رواية مغامرات ابناء العاصي الجزء الثاني من العاصي الفصل الخامس والثلاثون35بقلم كنزي حمزه

كانوا يجلسون علي مائدة الطعام في شقة جدهم ينتظرون مدرس المادة الالمانيه كي يشرح لهم درسهم واذا به يدخل عليهم وهم جالسون

عاصي: ازيكم ياقمرات العيله، مالكم قاعدين كده ليه

تيا: حمدلله علي السلامه مستنين مستر عصام عشان جاي يدينا درس الالماني

عاصي: اه مستر عصام، انا مش فاهم يعني مفيش غير المستر الملزق ده اللي يديكم الدرس

ليا: والله انا اللي مستغرباك، ماله بس مش عاجبك في ايه، ده حتي شرحه ممتاز وهو اصلا چان كده  في نفسه

اذا به يمسكها من رسغها ويفزعها عندما اوقفها امامه وهو ينظر لها بقوه

عاصي: في بنت محترمه تتغزل في راجل غريب عنها كده وادام خطيبها كمان

ليا  بتهتهه: ااااانا مش قصدي يا عاصي، سيب ايدي بتوجعني

تيا: يا فتاح ياعليم، يابني ارحمنا بقي من غيرتك عليها دي شويه، هي البت  قالت حاجه

عاصي بغضب: طب ابقي قولي كده ادام جوزك لما يجي وشوفي هيعمل فيكي ايه، وانتي تعالي اقعدي علي الكرسي ده

ليا: ازاي بس، انا كده مش هافهم حاجه

عاصي بهدوء: انشالله ما فهمتي يا حبييتي، انا ابقي افهمك بعدين انا اصلا كنت شاطر في الالماني

تيا: طيب يا شاطر ممكن بقي تهوينا

عاصي: اتلمي يا تيا احسنلك، لمي لسانك ده بدل ما مد ايدي عليكي

تيا: ههههههههه طب اعملها كده ده، كان زين يقتلك فيها، على فكره هو جاي النهارده

عاصي: عارف ياختي لسه مكلمني اصلا، هو مافيش حد هنا ولا ايه

ليا: قاعدين كلهم فوق في شقتنا

عاصي بغضب: نعم وسايبن الشقه فاضيه ليكم، حتي تيتا كمان طلعت فوق، مفيش حد يقعد وانتوا بتاخدوا الدرس

ليا: يوووووه بصراحه بقي احنا مش عارفين نرضيكم يعني بابي يزعق لمامي ويقولها تطلع فوق وعمو حمزه يقول لغزل ماتنزلش اصلا وتيتا قالت انا تعيانه وعايزه انام ودلوقتي حضرتك جاي تزعق، نعمل ايه بقي

عاصي: تعمليلي سندوتش اكله قبل المدرس ده مايجي وانا هادخل اغير هدومي وهاقعد اذاكر في اوضتي وهافتح الباب وعيني هتبقي عليكم انتوا الاتنين  وعالله اسمع ضحكة واحده فيكم، مفهوم؟ 

ليا وتيا: اوف بقي حاضر

عاصي: ايوه كده براڤو عليكم، يلا بقي يا لولتي اعمليلي ساندوتش اي حاجه وياريت معاه كوباية شاي، وتركها وذهب من امامها

ليا بغيظ وصوت خفيض: لولتي، انا ايه اللي خلاني اتنيل واوافق 

عاصي وهو يلتفت لها: بتقولي حاجه يا حبيبتي

ليا: هه لا ابدا اتفضل حضرتك وانا هدخلك الاكل لحد عندك

تيا: هههههههههه اه يا جبانه

ليا: اضحكي ياختي، مانا مخطوبه لخط الصعيد انا

وبعد ان حضرت له الطعام وكوب من الشاي، دقت علي باب غرفته حتي تعطيه له 

عاصي: ادخلي يا حبيبتي 

ليا وقد دلفت اليه: اتفضل يا سيدي الاكل اهو وكمان الشاي، عايز حاجه تاني بقي

عاصي وهو يلبس تيشرته: لاء ياحبيبتي تسلميلي

ليا: عاصي بص انا جبتلك ايه واخرجت من جيب فستانها قلاده فضيه محفور عليها اسمها

عاصي وهو يقترب منها: حلوه اوي يا حبيبتي، بس ليه عملتي كده

ليا وهي محنية الرأس بخجل من قربه: عشان انت ملبسني سلسله عليها اسمك، فأنا قولت لازم انت كمان تلبس اسمي

