رواية منتصف العمر
الفصل الرابع عشر14
بقلم جمانه السعيدي
مختار....علي كان مصمم اروح ويااا
مايقبل يعوفني هنا رغم اني متعود على بغداد مااكدر اطلع منها
احس نفسي مثل السمجه وبغداد الماي اذا طلعت اموت
حتى يضمن اروح وياا للبصره وابقى هناك
لغة عقد الايجار وصفا الغراض
يعني اني اذا ما عجبني الوضع مستحيل ارجع
علي راح قبلنا اتفق وياا مكتب ايجار واجرلنا بيت مرتب
واخذ الغراض رتبهن
بعدين اني اخذت لجين وحسوني ورحت ورا
المكان كان حلو كلشي تمام بس اني مامرتاح
اريد ارجع احس نفسي طفل ضايع
بعد مااستقرينا هناك شهر
علي...بابا بعد بس تنقل اوراقك هنا
مختار...لا مو هسه خل اشوف الوضع راح أقدم على اجازه
واشوف الوضع شنو
علي...تريد تعوفنا
مختار...ما كلت اعوفكم كلت اشوف الوضع شنو
قدمت على اجازه لمدت شهرين اني ابد ما ماخذ اجازه قبل باعتبار هاي الفتره مراح اداوم لمن اشوف الوضع
شني
بدا علي ولجين يدامون وحسون يبقى يمي
حسون هنا عمره سنتين ونص سوالفه يخبلن
طول النهار لا زكلي حتى من ترجع امه مايقبل يروح يمها
علي ولجين يتاخرون بلدوام الساعه ٣ يله يرجعون
ابقى وحدي بلبيت
الصبح الساعه عشره ابدل الحسون ونروح نفتر اني ويااا
بلشوارع بلاسواق
رحت للابتدائيه القريبه على بيتنا اشوف الوضع شنو
كالو ماعدنا شاغر عدنا فائض بلمعلمين
رحت الوحده ثانيه شويه ابعد نفس الشي اكو فائض
عدهم ماكو مدرسه قريبه تقبل تنطيني نقل
جمانه السعيدي
الجو بي رطوبه يخنك
كمت مااكدر اطلع الدنيا حاره رغم احنا بلخريف
طبعا اهل البصره متعودين عدهم هذا الجو طبيعي
اله اني
مااكدر اتحمل
خلصن الشهرين الي اخذتهن اجازه
حسيت الحنيين البغداد زاد هنا كلشي غريب عليه
علي...بابا يمتى تمشي ب إجراءات النقل
مختار...اني مراح انقل هاي المدارس القريبه كلها ماعدها شاغر
وحسيت من كلامهم ماكو اي تعاون بلموضوع
ما يحبون يجي عليهم دخيل
اني ارجع البغداد
علي....شلون ترجع البغداد واحنا
مختار... انتم شكو عليكم جاي اداومون والضاهر اتعودتو على هذا الوضع بس اني مااكدر
اني اطمنت عليكم الحمد لله وراح اجي اشوفكم كل
ماتصير عندي فرصه
علي...لا ماكو رجعه اني مراح اكون مطمن عليك
مختار....بابا ولله فراكك انت وحسون موهين عليه بس
مجاي اكدر اتأقلم وياا الوضع هنا
شوف الرطوبه صاعده للسما الجو يخنك كلش حاره
حتى السبلت يشمر نار علينا
اني مااكدر استمر هنا
علي...ووين ترجع حتى البيت أخذا صاحبه
مختار... ااجر شقه اني وحدي شقه كافيه عليه
اكو مجمع اشترو بي جماعتي شقق بلاقساط ااجر بي
واشوف الوضع شنو اذا ماعجبتي الوضع ارجع عليكم
جمانه السعيدي
علي. ..... جماعتك اشترو وانت تاجر ليش
مختار....لان مااكدر ادفع مقدمه هناك النضام تدفع على الاقل ٢٥ مقدم والباقي اقساط
علي....انتضر اني عندي حل ابيع قطعة الأرض الي
