رواية الخزلان
الفصل العشرون20
بقلم نوسه حمد
جاني فضول ادخل صفحه بت خالتي الدمرت حياتي لمن فتحتها اول بوست لاقاني بروفايلها وكانت مصوره يدها ويد زوجها حركات السوشيل ميديا دي وفي يدها اشوف دهبي الما بغباني لمن شهقتا وختيت يدي في قلبي امي والاء بصوت واحد قالو لي مالك فشنو ي بت المات منو ابوي طوالي بقا يكورك فشنو فشنو انا عشان عارفه ابوي م بتحمل بالذات الايام الاخيره دي بعد الامراض الجاتو والدكتور حزرنا قلت ليهم عجبني فستان شديد ف الفيس امي قعدت تطنطن قالت لي خلعتيني ي بتي انا قلت البت دي جابو ليها خبر وفاه ابوي بقا اضحك واقول لي امي اصلك انتي بتحبي الاخبار الكعبه البت قالت ليك شافت شي عجبا قولي ليها كدي النشوفو قالت ليهو انتو فايقين ورايقين وانا وراي شغل دخلت المطبخ مشيت لي ابوي قال لي انبسطي ي بتي الفرح اصلو شبهك وخليك واثقه انو ربنا م بخزلك لو كلهم خزلوك ربنا معاك وانا عافي منك وبدعي ليك ف كل صلاه قعدت جنبو ومسكت يدو قلت ليهو عارف يابا الدنيا دي كلها كوم وانت وامي كوم لو انتو كنتو ماف والدنيا دي تعبتني كان ح انكسر بس انا لمن اتزكركم لو وقعت بقوم والحمد لله ربنا موفقني قال لي ابقي ع روحك عشره واشتري الفستان العجبك دا قعدت اضحك قلت ليهو حاضر
وقومتا منو دخلت وقفلت الباب قلت لي الويه فستان شنو العجبني انا شفت شي بجنن قالت لي فشنو قلت ليها دهبي قالت لي مالو قلت ليها شالتو بت خالتي قالت لي اصلو م بصدق فوق دا كلو البت طلعت حراميه قلت ليها حراميه وعينا قويه مع كلامي دا امي جات داخله عملت ليها بي يدي قلت ليها هووووس ابوي قالت لي فشنو ي بت مديت ليها الصوره قلت ليها يمه بتعرفي الدهب دا قالت لي كيف م بعرفو دا دهبك صاح قلت ليها ياهو قالت لي دي يد منو الزي البعاتي دي رغم اني كنت حزينه بس ضحكت من جوه قلبي قلت ليها صحي بعاتي دي يد بت اختك قالت لي منو روضه قلت ليها هو في غيرها قالت لي سجمي سجمي سرقتو هي قلت ليها اي الويه قالت لي كدي نقرا التعاليق ولازم انتي تعلقي بقيت اقرا ف التعاليق واضحك اهل امي الشمتو علي كلهم رغم اني م عملت غلط مطبلين ليها طبيل شديد التعاليق كالاتي
اصلو الفرح بشبهك
بت حلال تستاهلي كل خير
ربنا عوضك بالسند البتفتخري بيهو
ربنا يسعدكم تستاهلي كل خير
دي تعاليق اهلي الشمتو علي لمن بت خالتي خربت حياتي اصلا انا م فارقين معاي بشي الدنيا ماشه بدونهم محبتهم لي بكسبو فيها اجر لاني لحمهم ودمهم بس حسدهم وغيرتهم م ح تكسبهم شي وانا ربنا معاي والحمد لله م محتاجه للناس
قررت اني ارد ليها رد اكشف حقيقتها واغلغلها كتبت ليها كالاتي
يذهب الحرام من حيث اتي وعمرو الحرام م دام لي زول ولا الشر انتصر ع الخير فصبرا جميل والله المستعان يا بت خالتي الحقيقه لو اندست ربنا قادر اكشفها وهاردلك ي بيبي
تعليق م عدا الدقايق كميه اللايكات فيهو وفي الناس القالو لي فشنو وف القالو لي انتي حاسده عشان قسمتك طلعت م سمحه عاوزه تخربي ع الناس ومن التعاليق ضمنهم ولد خالتي عريس روضه كتب لي فشنو ي نسيبه الوحيد الحسا في شي ودا الطبيعي جاتو لابسه دهب زي دا ليهو حق يفهم تعليقي م رديت ع اي زول دخلت علي هي بعد ساعه شكلها كانت نايمه وصحوها من النوم عشان تشوف حقيقتا الانكشفت شكلها حذفت الصوره بالتعاليق ودخلت علي خاص قالت لي انتي موهومه شكلك وممغوسه من الحاصل ليك رسلت ليها ضحكه قلت ليها الحمد لله م موهومه زيك ولا حراميه زيك خربتي بيتي وسرقتي دهبي قالت لي بيت شنو الخربتو انتي براك الخربتي مشيتي تحبي في ولد راجلك م بتخجلي واجيك انصاص الليالي عشان استغفر الله قلت ليها ع القسم انا لو زي م انتي بتتكلمي انا دقيقة م اقعدا ف الدنيا وانا م ح ابررر ليك خليك كده بس اقسم بالله ي روضه لمن اموت م عافيه ليك وكل يوم بدعي عليك واستمتعي هسي الدنيا حلوه معاك بس وقت الخلاص اتزكري انو دي دعواتي عليك وحق اولادي م بضيع اتوقعت اي شي الا انك تسرقي دهبي ولمن خربتي بيتي ختيت ليك العزر قلت معجبه بي عثمان وعاوزه تعرسو ولاخر لحظه خاته الكلام دا تبرير ليك بس لمن شفت دهبي في يدك عرفت انو انتي قاصداني وحسبي الله ونعم الوكيل قالت لي م تمثلي انك مظلومه قلت ليها امثل لمنو انتي اظنك م بتعرفيني انا تمثيل زيك م بمثل هسي عليك الله قلتي لي راجلك الدهب دا جبتي من وين راجلك طيب م استاهل امي وقت خطبتك ليهو م قايلاك كده قالت لي شنو امك الخطبتني ليهو دي القسمه قعدت اضحك قلت ليها اسأليهو هو وامي بقت سبب في قسمتك زي م محمد بقا سبب ف قسمتي مع ابوهو واتزكري كلامي دا عشان الدنيا ح تثبت ليك انا لا ح ابرر ليك ولا ابرر لي عثمان واخر كلامي ليك حسبي الله ونعم الوكيل مالي الشرف اتكلم معاك واديتا بلوك
