رواية اولاد تسعة الفصل الثالث عشر13بقلم جمان فريد

في صباح شتوي جميل تعزف فيه الامطار احلى الالحان ع اوتار القلوب..منهم قلب ربيعه اللي كانت تجهز في الفطور وهي مبتسمه..

من ليله الأمس لهالحظه مش قادره تحوله من بالها شخصيته بكل شي فيها جذبتها وهيئته وهو باللبس العربي سلبت قلبها منها..

ومازادها ع مابيها هو احاديث النساء عنه في الحفله كلامهم كله عن نجاحاته وقوته وحكمته والاهم عن معاملته لزوجاته..

ويبدا خيالها في هالحاله يسرح بيها بعيد لعند ماوصل بيها تشوف نفسها ولت قرينته حتى هي..

ومجرد ماوصلت هني استاقظ عقلها اللي قاللها..

فيقي من الاوهام ومعاش تخلي خيالك يشطح بيك بعيد هلبه..بعيد عن واقعك وظروفك..

تعبوا عيونها بالدموع لكن شدتهم بعدين خدت سفرة ومشت طلعت بيها للدار اللي قاعده فيها عصمت..

🌿ومن الفطور في حوش عصمت للفطور في قصر ذهيبه..

ع طاوله الاكل كانوا مجتمعين الكبار..

تسعه وامه ومرت بوه وخواته وزوجاته اما الصغار كانوا يفطروا فيهم برنيه وتعويضه في الكوجينه..

🌱"طلعت اردنيه حتى هي وقالت تعرف عيلة عبير مرت محفوظ"

تسعه بعد سمع من امه قال..

/ايه في بينهم صلة قرابه..

هانيه قالت..

/ايه تسعه جت مرت وزير الاعلام..

تسعه قال.

/عزمته يجي بعيلته قلت بالك هانيه تستغل فرصه..

بضحكه قالت..

/سلمهولي ياربي..

ابتسم وهي قالت..

/طبعا حتى اني اختك مانضيعش الفرص شديتها وهدرزنا وتبادلنا ارقام التليفونات..

تسعه:اهم شي ماتحكيش عن البرنامج اللي في راسك لين تضمنيهم...

فريحه قالت..

/وعلاش هاللفه والدورة والتعب خلي تسعه يكلم راجلها طول..

هانيه قالت..

/لالا نبيهم يوافقوا ع الموضوع لأن عجبهم مش ع خاطر خوي..

زكيه قالت..

/ماهم عارفينك بنت مني واخت مني هكي ولاهكي ماشي موضوعك..

تسعه:لايام في فرق..خل نقولك وين..لو بإذن الله برنامجها نجح هي حتحس بطعم النجاح لأنها حاولت تسعى وتثبت نفسها عكس مالو اني سهلته عليها مش حتحس انها تعبت ع نجاحها لأنه جاها بالساهل والنجاح اللي يجي بالساهل طعمه صامت..

🍃طول ماهو يتكلم كانت فريحه تتأمل فيه بحب لكن نزيهه تشوفله بضيق..شبه مارقدتش الليله اللي فاتت وهي تفكر في كلام اختها مش واجعتها نفسها بس حتى فريحه واجعتها وممكن اكثر ماواجعتها نفسها لأنها تعرفها كويسه انسانه رقيقه وقلبها مش قوي وتعشق تسعه عشق مش عارفه كيف بتتحمل فكرة زواجه عليها.🍃

بلقيس قالت بضحكه..

/نجيه وعليه ياربي اللي مايعرف يقول كان الدرر..

هانيه قالت بإبتسامه..

/يابختنا بيه وخلاص..

وامهاتهم يسمعولهم وهما مبتسمات..

تسعه بضحكه:سيارة سيارة موديل السنه..تلقيها الاسبوع الجاي هني ياهانيه وتوصلك لحد عندك يابلقيس..

ضحكوا الزوز بمفاجأه وقعدوا يصفقوا من الفرحه والحماس واللي حواليهم يضحكوا عليهم..

ع جية وحده من الخدم قالت..

/سيدي تسعه جمال وصل..

هز راسه بدون مايرد عليها وهي حياته ومشت..

فريحه قالت..

/قولي تسعه جمال هدا متزوج؟

حرك راسه بالنفي..

هانيه قالت بضحكه..

/شكلك جايبتيله عروس..

ابتسم تسعه وخدي فنجان الشاهي وهو يسمع في رد فريحه..

"الحق ايه..ريتوا البنية اللي تخدم مع عصمت"

لما سمع ردها كان حيشرب الشاهي لكن بكلامها خلت الفنجان يوقف عند فمه..

هانيه قالت بإزدراء..

/مثقل دمها..

