رواية اولاد تسعة الفصل العشرون20بقلم جمان فريد

وفاقت هانيه بعد محاولات اهلها انهم يفيقوها بالطرق المعروفه واول فاقت ورجعت لوعيها انهارت بالبكاء وع قد ماسألوها عن سبب حالتها وجيتها بالشناطي ماجاوبتش بكلمه ولابإشارة قعدت تبكي بس..

🍃"مش عارف يامرعي حتى معمر ماقدرتش نوصل فيه كلمته ع رقم المكتب قالوا ماشي لمصراته"

مرعي قال بقلق..

/لاحول ولاقوة الا بالله..

وتسعه زفر وقال..

/استغفر الله واتوب اليه..

🍃ورفض هانيه اجابتها ع اي سؤال من عيلتها خلا امها تفهم انها ماتبيش تتكلم في حضور حد منهم لهدا خدتها طول لجناحها وغادي كررت طرح نفس الأسئلة..

"الدكتورة قالت معاش فيا امل ياماما ماعنديش امل نجيب صغار بنتك ولت بلا فايده ماتنفعش لشي"

حالة الضعف اللي كانت فيها والألم اللي تحكي بيه فتت قلب امها عليها..امها اللي ماتتحملش فيها دقة الشوكه..

ضمتها لحضنها وقعدت تبكي معاها وهي تقول..

/معاش تقولي هكي ياماما معاش تقولي هكي..

وهانيه في حضنها منهارة تماما وتبكي بالعبرة..

🌿ومن جناح زكيه لصالون العيله اللي كانوا فيه فريحه ونزيهه بس يحكوا عن وضع هانيه..

🍃فريحه:حالها ليه علاقه بحكاية الصغار متأكده..

نزيهه قالت بأسف..

/حتى اني عارفه وتوقعت يجي اليوم هدا لكن ان شاء الله ماتفكرش في الطلاق المرة هادي صعب هلبه تطلق وهي مازال ماكملتش معاه خمسه شهور وفوق هكي هادي تاني مرة تطلق فيها..

فريحه بإستياء قالت..

/صدقتي ولسانات الناس ماترحم حد..

🌿ومن صالون العيله لجناح ربيعه اللي كانت حسناء معاها فيه..

🍃حسناء:ع حسب ماسمعت انها اطلقت قبل ع خاطر حكاية الصغار الباين ان مشكلتها صعبه ومالهاش علاج..

وربيعه تسمع في حسناء شن تقول وعيونها ع بنتها اللي كانت راقده ع السرير وقلبها مقبوض..

🌿🌿🌿🌿

ومع العصر يروح معمر للألف والخمسين ويتوجه طول لمكتبه..

لما خشله قابلاته السكرتيره وخبراته عن اتصال تسعه..

"قال لما يروح قوليله يجي للقصر ضروري"

حس معمر بالخوف وبدون ماينطق بحرف لف وطلع مرة تانيه...

بعد ركب سيارته طلب من السواق يرفعه للفيلا ولما وصل غادي نادى هانيه ودور عليها مالقهاش ع طول دور في دولاب حوايجها لقاه فاضي وشناطيها مختفيات قلبه اللي يحبها بشده حس انه حيوقف،بسرعه طلع يجري للسيارة وطلب من السواق يرفعه للقصر..

▪▪▪▪▪▪▪▪▪

"والله ماصار بيني وبينها اي خلاف نهائي من لما خديتها لليوم الصبح لاوجعتها ولا وجعتني ياتسعه"

تسعه قال بضيق ممزوج بالأسف..

/معناها الموضوع زي مافسرته في عقلي ليه علاقه بحكاية الانجاب..

معمر قال..

/ليها فترة باديه علاج والحق مابيتش نسألها شن صار معاها لأنه مايهمنيش..

تسعه قال بإستغراب..

/كيف مايهمكش؟!

رد عليه يقول..

/اني ماتزوجتش ع خاطر الصغار لو نبيهم ماقعدتش السنين اللي فاتت كلها من غير زواج..كل اللي يهمني هانيه بس ياتسعه..

سكت تسعه وهو يشوفله ويفكر في كلامه..

معمر تنهد وهو يحاول يخفي خوفه اللي مخلي قلبه يرجف بعدين قال..

/بالله ناديهالي..

تسعه هز راسه بالموافقه بعدين ناض ومشي طلع من المربوعه وخلا معمر يستنى ع نار..

▪▪▪▪▪▪▪

"لالا مانبيش"

مسح تسعه ع شعر هانيه بحنان وقال..

/غير نوضي قعمزي معاه وتفاهمي انتي وياه اسمعي منه مرات اللي يقوله يريحك وتقتنعي بيه..

هانيه وهي تبكي قالت..

/لالا.. مش طالعه مانبيش..

شاف تسعه لأمه وزكيه وهي تشوف لبنتها بحزن قالت..

/غير نوضي بنيتي ع خاطري نوضي شوفيه واسمعي منه زي ماقال وخيك..

هانيه قالت ببكاء..

/انتم تبوني نروح معاه وخلاص..خايفين نطلق مرة تانيه ولا؟

زكيه حطت يدها ع فمها وقعدت تبكي..

اما تسعه شد يد اخته بإيديه الزوز وقال..

/وكان اطلقتي مرة تانيه شن اللي يخوف في حاجه زي هادي!؟ هدا قسمه ونصيب وبعدين انتي مش زايده علينا ولاقالقين منك بش نفرضوك عليه ولانخلوك تعيشي معاه غصب عنك..اني بس مانبيكش ترجعي تتوجعي مرة تانيه وتعيشي اللي عشتيه قبل..الراجل شاريك ياهانيه قالي همي هانيه وبس...

مسحت دموعها وهي تقول..

/هو قال هكي!؟

ابتسم خوها وقال..

/ايه..

غيرت نظرها لأمها لقتها مبتسمه من بين دموعها وهي تهز في راسها ايجابا..

🍃ومشت هانيه مع خوها للمربوعه وصلها للباب وخلاها تخش بروحها..

اول مابانت ع معمر الراجل ماقدرش يتحكم في شعوره ناض وقدملها طول ولما وصل فيها ضمها لقلبه بقوة وهي شدت فيه وقعدت تبكي..

