رواية شهر زمان
الفصل السادس6
بقلم مريم اليوسف
(لاتبحث عن سبب ألمك في مكان آخر ، لا تكابر ،حان وقت الاعتراف اليس كذلك)
بتول : طولو العرسان مو هيك
عامر : هلق بيجو على شو مستعجلة
عبير : كأنو هالوزير مو معبر كل هالعالم
عمر : وزير و الو مكانتو ، بدك اياه ينجلق على الناس ،بالعكس معبي مركزو
عبير : شو رأيك نتقرب منو معرفة هيك شخص مكسب
عمر : شو بالك فاضي
بتول بصدمة :غفراان
عبير : شبها
بتول : ليكيها هنيك
عبير : وين
بتول : مو هداك الوزير
عبير ؛ اي والله هديك طاولة عيلة الوزير بس هية شو عم تعمل معهن عنفس الطاولة
عامر : اصلا مالازم تستغربو شي من غفران كلنا صرنا نعرف غفران
بتول : وانا بشهد
عبير : والله انا عم شك بهل البنت ، بس ياترى معتصم شافها
عمر : مابظن لانو عيونو على سارة
التفتو عليه وبالفعل كان عم يتطلع على سارة يلي منسجمة مع زياد
~~~~~~~~~~•
وعند غفران اشرت لحارس واقف شوي بعيد عنها كان معو كيس صغير من الكرتون وحطو قدامها ورجع لمكانو
غفران : مافي شي من قيمتكن ،بس ياريت تقبلو مني هالهدية البسيطة للعرسان
اخدت زوجة فرات الهدية وطلعت العلبة يلي هية علبة مجوهرات وفتحتها ،كانت بلاك نسواني وبلاك رجالي نفس النقشة بس البلاك النسوان مرصع بالالماس
بانت ملامح الاعجاب على وجه زوجة الوزير
وهية عم تسكر العلبة مدتلها غفران العلبة التانية بس كانت اصغر
غفران : وهي الك طنط
اخدتها وصدمتها كانت اكبر لما فتحتها وشافت خاتم مرصع بالالماس وبالوسط كان حجر كريم باللون الاخضر
-:واااو بجنن
غفران : فرحت انو عجبك
-:ميرسي كتتير الك ،ماكان الو داعي
غفران ؛ هدية بسيطة لتعبر عن معزتكن عنا
فرات : شكرا يابنتي
غفران: العفو
فرات : وين صارت اراضيه ابوكي
غفران : بتركيا
فرات : مو ناوي ينزل على البلد
غفران : مابعرف .. عأساس ينزل بهل القرب
فرات : وكيفو هو وفادية
غفران : مبسوطين
فرات : ايه الله يهنيه ، بس والله ماكانت لازمتو كل هالجازة
غفران : بالعكس حقو ، انا مابرضى يضل طول عمرو وحداني
فرات : بس مو فادية
غفران : لي شبها طنط فادية كتير حبابة ومحترمة
فرات : يعني ماسرقت ابوكي منك ودايرة فيه بالبلاد
غفران ؛ لا طنط مادخلها الموضوع هو .. وسكتت فجأة
فرات : شو الموضوع
غفران بشرود : لا ولا شي
فرات : بالمناسبة ماعرفتك على ولادي فهد وفراس
هزت راسها وقالت : تشرفت
فرات : وهي غفران بنت اعز صديق عندي
فهد وفراس : تشرفنا
انطفى الضو بكل الصالة واشتغل ضو مركز على درج الصالة ليعلن عن وصول العرسان
بالفعل كان عرس اسطوري من الصالة للزينة للأضوية للفرقة لدخلة العرسان ،للتنظيم
استقبلتن الفرقة اول الدرج مع معزوفة هادية ولما وصلو على الساحة رقصو رقصة سلو وبعدها قعدو بالمكان المخصص الهم وبعدها اشتغلت الاضوية واشتغلت الانغام الهادية لتعبر عن فخامة ورقي هالعرس
وقام بعض الناس يرقصو على شكل ثنائيات
فرات غمز مرتو وهية ابتسمتلو مع هزة براسها وكأنو عم تقلو عجبتني ،وبالمقابل الام غمزت ابنها فهد ليعزمها على الرقصة
وقف فهد وراح لقدامها وانحنى بشكل بسيط وقال : بتسمحلي الانسة غفران بهل الرقصة
~~~~~~`•
نفس حركة فهد عملها زياد وعرض الرقص على سارة ،وساارة عملت نظرة على معتصم يلي عم يتطلع عليها بأسف ترددت كتير بس ماقدرت تخجل زياد يلي ناطرها تشاركو الرقصة ومع قومتها نزل راسو بخيبة
خالد : بنتك جنت يعني
زوجتو : وين الجنان بالموضوع يقبرو قلبي طالعين بجننو
خالد : يلي عم تخططيلو انت وبنتك و ابن اختك مارح يصير
ماردت وانسجمت برقصة بنتها مع ابن اختها
~~~~~~•
رأفت متابع حالة رفيقو ونظراتو ولما التفت ع الساحة تفاجئ بغفران مع فهد
رأفت : معتصم مو هي مرتك
رفع راسو بسرعة وقال : وينها ؟
رأفت : هنيك
التفت وهو مو مصدق انو يشوفها ، بس لأ هية ولا حتى وحدة بتشبها هية بكل تفاصيلها حتى بلباسها
