رواية الخزلان
الفصل السادس6
بقلم نوسه حمد
مرت الايام وانا بتكلم مع عثمان بس حسيت نفسي في مصيبه قربت منو عشان انتقم من محمد بس لقيت نفسي اتعلقت بيهو شديد وحبيتو م كنت مفتكره اني ح احب راجل بعد محمد ورفضت اني اتزوج ولد غيرو واظلمو معاي عشان انا لسه كنت بحب محمد وم اتوقعت اني احب ابوهو كان قصدي الانتقام واتندمت اني م اديت نفسي فرصه وانسا محمد بدل الانتقام بالطريقه دي وشكلي كده انا بنتقم من نفسي فكرت اني اصارحو بس اصارحو كيف بعد م كنت في نظرو نوسه بت الناس المحترمه المؤدبه امش افضح نفسي واقول انا بلعب بالرجال. لانو العملتو الشيطان م فكر فيهو بس كل الحصل كان اندافع لي الخزلان الحصل لي وم عندي صديقه ولا اخت احكي ليها وف نفس الوقت م دايره اظلم الراجل دا معاي بقيت محتاره وعلما بي انو ابوي شبه وافق عليهو وشكلو سال منو وجا كرر لي انتي الراجل دا مقتنعه بيهو م قدرت ارد قال لي ي بت فشنو انتي موش كنتي موافقه سكت وم رديت قال لي انتي شكلك م ح تعرسي عمرك قرب التلاتين وكل راجل اجيك ترفضي انتي ي بت معرسك شيطان ولا شنو دموعي جرت وابوي بقا اكورك فيني وحسيت انو انا م طبيعيه وبدون مقدمات دخلت في حاله اكتئاب م يعلم بيها الا ربنا لا بمش المدرسه لا بشيل تلفوني ولا بتكلم مع ناس البيت امي وابوي بقو محتارين وغالبهم البعملو وابوي بقا مهموم بقا اقول لي امي بتك دي شكلها معرسا شيطان ولازم نوديها لي شيخ والشيخ غير اضربني م بفيدني بي شي قلت ليهو بصوت واطي ومبحوح يابا انا كويسه والله ماف شيطان معرسني بس خلوني امي طبعا عارفه الحاصل علي قالت لي ابوي البت دي شكلها م ح تتزوج والراجل دا لو جاك انا موافقه قال ليها هو وينو الراجل نمش نشحدو يعني م جا طقا الباب بتناقشو كده باب الحوش بقا يضرب وشكلو جايننا ضيوف امي قالت لي ابوي م تدخلهم هنا ع البت دي نقول ليهم مالا بس شكلهم الضيوف جايني انا ابوي فضلهم كل الاستاذات المدرسه ومن ضمنهم استاذ عثمان انا م كان فيني حيل اقوم وكنت مبهدله حتي شعري م مسرحاهو وكان مفكوك امي جات سندتني ولبستني الطرحه والاستاذات لمن دموعهن جرن وانا بس بعاين بعيوني حسيت استاذ عثمان متوتر ونفسو يتكلم معاي بس خجلان امي وابوي اكرموهم وانا بسالوني وبجاوب بالجلاله المدير قال ليهم امشو انتو انا بلحقكم ودعني وفاتن وبقو اتحسرو علي ابوي قعد ونادا امي المدير قال ليهم مالا نسيبه قالو ليهو م عارفين والله ورافضه تمشي لشيخ هي اصلا عندها حاجه من الزواج ومجرد فكره الزواج بحصل ليها كده قاطعهم ف الكلام قال ليهم انا قبلان انتو بس وافقو انا بوديها السعوديه تزور الكعبه وتدعي هناك العندها دا كلو بفك ابوي قال ليهو انا م عندي مانع وامي قالت ليهو انا موافقه بس هي بي حالتها دي تعرسك كيف قال ليهم انا م عندي مشكله خلوها بحالا دي مبدئيا