رواية شهر زمان
الفصل الخامس5
بقلم مريم اليوسف
بصباح يوم جديد
جاي معتصم من الدوام وانتبه على سارة طالعة بسيارتها من بيتهن وقف بسيارتو لوصلت لعندو هدت وفتحت الشباك
سارة : صباح الخير
معتصم : صباح النور ، مبكرة ع وين
سارة : مواعدة زياد
فتح الباب ونزل من سيارتو وقرب لعندها وقال : انت شو الشي يلي عم تعمليه
سارة : متل الشي يلي عملتو
معتصم : سارة لاتستعجلي بقرارك صدقيني رح صلح كلشي
سارة : طيب صلح وانا ناطرة
معتصم : والخطبة ؟؟
سارة : قررنا نعملها بعد شهر
اتطلع فيها مستغرب
سارة ؛ بتمنى الرسالة توصل
دعست على البنزين وكملت طريقها
ضل عم يلحقها بعيونو وحكي : وصلت الرسالة
رجع على سيارتو ودخل على البيت
اول ما دخل سمع امو وابوه عم يتحدثو بشكل محتد
امو : انا عرفانة نواياها بدها تستفزني وتفرجيني انو انا مابعرف ربي
عمر : طيب روح انا
عبير : ماهية هاد يلي بدها اياه تروح انت مشان تشوفك وترجعو الحب القديم وتفكر انو انا خايفة من مواجهتها
عمر : طيب شو الحل
معتصم : صباح الخير
التفتو عليه
عبير : معتصم بروح
ابوه :صباح النور
معتصم : خير ع وين بدي روح
امو : على مدرسة عامر طالبين ولي امرو
معتصم ؛ بعتذر فارط تعب ونعس
امو : لما تفيق ؟
معتصم : بدي ارجع ع المشفى في مريض دخل اسعاف وبعد كم ساعة لازم ارجع تابع حالتو
امو ؛ طيب شوو الحل
ابو معتصم : لاقي الحل المناسب وانا جاهز ، المهم شو صار بالفطور
تركهن معتصم وكمل عغرفتو ولما دخل غفران اتجلست من على الكنبة يلي كانت نايمة عليها
معتصم: صباح الخير
غفران : صباح النور
معتصم : عجب نايمة ع الكنبة
غفران : قلت بركي جيت بالليل رح تكون تعبان قلت بخليلك التخت فاضي مشان ترتاح
معتصم : كمان انت لازم ترتاحي نومة الكنبة ابدا مو مريحة
غفران : لاتاكل همي متعودة
هز براسو وراح لعند الخزانة صار ياخد تياب الو
غفران : شو القصة في ضجة
معتصم : طالبين ولي امرو لعامر بالمدرسة
غفران : مشان مشكلة مبارح
معتصم : اكيد
غفران ؛ وليش امك صوتها طالع
معتصم : امي هية والمديرة فيكي تقولي اعداء
غفران : والسبب
معتصم : لانها كانت حبيبة بابا من زمان وكمان هديك بتشوف حالها على ماما انو هية مديرة وامي ماكملت تعليمها واكيد اذا راحت ماما هديك رح تحاول تسمعها كم كلمة لماما عن التربية والثقافة
غفران : اي فهمت عليك ، طيب يروح ابوك
معتصم : هههه بدك ماما تبعت بابا لعندها برجليه
غفران : اي صح ، انا نازلة شوف الوضع لكن وشوف اذا الفطور جاهز
معتصم : لاتحسبو حسابي ،كان في كعكة اكلتها الصبح وحاسس حالي شبعان
غفران ؛ اوك ، طيب بدك شي مساعدة
معتصم متفاجئ : لا طبعا رح اعمل شاور واطلع
غفران : فهمتني غلط قصدي طالعلك تياب
معتصم : لا طالعت شكرا
غفران : خود راحتك انا نازلة لتحت
~~~~~~~~•
نزلت لتحت كانو مجتمعين عسفرة الفطور
بس محدا عم ياكل
ام معتصم : كلووو منك يا عامر مليون مرة قلتلك بلاا هالمشاكل
عامر : ماما ماااذنبي هني يلي تعدو علي
ام معتصم : بس هلأ حطتها علي وحدة مع ابو اربع عيون ، عقولت شو هالتربية ومابينعتب عليكي مابتعرفي تربي
عامر : خلص لاتروحي وبنفصل من هالمدرسة وبرتاح
عبير : بالله شوو .. بدك تضيع تعب سنة هيك بهل البساطة
غفران : صباح الخير
ردو وهني مشغولين
قعدت جنب بتول وبتول حكتلها نفس الشي يلي حكاه معتصم
غفران : ومين بدو يروح ع المدرسة
بتول : مابعرف بس لازم حدا يروح يا ماما يا بابا وماما مستحيل تبعت بابا
غفران :طيب تروح امك ويروح حدا معها
بتول : مافي حدا انا عندي جامعة والتيتة مو خرج وقال معتصم تعبان
حكت غفران بصوت ليسمعها الكل : طنط شو رأيك روح معك انا
الكل بصدمة : انتيي
غفران ؛ اي انا اذا ماعندك مانع
بتول صفنت شوي بغفران وهية متأكدة انها مانها شخص سهل: ماما اي خدي غفران ، لا تشوفيها هيك بس بيطلع معها
الست ؛ اي لسانها بسبع شطلات بتقدر تسكت نرجس وتوقفها عند حدها
عبير : بدكن اياها تشرشحني يعني
غفران ؛ بوعدك ما احكي ، وهديك اذا شافت معك حدا ممكن تخجل على حالها
عامر : اي ماما انا بأيد الفكرة
بتول : وانا كمان
الست ؛ خديها بتلزم
عمر : خديها مو خسرانة شي
عبير : طيب افطري وجهزي حالك
غفران بحماس : اصلا مو جوعانة قايمة جهز حالي
~~~~~~``•
فتحت الباب مستعجلة واتفاجئت بمعتصم طالع من الحمام لافف منشفة على خصرو والتانية عم ينشف شعرو
خجلت ورجعت خطوتين لورا
معتصم : اسف اسف
اخد تيابو ودخل على الحمام
ضربت بايدها على راسها وحكت : مجنونة كيف دخلت هيك ،اووف
بس ضحكت بخبث وحكت : بس حلو الضرسان وعندو عضلات
كملت لعند الخزانة طلعت تياب الها وهو كان طالع من الحمام لابس بجامة مريحة
شاف التياب بأيدها: شو ع وين
غفران بحماس رايحة مع امك على المدرسة
معتصم : يعني انحلت المشكلة
غفران : بنقول ان شاء الله
هية دخلت على الحمام وهو كمل على التخت
~~~~~~~~~~•
نزلو قدام المدرسة وام معتصم كانت بكل كبريائها واناقتها وغفران جنبها كمان انيقة وحلوة
