زاهر.. الداهيـة، الأخبار عنده حصرية، مفيش حاجة بتحصل في العالم دا إلا وهو أول واحد يعرفها، لـذا
فتح زاهر الباب فجأة ودخل لأيوب اللي بيغير، صرخ فيه أيوب بضيق- مش مية مرة حذرتك تخبط قبل ما تدخل
رد زاهر بصوت متقطع متحمس- سوزي اليوراني.. أتخطفت
بصله بزهول قبل ما يطلع يجري، قميصه كل أزاره مفكوكة، وحاله مبعثر ووراه زاهر بيحاول يلاحقه، يدّله على طريقها،
وصلوا بعد شوية لشارع جانبي فيـه وشـوش لكن رؤيته مشوشة، قرب من عربية بيبانها مفتوحة، الدم في كل مكان، بص حواليه للحظات بعقل واقف، سوزي إتاخدت من هنا، بأي سيناريو مش عارف
مسك في طرف الباب المفتوح يضغط عليه بقوة، قرب زاهر منه بخوف.. خايف ينهار لكنه بعكس توقعه، كانت لحظات كافية إنه يستوعب وينصب طوله
يبص لزاهر وبعزم- خلينا نلاقيها
هز زاهر راسه بتأكيد إنه ميقلقش، قبل ما ياخدوا خطوة صوت فرامل قوي وعربية بتركن بعشوائيـة وجنون، غمض زاهر عينيه بإدراك.. تاني واحد يعرف الأخبار في العالم دا بعده.. معاذ
إن كان الأمر ميهموش
لكن لو سوزي.. هو أول العالمين أكيد!
قرب معاذ بخطوات سريعة.. سريعة لحد ما بطأت فجأة، بتتقل خطواته كل ما يقرب من العربية يبص ليها من كل ناحية بزهول، لآثار الدم، لمح شنطتها واقعة على الأرض ومفتوحة.. ميل براسه سنة على جنب كدا وهو بيقرب أكتر لحد ما سند بإيده على ركبه وهو بيقعد على الأرض بإنهاك.. كإنه إتهد في ثانية ميل بجسمه بتقل على جنبه.. كان هيقع لكن كارين جريت تلحقه تمسك دراعه تسنده بتضرب بخفة على وشـه تفوقه لكن عيونه وبوقه مفتوحين على وسعهم من الصدمة
عقله وجسمه إتشل
كل دا تحت نظرات زاهر.. اللي مصدوم من شكل معاذ، أول مرة يشوفه كدا، زاهر خير العارفين بيه، معاذ داهية، قوي، قادر، لكنه مش مهتم إنه يثبت حاجة ولا يكون حاجة
دلوقتي بيشوفه في أضعف حالاته، حاجة مبتحصلش لحد في قوته غير لو بيحب.. بيهوى.. من كل قلبه!
لو أي حد قريب معاذ مخطوف غير سوزي مكنتش دي هتكون حالته مكنش هيرمش ليه جفن قبل ما يرجع المخطوف بدم بارد
لكن اللي قدامه.. كإنه جثة!
بص لأيوب اللي تعابيره كانت غير مفهومة، لكن دلوقتي مش وقت أي حاجة
قرب حد من رجالته فشاورله يجيله، قرب منهم وأخيرًا فاق أيوب من حالته وبصله وبدأ يفكر يعملوا أية
أما بالقرب منهم عند معاذ، فالحال غير
دي تاني مرة يحس إنه ممكن يخسر سوزي، والمرة دي أبشع، أول مرة كان قلبها، راح ومش عارف يرجعه
لكن هي.. خسارة ميتحملهاش
لو تكون سليمة قدامه ومع غيره، أهون من إنها تكون بين إيديه ويفقدها في لحظة زي كدا
كارين جنبه قليلة الحيلة مش عارفة تتصرف وهو كإنه لا سامعها ولا عارفها، عيونه بتبصلها لكنها مزغللة
الدم اللي قدامه موقف عقله، لو كان دمها؟ لو آتاذت، أية مدى جرحها؟
مدى وجعها
مين السبب.. هيكون أكتر واحد لازم يدفع التمن
*****
في مكان زي قبـو، فتحت سوزي عيونها وهي بتتآوه بآلم بعد ساعتين تقريبًا بصت حواليها وهي بتفتكر اللي حصل، قاعدة على كرسي، وإيديها فيها أساور حديد
حواليها حراسة كتير، لمح حد فيهم إنها صحيت فطلع تليفونه يتكلم فيه
عشر دقايق وأتفتح الباب ودخل حد، رفعت وشها تبصله ملامحه مألوفة..
