رواية منتصف العمر الفصل العاشر10بقلم جمانه السعيدي
مختار....دخل صدام على الكويت
وامريكا ودول التحالف اعلنتها حرب على العراق
الوضع حيل ادهور ووتصريحات دول التحالف تخوف
بعد حرب ست اشهر انسحب العراق من الكوبت
ونفرض الحصار علينا الناس كانت كلش خايفه
بدت الدوله تطبع فلوس طبع
قيمة الدينار العراقي نزلت كلش
راتبي بعد ماكان مكفيني صار كلش قليل تكرمون مااكدر اشتري بي حذاء
كمت اخذ ٣ الاف طبع
ردت اعوف الدوام الحكومي بس طلعت اشاعات الي يعوف الدوام تعاقبه الحكومه
وهم ابوي ما قبل كال انت درست وتعبت وتعينت شلون تعوف الدوام
كمت اشتغل شغل ثاني وياا الدوام العصر عندي بسيطه
كلشي ينباع اخلي بيها
الناس كامت تبيع غراض بيتها حتى تشتري اكل
نشتغل اني وصالح ثنيينه وما مكفين المعيشه
بس شي واحد كان زين بذاك الوكت
الكميه خير من الله كلشي ما نشتري بس الطحين
ماكوووو
الدوله كامت تطحن كلشي حتى الاذره والدخن
والناس تخبز بلبيوت وتاكل
مرينا باايام كلش صعبه مالها مثيل
بس احلام كانت كلش زينه صحته على الحمل
كلش زينه سمنت وصارت تخبل على الحمل
الحمد لله ايام الحمل بلنسبه الأحلام زينه ماكانت تشكي من شي بلعكس تشتغل كلشي وتشيل كلشي
عبالك مو حامل
جمانه السعيدي
منا لمن وصلت للولاده
ماتعرف شنو الطلوك من يجيها الوجع تريد تشرد للشارع
عبالك اذا طلعت تركض بلشارع يروح الالم
اني وخالتي لازمينها وصالح راح جاب الجده
الجده ما قبلت اجيبها لان بجر خافت منها
اخذنها للمستشفى اكو جده جبيره بلعمر اسمها ام نور
بس شافتها كالت اي هاي عدها ولاده
تعيط بكل صوتها تخبلت من الوجع ساعه تحضني
ساعه تعضني ساعه تريد تخنك خالتي
الوجع اخذها وما تعرف شسوي من شفت وضعها هذا
أقسمت قسم
بعد مااخليها تحمل مره ثانيه خطيه ماتت من الالم
العرك يصب من وجها جسمها كله كام يرجف
تعيط لمت المستشفى علينا
دخلتها السستر جوا ساعه كامله وهي تعيط جوا
النوب تصيح اريد مختار
اريد مختار عافت خالتي وتصيح بااسمي
شكد انقهرت عليها
طلعت السستر كالت شكد تتحرك ماكدرنا نجيبها بسهوله
تعبنا حيل كل شويه تريد تنزل من السرير وتشرد
حتى خطيه مجروحه من جوه بسبب الولاده
ماتقبل تثبت بمكانها من كد الالم
جابت ولد طلعته الستتر يخبل يخبل
من شفته كبل نزلن دموعي
خالتي اخذته منها
خالتي. هاك ابنك ليش تبجي
مختار....هذا ابني
خالتي...اي ابنك هاك شيله شوفه يخبل يشبهك
دخلت خالتي جوه تطمن على احلام
واني بقيت شايل هذا الملاك الحلو
ولا مصدك هذا ابني
اجت الستتر اخذته مني واني دخلت عليها بس شافتني كامت تبجي
مختار...حضنتها وبسته بكصتها ليش تبجين حبيبتي
احلام....يوجع يوجع متت اني كمت اصيح مختار مختار توجعني بطني توجعني
مختار...الحمد لله على سلامتج بعد ماكو جهال
ابد بعد مااريد مااريد اتعبج مثل هذا التعب واحد كافي علينا