▪▪▪▪▪▪▪▪

"من قالك نبي صغار!؟"

هانيه وهي دمع قالت..

/في حد مايتمناش يكون عنده صغار!؟

بإبتسامه هويام قال..

/اللي عنده انتي مازال يبي حاجه تانيه؟!

ضحكت من بين دموعها بعدين رشفت وقالت بنبرة باكيه..

/واهلك؟ عمي وعمتي اللي يراجو يشوفوا صغارك!؟ حتعيش في ضغط نفسي يامعمر وحتى اني مش حنرتاح..سحبت ايديها من ايديه وهي تقول..شوف نصيبك مع غيري يامعمر..

رجع شد ايديها بقوة وقال بلهفه وخوف..

/مستحيل والله مانخليك ولانستغنى عنك لو شن يصير مستعد ندير كل شي يريحك لكن نسيبك هادي مستحيل انسي..

هانيه وهي تبكي قالت..

/صعب يامعمر صعب لااني ولاانت نقدروا نتحملوا اللي بيصير بعدين..

زاد شد ع ايديها وقال..

/اني نتحمل..

قالت بألم..

/اني مانقدرش..

قاللها:لا حتى انتي بتتحملي تعيشي مع راجل عقيم ..

بدت ع وجهها ملامح عدم الاستيعاب..

معمر وهو مبتسم بحب ونظراته تتأمل في ملامحها قال..

/قدام ماليا والناس كلها اني اللي ماعنديش امل نجيب صغار وانتي اللي بضحي وتتقبلي وضعي وبتكملي معاي..

هانيه قالت بصدمه..

/معمر! انت واعي لروحك شن قاعد تقول!؟

هز راسه بإيجاب وقال..

/ايه وبكامل قواي العقليه..المهم عندي تقعدي معاي ياعمري انتي نتحمل كل شي ولاتخليني ياهانيه..قبل ايديها الزوز وقال..نموت من غيرك..

وهي تشوفله بإبتسامه حب ممزوجه بالصدمه ودموعها مابطلوش نزول...

🌿🌿🌿🌿

"عرفتها مش حتعيش معاه مرتاحه هو اصلا شكله شكل واحد زوفري"

غزلان قالت بملل..

/كريم..

كريم بعصبيه قال..

/اكيد ضاربها ولااشبح شن قاللها الحيوان هدا..قتلها اني قتلها..وسكت..

غزلان بصدمه قالت..

/شن قلتلها!؟.

هو بعصبيه وربكه قال..

/ماقلتلهاش هي قلت لروحي قصدي غير تلخبطت..ان شاء الله تفتك منه

ع خشة امهم عليهم لدار المعيشه قالت لغزلان..

/هي نوضي وتي روحك بنتي

غزلان ناضت وهي تقول..

/مافيش جديد ع هنو؟

فاطمه قالت بأسف..

/قالت فريحه جاها راجلها طلعتله تكلمت معاه شويه بعدين قالت بتقعد في القصر فترة لين ترتاح نفسيتها..

غزلان:ربي يهدي سرها..

فاطمه قالت..

/آمين

وطلعت غزلان وامها وراها وخلوا كريم اللي سمع حديثهم بإنتباه يقول..

"ان شاء الله تطلق ومعاش يخطبها حد لين نكبر وناخدها يارب"

🌿🌿🌿🌿🌿

ومشوا هديكا الليله نساوين تسعه كلهم وبلقيس ونبيهه ومعاهم فاطمه وغزلان لسهريه بنات البدري وماقعد في القصر الا زكيه وهانيه ومعاهم الصغار والخدم..

🍃"بري شوفي شن وراك  في الكوجينه"

زهره هزت راسها وقالت..

/حاضر

ومشت طلعت من جناح ربيعه وبعد لحظات طلعت زكيه بفداء ومشت بيها لجناحها وين ماقاعده هانيه..

🌱"انا جيت ياعميمه الحلوة"

فزت هانيه ونزلت من السرير وهي مبتسمه بفرح تقول..

/ياروح عميمه..

خدتها من زكيه وضمتها وشمت ريحتها بعدين قالت..

/قداش نحبها ياماما الوحيده من بين صغار خوتي كلهم خدت قلبي كله..

زكيه قالت..

/حتى هي تحبك ماتسكتش كان عندك وعند زهرة نحس فيها ماتحبش امها..

هانيه بإزدراء..

/شن بتحب فيها الخليقه هادي..قسما بالله ماهي مزبوطه ولاعمري تريحتلها..هلبه فيها يكون عندها بنية زي هادي..

زكيه وهي تسمع في كلامها خطر عليها كلام نزيهه وفريحه اللي ماتبيش تصدقه لكن مابين فترة والتانيه يجي ع بالها ويزرع الشك في نفسها اتجاه ربيعه ويكبر شعور النفور منها..

🍃وربيعه في حوش البدري..

كانت محط انظار الحاضرات ومحور الحديث الهامس بين بعض المدعوات..

"رافعه خشمها في السمي وماحاسبه حد صدقت روحها بنت البراريك ..

عندها تصدق روحها ياحنه شوفي القفطان اللي لابساته والذهب المدندشه بيه..

حظ القبايح ياحنه حظ القبايح"

وفي زوايه تانيه من الصاله المزحومه بالمعازيم..

"قالوا ولى الكلام كلامها والسلام سلامها خلاته خاتم في صبعها..

غير علي شني بس وهي لازول ولاعون والله ماتجي حاجه جنب ضرايرها..

بالذات بنت البندار غير تشبحي فيها ساد..لكن مقيوله حظ القبايح في سمي لايح

لا،لاحظ ولادياولي هادي يا مرشرشه ياموكله

والله حق،كان هدا وحده زي هادي ياخدها تسعه بيت المال ويجيبها ع بنات الحسب والنسب!"

..ومن هالكلام هو بس اللي كان ينقال ع ربيعه وهي وسطهم كانت تبان بيية زي مايقولوا معتزة بنفسها ع الآخر وهالاعتزاز بان في عيون الناس تكبر وشوفة نفس..

من جهة تانيه..

كانت الفرحه تتناثر من عيون رقيه وعاتكه ماقدروش يدرقوها مش مصدقات ان الفرح هدا فرحهم هما واخيرا تحققت امنيتهم الوحيده..