شعور بالغضب اجتاحو وكأنو كل الأحاسيس يلي كان حاسس فيها من قبل ثواني اتجاه سارة اختفت وانولدت احاسيس ومشاعر خاصة بغفران ،بس كان شعور غضب وغيرة
معتصم : كيف دخلت لهون ، وين هاد يلي عم ترقص معو ،هي جنت يعني
اجا بدو يقوم بس رأفت منعو بسرعة : اهدى لاتفضحنا
معتصم : كيف دخلت
رافت : مابعرف بركي من معازيم العريس
معتصم: ومين هاد يلي عم ترقص معو
رأفت : أخو العريس، خلص اهدى بس تخلص بتقوم بتحكيها برواق
~~~~~~~~•
كانت ابتسامة النصر ظاهرة على ثغرها لما شافتو كيف انفعل لشوفتها
فهد : شكلها الحفلة عاجبتك
غفران : كتير
فهد : بيسعدني هالشي
غفران : شكرا
سارة وزياد كانو بعاد شوي وما لاحظو وجودها ولما شافتهن عم يقربو اعتذرت من فهد وانسحبت من الرقصة
فهد: تعي نقعد عطاولة لحالنا
غفران : بالاول بدي ادخل على الحمام
فهد : اوك ،خدي راحتك انا ناطرك
غفران : اوك
راحت على الحمام ووقفت جنب الباب من الداخل ومتأكدة انو رح يلحقها
انفتح الباب بقوة ودخل عم يتلفت يمين وشمال لتظهر قدامو فورا
معتصم بعصبية :انت كيف دخلتي
غفران ؛ من الباب
معتصم : لا تتخوتي علي
غفران : والله من الباب
معتصم : غفراان انا حافظك، هبلك معد يمرق علي
غفران : ماني عم اتهبل قلتلك من الباب
معتصم : اكيييد مو من الشباك ،كيف سمحولك
غفران : كنت واقفة عباب الصالة واجى هالشب الحلو قلي شو المشكلة يا انسة قلتلو نسيانة هويتي وماعم يرضو يدخلوني قلي ولا يهمك ودخلني معو ،مو متلك حتى محاولة ماحاولت
معتصم : هاا عنجد ،وفخورة بعملتك
غفران : المهم دخلت ، بعدين ما انت قلتلي لابعرفك ولابتعرفيني
معتصم : اوك لابعرفك ولابتعرفيني بس بالبيت النا حكي تاني
غفران : اوك
تركها وطلع وخبط الباب وراه
غفران بفرحة نصر : لك عصب عصب ، يسسس
~~~~~~~•
رجعت على طاولة الوزير واعتذرت بدها تروح
الوزير : عمو انطري مني اتصال في موضوع مهم بدي فاتحك فيه
غفران : اوك بالانتظار
زوجة فرات : والله بكير الحفلة بعدها بأولها
غفران : والله موضوع مستعجل ،تتهنوا يارب
اخدت غراضها وطلعت طبعا تحت انظار معتصم يلي ماعم يصدق يلي عم يشوفو
اخد موبايلو ومفاتيح سيارتو وطلع يلحقها متجاهل وجود سارة نهائياً
كان حارسها ماشي وراها وحكتو بهمس خليك بعيد ممكن معتصم يلحقني
- امرك
طلعت ووقفت تنطر على الطريق وعلى اساس ناطرة تكسي
بس وقفت سيارة معتصم قدامها وفتحلها الباب يلي جنبو وقال اركبي
غفران : مابدي ما انت قلت مادخلك فيني
معتصم : وهلق عم قلك اركبي
غفران : مادخلك بدبر حالي
معتصم : ناطرة الشب الحلو يوصلك
غفران : لا ناطرة تاكسي
معتصم : من كل عقلك بدا تمرق تاكسي من هون ،اركبي
عملت حالها عم تطلع لبعيد بتجاهل
معتصم : عم قلك اركبيييي
نقزت من نبرتو بس اكيد ماخوفتها وركبت برضوخ وعم تحاول تخفي ابتسامتها
ومشي بسرعة
~~~~~~~~•
عمر عيونو على ابنو يلي لحق غفران بدون مايلتفت على حدا
وقف وقال: هي مفتاح سيارتي لما تخلصو روحو انا اتذكرت شي ضروري بالمشفى
~~~~~~~~•
سارة وزياد عم يرقصو وزياد شارد فيها وبملامحها
وشافها شاردة وحكي ليطالعها بشرودها
زياد : برأيك في بنات حلوين بهل الحفلة
صارت تتلفت حواليها وقالت : اي كلن حلوين
زياد :بس مو احلى منك
سارة : لا تبالغ
زياد : مو مبالغة بس والله انت اجمل وحدة بهي الحفلة حتى بالكون كلو بنظري
خجلها كتير بهل الكلامات واحمرو خدودها
سارة : حاج نرقص انا تعبت
زياد : تعبتي ولا خجلتي
ضحكت وقال : بصير التنين ؟
زياد: بصير
مشت خطوتين وحكي زياد : سارة، والله بحبك
صارت تتلفت حواليها خوفا انو حدا يسمعها بس اطمنت انو الكل مشغول بالرقص واصوات الموسيقى طاغية على المكان
~~~~~~~~~~•
انفتح باب غرفة النوم ودخلت غفران ومعتصم وراها
رما مفاتيحو وقعد ع اول كنبة وحكي : غفران لو سمحتي ممكن نحكي كلمتين
غفران : اوك