زكيه:بالعكس بنيه ماشاء الله عليها عاقله ورزينه واكابريه ماتقولش بنت عيله ع قد حالها..

بلقيس قالت..

/والله حق..اسلوبها وتصرفاتها راقيه هلبه..

وامها قالت..

/حتى اني عجبتني مؤدبه..

وهانيه ونزيهه يسمعوا فيهم وهما بينحرقوا من الغيظ..

فريحه:سمعتهم شن قالوا عليها؟..لو جمال مش متزوج قوله عليها تكسب فيها اجر مسكينه يتيمه والدنيا مبهدتلها..

نزل الفنجان ورده لمكانه بعدين ناض وقف وقال..

/خلاص معاش عندي وقت..اليوم مروح بعد المغرب..استودعناكم..

ومشي وهما معاه بنظراتهم اللي كلها استغراب..

فريحه قالت..

/خيره؟

بلقيس قالت..

/نتوقع من ردة فعله ان جمال هدا عنده قصه ولاحاجه..

هانيه:ومرات سامع بالدوة اللي طالعه ع البنت هادي وامها..

زكيه:استغفر اللهواتوب إليه..

هانيه قالت بإنزعاج..

/شن قلت يعني!؟

زكيه بحزم:مانبيش كلام في الاعراض لاقدامي ولامن وراي كبائر هادي يابنتي..

سكتت هانيه وهي منزعجه..

🌿هانيه اللي كانت محور حديث عيلة مرعي ع طاولة فطورهم..

🌱"اسعد نسيب خوي عبد الله"

مرعي قاله..

/ايه زبطه زبطه راجل كويس..خيره؟

فاطمه قالت..

/يبي يخطب هانيه بنت عمك..

ويشرق كريم بالعصير اللي كان يشرب فيه وقعد يكح"يسعل" لين عيونه دمعوا..عطاته اخته ميه وامه قالت بقلق..

/اشرب امي اشرب..

مرعي:ديما هكي الولد هدامستعجل ع كل شي..

هو بعد شرب الميه قال..

/مش هكي يابوي ماعرفتش كيف هربت مني..

مرعي هز راسه وهو يقول بتهكم..

/هربت منك..

ضحكت غزلان..

وامه قالت بإبتسامه..

/سلامتك وخلاص..ردت نظرها لراجلها وقالت..خل نرجعوا لموضوعنا..

كريم قال:امي سلامه يومها قال عمته ماتبيش تتزوج..

رفعت اخته حواجبه تعجبا..

وامه قالت بإستغراب..

/علاش العفو!

احمر وجه كريم وهو يقول..

/مانعرفش قال ماتبيش وخلاص..

فاطمه قالت بتعجب..

/منك نسمع..

غزلان:اني في مرة سمعتها قالت كان جي موضوع باهي مش رافضه..

كريم قال بإنفعال..

/بعدين بيجي سلامه واسأله يابوي قوله شن قال بوك لما خطب عمتك واحد من عيلة البندار..

مرعي قال:اها..لاالموضوع هداكا رد عليه تسعه من راسه مايبيش يعطيهم..

فاطمه:ايه سمعت بيه من العويله..باهي كان هكي انت افتح الموضوع مع تسعه اعرف رايه في الراجل كان تقبل بعدين نكلم هانيه..

ناض كريم من حداهم ومشي لداره وهو معصب وماحد ركز عليه غير اخته بوه وامه قعدوا مشغولين بالكلام عن نفس الموضوع..

🌿🌿🌿🌿🌿

خشت صالون العيله..

لقت ضرتها مقعمزه سرحانه وجنبها بنتها فايقه..

قعمزت جنبها وقالت..

/نزوهة..

شافتلها بصمت..

فريحه قالت..

/جوك مش عاجبني من امس حسيتك مش مزبوطه..

نزيهه قعدت تشوفلها بنظره فيها شي من الحزن وهي ساكته..

فريحه قالت بإستغراب..

/خيرك نزوهه قولي صار شي ضايقك امس؟

غيرت نزيهه نظرها عنها وقالت..

/لالا..غير شوره دوشه امس صدعتلي راسي..

فريحه:نجيبلك حبوب راس..

نزيهه قالت..

/لالا مش لازم تو يهدا بروحه..

ع خشة عبد المتين ولد بلقيس وهو يدب ع رجليه لما شاف ثريا قعد يقول..

"بيبي بيبي"

وقرب منها وطبس عليها وباسها من خدها..

نزيهه قالت بضحكه..

/من امس هدا حاله مع ثريا..

"عبودي مامي"

فريحه قالت..

/هني يابلقيس..

شويه وخشت عليهم بلقيس وهي تقول..

/انت هني دبدوبي..

فريحه قالت بضحكه..

/خش يقول بيبي بيبي..

ضماته بلقيس ورفعاته وهي تقول..