مشت ام معتصم وراسها مرفوع لفوق وغفران مشت جنبها عم تتلفت حواليها على الطلاب والصفوف
عبير : مابتفتحي تمك بحرف
غفران : اوك
وصلو ع مكتب الادارة دقو الباب واجاهن الاذن بالدخول
وبالفعل متل ماتخيلتها غفران للمديرة من عمر ام معتصم لابسة رسمي وشعرها مجموع لورا ولابسة نظارتا طبية
ام معتصم : مرحبا
المديرة بمكر : يا اهلا بعبير خانم تفضلو تفضلو
قعدو وغفران طلعت موبايلها وفتحت ع تسجيل الصوت وكبست على التشغيل
المديرة : شو تشربو
ام معتصم ؛ مو فاضية جاي اعرف شو السبب يلي استدعيتو ابني مشانو
المديرة : شي اكيد مانك فاضية بكون عندك نزلة على السوق او جمعة نسوان مافي منها اي فايدة
ام معتصم تلبكت وماعرفت شو ترد وغفران منصدمة فيها مو هي هية يلي بتردحلها بالبيت واكتشفت انها انسانة جبانة
ام معتصم : حياتي.. حياتي .. الخاصة مابتهمك ، بدي اعرف شو عامل ابني
المديرة ؛ لأ بتخصني لأنو انا وانت مربين اجيال وانا مافيني صلح اهمالك بتربية ابنائك يا مدام
عبير تلبكت وعرقت واتدخلت فورا غفران : لو سمحتي نحنا جايين لسبب واضح وصريح ونعرف شو عامل عامر ومابحقلك ابدا تتدخلي بالتربية ،وبعدين شو هو الشي يلي عاملو يلي بدل على عدم تربيتو
المديرة : معتدي على زملائو
غفران : والسبب ؟؟
المديرة : مافي سبب ولد بلا تربية
غفران : لا مافي شي بلا سبب ونحنا من حقنا نجمع الطرفين ونسمع منهم ونشوف الحق ع مين
المديرة تلبكت : انا هون يلي بسمع وبقرر
غفران ؛ طيب شو سمعتي من الطرف التاني وياترى استدعيتي ولي امرهن ولا لأ
المديرة : بدكن مني استدعيهن ،مايكتر خيرهن انو ما اشتكتوا على عامر
غفران : وليش ما اشكتوا مين مانعهن
المديرة واضح عليها التلبك : مابدهن يشتكوا ناس اكابر
غفران : بس نحنا مابنقبل انو ابنا يغلط وماياخد جزاتو ياريت تحكيهن وتستدعيهن نحنا حابين نعتذر منهن شخصيا على الشي يلي عملو عامر
المديرة : خلص بكرا بستدعيهن
غفران ؛ ليش مو اليوم ،ترى نحنا ماعنا شي يعني بنستنى
المديرة : لا تغيرو الموضوع وتقلبو القصة لصالحكن
غفران : ايو صالحنا عم نقلك بدنا نعتذر
المديرة ؛ انا بعتذر منهن ،المهم المشكلة هية عامر
غفران : شبو عامر
المديرة ؛ ولد مو مهذب ومتنمر وصاحب مشاكل ومانو مربى
غفران : وهاد الحكي بشهادة الكل ولا بس شهادتك
المديرة : مافهمت
غفران : قصدي المعلمين والتلاميذ زملائو
المديرة متلبكة : اكيد بشهادة الكل
غفران : طيب من حقنا نسمع شهادة الكل
المديرة : عم تكذبيني انت
خبطت غفران ايدها على الطاولة ووقفت وقالت : اي عم كذبك لأنو نحنا بنعرف كتتير مين عامر وبنعرفو تربايتو ومابعرف شو سبب اتهامك الو بأتهامات كاذبة ولا لأنو في مشاكل شخصية
وقفت المديرة وقالت : مشاكل شخصية اكيد لااا انت شو عم تخبصي
غفران : يلي اسمعتيه
المديرة ؛ بس مافيكن تنكرو انو عامل مشكلة وضارب تنين من زملائو
غفران ؛ ونحنا ماعم ننكر بس اكيد في سبب لحتى ضربن وقلتا لازم نسمع الطرفين
المديرة : انا مديرة هي المدرسة وبعرف الصح من الغلط مو تجي باسلوبك الهجومي تخوفيني
غفران : بالعكس ماعم خوفك ، بس متل ما استدعيتنا لنسمع شو عندك لازم تسمعي شو عنا ولا كان فيكي تكتبيهن برسالة وتبعتيهن
المديرة ؛ هي مدرسة محترمة وانا مابسمح يصير هيك شي عندي
غفران : ونحنا مارح نسمح انو ابنا ينظلم بس لأنك انت من وجهة نظرك شايفتيه غلطان وبعدين انت صرلك ساعة تقولي بلا تربية وبلا تهذيب وهاد يعتبر قدح وذم بحقو وحق اهلو يعني اذا رفعنا عليكي دعوة بتخسري شغلك وهي المدرسة يلي عم تتباهي فيها ،ولزيدك من الشعر بيت غير القدح والذم اذا طلع حكيك غلط صارت قضية تانية وهية تهم باطلة بحق طالب تحت السن القانوني ، وكمان بدنا نفتح تحقيق بخصوص المشكلة يلي صارت ونسمع اقوال كلشي كان شاهد عليها
المديرة بخوف واضح: انت شو عم تخبصي ، شو هي ساحة حرب لنفتح تحقيق
غفران ؛ والله انت يلي عاملتيها ساحة حرب مو نحنا طلعت غفران موبايلها وقالت كلشي تسجل هون يعني اذا رفعنا قضية لينخرب بيتك وبيت وبيتك
عبير مصعوقة وماعم تصدق يلي عم يصير ولا مصدقة انو هي غفران نفسها بس كانت حاسة بأنتصار وهية شايفة المديرة متلبكة وعم ترتجف من الخوف
المديرة : انتو شوبدكن
غفران : يرجع عامر على المدرسة معزز مكرم ويلي بقرب صوبو مايلوم الا حالو وتعتذري من عبير خانم
المديرة : مارح ترفعو دعوة علي
غفران لعبير : شو طنط ؟
وقفت عبير بشموخ وقالت : هالمرى سماح مشان تتعلمي كيف تحكي مع الاكبر منك
المديرة : انا اسفة عبير خانم
غفران : وتربايتها احسن تربية
المديرة بأزلال ؛ ومن بعدك محدا بيربي
غفران ؛ وعامر ؟
المديرة ؛ بعيوني يلي بحكيه بحكيني
عبير: انا وصلني حقي وحق ابني
غفران : تفضلي
طلعو وعبير غامرتها الفرحة وغفران فرحانة لأنو صار شي جديد بيومها
وصلو لعند السيارة وعبير وقفت قدام غفران بخجل
غفران : في شي طنط
عبير : شكرا
غفران : عفواً!!!!