قعدت جنبو بهدوء وذهنا شارد تحكيلو الحقيقة ولا لأ وتعرفو على شخصيتها الحقيقة
معتصم : غفران لو سمحتي ،عم اترجاكي تكوني طبيعية وبدون استهبال
غفران : طيب
معتصم : يعني بتعترفي انك كنت عم تستهبلي علي
غفران : ايمت استهبلت عليك
معتصم : بكلشييي ، من يوم دخلتي حياتي وقلبتيها فوقاني تحتاني ،ماعم افهمك ولا عم اعرف كيف اتعامل معك ،ايو وحدة هية شخصيتك الحقيقة
غفران : انت ايو شخصية بدك اياها
معتصم بعصبية : انا ماابدي شي ما ..بدي.. شيي عم تفهمي ، بدي تمرق هالايام على خير واخلص بقااا ،ماطلبت منك شي ،كوني انت وبسس
غفران مصدومة من يلي عم تسمعو : شو يعني تمرق هالايام ؟
معتصم : انو يخلص هالشهر على خير ،انا تعبتت تعبت عم عد الايام بالساعات والثواني
صدمتها ابكمتها بس حاولت تدخل بالجو وتقلبو للإيجابي وقالت : بس انا عم حاول
معتصم : لااتحاولي على الفاضي ،مارح تستفيدي شي
غفران : كل هاد لأنو رحت ع العرس
معتصم ؛ غفران انت شخص غريب ماعم افهمك مرة بحسك هبلة ، ومرة فهمانة ، ومرة وحدة خارقة ، ومرة وحدة لطيفة ، ومرة وحدة شريرة غفران انتت ميين ، كيف دخلتي على العرس ممكن تعطيني جواب منطقي
غفران حست قلبها انكسر من الشي يلي عم تسمعو ودمعة نزلت من عينها وكانت شاردة قدامها عم تسأل حالها بداخلها : معو حق انا ليش عملت هيك ... هو كان واضح شو بدو انو يقهر سارة بس انا شوبدي كل شوي برأي
انقهر على حالتها وتندم على حكيو بس ماعم شي
حكت بهدوء : خالتي كانت خادمة عندن وفرات بيك كان يعطف علي كتير ، بعت كرت دعوة لخالتي وقلا الك ولغفران ، معك حق انا عم اتصرف بتهور وكان لازم خبرك انو انا كمان معزومة على نفس العرس ، بس ... بس مابعرف ليش عم اعمل هيك معقول انا مريضة وبدي علاج نفسي
انقهر كتير على حالتها ، ويمكن بالفعل بدها علاج نفسي
وقف وقال : خلص ارتاحي بكرا بنحكي بالموضوع ، وانا بعتذر عن عصبيتي
غفران بنفس القعدة والشرود: كم لسه يوم ؟
معتصم : شو قصدك
غفران اتطلعت عليه: ليخلص الشهر
معتصم : ١٤ يوم
غفران : بالفعل عم تعدن
عجز يحكي اي شي ولقى افضل الشي هو الهروب
فتح الباب وطلع وهية بعدها على قعدتها لينفتح الباب مرة تانية واتطلعت على الدخيل لتتفاجئ بأبوه عمر
عمر : ممكن نحكي كلمتين
مسحت دموعها واجت لتوقف بس هو حكى وقال : خليكي مرتاحة
قعد جنبها وحكي : انا سمعت كلشي ، انا من اول يوم دخلتي على هالبيت وانا عم حاول اتجاهل وجودك ، بس لهون وبكفي انت ملاحظة انك عم تدمري حياة ابني ،ابني بحب بنت عمو وهية بتحبو ووجودك عم يمنعهن يرجعو لبعض
حاولت تجاريه وتعمل حالها مامعها خبر وقالت : سارة ؟
عمر : اي سارة ، ابني تزوجك ليقهر بنت عمو لانو تركتو بدون سبب وكـ ردة فعل تزوجك بس لقى حالو تورط ... وحس انو غلط وكان لازم يصلح هالغلط بأنو كل واحد يروح بحال سبيلو
، هلق انا بعرف انو يمكن حكيتو بهل الموضوع وعأساس تنفصلو بعد شهر لأنو يمكن خالتك مسافرة او هيك شي ، بس انا شايف الامور عم تتدهور ولازم تنسحبي من هلق بس اطمني مارح تطلعي غير رضيانة ، هالكم يوم باخدلك غرفة بشي اوتيل لبين ماترجع خالتك ورح اعطيكي مبلغ منيح تعملي فيه شي مشروع وكمان معتصم بظن مارح ينساكي ويلي بيني وبينك بضل بالسر ومحدا رح يخبر فيه
غفران بداخلها : معو حق حتى لو كملت الشهر شو ناطرة اول عن اخر رح اطلع من هالبيت ،لازم اطلع قبل ما اتعلق اكتر من هيك
عمر : شو يابنتي شو قلتي
غفران : انا موافقة ، بكرا رح احكي مع معتصم وانهي القصة
عمر ؛ كتير منيح وانا رح جهزلك المصاري
غفران : يكتر خيرك
قام راح وهية انهارت من البكي
غفران : غبييية مجنونة ... شو متوقعة حصل من هاد البيت .. عم اتعلق بشي مو الي ... رح ضل وحيدة طول عمري ومحدا بدو اياني .... كلن عم يهربو مني ... معو حق يمكن انا مريضة وبدي علاج ...