امسك يدها بكل حب وقبلها قبل رقيقه وهو يهمس

عاصي: بس انا مش محتاج سلسله عليها اسمك، اسمك اصلا محفور جوه في قلبي

كاد ان يقترب منها اكثر الا انها رجعت للخلف بخوف وقالت

ليا: انا انا هاروح عشان الدرس

عاصي وقد تركها بعد ان تفهم خوفها منه: طب اهدي يا حبيبتي، خلاص مفيش حاجه انا بعدت عنك اهو

ليا: طب سيبني اخرج من هنا

عاصي: ليا انتي لسه بتخافي مني بعد الفتره دي كلها

لمعت الدموع في عيناها وهمست: سيبني اخرج يا عاصي

عاصي: طب اعمل ايه عشان اخليكي ماتخافيش مني كده، انا اسف يا حبيبتي، انا غبي والله غبي اني اوصلك بأيدي للمرحله دي

ليا: لاء ماتقولش علي نفسك كده، انا اصلا مش عارفه انا بيحصلي كده ليه 

عاصي بهدوء: خلاص يا حبيبتي هدي نفسك وانا هاشوف حل ولو عايزاني ماقربش منك خالص، مش هقرب يا ستي، روحي اغسلي وشك ظبطي حجابك ده عشان تاخدي الدرس بتاعك

اومئت له برأسها وتركته وذهبت للخارج، تركت باب غرفته مفتوح، جلس عل المقعد بغضب وهو يؤنب نفسه علي مافعله معاها

شوفت بغبائك عملت فيها ايه، اذا كانت واحنا لسه مخطوبين وخايفه مني كده، اومال هتعمل فيا ايه بعد الجواز 

//////////////////////////ا

كان يجلس بجانبها في هول الڤيلا يستذكر لها درسها في مادة الكيمياء 

عدي: علي فكره بقي انتي بقيتي شاطره جد في الكيمياء، احنا تقريبا قربنا نخلص اول وحدتين في المنهج

دانا: ايوه طبعا لازم ابقي شاطر، عشان المدرس بتاعي ممتاز

عدي: كده، طب بصي بقي يا ستي انا النهارده مش هاديكي درس جديد، انا هاعملك امتحان صغير كده 

دانا: ماشي كلامك وانا مستعده اتفضل ياسيدي اكتبلي الامتحان اللي انت عايزه

انحني بجزعه للامام وبدأ يكتب لها مسائل الكمياء المعقده

دانا: مالك يا عدي، هو انت لسه زعلان علي موضوع الكلاب بتاعتك ده

عدي وهو يكتب: يعني  اللي مريحيني شويه انهم في الڤيلا وكل ما بجيلك، باروح اطمن عليهم

دانا: هههههههههههههه للدرجه دي انت بتحبهم، في ايه يابني، انت محسسني انهم ولادك

ترك القلم من يده وهو ينظر لها بهدوء

عدي: بطلي سخافه يا دانا، انا مش بحب ان حد يقلل من حاجه انا بعملها ومقتنع بيها واتفضلي حلي الامتحان ده يلا

دانا وهي تعض علي شفتاها السفلي: sorry يا عدي مش قصدي طب انت عارف اني بخاف من الكلاب جدا

عدي: طب ممكن بقي تحلي الامتحان وتخلصيني عشان بجد انا متأخر علي ابويا وعايز اروح اذاكر انا كمان ولسه هاشوف حسابات الوكاله

دانا بزعل: حاضر حاضر واسفه اني بعطلك معايا عن مذاكرتك والوكاله بتاعتك

عدي وقد التمس نبرة الحزن في كلامها: اولا بطلي تعتذري شويه

ثانيا: انا اللي قولتلك اني هاجي اذاكرلك 

ثالثا: انتي مش معطلاني عن حاجه، فيها ايه يعني لما باجيلك كل يومين ساعه بعد الكليه، ده مش معطلني لا عن مذكرتي ولا عن شغلي في الوكاله

رابعا بقي وده المهم، انا لو مش حابب اعمل ده مش هاعمله يا دانا

دانا وهي تعطيه الورقه: بجد يا عدي، يعني انت بتحب تيجي تقعد معايا، قصدي يعني عشان تذاكرلي وكده

