي يسندني؟!
عمر: يلا يا رونز بلاش كلام دلوقت
أدهم بتهكم: أظن يعني حضرتك مش عاوزة تشوفي وشي وأنا بنفذ أوامر الهانم وخرج من العربية وفضل واقف لحد ما نزلت وفجأة داخت ولسة هتقع أدهم: حاسبي قولتلك عمر يسندك
رونز بغباء سابت ايديه: مادام مساعدتك دي جميل مش عوزاها يا أدهم وشكراً تعبتك معايا
أدهم وشه بقى بيطلع نار من كلامها: تعرفي تخرسي..والله يا رونز لو ما اتعدلت في كلامك هظبطك أنا اتعدل بقى أنا مستحمل طول اليوم كلامك لكن الدلع دا مش بحبه والجميل اللي بتقولي عليه اخلصي ونطلع نتحاشب عليه فوق وفجأة شالها وطلع بيها
عمر بينادي عليه: يا أدهم مينفعش كدا انت متعصب اهدى ونزلها
أدهم بعصبية: ملكش دعوة واقفل العربية وتعالى
رونز بغضب: نزلني يا أدهم انت اتجننت أنا لسه خطيبتك
أدهم بعناد: كلمة كمان والله ما هتشوفي مني غير شخصية أدهم الوحش اتهدي علشان أنا مش طايقك ومش هستنى تقع تاني ومش علشان جمال عيونك وقلقي عليك علشان بس عاوز أخلص
رونز اتجرحت من كلامه وسكتت
أدهم كمل طلوع على السلم وندم على كلامه وعارف إنه المشكلة بتكبر وبكلامه كبرها أكتر
عند سليم وشروق..
سليم دخل البيت ودخل عند مامته لقى البيت كله فاضي ومفيش غير عمه خالد البواب وقاله إنه هي وشروق نزلوا مستعجلين وراحوا عند ست سهير والست شروق كانت بتعيط
سليم فتح الفون يتصل عليهم لقى أكتر من مكالمة من شروق نزل علطول على بيتهم
عمر حصل أدهم وخبط على الباب وسهير فتحت وباين عليها معيطة
أدهم بإستغراب: مالكم فيه ايه؟
سهير بتقرب من رونز وأدهم لسه شايلها: مالك يا حبيبتي انت كويسة طيب حصل ليك ايه؟
عمر: يا ماما مينفعش دلوقت أدهم شايلها دخلوه بس الأول ياخد نفسه
سهير بعدت بسرعة وأدهم وعمر دخل أوضة رونز ورونز ساكتة مش بتتكلم ولا ترد على حد وسهير وشروق ووفاء دخلوا الأوضة بعدهم
أدهم نزلها على السرير بهدوء وطلب من شروق تركب ليها المحلول
سهير قربوا منها: مالك يا ضنايا انا كنت حاسة والله انت الصبح كان فيك حاجة غريبة والله كنت حاسة
شروق بدموع: حبيبتي قلقتيني عليك انت بخير دلوقت؟
أدهم وعمر: متخافوش هي بخير من الضغط بس
شهد دخلت الأوضة بعد ما عرفت إنهم في الطريق من عمر
شهد: مالك يا حبيبتي ألف سلامة عليك
رونز: الله يسلمك
شهد استغربت كلامها وبعياط على صاحبة عمرها: رونز انت كويسة؟
سهير ووفاء استغربوا وبصو لبعض من طريقة كلامهم
رونز بدون اهتمام ليهم: أنا عاوزة أنام
أدهم: تركب المحاليل الأول وتبقي تنام
رونز بعناد: وانا قولت هنام تصبحوا على خير
الكل مصدوم من طريقتهم مع بعض
وفاء: فيه ايه يا أدهم بتتعاملوا كدا ليه؟
أدهم بيجز على سنانه: مفيش سيبوها ترتاح وتعالي يا ماما انت وماما سهير عاوزكم وطلع
رونز استسلمت ونامت وشهد بتدمع على منظر رونز وشروق وهي بتركب ليها المحلول بقيت بتعيط..