اخدت موبايلها وطلبت رقم : ربع ساعة وانطرني براس الشارع
قامت على الخزانة طلعت تياب بجامة سودة
لسبتها ورمت الفستان بالارض
اخدت فقط اغراضها الشخصية من موبايل والهوية وعقد الزواج طلعتو وشقتو وكبتو بالارض
فتحت الدرج وطلعت ورقة وقلم وكتبت : مافي داعي تنطر ١٤ يوم فيك تعتبر كلشي انتهى وصرت حر ((غفران ))
مشت لعند الباب واتطلعت نظرة اخيرة على الغرفة وبعدها سكرت الباب وطلعت
لقت الست بوجهها
غفران ؛ منيح شفتك
الست : خير
غفران : بدون هالنفسية الله يوفقك رايحة ومريحتك مني
الست ؛ ع وين
غفران : من محل ماجيت بس قبل ما فل تفضلي فتشيني لكون سارقتلكن شي من تحفكن الاثرية
الست : من كل عقلك
غفران : لا من ربعو ، ولا مفكرة مابعرف انكن كنتو تفوتو على الغرفة وتفتشو بس عشو مابعرف
الست خجلت وحكت : لا مافي هيك شي
غفران ؛ بدك تفتشي ولا روح
الست : انا مادخلني
كملت طريقها وهية عم تطقطق بعكازتها
وغفران مشت بسرعة اشبه للركض وطلعت من الفيلا كلها بدون ماتطلع وراها ،وصلت لعند السيارة وركبت فيها وقالت ؛ ع بيت ام جورج
~~~~~~~~~~~•
دقت الباب
صوت ام جورج : مين
غفران : انا غفران
فتحتلا وكانت بقميص نوم قطن طويل باكمام مناسب لعمرها
ام جورج ؛ حبيبتي هي انت
غفران : خالتي بتستقبلين عندك
ام جورج : البيت بيتك يا عيوني
دخلت غفران حزينة مكسورة
ام جورج : بتحبي حضرلك شي
غفران : بدي ابقى لحالي اذا ممكن
ام جورج : اكيد تفضلي ، هي غرفة ابني جورج عطول بنضفها وبرتبها
مشت معها وفتحتلا باب غرفة نوم بسيطة
دخلت ونامت على التخت وتكورت
غفران : خالة بردانة
غطتها وحتى جابتلها غطا تاني
ام جورج ؛ هيك منيح
هزت براسها وحررت دموعها
~~~~~~~~~•
بعد منتصف الليل اندق الباب وقامت ام جورج فتحت الباب وكان باسل
باسل ؛ مرحبا
ام جورج: اهلا باسل بيك ،اسفة ازعجتك بهل الوقت بس ماعرفت شو اتصرف
باسل : وينها
ام جورج : نايمة بهديك الغرفة
قرب ودق على الباب : غفران .. عم تسمعيني غفران
فتح الباب ودخل كانت بعدها على وضعيتها وحتى على نفس الجنب يلي كانت نايمة عليه
قرب لعندها وحكي : غفراان .. غفران
هية تحت الغطا مسحت دموعها واتجلست
باسل : بكيانة
هزت راسها بنفي
باسل ؛ احكيلي شو صاير ،مين عامل فيكي هيك لروح امحيلك اياه
غفران : مافي شي ،انا تعبانة شوي
باسل : من شو
ماردت
باسل ؛ ام جورج ممكن تنين قهوة
-تكرم عيونك يابيك
طلعت وسكرت الباب وقرب قعد جنبها وحكي احكيلي شو القصة
غفران : مضايقة من هالوضع
باسل : ايو وضع
غفران : ليش انا وحيدة
باسل ؛ مين قال هيك ،وانا وين رحت
غفران ؛ ماعم تفهم علي
باسل فهم عليها وقال : احكيلي شو صاير
غفران : خلصت اللعبة
باسل : التفاصيل ؟؟
حكتلو كلشي صار
وهو ساكت ماعلق
غفران : باسل انا مريضة نفسية شي
باسل ؛ من كل عقلك عم تحكي هالحكي
غفران ؛ شو بتبرر تصرفاتي
باسل : انت بالاصل فايتة لتتسلي ، ومرات تكوني على حقيقتك ولما تتهبلي عم تتسلي
غفران : انا عملت شي
باسل : شو هو
غفران : من فترة كان معتصم رح يقابل سارة وكأنو رح ترجع الامور لمجاريها فانا اتفقت مع باسل نخرب عليهن القعدة وباسل هدد سارة تضل معو يعني انا بعدتن عن بعض وكنت شريرة
ضحك باسل ؛ عنجد عملتي هيك
هزت براسها
باسل : طيب شو بتفسري الشي يلي عملتيه
غفران : مرض نفسي
باسل ؛ حاجتك جنان ، اكيد مو مرض نفسي وانت بتوزعي عقل عليهن كلن عم تفهمي
غفران ؛ لكن ليش عملت هيك
باسل ؛ لأنك عشقانة
غفران : اناااا ؟.. لا مافي منو ابدا
باسل ؛ بالاول قلت انو ممكن تسلية بس هلق فهمت انو هي كلها حركات عاشقين لأنو العاشق بيعمل شغلات جنونية
غفران ؛ لا انت غلطان