بصوت يبان مرح لكنه خالي من الروح- أخيرًا صحيت الأميرة.. مش متخيلة الدنيا بسببك برة مقلوبة أزاي، معرفش إنك محبوبة للدرجة دي
نظراتها كانت باردة، بتحاول تجمع، تفهم.. هي هنا لية
وعايزين منها أية، لأي أغراض؟
إنتقام منها؟ عيلتها، خطيبها.. حبيبها
كترت معارفها
فتح فونه يوريها فيديو زي بث حي كإن حد هناك بيصور حصري
- شايفة الكل ملهوف عليكي أزاي؟ من أول أكبر أعدائك
وقعت عيونها على زاهر ومعاذ وكلامهم الكتير وتحركاتهم هنا وهناك، ورجالتهم.. وجدية ملامحهم
- لخطيبك العزيز..
قاعد قرب مكان خطفها، على حجر موجود، باصص للأرض وشعره مبعثر من فركه فيه، زرايره كلها مفتوحة ومشمر أكمام قميصه، ماسك دبلته بيلعب فيها بشرود وبس.. كارين بتكلمه لكن مفيش أي رد فعل منه
وأخيرًا أهلها، طاهر وحليم وعزيز.. والجنون ماليهم
وهما لأول مرة بيحاولوا يتصرفوا من غيرها.. وعلشانها!
بَعد الفون عنها وقفله وهو بينطق بسأم مصطنع- بس للأسف أكتر واحد قولنا هيخاف على الأميرة ملهوش وجود
بصتله وهي بتستجمع.. فين أبوها؟
- شكلك مطلعتيش أميرة شاكر بيه ولا نقطة ضعفه.. أصل دي مش ملامح واحد نقطة ضعفه في خطر
قالها وهو بيفتح الفون على فيديو تاني، من قلب بيتهم، في مكتب أبوها وهو قاعد على مكتبه بيبص لسقف الأوضة بجمود
خايف.. ومتوتر.. لكن مش عليها
هي حفظاه، هنا هو في أسـوء حالة، عمل حاجة هيندم عليها، غلطة هيدفع تمنها
غلطته مع حلف سوزانكس علشان كدا هي هنا؟ ولا.. حاجة تانية؟
- أبوكي دلوقتي مش خايف على خطفك.. لإنك متهموش، لا كنتي تهميه في يوم ولا هتهميه خلاكي نقطة ضعف وهمية يصدرها للناس، علشان لو في آذية تصيب العيلة تيجي فيكي.. بعيد عن اللي يهموه بجد.. أولاد أخواته اللي رباهم وكبرهم على إيده.. وابنه.. الوحيد
بصتله بتشوش وصمت كعادتها، مش بتحب حد يفهم حيرتها
كمل- لكن.. أحنا عارفين كويس أزاي نخليه يقلق من وجودك هنا.. يخاف.. حتى لو مش عليكِ
يخاف من اللي هتعرفيه وفكر إنه أندثر وراح مع الزمن
من ملامحه المتحمسة، عرفت إنها هتعرف حاجة مكنش لازم تعرفها
حاجة هتغير عالمها، وحياتها..