اما اختهم وديعه اللي كانت تشرف وتعول ع كل شي يخص السهريه بانت في عيون الناس متغيره هلبه عن قبل ناشطه وفالحه وقايمه مسؤوليه ومهنيه امها اللي ماناضتش بكل من جنب المعازيم ومع هدا كله قاعده في بالهم انها تعاني من مشكله روحيه حتما حتوقف نصيبها..

🍃🍃🍃🍃

وسخن شوط الدربوكه وصاحبات العرايس وقريباتهم قاموا الليله..

وناضت ام العرايس وقعدت كل مرة تنوض في وحده من الجارات والقريبات يرقصوا..

نوضت حمواتها..ونوضت خواتها..وحتى سلفاتها واقرب جاراتها وكان لازم تقيمها بكبيرات الألف والخمسين زوجات اهم راجل فيها تسعه بيت المال..

نوضت نزيهه وفريحه وخلتهم يرقصوا وهما الزوز جاملوها ورقصوا رقيص حلو وكانوا منسجمات مع بعض كالعاده والعيون عليهم..

وبعد ماقعمزوا جت لحسناء وربيعه ونوضتهم ..

حسناء وهي تضحك قالت..

"مانعرفش"

شدت ربيعه يدها وقالت..

"شوفيني وقلدي"

واستسلمت حسناء لإلحاح ربيعه وبدت ترقض معاها..

مابتش ربيعه ترقص خير منها بش مايحطوهاش في مقارنه معاها خلت حركاتها ساهله لحسناء بش تعرف تقلدهم ومشي الجو بينهم كله بالضحك والمعازيم يضحكوا معاهم..

"ياسلمهم هما الزوز..فستق ومخلط باللوز"

هالبيت غناته عصمت والكل رد وراها ماعدا نزيهه وفريحه اللي كانوا يبتسموا بالغصب..

🍃🍃🍃

وبعد ماانتهي الشوط جي دور الضيافه..

واللي يضيفوا كانوا وقفات من نساء الطبقه الفقيره في المدينه..

وحده منهم كانت جارة لربيعه اول ماوصلت فيها قالت..

/تفضلي ياللا..

ربيعه ابتسمت بمفاجأه وقالت..

/خالتي راضيه!..شن حالك وحال العويله..

ابتسمت المراة وقالت..

/الحمد لله شن حالك انتي..

ربيعه وهي مبتسمه قالت..

/الحمد لله..كملي تفريق وتعالي..

هزت المراة راسها ومشت وعيون نزيهه معاها..

🌿🌿🌿🌿🌿

الساعه الثانيه عشر بعد منتصف الليل..

نزيهه وفريحه وهما ماشيات في الممر اللي يرفع لأجنحتهم كان وحده فيهم تتكلم والتانيه تسمع..

🍃نزيهه:قلت لوديعه تكلمها تجي هني الاسبوع الجاي بش تعول في العزومه اللي بنديرها والنهار اللي بتجي فيه بنقصقصها زين..

فريحه؛وبعدين؟

نزيهه وهي مبتسمه قالت..

/بعدين خليه لبعدين..تصبحي ع خير..

وكملت نزيهه طريقها لجناحها وخلت فريحه تخش لجناجها وهي تفكر في كلامها..

بعد لحظات خشت ربيعه لنفس الممر وهي مضايقه..

اول ماروحت للقصر تلقتها هنادي وقالتلها ان زكيه تبيها في جناحها ووين مشتلها تفاجئت ببنتها عندها واللي زاد فاجئها طلب زكيه..

"رضعي بنتك وغيريلها نبيها ترقد حداي"

وربيعه ماقدرتش تعترض بملامح وجهها حتى..

نفدت اوامرها وطلعت من الجناح وخلت بنتها معاهم وقلبها معصور..

هي عارفه ان زكيه تبي فداء تقعد جنب هانيه بش تواسيها بيها والخوف كل الخوف ان حال هانيه هدا هي الوحيده اللي تدفع ثمنه...

🍃🍃🍃

ومن ضيقها سهرت ليلها وهي تقرا في القرآن لعند ماخداها النوم لكن ماطولتش فهالنومه فاقت مفزوعه ع صوت باب الجناح وهو يدق..

ناضت ومشت بسرعه فتحاته لقت زهره جايه بفداء..

ربيعه وهي ملهوفه ع بنتها قالت..

/خشي خشي..

خشت زهره وربيعه خدت بنتها ضمتها وباستها من خدها بلطف وهي مبتسمه والدموع في عيونها.

زهره وهي تشوفلها قالت..

/اللا الكبيره قالت رضعيها وحمميها ونزليها للصالون..

غمضت عيونها بعدين فتحهم وهزت راسها وهي تقول بصوت مخنوق..

/حاضر..

🍃ويتلاقوا كلهم في الصالون..

وهالمرة تسعه كان معاهم اول ماخشت ربيعه بفداء مالاحظتش وجوده شافت بس لعزوزتها اللي لقتها تشوف لفداء بإبتسامه وتغنيلها..

"ياسلمها يانجيها..ياكبرها ياعليها"

قدمتلها بيها وعطتهالها..

خدتها زكيه وهي تقول..

/سلمها ياربي سلمها..

هانيه قالت بإبتسامه حب..

/هاتيها ماما هاتي استاحشتها..

مدتهالها وهي تقول..

/سلم عمتها سلمها..

خدتها هانيه وهي تقول بحب..

/نجيها ياربي هالعسل..

هدا كله يشوف فيه تسعه وهو مبتسم كانوا عيونه ع اخته بس حاله واجعها وكان متعاطف معاها لأبعد حد وربيعه لما التفتت وشافاته لاحظت نظرة عيونه لأخته وفهمتها وقلبها زاد انغم اكثر ماهو مغموم..

وهدا كله كانت تراقب فيه الى جانب حسناء نزيهه مراقبه دقيقه..

بعد قعمزت ربيعه شافت لعزوزتها لما قالت..

/امس ربيعه خلتها تبات حدانا طول الليل بش تونسنا..

فريحه شافت لتسعه اما الباقي ومن بينهم تسعه شافوا لربيعه اللي قالت وهي مبتسمه غصبا..

/حتى انتم حناها وعمتها..

هانيه شافت لخوها بعدين شافت لربيعه وقالت..

/شكرا..

