رواية جبروت انثي الفصل الثاني2 بقلم نوسه حمد

بسبب الحفله اخوي قطع لحمي قطيع وكل م ارفع راسي يديني سوط قلبي انقطع عديل بس كمان انا راسي قوي هو منعني انا كسرت كلامو وما كان نفسي اكسرو بس الشيطان شاطر  الصباح صحيت وشي مورم ورم وحالتي بالبلا اختي تلبس للمدرسه وكل م تعاين لي تضحك قلت ليها م تضحكي عشان م اقوم عليك  قالت لي هسي استفدتي شنو غير جلدوك وشيلتي ذنوب  قلت ليها م تتكلمي معاي خليني في حالي امي جات شايله لينا الشاي قالت لي مالك م جهزتي قلت ليها امش كيف البنات بضحكن علي قالت لي  لو م قومتي لبستي ومشيتي مدرستك المره دي انا البدقك قومتا مشيت لبست بي اخر نفس وابيت اشرب الشاي طلعت ومن الشارع الناس اعاينو لي ويضحكو انا قلبي دا انقسم النص ودخلت المدرسه البعاين لي كلو يموت بالضحك العجب هناء بقتني مضحكه البنات قالن لي نوسه مالك قلت ليهن وقعتا هناء قالت لي وقعتي ولا دقاك اخوك بقيت صغيره واتمنيت الارض تنشق وتبلعني البنات قالن لي اخوك يجلدك انتي كبيره وواعيه قلت ليهن مالكن ومالي ومشيت قعدت في ركن براي ودموعي في عيني في واحده شاطره كده بتحبني عشان انا بضحكهم جات قالت لي نوسه م تزعلي معليش كلو بهون الوحيده الحست بي قالت لي قسمتنا نقع في اهل صعبين انا فرحتا اخيرا لقيت واحده زيي قلت ليها انتي بدقوك  فتحت لي ضهرا مورم من الضرب انخلعت قلت ليها منو الضربك قالت لي راجل امي قلت ليها امك وين قالت لي امي ميته انا انخلعتا قلت ليها كيف وراجل امك مالو معاك وخيلانك واعمامك قالت لي اهل امي من عرست بعد وفاه ابوي  بقو ما شغالين بيها واهل ابوي زعلانين من عرس امي وامي ماتت بعد زواجها بشهرين قلت ليها طيب انتي م تقعدي مع راجل امك قالت لي انا م قاعده معاهو انا قاعده في بيت ابوي وهو كان ساكن معانا وبعد امي اتوفت عرس وقعد مرتو ف البيت معاي ومرتو كعبه وكل مره بتكذب فيني هو بضربني قلت ليها لا لا ي عبير انتي حالتك اصعب مني بس سبحان الله ما ظاهر عليك قالت لي لاني صابره ي نوسه افوت اخلي بيت ابوي وراجل امي متعابط قال عندو فيهو ورثه واموري جايطه والمهم بعد شفت حالتك والبنات بضحكن عليك جيت اتقل قلبك واقول ليك غصبا عننا نستحمل الناس الحولينا بالذات انتي اخوك واكيد عايز مصلحتك لكن انا بنضرب من غير سبب وشكيت لي خيلاني ادخلو في الموضوع وابا يطلع ليهم وخيلاني ف الشماليه وانا مدرستي هنا واهل ابوي كانهم مابعرفوني والحمد لله ربنا يخفف علي ويعوضني البت بتحكي لي ودموعها في عينها ودعتني وفاتت قلبها ابيض وما تستاهل الحصل عليها زعلت شديد عشانها ورضيت بقسمتي بعد كنت خجلانه بقيت ارد لي اي زول في وشو  وقررت اني انعدل واسمع كلام اخوي الحفلات وغيرو ما بفيدني وانا خلقه الله بليده ما بعرف القرايه بجازفها مجازفات وبنجح بس اختي شاطره شديد بتجي في العشره الاوائل  