- سمعتي عن مقتل جوز الكناريا الشهير فؤاد زيدان وجيهان إليازي؟
قالها وهو بيلف حواليها كإنه بيحكي قصة ممتعة
- أكيد سمعتي عن الشكوك اللي حوالين أبوكي إنه ليه دخل في موتهم
نطقت بصوت عصبي- أبويا ملوش دخل باللي حصل، كله كلام.. لو معاك دليل طلعه
- وماله.. جاهزة تشوفي الدليل بعينك؟
كمل بسخرية- تشوفي حقيقة الراجل اللي مسمياه أبوكي
أصله حتى لو قتل.. ما كتير بيقتل، هنا كله بيقتل
أية صدمتها فيه لو قتلهم؟ علشانهم مهمين زيادة يعني؟
طلعها من أفكارها صوت شاكر.. عرفاه رغم أختلاف النبرة وبيان صغر السـن فيها، لسة فيها القوة والحبروت.. والغل!
- دبر ليهم الحادثة يارفيق مش عايز فؤاد يطلع منها حي، عايزك تخلصلي على نسل زيدان، أنا ما صدقت إن أيوب بدأ يكبر ويعجز والعشاير تفقد ثقتها فيه وعياله لسة بدري عليهم
دلوقتي بيفكر يسلمها لجوز بنته؟ يبقى بيحلم..
صوت رفيق- متقلقش رجالتي هينفذوا المطلوب، بكرة هتسمع خبرهم
شاكر بغل- عايز أشوف بعيني،
- هبعتلك المكان والوقت وتعالى
رمشت تمحي أي تأثر من ملامحها، مفيش حاحة تفجعها لدلوقتي
قرب الراجل منها أكتر يحط فون قدامها يشغل فيديو يبان عليه القدم وقلة الجودة لكن الوجوه باينة
عربية سايقة بأقصى سرعتها مش عارف السواق يسيطر عليها، قبل ما يفقد السيطرة تمامًا وتتقلب كذا مرة ورا بعض
لحظات بعد الحادثة هادية لحد ما ظهر شاكر بيقرب من العربية ورفيق معاه بيصور لكن وهو مهتم إن الفون ميظهرش
بص شاكر للعربية المدمرة بزهـو، لفؤاد الميت هو ومراته، سمع صوت تآوه فنطق رفيق بخضة- في حد عايش، خلينا نمشي
بجبروت نطق- أستنى
بص للمقعد اللي ورا لمح طفلين، ولد وبنت، الولد رجله مدمرة ومغمى عليه وحاضن البنت حاميها، رفعت البنت عيونها تبصله بنظرات مشتتة
وقف يبصلها كتير طال صمته فنطق رفيق- بتعمل أية يلا بينا قبل ما البت تحفظ ملامحك
- أنا هاخدها معايا
بصله بزهول و- بتقول أية؟
- البت دي فيها دم أيوب إليازي وزيدان، هتطلع داهية، هتنفعني.. لو ربيتها على إيدي هتطلع ديـب أتسند عليه
تخيل أحاربهم بيها وهما ميعرفوش إنها تخصهم
النشوة اللي ملته من مجرد التفكير خلته يفتح الباب بتهور ويسحبها..
ويقول بآمر- أحرق العربية وحط جثة مكانها متفحمة
بص رفيق للعربية وللولد اللي بيتآوه بتعب رغم إغماؤه بنوع من الشفقة، قبل ما ياخد قراره، بَعده كإن النار طيرته وخلاه يعيش
طالاما لسة فيه النفس.. بعد ما بدل أخته بجثة محروقة
وسوزي لسة مش فاهمة، مش مجمعة ومش مستوعبة
أو بدأت تتكون الأفكار ورفضاها؟
صوت الراجل- لسة برضوا مش فاهمة؟ مش مستوعبة لية ذكريات طفولتك كلها مشوشـة، سافرتي سـنين ورجعتي مرة وحدة.. دقيقة
شغل فويس أخير، قصير..
- مقولتليش العيال دي كان اسمهم أية؟
- ريم ورحيم فؤاد زيدان
- أمم ريم.. هغيره
خد لحظات يفكر لحد ما نطق- هسميها سوزي.. سوزي شاكر اليوراني
نطقها بتنغم وكإنه بيحلم.