ورثته من امي واصرف بفلوسه
مختار...لا هاي حقك مااقبل تصرف بيها
علي.. حقي شنو اني لو انطيك عيوني مقصر وياك فنيت عمرك علمودي شنو قطعة الارض
عرض علي القطعه للبيع جابت خوش سعر يكفي نشتري بي شقه يمكن نحتاج شي قليل
اذا اسحب قرض تكون الشقه ملكي
لجين اتصلت على اهلها حتى يقرضونه فلوس نكمل فلوس الشقه علما يطلع القرض ونسددهن
مختار . اتصلت على معلم وياااي مشتري هناك شقه
حتى يشوفلي اكو شقه تناسبني
ثاني يوم رد عليه اكو عماره جديده انباعن الشقق الي بلطابق الاول اكو شقه طابق ثاني
مختار....كتله جايك حتة اشوفها
اخذت جنطت ملابسي ورجعت البغداد علي اجا وياي
لجين وحسون بقو هناك
رحنا شفنا الشقه صح المجمع شويه بعيد بس يخبل
كل الخدمات موجوده بي
ترتيب خارجي حلو حدائق داير ميدور المباني
نضام جديد وحلو
كلش عجبني المكان والأهم ثنيين معلمين وياي
اصدقائي مشترين شقق هناك همه واقاربهم
اكو مدرسه ابندائيه ومتوسطة واعداديه ومستشفى هناك بس المدرسه الابتدائيه مفتوحه والحضانه
اما المتوسطه والاعداديه منتضرين العدد يكمل يله
اني الصراحه كلش عجبني المكان
بعنا القطعه وتعاقدنا على الشقه لان احنا متفقين على كلشي مسبقا
بعد محتاج اثاث بسيط
اني رحت ابات يم صالح وعلي رجع الزوجته وابنه بلبصره لان بقو وحدهم
ثاني يوم رحت اشتري شغلات محتاجه للبيت
اكو مجمع يبيع بنظام القسط على الموضفين اني قبل اشتريت منه كم شغله
رحت اشتريت طباخ وثلاجه غرفة نفر سرير وكنتور
وميز مرايه غرفه تركيه مرتبه
اشتريت شغلات اطبخ بيهن كدوره ومواعين وفراش للكاع
اجرت سياره واخذتهن ورحت
العمال ساعدوني خلو كلشي بمكانه ونصبو الغرفه إليه
شكد جنت فرحان لان صار عندي بيت ملك يعني
الشقه بااسمي
بس رجعت اعيش وحدي من جديد
اصعب شي عليه فراك علي وحسوني ذني اصعب شي
مجاي اكدر اتحمل فراكهم
بس شسوي ماكدرت احصل مكان شاغر انتقل اله
ومااكدر اعيش بلبصره جوها يخنك بلنسبه اليه
العماره الي سكنت بيها الطابق الاول أربع شقق ساكنين بيهن ناس
اني بالطابق الثاني
اني الوحيد الي ساكن ماعندي جيران
شقتي مو الشقه الي بصف الدرج لا الشقه الي بصفها
اول شقه بصف الدرج مبيوعه وصاحبها مااجره
بس المؤ جر بعده ما نازل بيها
يعني راح يصير عندي جيران قريبا
جمانه السعيدي
كل يوم اكو اتصال كامره بيني وبين علي وحسوني
اكثر شي بليل يتصلون عليه
لان بلنهار دوام يرجعون متاخرين بليل نتصل كامره ونحجي
قبل حسون يبقى يمي من يرحون للدوام
هسه خلو بحضانه علما يرجعون وياخذو
تمنيت قريبين جان اني اهتم بي
قدمت نقل من مدرستي الهاي المدرسه الابتدائيه بلمجمع
حتى اكون قريب على السكن وهم ماادفع مواصلات
هواي اني ناوي اشتري سياره قرببا
بس يطلع القرض اسدد الدين الي عليه واشتري سياره
حتلو بلقسط