عدي وهو يبتسم لها: اوي يا دانا، باحب اعمل كده اوي

التفتت الي الجهه الاخري بخجل وهي فرحه جدا من كلماته واذا به يقول: يا بنت الايه براڤو عليكي انتي بقيتي ممتازه مفيش ولا واحده غلط

ليصيح والدها القادم من الخارج بزيه العسكري

احمد: والله براڤو عليك انت، دانت عملت معاها انجاز

دانا وهي تقبله: حمدلله علي السلامه يا بابي، شوفت انا بقيت شاطره ازاي

أحمد: البركه في المستر بتاعك، ازيك يا عدي

عدي: الحمد لله يا عمي، حمدلله علي سلامة حضرتك 

احمد: الله يسلمك ياحبيبي، دانا لو خلصتوا قولي لمامي تحضر الغدا عشان عدي يتغدي معانا

دانا: حاضر يا بابي، هو احنا كده خلصنا يا عدي؟ 

عدي: اه روحي بس ماتعملوش حسابي، انا هاكتبلك الهوم وورك بتاعك وامشي على طول

دانا بزعل: لاء ماتخليهوش يمشي يا بابي، اقوله يقعد عشان خاطري

احمد: طب بس روحي انتي وقولي لمامي اللي قولتلك عليه 

جرت من امامهم وهي فرحه جدا

واكمل هو: ااقعد يا عدي 

عدي: اتفضل حضرتك بس معلش انا هاخلص كتابة المسائل وهامشي عشان متأخر عن  ابويا والوكاله 

احمد: طب بس اقعد اتغدي معايا ومعلش نص ساعه تأخير مش هتعمل حاجه يعني، قولي اخبار كليتك ايه

عدي: الحمد لله ياعمي، انا بحب كليتي عشان كده بحس ان المواد اللي بدرسها سهله ومش صعبه

احمد: سمعت من عاصي انك لسه متأثر من موضوع الكلاب ده وانك تقريبا كل يوم بتيجيلهم عشان تشوفهم في الڤيلا بتاعتكم

عدي: ماهو مافيش في ايدي حاجه تاني اعملها، مش هاقدر اكسر كلام ابويا ومش هاقدر افرط فيهم، كفايه اني لغيت المشروع بتاعي عشان مازعلهوش مني، حضرتك عارف انا باحب ابويا قد ايه

احمد: ايوه يا عدي بس كمية الكلاب كبيره جدا علي حراسة ڤيلا دول ولا يحرسوا الكمباوند بتاعكم كله كمان

عدي باستغراب: حضرتك شوفتهم قريب ولا ايه؟ 

احمد: ايوه كنت هناك امبارح انا وعاصي وعندي ليك اقتراح كويس، ايه رأيك ياسيدي لو الداخليه تشتري منك كل كلاب الحراسه اللي عندك وبسعر كويس

عدي بفرحه: بجد، موافق طبعا، طالما مش هيتبهدلوا اكيد لازم اوافق

احمد: كده، سيب الموضوع ده عليا انا واطمن كلاب الحراسه عندنا بتتدرب كوبس جدا وبيحافظوا عليها جدا 

عدي: متشكر اوي يا عمي ان حضرتك مهتم يعني بيا كده

احمد: ههههههههه وان ماكنتش هاهتم بخطيب بنتي، هاهتم بمين، حتي لو هيا ماتعرفش 

عدي: ربنا يخليك ليا يا عمي يا رب

اتت اليهم دارين باناقتها المعهوده وهتفت: حمدلله علي السلامه يا حبيبي

احمد: الله يسلمك يا حبيبتي، الحقيني احسن انا ميت من الجوع

دارين: الاكل جاهز اتفضلوا، بس شوفت عدي خلي دانا لبلبه في الكيمياء ازاي

احمد: عدي شاطر في كل حاجه مش في الكيمياء بس، وغمز له بعينه، مش كده ولا ايه يا عدي؟  لتصيح دانا بطفوله وهي تجلس علي طاولة الطعام

دانا: تعالي اقعد جانبي ياعدي

نظر هو الي اباها وابتسم له ليضحك علي طفولتها 

////////////////////////ا

واخيرا قد عاد بعد غياب طويل واوقف سيارته امام الوكاله ودلف الي جده

ليهتف الجد: اهلا اهلا اهلا يا حبيبي، حمدلله علي سلامتك، اتأخرت علينا اوي المره دي يا زين