الويه قالت لي بس كده م قصرتي جزاك الله الف خير وقعدنا نضحك قلت ليها عارفه ي الويه انا م شيلت حقي بس انفشيت فيها قالت لي دي عينه قويه كلامك دا م بفرق معاها بشي قلت ليها فعلا م لينا بيها ارح ظبطي لي لبسه للمقابله قالت لي جدااااا
نومنا اولادي ونزلنا اتسوقنا وجبت كل النفسي فيهو لي ولي اولادي والحمد لله انا حوجتي بدروس العصر وطلبه الجامعه بقت مقضيه وم احتجت لزول ودي حاجه بحمد عليها ربنا وح اشتغل اكتر واكتر لمن ارجع بيتنا
بعد ايام اتصلت علي المشرفه قالت لي ارح بكره الوزاره قلت ليها تمام وكنت مبسوطه رغم اني م عارفه البحصل شنو او عاوزني لشنو
تاني يوم صحيت وكلي امل لبست وانتظرت المشرفه جات ركبنا ومشينا المحليه رحبو بي واستقبلوني
المشرف الجا المدرسه انتظرتو لمن جا واتكلم معاي مفتكرني اني شغاله لسه ف المدرسه قال لي انا عاوزك تشتغلي معاي وبديك مرتب اضعاف البتاخدي ف المدرسه الشغاله فيها بقلبي قعدت اضحك قلت ليهو م جايب خبر قال لي رايك شنو عاينت للمشرفه وم رديت طوالي هي ردت ليهو قعدت تضحك قالت ليهو عثمان لو عرف انو استاذه من الاستاذات خلتو ومشت مكان تاني بخرب الدنيا قال ليها م يقدر يعمل حاجه المهم هي توافق وانا بديها اضعاف مرتبها لو مرتبها ٢٠٠بديها ٦٠٠لو مرتبها ٣٠٠بديها ٩٠٠رايك شنو طوالي رديت عليهو انا قلت ليهو موافقه قال لي مبروك عليك ال٩٠٠. طبعا انا قربت ابكي شكرتو وقلت ليهو المدارس وين قال لي هنا ف الحصاحيصا مدرسه خاصه حقتي انا عندهم مشكله ف الانجليزي وكل استاذ نجيبو فاشل لمن لاقيتك انتي قلت خلاص انتي الحا تظبطي لي المدرسه جدا قلت ليهو جدا من بكره بنزل دوام وان شاءالله اكون عند حسن ظنك قلل لي واثق فيك وطلعنا لمن طلعنا قالت لي عثمان م يعرف اني جيت معاك طبعا دي المدرسه الوحيده المنافسه مدارس عثمان وفعلا عندهم مشاكل ف الانجليزي قلت ليها انا بفتش لي لقمه العيش م عندي شغله ف منافساتهم بس المهم ااكل اولادي لقمه حلال قالت لي ربنا يوفقك والله كريم عليك المرتب الاداك ليهو دا ما اظن في استاذه بتاخدو بس انتي بتستحقيهو
رجعت البيت وانا اكتر من مبسوطه وم مصدقه وكلمت امي ابوي لمن دموعو جرت قال لي الله كريم ي بتي ربنا يوفقك كان يوم بالنسبه لي كانو حلم نسيت فيهو عثمان واي ظلم انظلمتو وقررت تاني م ح ارجع ورا ح اربي اولادي بس واعلمهم احسن تعليم دهبي بعوضو البيت بشتريهو بس عثمان وحبو لي وخوفو لي دا المستحيل اتعوض حتي لمن طلقني وجدعني م قدرت انساهو ولي حق م انساهو علاقتي بيهو هو الكان المعطي هو الحباني شديد هو الدلعني هو السندني وخاف علي انا كنت بخيله م معطيه زيو ليهو حق ينساني بس انا عمري م انساهو ف لحظه بس ح اعيش بدونو اكيد الحياه م وقفت ع زول ودا اول درس اخدتو بعد زواجي من عثمان لاني كنت مفتكره الحياه وقفت ع محمد لغايه م اتزوجت ابوهو وعوضني وغيرت مفهومي انو الحياه م واقفه ع زول ولسه مواصله ف المفهوم دا
تاني يوم وانا ماشه الشغل ركبت المواصلات وكنت قاشره قشره لانو اول يوم لي العربيه جات بي حله ناس عثمان ركب معانا محمد لمن شافني انخلع وانا غلبني البعملو قربت انزل من العربيه عدينا دقايق وصلت نزل هو قدامي وقال لي حرم م تدفعي قلت ليهو انت منو عشان تدفع لي اديت بتاع العربيه اجرتو ومشيت هو بقا ماشي وراي واتكلم معاي وحاولت اتجاهلو بس هو عبيط بقا ساكيني ولو عرف مكان انا شغاله م برحمني ولا بخليني لانو بقا سكران وحيران ودي مصيبه الله احلني منها