عبير : عنجد مو عارفة كيف اتشكرك ،هالمخلوقة كانت عاملتلي رهاب
ابتسمت غفران : لاشكر على واجب ، بعدين انت اذا حدا بيزعجك بس اشري عليه وانا معك
فتحت عبير ايدها
وغفران مافهمت
عبير ؛ تعي
قربت غفران وعبير ضمتها
غفران تجمدت مكانها من اثر الصدمة ،من زمان محدا ضمها وبنفس الوقت متوقعة هي الضمة من الكل الا من عبير
بعدت عبير عنها وغفران شاردة لبعيد
عبير : خلينا نصير اصحاب حاج نقار ونقير
غفران انتبهت وحكت ؛ من كل قلبك
عبير : والله
مدت عبير ايدها وغفران صافحتها بحب شعور حلو اجتاحها ، هي كانت بحاجة اي حدا يكون بحياتها حتى لو عابر لأنو الوحدة يلي بحياتها عم تقتلها
~~~~~~~~~~•
وصل زياد على المطعم يلي مواعد سارة فيه وشافها على احدى الطاولات وتقدم لعندها
زياد : صباح الورد لأحلى وردة ابتسمت سارة بمجاملة وقالت : صباح النور
طلع من جيبتو وردة حمرا وقدملا اياها
زياد : وردة لاحلى وردة
سارة : شو حلوة ، ميرسي كتتير الك
زياد ؛العفو يا حلوة
اخدتها وشمتها وصارت تقلبها بايدها بأعجاب
زياد : عجبتك
سارة : كتتتير من زمان محدا هداني ورد
زياد : خلص تكرمي الك مني كل يوم احلى بوكيه ورد
سارة ؛ وردة متل هي بتكفي
زياد : تكرمي ، شو طلبتي فطور
سارة : ناطرتك
~~~~~~~~~~•
رجعت عبير على البيت وكأنها جاية من حرب ومنتصرة فيها
ولسا حماتها ومعتصم وعامر
عبير : كيفكن يا حلوين
الست :خير اللهم اجلعو خير شو يلي مفرحك يا كنتي
عبير : واخيرا يا مرت عمو مردغتلا مناخيرها لهل المتعجرفة ام اربع عيون
معتصم : غريب
عبير : هو مو انا بس انا هيك وصلني حق وهديك المغرورة بحياتها معد تقدر تطاول علي
عامر : كيف ، وشو صار
عبير : غفران تسلملي عينها جابتلي حقي
الست : انا قلت هالبنت لسانها طويل بلف البلد
عبير : بس بطريقة حضارية قانونية ، خرستها لنرجس معد عرفت شو ترد عليها
معتصم : غفراان ؟؟؟
عبير : اي والله وحتى خلتها تعتذر مني
معتصم : اي صح وينها
عبير : قال بدا تتمشى نزلتها بالطريق
عامر : يعني انا ارجع على المدرسة
عبير : اي ويلي بيطلع فيك تطليع عيونو لشيلها
ضحك معتصم وقال : انا صار لازم روح بالاذن
عبير : لا تتأخر حبيبي على العشا
معتصم : ماشي
طلع وهو مستغرب من يلي سمعتو وصل لباب سيارتو وحكي : اصلا مالازم استغرب بعد كلشي شفتو منها ، غريبة اطوار هالبنت هه
~~~~~~~~~~~•
ماشية وعم تتلفت حواليها بحذر وصلت لجنب سيارة فتحت الباب وركبت جنب كرسي السائق ويلي كان بالسيارة باسل
غفران : كيفك ابن عمتي
باسل : مشتقلك بنت خالي
غفران : باسل انا راسي رح ينفجر من التفكير
باسل : السبب
غفران : مين هاد يلي بدو ينتقم من بابا عن طريقي ، انا بدي اقضي حياتي هيك انا ببلد وبابا ببلد لك حتى الشغل محرومة منو
باسل : معك حق مو عيشة
غفران : مو انت ضابط حققلي بالموضوع
باسل : الموضوع مو سهل
غفران : شو ماكان لازم نحط حد لهل القصة بدي اعرف عيش حياة طبيعية ، انا بدي بابا يكون جنبي معد اتحمل هيك انا من حقي عيش معو، بكفي حرمان
باسل : لكن انا رح جيب اسماء اعداء خالي بالماضي كلها ونبحث عن كل واحد وعن حياتو
غفران : تمام ، اصلا بابا كمان لازم يجي كرمال الشركات والشغل انا ماعم اقدر ديرها من على اللابتوب في شي غلط عم يصير
باسل ؛ غلط شو
غفران : الشغل تمام بس الربح كتتير قليل
باسل ؛ عم تنسرقو يعني
غفران : شي اكيد المال الداشر بعلم الناس الحرام
باسل ؛ مين المدير التنفيذي بالشركة
غفران : اخوها لمرت بابا لاتقرف
باسل : معقول يكون الو يد بالسرقة
غفران : مابظن ، اختو مسيطرة على كلشي مافي داعي يسرق بيطلب طلب
باسل : هههه بهي معك حق ، شو اخبارك بهداك البيت
غفران : هلأ علاقتي صارت منيحة مع بتول وعامر وام معتصم
باسل : معتصم شو وضعو
غفران : لوح البوظ
باسل : هههههه شبو
غفران : عم يبكي على اطلال سارة خانم
باسل : كأنو شامم ريحة غيرة
غفران : لا ابدا اصلا انا عم اتسلى مو اكتر
باسل ؛ ومن هون لهون
غفران : مافي شي صدقني
~~~~~~~~~•
المسا
قاعدة بغرفتها وعم تدهن وجها بلون ابيض ورسمت تمها على شكل قلب صغير وفاردة شعرها ومنزلتو على اكتافها ولما وقفت بين الزي يلي لابستو وكان زي صيني
ضحكت وقالت : نيها مؤتصم
دق الباب دقتين وفتح الباب واتفاجئ فيها
قربت ايدها من بعضن 🙏 وانحنت وقالت : نيها
اجتو الضحكة وقال : شو عاملة بحالك يا مجنونة
حكت كم كلمة صيني
معتصم : الترجمة لو سمحتي
غفران : عم قول واخيرا شفت هالضحكة
معتصم : هلق هيك بتنقال بالصيني
غفران : اذا مو مصدق ترجم
معتصم : لا خلص مصدق