انا بجيب اخواني وبجيكم زول عقد زي م عارفين اني انا متزوج ابوي قال ليهو ماف مانع بس هي لازم توافق عليك قال ليهم اكيد وممكن بس تدوني دقيقه اتكلم معاها ابوي قال ليهواتفضل وقال لي امي قومي جهزي الاكل خلي الاستاذ دا يتغدا معانا وطلعو اول مره استاذ عثمان يقرب مني انا كنت م قادره اشيل حيلي عشان اقوم من رقدتي دي قال لي نوسه حبيبتي مالك ودموعو عشره عشره انا غالبني ارد وبقيت ابكي وهو يمسح لي في دموعي قال لي نوسه انا مستعد اعمل اي شيء بس انتي ابقي كويسه وقومي مستعد ابيع نفسي وأشتري بسمتك عشان خاطري قومي عشان انا محتاج ليك م صدقت اني لقيتك انا رغم سني بس حاسس نفسي مراهق وانتي اول بت تدخل قلبي انا حبيت الحياه عشان فيها انتي قومي وطمنيني عليك حاولت اقعد علي حيلي بس م قادره راسي لافي بقيت اصلح في طرحتي وشعري كان نازل في وشي هو بقا يزح لي في شعري وبقول لي صلاه النبي عليك ربنا يحفظك لي ويخليك لي وم اتحرم منك انا بحبك وانا في اخر انفاسي عاوزه أتشجع عشان اقوم وبقا هو ماسكني عشان انتكل عليهو وانا اصلا م واعيه لاي مشاعر تانيه وهو عشان ملتزم بقا ماسكني وضامني عليهو وبقول ي رب مسكه بالحلال وي رب تقربنا من بعض انا قلت ليهو بصوت واطي عثمان قال لي بهمس عيون عثمان بتعامل معاي برومانسيه وانا م واعيه لاحساسي شنو قلت ليهو نادي امي خليها تجي تمسكني انا ح اقع وم كملت كلمه ح اقع دايره اقع وهو بقا ماسكني وضاميني عليهو وبقا يقرأ لي وانا جسمي بقا تقيل وشبه غمرت سمعتو بكورك لي ابوي وهو شايلني وتاني م فهمت شي الا وانا ف المستشفى الدكتور بقا يشاكل فيهم لانو دمي بقا ٣٠وقال انقلو لي دم وابوي وعثمان بقو مخلوعين وامي تعزي علي والدكاتره بصبرو فيها لمن حسو انها متجرسه طلعوها مني نقلو لي دم ورقدوني في المستشفي قالو انو لو م اموري ظبطت وبقيت اكل م ح يخرجوني الايام الاولي كنت م واعيه شديد بس بعد ايام بقيت واعيه وعثمان كل يوم بجي الصباح قبل امش المدرسه وبعد اخلص بجي اقيل معانا ابوي بقا خجلان منو قال انو حلف طلاق انو يتكفل بي علاجي وم كده وبس كل يوم بجي شايل لينا الفواكه وبجيب لي اكل خاص وبقول لي امي لازم تاكلو كان خايف علي شديد وانا حبيتو من جوه قلبي بس كل ما اتزكر هدفي الاساسي بطني بتطم من نفسي التفكير داير يشل راسي انا لو واجهتو م ح يتزوجني وح تبقا فضيحه بس كان حاسي انو منعي للزواج بسبب شي م معروف قال لي نوسه انا م عايزك تفكري كتير انا مستعد اتزوجك والله لو فيك عيوب الدنيا كلها كان بديني احساس انو حاسي اني م بنت بنوت حاولت افهمو بس غالبني وهو بقول لي لدرجه المبالغه حتي لو انتي كده انا والله استرك غلبني اقنعو لانو ببساطه منعي للزواج من كل الرجال بقول كده قلت ليهو انا موافقه كان مبسوط شديد وطاير من الفرحه وقال لي تقومي بالسلامه