رواية الرقصة الأخيرة الفصل الثالث3 بقلم فاطمة الزهراء
استمعت لحديث الطبيب بصدمه ونادين أيضاً كأنها غير مدركه ما استعمت له
وائل : حياة ضرورى نبدأ مرحلة العلاج أى تأخير مش كويس فى حالتك
نادين :
ـ طيب هو أيه المفروض يتم فهمنا لو سمحت
وائل :
ـ بصراحه محتاجين متبرع فى أسرع وقت أهلها لازم يعرفوا علشان نعمل فحوصات ونشوف مين ممكن يتبرع لها منهم
حياة برفض :
ـ أنا عندي عرض مهم مش هقدر الفترة دى أخد أى خطوه أعطيني فرصة أسبوعين
وائل :
ـ الحاله مش محتاجه تأخير كل ما بدأنا بسرعه هيكون أفضل ثم انتى بتفضلى العرض عن حياتك الشخصية
حياة :
ـ مش هقدر الفرصه دى مستنياها من سنين متطلبش منى أضيعها لو سمحت أكتب علاج وهلتزم به
حاول إقناعها ونادين معه ولكن رفضت ليكتب لها بعض الأدوية قوية المفعول لتغادر مع نادين متجهين للخارج نظرت للسيارة والشارع أيضاً ..
أعطت مفاتيح سيارتها لنادين لتقودها هى فهى مازالت تحت تأثير الخبر
حياة بهدوء :
ـ نادين اوعديني الكلام ده مفيش اى شخص يعرفه
نادين :
ـ ماينفعش ياحياه لازم عمو وطنط يعرفوا
حياة بعناد :
ـ نادين انا عندى عرض مهم بعد ما أخلصه هسافر وأبدأ علاج مفيش حد هيعرف عن تعبي
نادين :
ـ عرض أيه ياحياه حياتك فى خطر
حياة :
ـ انا مش هضيع الحلم التاني هتوعديني انك مش هتحكي لأى شخص وإلا هختفي خالص ومش هتعرفي مكاني
نادين بيأس فهى تعرف حياة جيداً إن قالت شئ ستفعله دون إدراك العواقب التى قد تحدث :
ـ بس انا خايفه عليكى هتتعبى كده اكتر ولازم تبداي العلاج دى حياتك مفيش هزار
حياة :
ـ بعد العرض هسافر على طول وهلتزم بالعلاج اللى وصفه الدكتور
نادين :
ـ انا خايفه اوى عليكى
حياة :
ـ انا كويسه متقلقيش كل شئ هيكون كويس
نادين :
ـ ماشي هنشوف بس لو تعبتي وهما لاحظوا كده ها نقول ايه
حياة :
ـ هقول قلق وتوتر بسبب العرض
نادين :
ـ ماشي يا حبيبتي ربنا يستر
حياة :
ـ عاوزة أمشي شوية تمشي معايا
نادين :
ـ ما بلاش علشان ما تتعبيش
حياة :
ـ عاوزة أشوف الشوارع واودعها قبل السفر
نادين :
ـ ماشي يا حبيبتي يلا بينا
أوقفت السيارة ليخرجوا منها ويسيروا على الشاطئ أغمضت عينها لما عاد الآن ولما المرض فى هذا الوقت طلبت من نادين أن يعودوا للسيارة ليتجهوا للمنزل بعد ذلك
❈-❈-❈
عاد تميم ليجد حسناء تجلس فى الداخل اتجه إليها ليتحدث معها ويعلم إن كانت هذه العنيدة فى حياتها شخص أخر أم لا