بعد اسبوع واحد اجا علي وزوجته وحسون حتى يشوفوني
وجايبين وياهم مسواك أشكال واللوان
شكد فرحت بجيتهم
مختار... شنو هذا المسواك هواي اني بطرك عمري شدعوه هلكد جايبين مسواك
علي...خير هواي خير من الله
مختار....اني بس شوفت حسوني عندي تسوه الدنيا وما بيها
علي... هااا اجا خلاف وركب على الجتاف حسوني اخذ معزتي مو
مختار....قبل انت وبس ماكو واحد أعز منك بلدنيا كلها
بس هسه من اجا حسوني اخذ نص كلبي وانت النص الثاني
لجين...هااا عموووو واني وين مكاني
مختار...انتي الاصل حبيبت عموووو انتي الي لا متهم ومحافظه عليهم
بقو يومين هم لجين راحت شافت اهلها ورجعو للبصره
النقل بعده ما طالع بعدني اداوم بمدرستي القديمه
منتضر النقل يطلع
اكعد الصبح اتريك واطلع للدوام من ارجع مرات اجيب وياي اكل جاهز
اكل وانام للمغرب اكعد اصلي اصفح بلنت
اتصل على علي اسمع صوته اشوف حسوني بلكامره
جمانه السعيدي
مااخفي عليكم بديت احس بلوحده
كمت اضوج زين شلون لا اكدر اسكن بلبصره
وهم مالكيت نقل وهنا رجعت استاحش من جديد
كمنا نتفق اني وجماعتي العصر نكعد بلحديقه برا مال المجمع حتى اضيع وقت
وما ابقى وحدي من ارجع اتعشى احجي شويه وياا علي وانام
بعد شهر من سكني بلشقه
بليل سمعت صوت بلشقه الي بصفي صوت احد ينضف
بلشقه يمكن راح ينزل بيها احد
بس كون عائله لطيفه وماكو جهال وهوسه
مافتحت الباب ولا شفت شي
اني هم مو ذاك الفضولي
ثاني يوم من طلعت للدوام سمعت صوت داخل الشقه
ترتيب غراض وهيج شي
من رجعت من الدوام شفت اكو جيس زباله باب الشقه
والباب مطبوكه
اليوم الي بعده ما شفت شي بس سمعت صوت تلفزيون مشتغل وصوت اغاني اطفال
لان اني افوت يم باب الشقه يله انزل اسمع الأصوات الي داخل الشقه
يعني مو فضول مني هيج تجي الأشياء بلصدفه
اليوم الرابع قبل لا اوصل باب الشقه بس طلعت من شقتي طلعت وحده
اول شي شفته ضهرها شعرها جان نازل على ضهرها مبروم بشكل حلو
لونه نحاسي
بطئت خطوتي اريد اشوف وجها
طلعت من الشقه لازمه بيدها طفله تخبل الطفله تقريبا عمرها أربع سنوات
الام كانت لابسه بنطرون جينز وبدي نص ردن اسود
بشرتها بيضه
من وصلت يمها التفت عليه
هاي اللحظه تحديدا اني انتهيت بس شفت عيونها
مااعرف شنو الي صار اجاني احساس اول مره احسه
بقيت اباوع عليه ونسيت نفسي
عيونها يخبلن ورموش كثيفه اكو نمش بوجها منا ومنا
ضايفلها جمال على جمالها
ابتسمت وكالت صباح الخير
مختار....بقيت صافن عليها بعدين استوعبت هي جاي تسلم عليه
مختار....صباح الخير
مشيت كدامها نزلت من الدرج وهي تمشي وراي
ودي التفت عليها حتى احفظ كل تفاصيل شكلها بس استحيت
اني طلعت على اليمين وهي على الشمال
التفتت مرتين عليها
بعدين استحيت من نفسي اني شكاعد اسوي عيب
هاي تصرفات مراهقين
اني اليوم اول يوم ادخل بلخمسين
عمري مايسمحلي بهاي التصرفات