رواية امتحان الحب
الفصل السابع7
بقلم جمانه السعيدي
مسك.... قررت مااتعالج اريد استسلم للمرض
بكل الاحوال راح اموت
عليمن اتعالج ويوكع شعري
اصلا اني متت من اللحظه الي تركني بيها مازن وحدي
بغرفة الفندق بليلة عرسي
مازن كل حياتي شلون يعوفني
كنت خايفه علي من يسمع الخبر
تالي عافني وحدي ويتهمني استغلاليه
امي بليتله نامت وياي بغرفتي حضنتني مثل الطفل الزغير
ونامت كل شويه تفز تحضني حيل وترجع اتنام
من سمعت خبر مرضي وهي خايفه تفقدني
واني الي كنت خايفه على مازن من يسمع الخبر اكثر من خوفي على امي
تالي مازن عافني وامي الي احتضنتني وخايفه عليه
صدك ماكو مثل الام ومشاعرها وحبها الابنائه
ثاني يوم كعدتني من الصبح
امي. اكعدي اتريكي لازم انروح نتاكد من هاي التحاليل
مسك....مااروح
امي...لا ترحين مو بكيفح لازم ترحين
مسك...اني اريد اموت مااروح
امي...حياتج مو ملكج وحدج لازم ترحين الخاطري اذا اني اليه خاطر عندج
لازم ترحين اني حياتي مالها قيمه بدون وجودج
تقبلين اموت من زعلي عليج
اصلا اني مااتحمل اشوفج بهذا الوضع
الخاطري لازم تتعالجين
خالتي....لازم تكونين قويه وتهزمين المرض بعدج زغيره
واحمدي ربج الف مره كشفتي حقيقة مازن
قبل لا تتورطين وياا اكثر
لو متمرضه بيته جان شمرج بلشارع
الإنسان العادي يتعاطف وياا الناس الغريبه اذا سمع عنهم
مرضا شلون وهو يدعي يحبج كل هذا الوقت
من وصلتي وياا للجد طلع على حقيقته
كومي نروح نعالجج وارجعي قويه اكثر من قبل
وخلي يتندم على كل يوم فكر يعوفج بي
مازن ما يستاهلج رب العالمين نجاج منه
الحمد لله طلع على حقيقته كومي حبيبتي الخاطري
الخاطر امج كومي اني وامج مراح انعوفج منا لمن ترجعين قويه اكثر من قبل
جمانه السعيدي
مسك....اسبوع واني معانده وماااقبل بلعلاج بس امي
وخالتي كسرن خاطري
امي كل النهارتتوسل بيه وتبجي كطعت كلبي
رحنا عدنا التحاليل والدكتور اكد لازم عمليه نشيل بيها هذا الجزء باسرع وقت ممكن
لان هاي المنطقه عباره عن غدد ويمكن تمشي وتوصل المنطقه الابط ساعته لازم يشيلون الثدي كله
بس اذا سرعنا بلعمليه ممكن نحصل نتائج احسن
يشيلون بس الجزء الصلب ويبقى جسمي مثل ماهو
امي سئلت على كل المستشفيات بغداد الي ممكن نسوي بيهن العمليه وأخير شي قررت نسوي العمليه برا
امي...مراح نسوي العمليه بلعراق المستشفيات كلها ملوثه
ناخذها الايران
بدت امي تسئل عن احسن دكتور جراح بهذا المجال
جابت العنوان وحجزت عنده عن طريق النت
سافرنا اني وامي
دخلت على الدكتور ما قبل بلتحاليل بلعراق
كال عيديهن كلهن يريد يقطنا لان هذا المستشفى ملكه
عدنا التحاليل حدد العمليه بعد اربع ايام
طبعا يستغلون المريض مو شلون مجان
العمليه هاي للايرانيه ٣ مليون عراقي واني اخذي مني
٢٠ مليون عراقي
الفلوس الي ماخذيها ماكفت
امي اتصلت بخالتي حتى أدبر اي مبلغ ادزه النا
امي.... محتاجين فلوس على الاقل عشره مليون
خالتي.. باجر اروح ابيع الذهب مالتي واذا ما كفن الفلوس
اتقرض من الموضفات الي ويانه
ثاني يوم خالتي راحت باعت ذهبها كله
هذا الذهب خالتي ضامته تكول خاف اكبر واتمرض
عاد اصرف منه ضامته ذخر الكبرتها
فلوس ذهبها ماكفن يله الذهب وصل ٨ ملايين
راحت اتقرضت عليهن ٣ مليون
ودزتهن النا حواله
كنت خايفه بشكل مرعب من العمليه
اني الي اخاف من الابره داخله غرفة العمليات
امي ودعتني ودموعها على خدها والسانها يلهج بلدعاء
مسك...يمه سامحيني خاف اموت اني عذبتج هواي
امي....كولي يالله راح تعيشين وتعذبيني اكثر انتي وجهالج
انتي بحفظ رب العالمين
بعد ساعه وعشر دقايق طلعت من العمليات
خالين صونده بصدري اطلع الجراحه والدم
مااكدر اكلب لو اتحرك العمليه توجعني
بقيت يومين تحت المراقبه الدكتور اكد العمليه نحجت
وكلشي تمام
اما الغده الدكتور زرعها حتى يتأكد من نوع الورم
اليوم الثالث شالو الصوندا من صدري
سجلو على علاج كلش غالي من برا
علاج يقلل الالتهاب وينشف الجرح
بعد اسبوع رجعنا للعراق بقه منتضربن نتيجة تحليل
الورمه حتى الدكتور يقرر على اثرها
اخذ جرعات كيمياوي لو لا
جمانه السعيدي