تميم :
ـ ازيك يا طنط رجعتي امتى
حسناء بابتسامه :
ـ ازيك ياحبيبي عامل ايه لسه جايه من نصف ساعه كدا .. اخبارك ايه وحشتنا أوى تعالي اقعد معايا نتكلم زي زمان انت وحشتني قولى اخبارك ايه قدرت تتجاوز احساسك ولا ايه الدنيا معاك
تميم :
ـ انتم وحشتوني اكتر يا طنط حقيقي كنت مفتقد الأجواء دى فى امريكا
حسناء :
ـ فين ايامك فاكر ايام اما كنت بتجي وتحكي لي علي حبك لحياه وانك مش حتقدر تعيش من غيرها وانك هتقف قصاد الكل علشانها شوفت الايام غيرتكم والحب الجميل اتنسي وعدت عليه الايام ازاي وتجاوزت عن مشاعرك ومشاعرها
تميم :
ـ انا منستهاش بس هى اللى نسيت حبي لها انتى عارفه سبب سفرنا حاولت كتير اكلمها بس مقدرتش وتقريبا كده خسرتها
حسناء باستفهام :
ـ ليه عملت في حبكم كدا دي كانت ايامك تبشر بحب كبير بس ماحافظتش عليه البنت اتعذبت قوي بعد ما سفرت حست انك غدرت بها
تميم :
ـ هى رافضه تعطيني فرصه اتكلم معاها
حسناء :
ـ مش مهم اللي جي يا تميم اتكلم معاها مره واتنين اقنعها بسبب تخليك عنها .. وبصدق مشاعرك علشان ترضي تعطيك فرصه ثانيه وتحس معاك بالامان وانك مش هتبيعها تاني
تميم :
ـ حاولت لكن انتى عارفاها عنيدة
حسناء بابتسامه :
ـ يعني افهم من كلامك انك لسه بتحبها وباقي عليها هى افتقدتك من يوم ما سفرت حتي الضحكه غايبه من وشها مكسوره
تميم بأمل :
ـ هحاول اكيد لكن محتاج مساعدتك
حسناء :
ـ انا معاكم يابني وانا نفسي في ايه غير ان تبقي انت وهي سعداء سوا
لم ينتبهوا لحياة التى وصلت منذ وقت قليل رغم سعداتها بسبب حديثه ولكن القدر يعاندها ككل مره
❈-❈-❈
صعد تميم لغرفته بعد حديثه مع حسناء لتدخل حياة وجلست مع والدتها لتضع رأسها على قدمها ملست حسناء على شعرها
حياة :
ـ مساء الخير يا ماما
حسناء :
ـ مساء الخير يا حبيبتي .. عامله ايه طمنينى عملتى اي عند الدكتور
حياة بهروب :
ـ كويسه يا ماما اطمنى انتى هنا لوحدك ولا ايه
علمت حسناء أنها تخفي عنها شئ لتسألها :
ـ ايوه لوحدى الدكتور قالك اي يعني !!
حياة :
ـ مفيش يا حبيبتي توتر وقلق بسبب العرض انتى عارفه لما بيكون عندى عروض بتأثر عليا
حسناء :
ـ مفيش داعي للتوتر ولا القلق انا واثقه فيكى انك هتنجحى زى كل مره أهدى كده وخدى الموضوع عادى علشان ماتتعبيش وعلشان تركزى ف العرض اوكى ياحبيبتي
حياة :
ـ حاضر اطمنى بابا لسه فى الشركه ولا ايه !!