عمر: اهدوا بقى هي كويسة من الضغط بس..سليم فين؟
شروق: كان في مشوار بس كلمني وزمانه جاي..ليه؟
عمر بشرود : مفيش بس لازم سليم يتكلم مع أدهم
الإتنين استغربوا وسكتوا..
عند يوسف..
يوسف بيتكلم مع عمه: هه يا عمي قولت ايه؟
عمه بيضحك: لما انت واقع كدا ساكت دا كله ليه؟
يوسف بيضحك: التقل صنعة يا عمي
مختار أبو يوسف: دا اللي انت فالح فيه..طب والعريس هنعمل معاه ايه؟
يوسف ببرود: هيترفض ونقوله دي حرم يوسف الشربيني عادي
أبو يوسف وأبو رقية بيضخكوا على طريقته: ربنا ييسرلكم الحال يارب نتفق بقى
رقية بفرح في اوضتها مع رانيا: أخيراً يا رينو خلاص حبيب العمر وصل
رانيا بفرحة: مبارك يا حبيبة قلبي عقبال ما أشوفك بالأبيض يارب
رقية بفرحة: يارب يحبيبتي ويارب أشوفك انت وأحمد مبسوطين كدا
رانيا بحزن: مفتكرش يا رقية
رقية بخضة: ليه بس يا بت انت مشوفتيش غار عليك ازاي علشان صوتك طلع قدام يوسف دا كان فاضل شوية ويقتلك وبتضحك
رانيا بشرود: بس أخوك مش بيحبني يا رقية
رقية بثقة: لا بيحبك ومستحملش فكرة إنك بدأت تهمل فيه دا بقى مش طايق اليوم اللي بتروح فيه لـ أمك يا خايبة.
رانيا بأمل: بجد يعني انت شايفة كدا
رقية بتطبطب عليها: والله يا حبيبتي أحمد بيحبك ومش قادر على بعدك ومعاملتك دي..حاولي تدي علاقتكم فرصة يا حبيبتي والله أحمد طيب بس مشكلته إنه مش من النوع اللي بيعبر بالحب
رانيا بخجل: والله لو ايه كدا هيفضل حبيب القلب برضو
رقية بتسقف: يواد يواد دا انت واقع من الدور العاشر..قومي قومي نشوف هنختار ايه لـ يوم الخطوبة عاوزة حاجة شيك لينا كدا
يوسف اتصل على رقية
رقية:أرد يا رانيا انا ايديا بترتعش وخايفة ومتوترة وميكس مشاعر غريبة
رانيا:ردي يا بومة خلاص دا هيبقى خطيبك
رقية بس انا مش بعرف أتكلم
رانيا مسكت الفون منها وفتحته
يوسف: السلام عليكم مش بترد ليه طيب؟
رقية بخجل: وعليكم السلام ورحمة الله وبركاته..م معلش الفون كان بعيد
يوسف بيضحك: بعيد لدرجة إنك تتوتر كدا؟
رقية بخجل: معلش حقك عليا
يوسف بحب: براحتك يا حبيبي المهم عاوزك تشوفي طلباتك كلها وعرفيني ناوية على ايه وبعتلك شوية ديكورات نختار منها ولو ناقص حاجة عرفيني بلاش كسوف كل اللي نفسك فيه ابعتيلي بس
رقية بخجل أكتر: ش شكراً ربنا يخليك يارب
يوسف: فيه ليا محذوفة في الجملة..ايه شكراً دي انا بكلم بنت أختي!
رقية بعدم فهم: مش فاهمة؟
يوسف بحب وتنهيدة: اسمها يخليك ليا..مش شكراً
رقية بخجل: س سلام بابا عاوزني وقفلت بسرعة
يوسف ضحك على توترها وقال: وبعدين في قلبك اللي أنا واقع فيه دا يا روقا
رانيا بتضحك على كلامهم : يلا بسرعة هنعمل ايه ما هو مستعجل بقى
رقية بخجل: اتلم
وبدأوا يشوفوا الفساتين
عند تميم والجدة..