احلام....اي وجع وجع موت مااريد بعد جهال
مختار...حبيبتي الحمد لله طلعتي من هاي الشده سلامات
أخذنا الولد وطلعنا
كلما يبجي اباوع علي ولا مصدك هذا المخلوق الحلو جزء مني
كل يوم اشوفه احس نفسي محقق انجاز معقوله هذا الكائن الحلو ابني
كلما يكبر شويه اتأكد هو معافا تمام مو على احلام
لان يستجيب للاصوات والحركات
سميته علي
خالتي هي الي كانت شايله مسؤلية ابني
احلام بس ترضعه خالتي هي الي تغسل وتبدل وتلعب
حتى بليل ينام يم خالتي
من يكعد يبجي بليل خالتي اجيبه الأحلام ترضعه
الحد مايشبع وتاخذه تنومه يمها
لمن كبر شويه يكول الخالتي ماما
الحمد لله مو طفل عادي كلش نشط
ست اشهر السنون ترست حلكه تسع اشهر يلزم الأشياء ويمشي من صار عمره سنه حتى يركص
البيت كله مخبوص بي
مو طفل عادي يمكن رب العالمين يريد يعوضني بي
عن ايام الحرمان الي شفتها
خالتي يصيحلها يمه واني بابا واحلام يصيحلها باسمها
لان اصلا مايعرف هي امه
خالتي هي الي شايله كل مسؤليته
حتى من تطلع تاخذه وياها
تخاف علي حتى من الهوى مداريته بشكل مو معقول
جمانه السعيدي
اني بعد مااريد اطفال مو متبطر على نعمة الله
بس حصار والضروف صعبه
واحلام ماتكدر على تربية الجهال خل يكبر علي ولله كريم
كنت كل يوم بليل اجيب حب المانع
وانطي حبايه الاحلام حتى اتأكد مراح يصير حمل مره ثانيه
اذا اتحسن الوضع عود انفكر بطفل ثاني
كلشي اشتغلت حتى اكدر اصرف على عائلتي رغم صالح وخالتي ابد ما مقصرين ابد
لمن صار عمر علوش خمس سنوات
خالتي...ليش ماجيبلونا بنيه بعد نلعب عليها عليوي كبر
مختار...ابد على هاي الاوضاع مااريد بعد جهال
خالتي...النمله الها رزق يم رب العالمين الطفل الي يجي
ربك ما ينسى ينسى ابنكم
مختار...ابد مااريد جهال لمن ينشال الحصار عن العراق ويرجع الراتب قوي عود افكر اسوي طفل بعد
طفل واحد بعد كافي
خالتي...العراقيين ٤٠ مليون وعايشين عادي بس ابنك
راح يأثر على ثروة العراق
مختار... لو يجي طفل واني ضامن حياته ومحضرله حياة كريمه لو مااجيب اطفال
شنو فايدة الكثره وجوعانيين لو ماعدهم ملابس
هو ابوهم ماعندا بيت ووين هم يعيشون
خالتي...ياا غير هذا ببتنا ما يكفيهم
مختار....لمن اشتري بيت والوضع يتعدل عود نسوي طفل
هااا شكلتي احلام
احلام...اني بعد مااجيب يمه بطني توجعني
اذا تريد امي هي اجيب واحد طفل
خالتي...يااا دهر غير يذبحوني منيين اجيب طفل
صدك انتي خبله
احلام...ولله مااريد اموت
خالتي...مادامني عايشه حتى اربي اللج
احلام....حتلو انتي جيبي اني بعد مااجيب خلاص واحد كافي
مختار.....هههه اي خاله نزوجج وجيبلنا طفل نلعب علي
خالتي....بكيف صالح تقبل يمه ازوج
صالح.. اذا واحد مريش اقبل ليش لا احصلي نسيب
والنوب احصل اخوووو
خالتي.. يااا خل اكوم اعدل نفسي والكط حواجبي
السالفه بيها رجل
مختار... اي من زمان محد معرس همزين خالتي راح تعرس