باسل : طيب ياستي انا غلطان ، المهم بدنا نطلع من هالحالة ونعرف مين هو غريمكن وترجعي لحياتك الطبيعية
غفران : بظن اني عرفت مين
باسل : وصلتي لشي ؟
غفران : لا ، بس كنا عم ندور بالمكان الغلط وهو قدام عيونا كل الوقت
باسل باستنكار : مين
غفران : فكر معي من ايمت بلشت حياتنا تتهدد ،من يوم دخلت فادية على حياتنا ، كانت حياتنا هادية وعم كمل حياتي جنب بابا بس بتفاجئ انو عم نتهدد وضليت كم سنة بالغربة لحالي ، ولما قررت انزل هو سافر قال ليحميني وهيك صارت حياتنا مشتتة يا هو مسافر يا انا مسافرة ومانتلقي اعطيني تفسير منطقي
باسل : بس شو مصلحتها تبعدكن عن بعض
غفران : حقارة مرت اب مابدها اياني كون موجودة ويهتم فيني واخدو منها وكمان مشان تعيش على كيفها كل فترة بدولة شكل ، وعندك مثال امس لما بابا قرر ينزل بتجيه رسالة عم تهددو بالنزلة ، وغير هيك انا محرومة روح على الشغل والشغل كلو عم يديرو اخوها وشو عم يعملو بالشغل الله اعلم ، بالنهاية بنحصل النتيجة انو انا مشتتة ومالي بر امان ارسى عليه ومحرومة عيش طبيعة متلي متل غير واخوها مسيطر على الشغل وهية مسيطرة على بابا وعايشة حياتها
باسل ؛ معك حق احتمال كبير تكون هية
غفران : مشان هيك لازم يجي بابا ونوقعها الها ولاخوها
باسل : تماماً ، اصبح معد في مجال للخوف طالما عرفنا مين غريمنا
غفران : صح
وقف ومشي خطوتين ورجع التفت عليها ورفع حاجبو وقال : لكن انت شو عم تعملي هون ماتروحي على بيتك
غفران : اااااه
باسل ؛ وبتقوليلي مانك عشقانتيه للدكتور ، شوبتفسري وجودك هون ،ولا مشان اذا اجا يلاقيكي
غفران ؛ بدي اعرف ردة فعلو ، معقول يزعل على رحيلي
باسل : مارح يزعل غفران ، بعدين بعد كلشي حكاكي اياه بدك تعطيه فرصة تانية ، غفران انت مانك من هديك العيلة ولا رح تكوني والحمد لله انو وصلنا لهون ،كشفنا الفاعل.. وطلعتي من حياتن ، لازم تبلشي بداية جديدة وتنسي الماضي،
في مقولة بتقول (اذا ركبت القطار الخطأ فحاول ان تنزل في اول محطة لأنه كلما زادت المسافة زادت التكلفة ) . بتمنى تكون وصلت الرسالة
غفران ؛ وصلت
قامت وقالت : لازم ترجع غفران القديمة
باسل : برافو عليكي
يلا قومي
~~~~~~~~~~~~•
الصبح عسفرة الاكل عم تتجمع العيلة
واول الموجودين عبير وبتول
عبير : غفران ماراحت عن بالي وسؤال عم يعيد نفسو شو كانت عم تعمل مع عيلة الوزير
بتول : بتصدقيني اذا قلتلك انو غفران مو غفران يلي عرفتنا هية عليها
عبير : معك حق بس تنزل رح اسألها ،متأكد في وراها سر
بتول : وانا كمان
عبير ؛ اي صح بتول نسيت اسألك شو كان بدو هادك الشب امبارح بالعرس
بتول : قال حابب نحكي مع بعض
عبير : وشو قلتيلو
بتول ؛ اكيد لاا ماما بدي انتبه لدراستي واتخرج لاحقة على هي السخافات (وحكت بهمس : مستحيل اوقع بالجورة مرتين )
عبير : هي هية بنتي الحلوة
اجا عامر مستعجل معو شنتة المدرسة وقعد ياكل بسرعة
عبير ؛ ماما شوي شوي لسه معك وقت ع المدرسة
عامر : لا يادوب لحق لانو بدي روح مشي
عبير : مشي ؟؟
عامر :اي ، رياضة ولتنشيط الدورة الدموية
عبير : اف من ايمت هالتغير انت كمان
عامر ؛ من وقت حطيت هدف براسي بدي اخد البكالوريا وادخل الكلية الحريبة
عبير ؛ من وين طلعتلي بالكلية الحربية هي انت كمان
عامر ؛ قالتلي عنها غفران وعجبتني .. وحسيت انو انا عنجد هدفي هيك شي
عبير : طيب انت خود البكالوريا وبعدين بنحكي
عامر : اوك
اكل كم لقمة ومشي
عبير : طيب مافطرت منيح
عامر : باكل بالمدرسة لازم كون خفيف وانا عم اركض يلا سلام
راح عامر وحكت عبير ؛ والله هالغفران قدرت تأثر عليه وصاير انسان تاني عم يهتم بصحتو وبدروسو بس لولا هالقرار تبع الكلية الحربية