زين: الله يسلمك يا جدي، ازيك انت يا حبيبي عامل ايه

الجد: الحمد لله بس مالك شكلك تعبان كده ليه

زين: والله يا جدي بقالي ٣ ايام مانمتش، كنا في مهمه صعبه شويه و يادوب خلصنا امبارح بس

الجد: طب قوم يا حبيبي اطلع استريح شويه وغير هدومك

زين: حاضر يا حبيبي، عن اذنك

الجد: اتفضل روح يابني، ربنا يسلمك من كل شر

صعد الدرج وقابله الاطفال وهم يجلسون عليه يلعبون علي الهواتف سويا

طمطم: هيههههه زين جيه، وحستني اوي

زين: ههههههههه وانتي كمان ياحبيبتي وحشتيني بس معلش بقي مش هاقدر اشيلك عشان ايدي بتوجعني شويه وايدي التانيه فيها الشنطه

بوده: هيهههههه حمدلله علي السلامه، انت اتأخرت المره دي كتير اوي

زين: الله يسلمك يا لمض، عامل ايه ياض، هو البيت ماله ساكت كده

بوده: اصل ليا وتيا بياخدوا الدرس جوه ومامي وخالتو غزل وتيتا فوق

زين: ايه كلهم فوق، اومال مين اللي قاعد معاهم جوه

طمطم: عاصي قاعد بيذاكر في اوضته وفاتح الباب ادامهم

زين: ماشي يا حبايبي كملوا لعب بقي وانا هادخل لهم

دلف عليهم في هدوء ليري اخيرا حبيبته امامه وتجلس منحنية الرأس وتحل اسئلتها في هدوء وبمقابلها يجلس ذلك المدرس ولكن لم تعجبه نظراته لها ولأختها التي  تجلس بجوارها

زين: السلام عليكم

رفعت رأسها بفرحه بانت في لمعة عيناها، ها هو يقف امامها بعد غياب طال لمدة شهران كاملين، كادت ان تقف وتجري الي حضنه الا انه اشار لها بعينه أن تجلس 

ليا: وعليكم السلام،  حمدلله علي السلامة يا زين

زين: الله يسلمك يا ليا، ها عاملين  ايه الانسات دول معاك يا مستر

مستر عصام: ماشاء الله عليهم،  هايلين طبعا

زين: طب اتفضل حضرتك كمل الدرس، انا داخل جوه اصلا

مستر عصام: انا تقريبا خلصت، هما بس يحلوا بسرعه واعلم لهم ونخلص الحصه النهارده

اومئي له برأسه وابتسم الي حبيبته وهتف 

زين: ماشي انا هادخل اقعد مع عاصي جوه يا حبيبتي

تيا: ماشي هانخلص ونيجي نقعد معاكم

ذهب من امامهم واذا بالمدرس يهتف: هو مين ده يا تيا، انا اول مره اشوفه من ساعة الدراسه ما بدأت

كانت عيناها معلقه به وهو داخل الغرفه، مازال ينظر بحب لها لتجيب علي مدرسها 

اختها ليا: ده زين اخويا، اصله ظابط في الحربيه وبقاله شهرين مانزلش اجازه

مستر عصام: اه عشان كده بقي، ها خلصتوا ولا لسه، وريني كده يا تيا، انتي يا بنتي سرحانه في ايه

تيا: ها، اه يا مستر انا خلصت اتفضل

///////////////////////////////ا

اما عنده فقد دلف عليه الغرفه وهو يجلس علي طاولة الرسم الهندسي 

عاصي: حبيبي حمدلله علي السلامه 

زين: الله يسلمك يا حبيبي، اه حاسب ياض دراعي

عاصي: ايه في ايه؟ ماله دراعك؟ 

زين: ماتخافش كده، دي حاجه بسيطه كانت رصاصه وطلعتها خلاص

عاصي: يانهار اسود، رصاصه عادي كده بالساهل 

زين وقد جلس ينظر لحبيبته بحزن: اه بالساهل وفي بيموتوا عادي كده بالساهل كمان، انا العسكري اللي كان جانبي استشهد  وهو بيقولي ان فرحه يوم الجمعه يا عاصي

عاصي بحزن ايضا: الله يرحمه ويغفرله، الكلام ده حصل امتي واحنا ازاي مانعرفش

زين: يعني من حوالي اسبوعين وانا اللي طلبت من القائد بتاعي مايقولش لحد يعني عشان ماتقلقوش وكده وماكنتش عايز تيا تخاف كمان