فردت ايدها وبرمت قدامو وقالت : حلو
معتصم : بتزعلي من الحقيقة
غفران : لا احكي
معتصم : لا مو حلو
غفران ؛ ماعجبك
رفع بحواجبو
غفران : يلا المهم عم حاول لاتقول ماحاولتي
معتصم : لا مارح قول ،يلا روحي بدلي وتعي ننزل تنعشى مع العيلة
غفران : مو جاي عبالي
معتصم : اسمعي مني وتعي ننزل دوبهن حابينك
غفران : استغل الفرصة يعني
معتصم ؛ ههه اي
غفران : طيب انزل هيك
معتصم : اذا حابة تصيري مسخرة انزلي
غفران : لا رح بدل خمس دقايق ، بس سؤال
معتصم : تفضلي
غفران : شو سبب هالابتسامة
معتصم : فيكي تقولي اقدرت انقذ مريض على اخر لحظة بفضل رب العالمين طبعاً
غفران : بصراحة خبر حلو وبعدل المزاج ، روح يا معتصم الله يقدرك وتقدر تنقذ كل المرضى يلي بتجي لعندك وتفرح اهلن ويفرح قلبك
معتصم : ههههه آمين
غفران : ياربي عم يضحك اكيد في شي
~~~~~~~~~~•
نزلو على سفرة العشا والجو كان رايق
وغفران مو مصدقة انو معتصم عم يضحك وكل شوي تتأملو كيف مبستم عم يتشارك مع العيلة الحديث
عامر انتهى من اكل وقال : انا رايح اسهر عند رفقاتي
امو : بهل الوقت
عامر : شوفيها
معتصم ؛ دراستك
عامر : ماعندي شي
معتصم : حضر لشي جديد
عامر : بكرا, اليوم بدنا نتفرج ع مبارة ، سلام
عبير : خايفة يكبر راسو اكتر من هيك ،وخصوص بعد ماعرف شو صار بالمدرسة اليوم
معتصم : ماكان لازم تحكي قدامو
عبير : غفران تحكي معو انت؟ ، هو يكون قد حالو ما اختلفنا بس مايصير مو سائل على حدا ولا يهمل دراستو
غفران : خلص اتركي الموضوع علي
التفت عليها معتصم وقال : ماعم اعرفك صايرة مهمة
غفران : مشان تعرف ، انا لما بحكي شي بنفذو قلتلك رح اتغير يعني رح اتغير
معتصم : برافو عليكي
غفران : هههههه طيب بالنسبة للتغيير معك
معتصم ضحك وقال : خليكي عم تحاولي
غفران بقلبها : هاد ليش هيك تحول وصاير شخص بجنن ياربي تصبرني
رن موبايلها بمسج
قرأتو واستأذنت وطلعت على الحديقة لتحكي لتضمن انو محدا عم يسمعها
كبست ع الاتصال وقربت الموبايل من ادنها
غفران : كيفك بابا
اشرف ؛ اهلين يا عمري طمنيني عنك
غفران : كيف بدي كون وانت بعيد عني
اشرف : مشان مصلحتك ياعمري
غفران : بس انت لازم ترجع
اشرف : صاير شي
غفران : اوضاع الشركة مابتطمن ولازم تنزل
اشرف : وانت
غفران : انا بمكان آمن لاتخاف علي اذا انا المستهدفة مو انت و مابدهن منك شي، لازم ترجع وتدير شغلك
اشرف ؛ طيب رح رتب اموري وانزل
غفران ؛ تمام ،كيفها خالتي
اشرف : هية جنبي بدا تسلم عليكي
غفران ؛ والله ، عطيني اياها
الخالة فادية ؛ كيفك حبيبتي
غفران : اهلا طنط طمنيني عنك
فادية ؛ كتتير مشتاقتلك وعم نق على اشرف انو ننزل وهو مو راضي
غفران : لازم تقنعيه الوضع مابينحل بالهروب
فادية ؛ معك حق خلص اتركي هالامر الي لكن
غفران : اوك
فادية : انت منيحة
غفران : الحمد لله
~~~~~~~~~~~•
عيون معتصم عليها ومستغرب انو مع مين تكون عم تحكي وهية مقطوعة من شجرة بس يمكن مع خالتها
حكت عبير لينتبه عليها : معتصم
معتصم : اي ماما
عبير بخجل : انا وقفت بطاقة البنك تبعتك
معتصم : ليه
عبير : خفت من غفران تسرقك
معتصم : ماما انت ليش بتتصرفي من راسك
عبير : طيب والله خفت
معتصم : ماحلو هالتصرف ابدا وتصرف وتسرق بالنهاية هية مرتي
عبير : خلص فهمت غلطي عم حكيك مشان ترجع تفعلها
معتصم : ماشي
بتول : اصلا هية ما استخدمتها لتعرف اذا واقفة او شغالة
عبير : شو عرفك
بتول ؛ دخلت مرتين تلاتة لعندها ع الغرفة والبطاقة بالدرج جنب التخت ماتحركت
معتصم ؛ وانت شو دخلك على غرفتنا
بتول : عم اخد شاحن الموبايل شاحني مضروب
شرد معتصم انو فعلا من وين عم تصرف ،معقول عم تاخد من خالتها ، بس مابصير ،ماعم افهمك ياغفران ولا عم افهم طريقة تفكيرك
عبير : شو وين شردت
معتصم : بولا مكان بس اثبتتلنا انو مابعينها المصاري ولا داخلة على طمع
حكي ابوه بعد ماكان هادي طول القعدة وقال : شو ماكانت لازم تخلص هالشغلة على بكير
معتصم بلبكة : اكيد بابا ،شهر بالكتير
ابوه : لازم نرجع العلاقة بينا وبين عمك خالد ،عمك ساكت وسكوتو عم يخوفني
معتصم :ماشي بابا
وقف وقال : دايمة
راح ابوه والكل التفت ع غفران يلي بعدها عم تحكي على الموبايل
بتول : رح افقدلها لما تتركنا هالبنت كتير منيحة
عبير : الله يبعتلها ايام حلوة بتستاهل كل خير
معتصم شارد فيها وعم يسمع حكيهن وحاسس بغصة اتجاها
حكت الست : لا تبالغو انتو كمان ماحلكن تحبوها
عبير : الشغلة مو بالوقت ، الشغلة بالمواقف
بتول : معك حق (وبقلبها : خلصتني من اكبر كابوس كان بحياتي صابر الكلب ،حتى لو ميت مارح اشفق عليك الله لايردك )