الناس اللي ياما استقلوا بيه، هو سبب وجعهم دلوقتي وكسرتهم
ومعاه جوهرتهم
هيخليهم كل يوم يتمنوا لو كانت تبعهم.. لو كانت بنتهم
خلص الفويس وسوزي باصة قدامها بعيون جاحظة، والراجل بيبص لملامحها برضا تام
حقق المراد،
- هـي دي رد الفعل اللي كنت عايزاها، اللي يكسر شاكر مش وجودك من عدمه، إن سره يتكشف ويطلع للنور، إن زيدان وأيوب يعرفوا مين عدوهم الحقيقي اللي خد منهم نور عينيهم
كل العداوة والتنافس بينهم حاجة.. ودم أهلك حاجة تانية
نهاية شاكر قربت
أهلك..
أهلك..
أتكررت الكلمة كتير في عقلها، يعني أية؟ عمر كامل طلع كدبة، سنين عايشة مضلة؟
بص لساعته و- اللي مطلوب منك خلص، قريب هترجعي لبيتك سليمة.. وأسفين لو جبناكي بطريقة مش ولا بُد
كمل- دلوقتي الخيار في إيدك.. هتعملي أية باللي عرفتيه، هتداري على شاكر اللي إيده مليانة بدم أهلك لإنه رباكي وآواكي.. ولا هتاخدي حقك
بس صبرنا بينفذ بسرعة، لو متصرفتيش، إحنا هنتصرف
شاكر لازم يتلدع على عملته وإنه فكر يهدد رفيق باشا علشان يخلينا نضمه للحلف غصب
خرج بعد ما شاور للرجالة إنها تفك قيودها، فعلًا إتفكت، والكل مشى والباب أتفتح، وفضلت هي مكانها مش متحركة
بتتمنى كل دا يكون كدب ومش حقيقي
أعداءها، أكتر ناس أتربت على كرههم طلعوا أهلها، رحيم.. الشاب اللطيف الراحة اللي بتحس بيها معاه طلع ليها مبرر قوي.. هو أخوها
عزيز..
طاهر..
حليم..
أهلها وناسها، أبوها ودلعه ليها، ثقته فيها، إستثماره زي ما بيقولها
أيوب.. مبقاش في بينها وبينه حدود، بقى أقرب من أي حد تاني، بقى ينفع يكونوا سـوا
والحب بينهم ياخد فرصة..
مسكت دبلتها تلعب بيها بشرود كعادتها مؤخرًا لما عقلها يبقى مليان أفكار
هتقدر تسيب معاذ، مبقاش في حجة
الزعامة وتقدر تعيش إحساسها ببساطة وهي بتنتمي لعيلة أبوها أو أمها..
كل الأبواب أتفتحتلها..
مع صوت دوشة عليت في المكان وأصوات كتير قبل ما يظهر أيوب في الصورة داخل بيجري، لمحها فوقف يتنفس بعمق وراحة كبيرة، قبل ما يبتسم وهو بيطلع يجري ليها يوقفها يحضنها وهي بيتنفس براحة
- كنت هتجنن عليكِ.. أنتي كويسة صح؟ كويسة
بَعدها يبصلها من كل الزوايا، يطمن من كل النواحي..
مهموش مكان ولا زمان ولا ناس ولا إعتبارات
مهموش حد..
لمحت بعيون مشوشة معاذ واقف ورا، ساند على الباب بيبصلها وهي بين إيدين حد تاني، ساند بإنهاك على الباب وكإنه هو المخطوف مش هي.. ابتسم بسمة كبيرة وإتنهد تنهيدة عميقة لما شافها بخير
قبل ما بخطوات بطيئة ينسحب ببطء من المكان
هو أحق حاليًا يكون معاها، بس هي أكيد محتاجة تكون مع حد قلبها معاه
و.. هو لسة محتاج يكون لوحده يفضي خوفه والساعات المرعبة اللي عشاها..