/طايح في غرام ثريا من امس مايبوس كان فيها..

ضحكت نزيهه..

بلقيس باست ولدها من خده وقالت..

/هي ماما خل نمشوا نوتوا رواحنا بابا قريب يجي..

نزيهه:كان قعدتوا للغدي..

بلقيس قالت..

/صعب امه ليها فتره في حوش خوها وتعرفوها قلاقه ماتحبش تقعد كان في حوشها..

ومشت طلعت بولدها من الصالون..

تنهدت فريحه وقالت..

/تعرفي..حاسه ان في شي صاير مع تسعه مركبه هم..

نزيهه قالت بقلق..

/زي شني!؟

فريحه ردت بقلق..

/مانعرفش..امس قعد الليل كله في المكتب..

نزيهه:قصدك ماجاكش بكل؟

حركت فريحه راسها بالنفي وهي مضايقه..

نزيهه وهي تشوفلها قالت في نفسها..

"شكلها بدريه كانت تلمح حق يانزيهه ماتتوهميش"

فريحه قالتلها..

/في شن تفكري؟

غمضت عيونها وفتحتهم بعدين قالت..

/اكيد صاير معاه شي في الخدمه شاغله..تنحل ان شاء الله تنحل مادوريش..

فريحه قالت بضيق..

/ان شاء الله...

🌿🌿🌿🌿🌿

مقعمزة في مكتبها مشغوله بملف احدى القضايا عندها ويقطع عليها انشغالها رنين هاتف المكتب...

رفعت السماعه وردت..

/السلام عليكم...

"وعليكم السلام مرت بوي"

غمضت عيونها بغضب..

"مرت بوي عطيناك وقت واكرمنا والمثل يقول اذا اكرمت اللئيم تمردا وان تمردتي هلبه وسكرتي راسك هلبه وجبرتينا نديروا شي ماكناش نبوا نديروه والله..

هي قالت..

/شن بديروا اكثر مادرتوا ياحقراء!

"الحقراء..زي ماخسروك في خالك بالحياة حيخسروك في خالتك بنقيض الحياة"

بعد ماقال كلامه هدا نهي المكالمه وخلاها ترمي السماعه وتطلع من مكتبها تجري وهي مرعوبه ع خالتها..

🍃خالتها اللي اتصل بيها خوها وطلب منها تجيه لعنوان محدد وهي من حسن نيتها وطيبتها الزايد طلعت من الفندق وخدت سيارة اجره توجهت بيعا للمكان اللي بتشوفه فيه واول ماوصلت غادي ونزلت من السيارة جاها واحد ملتم كتفها ولما جي بيخدره يفزعه صوت اطلاق النار..

شاف حواليه لقي واحد ضخم شاد سلاح وجايه يجري هو من خوفه طول طلق المراة وهرب وتجيه السيارة اللي كان ناوي يحط فيها خاله حسناء ويركب بسرعه وتنطلق السيارة زي الصاروخ وتطلع في جرتها سيارة تانيه تلحقها..

نبيهه"خالة حسناء" وهي تاخد في انفاسها بصعوبه كانت تقول..

/ووك عليا ووك ووك ياربي!

وطاحت ع ركابها وهي تتنفس بصعوبه والراجل اللي كان واقف جنبها وقف سيارة اجرة ورفعها للمستشفى...

 🌿🌿🌿🌿🌿

في احدى الزوايا التي تخفى عن عيون الخلق ولاتخفى عن عيون الخالق..

كانت وديعه مع صاحبها يرتكبوا في المعاصي تحت مسمى الحب..

هو غارق في شهواته وهي زيالمغيبه تلبي في طلباته طمعا في حبه ورضاه..

🕸"بجديات مش قادر نعيش من غيرك ياوديعه"

هي قالت بإبتسامة هويام..

/ولااني..تصدق امس مشينا لحفلة اللمة متاع صغار البي تسعه لما شفت نساوينه كيف صاحبات وعلاقتهم ببعض حلوة قلت في نفسي هادم مايحبوشي قد مايحبوا فلوسه والجاه اللي عنده لأن لو يحبوه حق مافيش وحده فيهم ترضى تشاركها فيه غيرها..واني مستحيل نرضى بحاجه زي هادي من كثر مانحبك نبيك ليا بروحي..

قاللها بإبتسامه ساحرة ونبرة لعوب..

/وحتى اني مستحيل نكون لغيرك حبيبتي..تنهد بضيق مصطنع وقال..لكن مش عارف لعند امتى بنقعدوا هكي..

قالتله بفرح مخفي..