كبرت ابتسامة تسعه وربيعه بلعت ريقها وقالت..

/ماعنديش فيه جميل..

زكيه وهي مبتسمه قالت.

/سلمها الكنة الباهيه..

فريحه شافت لنزيهه لقتها تشوف لزكيه وهي مبتسمه ابتسامه ليها معنى..

اما حسناء كانت مركزه ع ربيعه وهي تشوف للمعة الدمعه في عيونها..

▪▪▪▪▪▪▪

"زدتي كبرتي في عيني بالحركه اللي درتيها ياربيعه"

ربيعه وهي مبتسمه بألم قالت..

/مادرت شي والله مادرت حاجه..

سكتها وقال بضحكه..

/فكينا من جو التواضع ياودي..ابتسم وقال..بجديات ياربيعه الحركه هادي شفتها كبيره منك هلبه انتي هكي جبرتي بخاطرها وجبر الخواطر عند ربك عمل عظيم..

♤قالت امي لما سمعت الجمله هادي من بوك حسيتها زي الثلج ونزل ع قلبي وقلت ياربيعه اعتبريه جبر خواطر واحتسبيه لله وخلاص كنت نبي نبرد قلبي اللي كان مغموم ومهموم وكملت امك في مسلسل التنازلات وهي كامده في قلبها وصابره ومتحمله..

ايه بتصبر وتتحمل مجبورة تصبر وتتحمل الحياة مرات تجبرك ع اكثر من هكي..

♧زي ماقلت تجبرك تتحمل بش ماتخسرش الخساير الفادحه

بس زي مايقولوا التحمل ليه قدر معين ويوقف عنده والصبر ليه حدود..

🌿وتم فرح عاتكه ورقيه ع خير وياقداش طلعتهم كانت واعره ع امهم اللي ياما صار فيها لكن اختهم بعد ماتمت ليله الحفله حبست روحها في الدار وبكت ع حالها لعند ماتعبت ورقدت..

🍃وتاني يوم..

روحت هانيه مع راجلها ويااه ع اللي صار فيها لما سلمت ع فداء بكت بكي وخلت قلب امها معصور من الألم عليها زي ماكان قلب ربيعه مقبوض وهي تتوقع في اللي مازال بيصير القدام...

🌿🌿🌿🌿

وجي يوم العزومه اللي دارتها نزيهه لصديقات ليها من المجتمع المخملي وعزمت عليها اختها بدريه واكيد هانيه مش حتفوت عزومه زي هادي لكن طلبت من نزيهه تعزم تيسير وهي ع طول لبت طلبها...

▪▪▪▪▪▪▪▪

في جناح ربيعه..

كانت واقفه ع الدولاب تتفرج ع ملابسها وهي محتارة شن بتلبس منهم ع العزومه..

فجأة دق باب جناحها اللي خطر في بالها ان زهره جايه بفداء بش ترضعها ولاتغيرلها تنهدت بهم بعدين مشت طول للباب وفتحاته..

ابتسمت لما شافت اللي وراه وقالت..

/روحتي بكري..

خشت حسناء وقالت..

/ع خاطر العزومه من صبح ربي جتنا نزيهه نادتنا ع العزومه اني قبل نحسابها ليها هي وصاحباتها بس..

🍃ربيعه وهي تسمع  في كلامها فهمت ان نزيهه ماتبيهاش تحضر وحمدت ربي اللي جتها حسناء في هالوقت وسمعت منها الكلام هدا قبل لتجهز نفسها وتنزل وتخلي نزيهه تحطها في موقف سيئ🍃

هزت ربيعه راسها بصمت وهي تبلع في ريقها..

حسناء قالت..

/اخترتي شن بتلبسي!؟

ربيعه ابتسمت وقالت..

/لااني مش حاضرة..

حسناء:توقعتك..لااحضري وانتي متأنقه ومتألقه والله ياربيعه مافي وحده من اللي بيجوا خير منك في حاجه ..شدتها من يدها وقالت..تعالي معاي نختارلك شن تلبسي..

شدت ربيعه يد حسناء ووقفتها وهي تقول..

/مانادتنيش ياحسنا..

قعدت حسناء تشوفلها وهي مضايقه ومعصبه في نفس الوقت..

ربيعه وهي مبتسمه قالت..

/عارفتها اني دور في الفرصه بش تهيني وربي مايبيش يوصلها للي تبيه هدا علاش خلاني نعرف في اخر لحظه..

حسناء قعدت ساكته للحظات بعدين قالت..

/حتى اني مش حاضره خالتي ساده..

ربيعه:لاردي بالك انتي هكي بتعطي نريهه فرصتها فيك حتى انتي..اني ملاحظه عمتي مش عاجبها حالنا مع بعض واكثر من مرة كانت ترمي علينا في الكلام اكيد فهمتي عليها مانبيهاش تحطك حتى انتي في راسها ياحسناء..

حسناء:اخر همي..

قاطعتها ربيعه وقالت..

/لاياحسنا ماتخربيش ع روحك ع خاطر حد اني لو كنت مكانك مش حندخل بكل وبنقول مالي ومالها..

ابتسمت حسناء بحزن وقعدت ساكته..

ربيعه:بري سلم وخيتي بري اصلا اني عندي هلبه قرايه وعندي حصه مع سلامه كان فتتها مستحيل يعاودها هالمسم هدا..ضحكت..

وضحكت حسناء معاها بعدين قالت..

/باهي تجي معاي تختاريلي شن نلبس!؟

ربيعه قالت بضحكه..

/اني نختارلك انتي!؟

حسناء:ايه ذوقك حلو هلبه غير انتي ماتبيش تعترفي..شدتها من يدها وقالت..هي تعالي من غير اعتراض..

وخدتها معاها وطلعوا من الجناح وربيعه تضحك..

🌿وبعد ساعه..

هلوا ضيوف نزيهه استقبلتهم هي وفريحه وحمواتها ورفعتهم لصالون الضيوف وكانت حاطه قدام الباب مجيده ونبهت عليها كان ربيعه جت ماتخليهاش تخش..

وجت حسناء اللي ماكانتش طيق مجيده نهائي عطتها نظره متعاليه وخشت للصالون ومجيده تسب وتشتم فيها همسا..