أصلك مهما حاولت وإجتهدت.. بتخسر في حرب لما يكون القرار للقلب
وأحسن الخاسرين اللي بيعرفوا يعترفوا بخسارتهم بدري
لسة معترفش بس يمكن يستسلم بدري
مشيت سوزي مع أيوب وهي لسة شاردة وساكنة
تعمل أية؟
الفصل الثالث عشر13
13..
أتحرك أيوب بعربيته مع سوزي، الجو بينهم هادي هي مسهمة مش متكلمة، بيبصلها بين دقيقة والتانية لكنها مش مركزة
لحد ما نطق أخيرًا- سوزي.
مـد إيده يمسك إيدها فإتخضت تبصله وهي بتسحب إيدها بحركة تلقائية، أبتسم يطمنها و- دا أنا أيوب.. حبيبك
أبتسمتله لما رجعت لأرض الواقع، كمل هو- ومش هكون غير حبيبك، متعرفيش الساعات اللي فاتت دي عدت عليا أزاي، وقتها كنت هتجنن بلف حوالين نفسي، أكتسبت طاقة معرفش جتلي منين، أنتي بتخليني حد تاني ياسوزي
وعلشان كدا.. أنا مش هسمح للمهزلة دي تستمر، العبط اللي بيحصل هينتهي، لا هتكوني لغيري ولا هكون لغيرك
ولا هسمح لعداوة سخيفة بقالها سنين تقف حائل بينا
أنا هعرف الكل إني بحبك وهقف في وش الكل وهتجوزك
وأول خطوة علشان دا يحصل..
مسك إيدها داس على صباع معين و- الخاتم دا وصاحبه يطلعوا من حياتك
بصت للخاتم ومشاعر غريبة كتيرة محوطاها، اللي عرفته واللي أيوب بيقوله، عايزة تقوله فعلًا مبقاش في حاجز بينا
بكلامه عن الخاتم.. أفتكرت صاحبه اللي لمحته خطافي قبل ما ينسحب
فبصت لأيوب تقول بتوقع- أنت طلبت مساعدة معاذ؟ علشان كدا لقيتوني بسرعة
نفى بسرعة، يقول بصوت شبة مغرور وواثق، ينسب الحق لأصحابه- لقيتك بنفسي.. ومع زاهر، جهد إليازي خالص
معاذ بتاعك دا
حرك جانب شفايفه بتريقة مكمل- وقع من طوله، طلع هفأ، مدينله حجم أكبر من حجمه أنتي وزاهر
بصتله من غير رد، ميعرفش هو معاذ
لكنها تعرفه، حجر ميقعش إلا لو ورقة طيرته
معقول هي الورقة؟ كل حاجة بتقول إن هـي الورقة!
أفتكرت شكله لما الراجل وراها الفيديو أزاي كان مسهم وتايـه،
- وصلنا..