/قصدك تبي تخطبني!؟

قاللها:اليوم قبل غدوة لكن مانبيش ندير الخطوة هادي الا بعد مانتم الحوش والحوش مازال يبي واني الفترة هادي ضايقه بيا هلبه..نزل عيونه وقال بحزن مصطنع..مرات نفكر..نفكر..غمض عيونه بشده بعدين فتحهم وقال..نفكر نقولك ماتوقفيش حالك ع خاطري وبري شوفي نصيبك..

شدت يده بقوة وقالت بفزع..

/مستحيل والله مانسيبك لو نقعد نراجي فيك العمر كله..

شافله بنفس ملامح الحزن الكاذبه وقال..

/مانبيش نضيعلك عمرك ونوقف في طريقك..

نزلوا دموعها وقالت..

/اني مانبيش غيرك كان ماتاخدنيش انت نموت..

مسح ع شعرها وقال..

/بعيد السو عليك..فيا ولافيك..

قالتله:بعيد السو..

تصنع مصارعة ملامح البكاء بعدين لف وجهه عنها وحط يده عليه وقعد يبكي..

هي بألم قالت..

/عادل!

هو قال..

/ياريتني ماحبيتك رفعت عيوني فوق هلبه وتعبت قلبي معاي..

وديعه قالت بنبرة باكيه.

/علاش هدا كله بس علاش!..سكتت شويه بعدين قالت..حبيبي تو نساعدك..

شافلها بفزع مصطنع وقال..

/لالا كله ولاهكي..

قالتله:مانقدرش نشوفك هكي وماندير شي..انت قولي كيف نساعدك قداش تبي قول بس..

حاول يجبد يده منها بش ينوض لكن هي شدتها وقالت بتوسل..

/عادل ماديرش فيا هكي..

هو دار روحه هدي شويه بعدين قال بألم وانفعال مصطنعين..

/وعد وعد قدام ربي بعد الزواج كل شي خديته منك نرده..

هي قالت..

/اني نبيك انت بس مانبي منك شي..

شافلها بنظرات حب كاذبه وقال..

/نحبك ونموت فيك..

🍃ورجع يمارس في مجونه معاها وهي مستسلمه تماما لخباثه هالشيطان..🍃

🌿🌿🌿🌿🌿

"ريتي يابنتي كيف خلوا خوي يبيعني"

حسناء وهي شاده خالتها قالت ودموعها ينزلول..

/خالي من يومه هكي يبيع الدنيا كلها ع خاطر مصالحه..

خالتها قالت بحزن..

/الراجل عنده حق يابنتي ماتقدريش عليهم بروحك..

مسحت دموعها وقالت..

/ارقدي توا ارقدي وارتاحي تو نوضك لما يأذن العصر..

تمددت خالتها ع السرير وهي تشوفلها بحزن..

وحسناء بعد ماغطتها قعدت مقعمزه حداها لعند مارقدت بعدين ناضت ومشت للحمام توضت ورجعت منه للدار لبست جلابيه وشاربه وجوارب واستقبلت القبله وبدت تصلي في صلاة الاستخارة..

🌿🌿🌿🌿🌿

"كان تشوفي اللي شفته تقولي هادم الناس العايشه حق"

قالت الكلام هدا فطيمة مرت كمال البندار لوحده من خواتها..

اختها قالت..

/ايه يحكوا عليهم هلبه يقولوا ناس متعلمه وراقيين..

فطيمه:هي هادي العلم اللي حني مانكسابوه الله يسامح بوي بعد الاعدادي قال قعمزي وعطاني لراجل زيه بالزبط مش راضي العلم للمراة..والله ندعي لربي كل يوم يعطيني ولاد بس مانبيش نجيب بنت تاخد حظي وطياح سعدي..

اختها قالت بضيق..

/قولي الحمد لله ياوخيتي غيرك مش لاقي ربع العيشه اللي عايشتيها..

ابتسمت فطيمه بألم وهي تقول..

/الحمد لله ع كل حال..

🌿🌿🌿🌿

الساعه التاسعه ليلا..

كان تسعه ماشي بإتجاه مكتبه اللي في القصر..

اول ماخش للممر اللي يرفعله بدت ع وجهه ابتسامه رافقاته لعند ماوصل للمكتب ويتفاجئ باللي يلقاه واقف يراجي فيه غادي..

"هشام"

هشام قدمله وقال..

/بوي من بكري نراجي فيك..

قاله بإبتسامة استغراب..

/علاش؟

قاله:نبي نتسلف منك كتاب في النحو شفته عندك في المكتبه..

قاله بوه:عرفت اما كتاب تقصد،لكن ماعرفتش شن بيدير بيه طالب يقرا سادس ابتدائي..

ابتسم وقال..

/اختاروني نشارك في مسابقه منهجيه ع مستوى المدارس وقالوا بتجي فيها اسئله معلومات عامه..

ابتسم تسعه وقال..