عاصي: ازاي بس يازين، هو انت اي حد بالنسبه لينا، دا انت اخونا الكبير

زين: تسلملي يا عاصي، يلا انا هاقوم اغير هدومي، صحيح مبروك علي الخطوبه اخيرا

عاصي: اه يا اخي دانا لو كنت بحارب الارهابين معاك كان اسهلي 

خرج من عنده وهو يضحك ودلف الي غرفته

واخيرا ما انهي هذا المدرس حصتهم 

مستر عصام: كده الحصه خلصت يا بنات اشوفكم الأسبوع  الجاي بقي، يلا سلام يا تيا

لم تلتفت اليه وهمت للذهاب من امامه لتهتف ليا:

ان شاء الله، مع السلامه

مستر عصام: سلام يا ليا

دقت دقه واحده علي الباب ودلفت اليه 

كان قد غير حلته العسكريه ولبس سروال قطني  ويمسك بيده تيشرت قطني ايضا

تيا: زين وحشتني اوي يا حبيبي 

التفت اليها وفتح لها ذراعيه وهو يصيح: تعالي في حضني يا قلب زين، انتي اللي وحشتيني اوي

القت نفسها بين زراعيه وتعلقت في عنقه وضمها هو بحب وجلس بها هلي الفراش وهو يمطرها بقبله الرقيقه بكل حب 

زين: اه ياروحي لو تعرفي وحشتيني اد ايه

تيا: يا سلام لو كنت وحشتك بصحيح، ماكنتش غبت عني كل ده

زين وهو يزيح  حجابها من علي رأسها: ههههههههه هو بمزاجي يعني يا توتو

ابتعدت عنه وهي تتصنع الزعل: ايوه انت قولتلي هاتغيب شهر بس واتأخرت بعد الشهر شهر بحاله، الله مال دراعك، انت رابطه كده ليه؟ 

زين: ماتخافيش اوي كده،  ده جرح بسيط

تيا: جرح ايه ده، ليه ماقولتليش

زين: ماحبتش اقلقك يا روحي واقلق الكل معايا وبعدين تعالي بقي، انتي بعدتي كده ليه، بقولك وحشتيني

تيا: لاء اوعي كده انا زعلانه منك، ازاي ماتقوليش يا زين

زين وهو يجذبها من يدها: طب مانا عارف، تعالي بقي وانا هصالحك

 

الاخيره الجزء الاؤل

الكل يجلس علي اعصابه، اليوم تظهر نتيجة الثانويه العامه، 

كانوا جميعا يمسكون هواتفهم بينما يجلس زين ويضع جهاز اللاب توب تبعه علي قدمه يحاول ان يفتح الموقع ليصيح بوده وهو يصعد الدرج

بوده: نجحوا نجحوا، ليا وتيا نجحوا، هيههههه

عاصي وهو يرفعه بين يديه: عرفت منين ياض 

زين: ارمي الواد ده من الشباك يا عاصي، ده تلاقيه مقلب من بتوعه

بوده: لاء والله ده المستر بتاعهم واقف تحت مع بابي وعمو حمزه وهو اللي قال انهم نجحوا

غمزه: مبروك ياحبايبي الف مبروك

تيا: استني بس يا مامي اما نشوف جيبنا كام

استمعوا الي صوت والدهم وهو يصيح اتفضل يا مستر، وقفوا امامهم وهتف عاصي: مستر عصام جابلكم النتيجه من الكنترول يا بنات

مستر عصام: الف الف  مبروك  ياتيا، مبروك يا ليا

تيا وهي تقف بجانب زوجها الذي كان ينظر له بغضب: بجد يا مستر، جبنا كام؟ 

مستر عصام: لاء ده انتوا علي كليات القمه اكيد يا طب يا هندسه واحده ٩٦% واحده٩٧%، عملتوها ازاي دي هههههههههه

زين وهو يهمس لعاصي: بأف اوي، مش عارف ليه عايز اضربه

عاصي: ومين سمعك 

ليا: هندسه طبعا مش كده يا عاصي

عاصي بحب: طبعا ياحبيبتي هو انا هاسيبك تروحي كليه تانيه

تيا: وانا كمان عايزه ادخل هندسه زي بابي يا زين

زين: اوك يا حبيبتي بس اما التنسيق ينزل 

مستر عصام: طب بالمناسبه الحلوة دي، انا كنت عايز اتكلم مع حضرتك 

عاصي: اه طبعا اتفضل،  دلفوا سويا الي داخل الغرفه

صعد حمزه هو الاخر اليهم: الف الف مبروك يا حبايب عمو

جروا اليه الفتاتان وهتفت ليا: عمو حمزه مدير حسابات العيله مش كده يا جدو

فضالي: طبعا يا حبايب جدو وبصفتي رئيس مجلس ادارة العيله يبقي كل واحده فيهم ليها مكافأه يا حمزه 