بتول ؛ والله مجال حلو خليه يكمل فيه ضروري نكون كلنا دكاترة
وصل معتصم وهي جيتو من برا ومبين من شكلو تعبان وكأنو مو نايم طول الليل
معتصم ؛ صباح الخير
و بوصلت الست كمان
ردو عليه
بتول : لك صح وين رحت مبارح من اول العرس
معتصم ؛ صار عندي شغل ضروري
بتول : وماعرفتلنا من غفران شو كانت عم تعمل مع عيلة الوزير
معتصم : ما حكينا بالموضوع ، هلق بس تنزل انتو اسألوها
الست : من وين بدا تنزل
معتصم ؛ من غرفتها
الست ؛ ماغفران مشت
معتصم حس حدا قبضلو على قلبو وحكي بصدمة : ع وين مشت
الست : بالليل شفتها طالعة من غرفتها سألتها ع وين قال رايحة بدون رجعة ورح ريحكن مني
عبير : بتكون عم تمزح
الست : مو شكلها كانت عم تمزح
طلع معتصم ركض على غرفتو فتح الباب بسرعة وبالفعل الغرفة فاضية
معتصم : غفرااان .. غفراان
مافي رد
راح على الحمام فتحو مالقى حدا
معتصم : معقول راحت
انتبه للورقة المكتوبة وعقد الزواج يلي مشقوق ومرمي على الارض
فتح الخزانة بس لسه تيابها وحس كأنو في امل ترجع
معتصم : مجنون ليش حكيتها هيك لييش
لف ليطلع لقى العيلة كلها قدام الغرفة بالاضافة لأبوه
عبير ؛ شوو
معتصم ؛ رايحة مو هون ، ستي قالتلك شي تاني
الست : لا بس هيك
معتصم ؛ رايح شوفها
عمر ؛ لييش
كان خاطي خطوة ووقفو سؤال ابوه
معتصم ؛ بدي افهم منها ليش راحت هيك بدون ماتخبر حدا
عمر : مو هاد يلي بدنا اياه ،خلص طلعت من حياتك ورح ترجع حياتنا متل اول
معتصم ؛ بس مو بهي الطريقة ،انا زعلتها مبارح
عمر : مو مهم، المهم انها طلعت خلص لا هية من توبك ولا انت من توبها ولانسيت ليش تزوجتها
معتصم : لا مانسيت ،بس ماكان بدي الامور تخلص هيك
عمر : كيف بدك اياها تخلص بالله ، ولا مو انت يلي كنت متفق مع امك وستك انكن اطفشوها
الكل ساكت وخجلان من حالو
معتصم : طيب على القليلة اعطيها مهرها ، ماني اناني لهل الدرجة لأتركها هيك ،واعتذر على الشي يلي عملتو
عمر : ماشي بس اكتر من هيك مابدي عم تفهم
تركهن عمر وبتول حكت : يعني غفران خلص راحت
عبير : ابني اعتذر منها وقلا تضل تجي لعنا والله تعودنا عليها
بتول : اي صح حتى لو ما كملتو بس بنضل اصحاب ماهيك
عبير : ياريت ، معتصم ابقى عطينا عنوانها
معتصم شارد وكأنو ماعم يسمع بس الشي يلي حاسو هو الندم
تركهن ونزل بسرعة ، بدو يروح لعندها بدي يشوفها ،صح صعب يقلا ارجعي بس الشي يلي بدو اياه بهل اللحظة يشوفها ويطمن عنها ويعتذر مابدو يخسرها
~~~~~~~~~~•
عم يدق على الباب على بيت ام جورج
بس محدا عم يرد
معتصم : غفران افتحي بعرف انك جوى ... غفراان
كمان مافي رد
كان طالع تنين نسوان ومعهن اغراض وهو تابع الدق
حكت وحدة منهن : يا ابني مارح تلاقي حدا
معتصم : كيف مارح لاقي حدا
-: هاد بيت لمرى وحدانية بتشتغل بالبيوت وهلق بتكون بشغلها لا تدق وتتعذب
معتصم ؛ بعرف هالشي بس بنت اختها بظن تكون هون
اتطلعو ببعض وقالو : ليش عندها بنت اخت
-: بس بنعرف انها مرى وحدانية ،وماعندها قرايبين
معتصم ؛ كيف يعني ، مابعرف اذا بنت اختها الحقيقة اسمها غفران ساكنة معها وهية يلي ربتها
-: صرلنا عمر قاعدين هون اول مرة بنسمع بهل القصة ،والمرى بحياتنا ماشفنا عندها حدا .. عندها ولد عم يدرس برا هاد يلي بنعرفو
معتصم : لا تجننوني بنت اختها عايشة معها هون انا جيت لعندن كذا مرة
-: يا ابني لتكون غلطان
معتصم ؛ مو هاد بيت ريحانة
-: اي صح اسمها ريحانة ام جورج
معتصم بصدمة : ام جورج ؟؟؟
-: اي ام جورج
معتصم ؛ مسيحية ؟
-: اي مسيحية
معتصم : لاا في غلط بالموضوع
- : غلط شوو يا ابني .. ليك اسأل ناطور البناية بركي بفيدك
معتصم ؛ وين بلاقيه
-: تحت اول طابق الشقة يلي على اليمين
معتصم : شكرا