/باهي وفي باقي المناهج كيف بدير؟

هشام قاله..

/تو نتصرف..

مسح تسعه ع شعره وهو يضحك بعدين فتح باب المكتب والتفت عليه قاله..

/تفضل هشام باشا..

ضحك هشام خش وبوه خش وراه وهو يقول..

/برا خوده بروحك..

🌿ومن كتاب النحو صبح في اربع كتابات اللي في الأدب العربي والانجليزي والتاريخ..

هشام:نكملهم ونردهم..

بوه قاله..

/خودهم بكل..

هشام قال بفرح..

/صحيت بوي..صحيت هلبه..

ابتسم تسعه بعدين قال..

/سألت ع اختك كريمه وقالوا مستواها متحسن شويه نبيك تساعدها تزيد تحسنه بش تتخطى هالسنه وماتعاودهاش مرة تانيه..

قاله هشام..

/هي شاده هلبه واني نساعد فيها بإذن الله حتنجح..

تسعه قال بإبتسامه..

/ربي يحفظكم انت وخوتك ونشوفكم خيرة الناس..

هشام قاله..

/آمين..سامحني بوي عطلتك تصبح ع خير..

تسعه قال بإبتسامه..

/قدامك كل خير..

مشي هشام طلع وبوه مشي وراه وسكر الباب.

وفي هاللحظه يرن الهاتف..

التفتشافله بعدين مشاله..وقف قدامه ورفع السماعه حطها ع وذنه وقال..

/السلام عليكم..

"وعليكم السلام سيد تسعه"

ابتسم ابتسامه جانبيه وقعد ساكت..

"سيد تسعه اسفه اللي اتصلت بيك فهالوقت بس عندي شي مهم نبي نقوله..لو العرض متاعك مازال قايم....اني موافقه"

تسعه قال..

/صدقيني هدا احسن قرار تاخديه في حياتك..

"اسمعني شويه معليشي اني عندي شروط"

قاللها:اللي هي..

"تقدر تجيني غدوة المكتب بش نتفاهموا"

قاللها:نقدر..

"خلاص لنا لقاء تصبح ع خير"

ونهت المكالمه فورا هو ابتسم ابتسامه خفيفه بعدين حط السماعه في مكانها ومشي خدي المصحف من مكانه وقعمز بيه ورا المكتب..فتحه وبدي يقرا في ورده اليومي..

▪▪▪▪▪▪▪▪

"اكيد عندك خلفيه ع بعض النشاطات الغير شرعيه اللي يديروا فيها ولاد نور الدين..ليا فتره واني ندور ونحاول نجيب ادله تثبت تورطهم فيها وهما شكلهم عرفوا بالحاجه هادي"

تسعه قال:وهدا اكبر دافع خلاهم يحاربوك بهالشراسه..

هي قالت..

/اني نبيك تساعدني بش نكلبشهم ونرفعهم ورا الشمس..

ابتسم وقال..

/وهدا اللي ليا فترة ندير فيه..

ابتسمت وقالت..

/اممم..بعد مانوصل للي نبيه حنطلب الطلاق..

قعد ساكت وهو يشوفلها بنظرات هاديه..

هي كملت تقول..

/يعني زواجنا حيكون ع ورق..عقدت حواجبها وكملت تقول..عارفاتك حتقول حرام لكن يعني واسفه ع اللي بنقوله اني مجبورة جبر ع الزواج هدا..

ابتسم وقاللها..

/واني لو نقدر نساعدك بطريقه تانيه مانوخرش لكن لأني عارف طينة ولاد نور الدين اللي حيلقوها سبله لما يعرفوا اني وراك  بش يرموك بإفتراءات تانيه مالقيتش غير هالحل..

قالتله:يعني مش معترض ع شرطي؟

بإبتسامه قال..

/لا...

هزت راسها بعدين قالت..

/باهي خلال هالفترة وين بنقعد؟

قاللها:في الالف والخمسين في المنطقه متاع عيلتنا عندي حوش حتقعدي فيه انتي وخالتك تحت حراسه مشددة واني يوميا حنديرلكم زيارة..

ابتسمت وهزت راسها بالموافقه بعدين هو قال..

/بس في عندي شي لازم نعطيك بيه علم عارف انه مش مهم عندك لكن لابد نخبرك..

هزت راسها وهي تراجي فيه يقول اللي عنده..

تسعه قال..

/بعد مانعقد عليك بنتزوج..

رفعت حواجبها وهي مندهشه..

وهو كمل يقول..

/الفترة مش حتكون بعيده ممكن بعد شهر كان سخر الله..

ضيقت عيونها وقالت..

/القرار هدا فكرت فيه توا بس..

ضحك وقال..

/لاوالله ابدا..

ابتسمت بتعجب وقالت..