~~~~~~~
عم تمرق الايام وخلال هالايام غفران قدرت تتقرب من عامر وراحت هية واياه ع صالة الالعاب الرياضية وصارت تعلمو على التصويب واستخدام المسدس بصالة خاصة لتعليم التصويب ،وهو كان كتير مبسوط بهل الشي بس بالمقابل اقنعتو يهتم بدورسو واقنعتو يدخل كلية حربية وهو تحمس كتير ورجع يهتم بدراستو
اما بالنسبة لعلاقتها هية ومعتصم كانت علاقة هادية مهضومة بنفس الوقت كانت كل يوم تعملو لوك جديد ومختلف ، مرة كلاسيكي ، ومرة مغربي ، ومرة متل الهنود الحمر وهو كان يشوفها ويفرط ضحك و وتسألو اذا عجبو ويقلا لأ حاولي مرة اخرى
وكمان عم تلتقي بباسل كل يوم لتعرف وتبحث عن الشخص يلي عم يهدد ابوها وكل يوم يشطبو على صورة حدا ويطالعوه من دائرة الشكوك
ولسارة وزياد زياد كان عم يهتم فيها ويقدملا كل الحب يلي بقلبو وكأنو عم يعيش اخر ايامو ، وماعم يحرم حالو من ولا لحظة انو يقابلها او يحكي معها ويسمع صوتها او يراسلها
~~~~~~~~~~~~~•
وصل معتصم على البيت والابتسامة على وجهو وهو عم يتحزر شو ممكن تكون عاملة غفران
وصل ع الصالة وكانت العيلة كلها مجتمعة
امو : اهلين حبيبي تعال اشرب شاي كتير طيب
معتصم بتهرب : بس لغسل وبنزل
امو ؛ كاسة شاي ع الماشي
معتصم : طيب
قعد وعينو على الدرج سكبتلو امو فنجان شاي وحاول يشربو على عجلة وحرق تمو
امو : شو صاير عليك
معتصم : هو سخن
امو ؛ اي سخن لكن بدو يكون بارد
ابوه ؛ وانت شوي شوي هيك بيشربو الشاي
معتصم : شردت شوي
الست : تتهنى يلي شاغلة بالك
معتصم ؛ مافي هيك شي ابدا
الست : كيف مافي هيك شي وسارة وين راحت
اتلاشت الابتسامة عن وجهو وكان نسيانها تماماً ومارد
ابوه : شو صار معك
معتصم : الشهر ما خلص وخالتها مارجعت ، ومافيني خليها لحالها لبين ماترجع خالتها
ابوه : نسينا انك ابو قلبك حنون
الست : ابني ليكون صار بينك وبينها شي اصحك ها تقوم تعلقك بشي ولد
معتصم : ستي شو هالحكي ، وحتى لو صار هي مرتي
ابوه : حكي ستك صح ، مافي مانع يكون بينك وبينها شي بس اعمل احتياطاتك مايصير حمل
معتصم : من وين عم تجيبو هالحكي انتو
عبير بانزعاج على معتصم : ابنك كبير وبيعرف شو يعمل وبلا هالحكي كلو
عمر : لتكون عاحبتك البنت
عبير : ليه شبها البنت
الست : سبحان الله بس تحب حدا كنتي
عبير : اي حبيتها، البنت مافي منها ،ع القليلة احسن من بنت اخوك قليل شو عملت بمعتصم ماهنتو يوم ع يوم زعلانة ويوم رضيانة
الست : هي الامور خلصنا منها والبنت تعلمت درس
ابوه ؛ امي معها حق ، وبعدين حتى لو هالبنت منيحة مابتناسبنا
معتصم : انتو موجعين راسكن بأمور مافي منها ابداً ، تصبحو على خير
تركهن وقام صح انزعج من الحديث بس طرد هالافكار من راسو ورجع ابتسم ومو مصدق ايمت يوصل على الغرفة ويعرف غفران شو محضرتلو اليوم وكل ماعم يقرب خطوة قلبو يدق بسرعة
دق الباب دقتين وفتح
كالعادة الاضاءة خفيفة مع شوية ضو احمر عزوايا الغرفة كانت عاطييتو ضهرها ولابسة عباية سودة وشعرها نازل فوق العباية لساتو عم يتحزر
طالت وقفتها وهو طال انتظارو
معتصم : وبعدين
غفران ؛ متحمس ؟؟
معتصم : بصراحة اي ،فضولي رح يقتلني
غفران : طيب شغل الضو من عندك
شغل الضو والتفتت عليه والعباية نزلت على كتافها لتبان ببدلة رقص شرقية
هو انسحر وانصدم بنفس الوقت كانت مختلفة عن كل المرات السابقة
غفران : جربت الغربي والشمالي والجنوبي بس قلت مافي بعد الشرقي شو رأيك
مارد بس شارد فيها
قربت من اللابتوب وشغلت غنية يابنت السلطان
وبلشت تتمايل بحركة عفوية ومو احترافية
غفران : لاتدقق على الرقص مابعرف زيادة
كتف اديه وهو عم يضحك وقال لا تابعي تابعي حلو
رقصت شوي وقربت وقفت الغنية
غفران : حلو ؟ ولا حاول مرة اخرى
ضحك وقال : يعني هيك وهيك
غغران :انت ماعم يعجبك العجب خلص انا بطلت حاول
معتصم : هو بدك للصراحة الشرقي احلى شي قدمتيه لحد الآن ، بس بدك تشتغلي على الموضوع
غفران : والله ؟؟
معتصم ؛ والله
غفران : بنفكر بالموضوع ،
ومشت اتجاه الحمام
معتصم : ع وين
غفران ؛ خلص عرض اليوم رايحة بدل
معتصم : برأيي مافي داعي طالعة كتير حلوة
غغران : عنجد انك رجل شرقي
معتصم ؛ بدك اياني انكر اصلي
غفران : لا بس لأنك دكتور قلت بتكون منفتح شوي ومابتحب هالامور
معتصم ؛ هو انا هي الامور بالفعل مابتعنيني بس معك كلشي غير
خجلت ولفت لتمشي بس هو وقفها بمسكة ايدها ورجعها لعندو والتقت عيونو بعيونها
لحظة ضعف ،لحظة ارداة القلب ، وهو كتير عاجبو الوضع وماحابب ينسحب و بالعكس كأنو مغناطيس عم يقربو منها اكتر ويلي عم يزيد هالاقتراب ريحة عطرها النادرة ، صراع بين بعد وبين قرب وعم يشجعو كلام ابوه مافي مانع يصير بينك وبينها شي ، مزالها مرتي