تميم في الفون: أنا هتكلم معاهم دلوقت وبإذن الله أكلم باباك ونتخطب أنا بجد مش عارف أكمل يوم من غير ما أشوفك
حور بخجل: وبعدين بقى في الكلام الحلو دا
تميم بيضحك: بتتكسف يا بطة الحلو للحلو يا جميل
حور: والله هقفل يا تميم عيب اتلم
تميم: وعلى ايه كلها أيام وأعاكس براحتي وأبقى أسمع صوتك..يلا بقى هقفل معاك وأفاتحهم في الموضوع
ودخل البيت لقى جدته نامت طلع وقال يتكلم معاها بكرا..
سليم وصل بيت رونز وخبط على الباب شروق فتحت وكانت عيونها لونها أحمر جامد
سليم بقلق: مالك يا حبيبتي حصل ايه؟
شروق اترمت في حضنه وبقيت تعيط: رونز مش كويسة ومش بتتكلم وأدهم بيتكلم بطريقة غريبة ومفيش حاجة كويسة
سليم بيطبطب عليها: هششش اهدي يا قلبي كله هيبقى بخير ومسح دموعها مش عاوز أشوف دموع من العيون الحلوة دي خالص
ماما وسوسو وأدهم فين؟
عمر من وراهم: يخويا مش وقته مُحن الله يسترك ما البت بتاعتي جوا وانا مش عارف أقولها السلام حتى
سليم: اتلم انت وادخل ليك حساب تاني
شروق: ماما عند رونز جوا و..
فجأة سمعوا صوت صريخ سهير من أوضة رونز
أدهم وعمر وسليم طلعوا جري على الأوضة وفتحوا الباب واتصدموا
سهير: الحقني يا أدهم شوف رونز عاوزة تعمل ايه
أدهم بصوت مُرعب: اطلعووووا برااااا كلكم
رونز قدامه بعناد: قبل ما تقرر حاجة اتأكد إني..
part (12)
أدهم بصوت مُرعب: اطلعوووو براااا كلكم
رونز وقفت قدامه وبعناد: قبل ما تقرر حاجة اتأكد إني استحملت كتير وأنا مش مُلزمة أستحمل أشوف خطيبي كل واحدة والتانية اللي تعاكس وتضحك معاك وأنا أقول معلش لا معلش دا شغله ومهما كان شُغله يجبره يتعامل مع طالبات زيي لكن توصل إنه تضحك معاهم وتهزر يبقى لا مش مجبره أستحمل كل دا أنا..
أدهم بتركيز واهتمام: و..كمل سامعك
رونز بتستغرب إنه هادي كدا ومهتم يسمع منها على عكس ما اتوقعت!
عمر بمقاطعة بغضب: رونز عيب كدا انا سكت ليك كتير
رونز عيونها بتدمع وبتسكت
أدهم بيشاور بـ ايديه: سيبها تقول اللي عندها يا عمر ومحدش يدخل لو سمحتوا
سليم: أدهم اطلع دلوقت رونز تعبانة و..
أدهم بهدوء: لا يا سليم مش حل إني أهرب من قدامها وأسيبها لـ تفكيرها ما أشاركها في اللي هي فيه ومادام أنا السبب في زعلها يبقى لازم أسمعها وأفهم ايه اللي وصل تفكيرها بكدا
وبص ليهم ممكن تسيبونا مع بعض شوية؟!
الكل استغرب طلبه وبصوا لـ بعض
الأم وفاء: بس..
سليم بتنهيدة: يلا يجماعة ياخدوا فرصة يتفاهمو مع بعض ويحل مشاكلهم مع بعض
الكل بدأ يطلع..
سهير وهي طالعة بصيت لـ أدهم برجاء إنها تعبانة وأدهم ابتسم ليها يطمنها وهز دماغه إنه فاهم حبيبته كويس وهيعرف يتعامل معاها واستأذن وقفل الباب
رونز بقيت متوترة وخصوصاً بعد الكلام اللي قالته..