🌵في نفس الوقت نزلت ربيعه بكتبها الدراسه لغرفه الدراسه

كانت فاضيه لان الصغار مازال ماروحوش من المدرسه..

قعمزت فيها وحطت كتبها ع الطاوله وبعد خدت نفس عميق وقالت..

"يامعين"

فتحت واحد من الكتب وبدت بالقرايه..

🍃في صالون الضيوف اللي كان مليان بضجة احاديث الحاضرات كانوا هانيه وتيسير قارنات الرووس وهما يحكوا عن..

🌱تيسير؛مرت خوك الشلافطيه وين؟

هانيه بإزدراء:نوزي مابتش تناديها..

تيسير:احسن مادارت شن بيقعمزها بيناتنا؟!

هانيه ابتسمت بتهكم..

تيسير:زعمه امك ماديرش قصه ولاخوك يحمق ع خاطرها؟

هانيه:الدوة صارت قدام ماما قالت نزيهه مش حناديها ماعلقتش اماتسعه مش حيعرف..

تيسير بفضول..

/كيف؟

هانيه بضحكه:بعدين نحكيلك..غيرت نظرها لكروسه بنت خوها بعدين قالت بضحكه..

/ياروحي ناضت..شوفيها توتي شوفي مش تهبل..

تيسير وهي تشوف لفداء قالت بإبتسامه..

/عسل الله يبارك عليها..صح فيها شبه منك غير عيونها فيهم تلوينه..

هانيه وهي تشوف لفداء بحب قالت..

/ايه..

تيسير قالت..

/كم عمرها؟

هانيه قالت..

/تقريبا سكرت اربعه شهور..

تيسير قالت بإبتسامه..

/بطول عمرها ياربي ونشوفوها عندك انتي وعمورة..

بلعت هانيه ريقها وهي تبتسم بعدين قالت..

/ان شاء الله..

🌿🌿🌿🌿🌿

وروحوا الصغار من المدرسه وتلقوهم برنيه وهنادي اهتموا بيهم وشافوا طلباتهم بعدين نزلوهم الكوجينه يتغدوا وبعد كملوا غداهم  معاذ وفاضل ركبوا للجناح بش يرقدوا اما سلامه وهشام واشرف ومعاهم كريمه واروى مشوا لحجرة الدراسه..

واول ماخشولها تفاجئوا بوجود ربيعه فيها..

"ماما"

التفتت ربيعه بعد سمعت نداء كريمه شافتهم ابتسمت وقالت..

/اهلا..

سلامه قال..

/طالبه مجتهده جايه قبل استاذها..

ربيعه قالت..

/بش تعرف بس..

ضحكوا بعدين قال هشام..

/علاش مش حاضرة عزومه امي؟

ابتسمت وقالت..

/ماعنديش خلوق وبعدين القرايه اهم..

هشام قعد يشوفلها بصمت وسلامه قعمز وحط كتاباته وهو مبتسم بأسف فهم اللي فهمه هشام..

ربيعه: اروشه كيري شن خديتوا اليوم ؟

اروى قالت..

/خديت جيم وحاء وخاء..

كريمه:اني عندي واجبات وتطبيق علوم..

هشام:بعد نكمل نقريك في العلوم اكتبي الواجب توا..

كريمه قالت..

/باهي..

ربيعه بعد ماكانت تشوفلهم بإبتسامه غيرت نظرها لأشرف وقالت..

/وانت ياهادي شن عندك؟

ابتسم اشرف وقال..

/واجب بس..

هزت ربيعه بعدين مررت نظرها عليهم وهي تشوف فيهم كيف قعمزوا حواليها وهي تقول في نفسها..

"والله التقعميزة معاكم خير من لمه القرمه والفخفخه الفاضية"

شافت لسلامه لما قاللها..

/جبتي ملخص النحو؟

ضيقت عيونها وقالت..

/نسيته في الجناح...تو نركب نجيبه بسرعه..

وناضت ومشت تجري طلعت من الحجره وسلامه وهشام يشوفولها بإبتسامه..

🌿وركبت ربيعه فوق عن طريق المصعد..

خشت لجناحها بدون ماتسكر الباب جابت الملخص بعدين ولت بتطلع لكن قبل لتوصل للباب وقفت في مكانها لما شافت حد خطم من قدام جناحها يجري..

قدمت بسرعه وقفت في الباب وبينت راسها بش تتعرف ع هوية الشخص اللي شافاته وتتفاجئ بقوة لما تلقاها بدريه اخت نزيهه لكن شد انتباهها حركه دارتها بدريه وهي تجري قعدت مركزه معاها لعند مااختفت من قدام عيونها..

🍃وصلت بدريه للشماعه القريبه من صالون الضيوف علقت عليها شنطتها بعدين ساوت شعرها..خدت نفس ومشت باتجاه باب الصالون..

بعد مرور لحظات مشت ربيعه للشماعه مررت نظرها ع الشناطي لعند ماطاحت في شنطة اخت نزيهه خدتها وفتحتها لما شافت اللي فيها حركت راسها يمين ويسار اسفا بعدين خدت اللي لقاته واللي كان قطعه من ملابس نزيهه..

وسكرت الشنطه وردتها في مكانها ومشت تجري ولحسن حظ ربيعه كانت هانيه طالعه من الصالون وشافتها وهي تجري..

🌿🌿🌿🌿🌿🌿

الساعه السادسه مساءا 

في جناح حسناء وخالتها..

🌱"معقوله!"

ربيعه قالت بأسف..

/والله زي مانحكيلك قسما بالله قاعده نرعش مع بعضي معقوله في خوت يكرهوا بعض لهالدرجه!

حسناء بإستياء..

/لاحول ولاقوة الا بالله..

ربيعه:صح مانطيقهاش لكن مستحيل نفكر نديرلها حاجه زي هادي اول شي بش مانخشش النار ع خاطر وحده نزيهه..

ضحكت حسناء..وربيعه متابعه تقول..

/تاني شي ع خاطر صغويرتها والله ع خاطرهم هما درت اللي درته..

حسناء قالت..

/لكن هي مفروض تعرف اللي داراته اختها؟

ربيعه بتهكم..

/بتعرفه مني اني!؟ ولابتصدق شهادتي ع اختها!؟ ع العموم اختها توا يعد تروح وماتلقاش اللي حطاته في شنطتها حتفهم ان في حد كشفها معاش تقدر دير شي..