حمزه: اللي يطلبوه يا بابا، هما بس يشاوروا وانا ادفع على طول

فضالي: كل واحده منهم تجيلها العربيه اللي تختارها

حمزه: احلي عربيتين لاحلي واشطر بنتين، بكره عاصي وزين ياخدوهم ينقوا العربيات اللي هما  عايزنها  ويبلغوني على طول، ماشي ياشباب

لم يلتفتوا اليه حين استمعوا لضحكات الاخر وهو بالداخل

زين: لاء كده كتير، هو عمال يضحك مع البأف اللي جوه ده علي ايه

عاصي: ياعم اوعي، انت لسه هاتسأل، انا داخله، ما تضحكونا معاكو

م ياجدعان

دلفو اليه وهتف عاصي: ههههههههه تعالوا يازين انت وعاصي، اسمعوا استاذ عصام طلب ايه

زين: في ايه يا بابا، مالك بتضحك اوي كده ليه، خير يا مستر

مستر عصام: خير طبعا، خلاص بقي قول عصام علي طول يا حضرة الظابط، احنا هنبقي نسايب

لم يتحمل عاصي اكثر من ذلك وبدء يضحك بطريقه هستيريه

عاصي الصغير: الله هو في ايه ياعمي، مين دول اللي نسايب، ما تفهمنا بقي

عاصي:  هههههههههه اصل استاذ عصام  ههههههه طالب ايد تيا مني 

زين: نععععععععم  انت بتقول مين؟؟ 

عاصي: ههههههههههه بيقولك لو مش موافقه عادي ياخد ليا  

عاصي الصغير:  اه طب ما تاخدهم اللي اتنين شروه واحده 

مستر عصام: نعم انت قصدك ايه يا عاصي

زين: قصده ايه، تعالي يا مستر وانا هاعرفك عايز ايه، بقي انت عايز تتجوز تيا اللي هي مراتي مش كده؟ واذا به يلكمه في وجه بقوه

وقف امامه عاصي وهو  مزال يضحك بشده: ههههههه اهدي يا زين، هو  مكانش يعرف انك جوزها

  مستر عصام: جوزها ازاي، ليا قالتلي انك اخوهم

عاصي الصغير: وانت بقي ب........ اهلك كنت جاي بتدي درس ولا تنقي عروسه وتحكي معاهم؟

عاصي: خلاص ياشباب قولنا مكانش عارف، احنا اسفين يا استاذ عصام بس طلبك مرفوض 

مستر عصام: ليه بس، طب بلاش تيا انا ممكن اخطب ليا

عاصي الصغير وهو يهجم عليه: تخطب مين يابن ال.............، انت عايز تخطب خطيبتي؟ 

مستر عصام: ايه؟ خطيبتك؟ انا اسف ماكنتش اعرف والله يا باشمهندس، عن اذنكم

عاصي: اتفضل يا مستر ومتشكر اوي علي النتيجه

وبعد ان خرج من امامهم، ذهب زين الي زوجته وجذبها من جانب جدتها واقفها امامه بغضب

زين: فرحانه اوي يا ختي عارفه البيه تعب نفسه وجابلك النتيجه ليه؟ 

تيا بعدم فهم: ليه يا زين، هو في ايه يا بابي؟ 

عاصي: خلاص يا زين بقي، هي مالها هي بتزعق لها  ليه ؟ 

زين: ماهو مش هيجي يتقدم لها كده من نفسه وهو طول السنه بيديها درس، تقدري تقوليلي ازاي معرفش انك متنيله مكتوب كتابك؟ 

لتهتف ليا: يعني هي كانت هتعمل اعلان عشان الناس تعرف يا زين؟ 

ليصيح عاصي الصغير: انتي تخرسي خالص يا حلوه، ده لسه دورك جاي، مانتي اصلك ماعرفتيش انه كان حاطك في الاحتياطي، وال ايه لو تيا مارديتش ياخد ليا 