عند تميم
صحى ولبس هدومه ونزل علشان يتكلم مع جدته..
تميم: ازيك يا تيتة
الجدة بقلق: الحمد لله كنت فين دا كله
تميم: جيت علشان أتكلم معاك بس لقيتك نايمة قولت لما تصحي
الجدة بقلق: موضوع ايه تاني؟
تميم بإستغراب: هو فيه موضوع أول؟!..مالك يا تيتة وشك أصفر ليه كدا وكمل بقلق انت كويسة ولا نروح لـ الدكتور؟
الجدة ببكاء: رونز يا تميم رونز يا ابني
تميم بقلق: مالها وبتعيط ليه كدا؟
الجدة بتكمل: تعبت النهاردة وسهير بتكلمني وبتقولي نفسيتها تعبانة جامد وبتاخد قرارات غريبة وبتزعق مع أدهم
تميم بقلق: امتى دا حصل..وبتزعق مع أدهم ليه ، تحب أوصلك حالاً ونروح نطمن؟
الجدة بعقل: لا لو روحت دلوقت الدنيا هتتبهدل وهما مش ناقصين وأنا مش عاوزة أعمل حاجة مع عيلة الشرقاوي أندم عليها
تميم بصدمة: انت يا تيتة اللي بتقولي كدا ومن امتى وانت مش عاوزة تزعل عيلة الشرقاوي منك؟
الجدة: لا انت فاهم غلط انا صحيح مش طايقة لا أدهم ولا سليم بسبب اللي حصل بس وفاء بنتي التانية وكمان مش عاوزو أخرب عليهم بيتهم دول ولاد الغالي
تميم بإرتياح: أتمنى فعلاً يا تيتة ، ربنا يصلح الحال يارب
الجدة: كنت عاوز ايه صحيح؟
تميم: لا خلاص مش وقته وسكت
تميم خلص كلام مع جدته وطلع يتصل على حور
تميم مع حور في الفون: طب أعمل ايه بنت عمي تعبانة وحالتها مش كويسة أقوم أقولها عاوز أخطب
حور بغيرة: طب وانت مالك طيب وبعدين أنا مقولتش كدا أنا بقول كنت فاتحها في الموضوع
تميم : يعني تيتة شايفها بتعيط وزعلانة أتفاهم معاها ازاي؟
حور كاتمة دموعها: قول بقى إنك عاوزها تقولك انت لـ رونز قول عادي
تميم بصدمة: انت بتقولي ايه..انت مجنونة ، بت انت بطلي هبل ما انا لو عاوز رونز كنت هاخدها من الأول
حور بعياط: زعق يخويا زعق علشان ست الحسن
تميم بصدمة: انت بتعيط انا كلمتك طيب..ست الحسن مين انت عاوزة تلبسيني مصيبة أنا مش فاهم!
حور: تمام عموماً أنا قولت لـ بابا وقالي يوم الجمعة تشرفونا لو حضرتك ليك مزاج يعني
تميم : لو حضرتي ليا مزاج!!
اتعدل يا حور علشان والله هخبط دماغك في الحيطة وبلاش غيرتك تخليك تقولي كلام نزعل من بعض بسببه ، انا هقفل سلام
حور بخجل : تميم
تميم: نعم لسه فيه اتهام تاني؟!
حور بصوت هادي: لا بس بس..
تميم: هنبسبس دلوقت!