حسناء وهي تفكر قالت..

/صح..

▪▪▪▪▪▪▪

"شني!؟"

هانيه:والله بعيوني ريتها يانزيهه..

نزيهه بصدمه..

/حي ياعليك فضيحه قدامهم حي كيف ندير

هانيه:ماديري شي توا كان كلمك حد وقالك في حاجه انخنبت مني كلميني واني نجي ونفضحوا الجربوعه هادي قدام ماما وتسعه بالك يفيق ع عمره ويتلفها..

نزيهه رفعت حاجبها وهي تفكر بعدين قالت..

/عندك حق..

هانيه؛المهم انتم افتحوا عيونكم وردوا بالكم شكلها هادي حنت لاصلها وبترجع لنشاط عيلتها وتاريخهم العريق في الخنبه..

نزيهه هزت راسها وفي نفسها تقول..

"جتني ع الطبطاب"

🌿وتعدي الأيام ومافيش حد كلم نزيهه ع شي حتى اختها بدريه معاش دارت عادتها المعتاده واتصلت بيها يش تعلق ع العزومه وطلع فيها العيوب وهالحاجه وقفت عندها نزيهه لكن مش هلبه المهم راحتها من استفزاز بدريه...

🍃ومع هالايام اللي تعدي..

زاد تعلق هانيه بفداء زي مازاد نفور فداء من امها مع امها طفله رضيعه لكن ربيعه ديما كانت تحس ان بنتها ماتبيهاش وياه ع الدمار اللي صابها لما بدت بنتها ترفض الرضاعه منها 

🍃"خيرك ياماما خيرك!"

تسعه بضيق:مافيها شي ياربيعه البنت معاش تبي الحليب الطبيعي في هلبه صغار زيها راهو..

ربيعه ببكاء..

/بنتي ماتحبنيش ياتسعه..

ضمها وقال بضحكه..

/غير شن تقولي ياربيعه بس ربي يهديك..والله طبيعي اللي فيه بنتك بري اسألي وتو تعرفي ان في صغار مارضعوش من امهاتهم من اول ماجابوهم..

سكتت عن الكلام وهي في حضنه لكن ماقدرتش تسكت عن البكي وفداء عند زهره في صالون الجناح وهي ترضع فيها حليب صناعي...

🍃🍃🍃🍃🍃

الساعه الثانيه بعد منتصف الليل..

في نفس الزاويه من القصر احدهم يجري في مكالمه هاتفيه..

=البنت مش متحمله امها ولانافره منها مافهمتش ..

"هدا عقاب ربي ليها الابليسه بنت الابليسه..باهي وشن تاني"

=ضرتها الكبير شدت وحده من جيرانهم زمان جابتها نهارتها تعول في العزومه وخلتها تجبد الخرينتي كله..

"ضرتها هادي بتوصلنا للي نبوه من غير مانتعبوا"

=حتى اني قلت هكي..

"ان شاء الله..شن مايصير معاها خبريني طول وخلي عيونك وودانك مفتوحات"

=حاضر عمتي..تصبحي ع خير..وسكرت السماعه بهدوء وهربت تجري...

🌿🌿🌿🌿🌿

تاني يوم الساعه الحاديه عشر صباحا..

في حجرة ارضيه لمصنع نزيهه..

كانوا موجودات هي وزكيه ومعاهم راضيه جارة ربيعه سابقا..

نزيهه تسأل فيها والمراة تجاوب..

🍃"اني والله ماريت حاجه سمعت اللي الناس سمعوه"

نزيهه:انتي يومها قلتي شفتي بعينك..

راضيه بتوتر قالت..

/اللي قتلك شفته ان صلاح كان يتبع فيها لما تطلع ولما تروح..

نزيهه:مش هدا بس اللي ريتيه..

تنهدت راضيه بضيق وقالت..

/مرة سمعناه يدق عليها الباب في الليل ويقوللها افتحي..

نزيهه شافت لعزوزتها وهي تأشر بعيونها ع راضيه..

زكيه وهي مضايقه ومعصبه قالت..

/باهي حق اللي يقولوا انها كانت معاه قبل ليموت..

راضيه:سمعت بالحاجه هادي لكن مانعرفش كان حق ولا كذب يالللا والله مانعرف..

زكيه تأفف بضيق بعدين قالت..

/الدوة اللي صارت بينا هني كان طلعت تحملي اللي يجيك..

المراة قالت بخوف..

/لا يااللا والله ماتطلع مني حاجه..

نزيهه:باهي بري...

مشت المراة بسرعه وهي خايفه..لما تباعدت زكيه شافت لنزيهه وقالت..

/اخر مرة تفتحي قدامي الموضوع هدا..

نزيهه قالت..

/لاخلاص اللي عليا درته ياعمتي..

مشت زكيه ونزيهه طلعت وراها وهي مبتسمه بنصر..

🌿🌿🌿🌿🌿

"كيف!؟"

معمر بضيق..

/اللي سمعتيه يام..

امه خبطت بإيديها ع وجهها وقالت..

/ياحليلي!

بوه قال بضيق..

/باهي مافيش علاج!؟

معمر قال..

/مافيش امل يابوي..

امه بدت تبكي وهي تقول..

/علاش ياربي علاش!

راجلها قال بعصبيه..

/استغفري ربك يامراة هدا امر الله لااعتراض عليه..

ام معمر قدمت لولدها وضماته وهي تبكي وهو يحضن فيها ويبوس ع راسها..

▪▪▪▪▪▪▪▪▪

"كله مني حطيت روحك في هالموقف بسببي سامحني يامعمر بالله عليك"

معمر وهو حاضنها قال..

/ماليك دخل بشي ياهانيه اني هكي نبي حبيبتي نبيك انتي ومانبي شي من الدنيا غيرك.

هانيه وهي تبكي قالت..

/نحبك هلبه..

هو بإبتسامه حب قال..

/واني نموت فيك ياعمري...

🌿وماتصدق هانيه يطلع نهار تاني يوم وتمشي لأمها منهارة وتبكي وتشكي وامها ع طول تعطيها حبة المسكن لأوجاعها فداء..