حسناء :
ـ اه كان عنده اجتماع وزمانه جاي
حياة :
ـ طيب محتاجه حاجه منى عاوزة أنام عندى تدريب بكرة
حسناء بهدوء :
ـ مش هتتعشي معانا ياحبيبتي ده حتى تميم وريان منتظرينك انتى وباباكى علشان نتعشي كلنا
حياة محاولة الهروب من والدتها :
ـ معلش يا ماما حقيقي عاوزة أرتاح اعتذري منهم
حسناء بهدوء :
ـ كده تميم هيزعل وهيقول انك مش متقبله وجوده
حياة :
ـ وهيزعل ليه يعني بعدين هو فى بيته
حسناء :
ـ لأ انتى مش محسساه أنه ف بيته خالص الولد حاسس أنه غريب عالطول وانك رافضه وجوده حياه انتى بجد مضايقه من وجوده ورجوعه مصر
حياة بعد أن جلست جوار والدتها :
ـ انا هتضايق ليه مفيش حاجه بينا علشان اتضايق منه وحضرتك عارفه انى طول الوقت بكون فى المركز علشان التدريبات ماما أنا لو نجحت العرض ده هسافر دول تانية واكسب مهارات جديدة
حسناء :
ـ اولا ربنا يوفقك وان شاء الله تحققي كل ده بس مش على ماما ياحياة انتى مش على بعضك من وقت رجوعه وبعدين لو فاكره انى نسيت كنتم ايه زمان ولا حالتك من وقت ما سافر تبقى عبيطه
حياة :
ـ كنا يا ماما يعني شئ انتهى بعدين ليه بتقولي الكلام ده اكيد فى حياته واحده تانية وانا حاليا مش بفكر غير فى مستقبلي انتى عارفه المجال ده مرهق قد أيه ومتعب كمان
حسناء :
ـ هو قالك أن في ف حياته واحده ولا انتى ألفتى من عندك والسلام .. وبعدين مفيش حاجه بتنتهى لو انتهت كان بان عليكى ياقلب ماما
حياة باستنكار :
ـ معني كلامك ايه وبعدين أنا طبيعية جدا
حسناء :
ـ معنى كلامى انى ماحكمش على حد من نفسي لأ أسأله واعرف وعلى أساس إجابته هحدد علاقتنا ببعض ازاى ... ثم انك كده طبيعية بذمتك مصدقه نفسك
حياة :
ـ ماما أنا خلاص حكايتنا سوا انتهت يوم ما سافر وهو بالنسبه ليا ابن عمى بس
حسناء بدفاع :
ـ حياه سفره كان غصب عنه وانتى عارفه السبب أما عدم سؤاله عنك ده بقى سببه عنده اعرفيه منه وعلى أساسه عاقبيه على بعده وبلاش تضيعي الحب من ايديكى
حياة :
ـ ماما ممكن نتكلم بعدين أنا بجد تعبانه ومحتاجه ارتاح ومفيش كلام بينا خلاص حكاية وقفلتها مش من حقي أفكر فى شخص مشى ومحاولش يسأل عنى كل السنين دى وبعد العرض هسافر لندن
حسناء :
ـ اوك ياحبيبتي براحتك انا مش هضغط عليكى انا بس حبيت انصحك قبل فوات الاوان بس عالفكره حرام تظلمى حد قبل ماتسمعي منه وف النهايه القرار قرارك وانا معاكى ف اي قرار
حياة :
ـ أنا اللى ظلمته يا ماما أنا أنا اللى بعدت ومشيت واضح إن حضرتك نسيتي عشت ازاى وأخدت وقت قد ايه علشان ارجع زى الاول
حسناء :
ـ ومارجعتيش لسه ياحياه انتى ظالمه نفسك مش ظلماه هو ده قصدى
حياة :
ـ بس أنا كويسه كده ومش هسمح لأى شخص يقرب علشان كلهم زى بعض بيوعدوا وبعدين يمشوا
حسناء :
ـ خلاص ياحبيبتي أهدى وانا معاكى فى اي قرار زى ماقولتلك .. قوليلى بقى العرض بتاعك امتى
حياة :
ـ كمان أسبوع انتى وبابا وريان هتحضروا طبعا محتاجه لكم معايا فى اليوم ده ودعمكم
حسناء بسعادة :
ـ اكيد طبعا ياحبيبتي هنكون معاكى وجنبك ونفتخر بيكى ياروحى
حياة :
ـ هطلع أرتاح بقي عاوزة حاجه منى
حسناء : عاوزه سلامتك ياحبيبتي
صعدت لغرفتها بدلت ثيابها لتأخذ الأدوية .. وصلت نادين لمنزلها لتجد أحد يضع يده على عينها لتصرخ بقوة .....