وهية مو احسن منو ،كانت محرومة من كلشي حب بالحياة وعم تتعلق بخيوط الحب الرقيقة عم تتعلق باللمسة بالنظرة بالضحكة
كان على وشك يلمس شفافها بس فاقت على حالها بأخر لحظة واتراجعت لورا
غفران : ماكان لازم البس هيك شي بعتذر
انسحبت على الحمام وهو كمان راجع حالو وحس انو كان رح يوقع بالغلط
وقفت على المراية ولونها مخطوف وصدرها عم يعلا ويهبط من التوتر حكت : جناني وهبلي رح يجيبو اخرتي
~~~~~~~~~~~•
غرفة معتمة وفجأة طلع فيها ضو خفيف وهو ضو الموبايل يلي على الطاولة عم ينبه بوصول مسج
اشتغل الضو وكان اشرف ابوها لغفران اتجلس من فراشو وتناول موبايلو
وفتح الرسالة وكان محتواها : لأيمت بدك تضل هربان برا البلد مصيرك ترجع
اشرف : ميين انت يا كللب
حست مرتو فادية واتجلست وقالت : شو القصة حبيبي
اشرف : تفضلي
عطاها الموبايل وقرت الرسالة
فادية : رسالة تهديد تانية ،يعني مو بس قاصدين غفران وانت كمان
اشرف : هيك الظاهر
فادية ؛ شو بدك تعمل هلأ
اشرف : رح الغي النزلة ولازم غفران تترك البلد فورا
فادية : وبرأيي نحنا لازم نغير مكانا نسافر عشي دولة تانية
اشرف : انت ارجعي نامي لفكر كيف نطلع من هالمصيبة
فادية : كيف بدك اياني ارجع نام بعد هالخبرية، لازم نفكر انا وانت
اشرف : اووف اووف
فادية : روق ان شاء الله بتنحل ، وانا قايمة اعمل فنجان قهوة تروق دمك
~~~~~~~~~~~•
نايمة غفران على الكنبة ومعتصم عم يتقلب بفرشتو مو جايه نوم .. اتجلس وقعد على حرف التخت وانتبه عليها كيف نايمة بعمق
قرب لعندها ونزل لمستوها بعدلها خصل شعرها عن وجها وكان مبتسم تلقائياً
لمست ايدو خدها بدون قصد ، سحبها بسرعة بس هية نايمة بعمق وماحاسة على اي شي ، لما شافها هيك تشجع ومد ايدو برقة ومررها على خدها عم يتحسس النعومة والطراوة
تحركت وقلبت ع تاني جهة وهو بعد فورا مشان ماتحس عليه وصار يعاتب حالو : شوعم تعمل يا معتصم شو جنيت
~~~~~~~~~~~•
تاني يوم
واقفة على البلكون وفاتحة مكالمة جماعية
مع باسل ومع ابوها
غفران: شو يعني بابا
اشرف : رح اجل نزلتي حاليا
غفران ؛ باباب بترجاك الهروب مو حل لازم تجي ونعرف مين يلي معيشنا على اعصابنا
اشرف ؛ بدك اياني اجي يعني مو خايفة علي
غفران : مبلى خايفة وكتير حتى انا خايفة على حياتي وعايشة بمكان غصب عني بس اذا بدنا نضل هيك لا الموت ارحم
باسل : غفران روقي ولاتنفعلي
غفران : لك عم عد الدقايق ليجي بابا وهلق بقلي انو مارح يجي ،انا والله تعبت
اشرف : خلص يا عمري رح انزل بأقرب وقت
باسل : خال ولاتخاف رح نحاول نأمنلك الحماية
اشرف : ماشي ، اي غفران كان في موضوع بدي احكي معك فيه
غفران : اي بابا
اشرف : صديقي فرات بتعرفيه
غفران : الوزير ؟
اشرف : اي عزمني على عرس ابنو وبدي تاخدي هدية معتبرة وتروحي على العرس وتعتذري بالنيابة عني
غفران : ومافيها خطورة الروحة على الحفلة
اشرف :لا لأنو علاقتي مع فرات محدا بيعرفها وكمان العرس رح يكون تحت حراسة مشددة ومحدا بفوت ع العرس الا الأسماء يلي عندهم واسمك موجود بقائمة المعازيم
غفران : بشوف
اشرف : لا ضروري تروحي
غفران : ليش كمان
اشرف ؛ قلتلك صديقي المقرب وكمان بتغيري جو
غفران : معك حق
اشرف : بتوصيني بشي قبل ماسكر
غفران ؛ سلامتك ياعمري سلم ع طنط
اشرف الله يسلمك
~~~~~~~~~~•
سكر المكالمة بدخلة فادية لعندو
فادية ؛ مع مين كنت عم تحكي حبيبي
اشرف : مع غفران
فادية : وخبرتها بموضوع الرسالة
اشرف ؛ اي
فادية : عرس شو كنت عم تحكي عنو
اشرف : صديقي فرات بتعرفيه
فادية : اي بدو يجوز حدا من ولادو يعني
اشرف : اي ابنو الصغير وعزمني بدي ابعت غفران على العرس بدالي
فادية ؛ مافي خطورة عليها
اشرف : ان شاء الله لا
فادية : وهية قبلت تروح
اشرف : اقنعتها ، لازم تروح
فادية : ليش هالاصرار
اشرف : فرات طلب غفران لأبنو الكبير ،وانا قلتلو انو القرار الها وقلتلو لازم يقعدو يتعرفو على بعض ، قلي لكن بالعرس بنخليهن يقعدو مع بعض ويتعرفو عبعض بدون مايحسو انو اللقاء مدبر
فادية ؛ والله فكرة حلوة ،
اشرف : بدي افرح فيها وشوف ولادها
فادية ؛ الله كريم ، الغدا جاهز
اشرف : يلا
~~~~~~~~~~~~•
ماشي بكريدور المشفى وايديه بجياب المريول الابيض يلي لابسو لينضم لمشيتو رأفت
رأفت : كيفك يا صاحبي
معتصم : رواق
رأفت ؛ اي تمام ،المهم اليوم لا تتأخر
معتصم : على شو
رأفت ؛ شبك يارجل عرس اختي
وقف والتفت عليه وقال ؛ يعني تحدد العرس