ويزيد الوضع يتطور بعدين وتبدا هانيه تروح بفداء تقعد معاها يومين تلاثه وحب هانيه لفداء ينتقل لمعمر اللي بدي يتعلق بيها حتى هو وغرقها بالهدايا والألعاب حتى انهم رفعوها معاهم لحوش العيله وبوه وامه وخواته وخوته بدوا يحبوا فداء زيهم ماعدا عاطفه اللي زادت قهرها حال اهل راجلها مع سلفتها بعد ماكبرت مكانتها في قلوبهم لأنهم يشوفوا فيها المراة الاصيله اللي صبرت ع وضع ولدهم ورضت تكمل معاه..

🍃زي مارضت ربيعه ببعد بنتها عنها شافت ان هكي اريح لبنتها لأنها مش متقبلتها وماتهداش ولاترتاح الا لما تكون عند عمتها..

♤هدا حرمان جديد عاشاته امي..اقسى انواع الحرمان..المشكله انها بعدين حملت نفسها الذنب قالت لو كنت ام حنونه راهو بنتي حبتني وماجافتنيش من وهي طفله رضيعه وناسيه تماما تعلق باقي خوتي وخواتي بيها بالذات البنات يعشقوا امي مش بس يحبوها لكن مع الاسف حبهم ليها مايقدرش يغنيها عن حب بنتها اللي من لحمها ودمها...

🌿وجي يوم ولاده فريحة وفاطمه لكن هالمرة ماولدوش في نفس الساعه..

فريحه جابت هدى الفجر وفاطمه جابت محبوبه بعد صلاة المغرب..

واتفقوا يديروا اسبوع الزوز مع بعض في نفس القصر زي ماصار مع سلامه وكريم..

🌿سلامه وكريم..

اليوم ولوا الطلاب للمدارس بعد نهايه عطلة نص السنه وفي هاليوم حتعطي المدرسه صحايف الفترة الاولى..

ولأول مرة يكون سلامه متوتر وهو يراجي فيهم مش لأنه خايف يخسر الترتيب اللي تعود يحصل عليه خوفه كان من حاجه تانيه..

🌱"هرر..صقع سم"

سلامه وهو ملتم وجهه بالشال قال بصوت مكتوم..

/تي اسكت جمدت عمي الزفت..

كريم قال بضحكه..

/انت بتجمد من الخوف..

رفع سلامه يده المغطيه بالقفاز وخبط بيها قفا كريم وكريم يضحك..

ويفوتوا من قدامهم البنات اللي كانت في مقدمتهم عزة اللي كانت غامه روحها غمه باهيه من الصقع مش باين منها غير عيونها اللي تشقلبوا لما شافوا سلامه..

بدت ع وجه سلامه ملامح الازدراء وكريم يضحك عليه..

سلامه قال..

/ربي يشفي..غير نظره عنها جو عيونه في عيون هشام اللي كان واقف مع صحابه لقاه يغمزله ويأشر براسه ع عزة..

سلامه:خيره المريض التاني!

وكريم جنبه ميت بالضحك...

🍀وداروا الطابور بسرعه بسبب بروده الجو بعدين ركبوهم للفصول..

وتعدي الحصص لعند ماجت الاخيره..حصة اللغة العربيه وتخش الابله بالصحايف.. 🌱الابله وهي مبتسمه قالت..

/جيتكم جيتكم بسفر الكعك جيتكم..

وحده من الطالبات قالت..

/بالله ياابله ماترعشيناش..

قالت:لانرعشكم لاترعشوني كل واحد بيحصد اللي زرعه..هيا توا خل نبدوا نوزعوهم هي..

..وبدت الابله توزع فيهم عليهم منهم الراسب ومنهم الناجح بس الغالبيه كانوا ناجحين..

الابله قالت..

/وتوا مع الحماس والتشويق..نبدوا من الاول ولامن التاني والامن الثالت والرابع والخامس..نبدوا من الاول ولامن الخامس؟

اغلبهم قالوا بأصوات متقطعه..

"الاول"

وهي قالت..

/حتى اني نقول هكي..وزعت نظرها عليهم بإبتسامه وقالت..ولأول مرة تصير ع مستوى المدرسه زوز يجيبوا الترتيب الاول..

الانظار توجهت لسلامه وعزة..

ضحكت الابله وقالت..

/الترتيب الاول وبمجموع كامل سلامه تسعه بيت المال..

صفقوا الولاد بالذات كريم اللي قريب ايديه ذابوا من التصفيق..

الابله بضحكه قالت..

/خلاص خلاص..خل نسموا الاول مكرر هي..شافت للصحيفه وقالت..الترتيب الاول مكرر..عزة عبد السلام الشيباني..

البنات صاحوا وصفقوا وعزة كانت بطير من الفرحه..

الابله وهي تضحك قالت..

/نقصاتك درجه وتسكري المجموع درجه بس..

هني التفت سلامه لعزة وقعد يرقص في حواجبه بإستفزاز 

الابله والطلبه اللي شافوه قعدوا يضحكوا اما عزة اللي انغاضت قالت..

/تو ناخدها منه الفترة تانيه..

ضحك ضحكة سخريه خلت الفصل كله يضحك بالابله وعزه قريب تنفجر من الغيظ..

🍃وبعد مارن جرس المرواح طلعوا الطلبه وعزة كانت ناويه سلامه..

لكن لما طلعت من الفصل وهي لاحقاته لقاته واقف مع خوته وكل مرة يحضن واحد فيهم واللي ينكشه شعره واللي يضربه ع قفاه بعدين خداهم كلهم وكريم معاهم ومشوا مع بعض..

"كلهم خوته الاشقر يقرا رابع والاسمر الخامس وهشام تعرفيه"

عزة شافت لوداد وقالت بإبتسامه حزن..

/ياريت كانوا عندي خوت وخوات..

ابتسمت وداد بتعاطف بعدين تعنقت ذراعها ومشوا مع بعض..

🌿🌿

وتنجح كريمه هالمرة الترتيب الخامس واول ماروحت للحوش خشت بصحفيتها تجري لربيعه اللي كانت مقعمزه نساوين العيله في الصالون..

"ماما ماما نجحت الخامس ماما"

ربيعه بفرح ناضتلها وطبست عليها وضمتها وهي تقول..

/برافو عليك حبيبتي برافو

وهدا كان ع عيون نزيهه اللي وجهها ولى في لون تاني من الموقف.