حور بسرعة: هتروح تشوفها؟
تميم لطم: اقفلي ونصيحة مني إني م أشوفك النهاردة علشان هدغدغ دماغك
حور: ما تريحني
تميم: يا حبيبتي هروح ليه ولو روحت هيكون علشان رونز أختي مش أكتر هه أختي يا حور
حور بإرتياح: طيب أنا آسفة بس دا حقي
تميم بحب: عارف يا حبيبتي ومقدر كل دا بس انا بجد بكلمك علشان أطمن تقوم تقوليلي لو ليك مزاج يعني دي كلمة تقوليها لحبيبك
حور بكسوف: انا آسفة بجد
تميم بحب: ولا يهمك..المهم احكيلي بقى يومك يست
بدأت حور تحكيله يومها كان عامل ازاي وازاي أنجزت حاجات كتير النهاردة وهو يشجعها تكمل وقد ايه هو فخور بيها
ونسيبهم بقى دول ناس لا نعرف عنهم شيء
نرجع لـ أدهم ورونز
الكل كان متجمع في الصالة وفجأة شافوا الباب اتفتح ورونز مبسوطة وأدهم ماسك إيديها في إيديه وبيتكلموا سوا
الكل: ايه الحمد لله كله تمام
أدهم ابتسم لـ رونز: رونزي بخير كله بس بسبب ضغط الثانوية وإني قصرت معاها وحقيقي آسف ليكم على اللي حصل النهاردة وبدأ يضحك ويهزر مع الكل
رونز بصيت عليه بإمتنان قد ايه اختارت الراجل الصح..راجل بيعاملها بـ وّد وحنية وبيخاف عليها أكتر ما بيخاف على صورته قدام الناس ومش مهم عنده غير رونز حبيبته حبيبته وبس واللي هي أنا..!
Flash back
أدهم قفل الباب ورجع بص عليها وبدأ يقرب ومسك ايديها وقعدوا على سريرها ورونز كل دا متوترة
أدهم بهدوء: سامعك اتكلم وعاتبيني لكن أشوفك بالمنظر دا مش هستحمل
رونز بتدمع: انا آسفة عارفة إني غلطت فيك كتير النهاردة و..وعارفة إني اتعديت حدودي بس غصب عني
أدهم باس ايديها وقال حبيبتي تعمل اللي هي عاوزاه ومين قالك إني زعلان على كلامك..انا زعلان إنك م عاتبتيني وانا للأسف سيبتك لـ تفكيرك وقصرت معاك وكمل بندم أنا آسف بجد
رونز بنفي: لا والله انت أكتر قلب أنا بحبه وأكتر قلب حنين عليا أخويا وحبيبي وابويا اللي مش بيعمل اللي انت بتعمله دا وأنا آسفة إني سكت بس دماغي كان فيها حرب وبالذات فكرة إني أشوف واحدة فاكرة إنك ملكها مينفعش تكون ملك حد غيري يا أدهم أنا أنانية ومبسوطة بـيها مادام عاوزة تكون حاجة خاصة بيا وبس
أدهم بحب: وأنا قلبي مش غرقات غير فيك يا حبيبتي بس لازم نعرف إنه الحب عتاب وقت الزعل مينفعش نشيل من بعض ولا نزعل من بعض واليوم اللي تزعل مني فيه تعالي اشتكيلي مني وأنا هاخد حقك مني بكل حب والله بس بلاش تشيل انت مني علشان الحبيب مش بيشيل من حبيبه يا رونزي..وكمان أنا آسف إني اتكلمت كدا الصبح بس كان لازم أعرف فيك ايه
رونز بحب:ربنا يديمك ليا يارب وكملت بزعل زمان شهد زعلانة مني
أدهم بمكر وفخر:لا متخافيش ما انت كمان قفلت وبعدين عيب يعني يبقى خطيبك مدرس المادة عيب دا انت تربيتي
رونز بتضربه: بارد حرقت دمي وخلاص
أدهم بغمزة: لا عاش ولا كان يحبيب قلبي
رونز بخجل: أدهم بس بقى
أدهم بيضحك: ما كنا حلوين..يلا ادخلياغسلي وشك علشان نطلع مع بعض حلوين كدا
رونز: حاضر
back
فجأة بتفتكر رونز قد ايه ألحّت في صلاتها على حبيب وزوج حنون وإنه الحب بينهم يشهد قد ايه كان مختلف وجميل وأهو ربنا رزقها بـ أدهم!