رجعنا للعراق البيتنا رجعت واني شايله الورمه من صدري
بس مجاي اكدر اشيل مازن من كلبي
الي سوا وياي شي ما ينسى ابد
اتخلى عني بلوكت الي اني كنت محتاجته بي
لو يصير اسوي عمليه واشيل مازن من كلبي للابد
وانسى موقفه وياي جان سويت عمليه ثانيه
٢١ يوم وطلع التحليل دزو النا عن طريق النت
طلع ورم خبيث الدكتور اكد على العلاج الكيمياوي
كمت ابجي مااريد هذا العلاج
شعري راح يوكع راح بخرب شكلي كله
امي...ليش تبجين فتره وتعدي وراح يرجع شعرج احلى من قبل وكولي امي كالت
الدكتور الي بايران دز النا رساله
تعاي اخذي الجرع الكيميائية بايران حتى يقطونه من جديد مايدرون احنا صرنا على الحديده بسبب هاي العمليه
امي سئلت طلع اكو مستشفى بغداد ينطي هاي الجرع
وبتكلفه اقل بهواي من إيران
بديت اخذ جرع وبدا شعري يتساقط
الله يبعد عنكم المرض
الجرعه من اخذها عبالك نار تنزل على روحي وتحركه
شي لا يطاق
شعري يوكع خصل خصل
خليت امي نامت وحلقت شعري كله
مااريدها تشوفني حتى لا تنقهر عليه اكثر ماهي مقهوره
هواي مرات الكاها تبجي على سجادة الصلا
لو بلمطبخ تبجي
من تشوفني تمسح دموعها
مسكينه امي بنيه وحده ومريضه
وجهي صار اصفر بسبب الجرع الي اخذهن
حواجبي وكعن
بس اضافري قاومن ما وكعن
كنا نمر بفتره صعبه حيل
مرض وحزن وضايقه ماليه بسبب الديون والعلاج الغالي
كلشي صعب
كلشي صعب بس اكيد فتره وتخلص
كنت انتضر يمتى الدكتور يكول
كافي بعد ماكو علاج كيميائي تعبت حيل شي متعب
بشكل مو معقول
صعب على روحي تتحمل هيج شي
لبست حجاب وقررت بس تمر هاي الضروف بسلام
بعد ماانزع الحجاب
والتزم بملابسي بعد ماكو شي ضيك لو قصير
كل هاي الضروف الصعبه الي مريت بيها
والموت الي اشوفه بعيوني كل مره اروح اخذ بيها الجرعه
بس ماكدرت اتخطى مازن
صعب اتخطى لازم امسح ذاكرتي حتى اكدر اتخطى
وانسا كلشي مر عليه من يوم عرفته لليوم
وهو نسا كلشي بينا نسا و دزلي ورقة طلاكي
بعد شهر واحد من ليلة عرسنا
بعد مااتاكد هو مراح يخسر شي بهذا الطلاك
بلقانون العراقي الزواج الي مااتم بي الدخله بين الزوجين
وتبقى العروسه عذراء
العريس كلشي مايخسر
ويكدر يستعيد المهر والذهب الي دفعه للعروس
اذا اتفقو على الطلاق بدون مشاكل
وجع اللحظه الي لزمت بيها ورقة طلاكي اكثر من وجع المرض والعلاج
ست اشهر واني اخذ كيمياوي
ومنتضره رحمة رب العالمين
اكره اليوم الي اروح بي للمستشفى
بس لازم ابين اني قويه
الخاطر امي امي حيل تعبت عليه
الحد ماوصلنا الاخر جرعه ورجعت للدكتور الي بلبدايه اكتشف المرض عندي
عاد التحاليل بقيت كاعده على نار
يومين وطلعن كل التحاليل
والدكتور اكد كلشي تمام كل الجسم وضائفه تمام
جمانه السعيدي
بعد لازم التزم بلاكل الفيتامينات والرياضه
حتى اكدر احارب هذا المرض ومايرجع الجسمي مره ثانيه
ممنوع النشويات والحلويات والمشروبات الغازيه
الاكل اغلبه خضروات
وماي وليمون وفيتامينات
بديت امشي على هذا النضام اريد استعيد عافيتي
لان خسرت هواي من وزني بهاي الفتره
والرياضه شي مهم اكيد حتى تنشط الخليا بلجسم
وما يصيبها الخمول وتصير فريسه سهله للمرض
بعد شهرين من توقف العلاج الكيمياء بد شعري ينبت
مره ثانيه
امي خطيه حارت شجابت من زيوت ومغذيات
حتى شعري بسرعه يطول
يوميه تبوس شعري ما مصدكه رجع طلعلي شعري مره
ثانيه
خالتي وامي دخلن سلفه وياا الموضفات
حتى يسدن الدين العلينا
الحمد لله بس استلمنها السلفه سددنا كل الدين
رجع وضعنا المالي شويه يتحسن
شكد مرت علينا ضروف صعبه وقاسيه ٣ نسوان
يواجهن المرض والعوز وحدهن
عمامي بس يجون يسئلون عني ويرحون ابد ما ساهمو بفلوس علاجي
امي كلما يسئلونها تكول خير من الله
تكول مااريد احد يمن علينا بشي رب العالمين واكف ويانه
هو الي يساعدنا
هو الوحيد الي يساعدنا وما يمن علينا بشي
واني رجعت استعيد صحتي من جديد
وشويه جسمي سمن بعد ما صرت عودان من المرض
بعد تسع اشهر بلضبط مرت زفه بشارعنا
كانت زفة مازن مازن كدر يتخطى حبنا ويزوج وحده غيري
من سمعت بي ازوج
فقدت ثقتي بكل البشر وخاصه الرجال
لقراءة باقي الفصول اضغط هنا