وقفت ربيعه ع حيلها وخدت الصحيفه منها شافت درجاتها وقالت..

/ماشاء الله تبارك الله..ومشت بالصحيفه لعزوزتها..

خدتها زكيه وشافت للدرجات وهي تقول بإبتسامه..

/مبارك ع بنيتي الشاطره مبارك..خودي بنتي صحيفتك ووريها لماما..

التفتت كريمه لأمها وقالت بحزن..

/ماما تفرح بالاول بس..

نزيهه:ايوه مانبيش غير الاول..

نظرات الاستياء توجهت لنزيهه من الجميع ماعدا ربيعه اللي قالت لكريمه..

/وريها لبابا من بكري في مكتبه يراجي..

مدت زكيه الصحيفه لكريمه وهي تقول بإبتسامة لطف..

/بري لبابا..

خدت كريمه الصحيفه وطلعت تجري وهي فرحانه..

ويخشوا خوتهم..

سلامه طول مشي لنزيهه باس راسها وقال..

/الاول ياالأول انت..

ضحكوا ونزيهه ضماته وقالت..

/هدا ولدي..

معاذ قالت..

/حتى حني امي جبنا الاوائل..

فريحه قالت بإبتسامه..

/سلمهم ياربي سلمهم..

نزيهه شافتلهم بعد تباعد عنها سلامه وقالت بإبتسامه.

/هادم صغاري..

ربيعه وهي مبتسمه قالت..

/مبروك عليكم..مبروك تيتشر..

جاها سلامه وباس راسها بعدين قال..

/الله يبارك فيك

ربيعه قربت من وذنه وقالت..

/شن صار في يزة؟

سمعها هشام وقال..

/الاول مكرر

ربيعه بضحكه..

/صحه ليها..

سلامه:صار هكي ياسبرينجه!!.مالا دوري من يقريك..ومشي طلع من حداهم وخلا ربيعه والولاد يضحكوا عليه..

بلقيس وهي تضحك..

/ضحكونا معاكم!؟

وحكالهم هشام قصة عزة مع سلامه كلهم كانوا يسمعوا وهما يضحكوا ماعدا نزيهه اللي كانت تشوف لربيعه بنظرات مخيفه...

🌿🌿🌿🌿

ويجي يوم حفله اسبوع هدى ومحبوبه كان يوم جميل ع الجميع ماعدا ربيعه وهي تشوف في بنتها كيف لاصقه في عمتها وماتبيش تشوفلها نهائي..

فداء اللي ولى عمرها تسعه شهور تعلقت بهانيه هلبه وين تخليها هانيه ماتبطلش عياط ومستحيل تسكت عند امها وبصعوبه زهرة تهديها وترقدها ومن وجع قلب ربيعه ع بنتها استسلمت للأمر الواقع وخلتها مع هانيه وماولتش تشوف فيها الا في اخر الاسبوع..

🍃"تعودت ياتسعه تعودت ع الحرمان من كل شي نحبه ونتمناه غير ان شاء الله يكون امتحان من ربي ومش غضب هدا مانبي"

تسعه وهو حاضنها قال..

/ماتقوليش هكي ياربيعه ماتعرفيش ربك شن داسلك القدام وصدقيني فداء مش كارهاتك فداء تعلقت بعمتها اللي انتي جبرتي بخاطرها وبإذن الله حيكافئك مكافأة عظيمه ع هالعمل الصالح..

ربيعه قالت بألم..

/خايفه ياتسعه خايفه العيل اللي نجيبه يكرهني..

تسعه قال بضيق..

/ربي يهديك ياربيعه..ربي يهديك..

شدت فيه وقعدت تبكي بألم وهو زاد ضمها وبدي يقرالها في القرآن...

🌿🌿🌿🌿🌿

ومازالت تمضي الايام..

وتتزوج نبيهه من خال معمر وتطلع من القصر باحتفال عائلي حلو وتودعها حسناء بالدموع ودعوات خير طالعه من القلب..

..وتستمر الأيام في مضيها..

وربيعه مكرسه اغلب وقتها للدراسه كانت تهرب بيها من اوجاعها وتهرب لعالم الصغار من عالم الكبار  الكالح السواد..

الكبار اللي مايبوش يخلوها في حالها مع انها كانت كافيه خيرها شرها وبعيده عن الجميع...

🍃"شهر!؟"

تسعه:ايه..شغل ضروري اللي بيخليني نغيب شهر ومعاي حسناء والله لولا قرايتك رفعتك معاي..

قالت ربيعه بضحكه..

/قول لولا العدل..

ضحك بعدين قال..

/في حال تبي تمشي تغيري جوك عند عصمت بري تبي صاحباتك يجوك هني قوليلهم تعالوا وماتعدلي ع حد القصر هدا ليك فيه زي غيرك فاهمه؟

ربيعه وهي مبتسمه بحب قالت..

/ربي مايحرمني منك يااغلى ماعندي في هالدنيا..

ضمها وقال بإبتسامه..

/حتى انتي غاليه هلبه ياربيعه هلبه..

ابتسمت بألم وفي قلبها خوف من اللي بيصير في غيابه..

🌿ويسافر تسعه تاني يوم بعد ماوصى امه ع الجميع وشدد في توصيته ع ربيعه ومع ذلك سافر وقلبه مش مطمن زي قلب حسناء بالزبط..

🍃ويصادف سفر تسعه وصول خبر وفاة احد اقارب عصمت في تركيا وكانت مجبورة تسافر بش تأدي واجب العزاء..

وقبل سفرها عدت ع القصر بش تسلم ع ربيعه

"خودي المفتاح يامراة قتلك"

شافت ربيعه للمفتاح وهي تبكي بعدين قالت..

/ماطوليش بالله عليك..

ضمتها عصمت ودموعها ينزلوا بعدين سيبتها ومشت بسرعه وقبل لتطلع كانت متمنيه لو لقت زكيه موجوده بش توصيها عليها لكن زكيه يومها مشت تزور في بنتها هانيه...

♧وقعدت عمتي ربيعه بروحها تماما في مواجهة ماداساته الايام الجايه من احداث كانت مجهوله هداكا الوقت بالنسبه ليها..وقلبها يدعي في كل وقت "ان شاء الله ماهناك كان الخير"