كلهم بدأوا يحضنوا رونز
شهد بخباثة: لا يا ماما خلاص رونز بخير الحمد لله وقاعدة تحب في مستر أدهم
أدهم بيضحك: لا مستر أدهم ايه بقى يا شهد
رونز بتبص ليها بـ وعيد
عمر لـ شهد: يلا علشان أوصلك الوقت اتأخر
شهد: لا شكراً يا مستر هلحق أروح
عمر: بس أنا قولت الوقت اتأخر أظن كلامي واضح!
شهد: وانا هعرف أروح يا مستر
سليم بيتدخل بسرعة: خلاص يا شهد معلش الوقت اتأخر مينفعش بنوته جميلة زيك تمشي لوحدها
شروق داست على رجلية: ااااه قصدي يعني يوصلك أحسن
شهد بإحترام: حاضر عن إذنكم وسلمت عليهم وقالت لـ رونز هتقابلها بكرا وطلعت عند الباب علطول وعمر لحقها..
عند يوسف ورقية..
يوسف بيتصل عليها ورقية كانت خلاص هتنام
رقية فتحت بعد تردد بس خافت يزعل
رقية بصوت رقيق ويكاد مسموع: السلام عليكم
يوسف بإبتسامة: وعليكم السلام ورحمة الله وبركاته..عاملة ايه يا روقا
رقية: ا الحمد لله
يوسف بحب: انت بتجاوب على قد السؤال ليه ما تتكلم معايا براحتك انا مستأذن من عمي
رقية: حاضر
يوسف بيضحك: بقى دي رقية اللي سيبتها قبل ما اسافر فين اللي كان عليها يوووسف تجيب الأجل!
رقية بتضحك: كنت مطمنة إنه بابا مش هيزعق ليا علشان انت موجود بس..
يوسف: بس ايه يا حبيبتي؟
رقية بعتاب: بس انت مشيت وبقيت أخاف أتكلم..شخصيتي اتغيرت وبقيت أخاف أتعلق بقيت كل يوم أدعي وأقول يارب انا متعلقة بيه ليه مادام بعيد عني كدا بس والله كنت كل يوم بيزيد القرب في قلبي بالرغم من المسافات
يوسف بندم: حقك عليا عارف إني اتأخرت عليك بس كنت خايف..أيوة كنت خايف أنزل ألاقيك لغيري ولا في حياتك راجل تاني مكنتش هستحمل والله يا رقية صحيح أنا بحبك بس فكرة تفكري في غيري صدقيني مش هتقبلها ومش هقدر عليها وأدهم الله يباركله فعلاً هو اللي صحاني من كل دا وقالي هتسيبها فعلاً لحد ما تضيع منك والحمد لله أهو هتبقي من نصيبي بإذن الله وأتمنى أكون ضلعك الثابت اللي بتتمنيه وحبيبك فاكرة حبيب أيامك
رقية بخجل: ربنا يديمك ليا يارب وعلفكرا محدش يعرف ياخد مكانك سلام وقفلت بسرعة وهي بتضحك وبتقول بحب بحبك يا چو والله
يوسف بيضحك: طب استني اتهنى بالكلمة الأول حتى..وبعدين في قلبي اللي غرقان فيك دا الله يعينك على حبي دا ودخل ياخد شاور وينام
عند الجدة..
الجدة بغضب: يعني ايه مش ناوي دلوقت ايه هتستنى لما تتجوز وانت مش موجود زي خيبتك هتفضل لحد امتى بعيد كدا؟
الطرف الآخر: سيبيها لله وانت عارفة كويس ايه اللي حاكم عليا بكدا
الجدة بزعيق: يووووه كل يوم نفس الحجة هتفضل غبي لحد ما تضيع كل حاجة منك يا غبي
الطرف الآخر: والعمل ايه أنا بخسر كل حاجة فعلاً
الجدة بثقة: يبقى تسمع اللي هقولك عليه لازم تنزل الأسبوع الجاي وتواجه رونز وتيجي هنا انت وهما وتقعدوا معايا رمضان كله والفترة دي نحاول نفهم تفكيرهم ازاي ونمشي عليه
الطرف الآخر: تمام الأسبوع الجاي هتلاقيني عندك وكله جاهز
الجدة بتحذير: متنساش رونز اللي لازم..