/اسفه لو بندخل في خصوصياتك بس في سؤال ملح ع عقلي ونبي نعرف اجابته،حق زوجاتك يعرفوا انك حتتزوج غيرهم من قبل لتاخدهم؟

قاللها:اول حاجه عطيتهم بيها علم لما خطبتهم..

حسناء قالت..

/وهما رضوا عادي!؟

قاللها:ايه..

قالتله؛بصراحة اني مستغربه فيهم جدا الزوز متعلمات تعليم عالي وبنات عايلات كبيره كيف قبلوا ع ارواحهم الحاجه هادي!؟

ابتسم وقال..

/في نظرك ربي يشرع شي فيه اهانة لعباده؟

قعدت ساكته وهي تشوفله..

تنهد وقال..

/اني ماشي معاهم بوصية الرسول عليه الصلاة والسلام..

"استوصوا بالنساء خيرا" معاشرهم بالمعروف والمودة والرحمه..حياة زي هادي مافيش مراة تكرهها يااستاذة.

مررت نظرها قدامها بعدين شافتله وقالت..

/متفاهمين..

بإبتسامه قال..

/خلاص ع بركه الله..بداية الاسبوع الجاي حيتم عقد القران تحديدا يوم الاثنين..

قالتله:كويس نلحق نرتب اموري لهداكا اليوم..

ناض وهو يقول..

/تمام نشوفك يوم الإثنين ان شاء الله..السلام عليكم

ناضت وهي تقوله..

/وعليكم السلام..

ومشي بيطلع وهي بعيونها معاه وفي عقلها مازال يدور الف سؤال وسؤال عنه..

🌿وتوا حيجي دور المهمة الأصعب وهي اعلام نزيهه وفريحة..

♤مااعتقدش كانت مهمه صعبه ع بوي جداي زكيه قالت الحاجه هادي عمرها ماكانت صعبه ع الراجل لكن اني قلتلها مش كلهم ياجداي في اللي كانت صعبه عليهم هلبه ممكن مش من حب بل مراعاة لشعور الطرف التاني..

🌿بعت تسعه ولده هشام لأمهاته يطلب منهم يجوا لحجرة المكتب..

نزيهه ع طول عرفت لشن طالبهم وع قد ماسألتها فريحه ماقدرتش تلمحلها حتى التلميح وفي قلبها خوف من ردة فعلها تعرف كويس ان فريحه مش قويه زيها بش تتحمل اللي بيصير فيها..

▪▪▪▪▪▪▪▪

ورا مكتبه كان مقعمز وهو يمرر في نظره بيناتهم وهما مقعمزات قدامه..

خدي نفس بعدين قال..

/اكيد تتفكروا كويس لما خطبتكم شن هي اول حاجه طلبت منكم توافقوا عليها..

قلب فريحه انقبض..بلعت ريقها وقالت..

/شن هي!؟

نزيهه قعدت تشوفلها بحزن..

ابتسم بعدين قال..

/انتي بالذات مستحيل تنسي حاجه زي هادي..

تعبوا عيونها بالدموع وهي تقول..

"تبي تتزوج!؟"

هز راسه بإيجاب..

نزلوا دموعها وهي تقول..

/قصرنا معاك اني ونزيهه ولاكبرنا!؟

قعد يشوفلها بنظرة عتب بدون مايتكلم..

مسحت دموعها وقالت..

/انت قلت خلاص معاش بناخد غيركم

قاللها:ولامرة قلته الكلام هدا يافريحه

فريحه قالت..

/ايه ماقلتاش لكن قعدت 13سنه مش مفكر فيه حتى التفكير علاش توا خطرلك!؟ معاش عجبناك طلعنا من قلبك خلاص حبيت غيرنا!؟

نزيهه قالت..

/فريحه..

فريحه قالت بشي من الانفعال..

/نبيه يقولي يصارحني معاش عجبناه معاش يحبنا!؟

غمض عيونه بعدين فتحهم وقال..

/تبي نرجعكبالزمان لقبل 13سنه متفكره الكلام اللي صار بيني وبينك متفكرة اني شن قلت وقتها!؟

قعدت تشوفله بصمت وهي تمسح في دموعها..

قاللها:لو تفكرتي بنسألك اني في شن قصرت معاكم في شن عطيتكم وعود وخلفتها!؟ شن هي الكلمه اللي عطيتهالكم ووليت فيها!؟

نزلت فريحه عيونها وهي تمسح في دموعها اللي ماباش يوقف جريانهم ع خدودها..

خدي نفس وزفر بعدين قال..

/عموما اللي شايفه انها معاش تقدر تتحمل الوضع هدا نسرحها بإحسان..

شافوله الزوز بصدمه..

هو قال..