ليا: هه، انا والله ماعرف حاجه عن الموضوع ده يا عاصي

غزل: بس بقي انت وهو، وهما ذنبهم ايه، وبغيظ فيهم،

ما هما عشان زي القمر العرسان بيتهبلوا عليهم

عاصي الصغير بغضب: حلو اوي، كده بنتك نجحت بمجموع حلو اهيه يا عم الحج، انا بقي عايز اعمل فرحي هنا في الشارع عشان الجماليه كلها تعرف ان بنتك بقت مراتي، ماشي يابا

عاصي:  ههههههههه ماشي يابا

///////////////////////////////ا

واخيرا فتح الموقع امامه وهي تقف تفرك يداها ببعض  ووالدتها تجلس بجانبه

دارين : ها يا عدي فتح

عدي: ايوه بسجل رقم الجلوس اهوه، بانت الف مبروك يا دانا، الف مبروك ياحبيبتي

لم تسمع من كلماته الا تلك الكلمه التي افرحتها جدا 

دارين: بجد يا عدي، جابت كام ؟ 

عدي: ما شاء الله، مجموعها حلو اوي 

دارين: الف مبروك يا حبيبتي، بالمناسبه دي هاروح اجيبلكم حاجه حلوه من جوه واجي

دانا وهي تنظر له: طب يا عدي يارب يجيب طب زيك

عدي: ان شاء الله وبالمناسبه دي، ليكي عندي  هديه حلوه اوي

دانا بخوف: اوعي تكون كلب، انا بخاف منهم يا عدي

عدي: عيب اوي لما نبقي اصحاب و قريب اوي هنبقي اكتر كمان من الاصحاب وتقوليلى بتخافي من الكلاب يا حبيبتي

ها هو يعيدها مره ثانيه، اذن هو يعيها جيدا

دانا بهدوء: حبيبتك

عدي: ايوه يا دانا، حبيبتي ولو وافقتي هتبقي خطيبتي، موافقه يا دانا

دانا: انا اه موافقه يا عدي  

عدي: كده بقت فرحتي فرحتين النهارده، واحده بنجاحك وواحده بموافقتك

دارين وهي تضع لهم الجاتوه: موافقتها علي ايه يا عدي

دانا بفرحه: عدي طلب موافقتي علي خطوبته ليا يا مامي وانا وافقت

دارين: مبروك يا حبايبي الف مبروك، واذا بها تضمهم اليها و تقبلهم في وجنتهم. 

عدي: الله يبارك فيكي، علي فكره عمو احمد عنده خبر بالموضوع من زمان ومتفق انا وهو علي ان الخطوبه تكون بعد النتيجه

دانا: بقي كده ومخبين علينا انتوا الاتنين، ماشي لما بابي يجي بس 

دارين: ههههههه كان لازم يخبوا عشان ماتنشغليش بيه عن المذاكره

دانا: وانتي كمان يامامي كنتي عارفه؟ 

اتاهم صوت احمد بعد ان حضر: طبعا يابنوتي، هو انا اقدر اخبي حاجه علي مامي، الف مبروك يا حبيبة قلبي

دانا: ربنا يخليك ليا بابي

عدي: طب استأذن انا بقي عشان اطمن علي بنات اخويا هما كمان 

دانا: لاء خليك كمان شويه واتصل بيهم

عدي: طب ايه رايك تيجي معايا نطمن عليهم سوي وتفرحيهم بنجاحك وابقي ارجعك تاني او زين يرجعك، بعد اذنك يا عمي طبعا

احمد: ماشي ياعدي وعلي فكره عاصي كلمني وقالي انهم  نجحوا وحدد معايا ميعاد الخطوبه كمان 

دانا: يا نهار مفاجآت حلوه، انا هاروح البس واجي بسرعه 

///////////////////////////////ا

لأول مره تركب سيارته، تجلس بجانبه في المقعد الامامي 

عدي وهو يضحك: ههههههههه ياه اخيرا عرفتي اني بحبك، اخيرا هنتخطب لبعض، ده كان جبل وانزاح من علي قلبي

دانا بخجل: علي اساس انك مش عارف اني بحبك

عدي بمكر: ايه، بتقولي ايه، انا ماسمعتش

دانا: لاء سمعت واسكت بقي عشان انت عارف من زمان اصلا بس انت اللي كنت بتحب ترخم عليا