يوم جا ف المدرسه ولد من اولاد العاصمه  جميل جمال م عادي الولد دا كسر البنات كلهن وهو النوع  الشفت داك انا زاتي حسيت انو كسرني ودي كان اول مره اعجب بولد وما اعجاب حب عديل وهناء حست بي اني بحبو بقت مشغلاها لي وكنت بشاكلها وبزهج منها زهج وكرهاناها موت بس اعمل شنو ف الكنبه قاعده جنبي  الولد مستحيل يعاين لي انا لاني مبهدله وما زي باقي البنات ولبسي شين قررت اني اتغير وبقيت اهتم بنفسي واتمسح واعمل فير الصباح لمن اجي ماشه المدرسه ويوم عملت لي فازلين في خشمي اخوي شافني مسكني من راسي وحكا وشي بالحيطه وشي كلو اتظلط زهجت منو وكرهتو عديل هناء قالت لي مالك وريتا قالت لي انتي زاتك هبله م بتعرفي اخوك دا امشي قدامو زي ما هو عايز بس بعد تجي المدرسه ولا تطلعي مكان عايزه اعملي العايزاهو انا خوفت من كلامه قلت ليها لا لا يا هناء احسن اعمل قدامو الحاجه يا اقتنع والله هداهو ي دقاني قالت ليك اخوك الشايفاهو انا دا غير الجلد م عندو شي انا كان دا اخوي كان جاتني نفسيات وانتحرتا قلت ليها اعمل شنو  غصبا عني والحمد لله قسمتي كده 💔هناء كلامها بدا يغير مفهومي بس كانت في حاجه جواي بتقول لي لا دا اخوك عايز مصلحتك وهناء دي بت اهلا م شغالين بيها وح تدمرك وفي شي بقول لي انتي لازم تعيشي اخوك البعمل فيهو دا حرام عديل بقيت في صراع داخلي بين سخصيتين شخصيه اتربت علي القيم والمبادئ وشخصيه عايزه حريتها الشخصيه والاتنين ما بجن وانا عايز اعيش في دورن الاتنين  في حاجه جواي بتقول لي انتي بت ولازم تكوني حلوه ورقيقه ماعارفه هل دا حبي للولد دا ولا دا طور مراهقه انا بقيت ضايعه ف النص  وهناء دي زي الشيطان تحرش فيني مرات كلامها بقنعني ومرات كلامها م بدخل راسي وبتصداهو ومن ناحيه تانيه انا كنت ميته ف الولد موت نفسي يحبني زي م بحبو  وخلاص غرقت غرق في حبو نوم م بنومو  وبقيت م مع الناس كانو عايشه في  مكان برااااااي  همي كلو الولد الاسمو سعيد دا هناء قالت لي انتي عارفه ي نوسه انا ماف ولد م حباني وكلهم عملت معاهم علاقات الا الولد الجديد قلت ليها ليه قالت لي لاني شايفه في عيونك الحب وانتي النوع الما حبيتي قبل كده احتمال الولد دا لو حباك قصت حبكم تنجح وتتزوجو انا بقيت اتبسم براااااي قلت ليها هناء بس الولد سمح قالت لي انتي زاتك سمحه بس وسخانه ساي لي الله الخلقك قلت ليها كيف تقولي لي كده مالي وسخانه قالت لي دي الحقيقه النقولا ليك انا في وشك اخير من البنات اقطعن فيك قلت ليها اقطعن فيني انا هن بشبهني قالت لي انتي الثقه دي الاداك ليها منو قلت ليها ربنا قالن شنو البنات يا هناء بقت تتمتم قالت لي قالن اختك نظيفه وظريفه وشاطره انتي التقول م عايشه معاها صراحه كلام هناء قطع قلبي بس من ناحيه فرحت اني عرفت البتقال من وراي وح اصلحو ان شاءالله صراحه انا م مهتمه بنفسي مبهدله بلبس ملابسي مكرفسه وعندي ثقه كده مبالغه دي البتخليني اتصرف ساي 

يوم ربك رب  الخير اخوي جاهو شغل في الخرطوم في شركه بتاعت مواد غذائيه  ودي فرصه عمر اي ولد من حلتنا بحلم بيها امي قالت ليهو طوالي تمش انا الفرحه دايره تكتلني  قال لي شوفي لو طلعتي من البيت دا ساي بقطع رقبتك وما تقولي انا م بعرفك بعرفك وبجي اقطع رقبتك  بقلبي قلت ليهو اديني ضهرك بس خليني اتنفس شويه ويا عالم البحصل شنو نشوف الحلقات الجايه ……….