رأفت : واخيراً ، فقعو قلبنا يازلمة ، اي شو هالعرس هاد يلي بدنا نعمل فيش لكل المعازيم
معتصم : كمان ابن وزير
رأفت : ملا وقعة
معتصم : ليش ولو الشب مو منيح
رأفت : اي منيح وبحبها وهاد الشي يلي مخلينا نكمل، والا لو الامر الي من زمان لفركش هالقصة
معتصم : هات احكيلي شو القصة
رأفت : كتتير متكبرين ومغرورين ،وكلو على كيفن عملوه ونحنا بس عم نفذ طلباتن ، اسماء المعازيم من شهر اخدوها ليشوفو بتتطابق مع رقيهن وكمان اذا عليه شي قضية
معتصم : يعني يلي بدو يجي على العرس بدو يكون معو لاحكم عليه
رأفت : اتركها على الله الوضع عنا بالبيت متوتر
معتصم : اي صح فيني جيي غفران معي
رأفت : ااه ، بصراحة لا لأنو من شهر اخدو الاسماء ومرتك مو من القائمة
معتصم : بس جاي معي وانا جوزها
رأفت : والله مو عارف شو قلك بس اذا اسماء الولاد اخدوها
معتصم : يلا مو مشكلة
رأفت : يعني مارح تجي
معتصم : بصير ما اجي ،رح اجي كرمالك بس
رأفت : تسلملي يا صاحبي
صوت مكبرات الصوت : دكتور معتصم الرجاء التوجه فوراً الى غرفة العمليات
معتصم تحرك بسرعة وقال : المسا بشوفك
~~~~~~~~~~~•
وصلت على الصالون وكانت بتول قاعدة جنب امها وعم تقلا شو رأيك بالفستان الاحمر ولا الموف
عبير : لا الموج احلى واروق
غفران : صباحو
بتول : هلا غفران شو رأيك انت البس فستان احمر ولا موف
غفران : مو لشوفهن بالاول
بتول : هلأ بفرجيكي اياهن بس انت شو رأيك بالالوان
غفران : اذا ماشفت مابقدر اعطيكي رأيي
قامت بتول وقالت : رايحة جيبن
غفران : شو القصة
عبير : معزومين على عرس
غفران بشك : عرس مين
عبير : بنت من معارفنا واخوها للعروس صديقو لمعتصم ودكتور عنا بالمشفى
غفران : ولمين بدها تتزوج
عبير : لأبن وزير الانشاءات
غفران بقلبها : ع نفس العرس
اجت بتول وقالت : هدول هنن ايو احلى
غفران : الموف
عبير : وانا قلتلا هيك
بتول : الموف الموف ، اي صح ماما غفران بدا تروح معنا
عبير : مابعرف ، تروحي ؟
غفران : مابعرف ، هية العزيمة الكن
عبير : اي عادي بتروحي معنا
غفران ؛ وبركي حدا سأل مين هي وانا محدا بيعرفني
عبير ؛ بقول انك بنت اختي ، شو قلتي
بتول : اي اي غفران تعي بنتسلى
غفران ؛ طيب ماشي بروح
بتول : يس والله لنكيف ،خصوصا عم يقولو انو رح يكون عرس اسطوري تخيلي من شهرين عم يجهزولو
غفران : والله
~~~~~~~~~~~~•
ركن سيارتو عباب الفيلا وموبايلو رن بأسم امو سكر بوجها وحكي جيت جيت
فتح الباب وطلعت امو بوجهو كانت عاخر شياكة
عبير : وينك انت
معتصم : جيت ليكني
عبير : بسرعة اطلع بدل تيابك ونحنا ناطرينك
معتصم : اوك خمس دقايق ،بس مين رايح
عبير : الكل ما عدا ستك
معتصم : ماشي
طلع لفوق مستعجل وفتح الباب واتفاجئ بغفران لابسة فستان اسود طويل مع فتحة على الرجل وفيه اجحار ناعمة عم تبرق
ورافعة شعرها شوي ولابسة طقم الماس
ضل شوي صافن فيها وبجمالها واناقتها
غفران : اهلين حبيبي ،حلو؟
معتصم بهمس : بطير العقل
غفران : شو قلت
معتصم : اي حلو بس ع وين
غفران : معكن على العرس
معتصم : مين قلك على العرس
غفران : امك وقالتلي اذا حابة روح وبصراحة انا حابة كتتير
معتصم بحيرة : بس مابقدر اخدك
تخنصرت وقالت : ليش بالله
معتصم : اسمك مانو مع المعازيم
غفران : اي انت مالك اسم
معتصم : اي
غفران : وانا رايحة معك ولا مابصير الواحد ياخد مرتو
معتصم : مبلى بس كان لازم ابعت اسمك
غفران : وليش مابعتت اسمي
معتصم ؛ اخدو الاسماء قبل ماتدخلي على حياتي
غفران : والحل ؟
معتصم : للأسف مارح تقدري تروحي
غفران : انتوا روحوا تنبسطوا وانا عمري ما اطلع
معتصم : والله مو هيك ،وانا اصلا مو كتير حابب هالروحة بس لانو اخو العروس رفيقي واذا مارحت رح يزعل
غفران : يعني انا معلش ازعل بس رفيقك مابصير
معتصم ؛ ليكي بروح بأثبت وجودي وبجي بنطلع انا واياكي شي مشوار شو رأيك
غفران : مابدي بدي روح ع العرس
معتصم ؛ والله مارح يسمحولك تدخلي
غفران ؛ مابتمون على رفيقك يدخلني
معتصم : رفيقي ياريت يمون على حالو
قعدت وكتفت ايدها متل الولاد الصغار وتظاهرت الزعل
ضحك على حركاتها وقال : وعد مارح طول
غفران : خلص انسى روح وانبسط
معتصم : بدي انبسط وانت زعلانة
غفران : لو بهمك زعلي كنت اخدتني او ضليت
معتصم : طيب عيري نص ساعة وبرجع شو رأيك
غفران : لا بدي روح يعني بدي روح
معتصم ؛ والله مارح يدخلوكي ليش ماعم تفهمي
غفران ؛ هيك الله خالقني مابفهم
معتصم ؛ طيب بوصل اهلي وبسلم عرفيقي من الباب وبرجع
كتفت اديها بعناد وقالت : هئ بدي روووح
معتصم ؛الله يطولك ياروح