وانا ح اعقد واجيب ليك حاجاتك واعمل ليك احلي عرس يحكو بيهو كل ناس الحله بس عاوزك تطمني قلبك بي انا سندك كان بعاملني بدلع لو قلت الفراشه حارقني اجي جنبي وينادي الدكاتره واقعد اجوط اقول ليهم انتو م شايفين شغلكم بقعدو اعتزرو ليهو وكل دقيقه يطلع اجيب لي شكولاته بقعداضحك بقول ليهو م بحبها بقول لي ماف بت م بتحب الشكولاته وانتي لازم تدلعي حبيبتي جد حسيت اني حبيت ابو محمد ومحمد كان ضياع زمن واتندمتا عليهو
عديت ايام ووضعي اتحسن وخرجوني وتاني يوم عثمان عقد علي وكان طاير من الفرحه وقال لي شوفي بت من بنات اهلك ديل تمشي معانا نشتري الشنطه شفت بت خالي واهلي لمن عرفو انو راجل مره زعلو شديد لاني انا رفضت اولادهم بت خالي مشت معانا لمن شافت أسلوب عثمان معاي قالت لي نوسه والله انا عاوزه اعرس راجل مره لانهم شكلهم حنينين دا لقيتي وين قلت ليها سبحان الله القسمه دا المدير بتاع المدرسه الشغاله فيها قالت لي والله م شاء الله شكلو محترم طبعا هو بعاملني كاني طفله امشي قدامي واقول لي حاسبي م تجيك حاجه واول م نصل المكان اقعدني في الكرسي واقول لبتاع الدكان اديها احلي حاجات عندك خليها تختار والسعر م مهم ولمن اشيل حاجه واحده اقول لي لا شيلي تاني م معروف الظروف واي شي بعجبني بجيبو لي وبحول ليهم بنكك لمن خلصنا الشنطه قال لي نمشي نشتري الدهب قلت ليهو لا لا م عايزه قال لي م عايزه شنو ولا علي كيفك ودخلني لي صايغ صاحبو سلم عليهو وقال ليهو اديها افخم طقم وسته غوايش انا بقيت منططه عيوني وبت خالي لمن شهقت بصوت لمن قفلت ليها خشما وهم م كانو شايفننا لمن اتلفتو قعدت تقح نظام عندها قحه قلت ليهااصبري لي وبقينا نضحك واختار لي احلي طقم دهب وغوايش وعشان مافي زمن نزل الشنطه بالفيها في بيتنا ولقيت خالاتي وعماتي كلهم قاعدين لمن شافن الشنطه والدهب لمن ريلن قالن لي امي يختي بتك دايره ليها راجل غنيان اظنو عشان كده ابت اولادنا وانا زاتي م عرفت انو غنيان الا لمن مشينا نشتري الشنطه قلت ليهم انا زاتي مخلوعه زي زيكم وقلبي ادق طبعا حبيتو شديد بس بقيت خايفه من رده فعل محمد البت لمن تعرس راجل مره بتكون خايفه من رده فعل مرتو الاولي بس انا خايفه من ماضيني المتعلق بيهو وكل احساس حلو اجيني بجيني وراهو محمد بطني بتطم والشي الموترني اول يوم في حياتي لي مع عثمان بلاقينا محمد كنت متوتره من اللحظه دي
مرت الايام ورميت الهم وراي وتركيزي بقا مع عثمان حبيتو وهو حباني لدرجه الجنون لو قلت ليهو مصدعه ساي بلقاهو في وشي وعمل لي احلي عرس ناس الحله كلها احكو بيهو وقطع تزاكر السفر وقدم لي عمره انا وهو وقال لي اول واحد ح يعرف عرسي محمد ولدي لانو منتظرنا ف المطار وانا قلبي ادق م عارفه محمد بعد يشوفني رده فعلو ح تكون شنو تفتكرو ح يقول لي ابوهو بالحقيقه ولا ح يسكت