نزل بسرعة وراح لعند الناطور
وبعد جدال طويل ومعتصم ماعم يصدق اي شي وكأنو بدوامة ومع محاولات انو يتصل بغفران بس كان يطلعلو خارج التغطية
معتصم : طيب ياعم ممكن تتصل بهي المرى وتخليها تجي
~~~~~~~~~•
وقفت تاكسي قدام البناية ونزلت منها ام جورج ومعتصم كان رايح جاي قدام المدخل ولما شافها ركض لعندها
ام جورج : مرحبا دكتور
معتصم ؛ اهلا كيفك
ام جورج : بنشكر الله
معتصم : خالتي وين غفران
ام جورج : مين غفران ؟؟
معتصم : لا تجنيني ، غفراان وين
ام جورج : تفضل نحكي فوق
معتصم ؛ تفضلي
~~~~~~~•
فتحت الباب بمفتاحها ودخلو
ام جورج : شو بتحب تشرب
معتصم : مو جاي اشرب شي .. ممكن تفهميني وين غفران
ام جورج: والله مابعرف
معتصم : مو المفروض تكون هون
ام جورج : لا
معتصم : كييف لاا ،مو انت خالتها اخت امها مدري شو بتقربيها
ام جورج : كمان لاا
معتصم : خالتي انا رح جن ممكن تفهميني لأنو ماضل ولا فيوز ع لحظة تخليت انت ماتكوني هون بس لما شفتك ارتحت شوي ، فيا ريت تريحيني وتحكيلي غفران وينها
ام جورج : بصراحة يا أبني ماعارفة شو احكي
معتصم : احكي اي شي
ام جورج : انا غفران مابعرفها
معتصم : كيف يعني
ام جورج : القصة بلشت من لما تعبت بالسوق وفقت بالمشفى لقيت بنت فوق راسي ويلي هية غفران ... طمنتني عن حالي وسألتني عن اسمي وشو بشتغل ، وعرفت عن حالها انها هية يلي اسعفتني
معتصم : اييي؟؟؟
ام جورج : قالتلي انو بدي عملية وانو هية رح تساعدني بتكاليف العملية ،وانا ماكان فيني ارفض حدا جاي يساعدك بعز ازمتك اكيد مارح ترفض
معتصم : كمليي
ام جورج : بعد العملية صارت تترد علي وحكتلي انها مقطوعة من شجرة وما الها حدا وخبرتني انك عرضت عليها الزواج وقالتلي بدا تستقبلك عندي وعاساس انا خالتها وبتطلبها مني
معتصم ؛ ايي
ام جورج : والباقي انت بتعرفو بعد ماطلعت عروس من هاد البيت ماشفتها
معتصم ؛ بركي وحدة حرامية .. كيف بتسايريها وبتدخليها على بيتك لا وبتساعديها تدخل بيوت الناس
ام جورج : حسيتها منيحة .. وحدة دفعت عني تكاليف عملية ،بتكلف هديك الحسبة معقول ماتكون منيحة
معتصم : مع حق حتى انا انغشيت فيها ... بس ماني مصدق كلشي حكيتيه
ام جورج : والله هاد يلي صار يا ابني .. انا بعدين وعيت على غلطي وتندمت بس خلص وقع الفاس بالراس وانا جاهزة لاي محاكمة
معتصم : بتعرفي وين ممكن لاقيها
ام جورج : لا والله .. بس هية عاملة معك شي فصل لاسمح الله
معتصم : لا بس لازم التقى فيها ضروري ، انت وين بتشتغلي ؟؟
ام جورج ؛ عند جماعة
معتصم : بعرف عند جماعة شو اسمن
ام جورج : اشرف عطالله .. فيك تروح تسأل عني عندن كمان
معتصم : القاضي اشرف عطالله ماغيرو ؟
ام جورج : اي هو بتعرفو
معتصم :بسمع عنو ، طيب بدي اسألك عن الوزير فرات بتعرفيه
ام جورج : لا مابعرفو
معتصم : دخلت بدوامة الله وحدو بيعلم فيها
ام جورج : طيب فيني افهم شو صار
طلع كرتو من جيبتو وقال : بترجاكي اذا شفتيها او رجعت لعندك تحكيني على هاد الرقم
ام جورج : تكرم يا ابني .. ومشان الله ماتواخذني انا حبيت ساعدها مو اكتر ومابعرف اذا في من وراها مصايب
مارد وقام طللع
وهية نطرت شوي واتصلت برقم
ولما اجاها الرد حكت : كيفك باسل بيك
باسل : يا هلا ،خبريني شو صار معك
-: قلتلو متل ماقلتلي بس حسيتو ماصدق
باسل ؛ عمرو مايصدق ، غفران حست عليكي لما طلعتي
-: لا اصلا هية ماكانت بالفيلا طلعت من الصبح بكير على الشركة
باسل : هي مجنونة يعني شو اخدها ع الشركة
:- والله نبهتها بس مادرت
باسل ؛ ماشي ، انا رح حكيها
~~~~~~~~~~~•
بالشركة
متزعمة غفران مكتب المدير وعم تدقق بالاوراق وبتدخل عليها السكرتيرة وبتضفلها كمان بعض المعاملات