/مانبيش نكون ظالم معاكم ولانبي نجبر وحده تعيش معاي غصب عنها..

شافوا لبعض بخوف وهو ركز ع نظراتهم وقال..

/شن قررتوا؟ صدقوني شن ماكان قراركم حنحترمه ومش ظالمكم نهائي حقوقكم كلها تاخدوها..

نزيهه قالت..

/من البدايه عارفه كل شي ورضيت ماعنديش اعتراض..

خدت فريحه نفس بعدين مسحت دموعها وقالت..

/حالي من حالها مادام رضيت من البدايه مش حنعترض توا..

دام نظره لفريحه للحظات بعدين غيره عنها ووجهه لطاولة المكتب وهو يقول..

"بناخد اتنين"

وفريحه حست برصاصتين اخترقوا قلبها قعدت تراجي فيه يوقف في أي لحظه..

ونزيهه كانت تشوفلها بألم..

هو قعد ع حاله وكمل كلامه..

/وحده فيهم سبب زواجي منها حمايتها..صايرة معاها مشاكل كبيره وتهددت بالقتل واني بناخدها بش نحميها لعند مايزول الخطر عنها وبعدين كل حد يمشي ع حاله..

نزيهه قالت..

/حسناء تاشفين..

قام عيونه فيها وهز راسه بإيجاب بعدين قال..

/مش حتعيش هني حتسكن في حوش جداي ذهيبه الله يرحمها لأن ظروف زواجي بيها مختلفه..

فريحه قالت..

/هادي المحاميه الزواريه؟

شتافلها وقال..

/ايه..

رشفت وقالتله..

/باهي والتانيه؟

غير نظره القدام وقال..

/لما يجي وقتها تو نقوللكم عليها.

فريحه قالت..

/قصدي شن سبب زواجك منها؟

قعد مركز بنظره القدام وهو ملتزم الصمت..

رجعوا نزلوا دموعها ونزلت عيونها للارض وهي مقهورة..

نزيهه وهي تشوفلها قالت..

/اللي تشوفه مناسب ديره اني واثقه فيك وفي اختياراتك..

شافلها بإبتسامه بعدين غير نظره لفريحه وقال..

/وانتي يافريحه؟

ناضت وهي تقول..

/اني معاش عندي ثقه في شي خلاص..

ومشت طول طلعت من المكتب ناضت نزيهه وهي تقول..

/نستأذن..ومشت بسرعه طلعت ورا فريحه..

تسعه تنهد وقال..

/سيورها تروق وترضى..

🥀"فريحه فريحه اوقفي"

وقفت فريحه في ممر المرايات وهي تقول ببكاء..

/زوز في مرة يانزيهه..

نزيهه قالت..

/مش حيطول مع حسناء..

ضحكت فريحه من بين دموعها وقالت..

/ضحكتيني يانزيهه..هي في وحده تعاشر تسعه تقدر ع فراقه!!؟

تنهدت نزيهه بألم..

خشت فريحه في حضنها وهي تقول ببكاء..

/سامحيني اللي درته فيك ولى عليا اللي ذقتيه بسببي ربي ذوقني اضعافه..

نزيهه قالت..

/شن تخرفي انتي! يشهد عليا ربي اني نحبك اكثر من خواتي من لما عرفتك ماريتش منك موجعه والله ديما نحمد في ربي ع وجودك..

زادت ضمتها فريحه وهي تقول..

/بنموت يانزيهه..

ضمتها نزيهه بقوة وقالت..

/بعيد السو عليك..

فريحه قالت..

/بنجيب وسام ونبات عندك..

نزيهه:الليله دورك..

فريحه:خليه ياخد ع قلتي اهو بيجيبهم زوز يبرطع هو وياهم..

ضحكت نزيهه بعدين قالت..

/نبي نعرف من هي الرابعه..

فريحه قالت..

/اسكتي خلاص..

نزيهه قالت بضحكه..

/تعالي معاي تعالي..ومشت بيها للمصعد للكهربائي...

🌿ومن بعدهم تعلم العيله كلها بقرار تسعه..

امه وجعها قلبها ع كناينها لكن بنتها هانيه كان كل همها تعرف من يكونوا..

وبلقيس لما وصلها الخبر وجعتها فريحه اكثر من نزيهه لأنها حاستها تعشق تسعه عشق مش بس تحبه زي نزيهه..

وعايلاتهم مع ان بناتهم وجعوهم لكن لأنهم من البدايه عارفين اللي فيها مالقوش قدامهم غير انهم يباركوا الزواج..

🌿🌿🌿🌿

في الحجرة الموجودة في ورشه صناعة المجوهرات اللي كانت محل لمرعي سابقا..

كان تسعه مقعمز ورا نفس الطاوله وهو منهمك في اللي يدير فيه..