ههههههه
صالح....ههههه خوش فكره
احلام...اني مااقبل امي تعرس
خالتي...يااا ليش ولج غير اجيبلج اخ انتي ما تقبلين تحبلين عاد اني ازوج واحبل
احلام...لا ولله اموتج لا تزوجين
خالتي.. أمري لله خل ابطل
قررت خالتي بهاي الفتره تبني غرفه فوك وزوج بيها صالح
خطيه تعبان ويشتغل تريد ازوجه حتى تطمن علي
طبعا هو اكبر مني باربع سنوات
خطبتله بنيه من منطقتنا خوش بنيه حبابه وبت اوادم
وبدت تشتري مواد بناء شويه شويه
على كد فلوسها تعرفون حصار وماكو هلكد فلوس
بس خالتي شاطره تلم الفلس على الفلس
ست اشهر بنت غرفه بقت تبني عليها هول
ست اشهر ثانيه كمل بناء الطابق الثاني
بعد اجمع فلوس العرس
مختار...حياتنا حلوه رغم الحصار متفاهمين وماعدنا اي مشاكل اني حيل تعودت على هذا الوضع
ومجاي احس نقص من اي ناحيه
من صار عمر علوش ٦سنوات ودخل بلسنه السابعه
قررت اسجله بنفس مدرستي حتى اخذه وياي وارجعه وياي وانتبهله بلمدرسه
انتم ماتعرفون شكد عزيز عليه اموت علي
خالتي جانت تلح حيل على طفل ثاني وخاصه من علاوي اسجل بلمدرسه
كل شويه وكالت علاوي كبر انريد طفل نلعب علي
اني افتنعت بكلامها وقررت بعد ماكو مانع حمل حتى
احلام تحبل ٣ اشهر وماكو حمل
الشهر الرابع دزيت احلام للدكتوره وهم ماكو حمل
جمانه السعيدي
مختار...رجعت من الدوام اني وعلوش بدلت وكعدنا نتغدا
خالتي...اريد احجي وياك موضوع مهم
مختار...اي كولي
خالتي...جيرانه ام محمود اليوم حجينا اني وياها على حمل احلام لان اتاخرت والعلاج خلص وما حبلت
تكول اخذيها الكربلا الابو فاضل اكو خادم هناك
بابو فاضل يكطع للنسوان ويحبلن
اريد اخذ احلام واروح اكطعلها بلكت تحبل
مختار...روحي ميخالف بس علاوي عنده دوام شلون
خالتي. ما ناخذ علاوي ويانه احنا نرجع بنفس اليوم
نطلع من الصبح ونرجع المغرب
هااا شكلت تكدر تتحمل علاوي يوم واحد
مختار...اي اتحمله ليش لا
ثاني يوم طلعت خالتي قبل صلاة الفجر هي واحلام
وصلتها للكراج ورجعت للبيت صليت ونمت شويه
كعدت علاوي تريكنا وبدلنا وطلعنا اني ويااا للمدرسه
رجعنا الضهر اني طبخت غده عدنا سمج كليت وجبنا خبز انتضرنا صالح كعدنا نتغدا سوا كلنا
كملنا نضفت المطبخ وخليت علاوي بحضني ونمت
كعدت المغرب صليت
وبديت احضر بلعشى وعيني على الباب
منتضر خالتي احلام يرجعن من الزياره
ساعه ورا الاذان وهنا ماكو عشيت علاوي وكتبنا الدروس
وهنا ماكووووو
بوقتها ماكو تليفونات مثل هسه ونطمن عليهن
نام علاوي تعشينا اني وصالح
الساعه عشره بليل وهنا ماكو
صالح...ايجوز يباتن بلزياره
مختار...لا خالتي كالت نرجع ما نبات ايجوز مالكن سيارات
صوجي اني ليش عفتهن يرحن وحدهن جان لازم اروح وياهن
صالح...هسه يجن لا تخاف عليهن
مختار...كلبي ما مرتاح مااعرف ليش
صالح....يمعود كول يالله هسه يجن
مختار...يالله استر علينا ورجعهن سالمات