فاقت على صوت أيوب، بصت حواليها لقيت إنها قدام البيت
- تعالي هنزل معاكي لازم أواجه باباكي
منعته، لسة في كتير قدامها تعمله، كتير تفكر فيه
- مش دلوقتي
بصلها برفعة حاجب فسرت- صدقني كل حاجة هتتحل، إديني بس وقت
مكنش فاهم، لكنه بيثق فيها، فهز راسه بتمام
نزلت بعد ما ودعها ودخلت للبيت، تبصله وهي بتمشي بأحاسيس غريبة، مطلعش مكانها، مطلعتش بنت البيت دا زي ما عاشت طول عمرها مصدقة الحقيقة دي
كل حاحة حواليها شيفاها ضبابية، الدنيا سودا، العالم كله أسود
لسة بتحاول تستوعب وتصدق، بس هنا جه دور إنها تشكر معاذ، هو اللي خلاها إنها في ظرف زي دا ومع حقايق بشعة زي دي، تبقى لسة واقفة على رجليها، مش مبينة ضعفها وتستوعب أسرع من غيرها
كل حيلة، كل مهارة، كل حاجة اتعلمتها
كان الفضل يرجع لمعاذ فيها
دخلت البيت أخيرًا فجرى عزيز عليها يحضنها ويطمن عليها، من بعده طاهر وحليم، خرج شاكر على الصوت
وإتعلقت عيونهم ببعض في نظرة طويلة
قاطعها لما قرب، يقول ببسمته المعتادة.. المحبة اللي قادرة تكتشف دلوقتي تزيفها لأول مرة- كنت عارف إنك هترجعيلي من غير خدش واحد، بنتي.. وريثتي
قرب يحضنها، جت ترفع إيدها تمنعه لكنها وقفت، لسة مأخدتش قرار تعمل أية
تواجه ولا تنكر،
بَعد عنها أخيرًا قبل ما يقول طاهر بغيظ- طبعًا خطف سوزي دا كان رد فعل على هجومك على رفيق، مش صح ياعمي؟
بص الكل لشاكر اللي حاول يخفي توتره، كمل حليم- أية اللي بيحصل ياعمي بالظبط، عرفنا علشان نبقى معاك على الخط، نعرف أية اللي مستنينا
زعق- مفيش حاجة مستنيانا دا حوار بيني وبينه وأنا هنهيه، هقابله وأتفاهم معاه.. محدش فيكم ليه دخل باللي بيحصل وأنتي ياسوزي يلا أطلعي أرتاحي أكيد تعبتي
هزت راسها بتمام، لسة هتمشي دخل جغفر الآيد اليمين لشاكر بيجري وهو بيقول- مش هتصدق اللي بيحصل ياشاكر بيه
بص الكل ليه بإستفهام ففسر- المقر الرئيسي لحلف سوزانكس بيولع بكل اللي فيه، أول مرة حد يعمل حاجة زي دي من غير ما يبعت إنذار او تحذير زي ما متعودين
مش كدا وبس.. أي فندق أو ملهى.. أو مينا يخصهم اتولع فيه، دا غير إن حصل هجوم مسلح على نص أعضاء الحلف..
وراهم صور وفيديوهات بتوصله أول بأول،
والكل بيبص لبعض بتعجب، بص طاهر لشاكر اللي نفى- مش أنا أكيد أنا مستحيل أتهور وأعمل كدا، ولا عندي إمكانية إني أعمل كدا
وسوزي بصتله بسخرية مريرة، لانه لو هيعمل.. أكيد مش هيعمل علشانها
حليم بتعجب- أومال مين!
وصل لسوزي في اللحظة دي رسالة فتحت شنطتها اللي اعطالها أيوب، مسكت فونها وفتحته لقيت إنها رسالة من معاذ بصورة
فتحتها لقيت جثتين قدامها، الرجلين اللي خطفوها، مقتولين بأبشع الطرق، لدرجة إنها هي وبكل الدموية اللي عاشتها كطل حياتها وشافتها، اتخضت وخافت.. وقرفت
لحظة ووصلها فيديو تاني، لية وهو طالع من فندق وبيرمي ولاعة فبيتحرق وراه، ولقطة تانية في ميناء بيولع وراه وهو بيبتسم للكاميرا.. ليها.. كإنه بيبصلها
وكذا لقطة مجمعة وهو بيولع في كل غالي وليه قيمة يخص حلف سوزانكس، وأغنية
' l'd let the world born '
let the world born for you ' شغالة في الخلفية
' سأدع هذا العالم يحترق، سأدع هذا العالم يحترق لأجلك '
بيقلب العالم كله ضـده حرفيّا، بيفتح عليه نار جهنم!
كل دا لية؟ علشانها هي.. سوزي
معاذ بيعمل كدا علشان بيحبها، معاذ عرض مساعدته علشانها، عادى أيوب في البداية علشان كل دا يحصل
كل الأوراق أتكشفت واتفهمت،
وخراب بخراب بقى، بمشاعر غريبة ومش مفهومة
لقيت نفسها بتبتسم وهي بتلعب في دبلتها
حد بيولع في العالم علشانها
وأيوب بيقول عليه هفأ، بيقول عليه ضعيف،
قالتله أنت متعرفهوش، هو دا معاذ
حبه من نـار! نار هتولع فيه قبل ما تولع في اللي حواليـه.