خش عليه وقال بضحكه..

/الله اكبر عليك ياراجل زوز في مرة وحده..

ضحك تسعه وعيونه في شغله..

وقف مرعي جنبه وشافه شن يدير بدت ع وجهه ملامح المفاجأه وهو يقول..

/مش هدا تصميم العقد اللي قلت بتعرضه في الفرع اللي بنفتحوه في دبي!؟

تسعه وهو يشتغل قال..

/غيرت رأيي..

مرعي وهو متفاجئ قال..

/شكلها الزواريه دارت في القلي دوايرها..

ابتسم تسعه وقعد ساكت..

ضيق مرعي عيونه وقال..

/غير دقيقه انت بتعقد عليها غدوة والعقد هدا مازال يبي منك شغل فوق الشهر..

قعد تسعه محتفظ بصمته وهو مبتسم..

ضحك مرعي وقال..

/اها..معناها العقد هدا للرابعه..

تسعه قاله..

/مش جايك نوم

ضحك مرعي وقال..

/ياودي باهي ربي يباركلك ويهنيك..تصبح ع خير..نكشله شعره ومشي..

تسعه بضحكه:قدامك كل خير...

▪▪▪▪▪▪▪▪▪

"مايبيش يدوي عليها بكل"

فاطمه قالت بحزن..

/ياروحي ع فريحه مسكينه..

ضحك مرعي وقال..

/والله ماصايرتلها حاجه حتعيش معززة مكرمه زي قبل زي تالي..

فاطمه شافتله بطرف عينها وقالت..

/طبيعي بتقول هكي..بالك بتوجعك..

مرعي قال بضحكه..

/لاطلعيني من الموضوع هدا عارفتيني حنعيش موحد دنيا ودين لين نموت..

فاطمه قالت بضحكه..

/مافيكمش امان..ابتسم وقال..

/استثنيني من كل القواعد اني فيا الامان كله..

ابتسمت بحب ممزوج بالخجل وهي تشوفله..

🌿🌿🌿🌿🌿

وجي يوم عقد قران حسناء وتسعه..

تم العقد في طرابلس وبعده ع طول خدي تسعه مرته وخالتها وتوجهوا للألف وخمسين ووراهم سيارة فيها جمال ومعاه السواق..

وطول الطريق كانت خالة حسناء تهدرز وتسعه مستانس بهدرزتها لكن بنت اختها قليل جدا ماتتكلم..

بعد ماقطعوا مسافه لاباس بيها وصلوا للألف وخمسين تحديدا لحوش ذهيبه..

🌱"كان احتجتوا لشي كلميني طول"

حسناء قالت بإبتسامه..

/مشكور سيد تسعه..

ابتسم وقال..

/العفو استاذة حسناء..

ضحكت ضحكه خفيفه..

وهو قال بإبتسامه..

/استودعناكم..السلام عليكم..

ولف ومشي وهو يسمع في ردها عليه..

لفت وخشت للحوش وسكرت الباب وراها..

وتتلقاها خالتها وهي تقول..

/عليك راجل عليك شخصيه البهي والزهي والهيبه الله يبارك..

حسناء قالت بإبتسامه ملل..

/خالتي ريحينا..

نبيهه قالت وهي تعجب عليها..

/خالتي ريحينا..تحسابيني مش كاشفاتك تي والله الا عاجبك الله..

مشت حسناء وهي تضحك وتحرك في راسها يمين ويسار وخالتها لحقتها ومازال تناشب فيها..

🌿🌿🌿🌿🌿

"تزوج؟!"

عصمت وهي تاخد في قياسات زبونتها قالت..

/ايه ياحنه تزوج وحده زواريه قالوا ارمله..

الزبونه قالت..

/تصدقي لما قعد السنين هادي كلها من غير زواج كذبت اللي قالوا ناوي ياخد اربعه..

عصمت:كلنا كذبناها لكن الحكايه نصيبات وشكله مازال عنده نصيب في غيرهم..

الزبونه قالت..

/صدقتي..

حديثهم هدا كانت تسمع فيه ربيعه وهي واقفه تشوفلهم بعيون مليانه دموع وع وجهها ابتسامه متهكمه وفي حديث بينها وبين نفسها كانت تقول..

"خيرك ياربيعه شن واجعك معقوله من عقلك صدقتي الاوهام اللي كنتي تحلمي بيها! باهي اللي جاك هالكف وفيقك ع الواقع متاعك..قداش كنت هبله وستوبيدا ع قولة ابلة عصمت".وضحكت ضحكه ألم خفيفه..

عصمت:ربيعه جيبي الكراسه والقلم وسجلي القياسات..

ربيعه قالت..

/حاضر..ومشت بسرعه خدت الكراسه والقلم ومشت وقفت جنب عصمت...