السكرتيرة : هاد كلشي طلبيته
غفران ؛ اوك فيكي تروحي
السكرتيرة : الاستاذ سمير برا بدو يقابلك
غفران ؛ دخليه
السكرتيرة : حاضر
طلعت ودخل سمير
سمير : نورت الشركة دوموزيل غفران
غفران ؛ شكرا
سمير : شو هالزيارة الحلوة
غفران ؛ مو زيارة والله يا سمير ، رح صير داوم
سمير : يا اهلا وسهلا طبعا .. اكيد
غفران : كل هالفترة محملينك الهم صار وقت ترتاح
سمير بلبكة : اذا مشاني انا كتير مرتاح واتأقلمت على الشغل
غفران : معك حق ،وحتى شغلك بيشهدلك بس بالفعل نحنا تعبانك معنا ورح تاخد مكان مريح الك شو رأيك
سمير بلبكة ؛ متل مابدك .. بالنهاية الرزق رزقكن
غفران ؛ وهلق لو سمحت تحولي كلشي عندك لعندي حابة راجع كلشي بنفسي
سمير بقلق : غفران خانم انت شاكة بشي
غفران : شك بشي ؟ هههه بشو بدي شك بس مليت من القعدة قلت خليني انزل اشتغل مو اكتر ، بس انت ليش هيك عم تحكي ، ياترى في شي بيدعي للشك
سمير : لا لا طبعا كلو ماشي نظامي بس فكرت انك شاكة بشي
غفران : لا مافي هيك شي بعدين كيف بدنا نشك والشركة كانت بأمانتك يعني بأيدي امينة
سمير : تسلمي هاد من لطفك .. واذا بتحبي بساعدك
غفران ؛ اي مو غلط
سمير : بدي استأذن وارجع عمكتبي
غفران ؛ اذنك معك
اتراجع وراح ليطلع ووقفتو غفران : لاتنسى العقود والملفات
سمير ؛ اكيد ساعة وبكونو عندك
غفران : لا مستعجلة عليهن لو سمحت
سمير : متل مابدك
طلع ولما سكر الباب تحولت ملامحو لحقد
~~~~~~~~~•
باسل بمكتبو وعن يحاول يتصل فيها و وعم يحكي : انت مو بس مريضة نفسية انت مجنونة بتصرفاتك
غفران : الو
باسل ؛ وينك
غفران ؛ محل مالازم كون
باسل : انت جنيتي
غفران : لا بالعكس هلق حطيت عقلي براسي
باسل : يابنتي لسه ما متاكدين من غريمنا ويمكن يطلعو مو هنن
غفران : بس انا متأكدة انو هنن ماشفت وجه سمير لما شافني بالمكتب
باسل ؛ طيب شو ناوية
غفران : عم راجع الملفات والعقود والظاهر في تلاعب وعم فكر افتح تحقيق لانو اكيد سمير مو لحالو
باسل : طيب انتبهي على حالك
غفران : اي
باسل : سلام
غفران : باااي
~~~~~~~~~~•
بالمشفى
قاعد عمر بمكتبو وشارد عم يفكر بغفران كيف راحت بدون ماتاخد ولا ليرة .. غريب امرها لو وحدة غيرها كانت استغلت الوضع .. بس اكيد معتصم رح يرضيها بكم ليرة .. او يمكن تجي لهون اطالبيني .. يلا كلو هاد مو مهم المهم خلصنا منها
اندق الباب ركز قعدتو وجلس ضهرو وقال : اتفضل
دخل اخوه خالد : السلام عليكم
عمر : وعليكم السلام ،تفضل ارتاح اخي
خالد : قال طالبني
عمر : مزبوط ، بدنا نحكي بموضوع معتصم وسارة
خالد : عن شو بدك تحكي ،ماكلشي انتهى
عمر ؛ لا مافي شي انتهى معتصم طلق غفران وراحت بحال سبيلها ، اخي حاج نعذب هالولاد خلينا اليوم المسا نجتمع ونحدد موعد العرس
خالد بهدوء ؛ ناطرينكن على العشا لكن
عمر : ونحنا بنتشرف
استأذن وطلع وهو مبسوط كتتير طلع موبايلو من جيبتو واتصل بمرتو
خالد : بتجهزي اليوم للعشا جاين بيت اخي يتعشو معنا اليوم
مرتو : شو المناسبة
خالد : المي رجعت لمجاريها وجايين يحددو موعد عرس سارة ومعتصم
مرتو : بس..
قاطعها قبل ماتكمل : معتصم طلق مرتو وبدنا ننهي هالقصة حاج نمرمط فيها
مرتو : سارة معها خبر ؟
خالد : خبريها انت .. واهم شي بتخليها تقطع علاقتها مع ابن اختك عم تفهمي
مرتو بغيظ : مااشي
~~~~~~~~~•
غفران عم تحكي السكرتيرة على التلفون : بتحكي مع سمير خليه يستعجل بالاوراق
السكرتيرة ؛ الاستاذ سمير طلع من الشركة
غفران : هيك لكن .. بسيطة
سكرت التلفون وطلعت من الشركة
وقفت على البوابة تنطر سيارتها ،ومع وصول سيارتها اجت سيارة مسرعة وعملت رشقة طلقات نارية متقصدة غفران فيهن