غفران ؛ اذا مابدك تاخدني تسطفل انا بروح لحالي
معتصم : اي بكون احسن روحي الله معك خليهن يقلعوكي من الباب بس من هلق انا مادخلني وبتعملي حالك لابعرفك ولابتعرفيني
غفران : عند كلامك
معتصم : اي عند كلامي ونص وكمان رح احضر الخفلة كلها وبطلت ارجع ارجعي لحالك متل مابدك تروحي لحالك
غفران ؛ مفكرني مابقدر روح
معتصم : ماني مفكر شي بدك تروحي ليكي الباب بفوت جمل انا لا باخدك ولا بجيبك من هلق عم قلك
غفران : وانا موافقة
تركها وراح لعند الخزانة طلع طقم الو ودخل على الحمام يبدل تيابو
~~~~~•
طلع من الحمام مالقاها حرك راسو بقهر وراح لقدام المراية ظبط شعرو وبخ برفان ولبس ساعتو ونزل لعند اهلو
كانو الكل ناطرين ابوه لابس طقم وامو جنبو لابسة فستان مناسب لعمرها وعامر لابس بنطلون جينز وفوقو جاكيت وبتول الفستان الموف كانت طالعة حلوة وكيوت
امو : جاهز ؟
معتصم : اي
بتول : وينها غفران
معتصم ؛ مانزلت ؟
بتول : ماشفنا حدا ،
عبير : بدا تروح
معتصم : لا مارح يسمحولا تفوت اسمها مانو من قائمة المعازيم
عبير ؛ بس هية رايحة معنا
معتصم : مارح يسمحولا ،هاد عرس ابن وزير وكلشي فايت على الصالة مضروب اسمو ع الفيش وجاية الموفقة ليحضر العرس
عامر : اف لهل الدرجة
معتصم : لهل الدرجة واكتر
عمر ؛ نمشي
التفت معتصم حواليه عم يدور عليها بعيونو وقال بقلبو: وين راحت هي المجنون ة ، اوقات عقلها بيشتغل عن الكل واوقات بتفصل على الاخير ، بتكون حردانة هون او هون اكيد مارح تروح اصلا مابتعرف العنوان ،
عبير : وين صرت
معتصم : اي معكن مين جاي معي
بتول : انا وعامر
معتصم : تفضلو
~~~~~~~~~~•
وصلو عباب الصالة وكأنو داخلين ع وزارة الداخلية والحرس اكتر من المعازيم يعني مستحيل تدخل نملة
كان في تفتيش واخدو الهويات لسموحلن يدخلو
معتصم ؛ تضرب يا رأفت انت وهالعرس
بتول : العما ولو شو داخلين ع شي مقر
عامر : هههه يلله مشان الاكشن
بتول : نيالك
دخلو وسلمو ع اهل رأفت بالخطوة التانية وقدمولن بوكيه الورد يلي حاملتو بتول ، اهلو اخدو طاولة الهن ومعتصم كمل لعند رأفت يلي كان ماخد طاولة وقاعد مع رفقاتو
سلم معتصم على الجميع وقعد مبين عليه مقهور
رأفت : هلا والله شريك
معتصم : اهلين
رأفت : شبك
معتصم : والله لو مامعزتك عندي مابخطي ، شو هاد يازلمة تفتيش وتفييش شو عوين داخلين
رأفت : بشرفك مرقها لأنو اهلي ناطرين ع نكشة
معتصم : معهن حق واذا وزير يذلو العالم
رأفت : مو لهل الدرجة انت التاني
معتصم : خلص انسى ، شو الوضع
رأفت : متوتر امي مو عاحبها كل هالوضع بس عم تساير ماحلوة وصلنا لهون
معتصم : معك حق يلله ليلة وبتمرق
رأفت ليك هنيك اهل العريس
اتطلع معتصم وشاف عيلة من اب وام وشبين معهن مبين عليهن الكريزما والوقار
والحرس حواليهن
معتصم : وليش اخدين زاوية لحالن
رأفت : مابعرف حتى ما رضو يستقبلو المعازيم ولا اختلطو بحدا
معتصم : احسن
حكي رفيق الهن معن عنفس الطاولة ؛ شو يادكاترة غلبتو النسوان بالسوالف
رأفت : مو لهل الدرجة انت التاني
انتبه معتصم على الباب ودخلت عيلة عمو خالد ووراهن زياد وابوه وامو
معتصم ؛ شو عشان
رأفت ؛ شوفي
معتصم ؛ عمي خالد فهمنا بس زياد شو جابو
رأفت : ابوه رفيق بابا
معتصم : ايه
اخدو طاولة على جنب واشتركوها مع بعض وزياد وسارة اجت كراسيهن جنب بعض وهالشي حلى معتصم ينقهر بزيادة
نفخ وصار يهز رجلو بتوتر ومو عاجبو شي
~~~~~~~~~~•
وصلت غفران على الباب
الحارس : الاسم لو سمحتي
غفران : غفران اشرف عطالله
الحارس : الهوية لو سمحتي
عطتو الهوية
الحارس : تفضلي انسة غفران انت من القائمة المفضلة
غفران : ميرسي
دخلت بكل كبرياء وحارس دخل معها
الحارس : طاولة فرات بيك هينك
غفران : ميرسي الك فيك ترجع لشغلك
ضلت واقفة مكانها وعم تدور على معتصم لحتى لمحتو وشافتو عم يراقب سارة وزياد
تبدلت ملامحها لحزن وتوجهت على الطاولة المطلوبة
غفران : عمو فرات
التفت عليها وقال : غفران بنتي يا اهلا وسهلا نورتي
قربت منو وهو ضمها وباسها من راسها
وزوجة فرات كانت واقفة وراه وكمان رحبت فيها بنفس الطريقة والشبين صافحتهم مصافحة وقعدت معن
~~~~~~~~~~~•
حكي شب من على طاولة معتصم
والله في بنات حلوين وخصوصا ضيوف سيادة الوزير
رأفت : كمان وزير ، اكيد لازم يكونو ضيوفو حلوين
حكي شب تاني : خصوصا البنت ام الفستان الاسود ياويلي شو هاد
-وينها
-هي يلي قعدت معن عنفس الطاولة
-بتكون بنتو ؟
رأفت : ماعندن بنات عحد علمي
التفت وشاف بس ضهرها ومعتصم مانو بهل العالم نهائياً
بس ياترى معتصم عشو مقهور على غفران ولا على سارة