*****
دخل أيوب المكتب وهو رايق وبيغني، بيلعب في سلسلة مفاتيحه، حاسس بالنصر لأول مرة، وبالقوة
غلب معاذ، معاذ طلعها من وسط هجوم
لكنه انقذها من إختطاف، حبه أقوى، وهو أقوى
دخل عليه زاهر لقيه في حالة الروقان دي، قعد قدامه وهو بيبتسم و- اللي واخد عقلك
- هو في غيرها، إنهاردة شوفتني وأنا بحاول أوصلها أنا حسيت إني مش أنا.. كان عندي استعداد ادخل هجوم زي اللي حصل من فترة دا علشانها،
شوفت الحب الحقيقي، مش تقولي معاذ اللي وقع جنب نقطتين دم فكرهم بتوعها دايخ
حرك زاهر راسه بقلة حيلة، لسة أيوب كتير عليه علشان يستوعب العالم دا كله
فتح الفون و- معاذ اللي مش عاجبك دا، تعالى شوف عمل أية بعد ما وقف على رجليه وعرف أن سوزي رجعت بيتها سليمة
وراه كل الدمار اللي ألحقه بالحلف، وأيوب بيوسع عيونه بعدم تصديق و- دا مجنون
- دا حقيقي.. بس شوفت معاذ قادر على أية؟ هو بس الصدمة شلته، وقفت عقله، لكن لما عقله رجعله شوف قلب الدنيا عليهم أزاي
فضل أيوب يبص للقطات المتفرقة اللي موجودة وبتتسرب بسرعة البرق، والكل عرف الكواليس اللي وراها
حبيبته كانت مخطوفة فبياخد حقها
وردرو الفعل كانت مختلفة، لكن تعليق بس لفت إنتباهه
' علشان كدا بقول دايمًا أنا مش عايزة البطل اللي يضحي بيا علشان العالم
انا عايزة الشرير اللي يحرق العالم علشاني '
وحس إنه بيخسر لتاني مرة قدام معاذ
*****
في بيت زيدان،
واقف معاذ قدام سور بلكونة بيبص لجنينة قدامه فيها نافورة وسرحان في البجع اللي فيها، قرب رحيم بكرسيه العجل لحد ما وقف وراه
- ناوي على أية بعد ما خربتها ياحلو؟
بصله بملامح هادية، مسالمة، مستسلمة و- ولا حاجة
رفع رحيم حاجبه و- بعد دا كله جاي تقولي ولا حاجة؟ هتستسلم بالسرعة دي؟ هتسيب سوزي؟
- قلبها مش ليا، مهما قولت ميهمنيش تحبني ومهم تكون معايا هبقى كداب، أنا عايزها هي بكل حاجة فيها.. مش عايزها وناقصها أهم حاجة.. حبها وقلبها
رحيم بغيظ- سوزي دي غبية ومبتفهمش، مش ذكية زي الكل ما بيقول، اللي تسيب واحد زيـك ومتحبهوش تبقى عبيطة، وعلشان مين؟ واحد عبيط زي أيوب دا
- لاحظ إنه ابن خالك
رفع ايده بلا مبالاة، محدش غالي في حياة رحيم قد معاذ
سـاد صمت بينهم لثواني لحد ما قطعه رحيم بغيظ أكبر- ولما بعد دا كله هتسيبها، حرقت العالم علشان خاطرها لية ياحبيب
- ما أنا طول عمري بحميها وباخدلها حقها حتى لو مش قريبة مني، جت على المرادي؟
- على رأيك.. بس المرة دي صعبة، كدا بتبعد الزعامة عنك
- كدا كدا مش عايزها كنت هخدها علشانها،
بصله رحيم بغيظ كتير، لو يقدر يخنقه
رجع معاذ يبص للنافورة قدامه ويسرح فيها، قرب رحيم منه لحد ما وقف بكرسيه جنبه
إتنهد بآسى و- البجعات دي أخر حاجة باقية من ريم..