عدي: بس هي مش اسمها برخم، اسمها بغير عليكي، تعرفي انا ماكنتش ناوي اتكلم مع عمو احمد ولا حتي اعرفك حاجه بس اللي خلاني اعمل كده، لما حسيت انك هتضيعي من ايدي وان الظابط ده كان عايز يخطبك

دانا: وانا اول ما بابي قالي رفضت من غير ما افكر، انا اصلا ماكنتش بطيق البني ادم ده 

عدي بجديه: ولا البني ادم ده ولا غيره، مفيش غير عدي وبس، ماشي يا حبيبتي

دانا بحب: ماشي يا حبيبي

عدي: الله الله، امتي بقي سنه دي تعدي وتبقي معايا على طول وتيجي تنوري بيتك في الجمالية

دانا بصدمه: بيت ايه اللي في الجماليه، انت مش هاتجبلي ڤيلا زي زين وتيا

عدي: والله يا حبيبتي لو الجماليه فيها ڤلل كنت جبتلك، بس انا قولت لعاصي وحمزه اني ناوي اهد البيت اللي ورثته من جدتي واخليهم يبنوا مكانه عماره كبيره وهاخد اخر دورين وافتحهم علي بعض زي نظام الدوبلكس يعني

دانا بزعل: بس انا مقدرش اعيش في الجماليه دي على طول، طب ما بدل ما تهد وتبني، ما تبيعه وبفلوسه نجيب ڤيلا في زايد جنب مامي

عدي: اه جنب مامي، طب والوكاله وشغلي فيها وابويا، ولا عايزاني اسيبه لوحده وهو في سنه ده

دانا: انا ماقولتش كده يا عدي، بس يعني ما هو اخواتك الكبار موجودين  بيقعدوا بردو في الوكاله وبعدين انت هتبقي دكتور، ازاي دكتور وتشتغل في وكاله تشيل دقيق ورز

عدي: اولا الشغل مش عيب، وانا مش بشتغل حاجه استعر منها ولا حرام ودي شغلانة ابويا واخواتي ومنهم واحد مهندس و واحد محاسب وشركتنا ما شاء الله كبيره ومع ذلك لو ابويا احتاجهم في اي وقت مش بيتأخروا ابدا عن الوكاله وعلي العموم يا دانا احنا لسه في الاول، فكري لو مش عاجبك كلامي اعتبري انه ماحصلش حاجه بينا ولا اني كلمت باباكي اصلا في حاجه

فضلت الصمت ولم تنطق بكلمه وتبدلت قسمات وجهها من الفرح الي الحزن

//////*************ا

وصل بسيارته الي بيتهم ومازال وجههم متهجم هو من الغضب وهي من الحزن

عدي: يلا اتفضلي اطلعي عشان انا هادخل اشوف شغلي

دانا بدهشه: انت هاتسيبني اطلع فوق لوحدي، عشان خاطري ياعدي ماتسيبنيش اطلع لوحدي، احنا اول مره نيجي مع بعض

عدي: معلش اصل ابويا قاعد جوه الوكاله هو واخواتي ولازم اعدي عليه قبل ماطلع ومش هاقدر اغصبك واقولك تعالي سلمي عليهم 

دانا: لاء طبعا، انا اصلا من غير ما تقول كنت هاروح اسلم عليهم، وتقدمته في الخطي واتجهت الي داخل الوكاله

رأوها وهم جالسون تدلف معه اليهم، ليصيح الحج فضالي:

اهلا اهلا بعروسة ابني الجميله، تعالي في حضني يا حبيبتي، الف الف مبروك  يا دانا

دانا بفرحه من كلامه: الله يبارك فيك يا جدو ياحبيبي انت

عاصي وهو يجذبها اليه: ههههههه جدو ايه بقى، يعني خطيبك بيقوله يا بابا وانتي تقوليله يا جدو، مبروك يا عروسه

حمزه: ياعم سيبها تقول اللي هي عايزاه، المهم انها بقت بنتنا خلاص، مش كده ولا ايه يا دانا

كادت ان ترد عليهم بفرحه الا انه صدمها هذا

عدي بسخريه: لا لسه مابقتش بنتكم، سيبوها براحتها 

دانا بصدمه من كلامه: طب عن اذنكم، انا هطلع للبنات فوق

عاصي وهو ينظر لأخيه بغضب: اتفضلي يا حبيبتي اطلعي، روح معاها ياعدي طلعها وابقي انزل تاني انت وعاصي وزين

اومأ برأسه له واتجه بها الي الاعلي

            الفصل السادس والثلاثون من هنا