هـي اللي بتفكرني بيها، حتى ريم نفسها مش فاكرها، لكن فاكر زنها على جدي لحد ما جابهم ليها
- الله يرحمها
قالها معاذ وهو بيربت على كتفه بمواسـاه.
هـي دي علاقتهم، أساسها المواسـاه، معاذ يـواسي رحيم على كل ما فقده، من أحلام وعيلة وصحة وطموحات
مش راضي يسعى ليها
ورحيم يواسـي معاذ في أصعب خسارة ليه.. حب مش مكتوب يكون ليه..
*****
بعد يومين،
- رايح فين؟
قالتها سوزي لشاكر وهي واقفة عند باب مكتبه في البيت، رد وهو بيلبس بالطو أسود طويل- هقابل رفيق، هحاسبه على الحركة البايخة اللي عملها معاكي
بسخرية- تحاسبه ولا تعرف أية اللي حصل معايا بالظبط؟
بصلها بضيقة حاجب وإستفهام- قصدك أية؟
فكت إيدها اللي كانت مربعاها وهي بتقول بنبرة ساخرة مريرة- بقالي يومين بفكر وعقلي بيرجعلي كل حاجة لحد ما أستوعبت اللي بيحصل..
أنا مش جوهرة شاكر اليوراني.. أنا الطُعم اللي مقدمه للناس
قربت بخطوات بطيئة وصوتها بيعلي سنة سنة- مش بنته الحبيبة بل حارسته العزيزة..
أصل لية؟ واحد عنده تلت رجالة في البيت طُول بعرض كلهم من صلبه وبيعتبروه أبوهم، يسيبهم كلهم ويختار بنت تكون خليفته؟
لية يميزها؟ قوية زيادة؟ ذكية زيادة؟
ولا علشان هي ليها مهمة تخلصها وتمشي، تجيب الزعامة وبعدين ترميها لأي حد..
دايمًا مقدمني كصفقة، خدوا سوزي، مخليني عرض..
لية؟ حب..؟ ولا حاجة بتفتخر بيها.. مكسب
بتكسر بيه عيون ناس.. مش عارفين بيها أصلًا
كان بيسمعها مزهول وكل شوية يفتح بوقه بصدمة أكتر، رافض يصدق اللي وصله
سوزي عرفت اللي ياما عاش عمره يخبي فيه، سـره الوحيد
لكنه حاول يتماسك ويعمل عبيط- أية الكلام الفارغ اللي بتقوليه دا، معنديش وقت ياسوزي لما نرجع نتكلم..
قاطعته- ريم.. متعملش مش فاهم.. كل حاجة اتكشفت وعرفتها
أنا ريم.. ريم فؤاد زيدان،
عيشتني كسوزي عمري كله، خليتني عدوة لعيلتي، كنت عايزني أسرق منهم حاجة ملكي..
بس خلاص كل دا خلص، من إنهاردة هعيش كـ ريم، هندمك على كل ثانية ربيتني فيها وزرعت فيا كل حاجة علشان أحقق أحلامك.. هستخدم كل حاجة علمتهاني علشان أخد منك أحلامك.. أخد منك كل حاجة كان نفسك فيها
هتشوف بنفسك اللي ربيتها على إيدك هتعمل أية
لفت علشان تمشي لقيت عزيز واقف بيبصلهم هما الأتنين بصدمة، وعيونه مدمعة
بصتله للحظات طويلة من غير كلام قبل ما تمشي وتسيبه، وتسيب البيت كله
مبقاش ليها مكان هنا،
ولا في أي مكان تاني، أختفت سوزي عن الأنظار فجأة للمرة التانية
لكن المرة دي بموافقتها